ଜଅନ୍ 1
1
ତୁମ' ରେମ ଏଗା'
1ଦର୍ତନି ଅ'ରଇଁ ସିଁସେଇଁଉ ମୁଲ୍ମୁଲ୍ ତୁମ' ଡୁକୁ । ଗୁତୁନ୍ ତୁମ' ମାପ୍ରୁବୁରଂ ଡୁକୁ ମାରି ଗୁତୁନ୍ ତୁମ' ମାପ୍ରୁ ଡୁକୁ । 2ମାଇ ମୁଲ୍ ମାପ୍ରୁବୁରଂ ଡୁକୁ ।
3ମାଇନା ଲାଗିରେ ମାପ୍ରୁ ଗୁଲାଇ ଅ'ରଇଁୟ' ମାରି ଗୁଲାଇ ଅ'ରଇଁୟ'କୁନୁଂକୁରୁଂ ମାଇବୁରଂ ମାର୍ ମାଏସା ମାଇ ମଅ'ରଇଁବାଇ' କେନ୍ ଦର୍ତନିବକ୍ ଆଡୁତା । 4ଆଗୁଲାଇର ଜିବନ୍ ବିବେ'ପୁଲେଇ ବପୁ ଡୁକୁନୁଂବାଇ' ଜିବନ୍ ମାଇନ୍ବକ୍ ଡୁକୁ । ମାରି ଗୁତୁନ୍ ଜିବନ୍ ଗୁଲାଇ ରେମଲେନା ତାରା' । 5ଗୁତୁନ୍ ତାରା' ଞୁର୍ବକ୍ ତାର୍କିକ୍ସେ'ଗା ଡୁତା ମାରି ଆମାଇ ଞୁର୍ ଅଲି' ଆଗଂତା ।
6 #
ମାତିଉ 3:1; ମାର୍କ 1:4; ଲୁକ 3:1,2 ମାପ୍ରୁ ବେନ୍ଟାୟ'ସା' ମୁଇନ୍ଡା ରେମ ସା'ଗା' । ମାଇନା ଇମି ଜଅନ୍ । 7ମାଇ ଗୁତୁନ୍ ତାରା'ସୁଗ ଡୁକୁନୁଂନା ବିସୟ ସାକି ସୁଁସୁପୁଲେଇ ମାରି ମାଇ ସୁନ'କୁନୁଂ ଅଂଅଁ'ସେକ୍ ଗୁଲାଇର ବିସ୍ବାସ୍ ଡିନ୍ଡେମ୍ପୁଲେଇ ମାଇ ସା'କୁ । 8ଜଅନ୍ଲା ନିଜେ ଗୁତୁନ୍ ତାରା' ଆରାକ୍ ମାତର୍ ମାଇ ଗୁତୁନ୍ ତାରା'ନା ବିସୟ ସାକି ସୁଁସୁପୁଲେଇଉ ସା'କୁ । 9ଗୁଲାଇ ରେମଲେନ୍ ଜିବନ୍ବକ୍ ଇମ୍ବ'ନା ସତ୍ବାଇ' ତାରା' ଅବୁଦି ତାରା' ବେ'ତ ଗୁତୁନ୍ ତାରା' ଦେସ୍ଦୁନିଆବକ୍ ସୁସାପ୍ଡେଂକୁ ।
10ମାଇ ନିଜେ ଅ'ରଇଁୟ'କୁନୁଂ ଦେସ୍ଦୁନିଆବକ୍ ସା'ଗା' ମାତର୍ ଦେସ୍ଦୁନିଆନା ରେମଲେ ଆମାଇ ଆସମ'ତ । 11ମାଇ ନିଜର୍ନା ରେମଲେନ୍ବକ୍ ସା'ଗା' ମାତର୍ ମାଇନା ନିଜର୍ନା ରେମଲେ ଆମାଇ ଆବୁତ । 