لوقایِ انجیل 23
23
محاکمه پیلاتُس و هیرودیس ورجه
1هو زمات تمانِ شورا آدمان ویریشتید و عیسیَ پیلاتُس ورجه ببَردید 2و اون جا شکایت بُکودید، بگفتید: «امان اَ مرداکَ مُجرم بیافتیم. اون اَمی مردومَ گُمرا کودن دَره و اَمرا وئنلانه کی امپراطور رومَ مالیات فَدیم و ادعا کونه کی مسیح موعوده، یعنی ایتا پادشا.» 3پیلاتُس عیسی جا واورسه: «تو یهود پادشائی؟» عیسی جواب بدَه: «تو اَطو بگفتی!» 4بازون پیلاتُس کاهنان سران و خلقَ بگفت: «هی خطائی اَنِ محکوم کودن ره نیافتم.» 5ولی اوشان زورِ مرا بگفتید: «اون تمانِ یهودیه درون جلیل جا بیگیفته حتی تا هَیا، هرجا کی شه مردومَ خو آموختنِ مرا کوکَ کونه.»
6هطوکی پیلاتُس اَنه بیشتاوسته، خواستی بدانه اون جلیل شینه؟ 7و چون بفهمست کی هیرودیسِ حُکمرانی منطقه شینه، عیسیَ، اون ورجه اوسه کود، چونکی هیرودیس اُ موقع اورشلیم درون ایسابو. 8هیرودیس هَطو کی عیسیَ بیده، خَیلی ذوق بُکود، خَیلی زمات بو کی خواستی اونَ بیدینه. چون اونچیَ کی عیسی باره بیشتاوسته بو، ناجه دَشتی نیشانه ئی اون جا بیدینه. 9پس عیسی جا خَیلی سؤال واورسه، ولی عیسی جوابی اونَ ندَه. 10کاهنان سران و تورات آموجگاران کی اویا ایسابید، اونِ خَیلی بُهتان بزئید. 11هیرودیس و اون سربازانم عیسیَ بی احترامی بُکودید و دَسپَر گیفتید. بازون ایتا شائانه قبا اونَ دُکودید و پیلاتُس ورجه واگردانه ئید. 12هو روج میان، هیرودیس و پیلاتُس بنا به رفاقت بُکودید، چونکی پیشتر دشمند بید.
13هو موقع پیلاتُس کاهنان سران و مردوم پیله تران و خلقَ دوخواد 14و اوشانِ بگفت: «شُمان اَ مرداکَ می ورجه باوردید و بگفتید کی مردومَ گُمرا کونه. من شیمی جُلُو اونَ واورس وُورس بُکودم و اُ خطائان جا کی شُمان اونِ ضّد گیدی هیچی نیافتم. 15هیرودیسم هیچی نیافت، چونکی اونَ اَمی ورجه واگردانه. هَطو کی دینیدی، کاری نُکوده کی مُستحقِ مَردن ببه. 16پس اون شَلاق زَنم و سَرا دئم.» 17پیلاتُس هر عید، ایتا زیندانی اوشان ره سَرا دَئی.
18ولی اوشان ایصدائی داد بزئید: «اونَ سر به نیستا کون و باراباسَ اَمرا سرا دَن!» 19باراباس شورشِ واسی کی شار میان ایتفاق دکفته بو، و ئم آدمکوشی ره، خولتانک درون ایسا بو. 20پیلاتُس کی خواستی عیسیَ سَرا دِه، ایوار دِه اوشان مرا گب بزِه. 21ولی اَشان بازَم داد بزئید: «مَصلوبَ کون! اونَ مَصلوبَ کون!» 22پیلاتُس سِیّوم بار اوشانِ بگفت: «چره؟ چی بدی بُکوده؟ من هی خطائی اون جا نیافتم کی سزاوار مردن ببه. پس اونَ شَلاق زَنم و سَرا دئم.» 23ولی اوشان داد مرا زور باوردید و بخواستید کی مَصلوب ببه. آخر پسی اوشانِ داد حریف بُبوست 24و پیلاتُس حُکمی کی خواستیدَ فدَه. 25اُ مردای کی شورش و قتل واسی خولتانک درون ایسابو و مردوم اونِ آزادیَ خواستیدیَ وِلا کوده و عیسیَ اوشانَ واسپارد تا اوجور کی اوشانِ دیل خواستی اونِ مرا رفتار بُکونید.
