انجیلِ مرقس 5
5
عیسی دیو زده مردکه شفا دییه
1اُخُری اَوُن بشنده دریاچه اَ دیم جِراسیون منطقه 2وختی که عیسی قایقَ دَ اشنیو بومه، ای مردکی که پلیده روحی گرفتار به، قبرستونَ دَ اَبَر بومه و عیسی ییَم دیمادیم ببه. 3اَ مردک قبرستونَ دَ زندگیش کردَی و کسی نتونِسَی حتی زنجیرییَم اَجو دِبِنده. 4چون چندِ را اَوِشون قول و زنجیرییَم دِبَسشون به، امّا اَو زنجیرش پاره کرده بِه و اَ آهنییَه پابندی که چو پاشون چواَم دبَستشون به، بِشکسِش به. هیچکسه زور اونرَسِسَی که اَجو رام بکره. 5شَو و روز قبرون و کوه هون سر جِیکیلِش کردَی و سِگییَم اِشتنش زخمی کردَی. 6وختی دورَ دَ عیسیش بِوینت البحل بومه و عیسی پا دِکَت 7و بِلنده صَصییَم جِیکیلِش بِکَه: «ای عیسی، خدای متعاله زا، ته اَمِن چِکار داری؟ اَته خدا قسم دیم اَمِن عذاب مده!» 8چون عیسی اجو واتش به: «اِی پلید روح، اَم مردکَ دَ اَبَر بوره!» 9عیسی چو کودَ آپرسِسِشه: «اِشته نوم چیه؟» جواوش بدا: «چِمِن نوم قُشون اِسه؛ چون اَما پِرییوم.» 10و پر عیسیش مندت بِکَه که اَجون اَ منطقه دَ اَبَر مَکره. 11اَ دور و اطراف تپه هونَ دَ پیله رَمَه خویی غذاشون خُوردَی. 12پلیده ارواح عیسی شون مندت بکه، بواتشون: «اَجَما بخرس اَ خویون دله؛ بارز بِشوم چون دله.» 13عیسی اَجونِش ایجازه بدا. پلیده ارواحِ اَ مردکَ دَ اَبَر بِشنده و اَ خوییون دله بِشنده. رَمَه ای که چُو تعداد دویر و بر دِ هزار خو به، تپه سراجیریه دَ گلوند آبه دریاچه دلَ و غرق آبنده.
14خوعه چوپونه دِوَشتنده و ام اتفاقه دربارَه شهر و دِهَ دَ بواتند. مردم بومِندِ تا بویننده چه اتفاقی دِکَتِه. 15اَوُن بومِندِ عیسی وَر و وختی بیوینتشون اَ دیوزده مردک، اَوی که پیش تر قُشونِ گرفتار به، هَنِنه خلاوش دکرده و عقلمند بِر نشته، بترسسنده. 16اَوُنی که اَم ماجراعونشون اِشتن چَشمونییَم وینته بنده، اَ چی ای که اَ دیوزده مردکه و اَ خوعون سر اومییه به، مردمه را بِواتِندِ. 17اُخُری مردمِ عیسی شون مندت بِکَه که چون منطقه دَ بیشییه.
18وختی که عیسی قایقِ سار آبَی اَ مردکی که پیش تر دیوزده به، عیسیش مندت بِکَه که چو خمنا بیشییه. 19امّا عیسی اجازِش ندا بلکم اجو بِوات: «بِشه کییه، اِشته دوستون و اشنایان وَر و اَجون بوا که خداوند اِشرا چِش کرده و چه طَرَه اَتِش رحم کرده.» 20پس اَ مردک بِشه دِکاپولیس منطقه، اَ چی که عیسی چُرا کردِش به، اعلامش بکه و همَّه حیران بیه بِنده.
