ଜଅନ୍ 8
8
ଜାଲିକୁନୁଂ ସେଲାନ୍ବକ୍ ସବ'ସେକ୍ ଜିସୁନ୍ବକ୍ ଇନ୍ଡ୍ରିଂଡେନ୍
1ମାତର୍ ଜିସୁଲା ଜିତ କୁନ୍ଡାବକ୍ ଡାଇ'ଗା' । 2ଆଇ'ବେରା ଇନ୍ଜୁର୍ନୁକ୍ ମାଇ ମାପ୍ରୁନା ମନ୍ଦିର୍ବକ୍ ମାରି ସା'ଗା' । ଆତା ଅବୁଦି ରେମଲେ ମାଇନ୍ବକ୍ ରୁନ୍ଗା', ସା' ମାଇ ଲେଇ'ସେକ୍ ଆମା'ଏ ଅମାକ୍ଡେଂକୁ । 3ଆଇ'ତୁନ୍ବେଲା ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ନିୟମ୍ ଅମାକ୍ରେମେ ମାରି ପାରୁସିଦଲ୍ନା ରେମଲେ ଜାଲିବାଇ' କାମ୍ ଡିନ୍ଡେମ୍ ଡେଂକୁନୁଂବକ୍ ଆମୁଇନ୍ଡା ସେଲାନ୍ଲା ସବ'ରିଂସେକ୍ ମା'ଏନ୍ ମନ୍ଜା ଆମାଇ ଅ'ତନ' । 4ଅ'ତନ'ସେକ୍ ଆଜିସୁଲା, “ଅ ଗୁରୁ, ଆକେନ୍ ସେଲାନ୍ଲା ଜାଲିକୁନୁଂବେଲାଉ ସବ'ତା, 5ଡି'କେନ୍ବାଇ' ସେଲାନେବକ୍ ବୁରେ ତିଲ' ଅଗୁଇ' ଡୁତା ଡ'ସେକ୍ ମସାଲା ଲେକ୍ଲ'କୁନୁଂ ନିୟମ୍ବକ୍ ଆନେଇ ସୁନ'ତା । ସା' ନ ମା ଏତ୍ଗୁତୁନ?” ଡ'ସେକ୍ ଅ'ଗଁସ୍ଲା'ଗା'। 6ମାଇ ମାମା ବୁଲ୍ ସୁନ'ନା ଆମାଇ ସବ୍ନେଇ' ଡ'ସେ'ଗାଉ ମା'ଏ ଡି'କେନ୍ ସୁନ'କୁ ।
ମାତର୍ ଜିସୁଲା ଅ'ଲାଂସେ'ଗା ମାଇନା ତିତିବୁରଂ ଆତୁବୁକ୍ ଲେକ୍ବାର୍ ଡେଂକୁ । 7ମା'ଏ ମାରିମାରି ଆମାଇ ଅ'ଗଁସ୍ଲା'ଗା'ସା' ମାଇ ତାଂଡାୟ' ଜୁଲ'ସେକ୍ ଆମା'ଏ ସୁନ', “ପେନ୍ ବିତ୍ରେ ଜାଜା ପାପ୍କାମ୍ ମଡିନେମ୍ରେମ୍ ଡୁକୁନା ମାଇ ମୁଲ୍ ଆମାଇ ବୁରେ ତିଲେଇ'” ଡ'ସେକ୍ ସୁନ' । 8ସୁନ'ସେକ୍ ମାଇ ତିତିବୁରଂ ଆତୁବୁକ୍ ମାରି ଲେକ୍ବାର୍ ମୁଲାୟ' ।
