မးသဲ 6
6
တဲၤအံာ်က့ၤစာ်က့ၤ
1“ဆီးအံာ်ပီၢ်သံန့ၤစာ်ဘိထဲၢ်သံကတမဲၤတဲၤထဲၢ်အဘဲာ် အံာ်လၤနံၤသံတစီာ်ပၠၤအလှီ မီၢ်ဒဳပၠၤကစာ်ထၱး သံအဲအနံၤခံနဳၤမဲး. သံကမဲၤ မၤကနဳၤဒဳၣ်, သံကတနံၤဘဲာ်တပွဲးသံဆိးသံလှဲ ဒဳပာ်အအီၣ်မီၢ်ခဳးနဳၤ နီး.
2“မဲၤကနဳၤဒဳၣ်, ဘ့နအံာ်က့ၤစာ်က့ၤပၠၤ နဳၤ, အူးမဲးကွဲၤပၠၤလှီ မီၢ် အစာ်ဘိပၠၤအဝၱၤတပီးခဳး မဲၤဒဳဘူၣ်ဘျီၣ်ကၱာ်ကျဲးတၡံးအပူၤ, စာ်ဘိ ထဲၢ် ပၠၤကဒဳကယးစဲာ်နဳၤမဲး. ယဒီၣ်သံအတၱၢ်အမှး, စနံၤ ဘဲာ်ထဳစဆိး စလှဲ. 3ကၱာ်ဒီဘ့နအံာ်က့ၤ စာ်က့ၤပၠၤနဳၤ, နစူးခီးအတထွဲး မဲၤ တၤနဲၢ်နူၤ, အံာ်မဲးနစူးခီးအတစၱးသၱာ်ဟဲကိာ်မဲး. 4စာ်ဘိထဲၢ်နတဲၤအံာ်က့ၤစာ်က့ၤ ကအီၣ်ဟူၣ် အီၣ်ဇီၤပီၢ်နဳၤ, ကၱာ်ဒီနပာ် ထဲၢ်အစာ် ထၱးတဲၤ ဟူၣ်တဲၤဇီၤအကျဲတပွဲၤကအံာ်ကီနဆိးနလှဲနဳၤ.
တဲၤတၤသဘဲ
(လူၤ ၁၁:၂-၄)
5“ကၱာ်ဒီဘ့ သံသဘဲထာ်နဳၤ, မဲၤမဲးအစာ်ဘိ ပၠၤဝၱၤတပီးခဳး, ထဲၢ်အဘဲာ်လီၢ် ဆီထဳးသဘဲဒဳဘူၣ်ဘျီၣ်ကၱာ်ကျဲးတၡံးအပူၤ စာ်ဘိထဲၢ် ပၠၤကစာ်ထၱးစဲာ်တစီာ်နဳၤမဲး. ယဒီၣ်သံအတၱၢ်အမှး, စနံၤဘဲာ်ထဳစဆိးစလှဲ. 6မၱာ်နဲၤနဳၤ, ဘ့နသဘဲထာ်နဳၤ, က့ၤနံၢ်နရှံၣ်ဒဳးပူၤ ကၱာ်ဒီကျဲၢ် ဘံာ်ဝှါနခးကျဲၢ်, သဘဲထာ်ဟူၣ်ဇီၤပီၢ် နပာ်, ကၱာ်ဒီနပာ်ထဲၢ် အစာ်ထၱး တဲၤဟူၣ် တဲၤဇီၤအကျဲတပွဲၤ, ကအံာ်က့ၤကီနဆိးနလှဲ.
