ଲୁକ 13
13
ଜାଜା ମାପ୍ରୁନ୍ବକ୍ ଆଆନ୍ଡେଇଁତା ଆମା'ଏ ମାପ୍ରୁ ଅବୁଦି ଡନ୍ଡ୍ ବେ'ତ
1ଆଇ'ତୁନ୍ବେଲା ଜିସୁଲାବୁରଂ ଏନ୍ତୁକ୍ର ଡୁକୁଗା' । ମା'ଏନ୍ ବିତ୍ରେ ଏନ୍ତୁକ୍ର ଆଜିସୁଲା ସୁନ' ଗାଲିଲି ଜିଲାନ୍ ରେମଲେ ଏନ୍ତୁକ୍ର ମନ୍ଦିର୍ବକ୍ ଗିଗେ ଡେଂକୁନୁଂବେଲା ପିଲାତଲା ଆମା'ଏ ଅଡାବ'ସୁଂଅଁ'ସେକ୍ ମା'ଏନ୍ ବନି ଗୁତୁନ୍ ଗିଗେନାବୁରଂ ମିସାୟ'ବେଡ' ଡ'ସେକ୍ ସୁନ' । 2ସା' ଜିସୁଲା ସୁନ' “ମା'ଏ ଗାଲିଲି ଜିଲାନ୍ ଗୁଲାଇ ରେମଲେନ୍କୁରୁଂ ଅଦିକ୍ ପାପ୍କାମ୍ ଡେମ'ସା' ଡି'କେନା ଡେଂସେକ୍ ଗୁଇ'ଗା' ଡ'ସେକ୍ ପେ ଏତ୍ଗୁତୁପେ ଇ? 3ଆରାକ୍, ଆରାକ୍! ପେ ପାପ୍କାମ୍ ଡେମ'କୁନୁଂ ଗୁଲାଇ ତର୍ମୁଲୁଇ'ଉ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆଆନ୍ଡେଇଁତୁପେ ଡ'ନା ପେସା ଡୁ'ତୁନା ଗୁଇ'ଉଇତୁପେ ଡ'ସେକ୍ ନିଂ ଆପେ ସୁନ'ତିଂ । 4ମାରି ଆତା ସିଲଅବକ୍ ଡୁକୁନୁଂ ଗୁତୁନ୍ ତି'ଉର୍ବାଇ' ଡିଂଅଁ ଲାର୍କୁନୁଂବେଲା ଅଟ୍ର ଲକ୍ ଗୁଇ'ଉଇଗା' । ଗୁତୁନ୍ ଗୁଇ'କୁନୁଂଏଁ ଗୁଲାଇର ଆତା ଜିରୁସାଲମ୍ ଉଂଗମ୍ବକ୍ ଡୁକୁନୁଂ ଗୁଲାଇରନ୍କୁରୁଂ ଅବୁଦି ପାପ୍କାମ୍ ଡେମ'ସା' ଡୁ'ତୁନା ଗୁଇ'ଉଇଗା' ଡ'ସେକ୍ ପେ ଏତ୍ଗୁତୁପେଇ? 5ଆରାକ୍, ଆରାକ୍! ପେ ପାପ୍କାମ୍ ଡେମ'କୁନୁଂ ଗୁଲାଇ ତର୍ମୁଲୁଇ'ଉ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆଆନ୍ଡେଇଁତୁପେ ଡ'ନା ପେସା ଡୁ'ତୁନା ଗୁଇ'ଉଇତୁପେ ଡ'ସେକ୍ ନିଂ ଆପେ ସୁନ'ତିଂ” ଡ'ସେକ୍ ଜିସୁଲା ସୁନ' ।
ମସୁ'ଉବାଇ' ଲିଅଇ ସୁଲପ୍ନା ଉ'ସୁରାମ୍
