ଜଅନ୍ 9
9
ଜନମ୍ବାଂସା' କାନାମ'ବାଇ' ଡୁକୁନୁଂରେମ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
1ଜିସୁଲା ଉଇଡେଂକୁନୁଂବେଲା ଜନମ୍ବାଂସା' କାନାମ'ବାଇ' ଡୁକୁନୁଂ ଆମୁଇନ୍ଡା ଜୁଲ' । 2ସା' ଜିସୁନା ସିସ୍ୟଲେ ଆମାଇ, “ଅ ଗୁରୁ, ଜା ବୁଲ୍ ଡେମ'ସା' ମାଇ ଡି'କେନା ଜନମ୍ ଡେଂଗା', ମାଇନା ପାପ୍କୁରୁଂ କି ମାଇନା ୟଂବାନା ପାପ୍କୁରୁଂ” ଡ'ସେକ୍ ଅ'ଗଁସ୍ଲା'ଗା'?
3ସା' ଜିସୁଲା ସୁନ', “ମାଇ ଡି'କେନା ଡେଂକୁନୁଂ ମାଇ ପାପ୍କାମ୍ ଡେମ'କୁନୁଂ କି ମାଇନା ୟଂବା ପାପ୍କାମ୍ ଡେମ'କୁନୁଂ ଡ'ସେକ୍ ଆରାକ୍ । ମାତର୍ ମାଇ ବଲ୍ ଡେଂନା ଆମାଇ ବଲ୍ ଡିନ୍ଡେମ୍ପୁଲେଇ ମାପ୍ରୁନ୍ବକ୍ ବପୁ ଡୁତା ଡ'ସେକ୍ ଅସୁଇ'ପୁଲେଇଉ ଡି'କେନ୍ ଡେଂଗୁତା । 4ସିମି'ଇ ଡୁକୁଡମ୍ ନେଇ' କାମ୍ ଡେମ୍ତୁନେଇ', ସା' ଆନିଂ ଜା ବେନ୍ଟାୟ' ମାଇନା କାମ୍ ଆ'ଇ ସୁରୁଇ' ଅ'ଡମ୍ ଗଂତୁନେଇ' ଆଇ'ତୁନ୍ ସୁରୁଇ' ନେଇ' ଡିନ୍ଡେମ୍ ଡୁତା । ମାସା'ଡ'ନା ତୁମୁଂଗ ଡେଂନା ନେଇ' କାମ୍ ଡିନ୍ଡେମ୍ ଆଗଂତୁନେଇ', ଡୁ'ତୁନ୍ବାଇ' ମୁଇ ବେଲା ସାପ୍ତା ଉନ୍ତା ଜାଏସା କାମ୍ ଡିନ୍ଡେମ୍ ଆଗଂତା । 5#ମାତିଉ 5:14; ଜଅନ୍ 8:12ନିଂ କେନ୍ ଦେସ୍ଦୁନିଆବକ୍ ଡୁକୁନୁଂବେଲା ନିଂଉ ଆଦେସ୍ଦୁନିଆନା ରେମଲେ ତାରା' ବିବେ'ଡା” ଡ'ସେକ୍ ସୁନ' ।
