ଲୁକ 12
12
ଜିସୁଲା ଅମାକ୍ଡେନ୍
(ମାତିଉ 10:26–27)
1 #
ମାତିଉ 16:6; ମାର୍କ 8:15 ଆଇ'ତୁନ୍ବେଲା ଅଜାର୍ ଅଜାର୍ ରେମଲେ ସାକ୍ସେକ୍ ଅଜକ୍ଡାକ୍ ଅ'ତେଇଁଡା'କୁ । ଆରେମଲେ ସୁଁସୁ ସିଁସେଇଁ ଜିସୁଲା ଆମାଇନା ସିସ୍ୟଲେ ସୁନ' “ପାରୁସିଦଲ୍ନା ରେମଲେ କମିର୍ସୁଗ ଡୁତାସା' ପେ ସଇଗା ଡେଂସେକ୍ ଡୁକୁଲା । ମାସା'ଡ'ନା ମା'ଏ ନାଡାଇବାର୍ବାଇ' ରେମଲେ । 2#ମାର୍କ 4:22; ଲୁକ 8:17 ରୁକ୍ସାଗ' ବୁଂଅଁ'କୁନୁଂ ଗୁଲାଇ ମୁସିଂ ଅ'ତୁନାଲ' ବେ'ତ ମାରି ମମୁନାକ୍ ମଜୁନୁସୁଗ କଲେ ଡେମ'କୁନୁଂ ଗୁଲାଇ ଅ'ତୁନାଲ' ବେ'ତ । 3ସା' ପେ ମାମା ଞୁର୍କୁନୁଂବକ୍ ଅଇଁୟ'ତୁପେ ଗୁତୁନା ଗୁଲାଇ ମୁସିଂ ତାରା'ବକ୍ ଅ'ଅଂତ । ମାରି ବିତ୍ରେନ୍ ଡିଂଅଁବକ୍ କଲେ ମାମା ଅ'ସୁନୁକୁନୁଂ ମୁସିଂ ଗୁଲାଇର ଅଂସୁଗ ଡକ୍ତି'ତା ତୁତର'ବେ'ତ ।”
ଆଜା ବୁତୁଂ ଡୁତା
(ମାତିଉ 10:28–31)
4ଜିସୁଲା ଆମାଇନା ସିସ୍ୟଲେ ସୁନ', “ଅ ବାଇଲ'ଗେ, ଆପେନ୍ ଞେରି ଅଡାବ'ସେକ୍ ତିର୍ଗି' ମାରି ଆପେ ମାସା' ଡିନ୍ଡେମ୍ ମଗୁନଂବାଇ' ରେମଲେବକ୍ ପେ ଆବୁତୁଂଗା' । 5ମାତର୍ ପେ ଆଜା ବୁତୁଂ ଡୁତା ଡ'ସେକ୍ ନିଂ ଆପେ ସୁନ୍ତିଂ । ଆପେ ଅଗୁୟ'ସେକ୍ ନର୍ଗବକ୍ ରାନ୍ଡେଲ' ବିବେ'ପୁଲେଇ ଜାନ୍ବକ୍ ବପୁ ଡୁତା ଆମାଇ ପେ ବୁତୁଂ ଡୁତା । ଅ'ଅଁ, ଆମାଇଉ ପେ ବୁତୁଂ ଡୁତା ଡ'ସେକ୍ ନିଂ ଆପେ ସୁନ'ତିଂ । 6ମି'କିନେମ୍ ଡୁକୁନୁଂ ଆପାଁନ୍ସ୍ଟା କିୟାଂପି' ଉନା ଡାବୁବକ୍ ରେମଲେ ସୁଂଅଁ' ଆଡୁତା ଇ? ଡୁ'ତୁନ୍ ଡ'ନାସା ମାପ୍ରୁ ଆମା'ଏ ଆମୁଇସା ଆବାନାତା । 7ସା' ପେ ଜୁ, ପେନ୍ ବ'ବ୍ବକ୍ ଡୁକୁନୁଂ ଉକ୍ବକ୍ସା ମାପ୍ରୁ ଗୁଲାଇ ଏଜାଲ'ସେକ୍ ବୁଂଅଁ'ତା । ସା' ପେ ବୁତୁଂ ଦର୍କାର୍ ଆରାକ୍ । ମାସା'ଡ'ନା କିୟାଂପି'ଡେନ୍କୁରୁଂ ପେ ଅବୁଦି ମୁନା' ।”
(ମାତିଉ 10:32–33; 10:19–20)
