انجیل یوحنا 1

کلمه انسان بیین

1صِفتنه کلمه بِه و کلمه خدا نه بِه و کلمه، خدا بِه؛ 2هَ صِفتنه خدا نه بِه. 3همه چی چَه واسطنه به وجود بامه، و هر چی‌ای که به وجود بامه، هیچ چی نبِه که بیدون چه به وجود آمییه بیبی.

4اَوک زندگی به و اَ زندگی، آدمان نور بِه. 5اِم نور تاریکیک سو زنه و تاریکی اوه اَفجور نبه.

6مردکی به که خدا طرفِنه خرسانسه بیه به؛ چَوه نام یحیی بِه. 7اَ ایگله شاهدی شوار بامه، که اَ نوره را شهادت بدیه، تا همه‌ی مردم چَوه واسطنه ایمان بوعَرنده. 8یحیی اَ نور نِبه، بلکم بامه تا اَ نوره را شهادت بدَیه. 9اَ نور حقیقی که هر انسانی روشونی دِرَنه، آمییره اِم دنیا.

10کلمه دنیاک بِه، و دنیا چَوه واسطنه به وجود بامه؛ امّا دنیا اَوِش آنِزانس. 11اَ بامه اِشتن قومه وَر، ولی چوه قوم اَوشان قبول نِکَرده. 12امّا به همه‌ی کسانی که اَوشان قبول بکرده، اِم حقش آدا که خدا خوردنان بیبینده، یعنی هر کسی که چَوه نامه ایمان بوعره؛ 13اَ خوردنه جسمک دنیا آمییه نینده، گوشت و خونک نی دنیا آمییه نینده، انسانه خواستک نی نبنده، بلکم خداک دونیا آمیینده.

14و کلمه، انسان آبه و چاما دلَک ساکن آبه. آما چَوه شکوه و جلالمان بینده، شکوه و جلالی که اَ ایگله زا شایسته اِسته، که پییَر طرفنه آمییه، که فیض و حقیقت نه فته. 15یحیی چوه درباره شهادت دییَرده و جرنه واتردشه که: «اِمه هَ کسی که چَوه درباره باتِمه: ”اَ کسی که چِمَنَه پَش آیه منک سرتر اِسه، چون چِمَنَه پران اَ اِسبه“.» 16چوه فِت بیینک آما همبلنه اَرکت، فیض، فیضه سر. 17چون شریعت، موسی واسطنه آدییَه بِبه؛ فیض و حقیقت عیسی مسیح واسطَنه بامه. 18هیچکس هرگز خداش وینده نییه. امّا اَ ایگله زا که پییَر ورکه، ه اَ خداش آما آزانسه.

یحیی شَهادتی

19اِمه یحیی شَهادتی اَدمی که یهودیان، کاهنان و لاویان که معبد خادمان بِنده شهر اورشلیمِنه بخرسانسنده یحیی وَر تا اَوک آپَرسنده که: «ته کییِش؟» 20یحیی اعتراف بکه، انکارش نکه، بلکم اعترافش بکه که: «از مسیح موعود نییِم.» 21اَوه آپرسسشانه: «پس کییِش؟ ایلیایش؟» یحیی جواب بدا: «نییِم.» اَوه آپرسسشانه: «ته اَ پیغمبری اِسش که موسی چوه آمییَنش آما وعده دییه به؟» یحیی جواب بدا: «نه!» 22اَدمی اَوِنه باتشانه: «پس ته کییِش؟ آما گه چاما خِرساناران را چه جوابی ببرام؟ اِشته درباره چه واتری؟» 23یحیی، باتشه:

«از اَ کسی صَصم که بیابانک جره کردر واتر،

” خداوند راهه دوز بِکَرا.»

اَجوره که ز اشعیای پیغمبره واته به.

24اَوه فریسی فرقه علما طرفنه خرسانسه بییه بنده، 25اَوه یحییک آپرسسشانه: «اگم ته نه مسیحش، نه ایلیا، و نه اَ پیغمبر، پس چیه را غسل تعمید دییری؟» 26یحیی چوان جواوک باتشه: «از اُونه غسل تعمید دَیم، امّا شاما دلَک کسی وِندَرسه که شاما اَوه آنِزانا، 27هَ کسی که چِمنه پَش آیه و از لایق نییِم چوه پاقابان بنده آکرم.»

28اِمه همه بِیت‌عَنْیا دهک که اُردن رباره اَ دیمک به، اتفاق دگسنده، اَگا که یحیی تعمید دسشه.