9ଗୁତୁନ୍ ଅଂଅଁ'ସେକ୍ ସିଁସେଇଁ ମୁନା'ରେମେନ୍କୁରୁଂ ମୁଲାୟ'ସେକ୍ ଡାଉରେମେନ୍ ପନ୍ତେକ୍ ଗୁଲାଇର ମୁଇନ୍ଡା ମୁଇନ୍ଡା ଡୁଂଡୁଂଆର୍ଗା' । ସା' ଜିସୁଲା ମାରି ଆତା ମନ୍ଜା ତଂକୁନୁଂ ଗୁତୁନ୍ ସେଲାନ୍ଲାଉ ଡୁକୁଗା' । 10ଜିସୁଲା ତାଂଡାୟ'ସେକ୍, “ଅ କୁଇ', ମା'ଏ ଗୁଲାଇର ଇମ୍ବ'ଲେଇ? ଜାଏସା ଆନ ମାସା ଡନ୍ଡ୍କସ୍ଟ ଆବେ'ତ ଇ?” ଡ'ସେକ୍ ଆମାଇ ଅ'ଗଁସ୍ଲା'ଗା',
11ସା' “ଆରାକ୍ ଗୁରୁ” ଡ'ସେକ୍ ସେଲାନ୍ଲା ସୁନ' ।
ସା' ଜିସୁଲା ଆମାଇ, “ଡୁ'ତୁନ୍ ଡ'ନା ନିଂସା ଆନ ମାସା ଡନ୍ଡ୍କସ୍ଟ ଆବେ'ତିଂ। ନ ଉୟା, ପାପ୍କାମ୍ ମାରି ଆଡେମ'” ଡ'ସେକ୍ ସୁନ' ।
ଜିସୁଲା ଦେସ୍ଦୁନିଆନା ତାରା'
12 #
ମାତିଉ 5:14; ଜଅନ୍ 9:5 ଜିସୁଲା ଆରେମଲେ ମାରି ସୁନ', “ନିଂ ଆଦେସ୍ଦୁନିଆ ତାରା' ବିବେ'ରେମ୍ । ଜାଜା ଆନିଂ ତେଂଗି' ସାପ୍ତା ମାଇ ଇନ୍ଡଇ'ଏସା ଞୁର୍ବାଇ' କୁରୁଂବକ୍ ଆଉରିଂତ ମାତର୍ ମାଇ ମଡୁନମ୍ ଜିବନ୍ ବିବେ'ନା ତାରା' ବାମ୍ତା” ଡ'ସେକ୍ ସୁନ' ।
13 #
ଜଅନ୍ 5:31
ସା' ପାରୁସିଦଲ୍ନା ରେମଲେ ଆମାଇ, “ନଉ ନନା ବିସୟରେ ସାକି ସୁନ'ତୁନ । ସା' ନ ସୁନ'କୁନୁଂ ସତ୍ ଆରାକ୍” ଡ'ସେକ୍ ସୁନ' ।
14ସା' ଜିସୁଲା ଆମା'ଏ ସୁନ' “ନିଂ ନିଜେ ସାକି ସୁଁବର୍ଗୁତିଂ ଡ'ନାସା' ନିଂ ସୁନ'କୁନୁଂ ସାକି ସତ୍ । ମାସା'ଡ'ନା ନିଂ ଇମ୍ବ'କୁରୁଂ ସାକ୍ନିଂ ମାରି ଆମ୍ବ' ଉଇତିଂ ଡ'ସେକ୍ ନିଂ ମାଗ'ତିଂ । ମାତର୍ ନିଂ ଇମ୍ବ'କୁରୁଂ ସାକ୍ନିଂ ମାରି ଆମ୍ବ' ଉଇତିଂ ଡ'ସେକ୍ ପେ ଆମାକ୍ତୁପେ । 15ପେ ଡ'ନା ରେମଲେ ମି ଡେମ'ତା ଡୁ'ତୁନ୍ସୁଗ ଆରେମଲେ ବିସାର୍ନା ଡେମ୍ତୁପେ ମାତର୍ ନିଂ ଆଜାଏସା ବିସାର୍ନା ଆଡେମ୍ତିଂ । 