6ମାରି ମାଇ ଆମା'ଏ ଅମାକ୍ପୁଲେଇ କେନା ଉ'ସୁରାମ୍ସୁଗ ସୁନ' । ମାଇ ସୁନ': “ମୁଇନ୍ଡା ମାଇନା ଅଂଗୁର୍ନା ଡିନ୍ଜାବୁର୍ବକ୍ ମୁଇ ଲିଅଇ ସୁଲପ୍ ଉନ'ବୁଂଅଁ' । ସା' ଗୁତୁନ୍ ସୁଲପ୍ବକ୍ ସୁ'ଉଗୁତାକି ଆରାକ୍ ଡ'ସେକ୍ ମାଇ ଇସାଉ ଉଇସେକ୍ ଜୁଲ'କୁ ମାତର୍ ମୁଇସା ସୁ'ଉକ୍ ଆଡୁତା । 7ସା' ମାଇ ଆତୁନ୍ ଡିନ୍ଜାବୁର୍ ଜୁଜୁରେମ୍ ସୁନ', ‘ଜୁ, ଆ'ନା ତିନ୍ବରସ୍ ଡେଂଗା' କେନ୍ ଲିଅଇ ସୁଲପ୍ବକ୍ ସୁ'ଉକୁନୁଂ ବାମ୍ତାକି ଆରାକ୍ ଡ'ସେକ୍ ଜୁଲ'ତିଂ, ମାତର୍ ମୁଇସା ଆବାମ୍ତିଂ । ଗୁତୁନ୍ ଗୁୟ'ସୁଂ! ମାସା' ଗୁତୁନ୍ ସୁଲପ୍ ସରଉ ତୁବୁକ୍ନା ଆର୍ଲବ୍ ଅ'ଡମ୍ ଡେନ୍ତା?’ ଡ'ସେକ୍ ସୁନ' ।
8ସା' ଗୁତୁନ୍ ଡିନ୍ଜାବୁର୍ ଜୁଜୁରେମ୍ ଆମାଇ ସୁନ', ‘ଅ ଗୁରୁ, ମାରି ବର୍ସେକ୍ ଡୁକୁଲେଇ' । ନିଂ ତେଇଁଲୁଗ'ବଲୁଗ'ସେକ୍ ଆର୍ଲବ୍ ବୁଂଅଁ'ଜୁତିଂ । 9ସୁନାପ୍ ବରସ୍ବକ୍ ଗୁତୁନ୍ ସୁ'ଉକ୍ନାଏ ବଲ୍, ଆରାକ୍ ଡ'ନା ଗୁୟ'ସୁଂ’” ଡ'ସେକ୍ ସୁନ' ।
ବିସ୍ରାମ୍ଦିନ୍ବକ୍ ଜିସୁଲା କୁବ୍ଡିବାଇ' ସେଲାନ୍ବକ୍ ବଲ୍ ଡିନ୍ଡେମ୍ଡେନ୍
10ମୁସିଂ ବିସ୍ରାମ୍ଦିନ୍ବକ୍ ଜିସୁଲା ଜିଉଦିରେମଲେନ୍ ପାର୍ତନା ଡିଂଅଁବକ୍ ଆରେମଲେ ଅମାକ୍ଡେଂକୁ । 11ଆତା ଆମୁଇନ୍ଡା ସେଲାନ୍ଲା ବୁତ୍ ସବ'ସା' ସୁରୁଇ' ତୁନ୍ତ ବାସ୍ ଆଗଂତା ଡେଂକୁସା' ମାଇ କୁବ୍ଡିବାଇ'ଉ ଡୁକୁ । ଆମାଇ ଡି'କେନ୍ ଡେଂସେକ୍ ଅଟ୍ରବରସ୍ ଡେଂକୁ । 12ସା' ଜିସୁଲା ଆମାଇ ଜୁଲ'ସେକ୍ ମାଇନା ଉନ୍ତୁ' ୱାୟ'ସେକ୍ “ଅ କୁଇ' ନନା ସି ଗୁଲାଇ ବଲ୍ ଡେଂଗା'” ଡ'ସେକ୍ ସୁନ' । 13ଡୁ'ତୁନ୍ ସୁନ'ସେକ୍ ଜିସୁଲା ମାଇନା ତିତି ଗୁତୁନ୍ ସେଲାନ୍ନା ବାଗ୍ବକ୍ ବୁଂଅଁ'ସା' ଗୁତୁନ୍ ସେଲାନ୍ଲା ଆଇ'କୁ ସୁରୁଇ' ତୁନ୍ତ ଗଂଗା' ମାରି ମାଇ ଆମାପ୍ରୁ ସୁନ୍ଡ୍ରଗା' ।