6ଡୁ'ତୁନ୍ ସୁନ'ସେକ୍ ମାଇ ତୁବୁକ୍ବକ୍ ବୁଇ'ତୁର'ସେକ୍ ଗୁତୁନ୍ ବୁନୁଇ'ତୁର୍ବୁରଂ ଲଦି ଅ'ରଇଁୟ'ସେକ୍ ମାଇନା ମ'ବକ୍ ସୁସୁଲ'ବେଡ' । 7ସୁସୁଲ'ବେଡ'ସେକ୍ ନ ଗୁତୁନ୍ ସିଲଅ ଡ'କୁନୁଂ ବନ୍ଦ୍ବକ୍ ଉଇସେକ୍ ଗୁଇମ'ଡା ଡ'ସେକ୍ ସୁନ' । (ସିଲଅ ଡ'ନା “ବେନ୍ଟାୟ'” ଡ'ସେକ୍ ଅର୍ତ ଡୁତା) । ସା' ମାଇ ଉଇସେକ୍ ଗୁଇମ'ଗା' ସା' ମାଇନା ମ' ତାର୍ଗା' ମାରି ମାଇ ବଲ୍ ଡେଂସେକ୍ ମାଇନା ଡିଂଅଁବକ୍ ଇ'ଗା' ।
8ସା' ମାଇନା ଉନ୍ତୁ'ସିଂ ଡାନ୍ଡର୍ସିଂନା ରେମଲେ ମାରି ସିଁସେଇଁଉ ମାଇ ଲେଇ'ସେକ୍ ମାଂନି ଲୁଲୁ'ବେଲା ଜୁଲ'କୁନୁଂ ରେମଲେ ଗୁଲାଇର ଆମାଇ ଜୁଲ'ସେକ୍ “କୁନା ଆତା ଲେଇ'ସେକ୍ ମାଂନି ଲୁଡ'କୁ ମାନ୍କି?” ଡ'ସେକ୍ ସୁନ' । 9ଅଁ'ଅଁ, କୁନାଉ ଗୁତୁନା ଡ'ସେକ୍ ଏନ୍ତୁକ୍ର ସୁନ',
ମାରି ଏନ୍ତୁକ୍ର “କୁନା ଆରାକ୍, ମାଇନା ସାର୍ମ'ସୁଗବାଇ' ପାଲ୍ ମୁଇନ୍ଡା ଜାଡେ ମାନ୍ଡେ” ଡ'ସେକ୍ ସୁନ' ।
ମାତର୍ ମାଇ “ଆରାକ୍, ନିଂଉ ଗୁତୁନ୍ ରେମ” ଡ'ସେକ୍ ସୁନ' ।
10ସା' ମା'ଏ ଆମାଇ “ମି ନନା ମ' ବଲ୍ ଡେଂଗା'?” ଡ'ସେକ୍ ଅ'ଗଁସ୍ଲା'ଗା'; ସା' ମାଇ,
11“ଜିସୁଲା ଡ'ସେକ୍ ମୁଇନ୍ଡା ଲଦି ଅ'ରଇଁୟ'ସେକ୍ ନିଂନା ମ'ବକ୍ ସୁସୁଲ'ବେଡ' । ସୁସୁଲ'ସେକ୍ ସିଲଅ ଡ'କୁନୁଂ ବନ୍ଦ୍ବକ୍ ଉଇସେକ୍ ଗୁଇମ'ଡା ଡ'ସେକ୍ ଆନିଂ ସୁନ' । ସା' ନିଂ ଉଇସେକ୍ ଗୁଇମକ୍ନିଂସା' ନିଂନା ମ' ବଲ୍ ଡେଂଗା'” ଡ'ସେକ୍ ମାଇ ସୁନ' ।
12ସା' “ମାଇ ଆମ୍ବ'ଲେଇ” ଡ'ସେକ୍ ଆମାଇ ଅ'ଗଁସ୍ଲା'ଗା'ସା',
“ନିଂ ଆମାକ୍ତିଂ” ଡ'ସେକ୍ ମାଇ ସୁନ' ।