16ମାତର୍ ନିଂ ବିସାର୍ନା ଡେମ'ନାସା ନିଂ ଡେମ'କୁନୁଂ ସତ୍, ମାସା'ଡ'ନା ନିଂ ମୁଇନ୍ଡାଉ ଆରାକ୍ । ଆନିଂ ବେନ୍ଟାୟ'କୁନୁଂ ନିଂନା ବା ସା ନିଂବୁରଂ ଡୁତା । 17ମାରି ପେନ୍ ନିୟମ୍ବକ୍ସା ଜାଏସା ଇମ୍ବାୟ ସାକି ସୁନ'କୁନୁଂ ସମାନ୍ ଡେଂନାଉ ଗୁତୁନ୍ ସୁନ'କୁନୁଂ ସାକି ସତ୍ ଡ'ସେକ୍ ଲେକ୍ଲ'ତା । 18ନିଂ ନିଂନା ସାକି ସୁନ'ତିଂ ମାରି ଆନିଂ ବେନ୍ଟାୟ'କୁନୁଂ ନିଂନା ବା ସା ନିଂନା ବିସୟରେ ସାକି ସୁନ'ତା” ଡ'ସେକ୍ ସୁନ' ।
19ସା' ମା'ଏ ଆମାଇ, “ପେମ୍ବା ଆମ୍ବ'ଲେଇ?” ଡ'ସେକ୍ ସୁନ'ସା'
ଜିସୁଲା ସୁନ' “ପେ ଆନିଂସା ମାରି ଆନେମ୍ବାସା ଆମାକ୍ତୁପେ । ପେ ଆନିଂ ମାଗ'କୁନାଏ ଆନିଂନା ବା ସା ମାକ୍ପେ” ଡ'ସେକ୍ ସୁନ' । 20ମାଇ ମାପ୍ରୁନା ମନ୍ଦିର୍ବକ୍ ଡାବୁ ବୁଂବୁଂନା ପେଡି ଉନ୍ତୁ' ଆରେମଲେ ଅମାକ୍ବେଲା କେନ୍ ଗୁଲାଇ ସୁନ' । ମାତର୍ ଆମାଇ ଜାଏସା ଆସପ୍ତ, ମାସା'ଡ'ନା ଆଇ'ତୁନ୍ବେଲା ମାଇନା ବେଲା ସୁସାପ୍ ଅରଇ' ଡେଂକୁ ।
ନିଂ ଆମ୍ବ' ଉଇତିଂ ଆତା ପେ ଉଇ ଆଗଂତୁପେ ଡ'ସେକ୍ ଜିସୁଲା ସୁଁସୁଡେନ୍
21ମାଇ ଆମା'ଏ ମାରି ସୁନ' “ନିଂ ଉଇଡେନ୍ତିଂ । ପେ ଆନିଂ ତୁର'ତୁପେ ମାତର୍ ପେ ନିଜର୍ନା ପାପ୍ବକ୍ ଗୁଇ'ତୁପେ । ନିଂ ଆମ୍ବ' ଉଇତିଂ ଆତା ପେ ସୁସାପ୍ ଆଗଂତୁପେ” ଡ'ସେକ୍ ସୁନ' ।
22ନିଂ ଆମ୍ବ' ଉଇତିଂ ଆତା ପେ ସୁସାପ୍ ଆଗଂତୁପେ ଡ'ସେକ୍ ଜିସୁଲା ସୁନ'ସା' ଜିଉଦିରେମଲେ ଅଂଅଁ'ସେକ୍ “ମାସା' ମାଇ ଡି'କେନ୍ ସୁନ'ତା? ମାଇନା ଜିବନ୍ ମାଇଉ ସୁଁବର୍ତା ଇ?” ଡ'ସେକ୍ ସୁନ' । 