8ନିଂ ମାପ୍ରୁ ବେନ୍ଟାୟ'ସା' ସାକୁନୁଂ ରେମନା ଉଁ'ଉଁ, ଜାଏସା ମୁଇନ୍ଡା ନିଂ ଆଜିସୁଲା ବିସ୍ବାସ୍ ଡେମ'ତିଂ ଡ'ସେକ୍ ଆରେମଲେ ସୁନ'ନା ନିଂସା ଆମାଇ ନିଂନା ରେମ ଡ'ସେକ୍ ମାପ୍ରୁନା ଦୁତଲେ ଡୁକୁନୁଂବକ୍ ସୁନ୍ତିଂ । 9ଜାଏସା ମୁଇନ୍ଡା ନିଂ ଆଜିସୁଲା ବିସ୍ବାସ୍ ଡେମ' ଆଡୁତିଂ ଡ'ସେକ୍ ଆରେମଲେ ସୁନ'ନା ନିଂସା ଆମାଇ ନିଂନା ରେମ ଆରାକ୍ ଡ'ସେକ୍ ମାପ୍ରୁନା ଦୁତଲେ ଡୁକୁନୁଂବକ୍ ସୁନ୍ତିଂ । 10#ମାତିଉ 12:32; ମାର୍କ 3:29ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ନିଂନା ବାଗ୍ବକ୍ ଜାଜା ଅଲିରାକ୍ବାଇ' ସୁନ'ନା ଆମାଇ ମାପ୍ରୁ କେମା ବେ'ତ; ମାତର୍ ଆପବିତ୍ର ଆତ୍ମା ଜାଜା ନିନ୍ଡାତ ଆମାଇ କେମା ଆବେ'ତ ।
11 #
ମାତିଉ 10:19,20; ମାର୍କ 13:11; ଲୁକ 21:14,15 ଆନିଂ ପେ ବିସ୍ବାସ୍ ଡେମ'ତୁପେସା' ରେମଲେ ଆପେ ସବ'ସେକ୍ ପାର୍ତନା ଡିଂଅଁବକ୍ ମାରି ଅଦିକାର୍ ଡୁକୁନୁଂ ମୁନା' ମୁନା'ରେମଲେନ୍ବକ୍ ରିଂଅଁ' ଉଇତା । ଆଇ'ତୁନ୍ବେଲା ମି ସୁନ୍ତୁନେଇ ମା ଡିକ୍ତୁନେଇ ଡ'ସେକ୍ ପେ ଆସିନ୍ତାଲ' । 12ମାସା'ଡ'ନା ଉନ୍ତା ମା ସୁନ'ନା ଡେନ୍ତା ଡ'ସେକ୍ ପବିତ୍ର ଆତ୍ମା ଆପେ ଅମାଗ' ବେ'ତ ।
ବଡ୍ପୁନ୍ବାଇ' ସାକାର୍ରେମ୍
13ରେମଲେନ୍ ବିତ୍ରେ ମୁଇନ୍ଡା ଆଜିସୁଲା ସୁନ' “ଅ ଗୁରୁ, ନେମ୍ବାନା ଦନ୍ସମ୍ପତି ବାନ୍ଟାଲ' ବିବେ'ପୁଲେଇ ଆନିଂନା ବୁୟାଂ ସୁଁ” ଡ'ସେକ୍ ସୁନ' ।
14ସା' ଜିସୁଲା ଆମାଇ ସୁନ' “ପେମ୍ବାନା ଦନ୍ସମ୍ପତି ଆପା ବାନ୍ଟାଲ' ବିବେ'ପୁଲେଇ ଆନିଂ ଜା ବିସାର୍ନା ଡିନ୍ଡେମ୍ରେମ୍ ଆରା'ଗେ ବାନ୍ଟାରେମ୍ ଡ'ସେକ୍ ବୁଂଅଁ'ତା?” ଡ'ସେକ୍ ସୁନ' । 15ମାରି ଜିସୁଲା ଆରେମଲେ ସୁନ' “ପେ ଲାଡ୍ସି ଆଡେଂଗା', ଗୁତୁନ୍କୁରୁଂ ସୁଲୁଂ ଡୁକୁଲା । ମୁଇନ୍ଡାନ୍ବକ୍ ଅବୁଦି ଦନ୍ସମ୍ପତି ଡୁକୁନା ଗୁତୁନ୍ ଦନ୍ସମ୍ପତି ମାଇନା ଜିବନ୍ ବଲ୍ ବୁଂବୁଂପୁଲେଇ ସାନ୍ଡୁଂତ ଇ? ଆରାକ୍!”