13ସା' ମା'ଏ ଆମାଇ ପାରୁସିଦଲ୍ନା ରେମଲେନ୍ବକ୍ ରିଂଅଁ' ଉଇଗା' । 14ମାସା'ଡ'ନା ଜିସୁଲା ବିସ୍ରାମ୍ଦିନ୍ବକ୍ଉ ଲଦି ଅ'ରଇଁୟ'ସେକ୍ ମାଇନା ମ' ବଲ୍ ଡେମ'କୁ । 15ସା' ପାରୁସିଦଲ୍ନା ରେମଲେସା ନନା ମ' ମି ବଲ୍ ଡେଂଗା' ଡ'ସେକ୍ ଆମାଇ ଅ'ଗଁସ୍ଲା'ଗା' । ସା' ମାଇ ସୁନ' “ମାଇ ନିଂନା ମ'ବକ୍ ଲଦି ସୁସୁଲ'ବେଡ' ମାରି ନିଂ ଉଇସେକ୍ ଗୁଇମକ୍ନିଂସା' ଆ'ନା ନିଂ ଜୁଜୁ ଗଂଗୁତିଂ ।” ଡ'ସେକ୍ ସୁନ' ।
16ସା' ପାରୁସିଦଲ୍ନା ରେମଲେ ଏନ୍ତୁକ୍ର ସୁନ': କୁନା ମାପ୍ରୁନ୍କୁରୁଂ ସା'କୁନୁଂ ରେମ ଆରାକ୍ ମାସା'ଡ'ନା ମାଇ ବିସ୍ରାମ୍ଦିନ୍ନା ନିୟମ୍ ଆମାନ୍ତା ।
ମାତର୍ ଏନ୍ତୁକ୍ର ସୁନ': ମି ପାପ୍ବାଇ'ରେମ ଡି'କେନ୍ କାବାକାବା ଡିନ୍ଡେମ୍ବାଇ' କାମ୍ ଡିନ୍ଡେମ୍ ଗଂତା? ଡ'ସେକ୍ ସୁନ' । ଡି'କେନା ଅଇଁୟ'ସେକ୍ ମା'ଏ ମା'ଏନ୍ ବିତ୍ରେ ପାଲ୍ପାଲ୍ ଡେଂଉଇଗା' ।
17ପାରୁସିଦଲ୍ନା ରେମଲେ ମାରି ଆମାଇ ଅ'ଗଁସ୍ଲା'ଗା' “ମାଇ ନନା ମ' ବଲ୍ ଡେମ'ସା' ମାଇ ମିବାଇ' ରେମ ଡ'ସେକ୍ ନ ଏତ୍ଗୁତୁନ” ଡ'ସେକ୍ ଅ'ଗଁସ୍ଲା'ଗା'ସା'
“ମାଇ ମୁଇନ୍ଡା ବାବବାଦି” ଡ'ସେକ୍ ସୁନ' ।
18ଆତୁନ୍ ବଲ୍ଡେଂକୁନୁଂନା ୟଂବା ୱାଇ ବେନ୍ଟାୟ'ସେକ୍ ଆମାଇପା ଅ'ଗଁସ୍ଲା'ଗ୍ ପନ୍ତେକ୍ ମାଇ କାନାମ'ବାଇ' ଡୁକୁଗା' ମାରି ଆ'ନା ମାଇନା ମ' ବଲ୍ ଡେଂଗା' ଡ'ସେକ୍ ଜିଉଦିରେମଲେ ବିସ୍ବାସ୍ ଆଡେମ୍ତ । 19ସା' ମା'ଏ ଆୟଂଡେଇଁ ଆବାଡେଇଁ “କୁନା ପାନା ଉଁ'ଉଁ ଇ? ମାଇ କାନାମ'ବାଇ' ଜନମ୍ ଡେଂକୁଗା' ଇ? ମି ମାଇ ଆ'ନା ଜୁଜୁ ଗଂଗୁତା?” ଡ'ସେକ୍ ଅ'ଗଁସ୍ଲା'ଗା'।
