ଲୁକ 16
16
ନାଡାଇବାର୍ବାଇ' କାମ୍ରେମ୍
1ଜିସୁଲା ଆମାଇନା ସିସ୍ୟଲେ ସୁନ', “ମୁଇନ୍ଡା ସାକାର୍ବକ୍ ମାଇନା କାମ୍ ଗୁଲାଇ ଜୁଜୁପୁଲେଇ ଆମୁଇନ୍ଡା ମୁନା'ରେମ୍ସୁଗ ବୁଂଅଁ'କୁ । ସା' ଗୁତୁନ୍ ମୁନା'ରେମ୍ ସାକାର୍ନା ଗୁଲାଇ ନାଡାୟ' ସୁମ'ତା ଡ'ସେକ୍ ମାଇନ୍ବକ୍ କବର୍ ସା'ଗା' । 2ସା' ଗୁତୁନ୍ ସାକାର୍ ଆମାଇ ୱାୟ'ସେକ୍ ‘ନନା ତୁମ' ରେମଲେ ସୁନ'କୁନୁଂ ଅବୁଦି ଅଂଅଁ'ତିଂ । ସା' ନ ମାମା କାମ୍ ଡେମ'ନ ଗୁତୁନା ଇସାପ୍ ଆନିଂ ଗୁଲାଇ ବେ' । ନ ମାରି ନିଂବକ୍ କାମ୍ ଡିନ୍ଡେମ୍ ଆଗଂତୁନ’ ଡ'ସେକ୍ ସୁନ' ।
3ସା' ଗୁତୁନ୍ ମୁନା'ରେମ୍ ମାଇନା ଜିବନ୍ବକ୍ ଏତ୍ଗା' ‘ନିଂ ଆ'ନା ମା ଡେମ୍ତିଂ? ଆ'ନା ନିଂନା ସାକାର୍ ଆନିଂ ଅ'ତୁର' ବେ'ତ । ଆନିଂତ ବୁରଂକାମ୍ ଡିନ୍ଡେମ୍ପୁଲେଇ ବପୁ ଆରାକ୍ । ମାଂନି ଲୁଲୁ' ବୁଲ୍ତିଂ ଡ'ନା ଆନିଂ ଗିୟାସୁପ୍ । 4ଆଁ, ମା ଡେମ'ନା ଡେନ୍ତା ଡ'ସେକ୍ ନିଂ ମାଗ'ତିଂ । ଡୁ'ତୁନ୍ ଡେମ'ନା ଆନିଂ ସାକାର୍ କାମ୍କୁରୁଂ ଅ'ତୁର'ବେଡ'ନା ରେମଲେ ଆନିଂ ମା'ଏନ୍ ଡିଂଅଁବକ୍ ୱାଇତ’ ଡ'ସେକ୍ ଏତ୍ଗା' ।
5ସା' ମାଇନା ସାକାର୍କୁରୁଂ ଜାଜା ସୁନାକ୍ ରିଂକୁ ଆମା'ଏ ଆମୁଇନ୍ଡା ଆମୁଇନ୍ଡା ମାଇ ୱାୟ' । ଆମୁଲ୍ନା ରେମ ୱାୟ'ସେକ୍ ‘ନ ନିଂନା ସାକାର୍କୁରୁଂ ଆ'ଇ ସୁନାକ୍ ରିଂଗୁତୁନ?’ ଡ'ସେକ୍ ଅ'ଗଁସ୍ଲା'ଗା' ।
6ସା' ମାଇ ‘ପାଁନ୍ସ୍କଡି ଡାବା ସୁ'ଉ ରିଂଗୁତିଂ’ ଡ'ସେକ୍ ସୁନ'ସା'
ମାଇ ଆମାଇ ସୁନ' ‘ଇନ୍ଡ ନନା ଲେକ୍ଲ'କୁନୁଂ ସିଟି ରିଂଆଁ, ଲେଇ'ସେକ୍ ସୁରୁଇ' ଦୁଇକଡି ଦସ୍ ଡ' ଲେକ୍’ ଡ'ସେକ୍ ସୁନ' ।
7ମାଇ ମାରି ଆମୁଇନ୍ଡା ୱାୟ'ସେକ୍ ‘ନ ନିଂନା ସାକାର୍କୁରୁଂ ଆ'ଇ ସୁନାକ୍ ରିଂଗୁତୁନ?’ ଡ'ସେକ୍ ଅ'ଗଁ'ସ୍ଲା'ଗା' ।
ସା' ମାଇ ‘ପାଁନ୍ସ୍କଡି ବାସ୍ତା ଗମ୍ ରିଂଗୁତିଂ’ ଡ'ସେକ୍ ସୁନ'ସା',
