نامَه وَ کِلیسِی روم 12
12
قُربونیِ زِندَه
1پَ ای کَکایَل، وَ خاطرِ رَحمَتَلِ خدا، وَتون تمنا دارُم که بَیَنَلِ خِتونَه مِی قُربونیِ زِندَه، مقدّس وِ بابِدلِ خدا تقدیم کِنیت که عبادتِ روحانیِ ایشا هَم یِنِه. 2وَ رنگِ ای دنیا نَوابِیت، بلکم بِی تازَه وابییَنِ فکرِتون عوض وابِیت، اوسِه ایتَریت ارادۀ خدا نَه بِفَمیت؛ ارادۀ خوب، بابِدل وِ کاملِ خدا نَه.
3سییِکِه وَ واسطۀ فیضی که وَم عطا وابییِه، وَ هر کویَکی وَ ایشا ایگُم که خِتونَه بیشتَرَ اوچیئی که هِسیت وَ حساب نَیاریت، بلکم هر کویَکی قَدِ ایمونی که خدا وَتون دایِه، دِرُس قضاوت کِنیت. 4سییِکِه هَموطو که هر کویَکی وَ ایما یِه بَیَن داریم که اَعضِی زیادی دارِه وِ کارِ تَمومِ ای اعضا نَه مِی یَکِه 5پَ ایما هَم بِی یِکِه زیادیم، مِنِه مسیح یِه بَیَنیم وِ هر کویَکیمون تَک وَ تَک، اَعضِی یَکیم. 6پَ وَ وُچِه که وَ طبقِ فیضی که وَمون بَخشییَه وابییِه، عطایَلِ جورواجوری داریم، هَر کویَکیمون بایِس اونگَلَه وَ کار بویَریم: اَر نبوَتِه، وِه نَه قَدِ ایمونِش وَ کار بِگِرِه؛ 7اَر خذمتِه، خذمت کِنِه؛ اَر تعلیمِه، تعلیم بییِه؛ 8اَر تشویقِه، تشویق کِنِه؛ اَر کِمَکِه، بِی دَسِدلوازی کِمَک کِنِه؛ اَر رهبری یَه، بِی دلوُجون ای کارَ کِنِه؛ وِ اَر مَرحمَت وَ مردِمِه، بِی شایی ای کارَ کِنِه.
نِشونهیَلِ مسیحیِ واقعی
9محبت بایِس واقعی بو. وَ گَندی بَدِتون بیا وَ اوچیئی که خوبِه، سِفت بِچَسبیت. 10بِی محبتِ کَکاگَری یَکَه دوس داشتَه بِیت. مِنِه حرمت نَهایَن وَ یَک، بِزَنیت نِهِی یَک. 11هیچ وخت غیرت ایشا سی خدا نَخُوسِه؛ مِنِه روح مِی تَش اَلُو بِگِریت، خداوندَ خذمت کِنیت. 12مِنِه امید شایَمون، مِنِه مصیبَتَل صبور وِ مِنِه دعا پاوَرجا بِیت. 13مِنِه بَرطرف کِردَنِ اِتیاجَلِ ایموندارَلِ وَ مسیح شریک وابِیت وِ خَشمِمون بِیت.
14برکت بِئیت وَ اونگَلی که وَتون آزار اییِن؛ برکت بِئیت وِ اونگَلَه نُرفین نَکِنیت. 15بِی کَسَلی که شایَمونِن، شایی کِنیت، وِ بِی کَسَلی که ایگِریوِن، بِگِریویت. 16بِی یَک مدارا کِنیت. غُد نَبِیت، بلکم بِی کَسَلی که ضعیفِن، اومَدِ رفت کِنیت. وَتَه خِتونَه دونا نَبینیت.
17وَ هیشکَه وَ عوضِ بَدی، بَدی نَکِنیت. بلکَم کاری نَه کِنیت که مِنِه نظرِ هَمَه حُرمت دارِه. 18اَر ایابو، تا وُچِه که وَ ایشا مربوطِه، بِی هَمَه مِنِه صلح وِ صفا زندِیی کِنیت. 19ای عَزیزَل، وَتَه خِتون تَقاص مَسونیت، بلکم وِه نَه بِئیت وَ دَسِ غضبِ خدا، سییِکِه مِنِه کتابِ تورات نوشتَه وابییِه که «خداوند ایگُ: "تَقاص این مِنِه؛ مِنُم که سِزا اییُم."» 20واریش، «اَر دشمَنِت گُسنَه یَه، وَش غذا بییِه، اَر تشنَه یَه، چیئی وَش بییِه تا بِخَرِه؛ سییِکِه بِی ای کار طوری خجالَتِش ایئی که اِنگار خرُنگَلِ تَشَه اینی وَ ری سرِش.» 21بَدی وَت زور وانَبو، بلکم بِی خوبی وَ بَدی زور وابو.
Currently Selected:
نامَه وَ کِلیسِی روم 12: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