20ସା' ବାଡେଇଁପା ସୁନ' “କୁନା ନାଂନା ଉଁ'ଉଁ ଡ'ସେକ୍ ମାରି ଜନମ୍ ଡେଂକୁନୁଂବାଂସା' ମାଇ କାନାମ'ବାଇ' ଡୁକୁ ଡ'ସେକ୍ସା ନାଂ ମାଗ'ତୁନାଂ । 21ମାତର୍ ଆ'ନା ମାଇ ମି ଜୁଜୁ ଗଂଗୁତା ଡ'ସେକ୍ ମାରି ଜା ମାଇନା ମ' ବଲ୍ ଡେମ' ଡ'ସେକ୍ସା ନାଂ ଆମାକ୍ତୁନାଂ । ପେ ଆମାଇ ଅ'ଗଁସ୍ଲା'ଗାବେ । ମାଇ ଡାଉ ଗୁଲା ଆରାକ୍, ଆମାଇ ଅ'ଗଁସ୍ଲାଗ୍ନା ମାଇଉ ସୁଁସୁ ଗଂତା” ଡ'ସେକ୍ ସୁନ' । 22ଆଜିଉଦିରେମଲେନା ମୁନା'ରେମେ ବୁତୁଂସେ'ଗାଉ ମାଇନା ୟଂବା ଡି'କେନା ସୁନ'କୁଗା' । ମାସା'ଡ'ନା ଜାଏସା ମୁଇନ୍ଡା ଜିସୁଲାଉ କିରିସ୍ଟଲା ଡ'ସେକ୍ ସୁନ'ନା ଆମାଇ ଜିଉଦିରେମଲେନା ପାର୍ତନା ଡିଂଅଁବକ୍ ଆବୁନେଇ' ଡ'ସେକ୍ ଜିଉଦିରେମଲେ ମା'ଏନ୍ ବିତ୍ରେ ଅଇଁୟ'କୁ । 23ଗୁତୁନ୍ସା'ଉ ମାଇନା ୟଂବା, ମାଇ ଡାଉ ଗୁଲା ଆରାକ୍, ଆମାଇ ଅ'ଗଁସ୍ଲା'ଗା'ବେ ଡ'ସେକ୍ ଆମା'ଏ ସୁନ'କୁ ।
24ଆତୁନ୍ କାନାମ'ଡା ମା'ଏ ମାର୍ ମୁସଉ ୱାୟ' । ୱାୟ'ସେକ୍ ସୁନ' “ନ ସତ୍ ସୁନ'ସେକ୍ ଆମାପ୍ରୁଉ ସୁନ୍ଡ୍ର ଡୁତା । ଜୁ, କେନ୍ ରେମ ପାପ୍ବାଇ' ଡ'ସେକ୍ ନେଇ ମାଗ'ତୁନେଇ” ଡ'ସେକ୍ ସୁନ' ।
25ସା' “ମାଇ ପାପ୍ରେମ୍ କି ଆରାକ୍ ଡ'ସେକ୍ ନିଂ ଆମାକ୍ତିଂ । ମାତର୍ କେନା ନିଂ ମୁଇଉ ମାଗ'ତିଂ, ମା ଡ'ନା ନିଂ କାନାମ'ବାଇ' ଡୁକୁନିଂ, ଆ'ନା ନିଂ ଜୁଜୁ ଗଂଗୁତିଂ” ଡ'ସେକ୍ ମାଇ ସୁନ' ।
26ସୁନ'ସା' ମା'ଏ “ଡୁ'ତୁନ୍ ଡ'ନା ମାଇ ମା ଡେମ'? ମାରି ମି ଡେମ'ସେକ୍ ଆନ ମାଇ ବଲ୍ ଡେମ'?” ଡ'ସେକ୍ ଅ'ଗଁସ୍ଲା'ଗା' ।
27ସା' ମାଇ ସୁନ' “ଜୁ, ମାଇ ମି ଡେମ' ମା ଡେମ' ଡ'ସେକ୍ ଆପେ ନିଂ ସୁନ'ନିଂ କି ଆରାକ୍ । ପେ ବଲ୍ ଆଅଂତୁପେ ଇ? ମାରି ଗୁତୁନ୍ ଅଂତୁନେଇ ଡ'ସେକ୍ ମୁନ୍ ଡେଂଗୁତୁପେ ଇ? ପେସା ମାଇନା ସିସ୍ୟଲେ ଏପୁଲେଇ ମୁନ୍ ଡେଂଗୁତୁପେ ଇ?” ଡ'ସେକ୍ ସୁନ' ।
