မးသဲ 5

တဲၤဟိးဝၱၤအမှိလွံၢ်သိး

1ယ့ၣ်ရှူးစာ်ထၱးပၠၤအီၣ်အဲးအီးအီးဒဳၣ်, စထာ်ကဲၤ ခီမူၤတမဲ အခဳး. ကၱာ် ဘ့စဆးနါဝှါ နဳၤ, စပျဲၢ်စဘီၣ်တစီာ်လ့ၤထၱးကဲၤစဲာ်. 2စဘါထာ်စလီၤမီၤ ကၱာ်စဒီၣ်အူဒီဆးကဲၤလၢ်ဝၤ တစီာ်ကယဳၤ.

တဲၤဟိးဝၱၤအနှဲးနှဲး

(လူၤ ၆:၂၀-၂၃)

3“အဘဲာ်ဟိးဝၱၤမၱာ် ပၠၤအဆဲးညဲ ဒဳအသးပူၤတစီာ်နဳၤ.

မၤနဲၢ်, မီၢ်ခဳးအထံအက့ၤမၱာ်စအဲ.

4အဘဲာ်ဟိးဝၱၤမၱာ် ပၠၤအသဳးအဳးသး အဳး, ယဳၤဟးတစီာ် နဳၤ.

မၤနဲၢ်, တဲၤကမဲၤမီၤထာ်က့ၤကီစသး.

5အဘဲာ်ဟိးဝၱၤမၱာ်ပၠၤအသဳးဘၱာ် သးယူၢ်တစီာ်နဳၤ,

မၤနဲၢ်, စကနံၤဘဲာ်ကီထံက့ၤ.

6အဘဲာ်ဟိးဝၱၤမၱာ် ပၠၤအသးဝံာ်သးအီ တဲၤတၱၢ်တဲၤမှး တစီာ်နဳၤ.

မၤနဲၢ်, စကအၣ်ဘဲာ်ကဳးအီဘဲာ်ကဳးကီ.

7အဘဲာ်ဟိးဝၱၤမၱာ် ပၠၤအခီၣ်ဝဲၤတဲၤ တစီာ်နဳၤ.

မၤနဲၢ်, တဲၤကခီၣ်ဝဲၤမှီးဘဲာ်ကီစဲာ်.

8အဘဲာ်ဟိးဝၱၤမၱာ် ပၠၤအသဳးဝၱၤသးစါ တစီာ်နဳၤ.

မၤနဲၢ်, စကစာ်ထၱးဘဲာ်ကီကဘၱာ်စဲာ်.

9အဘဲာ်ဟိးဝၱၤမၱာ် ပၠၤအမဲၤယံၢ်မဲၤဒွါ တဲၤတစီာ်နဳၤ.

မၤနဲၢ်, တဲၤကယဳၤကီစဲာ် ကဘၱာ်စဲာ် အဖဳး.

10အဘဲာ်ဟိးဝၱၤမၱာ်ပၠၤအခးဘဲာ် တဲၤလိၤမဲၤဆဲးညဲတဲၤတၱၢ် တဲၤမှးအခဳးအစဲတစီာ်နဳၤ.

မၤနဲၢ်, မီၢ်ခဳးအထံအက့ၤမၱာ်စအဲ.

11“သံဘဲာ်ဟိးဝၱၤ ဘ့ယခဳးယစဲ ပၠၤဒီၣ် ကဲဒီၣ်အိးသံ, ပၠၤကလိၤမဲၤ ဆဲးညဲသံ, ကၱာ်ပၠၤ ကပၢ်ဝဲၢ်ဖြီးသံလီၤ တဲၤကမဲာ်အရါနဳၤ. 12သးကနၢ်အံာ် ကၱာ်သးလဳၢ်သးလၤအံာ်ပီၢ်. မၤနဲၢ်, သံဆိးသံ လှဲဓဳၤသ့ပွ့ၤဒဳမီၢ်ခဳးနဳၤ. မၤနဲၢ်ကဒီၣ်ဓဳၤဒဳၣ်, ပၠၤလိၤမဲၤဆဲးညဲလံၤလံၤထဳ ဝံထဲၢ်အအီၣ်အူဆူးကဲၤသံတစီာ်နဳၤ.