7“ကၱာ်ဒီဘ့သံသဘဲထာ်အခၠၱးနဳၤယၱၢ်ဘဲာ် အီၣ်အဲးအီးအီးမဲး အစာ်ဘိပွဲၤသူကူာ်ဖဳးတစီာ် နဳၤမဲး. မၤနဲၢ်ကဒီၣ်ဓဳၤဒဳၣ်, စကမဳၤ စယၱၢ်ဘဲာ် အီၣ်အဲးခၣ်လဲာ် တဲၤကဆီးခ့န့းကီစလ့ၢ်နဳၤ. 8မဲၤကနဳၤဒဳၣ်, မဲၤပီၢ် မဲးအစာ်ဘိစဲာ်တစီာ် နဳၤမဲး. မၤနဲၢ်ကဒီၣ်ဓဳၤဒဳၣ်, သံတဆဲတၤနှၱနီး, သံပာ် သၱာ် ဟဲထဳတဲၤအလဳၤပၤသံနံၤခံ မၱာ်တၤနဲၢ်နဳၤ. 9မဲၤကနဳၤဒဳၣ်, သံနဳၤ, သဘဲထာ်ပီၢ်ကယဳၤ, အဳဝၤပာ် အအီၣ်ဒဳမီၢ်ခဳး, နမံၤကဘဲာ် ဒီပီၢ် ဧဲၤအစါထံတကၱာ်. 10နထံနက့ၤကဓဳၤဒီပီၢ်ဧဲၤတကၱာ်. အစာ်ဘိ တဲၤမဲၤ အန့ၤထ့နသးဒဳမီၢ်ခဳးနဳၤ, တဲၤကမဲၤဒီပီၢ်ဧဲၤ အန့ၤဒဳလၢ် ခဳးအခဳး ယဳၤတကၱာ်. 11ခဳနဳၤ တနံၤခီၣ်ဝဲၤအံာ်လၤပီၢ်ဝၤတဲၤအၣ်တကဳာ် တကၱာ်. 12ကၱာ်ဒီဘါပျဲးပီၢ်ဝၤတဲၤကမဲာ်, အစာ်ဘိဝၤဘါပျဲး ပၠၤ အမဲၤကမဲာ်ဝၤတစီာ် အခီနဳၤတကၱာ်. 13ကၱာ်ဒီ လ့ၤအံာ်ဟူ မဲးဝၤ ဒဳတဲၤနှးကါအကျဲမဲး. မၱာ်မဲၤလှိထာ်ပီၢ်ဝၤဒဳ တဲၤကၱကဲာ်အကျဲနဳၤတကၱာ်.
14“မၤနဲၢ်, ဘ့သံဘါပျဲးပၠၤတစီာ်အတဲၤ ကမဲးနဳၤ, သံပာ်အအီၣ်ဒဳမီၢ်ခဳးတပွဲၤ မၱာ်မၱာ် ကဘါ ပျဲာ်ကီသံတဲၤကမဲာ်တစီာ်နဳၤ. 15ပရၤဆါ သံတဘါပျဲးမၤပၠၤအတဲၤကမဲာ်နီးဒဳၣ်, သံပာ်မၱာ်မၱာ်ကတဘါ ပျဲး တပွဲးသံတဲၤ ကမဲးနီးနီး.
တဲၤသဲာ်လှိ အဘဲာ်ကၠး တဲၤဒူၣ်တဲၤအၣ်တဲၤအီ
16“ကၱာ်ဒီ ဘ့နဒူၣ်တဲၤအၣ်တဲၤအီနဳၤ, စာ် လၤသယိးမဲး အစာ်ဘိ ပၠၤအတပီးခဳးတစီာ် မဲၤနဳၤမဲး. မၤနဲၢ်ကဒီၣ်ဓဳၤဒဳၣ်, စမဲၤသံဝံၤစမူၢ် ကါပူၤ, စာ်ဘိထဲၢ်ပၠၤကစာ်ထၱး စဒူၣ်တဲၤအၣ် တဲၤအီနဳၤ. ယဒီဆးသ့ပွ့ၤ သံ, စနံၤဘဲာ်ထဳစဆိး စလှဲ. 17မၱာ်နဲၤနဳၤ, ဘ့နဒူၣ်တဲၤအၣ်တဲၤအီ နူၤ, သဖြိးနကဳာ်တဲၤနှူဝံာ်ကၱာ်အူပျၤနမူၢ်ကါ, 18စာ်ဘိထဲၢ်ပၠၤကတစာ်ထၱးနဒူၣ်တဲၤအၣ် တဲၤအီနီး, မၱာ်နပာ်အအီၣ်တဲၤဟူၣ်တဲၤဇီၤတပွဲၤ ကစာ်ထၱးသၱာ်ဟဲပီၢ်လီၤနဳၤ, ကၱာ်ဒီနပာ်အစာ်ထၱး တဲၤဟူၣ်တဲၤဇီၤကျဲတပွဲၤကအံာ်က့ၤကီနဆိးနလှဲ.
