ଲୁକ 19
19
ଜିସୁଲା ମାରି ଜକିୟଲା
1ଜିସୁଲା ଜିରିଅ ମୁନା'ଉଂଗମ୍ବକ୍ ଗାଇସେକ୍ ଉଇଡେଂକୁଗା' । 2ଆତା ସିସ୍ତୁ ଲୁଲୁ'ନା ମୁନା'ରେମ୍ ଜକିୟ ଡ'ସେକ୍ ମୁଇନ୍ଡା ଡୁକୁ ; ମାଇ ଡ'ନା ଅବୁଦି ସାକାର୍ବାଇ' । 3ଜିସୁଲା ମିବାଇ' ରେମ ଡ'ସେକ୍ ଜୁଜୁପୁଲେଇ ମାଇ ଅବୁଦି ମୁନ୍ ଡେମ'କୁ, ମାତର୍ ଅବୁଦି ରେମଲେ ଡୁକୁଗା'ସା' ମାରି ମାଇ ଅବୁଦି ପେଡ୍କାବାଇ'ସା' ଜୁଜୁ ଆଗଂତା ଡେଂକୁ । 4ଜୁଜୁ ଆଗଂତା ଡେଂକୁସା' ମାଇ ସିଁସେଇଁନୁକ୍ ଉଇସେକ୍ ଆମାଇ ଜୁଜୁପୁଲେଇ ମୁଇ ଲିଅଇ ସୁଲପ୍ ବାଗ୍ବକ୍ ଡାଇ'କୁ । ମାସା'ଡ'ନା ଜିସୁଲା ଆତୁନ୍ କୁରୁଂରି'ତା ଉଇ ଡୁକୁଗା' ।
5ସା' ଜିସୁଲା ଉଇରେମ୍ ଗୁତୁନ୍ ତାନ୍ବକ୍ ସାକ୍ସେକ୍ ତାଂଡାୟ' ଜୁଲ'ସେକ୍ ଆମାଇ ସୁନ' “ଅ ଜକିୟ, ନ ସେଟ୍ଟ' ଆଲୁଂ ଜରା । ମାସା'ଡ'ନା ଆ'ନା ନିଂ ନନା ଡିଂଅଁବକ୍ ଡୁକୁ ପଡ୍ତା” ଡ'ସେକ୍ ସୁନ' । 6ସା' ମାଇ ଆଇ'କୁ ଆଲୁଂ ଜର୍ସେକ୍ ଅବୁଦି ସାର୍ଦାକୁସି ଡେଂସେକ୍ ଆଜିସୁଲା ମାଇନା ଡିଂଅଁବକ୍ ୱାୟ' ଉଇଗା' ।
7ସା' ଗୁତୁନ୍ ଜୁଲ'ସେକ୍ ରେମଲେ ଗୁଲାଇର “ଜୁ, ମାଇ ପାପ୍ବାଇ' ରେମନା ଡିଂଅଁବକ୍ ଡୁକୁପୁଲେଇ ଉଇଗା'” ଡ'ସେକ୍ ଅଇଁସାମ୍ ମୁଲାୟ' ।
8ମାତର୍ ଜକିୟଲା ତଂସେକ୍ ଆଜିସୁଲା ସୁନ' “ଅ ପ୍ରବୁ ଜୁ, ନିଂନା ଦନ୍ସମ୍ପତି ବାଗେକ୍ ଆଗରିବ୍ରେମ୍ ବେ'ତିଂ । ମାରି ନିଂ ଜାଜାନ୍ବକ୍ ନାଡାୟ' ରିଂକୁନା ମୁଇନା ସାର୍ଟା ବେ'ତିଂ” ଡ'ସେକ୍ ସୁନ' ।
9ସା' ଜିସୁଲା ଆମାଇ ସୁନ', “କେନ୍ ଜକିୟଲାସା ଅବ୍ରାଆମ୍ନା ଉଁ'ଉଁସା' ଆ'ନା ଆକେନ୍ ଡିଂଅଁନ୍ରେମ୍ ଆଗୁଲାଇର ମାପ୍ରୁ ରକ୍ୟା ଡେମ'ତା । 10#ମାତିଉ 18:11ମାସା'ଡ'ନା ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ଜାଜା ମାପ୍ରୁନ୍କୁରୁଂ ସୁଲୁଂ ଉଇଗୁତା ଆମା'ଏ ତୁର' ଅ'ତୁର'ସେକ୍ ମାପ୍ରୁ ବିବେ'ନା ଡନ୍ଡ୍କୁରୁଂ ରକ୍ୟା ଡିନ୍ଡେମ୍ପୁଲେଇଉ ନିଂ ସା'ଗୁତିଂ” ଡ'ସେକ୍ ସୁନ' ।