16ମାଇ କେନ୍ ବିସୟ ଆମା'ଏ ଅମାକ୍ପୁଲେଇ ମୁଇ ଉ'ସୁରାମ୍ ଉଡ', ମାଇ ସୁନ': ମୁଇନ୍ଡା ସାକାର୍ନା ଜମିବକ୍ ଅବୁଦି ଗିଲେସୁ'ଉଗା' । 17ସା' ମାଇ ମାଇନା ଜିବନ୍ବକ୍ ଏତ୍ଗା', ନିଂ ଆ'ନା ମା ଡେମ୍ତିଂ? କାଦି ଗୁଲାଇଉ ବୁଂବୁଂତୁତବ୍ପୁଲେଇ ନିଂବକ୍ ତାନ୍ ଆଡେନ୍ତା ।
18ତିର୍ଗି' ମାଇ ଏତ୍ଗା', ନିଂ ମା ଡେମ୍ତିଂ ଡ'ନା କେନ୍ ଡିଂଅଁଲେ ଅ'ଲାର'ସେକ୍ ଅବୁଦି ବୁଡାଲା କାଦି ବୁଂବୁଂନା ଡିଂଅଁଲେ ଅ'ରଇଁୟ'ସେକ୍ ଗୁଲାଇ କାଦି ଗୁତୁନ୍ ବିତ୍ରେ ବୁଂତିଂ । 19ମାରି ନିଂ ଆନିଂନା ଜିବନ୍ ଡି'କେନ୍ ସୁନ୍ତିଂ; ନନ୍ବକ୍ ଅବୁଦି ବରସ୍ ସୁମ'ଡୁକୁପୁଲେଇ ଗୁଲାଇ ବଲ୍ବଲ୍ଟା କାଦି ବୁଂଅଁ'ତିଂ । ଆ'ନା ସୁସାର୍ ସୁମ'ଇଡ' ସାର୍ଦା ଡେମା ।
20ମାତର୍ ମାପ୍ରୁ ଆମାଇ ସୁନ', “ଅ ମମୁନାକ୍ରେମ୍, ଆ'ନା ତୁମୁଂଗ ନନା ଜିବନ୍ ନନ୍କୁରୁଂ ରିଂଅଁ' ଡୁଂତା । ସା' ନ ତ'ରିମ'କୁନୁଂ ଜା ସୁମ୍ତ?” ଡ'ସେକ୍ ସୁନ' ।
21ଜାଜା ନିଜର୍ପୁଲେଇ ଦନ୍ସମ୍ପତି ଅବୁଦି ତ'ରିମ'ବୁଂଅଁ'ସେକ୍ ମାପ୍ରୁନା ମୁନ୍ସୁଗ ଆଡୁତା ଡ'ନା ଆମାଇସା ଡି'କେନା ଡେନ୍ତା ।
ମା ସୁମ୍ତୁନେଇ ମା ଇ'ତୁନେଇ ଡ' ଏତ୍ସେ'ଗା ଆସିନ୍ତାଲ'
(ମାତିଉ 6:25–34)
22ମାଇ ଆମାଇନା ସିସ୍ୟଲେ ସୁନ': “ନିଂ ଇସାଉ ମା ସୁମ'ଇଡ' ବୁରତିଂବେ ଆରା'ଗେ ମା ଅଲୁକ୍ତିଂବେ ଡ'ସେକ୍ ପେ ଆସିନ୍ତାଲ' । 23ମାସା'ଡ'ନା ସୁସୁମ୍ ଇ'ନାକୁରୁଂ ପେନା ଜିବନ୍ ଅବୁଦି ମୁନା'ବାଇ' ମାରି ଞେରିପୁଲେଇ ଡୁକୁନୁଂ ସକାବାନ୍ଦାକୁରୁଂ ପେନା ଞେରି ଅବୁଦି ମୁନା'ବାଇ' ଡୁତା ଡ'ସେକ୍ ନିଂ ଆପେ ସତଇସା ସୁନ'ତିଂ । 24ଆଗୁଗା'ଗେ ଜୁ, ମା'ଏ ଲୁଗ'ୱାୟ' ଆଡୁତା ମାରି ରାଂଡାଗ୍ବକ୍ ତ'ରିମ' ଆବୁଂତ । ମାତର୍ ମାପ୍ରୁ ଆମା'ଏ ଗୁଲାଇ ସୁସୁମ୍ ଇ'ନା ଇସାଉ ବେଡ'ତା । ପୁରି'ସୁରଇ'ନ୍କୁରୁଂ ପେ ଅବୁଦି ମୁନା'! 25ପେନ୍ ବିତ୍ରେ ଜାଏସା ସିନ୍ତାଲ' ରୁନ୍ତାଲ' ଡୁକୁକ୍ସେକ୍ ଆନିଜର୍ନା ଜିବନ୍ ନିଜେ ଇ'କିସା ଅ'ଲାଂ ଗଂତୁପେ ଇ? ଆରାକ୍! 26ପେ ସିନ୍ତାଲ'ସେକ୍ ପେନା ଜିବନ୍ ଇକିସା ଅ'ଲାଂ ଆଗଂତୁପେ ଡ'ନା ମାସା' ପାଲ୍ ଗୁଲାଇ ଏତ୍ସେକ୍ ସିନ୍ତାଲ'ତୁପେ?
