ଲୁକ 18
18
ବିସାର୍ନା ଡିନ୍ଡେମ୍ରେମ୍ନା ମାରି ରାନ୍ଡିସେଲାନ୍ନା ଉ'ସୁରାମ୍
1ମଗୁସୁ ଇସାଉ ପାର୍ତନା ଡିନ୍ଡେମ୍ ଡୁତା ଡ'ସେକ୍ ଅମାକ୍ପୁଲେଇ ଜିସୁଲା ଆମାଇନା ସିସ୍ୟଲେ ମୁଇ ଉ'ସୁରାମ୍ ଉଡ' ଅମାଗ' । 2ମାଇ ସୁନ': “ମୁଇ ଉଂଗମ୍ବକ୍ ମୁଇନ୍ଡା ବିସାର୍ନା ଡିନ୍ଡେମା ଡୁକୁଗା' । ମାଇ ଡ'ନା ଆମାପ୍ରୁ ମବୁତୁଂ ଡୁକୁ ମାରି ଆରେମଲେସା ମମାନ୍ବାର୍ ଡୁକୁ । 3ଗୁତୁନ୍ ମୁନା'ଉଂଗମ୍ବକ୍ ମୁଇନ୍ଡା ଗୁଇ'ସିଂକୁଇ'ସା ଡୁକୁଗା' । ସା' ମାଇ ମାଇନ୍ବକ୍ ଇସାଉ ଉଇସେକ୍ ‘ନିଂନା ଦାଇରେମ୍ ସାକ୍ସେ'ଗା ଆନିଂ ଅବୁଦି କସ୍ଟ ବେଡ'ତାସା' ନ ଆନିଂ ସାନ୍ଡୁଂ’ ଡ'ସେକ୍ ସୁନ' ।
4ଆ'ଇଦିନ୍ସୁଗ ଗୁତୁନ୍ ବିସାର୍ନା ଡିନ୍ଡେମ୍ରେମ୍ ଆମାଇ ସାନ୍ଡୁଂପୁଲେଇ ମୁନ୍ ଆରାକ୍ ଡେଂସେକ୍ ଡୁକୁ । ମାତର୍ ତିର୍ଗି' ମାଇ ସୁଁବର୍ସେକ୍ ସୁନ' ‘ନିଂ ଆମାପ୍ରୁ ଆବୁତୁଂତିଂ ମାରି ଆରେମ ଇ'କିସା ଆମାନ୍ତିଂ ଡ'ନାସା'ଏସା 5କେନ୍ ଗୁଇ'ସିଂକୁଇ' ଆନିଂ ବିଜାର୍ ଡେମ'ତାସା' ନିଂ ଆମାଇ ସାନ୍ଡୁଂତିଂ । ଆରାକ୍ନା ମାଇ ଇସାଉ ନିଂବକ୍ ସାକ୍ସେକ୍ ଆନିଂ କସ୍ଟ ବେ'ତ’ ଡ'ସେକ୍ ସୁନ' ।”
6ମାରି ପ୍ରବୁ ସୁନ', “ଜୁ, କେନ୍ ବିସାର୍ନା ଡିନ୍ଡେମା ଦର୍ମ୍ରେମ୍ ଆରାକ୍ ଡ'ନାସା ମାଇ ମା ଡ' ସୁନ' ଡ'ସେକ୍ ପେ ଏତ୍କୁଲା । 7ଡୁ'ତୁନ୍ ଡ'ନା ମାପ୍ରୁ ସିରେଲ'କୁନୁଂ ମାଇନା ରେମଲେ ଗୁଲାଇ ସିମି'ଇ ଗୁଲାଇ ତୁମୁଂଗ ଆମାପ୍ରୁ ପାର୍ତନା ଡେମ'ନା ମାଇ ମା'ଏନା ପାର୍ତନା ଆଅଂତ ଇ? ଆମା'ଏ ମାଇ ସୁରୁଇ' ଆସାନ୍ଡୁଂତ ଇ? 8ଆରାକ୍ ମାଇ ଆମା'ଏ ସୁରୁଇ' ସାନ୍ଡୁଂତ ଡ'ସେକ୍ ନିଂ ଆପେ ସୁନ'ତିଂ! ମାତର୍ ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ନିଂ ତିର୍ଗି'ସୁମଂ କେନ୍ ଦର୍ତନିବକ୍ ଜର୍ନା ଡୁ'ତୁନ୍ ଆନିଂ ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେବକ୍ ଜୁଜୁ ଗଂତିଂକି ଆରାକ୍ ଡ'ସେକ୍ ନିଂ ଏତ୍ଗୁତିଂ” ଡ'ସେକ୍ ସୁନ' ।
