انجیلِ مرقس 3
3
مردکی که ای دسش خشک آبییه بِه
1عیسی هنی بِشه یهودیون عبادتگاه دلَ. بِر، ای مردکی به که چو ای دَس خُشک آبییه بِه. 2فریسی فرقه علما، عیسی شون زیرنظر دَ تا بویننده مقدسه شنبه روزَ اَ مردکه شفا دییه یا نه، تا ای بهونَه ای عیسی تُیمت زَیَنِ را بِدارِنده. 3عیسی اَ مردکش که چو دس خشک آبیه بِه بِوات: «بوره چمن وَر.» 4چو کودَ آپرسسشه: «مقدسه شنبه روزَ خوبی کردن جایزه یا بدی کردن؟ ای نفرِ جانه نجات داین یا چو کوشتن؟» امّا اَوُن ساکت وندردنده. 5عیسی، کسونی که چو دویره بر وِندَرده بِنده غضبییَم دِدِشت و چون سگیه دلِ خونین پر ناراحت بِه، اُخُری اَ مردکش بِوا: «اِشته دَس دراز بکه.» اَ مردک اِشتن دَسش دراز بکه و دَسش رچ ببه. 6فریسی فرقه عالمه عبادتگاهَ دَ اَبَر بشنده و اَلبحل هیرودسه طرفدارون خَمنا توطئه شون بکه که چه طَرَه عیسی نابود بکرنده.
پِر مردم عیسی پش شینده
7اُخُری عیسی اِشتن شاگردون خَمنا بِشه دریاچَه وَر. پِر جماعتی جلیل منطقه یهودیه منطقه 8اورشلیم شهر، اَدومیه منطقه، اردن رووارِ اَ دیم نواحی و صور و صیدون منطقه دویر و بر، عیسی پش راه دکَتِنده وختی که اَ جماعت عیسی همَّهی کارون خَوَرِشون بشنوس، چو وَر بومِندِ. 9جماعته پِر بینه خونین، عیسی اِشتن شاگردونش بِوات چو را ای قایقی حاضر بکرنده، تا مبادا مردم اَجو فِرچ بِکرنده. 10چمه خونین که عیسی پِر آدمش شفا آدایه به، همهی مریضه هر طرف دَ هجومشون آیردَی تا اَجو دَس بِزَنِندِه. 11هر موقَع پلید ارواح عیسی شون وینتَی، چو پیش زمین سَر ایکَتَینده و جیکیلَییَم واتَینده: «ته خدا زایش!» 12امّا عیسی تاکیدییَم اَجون دستور دایَی که کسی را موانده اَو کیه.
دونزه رسولون
13عیسی بشه کوهی سر و کسونیش که گَوِسَی، وُنگِش بکه اِشتن وَر و اَوُن بومِندِ عیسی وَر. 14عیسی دونزه نفرش انتخاب بِکه و چون نومش رسول اونا، تا چو خمنا بیبینده و اَجون مردمه تعلیم داینه را بخرسه، 15و اَم قدرت و اقتدار بِدارنده که دیون آدمونَ د اَبَر بِکَرِنده. 16اَ دونزه نفر که عیسی انتخابِش بِکه امِ بِنده: شَمعون که چُو نومش پِطرُس اُنا؛ 17یعقوب زِبِدی زا و یعقوبه برا یوحنا که چون نومشون ’بوآنِرجِس‘، یانی ’اِلدرم زارون‘ اُناشه؛ 18آندریاس، فیلیپُس، بَرتولْما، مَتّی، توما، یعقوب حَلْفای زا، تَدّای، وطن پرست شَمعون، 19و یهودا اَسْخَریوطی که عیسیش خیانت بِکَه.
خدا مقدس روح کفر واتن
20اُخُری عیسی بِشه کییه و هَنی جماعتی جمع آبنده، هِمنَه که عیسی و چو شاگرده حتی نتونِسَینده غذا بخرنده. 21وختی عیسی خونوادَه اَمِشون بشنوس، بشنده تا عیسی اِشتن خَمنا ببرنده، چون واتَینده: «اَو، اِشتن عقلش از دس آداعه.» 22تورات معلمین که اورشَلیمَ دَ اومیه بِنده بواتشون: «بَعَلزِبول چُو جِلد شیاسَه» و «دیون، دیون رئیسِ کمکییَم اَبَرکره.» 23عیسی اَجون وُنگ بکه اِشتن وَر و چون را مثالونیش بِزه و بِوات: «چه طَرَه بی که شیطان، شیطانه اَبر بِکره؟ 24اگم ای مملکتَ دِ دَسته ای دگنه، اَ مملکت نِتونه دووم بایره. 25و اگم ای کییَه ایَ دَ دِ دسته ای دِگِنه، اَ کییه نی نتونه دووم بایره. 26شیطانَ نی اگم اِشتن ضد ببی و دِ دسته ای دِگِنه نتونه دووم بایره، بلکم نابود بی. 27هیچکس نِتونه ای قدرتمند مردکی کییه دله بیشی و چو امواله غارت بکره، مگم اَم که اول اَ قدرتمنده مردکه دِبَنده. چو پَش تونه چو کییه غارت بکره.
28«حقیقتا، شَمارا وام که آدمیزاده هَمَّه ی گناهه و هر کفری که بوا بَخشِسه بی؛ 29امّا هر که روح القدوسِ کفر بوا هرگز بَخشِسه نیبی، بلکم چو گناه تا ابد چُو گردنَ دَ اِسه.» 30عیسی ام لاوه چمه خونین بِه که واتشونَی «عیسی پلیدَ روح داره.»
عیسی ما و چو برا
31عیسی ما و چو براعه بومِندِ. اَوُن بَرَ سَرَ دَ وندَردَ بنده، و ای نفرشون بِخِرسا تا عیسی عه وُنگ بِکَره. 32جماعتی که عیسی دویر نشته بنده، اَجو بواتندِ: «اِشته ما و اِشته براعه بَرَ سرِنده و اِشته پَش گَردِنده.» 33عیسی جواو بدا: «چِمن ما و چِمن براعه کینده؟» 34اُخُری کسونیش که چو دویر بر نشته بندِه، دِدِشت و بِوات: «اَمِه چِمن ما و چِمن براعنده! 35چون هر که خدا خواستَه انجام بیدی، چِمن برا و چِمن خا و چِمن ما اِسه.»
Currently Selected:
انجیلِ مرقس 3: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
