انجیلِ لوقا 20
20
عیسی اختیارون
1ای روز که عیسی معبد دِل وِنَدرده به و مردمش تعلیم و بشارت دایَی سران کاهنان که معبده علما بِنده و تورات معلمه یهود شیخون خمنا، بومِندِ چو وَر 2و عیسی شون بوات: «اَجَما بوا کومین حقّییَم اَم کارون کری؟که اَم حق اَتِش دایه؟» 3عیسی جواو بدا: «از شَما کودَ سوالی دارم؛ اَمِن بوایا 4که یحییش اِختیار دایه به که تعمید بیدی خدا یا انسان؟» 5اَون همدیگرییَم لاوه لاوه شون بکه، بواتشون: «اگم بوایوم خدا طرفَ به، عیسی وا، پس چرا ایمانرون نایرد“ 6اگم بوایوم انسانِ طرف به، مردم همُّن آینده اَجَما سِگسار کرنده، تا بِمَروم چون اَون یقین دَارِنده که یحیی ای پیغمبری به.» 7پس جواوِشون بدا: «اَما نزونوم که از کا اِسِه.» 8عیسی بِوات: «از ی شَمارا نِوام چه حقّییَم اَم کارون کَرِم.»
شرور باغبانون مثل
9اُخُری عیسی اَم مَثَلش مردم را بِزِه: «مَردکی ای انگوره باغیش رَچ بکَه اَوِش چند باغبونش ایجارِ بدا و اِشتن بشه طولانیه مدتی را سفر. 10اَنگوره چینی وَقتِه ای نوکَریش بِخِرسا باغبانون وَر تا ایکه از اِشتن انگوره محصول اَجو بدینده. امّا باغبانِ اَوِشون بِزه و خالیه دسییم بخرساشون. 11پس انگوره باغ صاحاب عَلایده نوکریش بِخِرسا امّا اَوِشونَ نی بِزه و بیحرمتیشون بکَه و خالیه دسییم بخرساشون. 12سوّمین سَفَر هنی نوکَریش بِخِرسا امّا اَوِشَ نی بِزشون و زخمیشون بِکَه و باغَ دَ اَبَرشون بکه.
13«اُخُری انگوره باغ صاحاب بوات: ”چه بکرم؟ چمن عزیز گِرامیه زا بخرسم؛ شاید چو حرمتِ نیا بدارنده.“ 14امّا باغبونِ وختی چو زاشون بِوینت هَمدیگرِ بواتشون: ”انگوره باغه وارث اَمِ. بایا اَجو بوکوشوم تا چو ارث و میراث اَجَما آرسه .“ 15پس اَ کوله شون انگوره باغ دَ اَبَرشون بکه، و بِکوشتشونه.
شَما نظر اَ انگوره باغه صاحاب چونییَم چه کَره؟ 16اَو آ و باغبانون کوشه، انگوره باغه علایدَه نفرونِ دس دی.» مَردم وختی امشون بشنوس، بواتشون: «هِمنَه نیبی!» 17امّا عیسی چون دیمِش دِدِشت و بِوات: «پس مقدسه نیویشته ان ام بخشِه معنی چیه؟:
”هَه سِگی که بنایان اجو ردشون بکه و فرشون بدا
هَنِنه بنا اصلیه سگ بِیاسه “؟
18هر که اَ سِگ سر ایگینه خُرد بی، و اَگم اَ سِگه کسی سَر ایگینه اَجو فرچ کره.»
روم امپراطور مالیات داین
19تورات معلمین و سران کاهنان وختی بِزونسشونه ام مثال دربارَه چون وا، تصمیمشون بگَت که هَه لحظه عیسی دَستگیر بکرنده، امّا مردمَ کودَ ترسِسَیندِه.