28ସା' ମା'ଏ ଆମାଇ ଅବୁଦି କୁୟଁ'ସେକ୍, “ନ ମାଇନା ସିସ୍ୟ ମାତର୍ ନେଇ ଡ'ନା ମସାନା ସିସ୍ୟଲେ । 29ମସାଲାବୁରଂ ମାପ୍ରୁ ଅଇଁୟ' ଡ'ସେକ୍ ନେଇ ମାଗ'ତୁନେଇ ମାତର୍ କୁନା ଇମ୍ବ'ନ୍ ରେମ ଡ'ସେକ୍ ନେଇ ଆମାକ୍ତୁନେଇ” ଡ'ସେକ୍ ସୁନ' ।
30ସା' ମାଇ ଆମା'ଏ ସୁନ', “ମାଇ ନିଂନା ମ' ବଲ୍ ଡେମ'କୁନୁଂ ଜୁଲ'ସେକ୍ସା ମାଇ ଇମ୍ବ'ନ୍ ରେମଡେ' ନେଇ ଆମାକ୍ତୁନେଇ ଡ'ସେକ୍ ପେ ମିଞାଂ ସୁନ'ତୁପେ? ପେନ୍ ତୁମ' ଅଂଅଁ'ସେକ୍ ନିଂ କାବା ଡେଂଗୁତିଂ । 31ପାପ୍ରେମ୍ନା ପାର୍ତନା ମାପ୍ରୁ ଆଅଂତ ମାତର୍ ଜା ଆମାପ୍ରୁ ସୁନ୍ଡ୍ରସେକ୍ ଡୁତା ମାରି ମାଇନା ମୁନ୍ସୁଗ କାମ୍ ଡେମ୍ତ ଡୁ'ତୁନ୍ବାଇ' ରେମନା ପାର୍ତନା ମାଇ ଅଂତ ଡ'ସେକ୍ ନେଇ' ଗୁଲାଇର ମାଗ'ତୁନେଇ' । 32ମୁଇନ୍ଡା ଜନମ୍ବାଂସା' କାନାମ'ବାଇ' ଡୁକୁନୁଂନା ମ' ଜାଏସା ବଲ୍ ଡେମ' ଡ'ସେକ୍ ଦର୍ତନି ଅ'ରଇଁୟ'କୁନୁଂବାଂସା' ଇନ୍ଡଇ'ଏସା ନେଇ' ଅଂ ଅରଇ' । 33କେନ୍ ରେମ ମାପ୍ରୁନ୍କୁରୁଂ ସାକ୍ ଆଡୁତା ଡ'ନା ମାଇ ମାଏସା ଡିନ୍ଡେମ୍ ଆଗଂଆଁନା” ଡ'ସେକ୍ ସୁନ' ।
34ସା' ମା'ଏ ଆମାଇ “ନଉ ତ ଜନମ୍ବାଂସା' ପାପ୍ବାଇ' ରେମ । ନ ଆନେଇ ଅମାକ୍ଡେନ୍ତୁନ ଇ?” ଡ' ସୁନ'ସେକ୍ ଆମାଇ ଉନ୍ତ୍କୁରୁଂ ବାଇରି ଞନ' ଅ'ତୁର' ।
35ଆମାଇ ଉନ୍ତ୍କୁରୁଂ ବାଇରି ଞନ' ଅ'ତୁର' ଡ'ସେକ୍ ସୁନ'କୁନୁଂ ଜିସୁଲା ଅଂଅଁ' । ଅଂଅଁ'ସେକ୍ ଜିସୁଲା ଆମାଇ ତୁର'ତୁର' ସୁସପ୍ବାଂସେକ୍ “ନ ମାପ୍ରୁ ବେନ୍ଟାୟ'ସା' ସା'କୁନୁଂ ଆରେମନା ଉଁ'ଉଁ ବିସ୍ବାସ୍ ଡେମ୍ତୁନ ଇ?” ଡ'ସେକ୍ ଜିସୁଲା ଅ'ଗଁସ୍ଲା'ଗା' ।
