مرقس 14

1وقبل بيومين من عيد البيسح وُمن وقت منع استعمال الخميرة كانو رؤسا الكهنة وجماعة الكتبة عم بدورو ع طريقة ملتوية عشان يمسكو يسوع ويقتلوه. 2م كنش بدهن يمسكوه في احتفالات العيد عشان م تهوجش الناس.

3وكان يسوع في قرية بيت عنيا، في بيت سمعان اللي كان أبرص. ولما كان قاعد وقت الأكل أجت لعندو وحدة ست معها قنينة ريحة من الناردين الأصلي والريحه غالية كثير. وكسرت القنينة وصَبَّت الريحه ع راس يسوع. 4وفي ناس انقهرت وصارت تفكر ليش هيك عم بتكب الريحة؟ 5كان بتقدر تبيع الريحه بمصاري قيمتها أكثر من معاش 300 يوم شغل وكان بتقدر تعطي المصاري للفقرا. وصارو يلوموها. 6فقلهن يسوع: فلتوها، عملتلي عمل منيح. ليش عم بتضايقوها؟ 7الفقرا دايمن معكو، بتقدرو تعملو معهن منيح ايمتى بدكو بس أنا مش دايمن معكو. 8هي عملت اللي عندها وصَبَّت الريحه على جسمي قبل م يودوه ع الدفن 9بأكدلكو إنو في كل محل بنحكى فيه عن الإنجيل وفي كل العالم رَح تحكي الناس عن شو عملت ورَح يتذكروها.

10وراح يهوذا الإسخريوطي، وهو واحد من ال 12 تلميذ، لعند رؤساء الكهنة عشان بدو يخون يسوع ويسلمو لإيديهن. 11لـما سمعوه فرحو وُوعدوه إنهن يعطوه مصاري. وصار يهوذا يدوّر ع اللحظة المناسبة اللي يسلمو فيها.

12وفي أول يوم من العيد وقت م بمنعو الخميرة وبوكلو الذبايح، أجو التلاميذ لعند يسوع وسألوه: وين بدك نحضّر ونوكل خروف العيد؟ 13فبعت يسوع 2 من تلاميذو وقلهن: روحو عالبلد ورَح يستقبلكو زلمة حامل جرة مي، إلحقوه. 14بعد م يفوت ع البيت قلولو لصاحب البيت، المعلم بسألك: وين المحل اللي رَح آكل فيه البيسح أنا وتلاميذي؟ 15ورَح يأرجيكو في العليّة غرفة كبيرة مفروشة وجاهزة. حضرو البيسح هناك. 16لما طلعو التلميذين وفاتوا ع البلد صار معهن زي ما قلهن يسوع وُحضّرو البيسح. 17وفي المسا أجا يسوع مع بقية تلاميذو ال 12. 18وهنّي قاعدين وعم بيوكلو قلهن يسوع: بأكدلكو إنو واحد منكو رَح يخوني. هو عم بوكل معي. 19فبديو التلاميذ ينضغطو ويسألو واحد ورا التاني: أكيد مش أنا؟ 20فقلهن يسوع: هو واحد من ال 12 وعم بوكل وبغمّس معي. 21ابن الإنسان رَح يرحل زي م هو مكتوب عنو، بس يا ويل الخاين اللي رَح يسلِّم ابن الإنسان. كان أحسنلو لو منولدش.

22ولما كانو عم بوكلو أخذ يسوع خبزه وبارك وبعدين قطّع الخبزه شقف وناولهن وقال: خذوا، هادا هو جسدي. 23وبعدين أخذ الكاس وُشكر وناولهن فشربو كلهن منها. 24وقلهن: هادا هو دم العهد، دمي اللي رَح ينسفك من أجل كتير ناس. 25وبأكدلكو إنو مش رَح أشرب من عنب الكرمة لحد م ييجي اليوم اللي أشرب فيه بطريقة جديدة في ملكوت الله. 26وبعد م رنموا راحو ع جبل الزيتون.

27وقلهن يسوع: كلكو رَح يتزعزع إيمانكو فيّ لأنو مكتوب، الغنم رَح تتشتت لأني رَح أموّت الراعي 28بس بعد قيامتي رَح أسبقكو ع الجليل. 29قلو بطرس: ممكن الكل يتزعزع إيمانهن بس مش أنا. 30فقلو يسوع: بأكدلك يا بطرس إنو اليوم وفي هاي الليلة قبل م يصِيح الديك مرتين رَح تنكرني 3 مرات. 31فشد بطرس ع حالو وقلو: ولا يمكن إنكرك حتى لو أنجبرت أموت معك. وصار الكل يحكي مِتِل بطرس.

