مرقس 15

1وأوَّل مَ طِلع اِلنهار عملو رؤسا الكهنة اجتماع مع الشيوخ وجماعة الكتبة وكل أعضاء السانهدرين. وربطو يسوع وجرّوه وسلّموه لبيلاطس. 2سألُه بيلاطس: إنت ملك اليهود؟ قلو يسوع: إنت اللي بتقول. 3وكان رؤسا الكهنة عم بتهموه بكـتيـر إشياء. 4فسألو بيلاطس كمان مرة وقلو: بدكاش تحكي إشي؟ شوف كيف عم بِتـهموك. 5بس يسوع محكاش إشي فاستغرب بيلاطس.

6وفي كل عيد كان بيلاطس يطلِّع سجين واحد. السجين اللي هني بطلبوه. 7وكان في أسير أمني اسمه باراباس. شارك في القتل مع المتمردين وقت الانتفاضة. 8وُصار الشعب يطلب من بيلاطس إنو يحرر سجين مِتِل م عوَّدهن. 9فسألهن بيلاطس: بدكو اطلعلكو ملك اليهود؟ 10كان بيلاطس عارف إنو رؤسا الكهنة سلّمو يسوع لإنهن بغارو منو. 11فهيّجو رؤسا الكهنة الشعب عشان يختارو تحرير باراباس. 12حكى معهن بيلاطس كمان مرة وسألهن: طيب شو بدكو أعمل باللي بتقولو عنو ملك اليهود؟ 13رجعو يصيّحو وقالو: اُصلبُه. 14فقلهن بيلاطس: شو الغلط اللي عملو؟ صارو يصيّحو أكثر ويقولو: اُصلبو. 15وكان بيلاطس بدو يرضي الشعب فطّلعلهن باراباس وُبعد ما جلد يسوع ودّاه عشان ينصلب.

16وأخدوا الجنود يسوع للساحة جوات القصر الحكومي وتجمعوا عليه مجموعة كبيرة من الجنود 17لبسوه عباي رومانية لونها نبيذي وعملو تاج من نبات بشوِّك وحطوه ع راسو. 18وصاروا يحيّوه ويقلولو: يَعيش ملك اليهود. 19وصاروا يضربوه بالقصبة ع راسو ويُبـزقو عليه ويركعو ويسجدو قدامو. 20وبعد متمسخرو عليه شلّحوه العباي الرومانية ولبّسوه أواعيه وطلّعوه عشان ينصلب.

21وكان سمعان القيرواني أبو ألكسندرس وروفس راجع من المزرعة. وُجبروه الجنود إنو يحمل صليب يسوع. 22وأخدُوا يسوع لمحل اسمو الجلجثة ومعنى الاسم الجمجمة. 23واعطوه هناك كوكتيل نبيذ مع مادة مُرّة بس مَ قِبلش يشرب منو. 24وُصلبوه ولعبو قمار ع أواعيه وقسّموها كل واحد حسب حظّو. 25ولما صلبوه كانت الساعة 9 الصبح. 26وكتبوا تهمتُه: ملك اليهود. 27وُصلبوا معُه 2 قُطّاع طُرق واحد ع يمينو والثاني ع شمالو. 28‏-29والناس اللي كانت تُمرء من هناك كان يسبّو عليه ويهينوه بالإشارات ويقلولو: هه! يا اللي بدمّر الهيكل وببنيه بـ 3 أيام 30خلّص حالك وانزل عن الصليب. 31وكمان رؤسا الكهنة وجماعة الكتبة كانو عم بِتمسخروا عليه بين بعض وبقولو: خلّص الناس التانيين بس مش قادر يخلّص حالو، 32خلي المسيح ملك إسرائيل ينزل إسه عن الصليب عشان نشوف ونآمن. والـ 2 المصلوبين معُه صارو يهينوه.

33ومن الساعة 12 الظهر للساعة 3 بعد الظهر صارت كل البلد عتمة. 34والساعة 3 صيّح يسوع بكل صوته وقال: إلوئي إلوئي لِـما شبقتاني ومعناتها: يا إلهي يا إلهي ليش تركتني؟ 35وفي ناس من الواقفين هناك لما سمعوه قالو: هياه عم بِنادي إيليا. 36وركض واحد زلمة وعبى السفنجة من النبيذ الرخيص وحطها على عصاي ومدها عشان يِشَرْبُو وقال: استنو تنشوف إذا بيجي إيليا وبِنَـزْلو. 37وصيّح يسوع بكل نَفَسُه وطلعت روحُه. 38وتمزعت بُرداية قدس الأقداس لشقفتين من فوق لتحت. 39ولما شاف قائد الـ 100 جندي الواقف قدام يسوع كيف طلعت روحُه قال: عنجد هادا الإنسان كان ابن الله. 40وكان في ستات عم بطّلعو من بعيد. وكان معهن مريم المجدلية، ومريم إم يعقوب الصغير ويوسي، وسالومة. 41وهني كانو من جماعة يسوع لما كان في الجليل وكانو يخدموه. ومعهن ستات تانيات كتار كانو من الستات اللي طلعو معُه ع أورشليم.

42ولما قرّب المسا ولأنو كان يوم التحضير للعيد قبل السبت 43أجا يوسف لعند بيلاطس. ويوسف زلمة من منطقة الرام وقائد معروف في السانهدرين وكان عم بِستنى ملكوت الله. كان جريء فدخل عند بيلاطس وطلب جثة يسوع. 44تعجب بيلاطس إنو مات بها السرعة فنادى الضابط المسؤول عن ال 100 جندي وسألُه قديش صارلو ميّت. 45وبعد مجاوبوه الضابط أعطى بيلاطس الجثة ليوسف. 46وبعد م اشترى يوسف كفن نزّل يسوع من على الصليب ولف الجثة بالكفن وحطها في قبر محفور في الصخر ودحرج الحجر ع باب القبر. 47وشافو مريم المجدلية ومريم إم يوسي وين انحطت الجثة.

Currently Selected:

مرقس 15: CGB

Highlight

Copy

Compare