لوقا 24
24
عیسانینگ دئرّیلمَکی
1آروادلار هفته‌نینگ اَوّلکی گؤنونده، یئر آچیلاندا، عَطرلی یاغ‌لاری کی آماده ائدمیشلَر ایدی گؤتوردولَر و مَقبره یانینا گئتدیلَر. 2اوللار گؤردولَر کی مَقبره آغیزی دَمینده‌کی داش، بیر قیراقا ایته‌له‌نمیش، 3آما مَقبره‌نینگ ایچینه گئدَنده، رَب عیسانینگ جنازه‌سینی بولمادیلار. 4آروادلار حلی بو ایشدَن حیران ایدیلار کی بیردَن ایکّی کیشی کی رَختلَری آغ-آپاقی ایدی، اوللار یانینا توردولار. 5ائله او حالدا کی آروادلار چوخ قورخموشلاردی و باشلارینی آشاغی آتمیشلاردی، او ایکّی کیشی اوللارا دئدیلَر: «نه ایچی دئرّی‌یی اؤلولَر آراسیندا گَزیرَینز؟ 6او بوردا ده‌ییل، بلکی دئرّیلمیش. یادینزا گتیرینز، اوندا کی حلی جَلیل ولایتینده ایدی سیزه نه دئدی. 7دئدی کی انسان اوغلو گُناهکار آداملار اَلینه وئریله‌سی، صَلیبه چَکیلَسی و اؤچونجو گؤنده دئرّیله‌سی.» 8اوندا آروادلار عیسانینگ سؤزلَرینی یادا گتیردیلَر 9و مَقبره‌دَن گئری دؤننده، واری زادی او، اون بیر شاگرده و قالان‌لارینگ واریسینا دئدیلَر. 10او آروادلار کی بو زادلاری حَواری‌لارا خَبر وئردیلَر، بوللار ایدیلَر؛ مَجدللی مریم، یوآنّا، یَعقوب آناسی مریم و بیر پارا داها آرواد کی اوللار اینان ایدیلار. 11آما حَواری‌لار گمان ائدیرلَردی کی آروادلار پرت و پلا دئییرلر و آروادلارینگ سؤزلَرینی اینانمادیلار. 12آما پِطرُس توردو آیاقی و مَقبره‌یه ساری قاچدی؛ اگیلدی و مَقبره‌نینگ ایچینه باخدی، آما دولالی کتان کَفن‌دان آیری، بیر زاد گؤرمه‌دی. پس بو تَفاق‌دان حیران، ائوه گئری دؤندو.
عِمائوس یولوندا
13ائله او گؤنده، شاگردلَرینگ ایکّی‌سی، بیر عِمائوس آدلی کَنده کی ایکّی آغاج اورشلیم شَهریندن ایراق ایدی گئدیرلَردی. 14اوللار بیر بیر اینَن واری بو دؤشَن تَفاق‌لارینگ باره‌سینده دانیشیرلاردی. 15ائله بیر بیر اینَن دانیشان حالدا عیسانینگ اؤزو یاخین اولدو و اوللارا قوشولدو. 16آما تارئ قؤیمادی کی اوللار عیسایی گؤره-گؤره، اؤنو تانیالّار. 17عیسا اوللاردان خَبر آلدی: «یولدا نَمنه‌دَن بیر بیر اینان دانیشیراینز؟» اوللار توردولار. غُصّه و ناراحت‌لیگ اوللارینگ ایزیندن آله‌یین ایدی. 18او ایکّی‌نینگ بیرسی کی آدی کلیوپاس ایدی عیسایا جواب وئردی: «آیا اورشلیم شَهرینه گلَن غَریب آداملارینگ آراسیندا، فقط سَنَینگ کی بو گؤنلَرده دؤشَن تَفاق‌لاردان خبر یوخونگ؟» 19عیسا خبر آلدی: «هانی تَفاق‌لار؟» اوللار جواب وئردیلَر: «ناصِره‌لی عیسا باشینا گلَن تَفاق‌لار. او بیر کیشی ایدی کی گپده و رووآل‌دا، هم تارئ یانیندا و هم دا بوتون خَلخ یانیندا بیر قُدرتلی پیغمبر ایدی، 20آما بیزیم باش کاهِن‌لَریمیز و باشی بویوک‌لَریمیز، اؤنو تَسلیم ائدیلَر تا اؤلومه محکوم اولا و صَلیبه چَکیله. 21بیز امیدلی‌دیک کی بو ائله او تارئ خَلخینی قورتاران آدام دیر. هم‌ده، ایندی اؤچونجو گؤن دور کی بو تَفاق‌لار دؤشموش. 22بوللارینگ واریسیندان برگذر، بیزیم آرامیزداکی آروادلارینگ بیر پاراسی بیزی حیرته سالدیلار. اوللار، سَحر یئر آچیلاندا مَقبره یانینا گئتدیلَر، 23آما جنازه‌یی بولا بیلمئیَنده دؤندولَر و دئییرلَردی کی حتّی فرشته‌لَری رویادا گؤرموشلَر کی اوللارا دئمیشلَر کی عیسا دئرّیدیر. 24بیزدَن بیر پارا آدام مَقبره یانینا گئتدیلَر و واری زادی ائله او طور کی آروادلار دئمیشلَر ایدی گؤردولَر، آما عیسایی گؤرمه‌دیلَر.» 25اوندا عیسا اوللارا دئدی: «ای نافَهم‌لَر؛ ای سیز کی اؤره‌کینز گئج آنگلیر کی پیغمبرلَرینگ سؤزلَرینه ایناناسی. 26بئیه لازم ده‌ییلدی کی وَعده وئریلَن مَسیح اؤز شوکتینه ائتیشمَکدَن ایلَری بو زَجرلَری چَکه؟» 