36ସା' ମାଇ, “ଅ ଗୁରୁ, ମାଇ ଜା ଡ'ସେକ୍ ସୁଁ, ଆମାଇ ବିସ୍ବାସ୍ ଡିନ୍ଡେମ୍ପୁଲେଇ ଆନିଂ ମୁନ୍” ଡ'ସେକ୍ ସୁନ' ।
37ସା' ଜିସୁଲା, “ନ ଆମାଇ ଜୁଲ'ନ । ସତଇସା ଜା ନବୁରଂ ଆ'ନା ଅଇଁୟ'ତା ମାଇଉ ଗୁତୁନା” ଡ'ସେକ୍ ସୁନ' ।
38ସା' ମାଇ, “ଅ ପ୍ରବୁ, ନିଂ ବିସ୍ବାସ୍ ଡେମ'ତିଂ” ଡ'ସେକ୍ ଆଜିସୁଲା ସୁନ୍ଡ୍ରଗା' ।
39ସା' ଜିସୁଲା ସୁନ' “ଜାଜା ଆମାପ୍ରୁ ଆମାକ୍ତ ମା'ଏ ଡ'ନା କାନାମ'ବାଇ' ରେମସୁଗ ଡୁତା ମାତର୍ ଆମାପ୍ରୁ ମାଗ୍ମାକ୍ପୁଲେଇ ନିଂ ଆମା'ଏ ସାନ୍ଡୁଂତିଂ । ମାରି ଜାଜା ଆମାପ୍ରୁ ମାଗ'ତୁନେଇ ଡ'ତା ମା'ଏ ଡ'ନା ମ' ଜୁଜୁ ଗଂକୁନୁଂ ରେମଲେସୁଗ ମାତର୍ ମା'ଏ କାନାମ'ବାଇ' ରେମସୁଗ ଡୁତା ଡ'ସେକ୍ ନିଂ ଆମା'ଏ ଅମାକ୍ତିଂ । ଡୁ'ତୁନ୍ଉ ଆରେମଲେ ବିସାର୍ନା ଡିନ୍ଡେମ୍ପୁଲେଇ ନିଂ ଆକେନ୍ ଦେସ୍ଦୁନିଆ ସା'ଗୁତିଂ” ଡ'ସେକ୍ ସୁନ' ।
40ସା' ଆତା ଡୁକୁନୁଂ ପାରୁସିଦଲ୍ନା ରେମଲେ ଗୁତୁନ୍ ଅଂଅଁ'ସେକ୍, “ମା ଡ'ତୁନଲେଇ? ଆନେଇସା କାନାମ'ବାଇ' ରେମଲେ ଡ'ସେକ୍ ନ ସୁନ'ତୁନ ଇ?” ଡ'ସେକ୍ ସୁନ' ।
41ସା' ଜିସୁଲା, “ପେ କାନାରେମ୍ସୁଗ ଡୁକୁନାଏ ପେ ପାପ୍ରେମ୍ ଡ'ସେକ୍ ଆସୁନିଂ ମାତର୍ ଆ'ନା ପେ ଜୁଜୁ ଗଂଗୁତୁନେଇ ଡ'ସେକ୍ ସୁନ'ତୁପେସା' ପେନ୍ବକ୍ ପାପ୍ ଡୁତା” ଡ'ସେକ୍ ସୁନ' ।
Currently Selected:
ଜଅନ୍ 9: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