12ମାତର୍ ଜାଜା ଆମାଇ ବିସ୍ବାସ୍ ଡେମ'ସେକ୍ ମା'ଏନା ଜିବନ୍ବକ୍ ଆମାଇ ୱାୟ' ଆମା'ଏ ଆଗୁଲାଇର ମାପ୍ରୁନା ଉଁ'ଉଁ ଏପୁଲେଇ ମାଇ ଅଦିକାର୍ ବେଡ' । 13ମା'ଏ ମାପ୍ରୁନା ଉଁ'ଉଁ ଏକୁନୁଂ ଦର୍ତନିବକ୍ ରେମଲେ ଜନମ୍ ଡିନ୍ଡେମ୍ସୁଗ ଆରାକ୍ । ମାରି ମୁଇନ୍ଡା ଇଂଗେରେ ମାରି ସେଲାନେ ଉଁ'ଉଁ ବୁମ୍ବାମ୍ପୁଲେଇ ଲେମ'କୁନୁଂସୁଗ ଆରା'ଗେ ରେମଲେନା ମୁନ୍ସୁଗ ଜନମ୍ ଡେଂଆଡୁତା । ମାତର୍ ମାପ୍ରୁ ଆମା'ଏ ମାଇନା ଉଁ'ଉଁ ଅ'ଏଲ'ତା ।
14ସା, ଗୁତୁନ୍ ତୁମ' ରେମ ଏକ୍ସେ'ଗା ଜନମ୍ ଡେଂସେକ୍ ନେଇ'ବୁରଂ ବାସାଗା' । ମାଇ ଅବୁଦି ଆଲାତ୍ବାଇ' ମାରି ସତ୍ବାଇ' । ମାପ୍ରୁଉ ମାଇନା ବା ମାରି ମାଇ ଆମାଇନା ତା'ମୁଇଉଁ ମଇମା ବେଡ'; ଗୁତୁନ୍ ମାଇନା ମଇମା#1:14 ଆକେ ମଇମା ଡ'ନା ଆଜିସୁଲା ଅବୁଦି ମୁନା'ରେମ୍ ଡ'ସେକ୍ ମାଇନା ବା ମାପ୍ରୁଲା ବୁଂଅଁ'କୁନୁଂ ନେଇ ଜୁଲ'ନେଇ ଡ'ସେକ୍ ଜଅନ୍ଲା ଲେକ୍ଲ'ତା । ନେଇ' ଜୁଲ'ତୁନେଇ' ।
15ଜଅନ୍ଲା ମାଇନା ବିସୟ ଡି'କେନା ସାକି ସୁନ', ମାଇ ଅବୁଦି ଡକ୍ତି'ତା ସୁନ', “ଜା ଆନିଂ ତେଂଗି' ସୁସାପ୍ଡେନ୍ତା ମାଇ ନିଂକୁରୁଂ ଅବୁଦି ମୁନା'; ମାସା'ଡ'ନା ନିଂ ଜନମ୍ ଡିନ୍ଡେମ୍ ସିଁସେଇଁଉବାଂସା' ମାଇ ଡୁତା ଡ'ସେକ୍ ଜାନା ବିସୟ ନିଂ ସୁନ'କୁନିଂ ଗୁତୁନାଉ ମାଇ । 16ମାରି ମାଇ #1:16 ଆକେ ଆଲାତ୍ ଡ'ନା ଲିବିସୁପ୍, ମାଇ ଆନେଇ' ଲିବିସୁପ୍ସେକ୍ ବଲ୍ ଜୁଲ'ତା ।ଆଲାତ୍ବାଇ' ମାରି ସତ୍ବାଇ'ସା' ମାଇ ଆନେଇ' ଗୁଲାଇ ବେଡ'ତା ମାରି ଡୁ'ତୁନାଉ ମାଇ ଆନେଇ' ଇସାଉ ବଲ୍ ଜୁଲ'ସେ'ଗାଉ ଡୁତା । 17ମାସା'ଡ'ନା ମାପ୍ରୁନା ନିୟମ୍ ଗୁଲାଇ ଆନେଇ' ମସାନା ତିତିକୁରୁଂ ବେଡ' । ମାତର୍ ମାପ୍ରୁ ଆଲାତ୍ବାଇ' ମାରି ସତ୍ବାଇ' ଡ'ସେକ୍ ଜିସୁ କିରିସ୍ଟନ୍କୁରୁଂ ମାଗ'ନେଇ' । 