ဒံာ်သဲာ်ကၱာ်တဲၤလှၱ

(မၢ် ၉:၅၀, လူၤ ၁၄:၃၄-၃၅)

13“သံမၱာ်လၢ်ခဳးအဒံာ်သဲာ်. ဒံာ်သဲာ်ကတၡံမၤနီးဒဳၣ်, တၤကမဲၤၡံဒီစဲာ်နဲၤ. အတဝၤနံၤပ့ၤတၤတမံနီး, မၱာ်ပၠၤကပၢ်ဖျီးမံ ကၱာ်ကခဲထာ် ယၢ်ထာ်အခဳးပ့ၤလီၤ.

14“သံမၱာ်လၢ်ခဳးအတဲၤလှၱ. အူး, ထဲၢ် အအီၣ်ခီမူၤ ခဳးတအူး နဳၤ, အတအီၣ်ဘံာ်ဇၤနီး. 15ကၱာ်ဒီ ပၠၤဓဳၤလၤဝှါ မှၱးတ့းဒဳၣ်, ပၠၤ တဖျး လၤကျဳၤပာ်လှူၣ်နီး. မၱာ်ပၠၤဘဲထာ်အထူၣ်ခဳး စာ် ဘိထဲၢ်အကလှၱ ဘဲာ်ပၠၤလဳစါစဲးအအီၣ်ရှံၣ်ပူၤ တစီာ်နဳၤ. 16မဲၤကနဳၤဒဳၣ်, သံတဲၤ လှၱ ကလှၱ ဒီဧဲၤပၠၤအလှီမီၢ်စာ်ဘိထဲၢ်ပၠၤကစာ်ထၱးသံတဲၤဖၱး တဲၤမဲၤအဝၱၤ အအဲး, ကၱာ်ပၠၤကပဲၢ်တီၤပဲၢ်သ့းပီၢ် သံပာ်အအီၣ်ဒဳမီၢ်ခဳးတပွဲၤနဳၤ.

တဲၤသဲာ်လှိအဘဲာ်ကၠးတဲၤသိၣ်တဲၤသီ

17“ကမဳၤမဲးယလၤမဲၤကဲ စီၤမိၤၡ့အတဲၤသိၣ်တဲၤသီမၱာ်ဝၱၤ, ဝံတစီာ်အတဲၤထိးလၤ မှဲးလၤမၱာ်ဝၱၤမဲး. ယတလၤမဲၤကဲနီး, မၱာ်ယလၤ မဲၤပ့ထာ်တခီ. 18ယဒီဆးသံအတၱၢ်အမှး, မီၢ်ခဳးကၱာ် လၢ်ခဳးကဟဲးဝၱၢ်ဟဲးကဲနီၣ်သီ, တဲၤမှဲးလၤကတပ့ထာ်လဳနှၱနီးအသူသရ့, စဲာ်ဒူထၱး တမံၤတဖျဳးမၱာ်ဝၱၤ, အန့ၤတန့ၤမၱာ်ဝၱၤ, တဟဲးဝၱၢ်ဟဲးကဲ ဘဲာ်နီး. 19မဲၤကနဳၤဒဳၣ်, ပၠၤအခဲဘးတဲၤမှဲး လၤအၡံးဖဳးကဓူယဳၤအကျဲ တမှိ ကၱာ်အသဲာ် အံာ်ဟူပၠၤအကမဲၤကနဳၤတပွဲၤနဳၤ, စကဘဲာ် ယဳၤကီအၡံးဖဳး ကဓူၤဒဳ မီၢ်ခဳးအထံအက့ၤအပူၤ နဳၤ. ပရၤဆါပၠၤအမဲၤကိာ်အကါ ကၱာ်အသဲာ် အံာ်ဟူပၠၤမဲၤကနဳၤတပွဲၤနဳၤ, စကဘဲာ်ယဳၤကီ အဓဳၤကဓူဒဳမီၢ်ခဳး အထံ က့ၤအပူၤနဳၤ. 20မၱာ် ယဒီဆးသံ, သံတဲၤတၱၢ်တဲၤမှး ကတဓဳၤဒဳၣ် လံမၤအဝှ့းစဲာ်ကၱာ်ဖၤရံၤၡဲတစီာ်အဲနီးဒဳၣ်, သံတလ့ၤနံၢ်ဘဲာ်မီၢ်ခဳး အထံအက့ၤအပူၤနီး.

