ଲୁକ 21
21
ଗୁଇ'ସିଂକୁଇ'ନା ଇମ୍ବାରୁ ଲୁକୁ'ଡାବୁ
(ମାର୍କ 12:41–44)
1ଜିସୁଲା ଆତା ମାପ୍ରୁନା ମନ୍ଦିର୍ବକ୍ ଜୁଲ'ସା' ଆତା ଡାବୁ ବୁଂବୁଂନାବକ୍ ସାକାର୍ବାଇ' ରେମଲେ ସାକ୍ସେକ୍ ଡାବୁ ବୁଂବୁଂଡେଂକୁନୁଂ ଜୁଲ' । 2ଆଇ'ତୁନ୍ବେଲା ଆତା ଅବୁଦି ଗରିବ୍ବାଇ' ମୁଇନ୍ଡା ଗୁଇ'ସିଂକୁଇ' ସାକ୍ସେକ୍ ଇମ୍ବାରୁ ଲୁକୁ'ଡାବୁ ବୁଂଅଁ' । 3ସା' ଗୁତୁନ୍ ଜୁଲ'ସେକ୍ ଜିସୁଲା ସୁନ' “ଗୁଲାଇରନ୍କୁରୁଂ କେନ୍ ଗରିବ୍ବାଇ' ଗୁଇ'ସିଂକୁ'ୟା ଅଦିକ୍ ଡାବୁ ବୁଂଅଁ'ତା ଡ'ସେକ୍ ନିଂ ଆପେ ସତଇସା ସୁନ'ତିଂ । 4ମାସା'ଡ'ନା ମା'ଏ ଗୁଲାଇର ମା'ଏନ୍ବକ୍ ଲଲ'କୁନୁଂ ରିଂଅଁ'ସେକ୍ ବୁଂଅଁ'ତା ମାତର୍ କୁନା ଅବୁଦି ଗରିବ୍ବାଇ'ରେମ ଡ'ନାସା' ମାଇ ସୁମ'ସେକ୍ ବୁରପୁଲେଇ ଡୁକୁନୁଂ ଗୁଲାଇ ରିଂଅଁ'ସେକ୍ ବୁଂଅଁ'” ଡ'ସେକ୍ ସୁନ' ।
ମାପ୍ରୁନା ମନ୍ଦିର୍ବକ୍ ମା ଡେନ୍ତା ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 24:1–2; ମାର୍କ 13:1–2)
5ଏନ୍ତୁକ୍ର ସିସ୍ୟଲେ ଗୁତୁନ୍ ମନ୍ଦିର୍ ଜୁଲ'ସେକ୍, କେନା ମନ୍ଦିର୍ ଅବୁଦି ମଇନାବାଇ' ବୁରେବୁରଂ ମାରି ରେମଲେ ଆମାପ୍ରୁ ମାମା ବିବେ'ଆର'କୁନୁଂବୁରଂ ବଲ୍ଟା ଅ'ରଇଁୟ'ତା ଡ'ସେକ୍ ସୁନ'ସା' ଜିସୁଲା ସୁନ', 6“ଆ'ନା ଆକେ ପେ ମାମା ଜୁଲ'ତୁପେ ଗୁତୁନ୍ ଗୁଲାଇ ମୁସିଂ ବିଲ୍ ଉଇନା ବେଲା ସାପ୍ତା । ଉନ୍ତା କେନା ବୁରେ ତିରେୟଁ' ବୁଂଅଁ'କୁନୁଂ ମୁଇସା ବାଗ୍ବକ୍ ଆଡୁତା, ଗୁଲାଇ ବିଲ୍ଉଇତା” ଡ'ସେକ୍ ସୁନ' ।
ତିର୍ଗି'ସୁମଂ ମାମା ଡେନ୍ତା ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 24:3–14; ମାର୍କ 13:3–13)
7ସା' ମା'ଏ ଆମାଇ ସୁନ' “ଅ ଗୁରୁ, କେନ୍ ଗୁଲାଇ ଇନ୍ଡ'ୟା ଡେନ୍ତା? ଗୁତୁନ୍ ଡିନ୍ଡେମ୍ନା ବେଲା ସୁରୁଇ' ସୁସାପ୍ଡେନ୍ ଡ'ସେକ୍ ନେଇ ମିବାଇ' ସିନ ଜୁଲ'ସେକ୍ ମାକ୍ତୁନେଇ?” ଡ'ସେକ୍ ସୁନ' ।