18ଜାଏସା ଆମାପ୍ରୁ ଇନ୍ଡଇ'ଏସା ଜୁଲ' ଆଡୁତା । ମାତର୍ ମାପ୍ରୁ କୁନ୍ଡୁଲ'ସେକ୍ ଡୁକୁନୁଂ ମାଇନା ତା'ମୁଇଉଁ ମାପ୍ରୁ ମିବାଇ' ଡ'ସେକ୍ ଅସୁୟ'ତା ।”
ବାପ୍ତିସ୍ମା ବିବେ'ଡା ଜଅନ୍ଲା ଜିସୁନା ବିସୟ ସୁଁସୁଡେନ୍
(ମାତିଉ 3:1–12; ମାର୍କ 1:1–8; ଲୁକ 3:1–18)
19“ନ ଜା” ଡ'ସେକ୍ ଆଜଅନ୍ଲା ଅ'ଗଁସ୍ଲାକ୍ପୁଲେଇ ଜିଉଦିରେମଲେ ଜିରୁସାଲମ୍ ମୁନା'ଉଂଗମ୍କୁରୁଂ ଆପୁଜାରିଲେ ମାରି ଆଲେବିୟ ଦଲ୍ନା ରେମଲେ ମାଇନ୍ବକ୍ ବେନ୍ଟାୟ'ସା' ଜଅନ୍ଲା ମା ସାକି ସୁନ' ଡ'ନା: 20ମାଇ ଆମା'ଏ ପଲୁ ଆସୁନ୍ତ, “ନିଂ କିରିସ୍ଟ ଆରାକ୍” ଡ'ସେକ୍ ମାଇ ସତ୍ ସୁନ' ।
21ସା' ମା'ଏ ସୁନ' “ଡୁ'ତୁନ୍ ଡ'ନା ନ ଜା? ନ ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁରେମ୍ ଏଲିୟଲା ଇ?” ଡ'ସେକ୍ ଆମାଇ ଅ'ଗଁସ୍ଲା'ଗା', ସା'
ମାଇ ସୁନ' “ଆରାକ୍ ।”
ଡୁ'ତୁନ୍ ଡ'ନା ସାପ୍ତା ଡ'କୁନୁଂ ଗୁତୁନ୍ ବାବବାଦି ନ ଇ? ଡ'ସେକ୍ ସୁନ'ସା'
ମାଇ ଆରାକ୍ ଡ'ସେକ୍ ସୁନ' ।
22ସା' ମା'ଏ ଆମାଇ ସୁନ' “ଡୁ'ତୁନ୍ ଡ'ନା ନ ଜା? ଆନେଇ ବେନ୍ଟାୟ'କୁନୁଂ ରେମଲେବକ୍ ନେଇ ମା ଡ'ସେକ୍ ସୁନ୍ତୁନେଇ? ଗୁତୁନ୍ସା' ନ ଜା ଡ'ସେକ୍ ନ ଏତ୍ଗୁତୁନ? ଆନେଇ ସୁଁ” ଡ'ସେକ୍ ସୁନ' ।
23ସା' ମାଇ ଆମା'ଏ ସୁନ' “ଇନ୍ତେକନ୍ଡେକ୍ ବାବବାଦି ଜିସାୟଲା ନିଂନା ବିସୟରେ ମି ସୁନ'କୁ ଡୁ'ତୁନା ପ୍ରବୁ ସୁସାପ୍ପୁଲେଇ କୁରୁଂ ବଲ୍ ଡେମ୍ ଡ'ସେକ୍ ଟାଂରାବାଟାପାଦାବକ୍ ଡକ୍ତି'ତା ସୁଁସୁରେମ୍ଉ ନିଂ” ଡ'ସେକ୍ ସୁନ' ।