عیسی، ای زَنکی و یایروسه کینه شفا دی
21عیسی هنی قایق ییَم بِشه آوِ اَ دیم، دریاچه کنارَ پر جماعتی چو دویر جمع آبنده. 22اُخُری عبادتگاه ای رئیسِ که چو نوم یایروس به بِر بومه. عیسی وینتَنییَم چو دس و پا دکَت 23و پِر مندتش بکه بِوات: «چِمِن وِلِگِ کینَه کورو مَرِه. بوره، اِشته دس اونه چو سر تا رچ ببی و زندَه بمونه.» 24پس عیسی چو خمنا بِشه.
پِر جماعتی عیسی پش راه دکَتِنده. اَوُن هر طرفیَ عیسی شون هجوم آیردَی. 25بِر ای زَنکی بِه که دونزده سال به خونریزیش دَ. 26اَ زنَک پِر دکتره ور شییه به و چون دسونَ دَ پِر عذابش کَشسَه به و اِشتن همَّه ی داراییش خرج کرده به؛ امّا رچ آبیینه عوض، بدتر آبییه بِه. 27اَ زَنک، درباره عیسی چیزونی اَشنَوِسِش به، پس جماعته دلَ عیسی پَش بومه و چو اَباش دس بزه. 28چون اَ زَنک اِشتنییَم واتش بِه: «اگم حتی چو اَبا دس بِزَنِم، شفا گیرم.» 29هَه لحظه چُو خونریزی بند بومه و احساسش بِکَه که اَ مریضیه دَ شفاش گَته. 30عیسی هه لحظَه بزونسشه که قُوتی چودَ اَبر بشه. پس جماعته دلَ اِشتن دویرو برِش دِدِشت و آپرسسشه: «کِه چمن اَباش دَس بِزه؟» 31چو شاگرده جواوشون بدا: «وینی که جماعت هر طرف اَته هجوم آیرنده هنی آپرسی، ”که اَمِنِش دَس بزه؟“» 32عیسی اِشتن دویر و برّش دِدِشت تا بِوینِه که ام کارش کرده. 33پس اَ زَنِکی که زونسَی چِه اتفاقی چو را دکَته ترس و لرزییَم بومه عیسی پا دکَت و هَمَّه ی حقیقتش چو را بوات. 34عیسی اجو بِوات: «کِلگ اِشته ایمان اَتِش شفا بدا. ساق وسلامت بِشه و اَم مریضی دَ آزاد بِبه!»
35عیسی حلا لاوِش کردَی که عده ای عبادگاه رئیس کییه دَ بومِندِ و بواتشون: «اِشته کینه بمَه! دِ چرا استاده زحمت دی؟» 36اما وختی عیسی چون لاوِش بشنَوِس، عبادتگاه رئیسِش بِوات: «مترس! فقط ایمان بدار.» 37و اجازِش اونِدا جز پِطرُس و یعقوب و یعقوبه برا یوحنا دِ کسی چُو پَش بیشی. 38وختی اَوُن آرسسنده عبادتگاهِ رییسه کییه، عیسی بیوینتِشه قیامتی یه. مردم بِلنده صَصییَم بِرَمِسَینده و زاری شون کردَی. 39پس بِشه دله و اَجون بوات: «چرا شیون و زاری کرا؟ خُردِگ نِمَردِه بلکم خُته.» 40اَون عیساشون مسخَرَه بِکه. ولی عیسی همُّنِش اَبَر بِکه، خُوردِگِ په و ما و شاگردونی که چو خمنا بِنده اوگَتِشُ و بِشه یقایی که اَ کلگ بِر بِه. 41اُخُری عیسی اَ کِلِگِ دسش بِگَت و اجو بِوات: «تالیتا کوم» یعنی: «ای وِلِگ کِلَگ اَته وام اوپاب ببه!» 42اَ کِلِگ البحل اوپاب ببه و راه بشه. اَ کِلِگ دونزده ساله بِه. اَوُن ام اتفاقَ دَ پِر تعجبشون بِکَه 43عیسی اَجونِش قدغن بِکَه که مارزنده کسی اَم اتفاقَ دَ خَوَر دار بیبی، و بِوات ای چی آدییا اَ کِلِگ تا بُخَرییَه.
Currently Selected:
انجیلِ مرقس 5: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