27پس موسا توراتیندان و واری پیغمبرلَر یازیلی‌لاریندان باشلادی و بوتون مُقدّس یازیلی‌لاردا، اؤز باره‌سینده یازیلان سؤزلَرینگ واریسینی اوللارا حالی ائدی. 28پس گئتدیگی‌لَری کَنده یاخین اولاندا، عیسا بیر رقم رووآل ائدی کی اینگار سئیر بیر ایراق‌تر یئره گئده. 29آما اوللار عیسایا چوخ اِصرار ائدیلَر و دئدیلَر کی: «بیزیم یانیمیزدا قال، چونکی یاخین دیر گؤن باتا و گئجه اولیر.» پس عیسا اوللارینگ ائوینه گئتدی تا اوللار یانیندا قالا. 30اوللار اینان سُفره قیراقینا اوتوراندا، چؤره‌کی گؤتوردو، تارئ‌یی شُکر ائدی، چؤره‌کی تیکه‌له‌دی و اوللارا وئردی. 31اوندا اوللارینگ گؤزلَری آچیلدی و اؤنو تانیدیلار، آما عیسا اوللارینگ گؤزو دَمیندَن غِیب اولدو. 32اوللار بیر بیره دئدیلَر: «گؤردونگ کی یولدا بیزیم اینَن دانیشاندا و مُقدّس یازیلی‌لاری بیزه حالی ائدنده، نه‌یین اؤره‌کیمیز آلیشمیشدی یانیردی؟» 33ائله او ساعت اوللار توردولار آیاقی و اورشلیم شَهرینه گئری دؤندولَر. اؤردا گؤردولَر کی او اون بیر شاگرد، بئللَری اینن اولان آداملار اینان بیر یئره ییغیلمیش‌لَردی، 34و دئییرلَر کی: «رَب گرچَکدَن دئرّیلمیش و شَمعونا ظاهر اولموش.» 35اوندا او ایکّی آدام دا یولدا دؤشَن تَفاقلاری تعریف ائدیلَر و دئدیلَر کی نه‌یین عیسایی چؤره‌کی تیکه‌له‌مک موقعده تانیدیلار.
عیسا شاگردلَرینه ظاهر اولیر
36شاگردلَر حَلی بو زادلار بارسینده دانیشیرلاردی کی عیسانینگ اؤزو اوللارینگ آراسیندا توردو و اوللارا دئدی: «سیزه سلام اولسون!» 37آما اوللار دیگسیندیلَر و وحشت ائدیلَر و گمان ائدیرلَردی روح گؤرورلَر. 38عیسا اوللارا دئدی: «نه ایچی بئله پریشاناینز؟ نه ایچی اؤره‌کینزه شَک دؤشیر؟ 39اَل‌لَریمه و قیچ‌لَریمه باخینز، اؤزومَم، منه اَل وورونز و گؤرونز، چونکی روح، اَت و سوموک یوخو آما ائله اوله‌یین کی گؤرورَینز، من واریم.» 40بونو دئدی و اَل‌لَرینی و قیچ‌لَرینی اوللارا گؤرسَتدی. 41و ائله او حالدا کی اوللار خوشحال‌لیگدان و حیرانلیگدان بو زادلاری حَلی اینانا بیلمئیرلَردی، عیسا اوللارا دئدی: «بوردا یئمَک ایچی بیر زاد وارینز؟» 42بیر تیکه قیزارمیش بالیق اؤنونگ یانینا گتیردیلَر. 43عیسا دا اؤنو گؤتوردو و اوللارینگ گؤزو دَمینده یئدی.
44اوندان سورا اوللارا دئدی: «اوندا کی حلی سیزینگ اینَن ایدیم، سیزه بو زادلاری دئمیشدیم کی هَر‌نه کی موسای پیغمبر شریعتینده، پیغمبرلَر یازیلی‌لاریندا و زَبور کتابیندا منیم حَقّیمده یازیلمیش، یئرینه ائتیشه‌سی.» 45اوندا عیسا اوللارینگ فکرلَرینی آچدی تا مُقدّس یازیلی‌لاری آنگلایالّار 46و اوللارا دئدی: «بئله یازیلمیش کی، وَعده وئریلَن مَسیح زَجر چَکه‌سی و اؤچونجو گؤنده، اؤلومدَن دئرّیله‌سی 47و بو کی اؤنونگ آدیندا توبه ائدمَک و گُناه‌لارینگ باغیشلانماگی، اورشلیم شَهریندَن باشلاناسی و بوتون ملّت‌لَره اعلام اولاسی. 48سیز بو زادلارینگ شاهدلَری‌یَینز. 49من، گؤیده‌کی بووآمینگ وَعده وئردیگینی، سیزینگ اوستونزه یوللاییرام. آما اوندایانچاز کی تارئ قوّتی گؤیدَن سیزه گله، بو شَهرده قالینز.»
عیسانینگ گؤیه گئدمَکی
50عیسا اوللاری شَهردَن یازّیا گتیردی و بِیت‌عَنیا کَندینَنچاز آپاردی. عیسا اؤز اَل‌لَرینی اوخاری ائدی و اوللارا بَرکت وئردی. 51و ائله اوللارا بَرکت وئرَن موقعده، اوللاردان آیریلدی و گؤیه آپارولدی. 52اوللار دا اؤنو پَرست ائدیلَر و بیر بویوک شادلیگ اینَن اورشلیم شَهرینه گئری دؤندولَر 53و دائم مَعبدده ایدیلار و تارئ‌یی حَمد و ثنا ائدیرلَردی.
Currently Selected:
لوقا 24: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