ଦସ୍ଟା ଗୁପାମ୍ରେମ୍ବକ୍ ଡାବୁ ବେଡ'କୁନୁଂ ଉ'ସୁରାମ୍
(ମାତିଉ 25:14–30)
11ରେମଲେ ଜିସୁଲା ସୁନ'କୁନୁଂ କେନ୍ ଗୁଲାଇ ଅଂଅଁ'ସେକ୍ ଡୁକୁନୁଂବେଲା ମାଇ ଆମା'ଏ ଅମାକ୍ପୁଲେଇ ମାରି ମୁଇ ଉ'ସୁରାମ୍ ଉଡ' । ମାସା'ଡ'ନା ମାଇ ଜିରୁସାଲମ୍ ମୁନା'ଉଂଗମ୍ ତାଇ'ଡେ ଡେଂକୁଗା'ସା' ମାପ୍ରୁନା ରାଜି ସୁରୁଇ' ଅ'ରଇଁୟ'ସେକ୍ ଜିସୁଲା ରାଜା ଏତା ଡ'ସେକ୍ ରେମଲେ ଏତ୍କୁଗା' । 12ସା' ମାଇ ସୁନ' “ମୁଇନ୍ଡା ମୁନା'ରେମ୍ ରାଜା ଅ'ଏଗ୍ସେକ୍ ଇ'ତିଂ ଡ' ଅବୁଦି ସୁଲୁଂବକ୍ ଉଇଗା' । 13ସା' ମାଇ ଉଇରେମ୍ ଆମାଇନା ଦସ୍ଲକ୍ ଗୁପାମ୍ରେମ୍ବକ୍ ୱାୟ'ସେକ୍ ଆମା'ଏ ଆମୁଇନ୍ଡା ଆମୁଇନ୍ଡା ଆଗୁଲାଇର ସମାନ୍ ଡାବୁ ବେଡ'ସେକ୍ ସୁନ' ‘ନିଂ ଇ'ପନ୍ତେକ୍ କେନ୍ ଡାବୁବୁରଂ ବେବାର୍ ଡେମ'କୁଲା’ ଡ'ସେକ୍ ସୁନ' ।
14ମାତର୍ ମାଇନା ଉଂଗମ୍ରେମ୍ ଆମାଇ ଗୁମୁୟ'କୁ । ମାରି ମା'ଏ ଆମାଇ କବର୍ ସୁଁସୁରେମ୍ବକ୍ ବେନ୍ଟାୟ'ସେକ୍ ‘ମାଇ ନେଇନା ରାଜା ଏପୁଲେଇ ଆନେଇ ମୁନ୍ ଆରାକ୍’ ଡ'ସେକ୍ ସୁଁସୁ ବେନ୍ଟାୟ' ।
15ମାତର୍ ମାଇ ରାଜା ଏଗ୍ସେକ୍ ଇ'ଗା' ମାରି ଆଜାଆଜା ଡାବୁ ବେଡ'ବୁଂଅଁ' ମା'ଏ ଗୁତୁନ୍ ଡାବୁବୁରଂ ବେବାର୍ ଡେମ'ସେକ୍ ମା ବାଂଗା' ଡ'ସେକ୍ ଜୁଜୁପୁଲେଇ ଆଗୁପାମ୍ରେମେ ୱାଇ ବେନ୍ଟାୟ' ।
16ସା' ମୁଲ୍ନା ଗୁପାମ୍ରେମ୍ ସାକ୍ସେକ୍ ‘ଅ ଗୁରୁ, ନ ବେଡ'କୁନୁଂ ଡାବୁବୁରଂ ନିଂ ମାରି ଦସ୍ଟଂକା ଅଲାବ୍ଲ'ତିଂ’ ଡ'ସେକ୍ ସୁନ' ।
17ସା' ମାଇନା ସାକାର୍ ଆମାଇ ସୁନ' ‘ଅବୁଦି ବଲ୍ବାଇ' ଗୁପାମ୍ରେମ୍, ନ ବଲ୍କାମ୍ ଡେମ'ତୁନ । ଆନ ଡାଉଡାଉବାଇ' କାମ୍ ବେଡ'କୁନୁଂ ନ ବଲ୍ ଡେମ'ତୁନ ଡ'ସେକ୍ ନିଂ ମାଗ'ତିଂସା' ଆ'ନା ଦସ୍ଟା ମୁନା'ଉଂଗମ୍ନା ଅଦିକାର୍ ଡୁକୁନୁଂ ମୁନା'ରେମ୍ ନ ଏଲା’ ଡ'ସେକ୍ ସୁନ' ।