32وراحو لمحل اسمو جثسيماني وقال يسوع لتلاميذو، خليكو قاعدين هون لحد م أصلي. 33وأخذ معو بطرس ويعقوب ويوحنا وبدي يِنْغمْ ويكتئب 34وقلهن: رَح أموت من كـتـرة الحزن. خليكو هون واسهروا معي. 35وُبَعد عنهن شوي وركع ع الأرض وصار يصلي إنو إذا في إمكانية تنقام عنو هاي الساعة. 36وقال: يا بابا الآب، إنت بتقدر على كل إشي اعفيني من شرب كأس الآلام بس الأولوية لإرادتك مش إرادتي. 37ولما رجع لاقى التلاميذ نايمين فقال لبطرس: يا سمعان، إنت نايم؟ مش قادر تسهر ساعة واحدة؟ 38اسهروا وصلوا عشان م تفوتوش في تجربة. إرادة الروح بتتعطل بضعف الجسد. 39وراح صلى كمان مرة وحكى نفس الصلاة. 40ورجع ولاقى التلاميذ كمان مرة نايمين ومش قادرين يفتحو عينيهن. وم عرفوش شو يقلولو. 41ورجع لعند التلاميذ تالت مرة وقلهن: بعدكو نايمين ومرتحين! بكفي! أجا الوقت وهاي الخطاة رَح يعتقلو ابن الإنسان. 42قوموا نروح. هادَ اللي بخوني وصل.

43وأول م خلص حكي إلا يهوذا جاي. كان يهوذا واحد من التلاميذ ال 12 بس أجا ومعو ناس كثار حاملين سيوف وعصي. كانوا جايين باسم رؤسا الكهنة وجماعة الكتبة وشيوخ الشعب. 44وكان الخاين متفق معهن على علامة، قلهن: اعتقلوا الشخص اللي ببوسو وخذوه واحرسوه منيح. 45وأوَّل م وصل يهوذا راح لعند يسوع وقلو: يا معلم، وباسو. 46فمسكو يسوع واعتقلوه. 47وفي واحد من التلاميذ الواقفين سحب سكينة كبيرة وضرب خَدَّام رئيس الكهنة وقطعلو دانو 48فقلهن يسوع: شو جايين تعتقلوني مع سيوف وعُصي كأني قطّاع طرق؟ 49كنت عم بعلم بيناتكو في الهيكل كل يوم ومعتقلتونيش. بس بهاي الطريقة بتتحقق الكتب. 50وهربوا كل التلاميذ وتركوه.

51ولحق يسوع شب لابس أواعي كتان على اللحم، ولما مسكوه 52فِلت من أواعيه وهرب مشلّح.

53واخدوا يسوع لعند رئيس الكهنة. والكل اجتمع، رؤسا الكهنة والشيوخ وجماعة الكتبة. 54ولحق بطرس يسوع من بعيد لحد مَ وصل ساحة بيت رئيس الكهنة وقعد هناك مع الحرّاس يتدفى حولين النار. 55وكانوا رؤسا الكهنة وكل مجمع السانهدرين عم بِدَوْرو على شهادة ضد يسوع عشان يقتلوه. بس م قدروش يلاقو. 56كتار كذبو وشهدو ضدو بس كان في تناقض في حكيهن. 57وفي ناس وقفت تشهد ضدو وقالو: 58إحنا سمعناه بقول: هادا الهيكل المبني بإيدين الناس أنا رح أدمرو وفي 3 أيام رَح ابني هيكل تاني مش معمول بإيدين الناس. 59وهاي الشهادة كانت كمان متناقضة. 60ووقف رئيس الكهنة بالنُص وسأل يسوع وقلو: بدكاش تحكي ولا إشي وترد ع شو عم بِشهدو ضدك؟ 61بس يسوع كان ساكت ومحكاش إشي. وحكى معو رئيس الكهنة كمان مرة وسألو: إنت هو المسيح ابن القدوس الـمُبارَك؟ 62فقلو يسوع: "أنا هو" . . . ورَح تشوفو ابن الإنسان قاعد عن يمين الله القدير وجاي راكب ع غيوم السما. 63فمزّع رئيس الكهنة أواعيه وقال: خلص بطلنا بحاجة لشهود؟ 64شو رأيكو بعد م سمعتوه بُكفُر؟ فكلهن حكمو إنو لازم ينعدم. 65وصار في ناس منهن يبـزقو عليه وُبعد مَغَطّو وجهو ضربوه بوكسات وقلولو تنبأ مين ضربك والحراس ضربوه كفوف.

66ولما كان بطرس قاعد تحت في الساحة أجت وحدة من خدّامات رئيس الكهنة 67وشافت بطرس عم بِتدفى، إتطلعت عليه منيح وقلتلو: إنت كمان كنت مع يسوع النصراوي. 68أنكر بطرس وقال: مش عارف ولا فاهم ع شو بتحكي. وطلع لمدخل الدار وبعدين صيّح الديك. 69ورجعت شافتو الخدامة وحكت وقالت للواقفين: هادا واحد منهن. 70أنكر كمان مرة. وبعد شوي قالو الناس اللي هناك لبطرس عنجد إنت واحد منهن لإنك جليلي. 71فبدي بطرس يلعن ويحلف إنو بعرفش الزلمة اللي بحكو عنو. 72وطوالي صيّح الديك كمان مرة، وقتها تذكر بطرس شو قلو يسوع، "قبل م يصيح الديك مرتين رَح تنكرني 3 مرات". وفقع بالبكا.

Currently Selected:

مرقس 14: CGB

Highlight

Copy

Compare