23ଜିସୁଲା ମାରି ସୁନ' “ପେ ଡ'ନା ଆଲୁଂନା ରେମଲେ ମାତର୍ ନିଂ ଡ'ନା ବାଗ୍ବକ୍ନା ରେମ । ମାରି ପେ କେନ୍ ଦେସ୍ଦୁନିଆନା ରେମଲେ ମାତର୍ ନିଂ ଡ'ନା କେନ୍ ଦେସ୍ଦୁନିଆନା ରେମ ଆରାକ୍ । 24ପେ ପାପ୍କାମ୍ ଡେମ'ତୁପେସା' ପେ ଗୁଇ'ତୁପେ ଡ'ସେକ୍ ନିଂ ଆପେ ସୁନ'କୁନିଂ । ମାସା'ଡ'ନା ନିଂଉ ଗୁତୁନ୍ ରେମ ଡ'ସେକ୍ ନିଂନା ବିସୟ ନିଂ ସୁନ'କୁନୁଂ ପେ ବିସ୍ବାସ୍ ଆଡେମ୍ତୁପେ ଡ'ନା ପାପ୍ ଡେମ'ତୁପେସା' ସତଇସା ପେ ଗୁଇ'ତୁପେ” ଡ'ସେକ୍ ସୁନ' ।
25ସା' ମା'ଏ ଆମାଇ ନ ଜାଲେଇ ଡ'ସେକ୍ ଅ'ଗଁସ୍ଲା'ଗା'ସା'
ଜିସୁଲା ଆମା'ଏ ସୁନ' “ସିଁସେଇଁଉବାଂସା' ନିଂ ମା ସୁନ'ତିଂ, ଗୁତୁନାଉ ନିଂ । 26ପେନ୍ ବିସୟରେ ନିଂ ଅବୁଦି ସୁଁସୁ ଗଂତିଂ ମାରି ଆପେ ବିସାର୍ନା ଡିନ୍ଡେମ୍ ଗଂତିଂ । ମାତର୍ ଆନିଂ ଜା ବେନ୍ଟାୟ' ମାଇ ସତ୍ବାଇ' । ସା' ମାଇ ମା ସୁନ'ତା ଗୁତୁନ ନିଂ ଅଂଅଁ'ସେକ୍ ଆଗୁଲାଇ ଦେସ୍ଦୁନିଆନା ରେମଲେ ସୁଁସୁ ଡେନ୍ତିଂ” ଡ'ସେକ୍ ସୁନ' ।
27ମାତର୍ ମାଇ ବାଡେଇଁନା ବିସୟଉ ଆନେଇ' ସୁଁସୁ ଡେନ୍ତା ଡ'ସେକ୍ ମା'ଏ ଆମାକ୍ତ । 28ସା' ଜିସୁଲା ସୁନ' “ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ । ଆନିଂ ପେ କୁର୍ସବକ୍ ଅଗୁଇ'ତୁପେ । ଡୁ'ତୁନ୍ ଡେମ'ନା ନିଂ ଜା ଡ'ସେକ୍ ନିଂନା ବିସୟ ନିଂ ଆପେ ସୁନ'କୁନୁଂ ସତଇସା ମାଇଉ ଡ'ସେକ୍ ପେ ମାକ୍ତୁପେ । ମାରି ମାଇନା ମୁନ୍ସୁଗ ଆରାକ୍ ମାତର୍ ମାଇନା ବା ଆମାଇ ସୁନ'କୁନୁଂସୁଗଉ ମାଇ ସୁନ'ତା ଡ'ସେକ୍ସା ପେ ମାକ୍ତୁପେ । 29ଆନିଂ ଜା ବେନ୍ଟାୟ' ମାଇ ନିଂବୁରଂ ଇସାଉ ଡୁତା । ନିଂ ଇସାଉ ଆମାଇ ସାର୍ଦା ଅ'ଡେମ୍ବାଇ' କାମ୍ ଡେମ'ତିଂସା' ମାଇ ଆନିଂ ସାକ୍ମୁଇନ୍ଡାଉ ଡେମ'ସେକ୍ ଆଡୁଂତା ।” 30ମାଇ ଡି'କେନା ଅଇଁୟ'କୁନୁଂ ଅଂଅଁ'ସେକ୍ ରେମଲେ ଅବୁଦିର ଆମାଇ ବିସ୍ବାସ୍ ଡେମ' ।
