لوقا 14
14
1وفي مرّة، في يوم سبت فات يسوع يوكل في بيت واحد من رؤسا الفريسيين وصاروا يراقبوه 2وأجا قدام يسوع زلمة جسمه متورم من مرض الاستقساء 3وسأل يسوع شيوخ التوراة والفريسيين وقلهن: مسموح نشفي في يوم السبت وِلَا لأ؟ 4فسكتوا. مسك يسوع المريض وشفاه وطلب منُه يروِّح. 5وسألهن: مين منكو إذا في يوم السبت وقع ابنه أو ثوره في بير بقيمُش طوالي؟ 6ومقدروش يحكو ولا كلمة.
7ولاحظ يسوع كيف أنُه المعازيم عم بختاروا كراسي الشرف، فقلهن متَل، قال 8لما بعزمك حدا ع حفلة عُرُس تقعدش في أول صف أحسن م يكون في ضيف تاني أهم منك 9فبيجي اللي عزمك وبقلك: اعطيه محلك. سيعتها بتنحرج وُبِتـروح لآخر صف. 10فلما بتنعزم روح أقعد في آخر صف عشان لما ييجي اللي عزمك يقُلّك: يا صاحبي تقدم لقدام سيعتها بِكرمك قدام كل المعازيم. 11لأنُو كل واحد بكبّـر بقيمة حاله رَح تصغر قيمته واللي بتواضع رَح يكرموه. 12وقال يسوع للزلمة اللي عزمُه: لما بتعمل عزيمة غدا أو عشا تعزمش لا صحابك ولا إخوتك ولا قرايبك ولا جيرانك الأغنيا عشان ميردولكاش العزيمة بعزيمة. وتكون هاي مكافئتك. 13على العزيمة تبعتك اعزم الفقرا واللي عندهن إعاقة والعُرج والعميان. 14ونيالك لما بتتصرف هيك لأنهن بقدروش يردوا العزيمة. فبتكون مكافئتك مع الأبرار يوم القيامة.
15في واحد من المعازيم لما سمع يسوع قلُّه: نيالُه الإنسان اللي رَح يوكل في ملكوت الله. 16فرد عليه يسوع وقلُّه: في واحد عمل حفلة عشا كبيـرة وعزم كثيـر ناس. 17ولما صار وقت العشا بعث واحد من خدامه لعند المعازيم عشان يقلهن: تفضلو تعالوا، العشا إسه جاهز. 18وكلهن اعتذروا. رد الأول وقال: يا ريتك تعذرني، اشتريت مزرعة ولازم أروح أشوفها. 19رد التاني وقال: يا ريتك تعذرني، اشتريت 10 ثيـران وأنا رايح افحصها. 20رد التالت وقال: بعدني عريس جديد عشان هيك بقدرش آجي. 21رجع الخادم وحكى للسيّد شو صار. غضب السيد صاحب البيت وقال للخادم اطلع بسرعة ع شوارع البلد وحاراتها وجيب لهون الفقرا واللي عندهن إعاقة والعُرج والعميان. 22فقال الخادم: يا سيد اللي طلبته صار وبعد في محل زيادة 23فقال السيد للخادم: اطلع ع الشوارع البعيدة وع المفارق وشد ع الناس إنها تيجي لحد ميصير بيتي ملان. 24وبقلّكو فش حدا من هدول الزلام اللي اعتذروا رَح يدوق إشي من العشا تبعي.
25وتجمّعوا كتيـر ناس ورا يسوع فدار ناحيتهن وقلهن: 26اللي بيجي لعندي وبحبنيش أكتـر من أبو وإمو وولاده وقرايبه وحتى نفسه بقدرش يكون تلميذي. 27واللي بِحملش صليبو وبمشي وراي بقدرش يكون تلميذي. 28وإذا في حدا منكو بدو يبنـي برج مش لازم بالأول يقعد يحسب التكلفة ويتأكد إنو معه مصاري كفاي؟ 29فبلاش يحط الأساس وبعدين ميقدرش يكمّل. سيعتها بِبدو كل اللي براقبوه يستخفو فيه. 30ويقولوا: هادا الزلمة بدي يبني بس مقدرش يكمّل. 31وإذا في ملك بدو يفوت في حرب مع ملك تاني مش لازم بالأول يقعد يقرر إذا بِقدر بـ 10.000 جندي يوقف قدام 20 ألف جندي هاجمين عليه؟ 32وإذا بقدرش سيعتها قبل م ييجي الجيش ببعث ناس يعملوا اتفاقية سلام. 33وبنفس المفهوم كل واحد منكو بتخلاش عن كل ممتلكاتُه بقدرش يكون تلميذي.
34الملح منيح. بس إذا الملح فقد طعمو بإيش الواحد بدّو يملّح؟ 35بنفعش لا للتربة ولا للسماد وراح نرميه بره. افهموا منيح شو عم بتسمعو.
Currently Selected:
لوقا 14: CGB
Highlight
Share
Copy
Want to have your highlights saved across all your devices? Sign up or sign in
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة
