یوحنایِ انجیل 19
19
عیسیَ مصلوب کودن ره ببَردید
1هو موقع، پیلاتُس دستور بدَه عیسیَ بیگیرید و اونَ شَلاق بزنید. 2سربازان ایتا تاج، توموشِ جا ببافتید و عیسی سر بنئید و ایتا ارغوانی قبا اونَ دُکودید، 3و اون ورجه باموئید و بگفتید: «سلام بر تو، اَی یهودیان پادشا!» و اونَ سیلی زِئیدی.
4پیلاتُس ایوارده بیرون بامو و اوشانَ بگفت: «الان اونَ شیمی ورجه اَورم تا بفهمید کی من هی تخصیری اونِ محکوم کودن ره پیدا نُکودم.» 5پس عیسی کی ایتا توموشِ تاج اونِ سر نئه بو و ارغوانی قبا دُکوده بو بیرون بامو. پیلاتُس اوشانَ بگفت: «بیدینید، اَن هو مرداکه!» 6وقتی کاهینان سران و مأمورانی کی معبدَ پاستیدی اونَ بیده ئید، داد زئیدی: «مصلوبَ کون! مصلوبَ کون!» پیلاتُس اَشانَ بگفت: «شُمان خودتان اونَ ببَرید و مصلوبَ کونید، چونکی من هی تخصیری اونِ محکوم کودن ره پیدا نُکودَم.» 7یهودیان اون جواب بدَه ئید: «اَمان شریعتی دَریم کی عین اَمی شریعت، اُ مرداک بایسی بمیره، چونکی ادعا کونه خُدا پسره.»
8هَطو کی پیلاتُس اَنه بیشتاوست، ویشتر هراسانَ بوست، 9ایوارده کاخ درون واگردَست و عیسی جا واورسه: «تو جه کویا بامو دَری؟» ولی عیسی اونِ جوابَ ندَه. 10پیلاتُس اونَ بگفت: «مره هیچّی نیگی؟ مگه تو نانی اَ قُدرتَ دَرم تره سرا دَم و اَ قُدرتَ دَرم تره صلیب سر فاکشم؟» 11عیسی بگفت: «اَگه اَ قدرت خُدا جا تره فَده نُبوسته بو، تو هی قدرتی می سر ناشتی. هن واسی اون گُناه کی مَرا تی دَس فدَه، خَیلی ویشتره.» 12بازون پس، پیلاتُس تقلّا بُکود عیسیَ سرا ده، ولی یهودیان داد زئید: «اَگه اَ مرداکَ وِلا کونی، امپراطورِ رومِ رفق نیئی. هرکی ادعا بُکونه پادشائه، امپراطورِ ضّدِ.»
13هَطو کی پیلاتُس اَ گبان بیشتاوست، عیسیَ بیرون باورد و مَحکمه تختِ سر بینیشت، اُ جیگائی کی به ’سنگفَرش‘ معروف بو و عبرای زوان درون اونَ ’جَبّاتا‘ گفتیدی. 14اُ روج، روج آماده بوستن پِسَخ عید ره بو و دوروَر ظهر بو. پیلاتُس یهودیانَ بگفت: «بیدینید اَنَم شیمی پادشا!» 15اوشان فریاد بزئید: «اونَ بُکوش! اونَ بُکوش، مصلوبَ کون!» پیلاتُس بگفت: «شیمی پادشای مصلوبَ کونم؟» کاهنان سران جواب بدَه ئید: «اَمان جغیر امپراطور روم پادشائی ناریم.» 16آخر بسر پیلاتُس عیسیَ اوشانَ دَس فدَه تا اونَ صلیب سر فاکشید.
پس عیسیَ بیگیفتید و ببَردید.
17عیسی کی صلیب اون کول سر نئَه بو، بیرون بُشو، اُ مَحلی وَر کی جمجمه نام دَشتی، کی عبری زوان درون اونَ جُلجُتا گیدی. 18اویا اونَ مصلوبَ کودید و اون مرا دو نفر دیگه ئم اونِ دو طرف مصلوبَ بوستید و عیسی اوشان وسط ایسا بو. 19پیلاتُس اَنَم دستور بدَه و اوشان ایتا تخته رو بینیویشتید و اونَ صلیبِ بجُوربزئید کی اونِ رو بینیویشته بُبوسته بو: ’عیسیِ ناصری، یهودیان پادشا‘. 20خَیلی جه یهودیان تخته رویَ بخواندید، چون اویا کی عیسی مصلوب بُبوسته بو شارِ نزدیکی بو و اُ تخته رو به زوان عبری و لاتین و یونانی بینیویشته بُبوسته بو. 21پس یهودیان کاهینان سران پیلاتُس بگفتید: «نینیویس ’یهودیان پادشا‘، بلکی بینیویس اَ مردای بگفته کی من یهودیان پادشائم.» 22پیلاتُس جواب بدَه: «هرچی بینیوشتم، دِه بینیویشتم.»
