ଲୁକ 20
20
ଜା ସୁନ'ସା' କେନ୍ ଗୁଲାଇ ଡିନ୍ଡେମ୍ ଡେନ୍ତୁନ ଡ'ସେକ୍ ଆଜିସୁଲା ଅ'ଗଁସ୍ଲାକ୍ଡେନ୍
(ମାତିଉ 21:23–27; ମାର୍କ 11:27–33)
1ମୁସିଂ ଜିସୁଲା ମନ୍ଦିର୍ବକ୍ ଆରେମଲେ ଅମାକ୍ଡେଂକୁ ମାରି ବଲ୍କବର୍ ସୁଁସୁ ଡେଂକୁ । ସା' ଆଇ'ତୁନ୍ବେଲା ମୁନା'ପୁଜାରିଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ମାରି ମୁନା'ମୁନା' ରେମଲେ ସାକ୍ସେକ୍ ଆମାଇ, 2“ନନ୍ ମା ଅଦିକାର୍ ଡୁତାସା' କେନ୍ ଗୁଲାଇ ଡେମ'ତୁନ? ଜା ଆନ କେନ୍ ଅଦିକାର୍ ବେଡ' ଡ'ସେକ୍ ଆନେଇ ସୁଁ?” ଡ' ସୁନ' ।
3ସୁନ'ସା' ଜିସୁଲା ଆମା'ଏ ସୁନ' “ନିଂସା ଆପେ ମୁଇ ଅ'ଗଁସ୍ଲାକ୍ତିଂ । ପେ ଆନିଂ ସୁଁ, 4ଆରେମଲେ ବାପ୍ତିସ୍ମା ବିବେ'ପୁଲେଇ ଆଜଅନ୍ଲା ଜା ଅଦିକାର୍ ବେଡ'? ମାପ୍ରୁ ବେଡ'ବୁଂଅଁ' କି ରେମଲେ ବେଡ'ବୁଂଅଁ'?” ଡ'ସେକ୍ ଅ'ଗଁସ୍ଲା'ଗା' ।
5ସା' ମା'ଏନ୍ ବିତ୍ରେ ମା'ଏ ମା'ଏଉ ଅସୁନୁଗା' “ମାପ୍ରୁ ଅଦିକାର୍ ବେଡ' ଡ'ସେକ୍ ସୁନ'ନା ମାସା' ପେ ଆମାଇ ବିସ୍ବାସ୍ ଆଡେମ୍ତୁପେ ଡ'ସେକ୍ ଜିସୁଲା ଆନେଇ' ସୁନ୍ତ । 6ମାତର୍ ରେମଲେନ୍କୁରୁଂ ଡ'ସେକ୍ ସୁନ'ନା ଜଅନ୍ଲା ମୁଇନ୍ଡା ବାବବାଦିଲା ଡ'ସେକ୍ ରେମଲେ ବିସ୍ବାସ୍ ଡେମ'ତାସା' ଗୁଲାଇର ଆନେଇ' ବୁରେ ତିତ” ଡ'ସେକ୍ ମା'ଏ ଅଇଁୟ' ।
7ସା' ମା'ଏ ଆଜିସୁଲା ସୁନ' “ଗୁତୁନା ଇମ୍ବ'କୁରୁଂ ଡ'ସେକ୍ ନେଇ ଆମାକ୍ତୁନେଇ” ଡ'ସେକ୍ ସୁନ' । 8ସା' ଜିସୁଲା ଆମା'ଏ ସୁନ' “ଡୁ'ତୁନ୍ ଡ'ନା ଜା ଆନିଂ ଅଦିକାର୍ ବେଡ'ସା' ନିଂ ଡି'କେନ୍ ଗୁଲାଇ ଡିନ୍ଡେମ୍ ଡେନ୍ତିଂ ଡ'ସେକ୍ ନିଂସା ଆପେ ଆସୁନ୍ତିଂ” ଡ'ସେକ୍ ସୁନ' ।