ମାଇ ଆମାଇ ସୁନ' ‘ଇନ୍ଡ ନନା ଲେକ୍ଲ'କୁନୁଂ ସିଟି ରିଂସେକ୍ ସାର୍କଡି ଡ'ସେକ୍ ଲେକ୍’ ଡ' ସୁନ' ।
8ଗୁତୁନ୍ କାମ୍ରେମ୍ ଅଲିରାକ୍ବାଇ' କାମ୍ ଡେମ'ତା ଡ'ନାସା ମାଇ ଡେମ'କୁନୁଂ ସାଲାକିବାଇ' କାମ୍ ଜୁଲ'ସେକ୍ ମାଇ ମୁଇନ୍ଡା ଅବୁଦି ବୁଦିବାଇ'ରେମସୁଗ ଡେମ'ତା ଡ'ସେକ୍ ଗୁତୁନ୍ ସାକାର୍ ସୁନ' । ମାସା' ମାଇ ଡୁ'ତୁନ୍ଉ ସୁନ' ଡ'ନା, ଜୁ, କେନ୍ ଦର୍ତନିବକ୍ ଆମାପ୍ରୁ ମମୁନାକ୍ ଡୁକୁନୁଂ ରେମଲେ ଆମାପ୍ରୁ ମାଗ'କୁନୁଂ ରେମଲେନ୍କୁରୁଂ ଅବୁଦି ବୁଦିରେମ୍ ।” 9ସା' ଜିସୁଲା ସୁନ', “କେନ୍ ଉ'ସୁରାମ୍କୁରୁଂ ମା ପେ ମାଗ'ନା ଡେନ୍ତା ଡ'ନା: ଆପାଲ୍ ରେମଲେ ସାନ୍ଡୁଂପୁଲେଇ ପେନ୍ବକ୍ ଡୁକୁନୁଂ କେନ୍ ଦର୍ତନିନା ଦନ୍ସମ୍ପତି ଗୁଲାଇ କର୍ସ ଡେମ'ସେକ୍ ଆମା'ଏ ପେନ୍ ବାଇଲକ୍ ଅ'ଡେମ୍ । ଡୁ'ତୁନ୍ ଡେମ୍ତୁପେ ଡ'ନା କେନ୍ ଦର୍ତନିନା ପେନ୍ ଦନ୍ସମ୍ପତି ଗୁଲାଇ ମୁସିଂ ବୁଗ୍ଉଇତା ଡ'ନାସା ସରଗ୍ବକ୍ ଡୁକୁନୁଂ ଗୁତୁନ୍ ଡିଂଅଁବକ୍ ପେ ଇସାଉ ଡୁକୁପୁଲେଇ ଆପେ ୱାଇତ ।
10ଜାଏସା ମୁଇନ୍ଡାନ୍ ତିତିବକ୍ ମାମା ଡିନ୍ଡେମ୍ପୁଲେଇ ବେଡ'କୁନୁଂ ଡାଉଡାଉବାଇ' କାମ୍ ମାଇ ବଲ୍ ଡେମ୍ତ ଡ'ନା ମାରି ମୁନା'ବାଇ' ବେଡ'ନାସା ମାଇ ବଲ୍ ଡିନ୍ଡେମ୍ ଗଂତା । ଜାଏସା ମୁଇନ୍ଡାନା ତିତିବକ୍ ମାମା ଡିନ୍ଡେମ୍ପୁଲେଇ ବେଡ'କୁନୁଂ ଡାଉଡାଉବାଇ' କାମ୍ବକ୍ ମାଇ ନାଡାୟ'ସେକ୍ ଡୁକୁନା ଆମାଇ ମୁନା'ବାଇ' ବେଡ'ନାସା ମାଇ ନାଡାଇତ । 11ସା' କେନ୍ ଦର୍ତନିବକ୍ ଆନେଇ' ବେଡ'କୁନୁଂ ଦନ୍ସମ୍ପତି ବଲ୍ବାବରେ ବେବାର୍ ଆଡେମ୍ତୁପେ ଡ'ନା ସରଗ୍ବକ୍ ଡୁକୁନୁଂ ବଲ୍ବାଇ' ଦନ୍ସମ୍ପତି ପେ ବଲ୍ ଡେମ୍ତୁପେ ଡ' ଏତ୍ସେକ୍ ଜା ଆପେ ବିସ୍ବାସ୍ ଡେମ'ସେକ୍ ବେ'ତ? 12କେନ୍ ଦର୍ତନିବକ୍ ବଲ୍ ଜୁଲ'କୁଲା ଡ'ସେକ୍ ଆପେ ବେଡ'କୁନୁଂ ପାଲ୍ ରେମଲେନା ଦନ୍ସମ୍ପତି ପେ ବଲ୍ ଆଜୁତୁପେ ଡ'ନା ସରଗ୍ବକ୍ ଡୁକୁନୁଂ ପେନ୍ ଦନ୍ସମ୍ପତି ଆପେ ଆବେ'ତ ।
