لوقا 12

1ولما كتـرت الناس وصاروا بالآلافات وصاروا يدافشوا بعض بدي يسوع يوجه كلامّه بالأول لتلاميذُه ويقول: ديروا بالكو ع حالكو من الخميـرة، يعني من توجهن الفريسيين. 2فش إشي متخبي مش رَح يبين أو مستور ومش رَح ينكشف 3عشان هيك كل اللي قُلتوه في عتمة الليل رَح ينسمع في نور النهار. واللي وشوشتوه في الدان في الغرف الجوانية رَح يعلنوه من فوق أسطح البيوت.

4وبقلكو يا صحابي، تخافوش من اللي بُقتلو الجسد وبقدروش يعملو أكثر من هيك. 5أنا بكشفلكو من مين تخافو. خافو من اللي بعد مَ يموِّت عندُه السُلطان إنُه يزتْ في جهنم. وعنجد بقلكو خافوا منُه. 6مش الخمس عصافير حقها رخيص؟ وحتى ولو سعرها رخيص، الله بنساش ولا واحد منها. 7وإنتو حتى شعر راسكو . . . كل شعره معدودة. تخافوش مكانتكو أحسن من كل العصافير.

8وبقلكو كل واحد بِعتـرف بعلاقتي معه قدام الناس رَح يعتـرف فيه ابن الإنسان قدام ملايكة الله. 9بس اللي بتبـرا مني قدام الناس رَح اتبـرا منه قدام ملايكة الله. 10وكل واحد بِحكي على ابن الإنسان بِنغفرلو. بس اللي بهين الروح القدس مش رح ينغفرلو. 11ولما بجروكو قدام الكُنس والزعما وأصحاب الحكم تهكلوش هم كيف تحكوا أو كيف تردوا ع الاتهامات. 12لأنُه الروح القدس رَح يرشدكو إيش تحكوا في هديك السيعة.

13وفي واحد من الناس قال ليسوع: يا معلم، قول لأخوي إنُه لازم يتقاسم الوِرثه معي. 14فقلو يسوع: يا خيّا، مين عيّني قاضي وُمقَسِّم للورثة تبعتكو؟ 15وقال يسوع للناس: انتبهوا واحموا حالكو من كل نوع طمع لأنُه حياتُه للبني آدم مش بوفرة وكثـرة اللي عنده. 16وقلهن يسوع متَل، قال: في واحد غني طلّعت أرضو حصاد كثيـر. 17فصار يفكر ويقول: شو لازم أعمل لأنو معنديش محل احط فيه حصادي؟ 18وفكر وقال: خليني أهدم المخازن تبعتي وأبني أكبـر منها وأخزّن هناك كل القمح والخيرات تبعتي. 19ورَح أطمّن نفسي وأقول: يا نفسي عندك كتيـر بركات بِتْكَفيِكِ لسنين كتيـرة: فاستريحي وكُلي واشربي واحتفلي. 20فقلُه الله: يا غبي، في هاي الليلة رَح تنتهي حياتك. واللي حضّرته لمين بدو يضل؟ 21وهيك حال اللي بوَفِّر بس لنفسه بدال ميكون غني لألله.

22وقال يسوع لتلاميذُه عشان هيك أنا بقلكو لما بتفكروا بحياتكو وبجسمكو تهكلوش هم الأكل واللبس. 23لأنو الحياة والجسم أكتـر من أكل ولِبس. 24راقبوا الغربان لا بتـزرع ولا بتحصد وفِش عندها لا مخزن ولا مخبى للأكل، بس الله برزقها. طيب وإنتو! مش قيمتكو أكبـر بكتيـر من قيمة الطيور!؟ 25ومين منكو يا اللي بتقلقو بقدر يطوّل عمرُه لحظة وحدة؟ 26فإذا القلق بفدِش بأبسط الأشياء ليش بتقلقوا بباقي الأشياء؟ 27فكروا كيف الورد البـري بِكبـر، لا بِتعب ولا بخيّط أواعيه وبقولكو . . . سليمان بكل عظمتُه مَ كَنِش يلبس زي وردة وحدة منهن! 28يا قليلي الإيمان، إذا الله بلّبس النباتات الموجودة اليوم واللي بُكره رَح تنحرق بالنار كيف بدُش يلبّسكو؟ 29عشان هيك تكونوش مشغولين بأكلكو وشربكو وتقلقوش. 30لأنو هيك حال أهل العالم بس أبوكو عارف إنكو بتحتاجو الأكل والشرب. 31انشغلو بمملكتُه وكل هاي الأشياء رَح تتوفرلكو. 32م تخفش يا قطيع الخرفان الزغيـر لأنو أبوكو قرّر أنو يعطيكو المملكة. 33بيعو ممتلكاتكو وتبـرعو للفقرا، افتحو إلكو حسابات توفير ولا مرة بتفلّس وكنزكو في السماوات مش رح ينقص، هناك فش حرامية تسرق ولا سوس يخرّب. 34لأنو قلبكو رَح يكون مشغول بالمحل اللي بتحطو فيه كنوزكو.