ଟାକ୍ରିବାଇ' ଡିନ୍ଜାବୁର୍ ଜାଗ୍ବାର୍ରେ
(ମାତିଉ 21:33–46; ମାର୍କ 12:1–12)
9ତିର୍ଗି' ଜିସୁଲା ଆରେମଲେ ଅମାକ୍ପୁଲେଇ ମୁଇ ଉ'ସୁରାମ୍ ଉଡ' । ମାଇ ସୁନ' “ମୁଇନ୍ଡା ରେମ ମୁଇ ଡିନ୍ଜାବୁର୍ବକ୍ ଅଂଗୁର୍ ଉଁ ଆର'ସେକ୍ ଗୁତୁନା ଆକାମ୍ରେମ୍ ବାଗ୍ଲ' ବେଡ'ସେକ୍ ପାଲ୍ ମୁଇ ଉଂଗମ୍ବକ୍ ଉଇସେକ୍ ଅବୁଦି ଦିନ୍ ଡୁକୁଗା' । 10ମାରି ଅଂଗୁର୍ ମୁମୁଇ'ନା ବେଲା ଡେଂଗା'ସା' ମାଇନା ବାନ୍ଟା ଇନ୍ଡ୍ରିଂପୁଲେଇ ଗୁତୁନ୍ ସାକାର୍ ଆମାଇନା ଗୁପାମ୍ରେମ୍ ଆମୁଇନ୍ଡା ଗୁତୁନ୍ କାମ୍ ଡିନ୍ଡେମ୍ରେମେନ୍ବକ୍ ବେନ୍ଟାୟ' । ମାତର୍ ଗୁତୁନ୍ କାମ୍ ଡିନ୍ଡେମ୍ରେମେ ଆତୁନ୍ ଗୁପାମ୍ରେମ୍ ଅବୁଦି ବୁଗ'ତିଲ'ସେକ୍ ସର ତିତିଉ ବେନ୍ଟାୟ'ବେଡ' । 11ସା' ମାଇ ମାରି ଆମୁଇନ୍ଡା ଗୁପାମ୍ରେମ୍ ଗୁତୁନୁଂଏଁନ୍ବକ୍ ବେନ୍ଟାୟ' । ସା' ମା'ଏ ଆମାଇସା ଅବୁଦି ବୁଗ'ତିଲ'ସେକ୍ ଅ'ଗେୱାଲ'ସେକ୍ ସର ତିତିଉ ବେନ୍ଟାୟ'ବେଡ' । 12ସା' ମାଇ ମାରି ଆମୁଇନ୍ଡା ବେନ୍ଟାୟ' । ସା' ଆମାଇସା ମା'ଏ ଅ'ବନିଲ' ଅ'ଲୁସୁଲ'ବୁଗ'ସେକ୍ ବାଇରି ରାନ୍ଡେଲ' ବେଡ' ।
13ସା' ଗୁତୁନ୍ ଡିନ୍ଜାବୁର୍ନା ସାକାର୍ ସୁନ', ‘ନିଂ ମା ଡେମ୍ତିଂ? ନିଂ ଅବୁଦି ଆଲାତ୍ ଡେମ'କୁନୁଂ ଆନିଂନା ଉଁ'ଉଁ ମା'ଏନ୍ବକ୍ ବେନ୍ଟାଇତିଂ । ଆମାଇ ମା'ଏ ମାନ୍ତା ମା'ନ୍ଡେ’ ଡ'ସେକ୍ ସୁନ' ।