24ସା' ଆଜା ବେନ୍ଟାୟ'କୁ ମା'ଏନ୍ ବିତ୍ରେ ଏନ୍ତୁକ୍ର ପାରୁସିଦଲ୍ନା ରେମଲେ ଡୁକୁ । 25ମା'ଏ ଆମାଇ ଅ'ଗଁସ୍ଲା'ଗା', “ନ କିରିସ୍ଟ ଆରାକ୍ ଡ'ନା ଏଲିୟଲା ଆରାକ୍ ଡ'ନା ମାରି ବାବବାଦି ଆରାକ୍ ଡ'ନା ମାସା' ନ ବାପ୍ତିସ୍ମା ବିବେ'ଡେନ୍ତୁନ?” ଡ'ସେକ୍ ଅ'ଗଁସ୍ଲା'ଗା' ।
26ସା' ଜଅନ୍ଲା ଆମା'ଏ ସୁନ' “ନିଂ ଆପେ ଡାଗ୍ବୁରଂ ବାପ୍ତିସ୍ମା ବିବେ'ଡେନ୍ତିଂ । ମାତର୍ ପେନ୍ ବିତ୍ରେ ମୁଇନ୍ଡା ଡୁତା ଆମାଇ ପେ ଆମାକ୍ତୁପେ । 27ମାଇଉ ନିଂନା ତିର୍ଗି' ସା'ପ୍ତା । ମାଇନା ପନ୍ଡଇଁବକ୍ ତୁଲ'କୁନୁଂ ସୁତା ତକ୍ତକ୍ପୁଲେଇ ଡୁକୁନୁଂ ମୁଇ ଗତିରେମ୍ସୁଗସା ନିଂ ସମାନ୍ ଆରାକ୍ ।”
28ଜର୍ଦନ୍ନା ମୁଇସାଂ କିନ୍ଡାକ୍ବକ୍ ବେତନିୟା ଡ'ସେକ୍ ମୁଇ ଉଂଗମ୍ ଡୁକୁ । ଆତା ଜଅନ୍ଲା ବାପ୍ତିସ୍ମା ବେଡ'କୁ । କେନ୍ ଗୁଲାଇଉ ଗୁତୁନ୍ ଜାଗାବକ୍ ଡେଂଗା' ।
ଜିସୁଲା ମାପ୍ରୁନା ଉଁ'ଉଁ ମେନ୍ଡା ଡ'ସେକ୍ ଜଅନ୍ଲା ସୁଁସୁଡେନ୍
29ସା' ଆଇ'ବେରା ଆଜିସୁଲା ମାଇନ୍ବକ୍ ସୁସାପ୍ଡେଂକୁନୁଂ ଜୁଲ'ସେକ୍ ଜଅନ୍ଲା ଆରେମଲେ ସୁନ' “ଜୁ, ମାପ୍ରୁନା ଉଁ'ଉଁମେନ୍ଡା, କେନ୍ ଗୁଲାଇ ଦେସ୍ଦୁନିଆନ୍ ରେମଲେନା ପାପ୍ ଗୁଲାଇ ଡୁନ'ରିଂଅଁ' ଉଇଡେନ୍ । 30ଆନିଂ ତେଂଗି' ମୁଇନ୍ଡା ରେମ ସୁସାପ୍ଡେନ୍ତା ମାରି ମାଇ ନିଂକୁରୁଂ ଅବୁଦି ମୁନା', ମାସା'ଡ'ନା ନିଂ ଜନମ୍ ଡିନ୍ଡେମ୍ ସିଁସେଇଁଉବାଂସା' ମାଇ ଡୁତା ଡ'ସେକ୍ ଜାନା ବିସୟ ନିଂ ସୁନ'କୁନିଂ ଗୁତୁନାଉ ମାଇ । 31ଆରେମଲେ ବଲ୍ ଡିନ୍ଡେମ୍ପୁଲେଇ ମାପ୍ରୁ ଆମାଇ ସିରେଲ'ତା ଡ'ସେକ୍ ସିଁସେଇଁଉ ନିଂ ମାଗ' ଆଡୁତିଂ । ମାତର୍ ଆମାଇ ଇସ୍ରାଏଲ୍ ରେମଲେ ସମଡେଇ' ଡ'ସେ'ଗାଉ ନିଂ ଡାଗ୍ବକ୍ ବାପ୍ତିସ୍ମା ବିବେ' ସା'ଗୁତିଂ” ଡ'ସେକ୍ ସୁନ' ।
