لوقا 15

1وكل شغيلة الضرايب والناس الخاطية أجو لعند يسوع عشان يسمعوه. 2فتذمروا جماعة الفريسيين وجماعة الكتبة ع يسوع وقالو: شو ها الزلمة اللي برّحب بالخاطيين وبوكل معاهن. 3فقلهن يسوع هادا المتَل، وسأل: 4مين فيكو إذا عندو 100 خروف وضاع منهن خروف واحد بتـركش ال 99 خروف في المرعى وبروح يدوّر ع الخروف الضايع لحد م يلاقيه؟ 5ولما بلاقيه بفرح وبحملُه ع كتافه 6وبرجع عبيتُه وبنادي صحابه وجيرانُه وُبُقلهن: افرحوا معي، عَشَني لقيت خروفي الضايع. 7وبقُلكو: هيك رَح تفرح السما بخاطي واحد بتوب أكثـر من 99 واحد دوغري مش محتاجين إنهن يتوبوا.

8وإذا في مره معها 10 شقف من مصاري فضة وضيّعت واحدة منهن مش بتضوي الضو وبتكنّس البيت وبدوّر منيح لحد م تلاقي الشقفة الضايعة؟ 9ولما بتلاقيها بتنادي صاحباتها وجاراتها وبتقُلهن: افرحو معي لأني لقيت الشقفة الضايعة. 10وبقُلكو: هيك رَح تفرح ملايكة السما بكل خاطي بتوب.

11وقال يسوع: كان في زلمة عندو ولدين. 12حكى الولد الزغيـر مع أبوه وقلُّو: يا بابا، اعطيني حصتي من الورثة. فقسّم الأب ممتلكاته ع ولاده. 13وبعد أكم من يوم جمّع الابن الزغيـر كل حصتُه وسافر ع محل بعيد وهناك ضيّع كل مصرياتُه وعاش يُصرف بدون حساب. 14وبعد مَصرف كل مصرياته صار في مجاعة مش بسيطة في هديك البلد. وصار محتاج. 15فراح يطلب شُغل عند واحد من أهل البلد وُشَغَّلُه يرعى خنازير في أرضُه. 16وكان يشتهي يوكل الخروب اللي بتوكلو الخنازير بس فش حدا طعماه. 17ولما حط عقله براسه قال: خُدام أبوي عندهن ملان أكل وأنا عم بموت هون من الجوع. 18خليني أقوم وأروح لعند أبوي وأقلُّه: "بابا، أنا غلطت في حق الله وفي حقك 19وُبستاهلش أكون ابنك خليني زي خادم من خدامك". 20وقام وراح لعند أبوه. ولما شافه أبوه جاي من بعيد حن قلبه عليه وركض لعنده وعبطه وباسه. 21فقلّو الابن: "بابا، أنا غلطت في حق الله وفي حقك وُبستاهلش أكون ابنك". 22وقال الأب لخُدامُه: يللا بسرعة لبسوه أحسن أواعي ولبسوه خاتم بأصبعه وبوط بإجريه. 23وجيبوا العجل الـمربرب وأدبحوه وخلينا نحتفل ونوكل. 24لأنو ابني هادا رجعتلو الحياة بعد مَ مات ولقيناه بعد مَ كان ضايع. وبديت الاحتفالات.

25وكان الابن الكبير في المزرعة ولما رجع وقرب ع البيت سمع صوت موسيقا ورقص. 26فنادى واحد من الخدام وسأله شو في؟ 27رد عليه وقلُّو: أخوك رجع بالسلامة فذبح أبوك العجل المربرب 28غضب وبطّل بدو يفوت، فطلع أبوه وصار يراضيه. 29بس هو رد ع أبوه وقلُّه: "أنا صرلي عم بخدمك كل هالسنين، ولا مرة كسرتلك كلمة وإنت ولا مرة اعطيتني جدي عشان احتفل فيه مع صحابي. 30بس لما رجع ابنك هادا اللي ضيع مصرياتك ع الزنى طوالي قدمتلو العجل المربرب". 31رد الأب وقلُّه: يا ابني، إنت دايماً معي وكل أملاكي إلك. 32بس كان ضروري نحتفل ونفرح لأنو أخوك هادا رجعتلو الحياة بعد مَ مات ولقيناه بعد مَ كان ضايع.

Currently Selected:

لوقا 15: CGB

Highlight

Copy