14ଗୁତୁନ୍ କାମ୍ରେମେ ଆସାକାର୍ନା ଉଁ'ଉଁ ଜୁଲ'ସେକ୍ ମା'ଏ ମା'ଏନ୍ ବିତ୍ରେ ଅଇଁୟ' ‘ଜୁ, କେନ୍ ଡିନ୍ଜାବୁର୍ନା ଅଦିକାର୍ ଆମାଇଉ ଡେନ୍ତା । ଲବେ, ଆମାଇ ଅଡାବ'ସୁଂନେଇ', ଡୁ'ତୁନ୍ ଡେମ'ନା କେନ୍ ଗୁଲାଇନା ଅଦିକାର୍ ନେଇ'ନା ଡେନ୍ତା’ ଡ'ସେକ୍ ମା'ଏ ଅଇଁୟ' । 15ସା' ମା'ଏ ଆମାଇ ଡିନ୍ଜାବୁର୍ ବାଇରି ଅ'ତୁର'ସେକ୍ ଅଗୁୟ'ସୁଂଅଁ' ।
ଆ'ନା ଗୁତୁନ୍ ସାକାର୍ ଆମା'ଏ ମା ଡେମ୍ତ? 16ମାଇ ସାକ୍ସେକ୍ ଆତୁନ୍ କାମ୍ରେମେ ଅଗୁୟ'ସେକ୍ ଗୁତୁନ୍ ଡିନ୍ଜାବୁର୍ ଆପାଲ୍ ରେମଲେ ବେ'ତ” ଡ'ସେକ୍ ସୁନ' । ସା' ଜିସୁଲା ସୁନ'କୁନୁଂ ଗୁତୁନ୍ ଅଂଅଁ'ସେକ୍ ରେମଲେ ସୁନ' “ଡୁ'ତୁନା ଇନ୍ଡଇ'ଏସା ଆଡେମେଇ'” ଡ'ସେକ୍ ସୁନ' ।
17ଜିସୁଲା ଆମା'ଏ ବଲ୍ ଜୁଲ'ସେକ୍ ସୁନ' “ଡୁ'ତୁନ୍ ଡ'ନା ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ଗୁତୁନ୍ ଅର୍ତ ମାଲେଇ?
ଆତା ଲେକ୍ଲ'ତା:
ବ'ସିଂରେମ୍ ଇମ୍ବ'ନା ବୁରେ ଅଲିରାକ୍ବାଇ' ଡ'ସେକ୍ ଅଡକ୍ସୁଂଅଁ'କୁ
ଗୁତୁନ୍ ବୁରେଉ ଆ'ନା ବ'ସିଂବେଲା ଗଡିକ୍ବକ୍ ବୁଂବୁଂପୁଲେଇ ଅବୁଦି ବଲ୍ବାଇ' ବୁରେ ଡ'ସେକ୍ ବୁଂଅଁ'ତା' ।
18ଗୁତୁନ୍ ବୁରେ ବାଗ୍ବକ୍ ଜା ଲକ୍ତା ମାଇ ସିସିକ୍ଲୁଲାର୍ଉଇତା ମାରି ଗୁତୁନ୍ ବୁରେ ଜାନ୍ ବାଗ୍ବକ୍ ଲକ୍ତା ମାଇ ବିଲ୍ଉଇତା” ଡ'ସେକ୍ ସୁନ' ।
19କେନ୍ ଉ'ସୁରାମ୍ ଅଂଅଁ'ସେ'ଗା ଜିସୁଲା ଆନେଇଉ ଡି'କେନ୍ ସୁନ'ତା ଡ'ସେକ୍ ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ମାରି ମୁନା'ପୁଜାରିଲେ ମାଗ' । ସା' ଆମାଇ ଆ'ନାଉ ସବ୍ନେଇ' ଡ'ସେକ୍ ଏତ୍ଗା' ମାତର୍ ଆତା ଅବୁଦି ରେମଲେ ଡୁକୁସା' ମା'ଏ ବୁତୁଂଗା' ।
ଆକାଇସ୍ର୍ଲା ସିସ୍ତୁ ବିବେ'ନା ବଲ୍ କି ଆସାର୍ ଡ'ସେକ୍ ଆଜିସୁଲା ଅ'ଗଁସ୍ଲାକ୍ଡେନ୍
