یوحنایِ انجیل 7
7
عیسی به عید خیمه ئان شه
1بازین، عیسی چند وقت جلیل ولایت درون گردَستی، اون نخواستی یهودیه ولایت درون بئسه، چونکی یهودیان اونِ کوشتن دُمبال بید. 2یهودیان عید خیمه ئان نزدیک بُبوست، 3پس عیسی براران اونَ بگفتید: «اَیا تَرکا کون و یهودیه بوشو تا تی شاگردان اُ کارانی کی کونیَ بیدینید، 4چون هر کی بخوائه بشناخته ببه، خَفا درون کار نُکونه. تو کی اَ کارانَ کونی، تره دُنیایِ نیشان بدن.» 5چونکی حتی اونِ برارانم اونَ ایمان ناورده بید. 6پس عیسی اَشانَ بگفت: «هنو می وقت فأنرسه، ولی شمرأ هر وقتی مناسبه. 7دُنیا نتانه شیمی جا خَفت بدَره ولی می جا خَفت دَره، چون من گُوائی دئم کی اونِ کاران بده. 8شُمان عید ره بیشید، من الان اَ عید واسی نایم، چونکی می وقت هنو فأنرسه.» 9عیسی اَنه بگفت و جلیل درون بأسا.
10ولی بعد اونکی اون براران عید واسی بُشوئید، خودِشم بُشو، ولی نه آشکارا بلکی خَفا درون. 11پس یهودیان، عید زمات اونِ دُمبال گردستید وَ واورسه ئید: «اُ مردای کویا ایسا؟» 12مردومِ میان عیسی باره خَیلی حرف دکفته بو. بعضیان گفتید: «ایتا خُرم مرداکه.» ولی بعضی دیگه گفتیدی: «نه! مردومَ جه راه بِدَر کونه.» 13ولی یهودیانِ ترسِ واسی، هیکّس اونِ باره آشکارا گب نزئی.
14وقتی نصف عید بُگُذشته، عیسی معبد صحن درون بامو و بنا به مردوم آموختن بُکود. 15یهودیان ماتا بوستید و واورسه ئید: «اَ مردای کی هرگس دینِ درسَ یاد نیگیفته، چُطو تانه اَجور عِلمی بدَره؟» 16پس عیسی اَشان جواب بدَه: «اونچی کی شمرأ یاد دئم می جا نیه، بلکی جه اونی ایسه کی مَرا اوسِه بُکوده. 17اَگه ایکَس حئیقتن بخوائه خُدا خواستِه یَ بجا باوره اون، فهمه کی اَ تعلیمان جه خُدا ایسه، یا من می جا گَم. 18اونکی جه خودِش گب زنه، خو جلال دُمباله، ولی اونکی خو اوسِه بُکوده جلالَ خوائه، راستگو ایسه و اون درون هی دوروغگو نَنه. 19مگه موسی پیغمبر، شریعتَ شمرأ فانده؟ با اَحال هیتّا جه شُمان اونَ انجام ندِه. چره می کوشتن دُمبالید؟» 20مردوم جواب بدَئید: «تو دیو بزئی! کیه کی تی کوشتن دُمبال ببه؟» 21عیسی اَشان جواب بدَه: «من ایتا کار بُکودم و شُمان همتان جه اَ کار ماتا بوستید. 22موسی ختنه کودن حُکمَ شمرأ فَدَه - البته اَن نه موسی جا بلکی مردوم پئران جا بو - و هَنه واسی، مُقدّسِ شنبه روج درونم پسرانَ ختنه کونیدی. 23اَگه ایتا آدم مُقدّسِ شنبه روج درون ختنه به تا موسی شریعت زیر پا بَنِه نبه، پس چره جه اَنکی تمان ایتا آدمِ جانَ مُقدّسِ شنبه روج درون سلامتی فدَم بَرزَخا بوستید؟ 24ظاهیر جا قضاوت نُکونید، بلکی به حق قضاوت بُکونید.»
مگه به اون مسیح ببه؟
25بعضی جه اورشلیم مردوم بگفتید: «مگه اَن هون نیه کی اون کوشتن دُمبالید؟ 26بیدینید چُطو آشکارا گب زنه و اونَ هیچّی نیگید! بِه کی مردوم پیله تران بفهمسته بیبید کی اون هو مسیح موعوده؟ 27اَمان دانیم اَ مردای جه کویا اَیه، ولی وقتی مسیح موعود ظهور بُکونه، کسی نانه جه کویا اَیه.» 28هو موقع عیسی آموختن زمات معبد درون، بلند صدا مرا بگفت کی: «مره ایشناسیدی و دانید جه کویا اَیَم. ولی من به می خواسته ناموم. اونکی مَرا اوسِه بُکوده، حقّه و شُمان اونَ نیشناسیدی. 29ولی من اونَ ایشناسم، چونکی من جه اونِ طرف باموم و اون مَرا اوسِه کوده.» 30پس اوشان اَنه دُمبال بید کی عیسیَ گرفتارَ کونید، ولی هیکّس اونِ رو دَس درازَ نُکود، چره کی اون وقت هنو فأنرسه بو. 31با اَن همه خَیلی جه مردوم عیسیَ ایمان باوردید. اوشان گفتیدی: «مگه وقتی مسیح موعود ظهور بُکونه، اَ مردای جا ویشتر نیشانه ئان و مُعجزه ئان انجام دئه؟»
32فَریسی فرقه عالمان گوشَ فارسه کی مردوم عیسی باره اَجور گبان زنیدی. پس کاهنان سران و فَریسیان، مأمورانی کی معبدَ پاستیدیَ اوسِه کودید تا اونَ گرفتارَ کونید. 33هوموقع عیسی بگفت: «ایپچه دِه شیمی مرا ایسم، و بازون اونی کی مَرا اوسِه بُکوده ی ورجه شم. 34می دُمبال گردیدی، ولی مَرا نخوائید یافتن؛ و اویا کی من ایسم، شُمان نتانید بائید.» 35پس یهودیان کَس کَسَ گفتید: «اَ مردای کویا خوائه بشه کی اَمان نتانیم اونَ بیاویم؟ خوائه یهودیانی کی یونانیان میان پخشَ بُوستیدِ ورجه بشه و یونانیانَ تعلیم بدِه؟ 36اونِ منظور چی بو کی بگفته، ”می دُمبال گردیدی، ولی مَرا نخوائید یافتن و اویا کی من ایسم، شُمان نتانید بائید“؟»
روخانی کی آب زندگی فَده
37آخرتا روج کی عیدِ مهمترین روج بو، عیسی بأسا و بلند بلند مردومَ بگفت: «هر کی تشنه یه، می ورجه بایه و بُنوشه. 38هرکی مَرا ایمان باوَره، هُطو کی مُقدّسِ کتابان گه، اونِ دیل جا آبی کی زیندگی فَده روخان مانستن رادکفه.» 39عیسی اَ گبَ روح القدس باره بگفت، کی اوشانی کی اونَ ایمان باورید، اونَ گیریدی؛ چونکی روح القدس هنو ببخشه نُبوسته بو، جه اَ رو کی عیسی هنو جلال نیگیفته بو.
40بعضی جه مردوم، اَ گبان ایشتاوستن مرا بگفتید: «حئیقتن کی اَ مردای هو پیغمبری ایسه کی بایستی بایه.» 41الباقی گفتید: «مسیح موعود ایسِه.» ولی ایتا دیگه دسته واورسه ئید: «مگه مسیح جلیل ولایت جا خوائه اَمون؟ 42مگه مُقّدسِ کتابان درون نگفته مسیح داوود پادشا نَسل جا ایسه کی جه بِیتلِحِمِ آبادی کی داوود اون درون زیوستی، خوائه اَمون؟» 43پس مردوم میان عیسی واسی اختلاف دکفت. 44بعضیان خواستیدی اونَ گرفتارَ کونید، ولی هیکّس اون رو دَس درازا نُکود.
45بازین مأمورانی کی معبدَ پاستید، کاهینان سران و فَریسیان ورجه وگردَستید. اَشان اُ مأموران جا واورسه ئید: «چره عیسیَ ناوردید؟» 46مأموران جواب بدَئید: «تا الان، هیکّس اَ مرداک مانستن گب نزِه!» 47فَریسیان بگفتید: «مگه شُمانم گول بُخوردید؟ 48مگه مردومِ پیله تران یا فَریسیانِ جا هیکّس اونَ ایمان باورده؟ 49ولی اَ مردوم کی شریعت جا هیچّی نانیدی، لعنت بُبوسته ئید.»
50نیقودیموس، کی پیشتر عیسی ورجه بُشو بو و ایتا جه فَریسیان بو، بگفت: 51«مگه اَمی شریعت کسیَ بی اونکی اول اونِ گبَ بیشتاوه و بفهمه کی چی بُکوده دَره اون محکوم کونه؟» 52اوشان جواب بدَئید: «مگه توئم جلیل شینی؟ بَگرد و بیدین کی هی پیغمبری جلیلِ جا نامو.» 53بازین هرتا خوشان خانه بُشوئید.
Currently Selected:
یوحنایِ انجیل 7: GIL
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