တဲၤမဲၤသံပၠၤ

21“သံသၱာ်ဟဲဘဲာ်ထဳလှ့တဲၤဒီၣ် ဘၱဆးကဲၤပၠၤလှ့းမဳၤတစီာ်တဲၤကယဳၤ, နတမဲၤသံ ဘဲာ်ပၠၤနီး, ကၱာ်ဒီအမဲၤသံပၠၤတပွဲၤနဳၤစကဘဲာ် ကီတဲၤစံးရးနဳၤ. 22မၱာ်ယဲၤယဳၤ, ယဒီဆး သံ, ပၠၤတပွဲၤပွဲၤကသဲးထဲးဆိးမၤစသဲပူၤဝ့ၤဒဳၣ်, စကဘဲာ်ကီတဲၤစံးရး. ကၱာ်ဒီပၠၤတပွဲၤပွဲၤကယဳၤ မၤအသဲပူၤဝ့ၤ ‘ပၠၤအနှးနှါလီၤ’ ဒဳၣ်, စကဘဲာ်ယဳၤလ့ၤကီ ဒဳအန့ၤ ဓဳၤသးပွ့ၤအယူခဳး နဳၤ. ကၱာ်ဒီ ပၠၤတပွဲၤပွဲၤ ကယဳၤစသဲပူၤဝ့ၤ ‘အကဓူၤ နှးဖါ’ ဒဳၣ်, စကလၤတ့ၢ်ဘဲာ်ကီ ဒဳလရာ်မှၱးအူအပီၤပူၤ. 23မဲၤကနဳၤ, ဘ့ာ်မ့နကလ့ၤအံာ်နတဲၤလှူၣ်ဒဳတဲၤလှူၣ်ထာ် အံာ်အလ့ၤနဳၤ, ကမဳၤ ထာ်နံၤနသဲပူၤဝ့ၤ မီၤဒီၣ်ထာ်နတဲၤကမဲာ်ကအီၣ်တမံၤမံၤဒဳၣ်, 24လဲၢ်လၤမီၢ်ကိာ်နတဲၤလှူၣ်ဒဳတဲၤလှူၣ်ထာ်အလ့ၤ အလှီမီၢ်နဳၤ, ကၱာ်လ့ၤ မဲၤ စဳးမဲၤမီၤအူဆူးမီၢ်ကိာ် နသဲပူၤဝ့ၤကၱာ်နဲၤအမ့ၢ်ဇဳၤနဳၤ, မဲၤဝှါက့ၤဘဲထာ် ကီပီၢ်နတဲၤလှူၣ်.

25“မဲၤလၤကျၤက့ၤပျါ ပၠၤအတရၤနဲၤ တပွဲၤဘ့နဟဲး ကိာ်ဝ့ၤ စကါဒဳကျဲးလီၤနဳၤ. ကတမၱာ်မၤနီးဒဳၣ်, အတရၤနဲၤတပွဲၤကအံာ်လၤဖျီး မံနဲၤအစံာ် ရးတဲၤတပွဲၤအစူးခီးပူၤဒဳၣ်, အစံးရး တဲၤတပွဲၤ ကအံာ်လၤ ဖျီးမံနဲၤခၱပွဲၤအစူးခီးပူၤ, ဒဳၣ်နကလၤဘဲာ်တပွဲးတဲၤကၱတၱၢ်ပူၤ. 26ယဒီဆးနဲၤနတပျ့းက့ၤ လဳနစွ့ဝှိကိအဘ့ာ်နီး အသူသရ့, နတဟဲး ထာ် ဘဲာ်တပွဲးတဲၤကၱတၱၢ် အပူၤနီး.

သဳးသးကၱာ်တဲၤန့ၤဘၱစဲာ်အတဲၤအီၣ်ပျၱအီၣ်စါ

27“သံသၱာ်ဟဲဘဲာ်ထဳတဲၤဒီဆးပၠၤလှ့းမဳၤ တစီာ်ကယဳၤ, ‘နတလၤကမဲာ်ဘဲာ်နီး.’ 28မၱာ်ယဲၤယဳၤ, ယဒီဆးသံ, ပၠၤတပွဲၤပွဲၤကစာ်ဝဲၢ် အမံၤမှူးဒဳတဲၤသးအဲးနံၤအကရၢ်အပူၤဒဳၣ်, စလၤကမဲာ်ကိာ် ထဳ လၢ်ဝၤဒဳစသးပူၤတခီ. 29နကၢ်ဓူအတထွဲးတဖျဳး ကမၱာ်မၤနနံၤခံ တဲၤဆဲး ဖြီးကျဲးဒဳၣ်, စဝၱလၤတ့ၢ်ဝှါ, ဝှ့ဖျီးမံပီၢ်. မၤနဲၢ် ကဒီၣ်ဓဳၤဒဳၣ်, အအဲးဒဳၣ်ချဳမၱာ်ကဆူးကပးကန့ၤ ဘၱစဲာ်တကီတကၱာ် ဒဳၣ်လံကၱာ် ကလၤ တ့ၢ်နံၢ် လရာ်အပူၤသဒဲပွဲၤဒဳးတခီ. 30ကၱာ်ဒီနစူးခီး အတထွဲးတခီကမဲၤလၤခူးနံၢ်နဲၤတဲၤခီၣ်ဝဲၤအပူၤဒဳၣ်, ကျါထဲဓူၢ်ဝှါဒဳၣ်ဝှ့ဖျီးမံစဲာ်. မၤနဲၢ် ကဒီၣ်ဓဳၤဒဳၣ်, အအဲးဒဳၣ်ချဳမၱာ်နစူးနခၣ်တအီၣ်နီးတခီဒဳၣ်လံကၱာ်နလၤတ့ၢ် နံၢ်လရာ်အပူၤသဒဲဗွဲနဳၤ.

