မးသဲ 7
7
တဲၤဆဲးကိနံၤတဲၤစံးရးဖးမ့
(လူၤ ၆:၃၇-၃၈,၄၁-၄၂)
1“စံးရးမဲး, စာ်ဘိထဲၢ်သံတဘဲာ်စံးရးပီၢ်နီးနဳၤ. 2မၤ နဲၢ်ကဒီၣ်ဓဳၤဒဳၣ်, အစာ်ဘိ သံစံးရးစာ်တဲၢ်နဳၤ, သံကဘဲာ် စံးရးကီကနဳၤ, ကၱာ်ဒီ အစာ်ဘိသံကိၤသံထဲတဲၤအဓ့နဳၤ, သံကကိၤစာ်ထဲစာ်ဘဲာ်ကီ. 3နစာ်ထၱးမၤ တဲၤကနိးအအီၣ်နသဲပူၤဝ့ၤအကၢ်ဓူပူၤကၱာ် နတစာ် ထၱး မၤဇ့ၤကျ့ၤအအီၣ်ကဲးကးနကၢ်ဓူ ပူၤတဘီ နီးနဲၢ်. 4‘အံာ်ပီၢ်ယခွဲး ထာ်တဲၤကနိးအီၣ်နကၢ်ဓူပူၤ,’ နဒီၣ်ဇၤမၤနသဲပူၤဝ့ၤဒဳၣ်နဲၢ်. စာ်ပီၢ်, ဇ့ၤ ကျ့ၤအီၣ်သဲနကၢ်ဓူပူၤနၱၢ်. 5နဲၤ, အဝၱၤတပီးခဳး, ခွဲးထာ်ဖျီးကဲအူ ဆူးဇ့ၤကျ့ၤ အအီၣ်နကၢ်ဓူပူၤ, ကၱာ်ဒီဘ့နဳၤနစာ်ထၱးလှၱဖြူးဒဳၣ်, နကခွဲး ထာ်ကဲဇၤကီတဲၤကနိးအအီၣ်နသဲပူၤဝ့ၤ အကၢ်ဓူပူၤနဳၤ.
6“တဲၤအစါထံနဳၤ အံာ်မဲးထွံၣ်တစီာ်မဲး, ကၱာ်ဒီ ဝှ့လၤတ့ၢ်မဲး လဳၤမီၤရၤထီးအလှီမီၢ်မဲး, မဲၤတဘဲာ်နီး အကယၱၢ်ထာ်ခဲထာ်ဝှါအခဳး, အကဘးတပ့ၤအန့ၤကၱာ်အကအ့းလၤလှဲးလၤဘး သံဒီၣ်ဗ့.
တဲၤသဘဲအခဳးအအါ
(လူၤ ၁၁:၉-၁၃)
7“တၤပီၢ်, ကၱာ်တဲၤကအံာ်ကီသံ. ဝၢ်လှဲးပီၢ်, ကၱာ်သံကပး ထၱးကီ. တကျီးပီၢ်, ကၱာ်တဲၤကဘါထာ်နံၤကီသံ. 8မၤနဲၢ်, ပၠၤအတၤတဲၤကိအပွဲၤနံၤဘဲာ်တပွဲး, ကၱာ်အဝၢ် လှဲးတပွဲၤ ကပးထၱးတပွဲး, ကၱာ် အတကျီးတပွဲၤ နဳၤ, တဲၤကဘါထာ်နံၤကီစဲာ်. 9ဒဳသံကျဲနဳၤ, အဖဳး တၤအၣ်တကဳာ်ဒဳၣ်, အကအံာ်ဝဲၢ်စဲာ်လဳၤ အီၣ်ပီၢ်တပွဲၤပွဲၤဧါ. 10မၱတမၱာ်နီး စတၤ အၣ်ဓၢ်ဖဳးဒဳၣ်အကအံာ်ဝဲၢ်စဲာ်ဝူၤ အီၣ်ပီၢ်တပွဲၤ ပွဲၤဧါ. 11မဲၤကနဳၤသံနဳၤ, သံမၱာ်နီၣ်သီအကၱ ကဲာ်ဖဳးနှီနူၤ, သံသၱာ် ဟဲတပွဲး အကအံာ် အဖဳးအလံၤတဲၤအအဲးတစီာ်နဳၤဒဳၣ်, သံပာ်အအီၣ်ဒဳမီၢ်ခဳး တပွဲၤကအံာ်ဒဳၣ်ချဳကီ ပၠၤအတၤစဲာ်တစီာ်တဲၤအဲးပွ့တမံၤပ့ၤ.