27ବୁର୍ଲୁକ୍ବକ୍ ଡୁକୁନୁଂ ଆସାରିଲେ ଜୁ, ମା'ଏ ମି ବୁରଗୁତା? ମା'ଏ ବୁରଂଗୁଡାକ୍ ଡେମ' ଆଡୁତା କି ଇମ୍ପ'ସେନ୍ଡି ତାୟଁ'ଗାଡ' ଆଡୁତା । ମାତର୍ ନିଂ ଆପେ ସୁନ'ତିଂ ଗୁଲାଇନ୍କୁରୁଂ ମୁନା' ରାଜା ସଲମନ୍ନା ଅବୁଦି ଦନ୍ସମ୍ପତି ଡୁକୁଗା' ଡ'ନାସା ମାଇ ଗୁତୁନ୍ ସାରିଲେସୁଗ ମଇନାବାଇ' ମୁଇ ସକାସା ଅଲୁକ୍ ଆଡୁତା। 28ମାରି ବୁର୍ଲୁକ୍ବକ୍ ଡୁକୁନୁଂ ଆକିରେଇଁଏ ଜୁ । ମା'ଏ ଅବୁଦି ମଇନାବାଇ' ତୁନାଗୁତା । ମା'ଏ ଅବୁଦି ମଇନାବାଇ' ତୁନାତା ଡ'ନାସା ଆ'ନା ଡୁତା ବେରା ଆମା'ଏ ସୁଂଅଁବକ୍ ବାଲ'ସୁଂତ । ମାପ୍ରୁ ଆମା'ଏ ଆଇ'କେନ୍ ମଇନାବାଇ' ଅ'ରଇଁୟ'ତା ଡ'ନା ମାଇ ଆପେ ଅଲୁକ୍ପୁଲେଇ ସକାବାନ୍ଦା ଆବେ'ତ ଇ? ମାସା' ପେ ଆମାପ୍ରୁ ବଲ୍ ବିସ୍ବାସ୍ ଆଡେମ୍ତୁପେ? 29ପେ ମା ସୁମ୍ତୁନେଇ ମା ଇ'ତୁନେଇ ଡ' ଏତ୍ସେ'ଗା ଆସିନ୍ତାଲ' । 30ମାସା'ଡ'ନା କେନ୍ ଦେସ୍ଦୁନିଆବକ୍ ଜାଜା ଆମାପ୍ରୁ ବିସ୍ବାସ୍ ଆଡେମ୍ତ ମା'ଏଉ କେନ୍ ଗୁଲାଇ ତୁର'ବୁଲ୍ଲ'ତା । ମାତର୍ କେନ୍ ଗୁଲାଇ ଆପେ ଦର୍କାର୍ ଡ'ସେକ୍ ପେନା ବା ମାଗ'ତା । 31ମାପ୍ରୁନ୍ ରାଜିନା ବିସୟ ମାରି ମାଇନା ମୁନ୍ ମା ଗୁତୁନ୍ ଏତ୍ସେ'ଗା ଡୁକୁଲା । ଡୁ'ତୁନ୍ ଡ'ନା ଆପେ ମାମା ଦର୍କାର୍ ଗୁତୁନ୍ ଗୁଲାଇ ମାପ୍ରୁ ବେ'ତ ।
ସରଗ୍ବକ୍ ଡୁକୁନୁଂ ଦନ୍ସମ୍ପତି
(ମାତିଉ 6:19–21)
32ଅ ନିଂନା ରେମଲେ, ପେ ଉନାରଉ ଡୁତୁପେ ଡ'ନାସା' ଆବୁତୁଂଗା' । ମାସା'ଡ'ନା ପେନା ବା ମାଇନା ରାଜି ଆପେ ବିବେ'ପୁଲେଇ ଅବୁଦି ସାର୍ଦା ଡେଂସେକ୍ ମୁନ୍ ଡେଂଗୁତା । 33ପେନ୍ ଦନ୍ସମ୍ପତି ଗୁଲାଇ ସୁଂଅଁ'ସେକ୍ ଆଗରିବ୍ରେମେ ବାନ୍ଟାଲ'ବେ' । ଡୁ'ତୁନ୍ ଡେମ'ନା ସରଗ୍ବକ୍ ମାପ୍ରୁ ପେପୁଲେଇ ଇନ୍ଡଇ'ଏସା ମଡୁନମ୍ବାଇ' ଦନ୍ସମ୍ପତି ବେ'ତ । ସା' ଆତା ପେନ୍ ଡାବୁ ବୁଂବୁଂନା ମୁନା ଇନ୍ଡଇ'ଏସା ବାୟୁର୍ବାଇ' ଡେଂସେକ୍ କାନାକ୍ ଆଉଇତା ମାରି ପେନା ଦନ୍ସମ୍ପତି ଡୁଂଗାରେମ୍ ରିଂଅଁ' ଉଇ ଆଗଂତା ମାରି ତପ୍ଡୁର'ଗୁସାଗ'ସେକ୍ ସୁମ୍ଲୁଗ'ସୁମ୍ବେର' ଆଉଇତା । 