18ଆସିଁସେୟାଁ ତେଂଗି' ସା'କୁନୁଂଆଁ ସୁନ' ‘ଅ ଗୁରୁ, ନ ବେଡ'କୁନୁଂ ଡାବୁବୁରଂ ନିଂ ମାରି ପାଁନ୍ସ୍ଟଂକା ଅଲାବ୍ଲ'ତିଂ’ ଡ'ସେକ୍ ସୁନ' ।
19ସା' ମାଇନା ସାକାର୍ ଆମାଇ ସୁନ', ‘ନସା ପାଁନ୍ସ୍ଟା ମୁନା'ଉଂଗମ୍ନା ମୁନା'ରେମ୍ ଏଲା’ ଡ'ସେକ୍ ସୁନ' ।
20ମାରି ମୁଇନ୍ଡା ଗୁପାମ୍ରେମ୍ ସାକ୍ସେକ୍ ସୁନ' ‘ଅ ଗୁରୁ, କେ ନନା ଡାବୁ, ନିଂ କେନା ମୁଇ ଜାଗଲିବକ୍ ଗୁଗବ'ବୁଂଅଁ'ନିଂ । 21ନନା ଆରାକ୍ ଡ'ନାସା ନ ରିଂଅଁ' ଡୁଂଡୁଂବାଇ' ମାରି ନ ବିଡ' ଆବୁଂତୁନ ଡ'ନାସା ଅଇଁୟ' ରିଂଅଁ' ଡୁଂଡୁଂବାଇ' । ନ ଡୁ'ତୁନ୍ ଟାକ୍ରିବାଇ' ରେମସା' ନିଂ ଆନ ଅବୁଦି ବୁତୁଂକୁନିଂ’ ଡ'ସେକ୍ ସୁନ' ।
22ସା' ମାଇନା ସାକାର୍ ଆମାଇ ସୁନ' ‘ଅ ଅଲିରାକ୍ବାଇ' ଗୁପାମ୍ରେମ୍! ନ ନିଂନା ବାଗ୍ବକ୍ ସୁନ'କୁନୁଂ ଗୁତୁନ୍ ତୁମ'ବୁରଂଉ ଆନ ନିଂ ବିସାର୍ନା ଡେମ୍ତିଂ । ମାଇନା ଆରାକ୍ ଡ'ନାସା ମାଇ ରିଂଅଁ' ଡୁଂଡୁଂବାଇ' ମାରି ମାଇ ବିଡ' ଆବୁଂତ ଡ'ନାସା ଅୟ' ରିଂଅଁ' ଡୁଂଡୁଂବାଇ' ମୁଇନ୍ଡା ଟାକ୍ରିବାଇ' ରେମ ଡ'ସେକ୍ ନ ଆନିଂ ସୁନ'ନ । 23ନିଂ ଡୁ'ତୁନ୍ବାଇ' ରେମ ଡ'ସେକ୍ ନ ମାଗ'କୁନା ନିଂନା ଡାବୁ କଲନ୍ତର୍ ବେଡ' ବୁଂଅଁ'ନା ନିଂ ସୁସାପ୍ବେଲା କଲନ୍ତର୍ବୁରଂ ପିଲ୍ସା ବାମାନିଂ । ମାସା' ନ ଡୁ'ତୁନା ଆଡେମ୍ତୁନ?’ ଡ'ସେକ୍ ସୁନ' ।
24ତିର୍ଗି' ମାଇ ଆତା ତଂକୁନୁଂ ରେମଲେବକ୍ ସୁନ' ‘ମାଇନା ତିତିବକ୍ ଡୁକୁନୁଂ ଡାବୁ ରିଂସେକ୍ ଦସ୍ଟଂକା ଅ'ଲାବ୍ଲ'କୁନୁଂ ରେମ୍ବକ୍ ବେ'’ ଡ'ସେକ୍ ସୁନ' ।
25ସା' ମା'ଏ ଆମାଇ ସୁନ' ‘ଅ ଗୁରୁ, ମାଇନ୍ବକ୍ତ ଦସ୍ଟା ଡାବୁ ଡୁତା’ ଡ'ସେକ୍ ସୁନ' ।
26 #