32ମାରି ଜଅନ୍ଲା ସାକି ସୁନ' “କି'ତୁଂକୁରୁଂ ପବିତ୍ର ଆତ୍ମା ମୁଇ ପାରାସୁଗ ଜୁଜର୍ ଡେଂକୁନୁଂ ମାରି ଗୁତୁନ୍ ପବିତ୍ର ଆତ୍ମା ମାଇନା ବାଗ୍ବକ୍ ଲେଇ'କୁନୁଂ ଜୁଲ'ନିଂ । 33ନିଂସା ଆମାଇ ମାଗ' ଆଡୁତିଂ । ମାତର୍ ଜା ଆନିଂ ଡାଗ୍ବକ୍ ବାପ୍ତିସ୍ମା ବିବେ'ପୁଲେଇ ବେନ୍ଟାୟ' ମାଇ ଆନିଂ ସୁନ' ‘ଜାନ୍ ବାଗ୍ବକ୍ ମାପ୍ରୁନା ଜିବନ୍ ଜର୍ସେକ୍ ଗୁଗାଇନା ନ ଜୁତୁନ ମାଇଉ ଆରେମଲେ ପବିତ୍ର ଆତ୍ମାବୁରଂ ବାପ୍ତିସ୍ମା ବିବେ'ଡା’ ଡ'ସେକ୍ ସୁନ' । 34ସା' ନିଂ ଗୁତୁନା ଜୁଲ'ତିଂ ମାରି ମାଇଉ ମାପ୍ରୁନା ଉଁ'ଉଁ ଡ'ସେକ୍ ସାକି ସୁନ'ତିଂ ।”
ଜିସୁଲା ସିଁସେଇଁନୁକ୍ ସିରେଲ'କୁନୁଂ ସିସ୍ୟଲେ
35ସା' ବେରା ଜଅନ୍ଲା ମାଇନା ଇମ୍ବାୟ ସିସ୍ୟପାବୁରଂ ମାରି ମୁସ ଆତା ତଂକୁ । 36ସା' ଗୁତୁନ୍ କୁରୁଂବକ୍ ଜିସୁଲା ଉଇଡେଂକୁନୁଂ ଜୁଲ'ସେକ୍ ମାଇ ସୁନ' “ଗିରି ଜୁ, ମାଇଉ ମାପ୍ରୁନା ଉଁ'ଉଁମେନ୍ଡା” ଡ'ସେକ୍ ସୁନ' ।
37ସା' ମାଇ ସୁନ'କୁନୁଂ ଅଂଅଁ'ସେକ୍ ଗୁତୁନ୍ ଇମ୍ବାୟ ସିସ୍ୟପା ଆଜିସୁଲା ତେଂଗି'ତେଂଗି' ଉଇଗା' । 38ଜିସୁଲା ଆନ୍ଡେଇଁକିକ୍ସେ'ଗା ଜୁଲ'ସା' ମାଇପା ମାଇନା ତେଂଗି'ତେଂଗି' ସୁସାପ୍ଡେଂକୁ । ସା' ଜିସୁଲା ଆମାଇପା “ପା ମା ତୁର'ତୁପା?” ଡ'ସେକ୍ ଅ'ଗଁସ୍ଲା'ଗା',
ସା' ମାଇପା ସୁନ' “ଅ ରାବ୍ବି (ଡ'ନା ଗୁରୁ) ନ ଆମ୍ବ' ଡୁତୁନ?” ଡ'ସେକ୍ ଅ'ଗଁସ୍ଲା'ଗା' ।
39ସା' ମାଇ ଆମାଇପା ସୁନ' “ଲ ଉୟାନେଇ', ପା ଜୁତୁପା” ଡ'ସେକ୍ ସୁନ' ।