34ମାସା'ଡ'ନା ପେନା ଦନ୍ସମ୍ପତି ଆମ୍ବ' ଡୁତା ଆତାଉ ପେନା ଏତ୍ସା ଡୁତା ।
ଇସାଉ ଅଜାକ୍ ଅ'ଜୁଂସେକ୍ ଡୁକୁଲା
(ମାତିଉ 24:45–51)
35-36 #
ମାତିଉ 25:1–13
#
ମାର୍କ 13:34–36
ମୁଇନ୍ଡା ସାକାର୍ ୱାଇବୁଇ'ନା ବଜିବକ୍ ଉଇଗୁତାସା' ମାଇ ଇନ୍ଡ'ୟା ଇକ୍ସେକ୍ ଆପାଟା ଡୁଡବ'ନାସା ପାଟା ସୁରୁଇ' ରୁଗ'ବିବେ'ପୁଲେଇ ମାରି ଆମାଇ ସେବା ଡିନ୍ଡେମ୍ପୁଲେଇ ମାଇନା କାମ୍ରେମ୍ ଇମ୍ପ'ସେନ୍ଡି ଅଲୁକ୍ସେକ୍ ମା'ଏନା ବତି ଅ'ଡଲ'ସେକ୍ ଇସାଉ ଜାଗ୍ଲ' ଡୁତା । ପେସା ଡୁ'ତୁନ୍ଉ ଇସାଉ ଇମ୍ପ'ସେନ୍ଡି ଅଲୁକ୍ସେକ୍ ପେନ୍ ବତି ଅ'ଡଲ'ସେ'ଗା ଇସାଉ ଅଜାକ୍ ଅ'ଜୁଂସେକ୍ ଆନିଂସା ଜାଗ୍ଲ'କୁଲା । 37ସାକାର୍ ଇ'ରେମ୍ ଜାଜା ମଲେମ' ଡୁତା ଡ'ସେକ୍ ଆଜାଆଜା ଜୁତ ମା'ଏ ଅବୁଦି କପାଲ୍ବାଇ' ରେମଲେ । ମାସା'ଡ'ନା ଇମ୍ବ'ନ୍ ଗୁପାମ୍ରେମେ ମଲେମ' ଡୁତା ଆମା'ଏ ମାଇ ୱାୟ'ସେକ୍ ସୁସୁମ୍ପୁଲେଇ ଅଲେୟ'ସେକ୍ ଗୁତୁନ୍ ସାକାର୍ ନିଜେ କାମ୍ ଡିନ୍ଡେମ୍ନା ଇମ୍ପ'ସେନ୍ଡି ଅଲୁକ୍ସେକ୍ ଆମା'ଏ କିୟାଂମା' ୱାୟ'ବିବ' ବେ'ତ ଡ'ସେକ୍ ନିଂ ଆପେ ସତଇସା ସୁନ'ତିଂ । 38ସା' ଗୁତୁନ୍ ସାକାର୍ ମୁଇ'ସାଂତକ୍ ଆରା'ଗେ ଇନ୍ଜୁର୍ନୁକ୍ ଇନ୍ଡ'ୟା ସାକ୍ନାସା ମାଇନା ଗୁପାମ୍ରେମେ ଆମାଇ ଜାଗ୍ଲ'ସେ'ଗାଉ ଡୁତା ଡ'ସେକ୍ ମାଇ ଜୁଲ'ନା ମା'ଏ ଅବୁଦି କପାଲ୍ବାଇ' ରେମଲେ । 39#ମାତିଉ 24:43,44ମାତର୍ ଆ'ଇବେଲା ଡୁଂଗାରେମ୍ ଡିଂଅଁବକ୍ ଗାଇତା ଡ'ସେକ୍ ଜାଏସା ମୁଇନ୍ଡା ଡିଂଅଁନା ସାକାର୍ରେମ୍ ମାଗ'ନା ମାଇନା ଡିଂଅଁବକ୍ ଡୁଂଗାରେମ୍ ଆଗାଏଇ' ଡ'ସେକ୍ ଜାଗ୍ଲ'ସେକ୍ ଲେଇ'ତା ଡ'ସେକ୍ ପେ ମାଗ'କୁଲା । 40ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ନିଂସା ଡୁ'ତୁନ୍ଉ ପେ ମଏତ୍ବାର୍ ଡୁକୁନୁଂବେଲା ସାପ୍ତିଂସା' ପେସା ଇସାଉ ଜାଗ୍ଲ'ସେକ୍ ଡୁକୁଲା” ଡ'ସେକ୍ ସୁନ' ।