ପାରୁସିଦଲ୍ନା ରେମଲେ ମାରି ସିସ୍ତୁ ଲୁଲୁ'ରେମ୍ନା ଉ'ସୁରାମ୍
9ମାରି ନେଇଉ ଅବୁଦି ଦରମ୍ବାଇ' ରେମଲେ ଡ'ସେକ୍ ନିଜର୍ନା ଜିବନ୍ ବାଗ୍ବକ୍ ଆସ୍ ବୁଂଅଁ'ସେକ୍ ଆପାଲ୍ ରେମଲେ ଅଲିରାକ୍ବାଇ' ରେମଲେ ଡ'ସେକ୍ ଜୁଲ'କୁନୁଂ ଆରେମଲେ ଅମାକ୍ପୁଲେଇ ଜିସୁଲା କେନ୍ ମୁଇ ଉ'ସୁରାମ୍ ଉଡ'। 10ଗୁତୁନ୍ ମା' ଡ'ନା: ଇମ୍ବାୟ ପାର୍ତନା ଡିନ୍ଡେମ୍ପୁଲେଇ ମନ୍ଦିର୍ବକ୍ ଉଇଗା' । ମୁଇନ୍ଡା ଡ'ନା ପାରୁସିଦଲ୍ନା ରେମ ମାରି ମୁଇନ୍ଡା ସିସ୍ତୁ ଲୁଲୁ'ରେମ୍ । 11ଗୁତୁନ୍ ପାରୁସିଦଲ୍ନା ରେମ ତଂସେକ୍ ମାଇନା ଜିବନ୍ବକ୍ ମାଇ ଡି'କେନ୍ ପାର୍ତନା ଡେମ୍ବର୍ସେକ୍ ସୁନ', “ଅ ମାପ୍ରୁ, ଆନ ନିଂ ସୁନ୍ଡ୍ରତିଂ । ମାସା'ଡ'ନା ନିଂ ପାଲ୍ ରେମଲେସୁଗ ଡୁଂଗା'ରେମ୍, ନାଡାଇବାର୍ରେମ୍, ଅଲିରାକ୍ବାଇ'କାମ୍ ଡିନ୍ଡେମ୍ରେମ୍ ମାରି ଜାଲିରେମ୍ ଆରାକ୍ । ମାରି ନିଂ କେନ୍ ସିସ୍ତୁ ଲୁଲୁ'ରେମ୍ସୁଗସା ଆରାକ୍ । 12ଆଟେକ୍ବକ୍ ଦୁଇପାଲି ନିଂ ଆଂଡାକ୍ସ ପାର୍ତନା ଡେମ୍ତିଂ ମାରି ଆନିଂ ମାମା ବାମ୍ତା ଗୁତୁନ୍ ଗୁଲାଇନା ଦସ୍ବାନ୍ଟାକୁରୁଂ ମୁଇ ବାନ୍ଟା ଆନ ବେ'ତିଂ” ଡ'ସେକ୍ ପାର୍ତନା ଡେମ' ।
13ମାତର୍ ଗୁତୁନ୍ ସିସ୍ତୁ ଲୁଲୁ'ରେମ୍ ରେମଲେନ୍କୁରୁଂ ସୁଲୁଂ ମୁଇ ତାନ୍ବକ୍ ତଂଗା' । ମାଇ ସରଗ୍ବକ୍ ମତାଂଡାଇ' ଅବୁଦି ଦୁକଡେଂସେକ୍ ଆଗିରେ ବୁକ୍ବର୍ସେକ୍ ପାର୍ତନା ଡେମ' । ମାଇ ସୁନ' “ଅ ମାପ୍ରୁ, ନିଂ ପାପ୍ବାଇ' ରେମ, ଆନିଂ ନ ଦୟା ଡେମ୍” ଡ'ସେକ୍ ସୁନ' ।
14 #