တဲၤပၢ်ဖျီးမံအမှဲ

(မး ၁၉:၉, မၢ် ၁၀:၁၁-၁၂, လူၤ ၁၆:၁၈)

31“ကၱာ်ဒီတဲၤဒီဆးအီၣ်ကဲၤကယဳၤ. ‘ပၠၤတပွဲၤပွဲၤကနှးဟဲး ဖျီးမံအမှဲဒဳၣ်, စကအံာ်ဘဲာ်လၢ်ဝၤစဲာ်လၤဖြး.’ 32မၱာ်ယဲၤ ယဳၤယဒီဆးသံ, ပၠၤတပွဲၤပွဲၤ, ကတမၱာ်တဲၤလၤ သူးလၤကမဲာ်အခဳးအစဲနီး, ကနှးဟဲးဖျီမံစမှဲဒဳၣ် စနှးလၤသူးလၤကမဲာ်လၢ်ဝၤလီၤ. ကၱာ်ဒီအမံၤခဳ အဖၱး က့ၤအမံၤမှူးအဘဲာ်နှးဟဲးကဲတပွဲၤနဳၤ မၱာ်မၱာ် စမၱာ်အလၤကမဲာ်လီၤလီၤ.

တဲၤသဲာ်လှိအဘဲာ်ကၠးတဲၤအဳလါဖျးလၤ

33“တပျာ်ပ့ၤသံသၱာ်ဟဲဘဲာ်ထဳတဲၤဒီဆး ကဲၤပၠၤ လှ့းမဳၤတစီာ်ကယဳၤ. ‘နတဝှိးပ့ၢ်ဆ့းဒါ တရၤဇါဘဲာ်နန့ၤနီး. မၱာ်နမဲၤကိာ်ဘဲာ်နတဲၤ အဳလါဖျးလၤကဘၱာ်စဲာ်တစီာ်နဳၤ.’ 34မၱာ်ယဲၤယဳၤယဒီဆးသံ, ဝှိး ဒါမဲးတပျါမဲး. ဝှိးဒါအံာ်မဲး မီၢ်ခဳးမဲး. မၤနဲၢ်, မီၢ်ခဳးမၱာ် ကဘၱာ်စဲာ်အနၤ. 35ဝှိးဒါအံာ်မဲးလၢ်ခဳးမဲး. မၤနဲၢ်, လၢ်ခဳးမၱာ်ကဘၱာ်စဲာ်အခၣ်တဆူ. ဝှိးဒါအံာ်မဲးယရူၤၡလ့ၣ်အူးမဲး. မၤနဲၢ်, ယရူၤၡလ့ၣ်မၱာ်ဆးဖြးဓဳၤ တပွဲၤအအူး. 36ဝှိးဒါအံာ်မဲးနကဳာ်မဲး. မၤနဲၢ်, နတမဲၤဘိာ်သါ, မၱတမၱာ်နီး မဲၤသံပးကဲာ်ထာ် နခူၣ်လူတဘီနီး. 37သံတဲၤယၱၢ်ဘဲာ်ကမၱာ်ဒီဧဲၤ, အီၣ်ဒဳၣ်အီၣ်, နီးဒဳၣ်နီး. တဲၤယၱၢ်ဘဲာ် အဖျီးတလိးကၱာ်အဘး ခဳးနဳၤအီၣ် ထာ်ကိာ်ကၱာ်တဲၤကၱကဲာ်လီၤ.

