نامَه وَ کِلیسِی روم 5
5
صلح بِی خدا وَ رَه ایمون
1پَ سییِکِه وَ رَه ایمون صالح وَ حساب اومِیمِه، وَ واسطۀ خداوَندِمون عیسی مسیح بِی خدا مِنِه صُلحیم. 2ایما وَ وسیلۀ وُّ، وُ وَ رَه ایمون، وَ ای فیضی که ایسِه مِنِشیم، دَس جُسیمِه، وُ مِنِه اِمیدِ جلالِ خدا شایی ایکِنیم. 3نَه تِنا یو، بلکم مِنِه عذابَل هَم شایی ایکِنیم، سییِکِه دونیم که عذابَل طاقَت وَ بار ایارِه 4وِ طاقَت، شخصیت وَ بار ایارِه، وِ شخصیت امید وَ بار ایارِه؛ 5وِ امید ایما نَه خجالَت زَیَه نیکِنِه، سییِکِه محبتِ خدا وَ وسیلۀ روحالقدس که وَ ایما عطا وابی، رِتَه وابییِه مِنِه دِلِمون.
6سییِکِه موقِی که ایما هَنی دَرمُندَه بیئیم، مسیح مِنِه وَختِ دِرِسِش جونِشَه دا سی بیدینَل. 7سییِکِه کَمتر ایابو که کسی جونِ خِشَه سی آیَمِ صالحی بییِه - هَرچَن ایابو کسی زَلَه کِنِه که جونِ خِشَه سی آیَمِ خوبی بییِه - 8امّا خدا محبتِ خِشَه وَ ایما ایطو نِشون دا، که وختی ایما هَنی گِناکار بیئیم، مسیح سی ایما مُرد. 9پَ، ایسِه که ایما وَ خاطرِ خینِ وُّ صالح وَ حساب اومِیمِه، چِقَه بیشتَر وَ واسطۀ وُّ وَ غضبِ خدا نجات ایجوریم. 10سییِکِه اَر موقِی که بِی خدا دشمن بیئیم، وَ واسطۀ مرگِ کِرِش ایما نَه بِی خُوش صلح دا، چِقَه بیشتَر ایسِه که باش مِنِه صُلحیم، وَ وسیلۀ حیاتِ وُّ نجات ایجوریم. 11نَه تِنا یو، بلکم ایما که وَ واسطۀ خداوَندِمون عیسی مسیح، صلحِ بِی خدا نَصیبِمون وابییِه، مِنِه خدا هَم شایی ایکِنیم.
مرگ وَ واسطۀ آدم، حیات وَ واسطۀ مسیح
12پَ، هَموطو که گِنا وَ واسطۀ یِه آیَم اومَه وَ جهان، وِ مرگ وَ واسطۀ گِنا اومَه، وَ ای ترتیب، مرگ دامنِ تَمومِ آیَمَلَه گِرُت، سییِکِه هَمَه گِنا کِردِن 13سییِکِه وَراسی نِهِی یِکِه شریعت دایَه وابو، گِنا مِنِه جهان بی، امّا جِیی که شریعتی نَبو، گِنا وَ حساب نیا. 14وا ای حال، وَ آدم تا موسی، مرگ وَ هَمَه حاکم بی، حتی وَ کَسَلی که گِناشون مِی نافِرمونی آدم نَبی. آدم، نمونۀ کسی بی که ایبایِس بیایِه.
15امّا پیشکِش نَه مِی گِنایَه. سییِکِه اَر وَ واسطۀ گِناهِ یِه آیَم خیلییَل مُردِن، چِقَه بیشتَر فیضِ خدا وِ پیشکِشی که وَ واسطۀ فیضِ او یِه آیَم، یعنی عیسی مسیح آمایَه وابی، وَ فَراوونی نَصیبِ خیلییَل وابی. 16وِ ای پیشکِش، مِی نتیجۀ گِنِی او یِه آیَم نی. سییِکِه داوری وَ دینِ یِه گِنا محکومیت آوُرد؛ امّا پیشکِش وَ دینِ یِکِلی گِنا اومَه وِ صالح وَ حساب اومَیَنَه بِی خِش آوُرد. 17سییِکِه اَر وَ واسطۀ گِناهِ یِه آیَم، مرگ وَ طریقِ او آیَم سلطنت کِه، چِقَه بیشتَر اونگَل که فیضِ بیحَدِحسابِ خدا وِ پیشکِشِ صالحی نَه ایگِرِن، وَ خاطرِ او آیَم، یعنی عیسی مسیح، مِنِه حیات سلطَنَت ایکِنِن.
18پَ هَموطو که یِه گِنا باعثِ محکومیتِ تَمومِ آیَمَل وابی، یِه عملِ صالح هَم باعثِ صالح وَ حساب اومَیَن وِ حیاتِ تَمومِ آیَمَل ایابو. 19سییِکِه هَموطو که وَ واسطۀ نافِرمونیِ یِه آیَم، خیلییَل گِناکار وابییِن، وَ واسطۀ اطاعتِ یِه آیَم هَم خیلییَل صالح ایابون.
20ایسو، شریعت اومَه تا گِنا زیاد وابو؛ امّا جِیئی که گِنا زیاد وابی، فیض بیحَدِحساب زیادتَر وابی. 21تا هَموطو که گِنا مِنِه مرگ سلطنت کِه، فیض هَم وَ واسطۀ صالحی که وَ حیاتِ ابدی ایرَسِه سلطنت ایکِنِه، وَ واسطۀ خداوندِمون عیسی مسیح.
Currently Selected:
نامَه وَ کِلیسِی روم 5: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