14ଜିସୁଲା ବିସ୍ରାମ୍ଦିନ୍ବକ୍ ଆତୁନ୍ ବୁତ୍ ସବ'କୁନୁଂ ସେଲାନ୍ଲା ବଲ୍ ଡେମ'ସା' ଗୁତୁନ୍ ପାର୍ତନା ଡିଂଅଁନା ମୁନା'ରେମ୍ ଅବୁଦି ଗିସେକ୍ସେକ୍ ଆରେମଲେ ସୁନ' “ଆଟେକ୍ବକ୍ ସ ଦିନ୍ କାମ୍ ଡିନ୍ଡେମ୍ପୁଲେଇ ଡୁତା, ଗୁତୁନ୍ ସ ଦିନ୍ ବିତ୍ରେ ପେ ବଲ୍ ଡିନ୍ଡେମ୍ପୁଲେଇ ସା'ବା, ମାତର୍ ବିସ୍ରାମ୍ଦିନ୍ବକ୍ ଆସା'ଗା'” ଡ'ସେକ୍ ସୁନ' ।
15ସା' ପ୍ରବୁ ଆମାଇ ସୁନ' “ପେ ଗୁଲାଇର ନାଡାଇବାର୍ବାଇ' ରେମଲେ! ବିସ୍ରାମ୍ଦିନ୍ବକ୍ ପେ ଗୁଲାଇର ଆପେନ୍ ସନ୍ଡ ଗୁଇତାଂଏଁ ଆରା'ଗେ ଆପେନ୍ ଗଦଲେ ତୁନୁଗୁଇ'କୁରୁଂ ତକ୍ପିଡ'ସେକ୍ ଡାଗ୍ ଅଇ' ଆରିଂତୁପେ ଇ? 16ମାତର୍ କେନ୍ ସେଲାନ୍ଲା ଡ'ନା ନେଇ'ସୁଗ ଅବ୍ରାଆମ୍ନା କୁଲ୍ନା ରେମ । ଆମାଇ ସଇତାନ୍ ଅଟ୍ର ବରସ୍ ସବ'ସେକ୍ ଡୁକୁ । ସା' ଆ'ନା ବିସ୍ରାମ୍ଦିନ୍ବକ୍ ସଇତାନ୍ନା ତିତିକୁରୁଂ ଆମାଇ ବଲ୍ ଡିନ୍ଡେମ୍ ଡୁତା କି ଆରାକ୍?” ଡ'ସେକ୍ ସୁନ' ।
17ଜିସୁଲା ଡି'କେନ୍ ସୁନ'ସା' ଆମାଇ ଗିସେ'କୁନୁଂ ରେମଲେ ଗେୱାକ୍ ଉଇଗା' । ମାରି ମାଇ ଡେମ'କୁନୁଂ କାବାକାବାବାଇ' କାମ୍ ଗୁଲାଇ ଜୁଲ'ସେକ୍ ରେମଲେ ଗୁଲାଇର ସାର୍ଦା ଡେଂଗା' ।
ସର୍ସୁ ମନ୍ଜିନା ଉ'ସୁରାମ୍
(ମାତିଉ 13:31–32; ମାର୍କ 4:30–32)