ସା' ମୁନ୍ଡିପ୍ ସାର୍ଟାବେଲା ଉଇସେକ୍ ମାଇ ବାସାକୁନୁଂ ଜାଗା ଜୁଲ' । ମାରି ମାଇପା ଆତା ମାଇବୁରଂ ଉନ୍ତା ଡୁକୁ ।
40ଜଅନ୍ଲା ସୁନ'କୁନୁଂ ଅଂଅଁ'ସେକ୍ ଆଜିସୁଲା ତେଂଗି' ଉଇକୁନୁଂ ଇମ୍ବାୟ ସିସ୍ୟପାନ୍ ବିତ୍ରେ ମୁଇନ୍ଡାନା ଇମି ଆନ୍ଦ୍ରିୟ । ମାଇ ସିମନ୍ ପିତର୍ନା ବୁୟାଂ । 41ମାଇ ସିଁସେଇଁଉ ମାଇନା ବୁୟାଂ ସିମନ୍ବକ୍ ଉଇଗା' । ଉଇସେକ୍ ଆମାଇ ସୁନ' ନାଂ ଆମସିଅଲା (ଡ'ନା ଆକିରିସ୍ଟଲା) ସୁସପ୍ ବାଂନାଂ ଡ'ସେକ୍ ସୁନ' । 42ସୁନ'ସେକ୍ ଆମାଇ ଜିସୁନ୍ବକ୍ ୱାୟ' ରିଂଗା' ।
ସା' ଜିସୁଲା ଆମାଇ ବଲ୍ ସର୍ମଡ' ଜୁଲ'ସେକ୍ ସୁନ' “ନ ଜଅନ୍ନା ଉଁ'ଉଁ ସିମନ୍ଲା । ଆନ କେପା ଡ'ସେ'ଗା ୱାଇତ ” (କେପା ଡ'ନା ପିତର୍)।
ଜିସୁଲା ଆପିଲିପ୍ଲା ମାରି ଆନିତନିଏଲ୍ଲା ୱାୟ'ତା
43ବେରା ଜିସୁଲା ଗାଲିଲି ଉଂଗମ୍ବକ୍ ଉଇପୁଲେଇ ଏତ୍ଗା' । ସା' ଆପିଲିପ୍ଲା ସୁସପ୍ବାଂଗା' । ସୁସପ୍ବାଂସେକ୍ ନ “ଆନିଂ ତେଂଗି' ସା'ବା” ଡ'ସେକ୍ ସୁନ' ।
44ପିଲିପ୍ଲା ବେତ୍ସାଇଦା ମୁନା'ଉଂଗମ୍ନା ରେମ । ଆନ୍ଦ୍ରିୟଲା ମାରି ପିତର୍ଲାସା ଗୁତୁନ୍ ଉଂଗମ୍ନା ରେମ । 45ପିଲିପ୍ଲା ନିତନିଏଲ୍ବକ୍ ଉଇସେ'ଗା ଆମାଇ ସୁନ' “ମସାଲା ଲେକ୍ଲ'କୁନୁଂ ନିୟମ୍ବକ୍ ମାରି ବାବବାଦିଲେ ଲେକ୍ଲ'କୁଂନୁଂବକ୍ସା ଜାନା ବିସୟ ଲେକ୍ଲ'ତା ଆମାଇ ନେଇ ସୁସପ୍ ବାଂନେଇ । ମାଇ ଜା ଡ'ନା ନାଜରିତ୍ ଉଂଗମ୍ନା ଜିସୁଲା, ଜସେପ୍ନା ଉଁ'ଉଁ” ଡ'ସେକ୍ ସୁନ' ।
46ନିତନିଏଲ୍ଲା ଆମାଇ ସୁନ' “ମା ଡ'ତୁନ ବାଇ, ନାଜରିତ୍କୁରୁଂ ମାଏସା ବଲ୍ଟାବାଇ' ସୁସାପ୍ ଗଂତା ଇ?”