(ମାତିଉ 22:15–22; ମାର୍କ 12:13–17)
20ସା' ମା'ଏ ଇନ୍ଡଇ'ଏସା ସୁବିଦା ବାଂନା ଆମାଇ ସବ୍ନେଇ' ଡ'ସେକ୍ ଡୁକୁ । ସା' ମାଇ ମାମା ବୁଲ୍ ସୁନ'ନା ସବ୍ନେଇ' ଡ'ସେକ୍ ଆଏନ୍ତୁକ୍ର ତାନ୍କି ଜୁଜୁପୁଲେଇ ମାଇନ୍ବକ୍ ବେନ୍ଟାୟ' । ଗୁତୁନ୍ ତାନ୍କିରେମେ ଅବୁଦି ବଲ୍ରେମ୍ସୁଗ ଅଇଁୟ'କୁ ମାତର୍ ଆମାଇ ସବ'ସେକ୍ ଅଦିକାର୍ ଡୁକୁନୁଂ ମୁନା'ରେମେନ୍ ତିତିବକ୍ ଅସବ' ବିବେ'ପୁଲେଇଉ ମା'ଏ ଡୁକୁ । 21ମା'ଏ ଆମାଇ ସୁନ' “ଅ ଗୁରୁ, ନ ମାମା ସୁନ'ତୁନ ମାରି ଅମାଗ'ତୁନ ଗୁତୁନ୍ ଗୁଲାଇ ସତ୍ ଡ'ସେକ୍ ନେଇ ମାଗ'ତୁନେଇ । ନ ଆଜାଏସା ପାଲ୍ପାଲ୍ ଡ'ସେକ୍ ଜୁଲ' ଆଡୁତୁନ ମାତର୍ ରେମଲେ ମି ଡୁକୁଡୁତା ଡ'ସେକ୍ ମାପ୍ରୁ ସୁନ'ତା ଗୁତୁନ୍ ସମାନ୍ ଅମାଗ'ତୁନ ଡ'ସେକ୍ସା ନେଇ ମାଗ'ତୁନେଇ । 22ସା' ଆନେଇ ସୁଁ, ନେଇ ରମିୟ ଦେସ୍ନା ଆମୁନା' ରାଜା ଆକାଇସର୍ଲା ସିସ୍ତୁ ବିବେ'ନା ନେଇ'ନା ନିୟମ୍ସୁଗ କି ଆରାକ୍?”
23ମା'ଏ ଆନିଂ ସବ୍ତୁନେଇ ଡ'ସେକ୍ ଏତ୍କୁନୁଂ ଜିସୁଲା ମାଗ'ସେକ୍ ଆମା'ଏ ସୁନ', 24“ଆନିଂ ମୁଇ ଲୁକୁ'ଡାବୁ ଅସୁଇ' । ଆତା ଜାନା ପଟ୍ ମାରି ଇମି ଡୁତା?” ଡ'ସେକ୍ ସୁନ'ସା'
ମା'ଏ ସୁନ' “କାଇସର୍ନା” ଡ'ସେକ୍ ସୁନ' ।
25ସା' ଜିସୁଲା ଆମା'ଏ ସୁନ' “ଡୁ'ତୁନ୍ ଡ'ନା ଆକାଇସର୍ଲା ମାମା ବିବେ' ଡୁତା ଗୁତୁନ୍ ଆକାଇସର୍ଲା ବେ' ମାରି ଆମାପ୍ରୁଲା ମାମା ବିବେ' ଡୁତା ଗୁତୁନା ଆମାପ୍ରୁଲା ବେ'” ଡ'ସେକ୍ ସୁନ' ।