တဲၤလံၢ်ဓဳၤပွၱၤသဲဒဳမီၢ်ခဳး
(လူၤ ၁၂:၃၃-၃၄)
19“လဲၢ်တထၱက့ၤမဲး သံနံၤခံတဲၤလၱၢ်ဓဳၤ ပွၱၤသဲဒဳလၢ်ခဳး, ထဲၢ်ဒဳထးလးအံာ် ကၱာ်ဖဲပူးအၣ် လဳၢ်ဇၤ, ကၱာ်ဒဳပၠၤအၣ်ဟူၣ်မဲၤ ကဲတဲၤ ဘးဖျီလ့ၤ နံၢ်ဇၤအပူၤအလ့ၤယဳၤနဳၤမဲး. 20မၱာ်လဲၢ် တထၱက့ၤပီၢ် သံနံၤခံ တဲၤလံၢ်ဓဳၤပွၱၤသဲဒဳမီၢ်ခဳး, ထဲၢ်ဒဳထးလးအံာ်မၱာ်ဝၱၤ, ဖဲပူးမၱာ်ဝၱၤ, တအၣ်လဳၢ် ဇၤနီး, ကၱာ်ဒဳပၠၤအၣ်ဟူၣ်မဲၤကဲတဲၤ တဘးဖျီ ကၱာ်လ့ၤနံၢ် ဇၤအပူၤနီးအလ့ၤနဳၤ. 21မၤနဲၢ်ကဒီၣ်ဓဳၤဒဳၣ်, ဘ့နတဲၤလံၢ်ဓဳၤပွၱၤ သဲ အီၣ်အလ့ၤနဳၤ, နသးအီၣ်ကိာ်ကိာ်.
န့ၤဘၱစဲာ်အတဲၤလှၱ
(လူၤ ၁၁:၃၄-၃၆)
22“နကၢ်ဓူမၱာ်နန့ၤဘၱစဲာ်အတဲၤလှၱ, နကၢ်ဓူကလှၱမၤဒဳၣ်, နန့ၤဘၱစဲာ်သဒဲပွဲၤကလှၱကီ. 23မၱာ်နကၢ်ဓူကဇီၤပြၤမၤဒဳၣ်, နန့ၤဘၱ စဲာ် သဒဲ ပွဲၤကအီၣ်ကီတဲၤခံးကျဲ. နတဲၤလှၱအအီၣ်နပူၤကခံးမၤဒဳၣ်, နတဲၤခံးနဳၤအကဇၱၢ်ကီပွ့းတဲၢ်လီၤ.
ကဘၱာ်စဲာ်အထံအက့ၤ
(လူၤ ၁၆:၁၃, ၁၂:၂၂-၃၁)
24“ပၠၤတခးဇိၤဇၤ အဘၱာ်စဲာ်ကၠံၢ်ပွဲၤနီး. မၤနဲၢ်ကဒီၣ်ဓဳၤဒဳၣ်, စကထဲးကဲထဲးအိးတပွဲၤ ကၱာ်ဘဲာ်လီၢ်အလဝ့ၤတပွဲၤ, မၱတမၱာ်နီး, စကမဲၤကိာ်ကီတပွဲၤအကါ, ကၱာ်ထဲးကဲကီအလဝ့ၤတပွဲၤ. သံတခးဇိၤဇၤ ကဘၱာ်စဲာ်ကၱာ်မၤမိၣ် တပျာ်ခါလီၤနီး.