ସା' ପିଲିପ୍ଲା ଆମାଇ “ନ ସାକ୍ସେକ୍ ଜୁଲ'ଜୁ” ଡ'ସେକ୍ ସୁନ' ।
47ସା' ଜିସୁନ୍ବକ୍ ନିତନିଏଲ୍ଲା ସୁସାପ୍ଡେଂକୁନୁଂ ଜିସୁଲା ଜୁଲ'ସେକ୍ ମାଇନା ବିସୟ ଡି'କେନା ସୁନ' “କେ ଜୁ, ସତଇସା ମାଇ ମୁଇନ୍ଡା ବଲ୍ବାଇ' ଇସ୍ରାଏଲ୍ ରେମ । ମାଇ ମୁଇନ୍ଡା ନାଡାଇବାର୍ବାଇ' ରେମ ଆରାକ୍” ଡ'ସେକ୍ ସୁନ' ।
48ସା' ନିତନିଏଲ୍ଲା ଆମାଇ ନ ଆନିଂ ମି ସମଡ'ନ? ଡ'ସେକ୍ ସୁନ'ସା'
ଜିସୁଲା ଆମାଇ ସୁନ' “ପିଲିପ୍ଲା ଆନ ୱାଇ ସିଁସେଇଁ ନ ମୁଇ ଲିଅଇ ସୁଲପ୍ ଆଲୁଂ ଡୁକୁନୁଂବେଲା ଆନ ଜୁଲ'ବୁଂଅଁ'ନିଂ” ଡ'ସେକ୍ ସୁନ' ।
49ସା' ନିତନିଏଲ୍ଲା ଆମାଇ ସୁନ' “ଅ ଗୁରୁ, ନ ମାପ୍ରୁନା ଉଁ'ଉଁ ମାରି ନ ଇସ୍ରାଏଲ୍ ରେମଲେନା ରାଜା” ଡ'ସେକ୍ ସୁନ' ।
50ସା' ଜିସୁଲା ଆମାଇ ସୁନ' “ନିଂ ଆନ ଲିଅଇ ସୁଲପ୍ ଆଲୁଂ ଡୁକୁନୁଂବକ୍ ଜୁଲ'ବୁଂଅଁ'ନିଂ ଡ'ସେକ୍ ସୁନ'ନିଂସା' ନ ବିସ୍ବାସ୍ ଡେମ'ତୁନ ଇ? ନ କେନ୍କୁରୁଂ ଅଦିକ୍ କାବାକାବା ଡିନ୍ଡେମ୍ବାଇ' କାମ୍ ମାରି ଜୁତୁନ” ଡ'ସେକ୍ ସୁନ' । 51ମାଇ ମାରି ଆମାଇ ସୁନ' “ନିଂ ଆପେ ସତ୍ ସୁନ'ତିଂ, ପେ କି'ତୁଂ ରୁ'କୁନୁଂ ଜୁତୁପେ, ମାରି ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ନିଂ, ସା' ନିଂବକ୍ ମାପ୍ରୁନା ଦୁତଲେ ଜୁଜର୍ ଡୁଡାଇ' ଡେଂକୁନୁଂସା ଜୁତୁପେ” ଡ'ସେକ୍ ସୁନ' ।
Currently Selected:
ଜଅନ୍ 1: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