13 #
ମାତିଉ 6:24
ଜାଏସା ମୁଇନ୍ଡା ରେମ ଇମ୍ବାର୍ ସାକାର୍ରେମ୍ନା ଗତିରେମ୍ ଏ ଆଗଂତା । ମାସା'ଡ'ନା ମାଇ ଆମୁଇନ୍ଡା ଗୁମୁୟ'ସେକ୍ ଆମୁଇନ୍ଡା ଆଲାତ୍ ଡେମ୍ତ । ମାରି ଆମୁଇନ୍ଡା ବଲ୍ ମାନ୍ତା, ଆମୁଇନ୍ଡା ବଲ୍ ଆମାନ୍ତା । ଡୁ'ତୁନ୍ଉ ପେ ଦନ୍ସମ୍ପତିବକ୍ ଏତ୍ସେକ୍ ଗୁତୁନ୍ ତେଂଗି' ଉଇନା ମାପ୍ରୁନା ସେବା ଡିନ୍ଡେମ୍ ଆଗଂତୁପେ ।”
ଜିସୁଲା ମାରି ଅମାଗ'କୁନୁଂ
(ମାତିଉ 11:12–13; 5:31–32; ମାର୍କ 10:11–12)
14ପାରୁସିଦଲ୍ନା ରେମଲେ ଦନ୍ସମ୍ପତିବକ୍ ଅବୁଦି ମୁନ୍ ଡେଂସେକ୍ ଡୁକୁଗା'ସା' ଜିସୁଲା ସୁନ'କୁନୁଂ ଅଂଅଁ'ସେକ୍ ଆମାଇ ଅବୁଦି ଅ'କିୟାଲିଗା' । 15ସା' ଜିସୁଲା ଆମା'ଏ ସୁନ', “ନେଇ ଦରମ୍ରେମ୍ ଡ'ସେକ୍ ଆରେମଲେ ଅସୁଇ'ପୁଲେଇ ପେ କାମ୍ ଡେମ'ତୁପେ ମାତର୍ ପେନା ଜିବନ୍ ବିତ୍ରେ ମିବାଇ' ଏତ୍ ଡୁତା ଡ'ସେକ୍ ମାପ୍ରୁ ମାଗ'ତା । କେନ୍ ଦର୍ତନିବକ୍ ରେମଲେ ଇମ୍ବ'ନା ଅବୁଦି ବଲ୍ବାଇ' ଡ'ସେକ୍ ଜୁଲ'ତା ମାପ୍ରୁ ଆତୁନା ଅଲିରାକ୍ବାଇ' ଡ'ସେକ୍ ଜୁଲ'ତା ।
16 #
ମାତିଉ 11:12,13 ଆରେମଲେ ବାପ୍ତିସ୍ମା ବିବେ'ଡା ଜଅନ୍ଲା ମାପ୍ରୁନା ବଲ୍କବର୍ ସୁଁସୁପନ୍ତେକ୍ ମସାଲା ଲେକ୍ଲ'କୁନୁଂ ନିୟମ୍ ମାରି ବାବବାଦିଲେ ଲେକ୍ଲ'କୁନୁଂ ଗୁଲାଇ ଆରେମଲେ ଅମାଗ'ସେକ୍ ଡୁକୁ । ମାତର୍ ଜଅନ୍ନା ବେଲାବାଂସା' ଆ'ନ୍ପନ୍ତେକ୍ ମାପ୍ରୁନ୍ ରାଜିନା ବଲ୍କବର୍ ଆରେମଲେ ସୁନ'ସେକ୍ ଡୁତା । ସା' ରେମଲେ ଗୁଲାଇର ମାପ୍ରୁନା ରାଜିବକ୍ ନେଇ ମିଏସା ଗାଇତୁନେଇ ଡ'ସେକ୍ ଅର୍ବର୍ ଡେଂଗୁତା । 17#ମାତିଉ 5:18ମସାଲା ଲେକ୍ଲ'କୁନୁଂ ନିୟମ୍ବକ୍ନା ମୁଇ ବୁନାଇ' ବାଦ୍ଲି ଡିନ୍ଡେମ୍ନାକୁରୁଂ କେନ୍ କି'ତୁଂ ମାରି ଦର୍ତନି ଗୁଲାଇ ନାସ୍ ଉଇନା ଅଲୁ ।
18 #