35كونوا لابسين ومستعدين وضاوين الضو 36فإنتو مثل ناس عم بِستنوا المسؤول عنهن يرجع من سهرة العرس عشان لما بُوصل ويدق ع الباب طوالي يفتحولو. 37نيالهن هدول الخُدّام لما بيجي سيّدهن وبلاقيهن سهرانين. بأكدلكو إنو بشد همته وبقعّدهن يوكلو وُبِدُور يخدمهن. 38ونيالهن هدول الخُدّام إذا بيجي السيّد بنص الليل أو قبل الفجر وبلاقيهن سهرانين. 39وافهموا إنه لو صاحب البيت بِعرف أي ساعة رح ييجي الحرامي سيعتها مش رح يخليه يُحفر ويفوت ع بيته. 40وإنتو كونوا مستعدين لأنُه ابن الإنسان رح ييجي في وقت تتوقعوهُش.

41سألُه بطرس: يا رب، بهذا المتَل، بتقصدنا إحنا بس وِلا كمان كل الناس؟ 42فسأل الرب: طيب مين هو المدير الأمين والفهمان اللي بِوَكْلُو السيد يوزع ع خدامه حصتهن من الأكل في الوقت المناسب؟ 43نيالُه هادا الخادم لما برجع السيد وبلاقيه عم بتصرف مِتِل م طلب منه. 44بأكدلكو إنو رَح يحطو السيد مسؤول ع كل ممتلكاته. 45بس إذا هادا الخادم صار يفكر ويقول لحالو: رح يطوّل السيّد قبل م يرجع، فبدي يضرب الولاد اللي بِخدمو والبنات الخدّامات وصار يوكل ويشرب ويسكر. 46فلما بِرجع سيد هادا الخادم في يوم مش متوقَع وفي ساعة غفلة رح يعاقبو ويخلي نصيبه مع الكُفّار. 47وهادا الخدّام اللي عارف شو بدو سيّدُه بس م عملش المطلوب ولا كان جاهز فرَح ينضرب كثيـر. 48واللي مش عارف بس عمل إشي بستحق عليه القصاص فرَح ينضرب شوي. اللي انعطى كثيـر رَح ينطلب منه كتيـر. واللي أمّنوه على كتيـر رَح ينطلب منه أكتـر.

49إجيت أولِّع الأرض بالنار وأديش بتمنى إنها تكون ولّعت. 50بس مطلوب مني معمودية اتعمّدها وأديش أنا مضغوط لحد متنتهي. 51بتفكروني إنو إجيت عشان يحل الهدوء ع الأرض؟ بقولكو: لأ وبالعكس جِبِت انقسام. 52لأنُه من إسه خمسة في بيت واحد رَح ينقسمو 3 ضد 2 وُ 2 ضد 3. 53ورَح يصير الأب ضد ابنه والابن ضد أبوه والأم ضد بنتها والبنت ضد أمها والمره ضد كنتها والكنة ضد مرة عمها.

54وقال كمان للجماهير: لما بتشوفو الغيمة جاي من شقة الغرب طوالي بتقولو جاي عاصفة، وبصير زي م حكيتو. 55ولما بتهب ريح جنوبية بتقولو جاي حم، وبصير زي م حكيتو. 56يا موجهنين، بتعرفوا تفهموا حالة الطقس من مراقبة الأرض والسما بس كيف مش فاهمين هادا الوقت؟

57وليش مش عم توصلوا لحالكو للقرار الصح؟ 58ولما بتـروح لعند القاضي مع الشخص اللي رافع عليك قضية اعمل جهدك في الطريق إنك تعمل معه اتفاقية وإلا رَح يجرك لعند القاضي والقاضي رَح يسلمك للشرطي والشرطي رَح يزتك في الحبس. 59وبأكدلك مش رَح تطلع من هناك لحد ما تدفع كل اللي عليك.

Currently Selected:

لوقا 12: CGB

Highlight

Copy