တဲၤမှဲးလၤအကျဳၤပူၤ
12“မဲၤကနဳၤဒဳၣ်, တဲၤအရါထဲၢ် သံသးအဲးနံၤ ပၠၤကမဲၤနံၤ သံနဳၤ, မဲၤပီၢ်ပၠၤပၠၤ. မၤနဲၢ်, အယဳၤ မၱာ်တဲၤတဲၤမှဲးလၤကၱာ်ဝံတစီာ် အတဲၤသိၣ်တဲၤသီ အကျဳၤပူၤလီၤ.
ခးကျဲၢ်အအၱးနှဲဖဳး
(လူၤ ၁၃:၂၄)
13“လ့ၤနံၢ်ပီၢ်ခီးဒ့တၤအအၱးနှဲဖဳးအပူၤ. မၤနဲၢ်ကဒီၣ်ဓဳၤဒဳၣ်, ခီဒ့တၤအခီကၱာ်ကျဲးအဓဳၤ အခီမၱာ်အဓဳၤနံၢ်ဒဳတဲၤကဲတဲၤအိးအကျဲနဳၤ, ကၱာ် ပၠၤအလ့ၤနံၢ်အပူၤအီၣ်အဲးအီးအီးဒဳး. 14ခီးဒ့တၤအဓဳၤနံၢ် တဲၤအီၣ်အကျဲတပူၤမၱာ်အအၱး နှဲးဖဳးကၱာ်အပၤ, ကၱာ်ဒီအလ့ၤနံၢ်ကိာ်မၱာ် အီၣ်တကၱာ်ဖဳးလီၤ.
သဳာ်အမူၤကၱာ်အသဲာ်
(လူၤ ၆:၄၃,၄၄)
15“ဆီးအံာ်ပီၢ်သံန့ၤကၱာ်ဝံအပျဲာ်ကအီၣ် ထာ်ထဲၢ်အလ့ၤထၱး သံ, အကိအသီးသဳဖ့း, ပရၤဆါဒဳအသးပူၤမၱာ်ထွံၣ်မံၤကယၤဘိာ် အအါ ဝူၢ်အါသဖျဲးတဲၤတစီာ်နဳၤ. 16သံကသၱာ် ဟဲ ကီစဲာ်တစီာ်ကၱာ် စဖီ စသဲာ်. ပၠၤဒ့းပီၢ်သဳာ်ပၡံး သဲာ်ဒဳတၤဆူးအမူၤလီၤနဳၤဧါ, မၱတမၱာ်နီး, သဳာ် ဓဳၤ ထံသဲာ် ဒဳတၤဆူးအမူၤလီၤနဳၤဧါ. 17စာ်ဘိကနဳၤအခီ, သဳာ် အဝၱၤကိအဘီ သဲာ်ထာ် အံာ် သဳာ်သဲာ်အဝၱၤ, ကၱာ်သဳာ်အတဝၱၤနီး သဲာ် ထာ်အံာ် သဳာ်သဲာ်အတဝၱၤနီး. 18သဳာ် အဝၱၤတသဲာ်ထာ်အံာ်ဇၤ တဲၤသဲာ်အတဝၱၤနီးနီး, ကၱာ်ဒီသဳာ်အတဝၱၤနီး တသဲာ်ထာ်အံၤဇၤ သဳာ်သဲာ် အဝၱၤနီးနီး. 19သဳာ်ကိအမူၤ, ထဲၢ်တသဲာ်ထာ်အံၤတဲၤသဲာ် အဝၱၤ နီးနဳၤ, ကဘဲာ် ကိၢ်ကဲ, ကၱာ်ကဘဲာ်ဝှ့နံၢ်ကီမှၱးအကျဲ. 20တဲၤမဲၤအန့ၤကနဳၤဒဳၣ်, သံကသၱာ်ဟဲဘဲာ်ကီ စဲာ်တစီာ်ကၱာ် စဖီစသဲာ်.