26ସା' ଜିସୁଲା ମାମା ବୁଲ୍ ସୁନ'ନା ରେମଲେ ଜୁଲ'କୁନୁଂବକ୍ଉ ଆମାଇ ସବ୍ନେଇ' ଡ'ସେକ୍ ମା'ଏ ଏତ୍କୁଗା' ମାତର୍ ମା'ଏ ଆଗଂତା । ମାରି ମାଇ ସୁନ'କୁନୁଂ ଗୁଲାଇ ଅଂଅଁ'ସେକ୍ ମା'ଏ ଗୁଲାଇର କାବାକାବା ଡେଂସେକ୍ ଜୁ'ଜା'ଡେଂଉଇଆର୍ଗା' ।
ରେମଲେ ଗୁଇ'ସେକ୍ ମାରି ବୁରତାକି ଆରାକ୍ ଡ'ସେକ୍ ସୁଁସୁଡେନ୍
(ମାତିଉ 22:23–33; ମାର୍କ 12:18–27)
27 #
ପେରିତ 23:8
ରେମଲେ ଗୁଇ'ସେକ୍ ମାରି ବୁର ଆଗଂତା ଡ'ସେକ୍ ସାଦୁକି ଦଲ୍ନା ରେମଲେ ବିସ୍ବାସ୍ ଡେମ'ତା । ମା'ଏନ୍ ବିତ୍ରେ ଏନ୍ତୁକ୍ର ଜିସୁନ୍ବକ୍ ସାକ୍ସେକ୍ ଆମାଇ ଅ'ଗଁସ୍ଲା'ଗା', 28“ଅ ଗୁରୁ, ମୁଇନ୍ଡାନା ବୁୟାଂ ଆଇବୁଇ'ସେକ୍ ଉଁ'ଉଁ ମବୁନାମ୍ ଗୁଇ'ଗା' ଡ'ନା ଗୁଇ'କୁନୁଂନା ଇମିବକ୍ ପୁଁଜିପୁଲେଇ ମାଇ ଆଗୁଇ'କୁନୁଂନା କୁନୁଇ' ବୁଂଅଁ'ସେକ୍ ଉଁ'ଉଁ ବୁମ୍ବାମ୍ ଡୁତା ଡ'ସେକ୍ ମସାଲା ଲେକ୍ଲ'ତା । 29ଡୁ'ତୁନ୍ ଡ'ନା ଜୁ, ମୁଇ ଡିଂଅଁବକ୍ ସାତ୍ଲକ୍ ମା'ଏ ବୁନୁୟାଂଏଁ ଡୁକୁଗା' । ସା' ମୁଲ୍ନା ବୁୟାଂଡେଇଁ ସେଲାମ୍ବୁଇ' ରିଂଅଁ'ସେକ୍ ମୁଇସା ଉଁ'ଉଁ ମବୁନାମ୍ ଗୁଇ'ଉଇଗା' । 30ସା' ଆମାଇ ତେଂଗିଡ'କୁନୁଂ ବୁୟାଂଡେଇଁ ଆମାଇ ବୁଂଅଁ' । ମାଇସା ଡୁ'ତୁନାଉ ଗୁଇ'ଗା' । 31ମାରି ଆମାଇ ତେଂଗିଡ'କୁନୁଂସା ବୁଂଅଁ'ସେକ୍ ଡୁ'ତୁନାଉ ଗୁଇ'ଗା' । ଡୁ'ତୁନାଉ ସାତ୍ଲକ୍ସା ଉଁ'ଉଁ ମବୁନାମ୍ ଗୁଲାଇର ଗୁଗୁଇ' ଆର୍ଗା' । 32ତିର୍ଗି' ଗୁତୁନ୍ ସେଲାନ୍ଲାସା ଗୁଇ'ଗା' । 33ଜୁ, ଆମାଇ ସାତ୍ଲକ୍ ବୁନୁୟାଂଏସା ବୁଂଅଁ'କୁ । ଡୁ'ତୁନ୍ ଡ'ନା ତିର୍ଗି'ସୁମଂ ରେମଲେ ଗୁଇ'ସେକ୍ ବୁରବେଲା ଗୁତୁନ୍ ସେଲାନ୍ଲା ଜାନା କୁନୁଇ' ଏତା?”