18ଜିସୁଲା ଆମା'ଏ ସୁନ' “ମାପ୍ରୁନା ରାଜି ଡ'ନା ମିବାଇ' ଡୁତା? ମାବୁରଂ ଗୁତୁନ୍ ଅ'ସରିଲ'ସେକ୍ ନିଂ ସୁଁସୁ ଡୁତା? 19ମାପ୍ରୁନା ରାଜି ଡ'ନା ମୁଇନ୍ଡା ରେମ ମାଇନା ଡିନ୍ଜାବୁର୍ବକ୍ ଉନ'କୁନୁଂ ମୁଇ ଡାଉବାଇ' ସର୍ସୁ ମନ୍ଜିସୁଗ । ଗୁତୁନ୍ ମନ୍ଜି ତୁର୍ସେ'ଗା ବୁଡାଲା ମୁଇ ସୁଲପ୍ସୁଗ ମୁନା'ଗା' । ସା' ଆତା ପୁରି'ସୁରଇ'ଏ ସାକ୍ସେକ୍ ସୁଲବ୍ନା କେନ୍ଡାଲେବକ୍ ଇଁସାକ୍ପି' ଇଁନ୍ସାକ୍ଆର' ।”
କମିର୍ନା ଉ'ସୁରାମ୍
(ମାତିଉ 13:33)
20ମାରି ମାଇ ସୁନ', “ମାପ୍ରୁନ୍ ରାଜି ମାବୁରଂ ଅ'ସରିଲ'ନା ଡେନ୍ତା? 21ମୁଇନ୍ଡା ସେଲାନ୍ଲା ରୁଟି ଅ'ରଇଁପୁଲେଇ ମୁଇ ମୁନା'ବାଇ' ତାଲିବକ୍ ତିନ୍ଟା କୁନ୍ସ ତର୍ଲା' ଜୁଗ'ସେକ୍ ଆତୁନ୍ ତର୍ଲା' ଅ'ପୁଲ୍ପୁଲେଇ ମାୟ'କୁନୁଂ ଇ'କି କମିର୍ସୁଗ ମାପ୍ରୁନା ରାଜି ଡୁତା” ଡ'ସେକ୍ ସୁନ' ।
କୁତବ୍ବାଇ' ଡାନ୍ଡର୍
(ମାତିଉ 7:13–14,21–23)
22ଜିସୁଲା ଡାଉ ଉଂଗମ୍ ମୁନା'ଉଂଗମ୍ବକ୍ ଗାଇସେକ୍ ଆରେମଲେ ଅମାଗ' ଅମାଗ'ସେ'ଗା ଜିରୁସାଲମ୍ ମୁନା'ଉଂଗମ୍ବକ୍ ଉଇଡେଂକୁ । 23ସା' ମୁଇନ୍ଡା ଆମାଇ ଅ'ଗଁସ୍ଲା'ଗା', “ଅ ପ୍ରବୁ, ଉନାରସୁଗଉ ରକ୍ୟା ବାମ୍ତା ଇ?” ଡ'ସା', ଜିସୁଲା ଆମାଇ ସୁନ',
24“ପେ ଜିବନ୍ଗିରେ ବେଡ'ସେକ୍ କୁତବ୍ବାଇ' ଡାନ୍ଡର୍କୁରୁଂ ମାପ୍ରୁନା ରାଜିବକ୍ ଗୁଗାଇପୁଲେଇ ବଲ୍ ସେସ୍ଟା ଡେମ୍ । ଅବୁଦି ରେମଲେ ଆତା ଗାଇତୁନେଇ ଡ'ସେକ୍ ସେସ୍ଟା ଡେମ୍ତ ମାତର୍ ମା'ଏ ଆଗଂତା ଡ'ସେକ୍ ନିଂ ଆପେ ସୁନ'ତିଂ । 25ଡିଂଅଁ ସାକାରା ମାଇନା ଡିଂଅଁନା ପାଟା ଅନ୍ତୁଡ'ବେଡ'ନା ତିର୍ଗି' ପେ ବାଇରି ତଂସେ'ଗା ‘ଅ ଗୁରୁ, ରୁକ୍ବେ’ ଡ'ସେକ୍ ଆଡାନ୍ଡର୍ ଡୁଡବ'ନା ମାଇ ଡିଂଅଁ ବିତ୍ରେକୁରୁଂ ‘ପେ ଜା, ଇମ୍ବ'କୁରୁଂ ସା'ଗୁତୁପେ, ନିଂ ଆପେ ଆମାକ୍ତିଂ’ ଡ'ସେକ୍ ସୁନ୍ତ ।