خدا قربانیه وَرَلی

29صباینه روج، یحیی بینده که عیسی آمییر چَه طرفه را، باتشه: «دیَسا اِمه اَ خدا قربانیه وَرَلی که گناه دنیاک اَگیره! 30اِمه اَ کسی که چوه درباره باتِمه ” چِمَنه پَش مردکی آیه که منک سرتره، چون چِمَنه پران اَ اِسبه.“ 31از نی اِشتن اَوم آنِزانسرده، امّا چِمه واسنه آمییم و اُونَم تعمید دییَه تا اَ خدا قومه را ظاهر آبی.» 32یحیی شهادتی بدا، باتشه: «خدا روحم بینده که کُوتری شوار آسماننه نازل ببه و چَه سرک بنشت. 33از نی اِشتن اَوم آنِزانسَرده، امّا اَ کسی که منِش بِخِرسانسم تا اُونه تعمید بدیم، مَنَش باته: ”هر موقع بیندره خدا روح کسی سرک بنشت و بندرس، بزان اَ ه کسیه که خدا مقدس روح نه غسل تعمید دَیه.“ 34و از ویندمه و شهادت دَیِم که اِم خدا زایه.»

عیسی اولین شاگرده

35صباینه روج، هنی یحیی اِشتن دو گله شاگرداننه وِندَرسه بِه. 36ایزه که عیسی اِوردره، یحیی اَوه دیشته و باتشه: «دیسا! اِم ه خدا قربانیه ورلییِه!» 37اَ دو گله شاگرد اِم لاوشان بشنوس، عیسی پَشَدنه راه دِگِسِنده. 38عیسی آگَردس و بیندشه که اَوه چَه پشدنه آمییرنده. اَواننه باتشه: «چیه پشدنه اِسِران؟» اَوان باته: «رَبّی یانی ای استاد، کاک وندری؟» 39عیسی اَواننه باتشه: «بایا و بینا.» پس بِشنده و بیندشانه کاک وندره و اَ روج اَونه بندرسنده. که حدودا ساعت چهار بعدازظهر به.

40ایگله اَ دو نفر که یحیی لاوان اَشنوسننه بشه عیسی پشدنه، آندریاس، شَمعونه پِطرُس بِرا بِه. 41آندریاس اول، اِشتن برا شَمعونش بینده و اَوِنش باته: «آما ماشیحه که هه مسیح موعود اِسه پیدامان کرده.» 42آندریاس، شمعونش بِبَه عیسی وَر. عیسی اَوش دیشته و باتِشه: «تِه شَمعونْ یونا زایش. ته’کیفا‘ داد کرنده (هه پطرس که چَه معنی صخره سِگ اِسه).»

عیسی فیلیپُس و نَتَنائیل دعوت کره

43صَباینه روج، عیسی تصمیمش بکته که بیشی جلیل منطقه. عیسی فیلیپُسش بینده و اَونش باته: «چِمن پشدنه بوره!» 44فیلیپُس اهل بِیت‌صِیْدا، آندریاس و پِطرُس شهر کین به. 45فیلیپس، نَتَنائیلش بینده و اَونه باتشه: «آما اَ کسی که موسی، توراتک و پیغمبران اِشتن کتابانک چوه دربارشان نیویشته، وینده مانه! اَ عیسی، یوسفه زا، ناصره شهر کینه!» 46نَتَنائیل اَونش باته: «مگم بی ناصرنه چاکه چی بَرایه؟» فیلیپُسه جواو بدا: «بوره و بینه.»

47وختی عیسی بیندشه نَتَنائیل چوه ور آمییر، چوه درباره باتشه: «دیسا، ایگله اسرائیلی حیقیقی که اَوک هیچ مکر و حیله ای نییه!» 48نَتَنائیله اَونه باته: «کاردنه من آزانسری؟» عیسی جواو آدا: «پیش از اِم که فیلیپُس ته داد بکره، اَدمی که هلا اَنجیله داره بنک بش، تِم بیندش.» 49نَتَنائیله جواو آدا: «استاد، ته خدا زایش! ته اسرائیله پادشایش!» 50عیسی چوه جواوکش باته: «چِمه واسنه که باتِمه تم اَنجیله داره بنک بیندش، ایمان آوردری؟ چِمه پَش، اِمکین پیله تره چیان وینی.» 51چاوش باتشه: «حقیقتا، شامانه واجم که آسمانه وینا که آبییَه و خدا فرشتان وینا که آینده جیر انسانه زا وَر و شینده کفا.»

Currently Selected:

انجیل یوحنا 1: TIT

Highlight

Copy