ଅବ୍ରାଆମ୍ନା ଉଁ'ଉଁନେ
31ଆମାଇ ବିସ୍ବାସ୍ ଡେମ'କୁନୁଂ ଆଜିଉଦିରେମଲେ ଜିସୁଲା ସୁନ' “ପେ ନିଂନା ତୁମ' ସବ'ସେକ୍ ଡୁ'ତୁନ୍ ସମାନ୍ ଡୁତୁପେ ଡ'ନା ପେ ସତଇସା ନିଂନା ସିସ୍ୟଲେ । 32ମାରି ଇମ୍ବ'ନା ସତ୍ ଡ'ସେକ୍ ମାକ୍ତୁପେ, ଗୁତୁନ୍ ସତ୍ ଆପେ ପାପ୍କୁରୁଂ ଅ'ତୁର୍ତ” ଡ'ସେକ୍ ସୁନ' ।
33 #
ମାତିଉ 3:9; ଲୁକ 3:8 ସା' ମା'ଏ ଆମାଇ ସୁନ', “ନେଇ ଡ'ନା ଅବ୍ରାଆମ୍ନା ଉଁ'ଉଁନେ । ଇନ୍ଡଇ'ଏସା ନେଇ ଜାନାସା ଗତିରେମ୍ସୁଗ ଆଡୁତୁନେଇ ମାରି ମିଞାଂ ନ ସୁନ'ତୁନ ଆନେଇ ଅ'ତୁର୍ତ ଡ'ସେକ୍?”
34ସା' ଜିସୁଲା ସୁନ', “ଆପେ ନିଂ ସତଇସା ସୁନ'ତିଂ, ଜାଜା ପାପ୍କାମ୍ ଡେମ'ତା ମା'ଏ ଗୁଲାଇର ପାପ୍ନା ଗତିରେମ୍ । 35ମୁଇ ଡିଂଅଁବକ୍ ଡୁକୁନୁଂ ଗତିରେମ୍ ଡ'ନା ଡିଂଅନ୍ରେମ୍ସୁଗ ଇସାଉ ଆତା ଆଡୁତା, ମାତର୍ ଗୁତୁନ୍ ଡିଂଅଁନ୍ରେମ୍ନା ମୁଇନ୍ଡା ଉଁ'ଉଁ ଡ'ନାଏ ଗୁତୁନ୍ ଡିଂଅଁବକ୍ ଇସାଉ ଡୁତା । 36ସା' ନିଂ ମାପ୍ରୁନା ଉଁ'ଉଁସା' ନିଂ ଆପେ ପାପ୍କୁରୁଂ ଅ'ତୁର୍ତିଂ ଡ'ନା ପେ ସତଇସା ତୁତୁର୍ ଗଂତୁପେ । 37ପେ ଅବ୍ରାଆମ୍ନା ଉଁ'ଉଁନେ ଡ'ସେକ୍ ନିଂ ମାଗ'ତିଂ । ମାତର୍ ପେ ଆନିଂ ଅଗୁଇ'ପୁଲେଇ ଏତ୍ଗୁତୁପେ ମାସା'ଡ'ନା ନିଂନା ତୁମ' ପେ ବିସ୍ବାସ୍ ଆଡେମ୍ତୁପେ । 38ନିଂ ନେମ୍ବାନ୍ବକ୍ ମାମା ଜୁଲ'ତିଂ ଗୁତୁନ୍ ଆପେ ସୁଁସୁ ଡେନ୍ତିଂ । ମାତର୍ ପେସା ପେମ୍ବାନା ତୁମ' ଅଂଅଁ'ସେକ୍ ଡେମ'ତୁପେ ।”