25“မဲၤကနဳၤဒဳၣ်, ယဒီဆးသံ, သံတဲၤ အီၣ်အနံၤ ခံဘဲာ်ၡဳ ဘဲာ်မၤမဲး သံကအၣ်ဘဲာ်အီ ဘဲာ်တၤနဲၢ်နဳၤမဲး, ကၱာ်ဒီသံန့ၤဘၱစဲာ်အနံၤခံ, သံကကိကသီးဘဲာ်တၤနဲၢ်နဳၤမဲးမဲး. ကတဲၤအီၣ်တဓဳၤချဳ လံမဲၤတဲၤအၣ် တဲၤအီနီးဧါ. ကၱာ်ဒီကန့ၤဘၱစဲာ် နဳၤတဓဳၤချဳလံကၱာ်တဲၤကိ တဲၤသီးနီးဧါ. 26စာ်ပီၢ်, ထဳၣ်ဖဳးယဳၢ်လံၤဒဳ ကလံၤကျဲနဳၤ, အတပၢ်ဘူၣ်ခွံနီး, အတကဲာ် ဘူၣ်နီးနီး, အတတီးနံၢ်က့ၤဖါပူၤနီးနီး, ပရၤဆါသံပာ်အအီၣ် ဒဳမီၢ်ခဳးတပွဲၤ ဘိၣ်အၣ် တပွဲးစဲာ်. သံလံၢ်သံပွၱၤတဓဳၤချဳလံပီၢ်စဲာ်တစီာ် အဇၱၢ်အဇိၢ်နီးဧါ. 27ဒဳသံကျဲနူၤ, အကဳထာ် ကၠးလၤကၱာ်အမဲၤထိ ထာ်ဇၤအန့ၤတပျ့ၤအီၣ်ပီၢ် တပွဲၤပွဲၤဧါ.
28“ကၱာ်ဒီသံတဲၤကိတဲၤသီးအနံၤခံ, သံဘဲာ်ၡဳမၤနဲၢ်. စာ်ပီၢ်, ဖီဒ့ၣ်ညါဒဳပြးပူၤနဳၤကဲာ် ထာ်စာ်တဲၢ်. အတမဲၤတဲၤနီး, အတလှ့းလှူၣ် နီးနီး. 29ပရၤဆါယဒီဆးသံ, စီၤၡလိၤမိၤ နှီနူၤ, ဒဳစတီၤစသ့း အကျဲ, စတကိတသီး ကဲာ်ထာ်အစာ်ဘိဖီအယဳၤတစီာ်အကျဲတဖီနီး. 30ကၱာ်ဒီပြးပူၤအမံၤ, ထဲၢ်အအီၣ်ခိတနံၤ ကၱာ်မီၤဗ့တနံၤအဘဲာ် ဝှ့နံၢ် မှၱး အပီၤပူၤနဳၤ, ကဘၱစဲာ်ကဒဳးကိဒဳးသီးစဲာ်ပွ့ကနဳၤဒဳၣ်, အဳသံ, အတဲၤ ဘူၣ်ၡံးဖဳးတစီာ်, ဒဳၣ်လံကၱာ်အနဳၤ, စတဒဳးကိဒဳးသီးသံနီးဧါ.
31“မဲၤကနဳၤဒဳၣ်, ဘဲာ်ၡဳကၱာ်ဒီၣ်မဲး, ‘ဝၤကအၣ်တၤနဲၢ်, ဝၤကအီတၤနဲၢ်, ဝၤကကိ ကသီးတၤနဲၢ်’ နဳၤမဲး. 32မၤနဲၢ်, အလိၤ ဝၢ်လှဲး တဲၤအယဳၤလဳစါစဲးမၱာ်ပွဲၤသူကူာ်ဖဳးလီၤ. တဲၤအယဳၤတစီာ်ဘဲာ် အီၣ်သံနံၤခံနဳၤ, သံပာ်အအီၣ်မီၢ်ခဳးတပွဲၤ သၱာ်ဟဲတပွဲး. 33မဲၤကနဳၤဒဳၣ်, ဝၢ်လှဲးအူဆူးပီၢ်ကဘၱာ်စဲာ် အထံအက့ၤကၱာ်စတဲၤ တၱၢ် တဲၤမှး, ကၱာ်သံကနံၤ ဘဲာ်ကိာ်ကီတဲၤအယဳၤလဳစါစဲး. 34မဲၤက နဳၤဒဳၣ်, ဘဲာ်ၡဳအံာ်မဲးမီၤဗ့အနံၤခံမဲး, မၱာ်မီၤဗ့ကဘဲာ်ၡဳအံာ်ဒီဧဲၤအနံၤခံ. ခိတနံၤအနံၤခံ, ခိတနံၤအတဲၤပၤတဲၤဆဲ ဆိအံာ်ဆဲးအံာ်ထဳတပွဲး.
Currently Selected:
မးသဲ 6: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