34ଜିସୁଲା ଆମା'ଏ ସୁନ', “କେନ୍ ଦର୍ତନିନା ରେମଲେ ଗୁଲାଇର ଇ'ପର୍ୱାଇବୁଇ'ତା । 35ମାତର୍ ମାପ୍ରୁ ଆଜାଆଜା ଗୁଇ'କୁନୁଂ ରେମଲେନ୍କୁରୁଂ ବ'ରତ ମାରି ମାପ୍ରୁନା ରାଜିବକ୍ ଡୁକୁ ଗଂତା ମା'ଏ ଆତା ଇନ୍ଡଇ'ଏସା ଆୱାଇବୁଇ'ତା । 36ମାରି ମା'ଏ ସରଗ୍ନା ଦୁତଲେସୁଗ ଡୁତାସା' ମା'ଏ ଇନ୍ଡଇ'ଏସା ଆଗୁଇ'ତା । ମାରି ଆମା'ଏ ମାପ୍ରୁ ଗୁଇ'କୁନୁଂକୁରୁଂ ବ'ରଲ'ତାସା' ମା'ଏ ମାପ୍ରୁନା ଉଁ'ଉଁ ଏଗୁତା । 37ରେମଲେ ଗୁଇ'କୁନୁଂକୁରୁଂ ବୁରତା ଡ'ସେକ୍ ମସାଲାସା ଇନ୍ତେକନ୍ଡେକ୍ ଲେକ୍ଲ'ବୁଂଅଁ'ତା । ମାସା'ଡ'ନା ମାଇ ସୁଂଅଁ ଡ'କୁନୁଂ ଗୁମ୍ରାବକ୍ ଆପ୍ରବୁ, ‘ଅବ୍ରାଆମ୍ନା ମାପ୍ରୁ, ଇସାକ୍ନା ମାପ୍ରୁ ମାରି ଜାକୁବ୍ନା ମାପ୍ରୁ’ ଡ'ସେକ୍ ୱାୟ'ତା । 38ସା' ମାଇ ଗୁଇ'କୁନୁଂ ରେମଲେନା ମାପ୍ରୁ ଆରାକ୍ ମାତର୍ ବୁରକ୍ସେକ୍ ଡୁକୁନୁଂ ରେମଲେନ୍ ମାପ୍ରୁ । ମାସା'ଡ'ନା ମାଇ ଜୁଲ'ନା ଗୁଇ'କୁନୁଂ ରେମଲେସା ବୁରକୁନୁଂସୁଗ ଡୁତା ।”
39ସା' ମାପ୍ରୁନା ନିୟମ୍ ଅମାକ୍ରେମ୍ ଏନ୍ତୁକ୍ର ଗୁତୁନ୍ ଅଂଅଁ'ସେକ୍ ଆମାଇ ସୁନ' “ଅ ଗୁରୁ, ନ ମା ଡ' ସୁନ'ନ ଗୁତୁନ୍ ସତ୍” ଡ'ସେକ୍ ସୁନ' । 40ମାସା'ଡ'ନା ଆମାଇ ମାରି ମାମା ଅ'ଗଁସ୍ଲାକ୍ପୁଲେଇ ମା'ଏ ବୁତୁଂସେକ୍ ମାସା ଆସୁନ୍ତ ।
କିରିସ୍ଟଲା ଜାନା ଉଁ'ଉଁ ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 22:41–46; ମାର୍କ 12:35–37)
41ତିର୍ଗି' ମାଇ ଆମା'ଏ ଅ'ଗଁସ୍ଲା'ଗା' “କିରିସ୍ଟଲା ଦାଉଦ୍ନା ଉଁ'ଉଁ ଡ'ସେକ୍ ମିଞାଂ ରେମଲେ ସୁନ'ତା? 42-43ମାସା'ଡ'ନା, ଇନ୍ତେକନ୍ଡେକ୍ ଦାଉଦ୍ଲା ନିଜେ ଗିତସଂଗିତାବକ୍ ସୁନ'ତା:
