SAHRUOTHUNA 12
12
Khazing Ta Abram A Kunapa
(Lct 7.2-5)
1 #
Lct 7.2,3; Heb 11.8 Abyipa ta Abram kha, “Na ruo hne na tieriy hne na paa ing kha thuse la ica pahmung sa riypa ruo luo kha si tie. 2Nama ca mingphang lepa ta ica tue aa. Thluechiy ca pi'a angte na ming pathuo riypata ica tue aa. Caacuonakawta nama ca malie cuota thluechiy tana na cuo aa. 3#Gal 3.8 Nama thluechiy caa pipa kha thluechiy pi'a angte, nama chie caa sapa kha chie i sa aa; nama thue hingta mingphang bangkhuo ca thluechiy pi pata ama cuo aa,” a ta.
4Caacuonakawta Abram ca Abyipa ta a changpa haa khata si te, Lot ca ama hne khata a si ra. Abram ca Haran taata aa thu ning kha sawsariy kung pangaa a ta tli. 5A napuvnung Sarai hne a uvta sacapaa Lot, hne ama hnyipa chechiy bangkhuo hne Haran lie ama hnyipa sii bangkhuo hne khata Kanaan luo kha amaa tha. 6Abram ca ruo chung kha cahraw te Shekhem ama tapa hmang Moreh mathliy diy luo kha a va chiy. Capa cuo ning ca Kanaan ming kha capa ruo lie ca ama aw. 7#Lct 7.5; Gal 3.16 Cakhutaata Abyipa ca Abram'a lie kha zaa luo te, “Na samingsahlaa zaw khana hingpa ruo hing i pi'a yi,” a ta. Caacuonakawta capa lie ca ama'a lie zaa luopa Abyipa huo khata bienatluophie kha a sa. 8Capa taa cata Bethel ningchiyluo ta a awpa tluocung ruo luo kha si te, Bethel taata ningchiyluo kuo, Ai taata ningtlaluo kuo, aa lalalie kha thluodaa kha aa tuv. Capa lie ca bienatluophie kha sa te Abyipa kha aa bie. 9Cahaacata Abram ca sile hryly te Negeb luo a chiy.
Izipt Lie Abram Hne Sarai
10Capa ruo lie ca khuopuv ta cakuo a tlung nakawta Abram ca a pe riypata Izipt luo kha a si. 11Izipt luo amaa ngie'a nang caw ta a napuvnung Sarai kyihuo khata, “Nama ca canung puvthesapa na cuopa kha i pachang. 12Caacuonakawta Izipt ming ta aca hmung tiy yi ta, “Hingpa nung hing a napuv tana a cuo ta'a yi te, kama kha na thie'a yi te nama kha aca pahring'a yi. 13#Sah 20.2; 26.7 Nama nakawta kama cuo a phana riypa hne ina pahringna riypa yi ta, a sietanung tana i cuo na tapa tana a pha aa,” a ta. 14Abram ca Izipt luo a ngie tiyta Izipt ming ta a napuvnung a puvthesapa kha ama hmung. 15Faro abyi tie ta cawsaanung a puvthe hringhruopa kha ama hmung tiyta, Faro ca ama chang. Caacuonakawta cawsaanung ca Faro ing chung luo kha amaa chiyle. 16Sarai thue cata Faro ta Abram ca a phasa pata mangsang te, tuv, cue, laa a canung a capaa, siicanung siicapaa hne kala-uv zaw kha a pi.
17Cuorasala Abram napuv Sarai nakaw ca ta Abyipa ta Faro hne a ing lie a awpa bangkhuo cunglie kha ciy aa chiypa pasana a patlung sa. 18Caacuonakawta Faro ta Abram kha ku te, “I cunglie na tuepa hmang hing khaapatama a cuo? Na napuv ta a cuopa hing khaapanakawma ina chang vaciy? 19Khaapanakawma, “I sietanung tana a cuo ta cate, kama ca napuv riypata ina pala sa ciy? Ata hingta na napuvnung hing a la lah si tie,” a ta. 20Faro ta a cawsaa zaw kha naw pi yi te Abram ca a napuvnung hne a hnyipa bangkhuo hne khata ama pasi sa.
Currently Selected:
SAHRUOTHUNA 12: LNT
Highlight
Share
Copy
Want to have your highlights saved across all your devices? Sign up or sign in
Lutuv Holy Bible © Bible Society of Myanmar, 2023.