عیسی مصلوبَ بوستن
26وقتی کی عیسیَ بَردید، ایتا مرداک شَمعون نام جه قیرَوان مردوم کی زمین جا به شار اَموئیَ بیگیفتید و صلیبَ اونِ کول سر بنئید، و وادارَ کودید کی اونِ عیسی دُمبالسر فاکِشه. 27خَیلی جه مردوم، و زناکانیم کی خوشان سینه سر زئید و گریه زاری کودید، عیسی دُمبالسر رادکفتید. 28عیسی واگردست و اوشانَ بگفت: «اَی اورشلیمِ کُران، می واسی گریه نُکونید شمرأ و شیمی زاکان ره گریه بُکونید. 29چون اُ روجانی اَیه کی خوائید گفتن: ”خوشا به حال زناکانی که اوشان ره زای نیبه، خوشا به حال اُ زایدانی کی هرگس نزا و سینهئانی کی هرگس شیر فانده!“ 30هو موقع، کوئانَ خوائید گفتن اَمی سر فُگوردید!“ و پوشته ئانَ کی ”اَمَره بپوشانید!“ 31چونکی اَگه تَرِ چوب مرا اَطو بُکودید، خُشک چوب مرا چی خوائید کودن؟»
32دو تا دِه مرداکیَم کی هر دو جنایتکار بید، بَردیدی تا عیسی مرا بُکوشید. 33وقتی اُ جیگا کی جمجمه نام دَشتی فارسه ئید، اویا عیسیَ مَصلوُبَ کودید، و اُ دوتا جنایتکارم، ایتا اون راست وَر و اویتایم اون چپ وَر مصلوب بُکودید. 34عیسی بگفت: «اَی پئر، اَشان ببخش، چونکی نانید چی کودن دَرید.» هو موقع اوشان قُرعه تَوَدَه ئید تا عیسی رختَ خوشان میان سَام بُکونید. 35خَلق تماشاکونان ایسابید و مردوم پیله ترانم رَخشن زئیدی و گفتید: «بقیه یَ مردومَ نیجات بدَه! اَگه مسیح موعوده و خُدا انتخاب بُبوسته، وئل خودشَ نیجات بده.» 36سربازانم اونَ دَسپرَه گیفتید. اَشان عیسی ورجه باموئید، تورش شراو اونَ دئید 37و گفتیدی: «اَگه یهود پادشائی، تَره نیجات بدن.» 38ایتا بینیوشته ئم اون سر جُور بچسبانه ئید کی «اَن ایسه یهودیان پادشا.»
39ایتا جه اُ دو تا جنایتکار کی مصلوب بُبوسته بید، بی احترامی مرا عیسیَ بگفت: «مگه تو مسیح موعود نیئی؟ پس خودت و امرا نیجات بدن!» 40ولی اویتا اونَ تشر بزه و بگفت: «خُدا جا نترسی؟ توئم هو حُکمَ دَری! 41اَمی مجازات به حقّه، چونکی اَمی کارانِ سزای. ولی اَ مردای هی خطائی نُکوده.» 42بازون بگفت: «اَی عیسی، وقتی به تی پادشائی فارسه ئی، مَرا ئم بیاد باور.» 43عیسی جواب بدَه: «حئیقتن، تره گَم، ایمرو می اَمرا بهشت درون خوائی ایسان.»
عیسی مَردن
44ساعت دوروَر دوازده ظهر بو کی تارکی سراسر اُ ولایتَ بیگیفت و تا ساعت سه بعداز ظهر ادامه دَشتی، 45چونکی آفتاو دِه نتاوستی. هو موقع، پرده ئی کی محرابگا درون آویزان بو، دو تیکه ببو. 46بازون عیسی ایژگره مرا بگفت: «اَی پئر، می روحَ تی دَسانَ واسپارم.» اَنه بگفت و خو آخرین نفسَ بکشه. 47سربازانِ فرمانده اَ ایتفاق دِئن مرا، خُدایَ ستایش بُکود و بگفت: «حئیقتن کی اَ مرد بیگُنا بو.» 48مردومی ئم کی تماشا کودن ره جمَ بوسته بید، وقتی اونچی کی ایتفاق دکفته بو یَ بیده ئید، هُطو کی خوشان سینه سر زئید، خوشان خانه واگردستید. 49ولی همۀ اون آشنایان، اُ زناکانی ئم کی جلیل جا اون دُمبالسر روانه بوسته بید، دور ایسابید و اَ ایتفاقَ دئن دیبید.
عیسی دفنَ کودن
50اویا ایتا مردای ایسابو یوسف نام، رامه یهودیه شار جا. اون عضو شورا بو. یوسف دُرُستکار بو و صالح 51و شورا تصمیم و نظرِ مرا مُوافق نُبو. اون خُدا پادشائی رافا ایسا بو. 52اَ مردای پیلاتُس ورجه بُشو و عیسی جنازه یَ بخواست. 53پس عیسی جنازه یَ بجیر باورده، ایتا کتان درون بیپیچانه و ایتا مقبره ئی کی سنگ درون بساخته بُبوسته بو و هیکسَ تا بحال اون درون ننَه بید بنه. 54اُ روج، ’روج آماده بوستن عید ره‘ بو و چیزی به مُقدّسِ شنبه روج نمانسته بو. 55زناکانی کی جلیل جا عیسی دُمبال بامو بید، یوسف دُمبال بُشوئید و مقبره جایَ و اَنکی چُطو جنازه یَ اویا بنه ئید بیده ئید. 56بازون به خانه واگردستید، حنوط و عطریاتَ چاکودید و شنبه روج درون، عَینِ شریعتِ حُکم، استراحت بُکودید.
Currently Selected:
لوقایِ انجیل 23: GIL
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