‘ପ୍ରବୁ ଆନିଂନା ପ୍ରବୁ ସୁନ'ତା:
ଆନନା ଦାଇରେମେ ନନା ତିକ୍ସୁଂ ଜକ୍ଜକ୍ନା ମୁଇ ପାଟାସୁଗ ନିଂ ଡେମ୍ତିଂ,
ଆଇ'ତୁନ୍ ପନ୍ତେକ୍ ନ ନିଂନା ସୁସୁମ୍ତିକୁରୁଂ ଲେଇ'କୁଲା ।’
44ସା' ଦାଉଦ୍ଲା ଆକିରିସ୍ଟଲା ପ୍ରବୁ ଡ' ୱାୟ'ତା ଡ'ନା କିରିସ୍ଟଲା ମି ଦାଉଦ୍ନା ଉଁ'ଉଁ ଏତାଲେଇ?” ଡ'ସେକ୍ ଅ'ଗଁସ୍ଲା'ଗା' ।
ନିୟମ୍ ଅମାକ୍ରେମେନ୍କୁରୁଂ ସଇଗା ଡେଂକୁଲା
(ମାତିଉ 23:1–36; ମାର୍କ 12:38–40; ଲୁକ 11:37–54)
45ତିର୍ଗି' ମାଇ ଆଗୁଲାଇର ଅ'ଅଂଅଁ'ସେକ୍ ଆମାଇନା ସିସ୍ୟଲେ ସୁନ': 46ନିୟମ୍ ଅମାକ୍ରେମେନ୍କୁରୁଂ ସୁଲୁଂ ଡୁକୁଲା । ମାସା'ଡ'ନା ମା'ଏ ଲାଂବାଇ' ସକା ଅଲୁକ୍ସେ'ଗା ଆରେମଲେ ଅସୁଇ'ପୁଲେଇ ବୁଲ୍ତ ମାରି ଆଟ୍ବକ୍ ଉଇନା ରେମଲେ ଆନେଇ ସୁନ୍ଡ୍ରଲେଇ' ଡ'ସେକ୍ ଏତ୍ତା ମାରି ପାର୍ତନା ଡିଂଅଁବକ୍ ଉଇନା ମୁନା'ରେମେପୁଲେଇ ବୁଂଅଁ'କୁନୁଂ କର୍ଜିବକ୍ ଲିଲେଇ'ପୁଲେଇ ମାରି ବଜି ସୁସୁମ୍ପୁଲେଇ ୱାୟ'ନା ମୁନା'ରେମ୍ପୁଲେଇ ବୁଂଅଁ'କୁନୁଂ ତାନ୍ବକ୍ ଲିଲେଇ'ପୁଲେଇ ଆମା'ଏ ମୁନ୍ । 47ମା'ଏ ଗୁଇ'ସିଂକୁଇ'ନା ଗୁଲାଇ ନାଡାୟ' ରିଂତା ମାରି ମା'ଏନ୍ ଡିଂଅଁସା ରିଂଅଁ' ଡୁଂତା । ମାରି ରେମଲେ ମାଇ ବଲ୍ବାଇ' ରେମ ଡ' ସୁନେଇ' ଡ'ସେକ୍ ମା'ଏ ଲାଂବାଇ' ପାର୍ତନା ଡେମ୍ତ । ଡି'କେନ୍ବାଇ' ରେମଲେବକ୍ ମାପ୍ରୁ ଅବୁଦି ମୁନା'ବାଇ' ଡନ୍ଡ୍ ବେ'ତ ।
Currently Selected:
ଲୁକ 20: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