ବଲ୍ବାଇ' ମାରି ଅଲିରାକ୍ବାଇ' ଗୁପାମ୍ରେମ୍
(ମାତିଉ 24:45–51)
41ସା' ପିତର୍ଲା ଆଜିସୁଲା ସୁନ' “ଅ ପ୍ରବୁ, କେନ୍ ଉ'ସୁରାମ୍ ନ ଆନେଇଉ ସୁନ'ତୁନ କି ଆଗୁଲାଇର ସୁନ'ତୁନ?” ଡ'ସେକ୍ ସୁନ' ।
42ସା' ପ୍ରବୁଲା ସୁନ' “ଜାଏସା ମୁଇନ୍ଡା ମାଇନା ସାକାର୍ ସୁନ'କୁନୁଂସୁଗ କାମ୍ ଡେମ୍ତ ମାରି ଆମାଇ ବେଡ'କୁନୁଂ ଗୁଲାଇ କାମ୍ ବଲ୍ ଡେମ୍ତ ଡ'ନା ଡୁ'ତୁନ୍ବାଇ' ରେମବକ୍ ମାଇନା ସାକାର୍ ଗୁଲାଇ ଗୁପାମ୍ରେମେନ୍ ବାଗ୍ବକ୍ ମୁନା'ରେମ୍ ଡ'ସେକ୍ ସିରେଲ' ବୁଂତ । ମାରି ଆଗୁଲାଇ ଗୁପାମ୍ରେମେ ବେଲା ଜୁଲ'ସେକ୍ ସମାନ୍ ବେଲାବକ୍ କାଦି ବାନ୍ଟାଲ' ବିବେ'ପୁଲେଇସା ଆମାଇ ଦାଇତ୍ ବେ'ତ । 43ମାଇନା ସାକାର୍ ଡିଂଅଁବକ୍ ଇକ୍ନା ମାଇ ସୁନ'କୁନୁଂସୁଗ କାମ୍ ଡେମ'କୁନୁଂ ଜୁଲ'ନା ଗୁତୁନ୍ ଗୁପାମ୍ରେମ୍ ଅବୁଦି କପାଲ୍ବାଇ' ରେମ । 44ମାସା'ଡ'ନା ଗୁତୁନ୍ ସାକାର୍ ଆମାଇ ମାଇନା ଗୁଲାଇନା ବାଗ୍ବକ୍ ମୁନା'ରେମ୍ସୁଗ ବୁଂତ ଡ'ସେକ୍ ନିଂ ଆପେ ସତଇସା ସୁନ'ତିଂ । 45ମାତର୍ ଗୁତୁନ୍ ଗୁପାମ୍ରେମ୍ ମାଇନା ଜିବନ୍ବକ୍ ନିଂନା ସାକାର୍ ସୁରୁଇ' ଆସାପ୍ତା ଡ' ଏତ୍ସେକ୍ ଆତା ଡୁକୁନୁଂ ଆଇଂଗେରେ ଆସେଲାନେ ଆଗୁଲାଇ ଗୁପାମ୍ରେମ୍ ବୁକ୍ବୁକ୍ ତିତି ଡେମ'ତା ମାରି ବଜି ସୁମ'ସେକ୍ ସାଗୁର୍ ପେନ୍ଡମ୍ ଇଡ'ସେକ୍ ଅବୁଦି ବିକ୍ସେକ୍ ଇସାଉ ଡୁତା ଡ'ନା ମା ଡେନ୍ତା ଡ'ସେକ୍ ପେ ଏତ୍ଲା । 46ମାଇନା ସାକାର୍ ଇମ୍ବ'ନ୍ ଦିନ୍ ମାରି ଆ'ଇବେଲା ଇ'ତା ଡ'ସେକ୍ ଗୁତୁନ୍ ଗୁପାମ୍ରେମ୍ ମମୁନାକ୍ ଡୁକୁନୁଂବେଲା ଗୁତୁନ୍ ସାକାର୍ ଇ'ତା । ଉନ୍ତ୍ଦିନ୍ ମାଇ ଇକ୍ସେକ୍ ଆମାଇ ଅବୁଦି କସ୍ଟ ବେଡ'ସେକ୍ ଜାଜା ଆମାପ୍ରୁ ବିସ୍ବାସ୍ ଆଡେମ୍ତ ଡୁ'ତୁନ୍ବାଇ' ରେମଲେ ଡୁକୁନୁଂ ଜାଗାବକ୍ ରାନ୍ଡେଲ'ସୁଂତ ।