ମାତିଉ 23:12; ଲୁକ 14:11 ଜିସୁଲା ସୁନ' “ନିଂ ଆପେ ସତ୍ ସୁନ'ତିଂ, ଗୁତୁନ୍ ସିସ୍ତୁ ଲୁଲୁ'ରେମ୍ ଡୁ'ତୁନ୍ ପାର୍ତନା ଡେମ'ସା' ମାଇନା ଗୁଲାଇ ପାପ୍ ମାପ୍ରୁ କେମା ଡେମ'ସା' ମାଇ ବଲ୍ରେମ୍ ଡେଂସେକ୍ ଡିଂଅଁବକ୍ ଉନ୍ତ୍କୁରୁଂ ଇ'ଗା' । ମାତର୍ ଗୁତୁନ୍ ପାରୁସିଦଲ୍ନା ରେମ ଡୁ'ତୁନ୍ ଆରାକ୍ । ଜାଜା ନିଂ ମୁନା'ରେମ୍ ଡ'ସେକ୍ ବଡ୍ପୁନ୍ ଡେନ୍ତା ଆମାଇ ଡାଉରେମ୍ ଡ'ସେକ୍ ଜୁତ ମାରି ଜା ନିଂ ମୁଇନ୍ଡା ଡାଉରେମ୍ ଡ'ସେକ୍ ନିଜେ ଏତ୍ତା ଆମାଇ ମୁନା'ରେମ୍ ଡ'ସେକ୍ ଜୁତ ।” ଡ'ସେକ୍ ସୁନ' ।
ଡାଉ ଗୁବୁଲେ ମାରି ଜିସୁଲା
15ମୁସିଂ ଜିସୁଲା ଡାଉଡାଉ ଗୁବୁଲେନ୍ ବାଗ୍ବକ୍ ମାଇନା ତିତି ବୁଂଅଁ'ସେକ୍ ଆମା'ଏ ଆସିର୍ବାଦ୍ ଡେମେଇ' ଡ'ସେକ୍ ଆ'ଇରସୁଗ ରେମଲେ ଆଗୁବୁଲେ ଜିସୁନ୍ବକ୍ ୱାୟ' ରିଂଅଁ' । ସା' ଗୁତୁନ୍ ଜୁଲ'ସେକ୍ ଜିସୁନା ସିସ୍ୟଲେ ଆୟଂଡେଇଁ ଆବାଡେଇଁଏଁ ତର୍ଞେ'ଗା'। 16ମାତର୍ ଜିସୁଲା ଆତୁନ୍ ଗୁବୁଲେ ପେ ନିଂନା ଉନ୍ତୁ' ସା'ବା ଡ'ସେକ୍ ୱାୟ' । ୱାୟ'ସେକ୍ ଆମାଇନା ସିସ୍ୟଲେ ସୁନ' “ଗୁବୁଲେ ନିଂବକ୍ ସାବେଇ'; ଆମା'ଏ ଆପିଟାୟ' । ମାସା'ଡ'ନା ମାପ୍ରୁନା ରାଜି ଡି'କେନ୍ବାଇ' ରେମଲେପୁଲେଇ ଡୁତା । 17ସା' ନିଂ ଆପେ ସତ୍ ସୁନ'ତିଂ, ଗୁବୁଲେ ବିସ୍ବାସ୍ ଡେମ'କୁନୁଂସୁଗ ଜାଜା ଆମାପ୍ରୁ ବିସ୍ବାସ୍ ଆଡେମ୍ତ ମାଇ ମାପ୍ରୁନା ରାଜିବକ୍ ଇନ୍ଡଇ'ଏସା ଉଇ ଆଗଂତା” ଡ'ସେକ୍ ସୁନ' ।
ମୁଇନ୍ଡା ଅବୁଦି ସାକାର୍ରେମ୍ ଜିସୁଲାବୁରଂ ଅଇଁଡେନ୍
(ମାତିଉ 19:16–30; ମାର୍କ 10:17–31)
18ଜିଉଦିରେମଲେନା ମୁନା'ରେମ୍ ମୁଇନ୍ଡା ଆଜିସୁଲା “ଅ ବଲ୍ ଗୁରୁ, ମଡୁନମ୍ ଜିବନ୍ ବୁମ୍ବାମ୍ପୁଲେଇ ନିଂ ମା ଡେମ'ନା ଡେନ୍ତା?” ଡ'ସେକ୍ ଅ'ଗଁସ୍ଲା'ଗା' ।