တဲၤသဲာ်လှိအဘဲာ်ကၠးတဲၤမဲၤက့ၤအလံၢ်

(လူၤ ၆:၂၉-၃၀)

38“သံသၱာ်ဟဲဘဲာ်ထဳတဲၤဒီၣ်, ‘ကၢ်ဓူ တဖျဳးအလံၢ်ကၢ် ဓူတဖျဳး, ကၱာ်ဒီသိတဘဲာ် အလံၢ်သိတဘဲာ်နဳၤ.’ 39မၱာ်ယဲၤယဳၤယဒီၣ် သံမဲၤ က့ၤပီၢ်မဲးတဲၤကၱကဲာ် အလံၢ်မဲး. ပၠၤတပွဲၤကဒဲးနနၱၤထၱးအတထွဲး တခီဒဳၣ်, ဒးဝဲၢ်နံၤကိာ်စဲာ်အတစၱးတခီဘဲာ်. 40ပၠၤတပွဲၤပွဲၤကတရၤနဲၤဒဳယူခဳး ကၱာ် ကသး အဲးဖၱးသူဧူၢ်နဲၤနၡံာ်ဒဳဒဳၣ်, အံာ်ဒီၣ်စဲာ်နၡံာ်ဒဳချဳ တခီ. 41ပၠၤတပွဲၤပွဲၤ ကစွံးနှးလ့ၤနဲၤ တသရဲးအပူၤဒဳၣ်, လ့ၤကိာ် စကါကၠံၢ်သရဲး အပူၤတခီ. 42ပၠၤအတၤနဲၢ်တဲၤတပွဲၤ, အံာ်ပီၢ်စဲာ်. ကၱာ်ဒီပၠၤအသးအဲးလီၤတဲၤဒဳ နအီၣ်တပွဲၤ, ဒူၣ်ဖျီးမံမဲးနန့ၤမဲး.

တဲၤဘဲာ်လီၢ်ဒ့ဒီၣ်ရီၢ်ခဲး

(လူၤ ၆:၂၇-၂၈,၃၂-၃၆)

43“သံသၱာ်ဟဲဘဲာ်ထဳတဲၤဒီၣ်, ‘နကဘဲာ် လီၢ်ဘဲာ်နသဲပူၤဝ့ၤ, ပရၤဆါနတဝဲၢ်တဆဲဇၤ တပွဲးနဒ့ဒီၣ်ရီၢ်ခဲး.’ 44မၱာ်ယဲၤယဳၤ, ယဒီၣ်သံ, ဘဲာ်လီၢ်ပီၢ်သံဒ့ဒီၣ်ရီၢ်ခဲး, ကၱာ်ဒီသဘဲပီၢ်ပၠၤအလိၤ မဲၤဆဲးညဲ သံ ကၱာ် အဒီၣ်ကဲဒီၣ်အိးသံမံၤသံခဲတစီာ်အနံၤခံ. 45စာ်ဘိထဲၢ်သံကမၱာ်ပီၢ်သံပာ်အအီၣ်ဒဳ မီၢ်ခဳးထဲၢ် အနှးလူၤမူၤထာ်ပၠၤ အဝၱၤကၱာ်အကၱကဲာ် တစီာ်အခဳး, ကၱာ်အအံာ်ဝှဲးစူၤလၤနံၤပၠၤအတၱၢ်အမှးကၱာ် ပၠၤ တတၱၢ်တမှး နီးတစီာ်အခဳးတပွဲၤအဖဳးအလံၤနဳၤ. 46သံကဘဲာ်လီၢ်ထဲၢ် အဘဲာ် လီၢ် သံတစီာ် လီၤဒဳၣ်, သံကနံၤဘဲာ်ဒီ သံဆိးသံလှဲတၤနဲၢ်. အတၤတဲၤ မှူတစီာ်နှီနူၤ မဲၤသဲကနဳၤလီၤလီၤ တဘဲာ်နီးဧါ. 47သံကနှူဆဲး လီၤထ့ သံ သဲပူၤသဲဝ့ၤတစီာ်လီၤဒဳၣ်, သံမဲၤချဳဒီတၤနဲၢ်. ပွဲၤ သူ ကူးဖဳး တစီာ်နှီနူၤမဲၤသဲကနဳၤလီၤလီၤ တဘဲာ်နီးဧါ. 48အစာ်ဘိသံပာ် အအီၣ် ဒဳမီၢ်ခဳးတပွဲၤဝၱၤစါပ့ထာ်ဇီၤထာ်နဳၤ, သံမၱာ်မၱာ် ပ့ထာ်ဇီၤထာ်ပီၢ် ကနဳၤ.”

Currently Selected:

မးသဲ 5: GBA

Highlight

Copy