47ମୁଇନ୍ଡା ଗୁପାମ୍ରେମ୍ ମାଇନା ସାକାର୍ନା ମୁନ୍ ମାରି ଆମାଇ ମାମା ଦର୍କାର୍ ଡ'ସେକ୍ ମାଗ'ସେକ୍ସା ଡୁ'ତୁନ୍ସୁଗ ଗୁଲାଇ ଅଜାଗ'ଅଜୁଂଅଁ ଆବୁଂତ ଡ'ନା ଆମାଇ ଅବୁଦି ବୁକ୍ତ । 48ମାତର୍ ଜାଏସା ମୁଇନ୍ଡା ଗୁପାମ୍ରେମ୍ ମାଇନା ସାକାର୍ନା ମୁନ୍ ମା ଡ'ସେକ୍ ଆମାକ୍ତ ମାରି ମାଇ ମମୁନାକ୍ ମାମା ବୁଲ୍କାମ୍ ଡେମ'ନା ଆମାଇସା ବୁକ୍ତ ମାତର୍ ଆମାଇ ଆଇ'ତୁନ୍ ଆବୁକ୍ତ । ଆଜାଆଜା ଅବୁଦି ବେଡ'ତା ଆମାଇ ଅବୁଦି ଲୁ'ତ । ମାରି ଆଜାଆଜା ରେବ୍ତେ ରେବ୍ତେ ଦାଇତ୍ ବେଡ'ତା ଆମାଇ ରେବ୍ତେ ରେବ୍ତେ ଲୁ'ତ ।”
ଆପେ ସାନ୍ତିସାର୍ଦା ଆରାକ୍ ଦୁକକସ୍ଟ ସାପ୍ତା ଡ'ସେକ୍ ସୁଁସୁଡେନ୍
(ମାତିଉ 10:34–36)
49“ନିଂ ମାପୁଲେଇ ସା'ଗୁତିଂ ଡ'ନା କେନ୍ ଦର୍ତନି ବାଲ'ସୁଂସୁଂପୁଲେଇ ଆକେ ସା'ଗୁତିଂ ମାରି ଗୁତୁନ୍ ଆ'ନାଉ ସୁରୁଇ' ଗେବ'ସୁଂଅଁ'ନା ଡେମାନା ଡ'ସେକ୍ ନିଂ ଆସ୍ଗୁତିଂ । 50#ମାର୍କ 10:38ମାତର୍ ନିଂ ଅବୁଦି ଦୁକକସ୍ଟ ବାଂସେକ୍ ଗୁଗୁଇ' ଡୁତା । ଗୁତୁନ୍ ଦୁକକସ୍ଟ ବୁମ୍ବାମ୍ପନ୍ତେ'କା ଆନିଂ ବଲ୍ ଆଲାକ୍ତା । 51ଆକେ ଦର୍ତନିବକ୍ ଆଗୁଲାଇର ସାନ୍ତିସାର୍ଦା ବିବେ'ପୁଲେଇ ନିଂ ସା'ଗୁତିଂ ଡ'ସେକ୍ ପେ ଏତ୍ଗୁତୁପେ ଇ? ଡୁ'ତୁନ୍ ଆରାକ୍! ଆଗୁଲାଇର ପାଲ୍ପାଲ୍ ଡିନ୍ଡେମ୍ପୁଲେଇ ସା'ଗୁତିଂ ଡ'ସେକ୍ ନିଂ ଆପେ ସୁନ'ତିଂ । 52ମୁଇ ଡିଂଅଁବକ୍ ପାଁନ୍ସ୍ଲକ୍ ଡୁତା ଡ'ସେକ୍ ଏତ୍ଲା । ମା'ଏନ୍ ବିତ୍ରେ ଇଁଗେନ୍ଡ୍ର ମିସ୍ସେ'ଗା ଇମ୍ବାୟବୁରଂ ରିମ୍ତ ଆରା'ଗେ ଇମ୍ବାୟ ମିସ୍ସେ'ଗା ଇଁଗେନ୍ଡ୍ରବୁରଂ ରିମ୍ତ । ଡୁ'ତୁନ୍ଉ ମା'ଏ ପାଲ୍ପାଲ୍ ଡେନ୍ତା । 53ବାଡେଇଁ ମାଇନା ଇଂଗେର୍ଗୁବୁରଂ, ଇଂଗେର୍ଗୁ ମାଇନା ବା ବୁରଂ, ୟଂଡେଇଁ ମାଇନା ସେଲାମ୍ବୁଇ'ଗୁବୁରଂ, ସେଲାମ୍ବୁଇ'ଗୁ ୟଂଡେଇଁବୁରଂ, କିୟାଁର୍ଡେଇଁ ମାଇନା କିମିବୁରଂ, କିମିନ୍ଡେଇଁ ମାଇନା କିୟାଁର୍ବୁରଂ ରିମ'ସେକ୍ ପାଲ୍ପାଲ୍ ଡେନ୍ତା ।”