26ପେ ଉନ୍ତା ସୁନ୍ତୁପେ, ‘ନେଇ ନବୁରଂ ତିରେ ସୁମ'ଇଡ'କୁନେଇ ମାରି ନେଇନା ଉଂଗମ୍ବକ୍ ନ ଅମାଗ'କୁନ ।’
27ମାତର୍ ମାଇ ‘ନିଂ ଆପେ ସମଡ' ଆଡୁତିଂ ପେ ଜା'ଡେ, ଇମ୍ବ'କୁରୁଂ ସା'ଗୁତୁପେ ନିଂ ଆମାକ୍ତିଂ । ପେ ଅଲିରାକ୍ବାଇ'କାମ୍ ଡିନ୍ଡେମ୍ରେମ୍, ପେ ନିଂକୁରୁଂ ଡୁଂଆଁ’ ଡ'ସେକ୍ ଆପେ ସୁନ୍ତ ।
28 #
ମାତିଉ 22:13; 25:30 #
ମାତିଉ 8:11,12 ମାରି ଅବ୍ରାଆମ୍ଲା, ଇସାକ୍ଲା, ଜାକୁବ୍ଲା ମାରି ମାପ୍ରୁନା ବାବବାଦିଲେ ଗୁଲାଇର ମାପ୍ରୁନା ରାଜିବକ୍ ଲେଇ'କୁନୁଂ ମାରି ଆପେ ବାଇରି ଅଡକ୍ସୁଂଅଁ'କୁନୁଂ ଜୁଲ'ସେକ୍ ପେ ଗୁଲାଇର ଅବୁଦି ଉକ୍ସେ' ୱାଇସେ'ତୁପେ ମାରି ଅବୁଦି ଗିସେକ୍ସେ'ଗା ଗେନ୍ଡ୍ରେଇ'ସି ଗେନ୍ଡ୍ରେଇ'ବକ୍ତୁପେ । 29ଅ'ତୁର୍ସିଂ, ଅଲୁକ୍ସିଂ, ଗୁରାଇ'ମ', ଗୁରାଇ'ସିଂକୁରୁଂ ଅବୁଦି ରେମଲେ ମାପ୍ରୁନା ରାଜିବକ୍ ସାକ୍ସେ'ଗା ସୁସୁମ୍ପୁଲେଇ ଲେଇ'ତା । 30#ମାତିଉ 19:30; 20:16; ମାର୍କ 10:31ଜୁ, ସତଇସା ଜାଜା ତିର୍ଗିକ୍ସେକ୍ ଡୁତା ମା'ଏ ସିଁସେଇଁତା, ମାରି ଜାଜା ସିଁସେଇଁସେକ୍ ଡୁତା ମା'ଏ ତିର୍ଗି'ତା ।”
ଜିସୁଲା ଆଜିରୁସାଲମ୍ ଉଂଗମ୍ ଏତ୍ସେକ୍ ସିନ୍ତାଲ'ତା
(ମାତିଉ 23:37–39)
31ଆଇ'ତୁନ୍ବେଲା ଆ'ଇରସୁଗ ପାରୁସିଦଲ୍ନା ରେମଲେ ଜିସୁନ୍ବକ୍ ସାକ୍ସେ'ଗା “ନ ଇଂକେକୁରୁଂ ତୁର୍ସେକ୍ ଡୁଂଆଁ! ମାସା'ଡ'ନା ଏରଦ୍ ରାଜାଲା ଆନ ଅଗୁଇ'ତିଂ ଡ'ସେକ୍ ଏତ୍ଗୁତା” ଡ'ସେକ୍ ସୁନ' ।