39ସା' ମା'ଏ ଆମାଇ, ନେଇନା ବା ଅବ୍ରାଆମ୍ଲା ଡ'ସେକ୍ ସୁନ'ସା'
ଜିସୁଲା ସୁନ' “ପେ ଅବ୍ରାଆମ୍ନା ଉଁ'ଉଁନେ ଡ'ନାଏ ପେ ଅବ୍ରାଆମ୍ଲା ଡେମ'କୁନୁଂ କାମ୍ ଡେମ୍ପେ । 40ମାତର୍ ନିଂ ମାପ୍ରୁ ସୁନ'କୁନୁଂ ତୁମ' ଅଂଅଁ'ସେକ୍ ଆପେ ସୁଁସୁ ଡେନ୍ତିଂ । ଗୁତୁନ୍ ସତ୍ବାଇ' ତୁମ' ସୁନ'କୁନୁଂ ରେମବକ୍ ପେ ଅଡାପ୍ପୁଲେଇ ଏତ୍ଗୁତୁପେ । ଅବ୍ରାଆମ୍ଲା ଡ'ନା ଇନ୍ଡଇ'ଏସା ଡୁ'ତୁନ୍ବାଇ' କାମ୍ ଡେମ' ଆଡୁତା । 41ସା' ପେ ଡ'ନା ପେନ୍ ନିଜର୍ନା ବା ମିବାଇ' କାମ୍ ଡେମ'ତା ଡୁ'ତୁନ୍ସୁଗଉ ସମାନ୍ ଡିନ୍ଡେମ୍ ଡେନ୍ତୁପେ” ଡ'ସେକ୍ ସୁନ' ।
ସା' ମା'ଏ ସୁନ' “ନେଇ ଡ'ନା ବୁର୍ଲା'ଉଁନେ ଆରାକ୍ । ମାପ୍ରୁ ମୁଇନ୍ଡାଉ ନେମ୍ବା ମାରି ଜାଏସା ଆରାକ୍” ଡ'ସେକ୍ ସୁନ' ।
ସଇତାନ୍ନା ଉଁ'ଉଁନେ
42ସା' ଜିସୁଲା ଆମା'ଏ ସୁନ' “ମାପ୍ରୁ ପେନା ବା ଡ'ନାଏ ପେ ଆନିଂ ଆଲାତ୍ ଡେମ୍ପେ । ମାସା'ଡ'ନା ନିଂ ମାପ୍ରୁନ୍କୁରୁଂ ସା'ଗୁତିଂ । ନିଂନା ମୁନ୍ସୁଗ ନିଂ ଆକେ ସାଗ୍ଆଡୁତିଂ ମାତର୍ ଆନିଂ ମାପ୍ରୁ ବେନ୍ଟାୟ'ସା' ପେନ୍ବକ୍ ସା'ଗୁତିଂ । 43ନିଂ ସୁନ'କୁନୁଂ ତୁମ' ମାସା' ପେ ଆମାକ୍ତୁପେ? ମାସା'ଡ'ନା ନିଂ ସୁନ'କୁନୁଂ ତୁମ' ଅଂପୁଲେଇ ଆପେ ମୁନ୍ ଆରାକ୍ସା' ପେ ଆମାକ୍ତୁପେ । 44ପେ ଗୁଲାଇର ସଇତାନ୍ନା ଉଁ'ଉଁନେଉ । ମାଇ ପେମ୍ବାସା'ଉ ମାଇନା ମୁନ୍ସୁଗ ଡିନ୍ଡେମ୍ପୁଲେଇ ପେ ମୁନ୍ ଡେଂଗୁତୁପେ। ମାଇ ମୁଲ୍ବାଂସା' ଆ'ନ୍ପନ୍ତେକ୍ ଅଗୁୟ'ସେକ୍ ଡୁତା । ମାଇ ଇନ୍ଡଇ'ଏସା ସତ୍ ଆସୁନ୍ତ ମାସା'ଡ'ନା ମାଇ ସତ୍ବାଇ' ଆରାକ୍ । ପଲୁ ସୁଁସୁନାଉ ମାଇନା ଏତ୍ବକ୍ ଡୁତାସା' ମାଇ ଇସାଉ ପଲୁଉ ସୁନ୍ତ । ମାଇ ପଲୁବାଇ' ମାରି ଗୁଲାଇ ପଲୁ ମାଇନ୍କୁରୁଂଉ ତୁର୍ତା ସା' ମାଇଉ ଗୁଲାଇ ପଲୁ ସୁଁସୁନା ବା । 