ବେଲା ଜୁଲ'ସେକ୍ ମା ଡେନ୍ତା ଡ'ସେକ୍ ସୁଁସୁନା
(ମାତିଉ 16:2–3)
54ଆତା ଅବୁଦିର ରେମଲେ ରୁନ୍କୁନୁଂବକ୍ ଜିସୁଲା ସୁନ' “ଅଲୁକ୍ସିଂକୁରୁଂ ଡାଗ୍ ଞୁର୍ଗା' ଡ'ନା ଡାଗ୍ ଗୁର୍ତ ଡ'ସେକ୍ ପେ ସେଟ୍ଟ' ସୁନ୍ତୁପେ । ପେ ସୁନ'କୁନୁଂସୁଗ ସତଇସା ଡାଗ୍ ଗୁର୍ତ । 55ମାରି ଗୁରାଇ'ସିଂକୁରୁଂ ଉଇଡାକ୍ ସାକ୍ନା ଅବୁଦି ସୁଲଇଁତା ଡ'ସେକ୍ ପେ ସୁନ୍ତୁପେ । ମାରି ପେ ସୁନ'କୁନୁଂସୁଗ ସତଇସା ଡେନ୍ତା । 56ଅ ନାଡାଇବାର୍ବାଇ' ରେମଲେ, କି'ତୁଂବକ୍ ମାରି ଦର୍ତନିବକ୍ ଜୁଲ'ସେ'ଗା ମା ଡେନ୍ତା ଡ'ସେକ୍ ପେ ସୁଁସୁ ଗଂତୁପେ । ମାତର୍ ଆ'ନ୍ଦିନ୍ ଆନ୍କାଲ୍ ମାପ୍ରୁ ଡେମ'କୁନୁଂ ଗୁଲାଇ ଜୁଲ'ସେ'ଗା ମାସା' ପେ ସୁଁସୁ ଆଗଂତୁପେ?”
(ମାତିଉ 5:25–26)
57ଇମ୍ବ'ନା ବଲ୍ ଡୁତା ଗୁତୁନା ଡିନ୍ଡେମ୍ପୁଲେଇ ପେ ଏତ୍ବାର୍ ଡୁତା । 58ଜାଏସା ମୁଇନ୍ଡା ଆପେ ବିସାର୍ନା ଡିନ୍ଡେମ୍ନା ଜାଗାବକ୍ ରିଂଅଁ'ଉଇଡେନ୍ତା ଡ'ନା ଆତା ଉଇ ସିଁସେଇଁଉ ମନ୍ଜାକୁରୁଂବକ୍ଉ ପେ ମାଇବୁରଂ ବିଡ୍ବାର୍ପୁଲେଇ ସେସ୍ଟା ଡେମ୍ । ଆରାକ୍ନା ମୁନା'ରେମ୍ବକ୍ ମାଇ ଆପେ ୱାନ'ରିଂଅଁ' ଉଇତା । ମାରି ଗୁତୁନ୍ ମୁନା' ରେମ୍ ଆପେ ପଲିସ୍ଲେନ୍ ତିତିବକ୍ ବେ'ତ ମାରି ଗୁତୁନ୍ ପଲିସ୍ଲେ ଆପେ ବନ୍ଦିବକ୍ ସୁରୁଂତ । 59ଡୁ'ତୁନ୍ ସୁରୁଂଅଁ'ବେଡ' ଡ'ନା ପେ ମାମା ବିବେ' ଡୁତା ଗୁତୁନ୍ ଗୁଲାଇ ବିବେ' ଅ'ଡମ୍ପନ୍ତେ'କା ଉନ୍ତ୍କୁରୁଂ ବାଇରି ତୁତୁର୍ ଆଗଂତୁପେ ଡ'ସେକ୍ ନିଂ ଆପେ ସୁନ'ତିଂ ।
Currently Selected:
ଲୁକ 12: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