ମାତିଉ 5:32; 1 କରି 7:10,11 ଜାଏସା ମୁଇନ୍ଡା ଆନିଜର୍ନା କୁନୁଇ' ଲଂସିଡ'ସେକ୍ ପାଲ୍ କୁନୁଇ' ରିଂଅଁ'ନା ମାଇ ଜାଲିବାଇ' କାମ୍ ଡିନ୍ଡେମ୍ଡେନ୍ । ମାରି ଲଂସିଡ'କୁନୁଂ ସେଲାନେବକ୍ ଜାଏସା ମୁଇନ୍ଡା ଇଂଗେରେ ଉଇସେକ୍ ରିଂନା ମାଇସା ଜାଲି ଡିନ୍ଡେମ୍ଡେନ୍ ।”
ସାକାର୍ବାଇ' ରେମ ମାରି ଲାଜାର୍ଲା
19ଜିସୁଲା ମାରି ସୁନ' “ମୁଇନ୍ଡା ଅବୁଦି ସାକାର୍ବାଇ' ରେମ ଡୁକୁ । ମାଇ ଇସାଉ ଅବୁଦି ଦାମ୍ନା ମଇନା ମଇନାବାଇ' ସକାବାନ୍ଦା ଅଲୁକ୍ସେକ୍ ଡୁକୁ । ଇସାଉ ମାଇନା ଡିଂଅଁବକ୍ ବଜି ଡିନ୍ଡେମ୍ସୁଗ ସୁମ'ଇଡ'ସେକ୍ ସାର୍ଦାକୁସି ଡେଂସେକ୍ ଡୁକୁ । 20ମାତର୍ ଲାଜାର୍ ଡ'ସେକ୍ ମୁଇନ୍ଡା ଅବୁଦି ଗରିବ୍ବାଇ'ରେମ ଞେରିଇଁସାପ୍ ଗୁଲାଇ କୁନ୍ଡା ଅବୁଦି ରେକ୍ସେକ୍ ଗୁତୁନ୍ ସାକାର୍ନା ଡିଂଅଁନା ଡାନ୍ଡର୍ବକ୍ ଡୁକୁ । 21ମାସା'ଡ'ନା ଗୁତୁନ୍ ସାକାର୍ ସୁସୁମ୍ବେଲା ଲ'କୁନୁଂ ମ'ଜାଂ ସୁମ୍ତିଂ ଡ'ସେକ୍ ମାଇ ଏତ୍କୁ । ମାରି ଗୁସୁ'ଡେସା ସାକ୍ସେକ୍ ମାଇନା ରେ'ବକ୍ ସୁସାଲ'କୁ ।
22ଆ'ଇ ଦିନ୍ ତିର୍ଗି' ଗୁତୁନ୍ ଗରିବ୍ରେମ୍ ଗୁଇ'ଗା' । ସା' ମାପ୍ରୁନା ଦୁତଲେ ସାକ୍ସେକ୍ ଆମାଇ ଅବ୍ରାଆମ୍ନା ଉନ୍ତୁ' ରିଂଅଁ' ଉଇଗା' । ମାରି ଗୁତୁନ୍ ସାକାର୍ସା ଗୁଇ'ଉଇଗା'ସା' ଆମାଇ ଆତିଲ'ସୁଂଅଁ' । 23ମାଇ ପାତାଲବକ୍ ଅବୁଦି କସ୍ଟ ଡେଂସେକ୍ ଡୁକୁନୁଂବେଲା ତାଂଡାୟ' ଜୁଲ'ସା' ଅବ୍ରାଆମ୍ଲା ଆଲାଜାର୍ଲା କୁନ୍ଡୁଲ' ଲେଇ'କୁନୁଂ ଅବୁଦି ସୁଲୁଂକୁରୁଂ ଜୁଲ' । 24ଜୁଲ'ସା' ଅ ବା ଅବ୍ରାଆମ୍, ଆନିଂ ଦୟା ଡେଂସେକ୍ ମିଏସା ଇ'କି ସାନ୍ଡୁଂ । ନ ଆଲାଜାର୍ଲା ନିଂବକ୍ ଇ'କି ବେନ୍ଟାଇ । ନିଂନା ଲେ'ୟାଂ ଇ'କି ସିତ୍ଲି ଡିନ୍ଡେମ୍ପୁଲେଇ ମାଇ ଆନିଂ ମାଇନା ଇନ୍ଡ୍ରୁଆଇ'ତିବୁରଂ ଡାଗ୍ ଇ'କି ଅ'ସୁରୁଡ' ବେଡେଇ' । ମାସା'ଡ'ନା ନିଂ କେନ୍ ସୁଂଅଁବକ୍ ଅବୁଦି କସ୍ଟ ବାଂଗୁତିଂ” ଡ'ସେକ୍ ଅବୁଦି ଡକ୍ତି'ତା ୱାୟ'ସେକ୍ ସୁନ' ।
