مرقس 1

1هيك بِدْيَت الأخبار الحلوة عن يسوع المسيح ابن الله: 2مكتوب في كتاب النبي إشعيا: هيـاني عم ببعث رسولي قدامك عشان يحضرلك الطريق. 3هو بنادي بصوت عالي في الخلا وبقول: حضروا الطريق للرب، جهزوا طرق دوغرية. 4هادا المكتوب تحقق في يوحنا الـمعمدان اللي كان عم بِعْلِن في الخلا عن معمودية التوبة عشان تنغفر الخطايا. 5وراح كل سكان اليهودية وأورشليم لعند يوحنا وتعمدوا على إيديه في نهر الأردن. واعترفوا بخطاياهن. 6وكانت أواعي يوحنا من وبر الجمال وكان يلبس قشاط جلد على خصرو وكان يوكل جراد وعسل بري. 7وكان ينادي ويقول اللي بيجي بعدي هو أعظم مني لدرجة إني بستحقش أوَطّي وأفك رباط إجريه. 8أنا عمدتكو بالـمي بس هو راح يعمدكو بالروح القدس.

9وفي هديك الأيام ترك يسوع الناصرِة اللي في الجليل. وتعمّد في نهر الأردن على إيدين يوحنا. 10وأوَّل مَ طِلع من الـمي شاف السماوات انشقت والروح نازلة عليه متل الحمامة. 11وطلع صوت من السماوات وقال: إنت ابني المحبوب اللي فرّح قلبي.

12وطوالي حرَّك الروح يسوع عشان يروح ع الخلا. 13وقعد الشيطان يجربه في البرية 40 يوم. وكان مع الحيوانات البرية وكانت الملايكة تخدمه.

14وبعد م اعتقلوا يوحنا أجا يسوع يبشر بإنجيل الله. 15وصار يقول: أجا الوقت وُبِدْيَت مملكة الله توصل. فتوبوا وآمنوا بالإنجيل.

16ولما كان يسوع عم يمشي ع شط بحر الجليل شاف سمعان وأخوه أندراوس عم بِرموا شبكة صيد في البحر لأنهن كانوا صيادين سمك. 17وقلهن يسوع: صيروا تلاميذي ورح أعملكو صيادين للناس. 18وطوالي تركوا شباك الصيد وراحوا معو. 19وبعد م مشي شوي شاف ولاد زبدي يعقوب ويوحنا وكانوا في القارب عم بِحضروا شباك الصيد 20وأوَّل م شافهن طلب يسوع منهن أنو يصيروا تلاميذو فتركوا أبوهن زبدي في القارب هو والشغيلة وراحوا مع يسوع.

21وفاتوا على كفرناحوم. وأوَّل ما دخل السبت فات يسوع ع الكنيس وصار يعلِّم 22انصدموا من تعليمه لأنو كان عم بِعلمهن بسلطة ومش مِتِل جماعة الكتبة. 23وفي الكنيس كان في واحد زلمة راكبو روح نجس فصار يصيّح. 24ويقول: شو بِدَّك منا يا يسوع النصراوي؟ جاي عشان تقضي علينا؟ أنا بعرف مين إنت. 25إنت قدوس الله. انتهره يسوع وقلّو: سكر تمك واطلع منه. 26وصار الزلمة يتزعفل بسبب الروح النجس ويصيّح بصوت عالي وطلع منو. 27والكل تعجبوا وصاروا يقولوا لبعض: شو هادا؟ هادا تعليم جديد. بسلطان بُؤمر الأروح النجسة وبترد عليه. 28وطوالي انتشرت الأخبار عن يسوع في كل الجليل.

29وأوَّل م طلعوا من الكنيس راحوا ع بيت سمعان واندراوس وكان معهن يعقوب ويوحنا. 30وكانت حماة سمعان مريضة بالفرشة وُحمها عالي. فأوَّل م فات يسوع حكولو عنها. 31وراح لعندها ومسك إيدها وقَوَّمها وراح الحم. وصارت تخدمهن. 32وبعد غروب الشمس ولما صارت الدنيا ليل جابوا كل الموجوعين واللي راكبهن شياطين. 33وتجمعوا كل أهل المدينة عند الباب. 34وشفى يسوع كتيـر من الموجوعين بأمراض مختلفة وطرد شياطين كـتير وم سمحش للشياطين إنها تحكي لإنها عرفتو.

35وقام يسوع بكيـر كـتيـر قبل م تطلع الشمس وطلع لمحل خلا وقضى وقت يصلي هناك. 36وسمعان واللي معه فتشوا ع يسوع. 37ولما لقوه قلّولو: الكل عم بدوّر عليك. 38قلهن: خلينا نروح ع محل تاني لعند الجيـران اللي في القرى اللي جنبنا عشان بدي أبشر كمان هناك. هادا هو السبب اللي أجيت عشانه. 39وكان يبشر في الكُنس اليهودية في كل الجليل وكان يطرد الشياطين.

40وأجا لعندو واحد أبرص وركع قدامه يِتْـرَجّى ويقول إذا بدك، إنت بتقدر تخليني طاهر. 41شفق يسوع عليه ومد إيدو ولمس جسمه وقلّو: بدي، فكون طاهر. 42وطوالي شِفي من البـرص وصار طاهر. 43وفي نفس اللحظة حذره يسوع وأمره يروح 44وقلّو: أوعك تحكي لحدا عن اللي صار. وروح لعند الكاهن خليه يشوف إنك شفيت واعمل مِتِل م وصى موسى وبرهن شفاءَك. 45بس هو طلع وبدي يعلن وينشر الخبر في كل محل لحد م إنو يسوع بطّل يقدر يفوت ع مدينة بالعلن. وصار يقعد في الخلا وصارت الناس من كل محل تيجي لعندو.

Currently Selected:

مرقس 1: CGB

Highlight

Copy

Compare