انجیل یوحنا 2

وِیوَه قانا دِهِک

1سوّمین روجک، جلیله منطقک، قانا دهِک، ویوه بِه و عیسی ما نی اَگارک بیا. 2عیسی و چَه شاگرده نی ویوه دعوت بِنده. 3وقتی شراب اُوجرس، عیسی ما اَونه باتشه: «اَوه د شراب ندارنده!» 4عیسی اَونش باته: «ای زلی، از اِم کاره نه چِه کار دارم؟ چِمن وقت حلا آرسه نی.»

5عیسی ما، نوکران نه باتشه: «هر چی شامانه واجه، اَجوره بِکَرا.» 6اَگارک شش گله سِگیه خمره بِه که یهودیان مذهبک چوان اُوعه، نجس چییان پاک کردنه را استفادشان کرده و هر کامینه صد و بیست لیتر یاگا کته. 7عیسی نوکران نه باتشه: «اِم خمران اُونه فِت آکَراه.» پس اَوه خمرشان کوکولی فِت آکردنده. 8عیسی اَوان نه باتشه: «اِسا کَملی ای اَوک اَگیرا و ببرا مجلسه رئیسه وَر.» پس اَوان ببردشانه. 9چاوَش مجلسه رییس اَ‌ اُیی که شراب بیه به بِچَشسشه. اَوه نِزانسرده که اَوان شرابشان کاردنه آورده، ولی نوکرانی که اُوشان اَکته به، زانسَردِشانه. مجلسه رئیس زَماش داد بکه 10و اَونه باتشه: «همه اول چاکه شرابنه پذیرایی کرنده و وختی میهمانه مست آبنده، ارزانتر شرابه آورنده؛ امّا ته چاکه شرابر تا اِسا نیا داشته!»

11اِنجوره عیسی اِشتن اولین علامت و معجزش قانای جلیله منطقک انجامش بدا و اِشتن شکوه و جلالش آشکار بکه و چَوه شاگرده اَوشان ایمان بوعرده.

12چاوش اِشتن ما و براران و شاگرداننه بشه شهر کَفَرناحوم، و چند روج اَگارک بندرسنده.

عیسی معبدک

13یهودییان پِسَخه عید نزدیک به و عیسی بِشه اورشلیمه شهره را. 14معبده حیاطک، بیندشه که بعضی گُو و پَس و کوتره خورترنده، و صرّافه نی نشتنده کسب و کار کردرنده. 15پس عیسی لافندنش شلاقی رچ آکرده و اَوش همبلنه چَوان پَسان و گُوانه، معبدک برکردنده. و صرّافان سکش گلک اَرَکردنده و چوان میزش اَوگاردنسنده، 16و کوتر خروشاننه باتشه: «اِمان اِنگارنه بِبرا بَر، و چِمن پییَر کییه کسب و کار محل مَکرا!» 17چَوه شاگرده ویرشان بوعرده که زبوره کتابک نیویشته بیه: «غیرتی که اِشته کییه را دارم من سوجانه.» 18پس یهودیان عیسی نه باتشانه: «چه علامت و معجزه ای آما آمانی تا بزانام اِم کاران اجازه داری؟» 19عیسی چَوان جواوک باتشه: «اِم معبده خرابه بِکَراه که از سُه روجک هنی اَوه رچ آکرم.» 20یهودیان باتشانه: «اِم معبده رچ آکردن چهل و شش سال طولش کشسَه، اِسا ته گره سُه روجه اَوه رچ آکَری؟» 21امّا معبدی که عیسی اَوکش لاوَه کردرده اِشتنش بدن بِه. 22پس وقتی که مَردنه پَش زنده آبه، چَوه شاگرده چوه اِم لاوشان ویر بوعرده، مقدّسه نیویشتان و چَوه لاوَشان ایمان بوعرده.

23مدتی که عیسی پسخ عیده را اورشلیمک به، خیلیان وقتی بیندشانه علامت و معجزان انجام دیه چوه نامشان ایمان بوعرده. 24امّا عیسی چوان ایمانش اعتماد نداشته، چون همه‌ی مردمش آزانسرده 25و لازم نبه کسی انسانه درباره چی اَونه باجه، چون اَ اِشتن زانسِشه انسانه دلِه دلَک چِه اِسه.

Currently Selected:

انجیل یوحنا 2: TIT

Highlight

Copy