32ଜିସୁଲା ଆମା'ଏ ସୁନ' “ପେ ଉଇସେ'ଗା ଆତୁନ୍ କଲ୍ୟାସୁଗବାଇ' ଡୁକୁନୁଂଆଁ ସୁଁ, ‘ନିଂ ଆ'ନା ବେରା ବୁତ୍ ସବ'କୁନୁଂ ରେମଲେବକ୍ ଆବୁତ୍ଲେ ଞନ' ଅ'ତୁର୍ତିଂ ମାରି ଆସିରେମ୍ ବଲ୍ ଡେମ୍ତିଂ, ମାରି ତିନ୍ଦିନ୍ବକ୍ ଗୁଲାଇ କାମ୍ ଅ'ଡମ୍ତିଂ ।’ 33ମାତର୍ ଆ'ନା ବେରା ମାରି ମାର୍ତକ୍ସା ନିଂ ବୁଲ୍ଲ'ବୁଲ୍ଲ'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ମିଏସା ଉଇ ଡୁତା । ମାସା'ଡ'ନା ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁରେମ୍ବକ୍ ଆଜାଏସା ଜିରୁସାଲମ୍ ଉଂଗମ୍ ବାଇରି ଅଡାବ' ଆଡୁତା । ସା' ଆନିଂସା ଜିରୁସାଲମ୍ବକ୍ଉ ଅଡାପ୍ତ ।
34ଅ ଜିରୁସାଲମ୍ ଉଂଗମ୍ନା ରେମଲେ! ଅ ଜିରୁସାଲମ୍ ଉଂଗମ୍ନା ରେମଲେ! ପେ ଆବାବବାଦିଲେ ଅଡାବ'ତୁପେ ମାରି ମାପ୍ରୁ ଆଜାଆଜା ପେନ୍ବକ୍ ମାପ୍ରୁନା ତୁମ' ସୁଁସୁପୁଲେଇ ବେନ୍ଟାୟ'ବୁଂଅଁ' ଆମା'ଏସା ବୁରେ ତିଲ'ସେକ୍ ଅଗୁୟ'ପେ । ମାରି ମୁଇ ୟଂସିଂ ମି ଆ'ଉଁସିଂଏଁ ଡେନା ଆଲୁଂ ବୁଂଅଁ'ସେକ୍ ମାଅମ୍ତ ଡୁ'ତୁନା ନିଂସା ଆପେନା ଉଁ'ଉଁନେ ମୁନ୍ଡକ୍ବକ୍ ରୁନ୍ଡାଇବାର୍ପୁଲେଇ ଅବୁଦି ପାଲି ମୁନ୍ ଡେମ'ନିଂ ମାତର୍ ପେ ମୁନ୍ ଆଡେନ୍ତୁପେ । 35ଜୁ ଆ'ନା ପେନ୍ ମନ୍ଦିର୍ ଗୁଲାଇ ଲାର'ସେକ୍ ସରଉ ଡେଂଉଇତା । ମାସା'ଡ'ନା ପ୍ରବୁନା ଇମିବକ୍ ଜା ସୁସାପ୍ଡେନ୍ତା ଆମାଇ ମାପ୍ରୁ ଆସିର୍ବାଦ୍ ଡେମେଇ' ଡ'ସେକ୍ ପେ ସୁଁସୁପନ୍ତେକ୍ ଆ'ନାବାଂସା' ଆନିଂ ପେ ମାରି ଜୁଜୁ ଆଗଂତୁପେ ଡ'ସେକ୍ ନିଂ ଆପେ ସତ୍ ସୁନ'ତିଂ” ଡ'ସେକ୍ ସୁନ' ।
Currently Selected:
ଲୁକ 13: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