25ମାତର୍ ଅବ୍ରାଆମ୍ଲା ସୁନ', “ଅ ବାବୁ, ନ ବୁରକ୍ସେକ୍ ଡୁକୁନୁଂବେଲା ବଲ୍ବଲ୍ଟା ଗୁଲାଇ ବାଂସେକ୍ ଡୁକୁନ । ମାତର୍ ଲାଜାର୍ଲା ଅବୁଦି କସ୍ଟ ବାଂସେକ୍ ଡୁକୁ ଡ'ସେକ୍ ଏତ୍କୁଲା । ମାଇ ଆ'ନା ଆକେ ସାର୍ଦାକ୍ସେକ୍ ଡୁତା ମାରି ନ କସ୍ଟ ବାଂସେକ୍ ଡୁତୁନ । 26ମାରି ମା ଡ'ନା, ମନ୍ଜା ବୁଡାଲା ମୁଇ କାଲ୍ ଡୁତାସା' ଜାଏସା ଇଂକେକୁରୁଂ ପେନ୍ବକ୍ ସୁସାପ୍ ଆଗଂତା ମାରି ପେନ୍କୁରୁଂ ଆକେ ଜାଏସା ସୁସାପ୍ ଆଗଂତା” ଡ'ସେକ୍ ସୁନ' ।
27ସା' ମାଇ ସୁନ' “ଡୁ'ତୁନ୍ ଡ'ନା ମିଏସା ଆମାଇ ନେମ୍ବାଲେନ୍ବକ୍ ବେନ୍ଟାଇ । 28ମାସା'ଡ'ନା ନିଂନା ବୁୟାଂଏଁ ପାଁନ୍ସ୍ଲକ୍ ଡୁତା । ଡି'କେନ୍ ଅବୁଦି କସ୍ଟବାଇ' ତାନ୍ବକ୍ ମା'ଏ ମସୁସାପ୍ପୁଲେଇ ଲାଜାର୍ଲା ଉଇସେକ୍ ଆମା'ଏ ସୁନେଇ'” ଡ'ସେକ୍ ସୁନ' ।
29ସା' ଅବ୍ରାଆମ୍ଲା ଆମାଇ ସୁନ', “ମସାଲା ମାରି ବାବବାଦିଲେ ଲେକ୍ଲ'କୁନୁଂ ମା'ଏନ୍ବକ୍ ଡୁତା । ଗୁତୁନ୍ ମା'ଏ ମାନ୍ଲେଇ'” ଡ'ସେକ୍ ସୁନ' ।
30ସା' ସାକାର୍ ସୁନ', “ଅ ବା ଅବ୍ରାଆମ୍, ଡୁ'ତୁନା ଆରାକ୍, ଗୁତୁନ୍ ତୁମ' ମା'ଏ ଆମାନ୍ତା । ମାତର୍ ଇଂକେକୁରୁଂ ଗୁଇ'କୁନୁଂ ମୁଇନ୍ଡା ରେମ ମୁରାକ୍ସେ'ଗା ମା'ଏନ୍ବକ୍ ଉଇଗା' ଡ'ନା ମା'ଏ ପାପ୍କାମ୍ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁତା” ଡ'ସେକ୍ ସୁନ' ।
31ସା' ଅବ୍ରାଆମ୍ଲା ଆମାଇ ସୁନ', “ମସାଲା ମାରି ବାବବାଦିଲେ ଲେକ୍ଲ'କୁନୁଂ ତୁମ' ମା'ଏ ଆମାନ୍ତା ଡ'ନା ଗୁଇ'କୁନୁଂ ରେମ ବୁରକ୍ସେକ୍ ଉଇନାସା ମାଇ ସୁନ'କୁନୁଂ ମା'ଏ ବିସ୍ବାସ୍ ଆଡେମ୍ତ” ଡ'ସେକ୍ ସୁନ' ।
Currently Selected:
ଲୁକ 16: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
