SAHRUOTHUNA 11
11
Babel Ingsuo
1Alyi cung bangkhuo hingta ryi phang kha dyi za hnyi yi te biesuo zaw a zaa lu diy. 2Ningchiy taata a vya palaw yi te ase ruo Shinar luo vya chiy yi te capa lie ca khy ama sa. 3Cakhutaata pakha hne pakha kha, “A vaw tie ung, lungrue tue ung sala a cuosa pata rue ung siy.” Cahaacata ing sana riypata lungrue kha hnyi yi te maasalaa riypata thung kha ama hnyi. 4Cakhutaa cata thukhyi yi te, “A vaw ung la ima cuota khypuv kha sa'a ung puv, avuo a kya depa ing a suosapa kha ima ming riypata sa'a ung puv; cata a cuo li kieca alyi cung ting ta a chepatlaa diy'a kie ung puv,” amaa ta. 5Cawsaapa zaw ta ama sapa khypuv hne ing a suosapa ca mang riypata Abyipa ca a za cung. 6Cakhutaa cata Abyipa ta, “Mang tie ung, iema hing mingphang phang kha ta cuo yi te, ryi ryi kha ama cyi pakhaw; ata ama tuepa hmang hing ama tue riypa hmang a hruothuna dyi tana a cuo kalie, ama tue khingpa bangkhuo hing ama vya tue diy aa. 7A vaw tie ung, cung ung sala pakha hne pakha amaa thyi the li riypata ama ryi za pananang sa'a ung puv,” amaa ta. 8Caacuonakawta Abyipa ta capa hmang taa cata alyi cung ruo ting ta chepatlaa diy yi te khypuv sa ca ama taw. 9Caacuonakawta capa khypuv ca Babel ama ta, tahematapakieca capa lie ca Abyipa ta ama ryi kha pananang yi te, capa hmang taa cata iema kha alyi cung ruo ting ta a chepatlaa diy yi.
Shem Ciypathla Zaw
(1Chr 1.24-27)
10Hingpa hing Shem ciypathla zaw ta ama cuo. Shem kung zakha a ta kung, tiypa-aa tlung khutaata kung hning a ta pata sacapaa Arpakshad kha a sa. 11Arpakshad a sa khutaata kung zapangaa hring kalie te a hrangpa sacapaa hne sacanung zaw kha a sa yi.
12Arpakshad ca sawthung kung pangaa a ta pata sacapaa Shelah a sa. 13Shelah a sa khutaata zapaliy kung thung hring kalie te sacapaa hne sacanung hrangpa zaw kha a sa yi.
14Shelah ca kung sawthung a ta pata sacapaa Eber kha a sa. 15Eber a sa khutaata zapaliy kung thung hring kalie te sacapaa hne sacanung hrangpa zaw kha a sa yi.
16Eber ca sawthung kung paliy a ta pata sacapaa Peleg kha a sa. 17Peleg a sa khutaata kung zapaliy sawthung hring kalie te sacapaa hne sacanung hrangpa zaw kha a sa yi.
18Peleg ca kung sawthung a ta pata sacapaa Reu kha a sa. 19Reu a sa khutaata kung zahning kung caky hring kalie te sacapaa hne sacanung hrangpa zaw kha a sa yi.
20Reu ca sawthung kung hning a ta pata sacapaa Serug kha a sa. 21Serug a sa khutaata zahning kung sariy hring kalie te sacapaa hne sacanung hrangpa zaw kha a sa yi.
22Serug ca kung sawthung a ta pata sacapaa Nahor kha a sa. 23Nahor a sa khutaata kung zahning hring kalie te sacapaa hne sacanung hrangpa zaw kha a sa.
24Nahor ca kung kiy kung caky a ta pata sacapaa Terah kha a sa. 25Terah a sa khutaata zakha kung hraa hlyicaky hring kalie te sacapaa hne sacanung hrangpa zaw kha a sa yi.
26Terah ca kung sawsariy a ta pata sacapaa Abram, Nahor hne Haran kha a sa yi.
Terah Ciypathla Zaw
27Hingpa tie hing Terah ciypathla zaw ta ama cuo. Terah ca Abram, Nahor hne Haran paa ta cuo te, Haran ca Lot a paa ta a cuo. 28Haran ca a paa a thiy hluo ta a puvnapa Khaldi ruo Ur khy lie kha a thiy. 29Abram hne Nahor ca napuv kha ama chiy; Abram napuvnung a ming ca Sarai ta cuo te Nahor napuvnung ming ca Milkah ta a cuo. Ama ca Milkah hne Iskah ama paa Haran sacanung ta a cuo. 30Sarai ca ciing te saata hnyi khu vyi.
31Terah ca a sacapaa Abram hne Haran sacapaa, a samingta Lot hne a sacapaa Abram napuvnung Sarai hne khata Kanaan ruo luo si riypata Khaldi ruo Ur khy taa khata amaa tha. Cuorasala Haran ama phapa khata capa lie ca khy ama sa. 32Terah ca zahning kung pangaa a ta pata Haran lie a thiy.
Currently Selected:
SAHRUOTHUNA 11: LNT
Highlight
Share
Copy
Want to have your highlights saved across all your devices? Sign up or sign in
Lutuv Holy Bible © Bible Society of Myanmar, 2023.