19ସା' ଜିସୁଲା ଆମାଇ ସୁନ', “ନ ମାସା' ଆନିଂ ବଲ୍ରେମ୍ ଡ'ସେକ୍ ସୁନ'ତୁନ? ମାପ୍ରୁ ମୁଇନ୍ଡାଉ ବଲ୍ରେମ୍ ଡୁତା, ମାରି ଜାଏସା ଆରାକ୍ । 20ନ ତ ମାପ୍ରୁନା ନିୟମ୍ ଗୁଲାଇ ମାଗ'ତୁନ । ଗୁତୁନ୍ ନିୟମ୍ ଗୁଲାଇ ମା ଡ'ନା: ‘ଆଜାଲିଗା', ଆରେମଲେ ଆଅଡାବ', ଆଡୁଂଗାଲ', ପଲୁସାକି ଆସୁନ', ମାରି ନନା ୟଂବାନା ତୁମ' ମାନ୍ଲା’ ଡ'ସେକ୍ ଡୁତା” ଡ'ସେକ୍ ସୁନ' ।
21ସା' ମାଇ “ନିଂ ଡାଉବାଂସା' କେନ୍ ଗୁଲାଇ ମାନ୍ସେ'ଗା ଡୁତିଂ” ଡ'ସେକ୍ ସୁନ' ।
22ସା' କେନ୍ ଅଂଅଁ'ସେକ୍ ଜିସୁଲା ଆମାଇ ସୁନ' “ନ ମାରି ମୁଇ ଡିନ୍ଡେମ୍ ଡୁତା । ମା ଡ'ନା, ନ ଉଇସେକ୍ ନନ୍ବକ୍ ମାମା ଡୁତା ଗୁତୁନ୍ ଗୁଲାଇଉ ସୁଂଅଁ'ସେକ୍ ଗୁତୁନ୍ ସୁଂଅଁ'କୁନୁଂ ଡାବୁ ଆଗରିବ୍ରେମ୍ ବାନ୍ଟାଲ'ବେ' । ଡୁ'ତୁନ୍ ଡେମ'ନା ସରଗ୍ବକ୍ ମାପ୍ରୁ ଆନ ଅବୁଦି ଦନ୍ସମ୍ପତି ବେ'ତ । ତିର୍ଗି' ନ ଆନିଂ ତେଂଗି' ସା'ବା” ଡ'ସେକ୍ ସୁନ' ।
23ଆମାଇ ଅବୁଦି ଦନ୍ସମ୍ପତି ଡୁକୁସା' କେନ୍ ଅଂଅଁ'ସେକ୍ ମାଇ ଅବୁଦି ସିନ୍ତାଲ' । 24ସା' ଗୁତୁନ୍ ସିନ୍ତାଲ'କୁନୁଂ ଜିସୁଲା ଜୁଲ'ସେକ୍ ସୁନ' “ଜାଜା ଅବୁଦି ସାକାର୍ସେକ୍ ଡୁତା ମା'ଏ ମାପ୍ରୁନା ରାଜିବକ୍ ଉଇପୁଲେଇ ଅବୁଦି କସ୍ଟ । 25ସତଇସା ମୁଇ ଉନ୍ଟ୍ ସୁଜିନା କାନାକୁରୁଂ ଗୁଗାଇପୁଲେଇ ମି କସ୍ଟ ଡେନ୍ତା ଗୁତୁନ୍କୁରୁଂ ଅଦିକ୍ ମୁଇନ୍ଡା ସାକାର୍ବାଇ' ରେମ ମାପ୍ରୁନା ରାଜିବକ୍ ଉଇପୁଲେଇ କସ୍ଟ ଡେନ୍ତା” ଡ'ସେକ୍ ସୁନ' ।
26ରେମଲେ କେନ୍ ତୁମ' ଅଂଅଁ'ସେକ୍ ସୁନ' “ଡୁ'ତୁନ୍ ଡ'ନା ଜା ରକ୍ୟା ବୁମ୍ବାମ୍ ଗଂତାଲେଇ?” ଡ'ସେକ୍ ସୁନ' ।
27ସା' ଜିସୁଲା ସୁନ' “ଇମ୍ବ'ନା ରେମଲେ ଡିନ୍ଡେମ୍ ଆଗଂତା ଗୁତୁନା ମାପ୍ରୁ ଡିନ୍ଡେମ୍ ଗଂତା” ଡ'ସେକ୍ ସୁନ' ।