45ମାତର୍ ନିଂ ସତ୍ ସୁନ'ତିଂସା' ପେ ଆନିଂ ବିସ୍ବାସ୍ ଆଡେମ୍ତୁପେ । 46ନିଂ ପାପ୍ ଡେମ'ତିଂ ଡ'ସେକ୍ ଜାଏସା ଆନିଂ ଅସୁଇ' ଗଂତୁପେ ଇ? ଆରାକ୍ । ନିଂ ସୁନ'କୁନୁଂ ସତ୍ ଡ'ନା ପେ ମାସା' ଆନିଂ ବିସ୍ବାସ୍ ଆଡେମ୍ତୁପେ? 47ମାପ୍ରୁନା ଉଁ'ଉଁନେ ଗୁଲାଇର ମାପ୍ରୁ ସୁନ'କୁନୁଂ ତୁମ' ଅଂପୁଲେଇ ମୁନ୍ ଡେନ୍ତା । ମାତର୍ ପେ ଡ'ନା ମାପ୍ରୁନା ଉଁ'ଉଁନେ ଆରାକ୍ସା' ମାଇନା ତୁମ' ଆଅଂତୁପେ” ଡ'ସେକ୍ ସୁନ' ।
ଜିସୁଲା ଅବ୍ରାଆମ୍କୁରୁଂ ମୁନା'
48ଜିଉଦିରେମଲେ ଆମାଇ ସୁନ' “ନ ଡ'ନା ବୁତ୍ ସବ'କୁନୁଂ ମୁଇନ୍ଡା ସମିରନିୟ ରେମ ଡ'ସେକ୍ ନେଇ ଇସାଉ ସୁନ'ତୁନେଇ; ଗୁତୁନା ସତ୍ କି ଆରାକ୍?” ଡ'ସେକ୍ ସୁନ' ।
49ସା' ଜିସୁଲା ସୁନ' “ଆନିଂ ବୁତ୍ ଆସପ୍ତ । ମାତର୍ ନିଂ ଆନିଂନା ବା ମାନ୍ସେକ୍ ଡୁତିଂ; ମାରି ପେ ଡ'ନା ଆନିଂ ଆମାନ୍ତୁପେ । 50ରେମଲେ ଆନିଂ ନାଉଲେଇ' ଡ'ସେକ୍ ନିଂ ଆଏତ୍ତିଂ ମାତର୍ ଜା ନିଂପୁଲେଇ ଏତ୍ତା ମାରି ଇମ୍ବ'ନା ସତ୍ ଡ'ସେକ୍ ବିସାର୍ନା ଡେମ୍ତ ଡୁ'ତୁନ୍ବାଇ' ମୁଇନ୍ଡା ଡୁତା । 51ସତଇସା ନିଂ ଆପେ ସୁନ୍ତିଂ, ଜା ନିଂନା ତୁମ' ମାନ୍ତା ମାଇ ଇନ୍ଡଇ'ଏସା ଆଗୁଇ'ତା” ଡ'ସେକ୍ ସୁନ' ।
