لوقا 13

1وُصل في هداك الوقت ناس وحكوا ليسوع عن ناس من الجليل خلط بيلاطس دمهن مع دم ذبايحهن. 2رد عليهن يسوع وقلهن: فكركو إنُه هيك صار فيهن لأنهن هنّي ناس خاطيين أكثـر من كل أهل الجليل؟ 3الجواب لأ. وبقلكو إذا بتوبوش كلكو رَح تموتو زيهن. 4وُفكركو إنُو ال 18 واحد اللي انقتلو لما وقع عليهن برج سلوام هنّي خاطيين أكثـر من كل سكان أورشليم؟ 5الجواب لأ. وبقلكو إذا بتوبوش كلكو رَح تموتو زيهن.

6وقال هادا المتَل: في واحد عنده كرم عنب كبّر فيه شجرة تين. ولما أجا يدوّر ع الثمر ملاقاش فيها إشي. 7فقال للبُستنجي: اطّلع، صرلي 3 سنين باجي وبدوّر ع الثمر في هالتينة وبلاقيش فيها إشي. اقطعها . . . ليش نتركها تعطّل الأرض؟ 8رد البستنجي وقلُّه: يا سيّد اتركها كمان هاي السنة وخليني احرث حوليها واحط سماد، 9ويا ريتها بعدين إتطّلع ثمر وإذا م طلعتش اقطعها.

10وفي مرّه في يوم سبت كان يسوع عم بعلّم في واحد من الكنُس 11وكان في مره صارلها 18 سنة راكبها روح، مرّضها، وانحنى ظهرها وبطّلت تقدر ترفعه. 12لما شافها يسوع ناداها وقلها: يا ست إنت تحررت من مرضك 13وحط إيديه عليها وطوالي صار ضَهِرْها دُغري وصارت تمجّد الله. 14فغضب رئيس الكنيس لأنُه يسوع شفى المره يوم سبت، وقال للناس: في 6 أيام مسموح فيها الشُغل تعالو واطلبوا الشِفا فيها، بس مش في يوم السبت. 15رد الرّب وقال: يا موجهنين، مش كل واحد منكو في يوم السبت بِفك حبل ثوره أو حماره المربوط في محل الأكل وبوديه يشرب مي؟ 16وهاي الست من نسل إبراهيم ربطها الشيطان 18 سنة ممنوع تنفك من هادا السجن في يوم السبت؟ 17ولما حكى يسوع هادا الكلام كل اللي وقّفوا ضدُه انخزوا بس كل الناس التانية فرحوا بكل الأعمال العظيمة اللي كان يعملها.

18وقال: شو بِشْبَهْ ملكوت الله وبشو أشبهُه؟ 19بشبه بزرة خردل اخذها واحد وزرعها في بستانه. كبـرت وصارت شجرة وصارت طيور السما تعشش ع أغصانها. 20وسأل كمان مرة: بشو أشبّه ملكوت الله؟ 21بِشْبَه خميـرة اخذتها وحدة مرة وحطتها بقلب 3 طناجر طحين لحد مَخِمْرتْ كل العجينة.

22وصار يسوع يعلّم في المدن والقرى اللي في الطريق لأورشليم 23وفي واحد زلمه سأله: يا سيّد، بتفكر إنُو اللي رَح يخلصوا عددهن قليل؟ فقلهن يسوع: 24اعملوا جهدكو إنكو تفوتوا من الباب الضيق وبقلكو كتار رَح يجربو يفوتو بس مش رَح يقدرو يفوتوا. 25وبعد مَ بقوم صاحب البيت وبقفّل الباب ببلشو الناس الواقفين بره يدقو ع الباب ويقولو: يا رب، افتحلنا، بجاوبهن وبُقلهن: من وين إجيتو أنا بعرفكوش. 26سيعتها ببلشو يقولو أكلنا وشربنا معك وعلَّمِتْ بشوارعنا. 27برد عليهن وبُقلهن: من وين إجيتو أنا بعرفكوش. ابعدو عني إنتو كلكو أشرار. 28وبرّه رَح يكون البِكى وطقطقة الأسنان. وسيعة متشوفو إبراهيم واسحاق ويعقوب وكل الأنبيا اللي في ملكوت الله رَح تكونو مطرودين بره. 29ورَح تيجي الناس ع العزيمة اللي في ملكوت الله من الشرق والغرب والشمال والجنوب. 30واللي إسه من الأوائل رَح يصيروا من الأواخر واللي إسه من الأواخر رَح يصيروا من الأوائل.

31سيعتها أجا لعندو جماعة من الفريسيين وقلولو: اتركنا واترك البلد لأنو هيرودس بِدّو يقتلك. 32فقلهن يسوع: روحو وقولو لهادا التعلب: "هياني عم بطرد الشياطين وبشفي المرضى اليوم وبُكره ورَح أخلِّص في اليوم التالت". 33وأنا لازم أكمّل المشوار اليوم وبُكره وبعد بُكره لأنُو مش من اللايق إنو يموت نبـي بريت أورشليم. 34يا أورشليم يا أورشليم: يا قتّالة الأنبيا ويا اللي بتراجدي بالحجار ع الرسل اللي جايين عندك. أكم من مرة كنت بدي أَلِمْ ولادك زي مَبِتْلِمْ الجاجة صيصانها تحت جناحاتها بس إنتو بدكوش. 35هياه بيتكو رَح يصير بيت مهجور وبقلكو: مش رَح تشوفوني لحد مَ يجي الوقت اللي تقولو فيه: بركة الله مع الجاي باسم الرب.

Currently Selected:

لوقا 13: CGB

Highlight

Copy