28ସା' ପିତର୍ଲା ସୁନ' “ଜୁ, ଆନ ତେଂଗି' ସୁସାପୁଲେଇ ନେନ୍ବକ୍ ଡୁକୁନୁଂ ଗୁଲାଇ ନେଇ ଅଡକ୍ସୁଂଅଁ'ତୁନେଇ” ଡ'ସେକ୍ ସୁନ' ।
29ଜିସୁଲା ଆମା'ଏ ସୁନ' “ନିଂ ଆପେ ସତଇସା ସୁନ'ତିଂ, ମୁଇନ୍ଡା ରେମ ମାପ୍ରୁନା ରାଜିପୁଲେଇ ନିଜର୍ନା ଡିଂଅଁସାରୁ, କୁନୁଇ'ଉଁ'ଉଁ, ବୁୟାଂତାବୁକ୍, ଆୟଂଆବା ମାରି ଆଗୁଲାଇର ଅଡକ୍ସୁଂଅଁ'ନା, 30ମାଇ କେନ୍ ଦର୍ତନିବକ୍ ଡୁକୁନୁଂବେଲା ମାଇ ଅଡକ୍ସୁଂଅଁ'କୁନୁଂକୁରୁଂ ଅଦିକ୍ ଅଦିକ୍ ମାପ୍ରୁ ଆମାଇ ଗୁଲାଇ ବେ'ତ ମାରି ତିର୍ଗି'ସୁମଂ ମାପ୍ରୁ ଆମାଇ ମଡୁନମ୍ ଜିବନ୍ସା ବେ'ତ” ଡ'ସେକ୍ ସୁନ' ।
ନିଂ ମି ଗୁଇ'ତିଂ ଡ'ସେକ୍ ଜିସୁଲା ଆମାଇନା ସିସ୍ୟଲେ ମାର୍ ମୁସ ସୁଁସୁଡେନ୍
(ମାତିଉ 20:17–19; ମାର୍କ 10:32–34)
31ତିର୍ଗି' ମାଇ ଆବାରଲକ୍ ସିସ୍ୟଲେଉ ୱାୟ'ସେକ୍ ସୁନ' “ଜୁ ନେଇ' ଗୁଲାଇର ଜିରୁସାଲମ୍ ମୁନା'ଉଂଗମ୍ବକ୍ ଉଇଡେନ୍ତୁନେଇ' । ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ଆତା ଡେଲ'ନା ନିଂନା ବିସୟ ଲେକ୍ଲ'ବୁଂ ଡ'ସେକ୍ ଆବାବବାଦିଲେ ମାପ୍ରୁ ସୁନ'କୁନୁଂସୁଗ ଆନିଂ ଡେନ୍ତା । 32ମାରି ଜାଜା ଜିଉଦିରେମ ଆରାକ୍ ଡୁ'ତୁନ୍ବାଇ' ରେମଲେନ୍ ତିତିବକ୍ ରେମଲେ ଆନିଂ ବେ'ତ । ମା'ଏ ଆନିଂ ଅବୁଦି ଅ'କିୟାଲିକ୍ସେକ୍, ଗୁମୁୟ'ସେକ୍, ବୁଇ'ତୁର'ସେକ୍ ବୁଗ' ଅଗୁଇ'ତ । 33ମାତର୍ ନିଂ ତିନ୍ଦିନ୍ବକ୍ ମାରି ବୁରତିଂ” ଡ'ସେକ୍ ସୁନ' ।
34ମାତର୍ କେନ୍ ଗୁଲାଇ ମାଇନା ସିସ୍ୟଲେ ଆମାକ୍ତ । ଗୁଲାଇ ତୁମ'ନା ଅର୍ତ ଆମା'ଏ ଡାଲୁଲ'କୁନୁଂସୁଗ ଡେଂକୁସା' ମାଇ ମା ଡ'ସେକ୍ ସୁନ'ତା ଡ'ସେକ୍ ମା'ଏ ବାସ୍ ମାସା ଆମାକ୍ତ ।
