نامَه وَ کِلیسِی روم 16
16
سلام و درود
1سفارشِ دَیَمون «فیبی» نَه وَتون ایکِنُم. وِّ خادِمِ کلیسِی شهرِ کِنخریَه یَه. 2تا وِّ نَه مِنِه خداوند، هَموطو که لایقِ ایموندارَلِه، قبول کِنیت وِ مِنِه هَر چیئی که وَتون اِتیاج دارِه کِمکَش کِنیت، سییِکِه وُّ ویردارِ خُوم وِ خیلییَلِ دَ بییِه.
3وَ «پریسکیلا» وِ «آکیلا»، هُمکارَلُم مِنِه مسیح عیسی، سلام بِرَسونیت. 4اونگَل جونِ خِشونَه سی مِ وِردان مِنِه خطر، وِ نَه تِنا مو، بلکم تَمومِ کلیسایَلِ غیرِیَهودییَل هَم وَشون ممنونِن. 5هَمیطو وَ کِلیسِی که مِنِه حونَشون بِی یَک جَم ایابون، سلام بِرَسونیت. وَ رَفیقِ عزیزُم «اِپینِتوس» سلام بِرَسونیت، که اَوَلین کَسی بی که مِنِه دیارِ آسیا وَ مسیح ایمون آوُرد. 6وَ مریمِ سلام بِرَسونیت که سیتون سخت زحمت کَشییِه. 7وَ خیشَلُم، «آندرُونیکوس» وِ «یونیا» سلام بِرَسونیت، که بام مِنِه زندان بییِن. اونگَل مابینِ رسولَل، شناختَه وابییَه یَن، وِ نِهِی مِ مسیحی بییِنِه. 8وَ رِفیقِ عزیزُم مِنِه خداوند «آمپلیاتوس» سلام بِرَسونیت. 9وَ «اوربانوس» هُمکارِمون مِنِه مسیح، وِ «اِستاخیسِ» عزیزُم سلام بِرَسونیت. 10وَ «آپِلِس» سلام بِرَسونیت، که امتحانِ خِشَه مِنِه مسیح پَس دایِه. وَ تَمومِ اَهلِاَیالِ «آریستوبولُس» سلام بِرَسونیت. 11وَ خیشُم «هیرودیون» سلام بِرَسونیت. وَ اونگَلی وَ اَهلِاَیالِ «نارکیسوس» سلام بِرَسونیت، که مِنِه خداوَندِن. 12وَ «تریفینا» وِ «تریفوسا» سلام بِرَسونیت، اونگَل که مِنِه خداوند زحمت ایکَشِن. وَ «پِرسیس» عزیزُم سلام بِرَسونیت، که مِنِه خداوند یِکِلی زحمت کَشییِه. 13وَ «روفُس» سلام بِرَسونیت، که مِنِه خداوند بَرگزیدَه یَه، وُ وَ دِیش که سی مِ هَم مِی دِی بییِه. 14وَ «آسینکریتوس»، «فلیگون»، «هِرمِس»، «پاتروباس» وِ «هِرماس» وِ کَکایَلی که باشونِن، سلام بِرَسونیت. 15وَ «فیلولوگوس»، «یولیا»، «نیریاس» وِ دَیَش، وُ وَ «اولیمپاس» وِ تَمومِ ایموندارَلی که باشونِن، سلام بِرَسونیت. 16بِی بوسِ مقدس وَ یَک سلام کِنیت. تَمومِ کلیسایَلِ مسیح وَتون سلام ایرَسونِن.
سفارِشَلِ آخِر
17ایسو، ای کَکایَل، وَتون تمنا ایکِنُم حَواسِتون وَ کَسَلی بو که باعثِ جیایی یَن وِ بَرد وِراییِن مِنِه رَتون وُ وَ ضدِ تعلیمی یَن که ایشا گِرُتیتِه؛ وَ اونگَل دیری کِنیت. 18سییِکِه ای آیَمَل، خداوندِ ایما مسیحَ خذمت نیکِنِن، بلکم وَ دینِ کِمِ خِشونِن وِ بِی گَپَلی نرم وِ چربزُوونی دلِ آیَمَلِ سادَه نَه گول ایزَنِن. 19سییِکِه اطاعت ایشا سی هَمَه شناختَه وابییَه یَه؛ طوری که مِ وَ خاطرِ ایشا شایَمونُم. امّا وَتون ایخوام مِنِه خوبی دونا، وِ مِنِه بَدی، سادَه بِیت.
20خِدِی صلحوُسلامتی وَ هَمی زیئی شیطونَه زِرِ پایَلِتون لَه ایکِنِه.
فیضِ خداوندِ ایما عیسی مسیح بِی ایشا بو.
21هُمکارُم «تیموتائوس» وَتون سلام ایرَسونِه؛ خیشَلُم «لوکیوس» وِ «یاسون» وِ «سوسیپاتِر» هَم وَتون سلام ایرَسونِن.
22مو، «تِرتیوس»، که ای نامَه نَه نِوشتُم، مِنِه خداوند وَتون سلام ایکِنُم.
23«گایوس» که مِ وِ تمومِ کِلیسا مِمونِشیم، وَتون سلام ایرَسونِه.
«اِراستوس» که خزانَه دارِ شَهرِه، وِ کَکامون «کوآرتوس» وَتون سلام ایرَسونِن.
24[«فیضِ خداوندِ ایما عیسی مسیح بِی تَمومِ ایشا بو. آمین».]
25ایسو جلال وَ وِّ که ایتَرِه طبقِ انجیلِ مو وِ موعظۀ عیسی مسیح، ایشا نَه تقویت کِنِه، یعنی طبقِ آشکار وابییَنِ سِرّی که وَ دورهیَلِ دیرِدِرازی پَنون وابییَه بی، 26وِ ایسو طبقِ نوشتهیَلِ پیغَمبَرَل آشکار وابییِه وُ وَ حُکمِ خِدِی ابدی، وَ تَمومِ مِلَتَلِ دنیا آشکار وابییِه تا اونگَل ایمون بیارِن وِ اطاعت کِنِن- 27وَ وِّ که تِنا خِدِی دونایَه، وَ واسطۀ عیسی مسیح تا وَ ابد جلال بو! آمین.
Currently Selected:
نامَه وَ کِلیسِی روم 16: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company