انجیلِ مرقس 4
4
کشاوزه مَثال
1هنی عیسی دریا وَر تعلیم داینش شروع بِکَه. جماعتی عیسی دویر و برَ جمع آبنده همنه که عیسی مجبور ببه قایقی سار بییبی که دریا دَ به، و بِر، بنشت، و همَّهی جماعت دریا ور خشکیهَ دَ بِنده. 2عیسی مثالونییَم پِر چییش اَجون تعلیم آدا. و اِشتن تعلیم آدایَنییم اَجونش بِوات: 3«گوش بِکرا! ای کَشاورزی دانه اوشونتنه را اَبَر بِشه. 4وختی دانِش اوشونت بعضی دانه عه راه دَ ایکَتِنده و پرنده عه نی بومِندِ و اَ دانَه عونِشون بُخَه. 5بعضی دانه عون نی سِگی زمینِ سر ایکَتِنده که پِر خاکِش نِدَ؛ پس البحل سَوز بِبِنده، چون که خاک کم عمق به. 6امّا وختی آوتاو اَبَر بومه، همَّه بِسوجِسنده و خشک آبنده، چون ریشه شون نِدَه. 7بعضی دانه عه نی خارِ دله ایکَتِنده. خارِ رشدشون بِکَه، و خفه شون بِکَه و ثمرشون نایرد. 8امّا اَ ای دانه عون چاکه خاکِه سر ایکَتِنده و جوونه شون بزه، پیله آبنده، و بارشون بایرد پِر آبنده، بعضی سی، بعضی شصت و بعضی صد برابر.» 9عیسی بِوات: «هر که گوش اَشنوسَن داره، بَشنوه.»
10اَ لحظَه که عیسی تَیناو به، اَ دونزده شاگرد و کسونی که چو دویر و وَرَ بنده، مثلون درباره چو کو دَ آپرسسنده. 11عیسی اَجون بِوات: «خدا پاتشاهی سِره درک کردن شَماشون آدایه، امّا مردمِه را، همَّه چی مثالونییَیم واته بی؛ 12تا:
«”دِدِسِنده امّا درک مکرنده،
بَشنَونده، امّا مَفَهمنده،
مبادا آگردنده و بَخشِسه ببینده!“»
13اُخُری عیسی اَجون بِوات: «شَما اَم مَثَله درک نکرا؟ پس چه طَرَه گَوا علایده مثلون درک بکرا؟ 14کشاورز خدا کلامه کارِه. 15بعضی مردم، اَ دانه عونی شاریننده که راه دَ ایکَتِنده، بِر که خدا کلام کاشتَه بی؛ وختی که خدا کلامه اَشنونده، البحل شیطان آ و کلامی که چون را کاشته بییَه به، دِزِه. 16بعضی مردمِ اَ دانه عونی شاریننده که سِگیه زمینِ سر ایکَتِنده وختی که خدا کلامه اَشنونده اَلَبحل اجو شادییَم قبول کرنده، 17امّا چون اِشتن دَ ریشَه ای نِدارِنده، ایکه تاو آیرنده. اُخُری وختی خدا کلامه خونین اَجون اذیت و آزاری آرسه، البحل اِشتن ایمان از دست دینده. 18اَ ایوِ اَ دانه عونی شاریننده که خار دلَ ایکَتِنده اَوُن خدا کلامه اَشنونده، 19امّا اَم دِنیا نگرانیه و ثروته وَسوسَه و علایدَه چیه هوس، چون دِلِ دِلَ شی و خدا کلامه خفه کره، و اجو بی ثمر کره. 20علایده عه، دانه عونی آشینده که چاکه خاکه دلَ ایکَتِنده اَوُن خدا کلامه اَشنونده، اجو قبول کرنده و سی، شصت و صد برابر، ثمر آیرندِ.»
چراوِ مثال
21عیسی اَجون بِوات: «مگم چراوِ آیرا تا اجو قداره بِن یا تخت بِن بِنییا؟ مگم اجو چراودونه سر اونِنییا؟ 22چون هیچ مخفیه چی ای نی که آشکار مَبی، و هیچ چی ای مخفی نی جز آشکار بین را 23هر که گوش اَشنوسن داره، بَشنوه.» 24و اَجون بِوات: «به اَ چی ای که اَشنوا دقت بِکَرا. هَه پیمانه اییم که وزن کَرا، شَماهون وَزن کرنده، حتی ویشتر 25چون به اَو که داره، ویشتر آدایَه بی، و اَوی که نِداره، حتی اَ چی ای که داره نی چو کودَ ایگَته بی.»
دانه ای مثال که رشد کره
26عیسی بِوات: «خدا پاتشاهی ای مردکی شارین که زمینِ سر دانَه اوشونه. 27شَو و روز اَ مردک چِه بُخوسه چِه بیدار بیبی، دانه جوونه زنه و پیله بی. چه طره؟ نِزونه. 28زمین اِشتن بار آیره: اول ساقَه پیله بی، اُخُری اوشه سَوز بی، چو پَش اوشه، دانه ییَم مَشت بی. 29امّا اَ زمُون که دانه بِرَسه، کشاورز البحل دازه اوگوره، چون درِفَنِ فصل آرَسسه.»
خردل دانۀ مثال
30و عیسی بِوات: «خدا پاتشاهی چه شارین اِسه، چه مثلی ییَم اَجو توضیح بدیوم؟ 31خدا پاتشاهی خردله دانهای شارینه. خردله دانه، وِلِگ ترین دانه ای اِسه که اَجو زمین دلَ کارِنده، 32امّا وختی کاشته بیی، پیله بی و همهی باغه گیاهونَ دَ پیله تر آبی، بِلندَ لاخه عونی آییریه همنه که پرنده عه توننده چُو سایَه دَ لونه رَچ بکَرنده.»
33عیسی، هِمنَه مَثلونییَم تا بِر که تونسَینده بفهمنده، خدا کلامش چون را واتَی. 34عیسی مردمییَم جز مثلییَم لاوش نِکردَی؛ امّا وختی اِشتن شاگردونییَم تیناو به، همه چیش چون را توضیح دایَی.
عیسی، طوفانه آرام کردن
35هَه روز وختی غروو دم ببه، عیسی اِشتن شاگردونِش بِوات: «بشوم دریا اَ دیم.» 36اَوُن جماعتشون ترک بِکه و عیسی شون هَه قایقییَم که چُو دلَ به، اِشتن خَمنا ببردشونه. چند علایدَه قایق نی چو خمنا بشنده. 37ای دَفَه تِنده بادی بِوَزِس و موجه هِمنَه قایقِشون برخورد کردَی که نزدیک به قایق آوییَم مَشت بیبی. 38اما عیسی قایقه پِشت، اِشتن سر بالِشمَه سر نایِش به و خُته به. شاگرده عیسی شون خواوَ دَ اوپاب بکه و بواتشون: «استاد، عین خیالر نی که اَما هلاک بِبیوم؟» 39عیسی اوپاب بِبه و باد را تَشَرِش بِزِه و دریاش بِوات: «ساکت ببه! آرام ببه!» اَ لحظَه باد بِنِشت و همه یقا آرام بِبِه. 40اُخُری عیسی اِشتن شاگردونِش بِوات: «چرا هِمنَه ترسا هنوز ایمان ندارو؟» 41اَوُن پِر بترسسنده و هندیگرییم بواتِندِ: «اَم کیه که حتی باد و دریا نی چو کودَ فرمان بَرِندِه!»
Currently Selected:
انجیلِ مرقس 4: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