କାନାମ'ବାଇ'ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 20:29–34; ମାର୍କ 10:46–52)
35ମାରି ଜିସୁଲା ଜିରିଅ ମୁନା'ଉଂଗମ୍ ତାଇ'ଡେ ଡେଂକୁନୁଂବେଲା ମୁଇନ୍ଡା କାନାମ'ବାଇ'ରେମ କୁରୁଂବକ୍ ଲେଇ'ସେକ୍ ମାଂନି ଲୁଲୁ'ଡେଂକୁ । 36ରେମଲେ ଆତୁନ୍ରି'ତା ଉଇଡେଂକୁନୁଂ ମାଇ ଅଂଅଁ'ସେକ୍ କେନ୍ ମା ଡେଂଗୁତାଲେଇ ଡ'ସେକ୍ ଆମା'ଏ ଅ'ଗଁସ୍ଲା'ଗା' । 37ସା' ନାଜରିତ୍ ଉଂଗମ୍ନା ଜିସୁଲା ଆକେନ୍ ରି'ତା ଉଇଡେନ୍ତା ଡ'ସେକ୍ ମା'ଏ ଆମାଇ ସୁନ' ।
38ଗୁତୁନ୍ ଅଂଅଁ'ସେକ୍ ମାଇ “ଅ ଦାଉଦ୍ନା ଉଁ'ଉଁ ଜିସୁ, ଆନିଂ ନ ଦୟା ଡେମ୍” ଡ'ସେକ୍ ଅବୁଦି ଡକ୍ତି'ତା କିରକ୍ସେକ୍ ସୁନ' ।
39ସା' ସିଁସେଇଁକୁନୁଂ ରେମଲେ ଆମାଇ “ନ ଜୁକ୍ଲା” ଡ'ସେକ୍ ତର୍ଞେ'ଗା' । ମାତର୍ ମାଇ “ଅ ଦାଉଦ୍ନା ଉଁ'ଉଁ ନ ଆନିଂ ଦୟା ଡେମ୍” ଡ'ସେକ୍ ଅବୁଦି ଡକ୍ତି'ତା ମାରି ସୁନ' ।
40ସା' ଗୁତୁନ୍ ଅଂଅଁ'ସେ'ଗା ଜିସୁଲା ତଂଗା' । ତଂସେ'ଗା “ଆମାଇ ଆକେ ନିଂବକ୍ ୱାୟ' ରିଂ” ଡ'ସେକ୍ ସୁନ' । 41ମାଇ ଉନ୍ତୁ' ସା'ଗା'ସା' ଜିସୁଲା ଆମାଇ ଅ'ଗଁସ୍ଲା'ଗା', “ନିଂ ନପୁଲେଇ ମା ଡେମ୍ ଡ'ସେକ୍ ଏତ୍ଗୁତୁନ” ଡ'ସା' ମାଇ ସୁନ' “ଅ ଗୁରୁ, ନିଂନା ମ' ତାରେଇ' ଡ' ଏତ୍ଗୁତିଂ” ଡ'ସେକ୍ ସୁନ' ।
42ସା' ଜିସୁଲା ଆମାଇ ସୁନ' “ନନା ମ' ତାରେଇ', ନ ବିସ୍ବାସ୍ ଡେମ'ନସା' ନନା ବିସ୍ବାସ୍ ଆନ ବଲ୍ ଡେମ' ” ଡ'ସେକ୍ ସୁନ' । 43ସା' ମାଇନା ମ' ଆଇ'କୁ ତାର୍ଗା'ସା' ଆମାପ୍ରୁ ସୁନ୍ଡ୍ରକ୍ ସୁନ୍ଡ୍ରକ୍ସେକ୍ ଆଜିସୁଲା ତେଂଗି' ଉଇଗା' । ମାରି ରେମଲେ କେନ୍ ଗୁଲାଇ ଜୁଲ'ସେକ୍ ଆମାପ୍ରୁ ସୁନ୍ଡ୍ରଆର୍ଗା' ।
Currently Selected:
ଲୁକ 18: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