ମାତିଉ 13:12; ମାର୍କ 4:25; ଲୁକ 8:18 ସା' ମାଇ ଆମା'ଏ ସୁନ' ‘ଜାଜାନ୍ବକ୍ ଡୁତା ଆମା'ଏ ମାରି ଅଦିକ୍ ବେ'ତ ମାରି ଜାଜାନ୍ବକ୍ ଆଡୁତା ମା'ଏନ୍ବକ୍ ଡୁକୁନୁଂସା ରିଂଅଁ' ଡୁଂତା ଡ'ସେକ୍ ନିଂ ଆପେ ସୁନ'ତିଂ । 27#ମାତିଉ 25:14–30ମାତର୍ ଆନିଂ ରାଜା ଆ'ଏଲେଇ' ଡ'ସେକ୍ ସୁନ'କୁନୁଂ ନିଂନା ଦାଇରେମ୍ବକ୍ ଆଗୁଲାଇର ଆକେ ୱାୟ' ରିଂଅଁ'ସେକ୍ ନିଂ ଜୁଲ'କୁନୁଂବକ୍ଉ ଆମା'ଏ ଅଗୁୟ'ସୁଂ’ ଡ'ସେକ୍ ସୁନ' ।”
ଜିସୁଲା ଗଦବାଗ୍ବକ୍ ଲେଇ'ସେଗା ଜିରୁସାଲମ୍ ମୁନା'ଉଂଗମ୍ବକ୍ ଉଇଡେନ୍
(ମାତିଉ 21:1–11; ମାର୍କ 11:1–11; ଜଅନ୍ 12:12–19)
28ଜିସୁଲା କେନ୍ ଉ'ସୁରାମ୍ ଅ'ଡମ'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଉଇପୁଲେଇ ତୁର୍ଗା' । 29ମାଇ ଜିତ କୁନ୍ଡାପାଲି ଡୁକୁନୁଂ ବେତ୍ପାଗି ମାରି ବେତନିଆ ଡ'ସେକ୍ ଇମ୍ବାରୁ ଉଂଗମ୍ ଉନ୍ତୁ' ଡେଲ'ସେକ୍ ଆମାଇନା ସିସ୍ୟପା ଆଇମ୍ବାୟ ସିଁସେଇଁନୁକ୍ ବେନ୍ଟାୟ' । 30ମାଇ ଆମାଇପା ସୁନ' “ପା ଉଇବେଲା ମୁଲ୍ ଇମ୍ବ'ନ୍ ଉଂଗମ୍ ଜୁତୁପା ଗୁତୁନ୍ ଉଂଗମ୍ବକ୍ ଗାୟା । ପା ଗୁଗାଇବେଲା ଜାଏସା ମଲିନେଇ'ବାଇ' ମୁଇ ଉଁ'ଉଁଗଦ ଆତା ତୁଲ'କୁନୁଂ ଜୁତୁପା । ଗୁତୁନା ତକ୍ପିଡ'ସେକ୍ ଆକେ ରିଂଅଁ' ସା'ବା । 31ମାରି ଜାଏସା ଆପା ମାସା' ପା ତକ୍ପିଡ'ସେକ୍ ଇନ୍ଡ୍ରିଂ ଡେନ୍ତୁପା ଡ'ସେକ୍ ଅ'ଗଁସ୍ଲାଗ୍ନା, ନେଇନା ଗୁରୁ କେନା ଦର୍କାର୍ ଡ'ସେକ୍ ସୁନ'ତା ଡ'ସେକ୍ ଆମାଇ ସୁଁ” ଡ'ସେକ୍ ସୁନ' ।
32ସା' ମାଇପା ଉଇଗା'ସା' ଜିସୁଲା ସୁନ'କୁନୁଂସୁଗ ମୁଇ ଉଁ'ଉଁଗଦ ଜୁଲ' । 33ସା' ମାଇପା ଗୁତୁନ୍ ଉଁ'ଉଁଗଦ ତକ୍ପି'ବେଲା ସାକାରେ ସାକ୍ସେକ୍ “ମାସା' ପା ଗୁତୁନ୍ ତକ୍ପି' ଡେନ୍ତୁପା” ଡ'ସେକ୍ ଅ'ଗଁସ୍ଲା'ଗା' ।
34ସା' ମାଇପା ସୁନ', “ନେଇନା ଗୁରୁ ଜିସୁଲା କେନା ଦର୍କାର୍ ଡ'ତା” ଡ'ସେକ୍ ସୁନ' ।