23وقتی کی سربازان عیسیَ مصلوبَ کودید، اون رختانَ بیگیفتید و چار سَام بُکودید و هر نفر ایتا سَام اوسادید. وقتی اون قبایَ فارسه ئید بیده ئید یسره ایسه و درز ناره. 24پس کَس کَسَ بگفتید: «اَ قبایَ پاره نُکونیم، بلکی قرعه تَوَدیم تا بیدینیم کی شین بِه.» هَطو بو کی زبور کتاب بینیوشته به انجام فارسه کی:
«می رختانَ خوشان میان سام بُکودید
و می قبا سر قُرعه تَوَدَئید.»
پس سربازان اَطو بُکودید.
25ولی عیسی صلیب نزدیکی، اون مار و اون خالا، مریم کْلوپاسِ زنای و مریم مَجدَلیّه ایسابید. 26وقتی عیسی خو مارَ اُ شاگرد ورجه کی خَیلی اونَ دوست دَشتی بیده، خو مار بگفت: «اَی زن، بیدین، اَنَم تی پسر.» 27بازون اُ شاگرد بگفت: «بیدین، اَنَم تی مار.» جه هو وقت، اُ شاگرد، عیسی مارَ خو خانه ببَرد.
عیسی مَردن
28بازون پس عیسی دانستی کی همه چی تمانَ بوسته، و اَنِ واسی کی مُقدّس کِتابان بینیویشته به انجام فارسه، بگفت: «تشنه ئم.» 29اویا ایتا خُم بو کی تورش شراوِ اون جا پُر بو. پس ایتا ابر تورش شراو درون فرو بُکودید و ایتا زوفا دار خال سر بنه ئید و عیسی دهنِ جُلُو ببَردید. 30وقتی عیسی شراو بیچیشتِ، بگفت: «تمانَ بو.» بازون خو سرَ بجیر تَوَدَه و خو روحَ تسلیم بُکود.
31جه اویا کی اُ روج روجِ ’تهیه‘ عید پِسَخِ ره بو، و نبایستی مصلوب بُبوسته ئان جنازه اُ مقدس شنبه درون کی پیله شنبه بو، صلیب سر بمانه، یهود سران پیلاتُس جا بخواستید تا اُ سه نفرِ پا قلمَ بشکنید و اوشان جنازه یَ صلیب جا بجیر باورید. 32پس سربازان باموئید و اُ دونفرِ پا قلمَ کی عیسی مرا مصلوب ببُوسته بیدَ بشکنه ئید. 33ولی وقتی عیسی سر فارسه ئید و بیده ئید بَمرده، اون پا قلمَ نشکنه ئید. 34ولی ایتا جه سربازان اونِ تکَ نیزه فوغاسته کی هو دَم خون و آب اونِ جا بیرون بزه. 35اُ کَس کی اَنه بیدِه، گُوائی دئه تا شُمانم ایمان باورید. اونِ گُوائی راسته و اون دَنه کی حئیقتَ گِه. 36اَ اتیفاقان دکفت تا مُقدّس کتابان بینویشته به انجام فارسه کی: «هیتّا جه اون خاشان نشکفِه،» 37و هَطوئم ایتا قسمت دیگه جه کتاب کی گه: «اونی یَ کی نیزه بزئید، فندریدی.»
عیسی دفنَ کودن
38بعد اَ ایتفاق، یوسف کی رامَه شین بو، پیلاتُسِ جا اجازه بخواست کی عیسی جنازه یَ ببَره. یوسف ایتا جه عیسی دُمباله روئان بو، ولی خلوتی، چونکی یهودیانِ جا ترس دَشتی. پیلاتُس اونَ اجازه بدَه. یوسف بامو، عیسی جنازه یَ ببَرد. 39نیقودیموسم کی پیشتر شبانه عیسی ورجه بُشو بو، بامو و خو مرا سی کیلو مُر و عود باورد. 40پس اوشان عیسی جنازه یَ ببَردید، اونَ طبق یهودیان دفنَ کودن رسم، عطریات مرا کَفَن درون واپِختید. 41اویا کی عیسی مصلوب بُبوست، باغی بو و اُ باغ درون ایتا تازه مَقبره نئَه بو کی هنو هی مُرده ئی اون درون ننَه بید. 42پس چونکی یهودیانِ ’آماده بوستن روج‘ عید پِسَخِ واسی بو و اُ مَقبره ئم هو نزدیکی نئَه بو، عیسی جنازه یَ اون درون بنه ئید.
Currently Selected:
یوحنایِ انجیل 19: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