ယတသၱာ်ဟဲသံနီး
(လူၤ ၁၃:၂၅-၂၇)
21“ပၠၤအယဳၤယဲၤဘၱာ်စဲာ်, ဘၱာ်စဲာ်, တစီာ် နဳၤ, တဘဲာ်စကလ့ၤနံၢ်ဘဲာ်မီၢ်ခဳးအထံအက့ၤ ပူၤကိအပွဲၤနီး. အကလ့ၤနံၢ်ဘဲာ် မီၢ်ခဳး အထံ အက့ၤပူၤမၱာ်ပၠၤထဲၢ်အမဲၤယပာ်အအီၣ်မီၢ်ခဳး တပွဲၤ အတဲၤသး အဲးနံၤတစီာ်နဳၤလီၤ. 22ဒဳမူၤနံၤတနံၤနဳၤ, ပၠၤအီၣ်အဲဗွဲ ကဒီၣ်ကီ ယဲၤ, ဘၱာ်စဲာ်, ဘၱာ်စဲာ်, ဝၤတဒီၣ်တီၤလီၤကဲၤတဲၤနမံၤ အပူၤနီးဧါ. ကၱာ် ဝၤတနှးဟဲးထာ်ကဲၤတဲၤရှံး တဲၤနှဲးနမံၤအပူၤနီးဧါ. ကၱာ်ဝၤ တမဲၤကဲၤတဲၤ ပီၤ တဲၤပၤပွ့တမံၤနမံၤအပူၤနီးဧါ. 23ကၱာ်ဒီ ဘ့နဳၤယဒီၣ်ဖျီ ထာ် ကီစဲာ်တစီာ်, ‘ယတသၱာ်ဟဲ ကဲၤသံတပျါနီး, ဆဲးတပီၤယဲၤ, သံထဲၢ်အမဲၤ တဲၤကၱကဲာ်မဲၤလှီတစီာ်နဳၤ,’ ယကဒီၣ်ကီစဲာ်ဒဳၣ်.
တဲၤဒီထိးအကူဓူၤ
(လူၤ ၆:၄၇-၄၉)
24“မဲၤကနဳၤဒဳၣ်, ပၠၤအဆီးခ့န့းယတဲၤ ယၱၢ်ဘဲာ်အယဳၤ တစီာ်ကၱာ် အမဲၤကိာ်အကါ ကိအဗွဲၤနဳၤ, စကမၱာ်ကီအစာ်ဘိပၠၤအပျၱၢ်အပျၤထဲၢ်အပြးထာ်ကဲၤအၡံၣ်ဆီးအခဳးတပွဲၤနဳၤ. 25ကၱာ်ဒီဝှဲးဇူၤလၤ, ထံဓဳၤတကျီကၱာ်ကလံၤ တပဳၢ်နီၣ်သီ, ၡံၣ်အနဳၤတဝၤတက့ၤဖျီးတပွဲးနီး. မၤနဲၢ်ကဒီၣ်ဓဳၤဒဳၣ်, အကါထၱးဒီလါမှ့းကဲၤဆီး အခဳး.
26“ကၱာ်ဒီပၠၤအဆီးခ့န့း ယတဲၤယၱၢ်ဘဲာ် အယဳၤတစီာ်, ပရၤ ဆါအတမဲၤကိာ်အကါနီး ကိအပွဲၤနဳၤ, စကမၱာ်ကီအစာ်ဘိပၠၤကဓူၤ ထဲၢ် အပြးထာ်ကဲၤအၡံၣ် လဳၤသံမံးခဳးတပွဲၤနဳၤ. 27ဝှဲးဇူၤလၤ, ထံဓဳၤ တကျီ, ကလံၤ တပဳၢ်ဘဲာ် ဒဳၣ် အက့ၤဖျီးတပွဲး, ကၱာ်အကဲအအိး ဆိး ကဲၤ.”
28ကၱာ်ဒီဘ့ယ့ၣ်ရှူး အတဲၤယၱၢ်ဘဲာ်အယဳၤတစီာ်ကူဓူၤ ဝှါ နဳၤ, ပၠၤအပဳၤအဟီးထဲးတမိၢ်တမှါနံၤကဲၤ စတဲၤသိၣ်တဲၤသီအလ့ၤ. 29မၤနဲၢ်ကဒီၣ်ဓဳၤဒဳၣ်, စဒီၣ်အူဒီဆးကဲၤလၢ်ဝၤ တစီာ်အစာ်ဘိအဖျူအသရ့ာ်အီၣ်တပွဲၤနဳၤ, တဘဲာ်အစာ်ဘိ ပၠၤသၱာ်တဲၤသိၣ်တဲၤသီ တစီာ် နဳၤနီး.
Currently Selected:
မးသဲ 7: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