35ସା' ମାଇପା ତକ୍ପିଡ'ସେକ୍ ଜିସୁନ୍ବକ୍ ରିଂଅଁ' । ମାରି ମା'ଏ ମା'ଏନା ଇମ୍ପ'ଡେ ଉଁ'ଉଁଗଦ ବାଗ୍ବକ୍ ବେସାଗ'ସେକ୍ ଗୁତୁନ୍ ବାଗ୍ବକ୍ ଆଜିସୁଲା ଅଲେୟ' । 36ମାଇ ଉଁ'ଉଁଗଦ ବାଗ୍ବକ୍ ଲେଇ'ସେକ୍ ଉଇଡେଂକୁନୁଂବେଲା ରେମଲେ ମା'ଏନ୍ ଇମ୍ପ'ସେନ୍ଡିଲେ ମାଇ ଉଇପୁଲେଇ କୁରୁଂବକ୍ ବେସାଗ'ବେଡ' ।
37ମାଇ ଜିତ କୁନ୍ଡାନ୍ ଜୁନର୍କନ୍ଡେକ୍ ସା'ଗା'ସା' ଜିସୁଲା ମାମା କାବାକାବା ଡିନ୍ଡେମ୍ବାଇ' କାମ୍ ଡେମ'କୁ ଗୁତୁନ୍ ଗୁଲାଇ ଏତ୍ସେକ୍ ମାଇବୁରଂ ଡୁକୁନୁଂ ସିସ୍ୟଲେ ଗୁଲାଇର ଅବୁଦି ସାର୍ଦାକ୍ସେକ୍ ଆମାପ୍ରୁ ଡକ୍ତି'ତା ସୁନ୍ଡ୍ରଗା' ।
38ମା'ଏ ସୁନ', “ପ୍ରବୁନା ଇମିବକ୍ ସୁସାପ୍ଡେଂକୁନୁଂ ଆରାଜାଲା ମାପ୍ରୁ ଆସିର୍ବାଦ୍ ଡେମେଇ'।
ସରଗ୍ବକ୍ ଡୁକୁନୁଂ ମାପ୍ରୁଲାବୁରଂ ରେମଲେ ସାନ୍ତିସାର୍ଦା ଡେଂସେକ୍ ଡୁକୁଲେଇ' ମାରି ଗୁଲାଇର ଆମାପ୍ରୁ ସୁନ୍ଡ୍ରଲେଇ' #19:38 ଆମାପ୍ରୁ ସୁନ୍ଡ୍ରଲେଇ' ଆମାପ୍ରୁ ମଇମା ବାମେଇ'” ଡ'ସେକ୍ ସୁନ' ।
39ରେମଲେବୁରଂ ଡୁକୁନୁଂ ଏନ୍ତୁକ୍ର ପାରୁସିଦଲ୍ନା ରେମଲେ ଆଜିସୁଲା ସୁନ' “ଅ ଗୁରୁ, ଆନନା ସିସ୍ୟଲେ ଡୁ'ତୁନା ଆସୁନ' ଡ'ସେକ୍ ତର୍ଞେକ୍ସେକ୍ ସୁଁ” ଡ'ସେକ୍ ସୁନ' ।
40ସା' ଜିସୁଲା ଆମା'ଏ ସୁନ' “ମା'ଏ ଜୁ'ଡେଂସେକ୍ ଡୁକୁନା କେନ୍ ବୁରେଲେ ଗୁଲାଇ କିରମରତା” ଡ'ସେକ୍ ସୁନ' ।
41ଜିସୁଲା ଜିରୁସାଲମ୍ ମୁନା'ଉଂଗମ୍ ଉନ୍ତୁ' ଡେଲ'ସେକ୍ ଆତୁନ୍ ଉଂଗମ୍ ଜୁଲ'ସେକ୍ ମାଇ ଉ'ଗା' । 42ମାରି ମାଇ ସୁନ', “ଅ ଜିରୁସାଲମ୍ ମୁନା'ଉଂଗମ୍ନା ରେମଲେ, ମି ଡେମ'ନା ପେ ମାପ୍ରୁବୁରଂ ସାନ୍ତିସାର୍ଦା ଡେଂସେକ୍ ଡୁକୁ ଗଂତୁପେ ଡ'ସେକ୍ ପେ ମାଗ'ନା ଡେମାନା । ଗୁତୁନ୍ ପେ ଆ'ନାଉ ମାଗ'ନା ଡେମାନା ଡ'ସେକ୍ ନିଂ ଆସ୍ଗୁତିଂ ମାତର୍ ପେ ଆ'ନା ଆଗଂତୁପେ ମାସା'ଡ'ନା ଗୁତୁନ୍ ପେନ୍କୁରୁଂ ତିପାକ୍ସେକ୍ ଡୁତା । 