20پس عیسیاشون نظر دَ و ای سیری جاسوس چو وَر بِخِرساشون که اِشتنشون چاک و صادق نشون دایَی. تا چو لاوعونییَم اَجو تله درایننده و عیسی آدینده روم دولت و دادگاه فرماندَه دس. 21پس اَ جاسوسه عیسی کودَ آپرسسنده: «ای استاد، اَما زونوم که تَه حقیقته وای و درست تعلیم دی و کسی طرَفه نیگیری، بلکم خدا راه، درستییَم تعلیم دی. 22روم امپراطور مالیات آداین چَما را درسته یا نه؟» 23امّا عیسی چون حُقِش بزونس و بِوات: 24«ای سکه ای اَمِن آدیا. چه که نقش و نوم اَ سکه سَر اسه» 25جواوشون بدا: «روم امپراتور.» عیسی اَجون بوات: «پس امپراطوره ماله، امپراطور آدیا و خدا ماله، خدا آدیا!» 26اَون، نتونسنده عیسی مردمِ پیش چو لاوَعونییَم تَلَه درایننده، و هِمنَه که چُو جواوَ دَ مات بیه بنده، ساکت وندردنده.
مَرده عه زنده بینده؟
27اُخُری ای سِری صَدّوقیان فرقه علما عیسی وَر بومِندِ. صدوقیون مَردعون زنده آبیینه منکر بِنده. 28عیسی کودَ سؤالی آپرسسنده و بواتشون: «استاد، موسی چَما را اَم فرمانش نیویشته اگم مردکی زَنِگ ببره ولی بیدون خوردِگ بِمَره، چو برا وظیفَه داره اَ زَنِگِ ببره تا اشتن بِرار را نسلی بِنی. 29ای بار هفت برا بِنده. اولین بِرا ای زنِگیش بِبَه و بی اولاد بِمَه. 30اُخُری دوّمین برا اَ زنگِش ببه 31اُخُری سوّمینی اَ زَنِگِش بِبَه و هِمنَه هر هف براره بِمَردنده، بی اَم که خُوردِگی بدارنده. 32آخِر اَ زَنَکَ نی بمَه. 33قیامت روز اَ زَنَک کومین برا زنِگ بی؟ چون هر هف برار اَوشون برده به.»
34عیسی جواو بدا: «ام دنیا مردم، زَنِگ برنده و شو کرنده. 35امّا اوی که لایق ابدیه زندگی اِسّنده، نه زنِگ بَرِنده ،نه شو کرنده 36و نه مَرنده؛ چون فرشتَه عون شارین بینده. اوُن خدا خوردِگِنده چون مَردَنِ پَش زنده بینده. 37حتی موسی اِشتن کاملا واضح نشون داعه به که مرده زنده بینده چون وختی موسی داستانه تعریف کره که چه طَرَه خدا بوته ای دلَ که آتش گَته به چو را ظاهر ببه. بِر که خداونده، ابراهیم خدا و اسحاق خدا و یعقوب خدا وانده. 38خدا مَردَعون خدا نی، بلکم زندِعون خدا اِسّه؛ چون چو وَر همُّن زِندِنده.» 39بعضی تورات معلمین چو جواوَ بواتشون: «ای استاد، چاکر جواو بدا!» 40و چو پَش دِ هیچ کس جرائت نکه چو کودَ چیزی آپَرسه.
مسیح موعود چه که زاعه
41اُخُری عیسی اَجون بوات: «پس چه طرعه که وانده مسیح موعود داوود پاتشاه زاعه؟ 42چون که داوود پاتشاه زبورِ کتاب دَ وا:
”خداوند چمن خداوندِ بوات:
چمن راسِ طرف بِنِش
43تا وختی که اِشته دِشمنون اِشته پا بِن دِراینِم.“
44اگم داوود اَجو ”خداوند“ وا پس چه طَرَه اَو تونه داوود زا بیبی؟»
45وختی که مردم همه گوششون دایَی عیسی اِشتن شاگردونش بوا: 46«تورات معلمونَ دَ دوری بکرا، که خشِنده بِلَند اَباییَم راه بِشِنده و کوچه و بازارونَ دَ مردم چون را سلام بکرنده، و عبادتگاهان دَ چاکترین یقا چون را بیبی و جشنون دِله مجلسه سَرون وَرَ بنشنده. 47اَوه ای طرف بیوه زنکون کییه غارت کرنده، ای طرف اِشتن تظاهرِ خونین طولانیه دعا کرنده. چِمون مجازات پِر سخت بی.»
Currently Selected:
انجیلِ لوقا 20: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