52ସା' ରେମଲେ ଆମାଇ ସୁନ', “ଜୁ, ଆ'ନା ନେଇ ମାଗ'ତୁନେଇ ଆନ ବୁତ୍ ସବ'ତା ଡ'ସେକ୍ । ମାସା'ଡ'ନା ଅବ୍ରାଆମ୍ଲା ଗୁଇ'ଗା' ମାରି ଡୁ'ତୁନା ବାବବାଦିଲେସା ଗୁଇ'ଗା' । ମାତର୍ ଜା ନନା ତୁମ' ସପ୍ତ ମାଇ ଇନ୍ଡଇ'ଏସା ଆଗୁଇ'ତା ଡ'ସେକ୍ ନ ସୁନ'ତୁନ । 53ନ ଜା, ନେଇନା ବା ଅବ୍ରାଆମ୍ନାକୁରୁଂ ନ ଅବୁଦି ମୁନା' ଇ? ମାଇ ଗୁଇ'ଗା' ମାରି ବାବବାଦିଲେସା ଗୁଇ'ଗା' । ଡୁ'ତୁନ୍ ଡ'ନା ନ ନିଜେ ନିଂ ଜା ଡ'ସେକ୍ ଏତ୍ଗୁତୁନ?” ଡ'ସେକ୍ ସୁନ' ।
54ସା' ଜିସୁଲା ସୁନ', “ନିଂ ନିଜେ ଅ'ନାଉକ୍ନା ମା ଲାବ୍ । ମାତର୍ ପେ ମାପ୍ରୁ ଡ'ସେକ୍ ଆଜା ସୁନ୍ତୁପେ ଗୁତୁନ୍ ନେମ୍ବାଉ ଆନିଂ ଅ'ନାଉରେମ୍ । 55ପେ ଆମାଇ ଆମାକ୍ତୁପେ ; ମାତର୍ ନିଂ ଆମାଇ ମାଗ'ତିଂ । ନିଂ ଆମାଇ ଆମାକ୍ତିଂ ଡ'ସେକ୍ ସୁନ'ନା ନିଂସା ପେସୁଗ ପଲୁ ସୁଁସୁରେମ୍ ଡେନ୍ତିଂ । ମାତର୍ ନିଂ ଆମାଇ ମାଗ'ତିଂ ମାରି ମାଇନା ତୁମ' ମାନ୍ସେକ୍ ଡୁତିଂ । 56ପେମ୍ବା ଅବ୍ରାଆମ୍ଲା ଆନିଂ ଆକେ ସାପ୍ତା ଡ' ଏତ୍ସେକ୍ ଅବୁଦି ଆସ୍ସେକ୍ ସାର୍ଦାକୁ । ନିଂ ସା'କୁନୁଂ ମାଇ ଜୁଲ'ସେକ୍ ଅବୁଦି ସାର୍ଦାଗା'” ଡ'ସେକ୍ ସୁନ' ।
57ସା' ଜିଉଦିରେମଲେ ଆମାଇ ସୁନ', “ଆନ ପସାସ୍ ବରସ୍ସା ଡିନ୍ଡେମ୍ ଅରଇ' ମାରି ମି ନ ଆଅବ୍ରାଆମ୍ଲା ଜୁଲ'ତିଂ ଡ'ତୁନଲେଇ?” ଡ'ସେକ୍ ସୁନ' ।
58ସା' ଜିସୁଲା ଆମା'ଏ ସୁନ', “ନିଂ ଆପେ ସତଇସା ସୁନ'ତିଂ, ଅବ୍ରାଆମ୍ନା ଜନମ୍ ସିଁସେଇଁବାଂସା' ନିଂ ଡୁତିଂ” ଡ'ସେକ୍ ସୁନ' । 59ସା' ରେମଲେ ଗୁତୁନ୍ ଅଂଅଁ'ସେକ୍ ଆମାଇ ତିତୁନେଇ ଡ'ସେକ୍ ବୁରେ ଜୁଗ' । ମାତର୍ ଜିସୁଲା ଆଜାଏସା ମ'ସୁଇ' ମନ୍ଦିର୍କୁରୁଂ ତୁର୍ସେକ୍ କଲେ ଡୁଂଗା' ।
Currently Selected:
ଜଅନ୍ 8: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