43ତିର୍ଗି'ସୁମଂ ମୁସିଂ ପେନ୍ ଦାଇରେମେ ପେନ୍ ଉଂଗମ୍ବକ୍ ସାର୍ବେର୍ତି ସାକ୍ସେକ୍ ଆପେ ରାମ'ସୁଂତ ସା' ପେ ବାଇରି ଉଇ ଆଗଂତୁପେ, ଡୁ'ତୁନ୍ବାଇ' ମୁଇ ବେଲା ସାପ୍ତା । 44ମା'ଏ ପେନ୍ ଉଂଗମ୍ବକ୍ ଗାଇସେକ୍ ଆପେ ଆଗୁଲାଇର ଅଡାବ'ସୁଂଅଁ'ସେକ୍ ଆତା ଡୁକୁନୁଂ ଗୁଲାଇ ବିଲାୟ'ସୁଂତ । ଡୁ'ତୁନ୍ଉ ମା'ଏ ଗୁଲାଇ ନାସାୟ'ସୁଂତ, ସା' ପେ ବଡ'କୁନୁଂ ବୁରେଲେ ମୁଇସା ମାର୍ମୁଇ ବୁରେ ବାଗ୍ବକ୍ ଡୁକୁନୁଂ ପେ ମାରି ଜୁଜୁ ଆଗଂତୁପେ । ମାସା'ଡ'ନା ଆପେ ମାପ୍ରୁ ରକ୍ୟା ଡିନ୍ଡେମ୍ପୁଲେଇ ଆ'ନା ପେନ୍ବକ୍ ସା'ଗୁତାସା'ଏସା ପେ ଆମାଇ ଆଏତ୍ତୁପେ ।
ଜିସୁଲା ମନ୍ଦିର୍ବକ୍
(ମାତିଉ 21:12–17; ମାର୍କ 11:15–19; ଜଅନ୍ 2:13–22)
45ମାରି ଜିସୁଲା ମାପ୍ରୁନା ମନ୍ଦିର୍ବକ୍ ଗାଇସେକ୍ ଆତା ଜାଜା ସୁଂସୁଂ ଡେଂକୁ ଆମା'ଏ ବାଇରି ଞନ' ଅ'ତୁର' । 46ମାଇ ସୁନ' ‘ନିଂନା ଡିଂଅଁ ଡ'ନା ରେମଲେ ଆମାପ୍ରୁ ପାର୍ତନା ଡିନ୍ଡେମ୍ନା ଡିଂଅଁ’ ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା । ମାତର୍ ପେ ଡୁଂଗାରେମ୍ନା ଡିଂଅଁସୁଗ ଡେମ'ତୁପେ” ଡ'ସେକ୍ ଆମା'ଏ ସୁନ' ।
47 #
ଲୁକ 21:37
ଇସାଉ ମାଇ ମନ୍ଦିର୍ବକ୍ ଆରେମଲେ ଅମାଗ'କୁ । ମାତର୍ ମୁନା'ପୁଜାରିଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ମାରି ମୁନା'ରେମେ ଆମାଇ ଅଗୁଇ'ପୁଲେଇ ସେସ୍ଟା ଡେମ'କୁ । 48ମାତର୍ ରେମଲେ ଗୁଲାଇର ଜିସୁଲା ସୁନ'କୁନୁଂ ତୁମ' ଗୁଲାଇ ବଲ୍ ଡିରିଡ' ଅଂଅଁ'ସେକ୍ ଲେଇ'କୁଗା'ସା' ଆମାଇ ବାସ୍ ମାସା ମା'ଏ ଡିନ୍ଡେମ୍ ଆଗଂତା ।
Currently Selected:
ଲୁକ 19: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