8ସା' ମାଇ ଆମା'ଏ ସୁନ', “ଜାଏସା ଆପେ ଆନାଡାଏଇ', ପେ ସଇଗା ଡେଂକୁଲା! ରେମଲେ ଅବୁଦିର ନିଂନା ଇମି ସୁନ'ସେକ୍ ‘ନିଂଉ ମାଇ’ ଡ'ସେକ୍ ପେନ୍ବକ୍ ସାପ୍ତା । ମାରି ରାଜି ବୁଡାଇବାର୍ନା ବେଲା ସା'ଗା' ଡ'ସେକ୍ସା ଆପେ ସୁନ୍ତ । ମାତର୍ ପେ ଆମା'ଏ ତେଂଗି' ଆଉଇଗା' । 9ରେମଲେ ଇନ୍ଡ୍ରିମ୍ ଡେଂକୁନୁଂ ମାରି ଅବୁନୁକ୍ ଅ'ତିନିକୁନୁଂ ଅଂଅଁ'ସେକ୍ ପେ ଆବୁତୁଂଗା' । ମାସା'ଡ'ନା ସିଁସେଇଁ ଡି'କେନା ଡେଂନାଉ ଡେନ୍ତା ମାତର୍ ଆଇ'କୁ ରାଜି ବୁଡାଇବାର୍ନା ବେଲା ଆସାପ୍ତା ।”
10ମାରି ମାଇ ଆମା'ଏ ସୁନ' “ମୁଇ ଦେସ୍ନା ରେମଲେ ପାଲ୍ ଦେସ୍ନା ରେମଲେବୁରଂ ମାରି ମୁଇ ରାଜିନା ରେମଲେ ପାଲ୍ ରାଜିନା ରେମଲେବୁରଂ ରିମ୍ତ । 11ଗୁଲାଇ କୁନ୍ଡା ଦର୍ତନି ଅବୁଦି ଲୁନ୍ଡୁର୍ତା, ସୁସୁମ୍ଇ'ପୁଲେଇ ଆବାମ୍ତା ମାରି ଉଂଗମ୍ ଉଂଗମ୍ ଗୁଇ'ଲେଇଁ ସାକ୍ସେକ୍ ରେମଲେ ଗୁଇ'ଉଇତା । ମାରି ରେମଲେ ଅବୁଦି ବୁତୁଂସୁବ୍ଡାକ୍ବାଇ' ମାରି କାବାକାବା ଡିନ୍ଡେମ୍ବାଇ' ଅବୁଦି ମାମା କି'ତୁଂବାଗ୍ବକ୍ ଜୁତ ।
12ମାତର୍ କେନା ଗୁଲାଇ ଡିନ୍ଡେମ୍ ସିଁସେଇଁ ରେମଲେ ଆପେ ଅବୁଦି ଦୁକକସ୍ଟ ବେ'ତ । ମା'ଏ ଆପେ ସବ'ସେକ୍ ମା'ଏନ୍ ପାର୍ତନା ଡିଂଅଁବକ୍ ବିସାର୍ନା ଡେମ୍ତ ମାରି ବନ୍ଦିବକ୍ ସୁରୁଂତ । ପେ ଆନିଂ ବିସ୍ବାସ୍ ଡେମ'ତୁପେସା' ମା'ଏ ଆପେ ରାଜାଲେନ୍ବକ୍ ମାରି ମୁନା' ମୁନା'ରେମଲେନ୍ବକ୍ ରିଂଅଁ' ଉଇସେକ୍ ଅବୁଦି କସ୍ଟ ବେ'ତ । 13ମାତର୍ ଆଇ'ତୁନ୍ବେଲା ପେ ନିଂନା ବଲ୍କବର୍ ଆମା'ଏ ସାକି ସୁଁସୁ ଗଂତୁପେ । 14#ଲୁକ 12:11,12ସା' ମା'ଏ ମାମା ଅ'ଗଁସ୍ଲାଗ୍ନା ନେଇ ମା ଡ' ସୁନ୍ତୁନେଇବେ ଡ'ସେକ୍ ମୁଲ୍ଉ ପେ ସିନ୍ତାଲ'ସେକ୍ ମଡୁକୁପୁଲେଇ ପେନ୍ ଜିବନ୍ବକ୍ ବପୁ ବାଂସେକ୍ ଡୁକୁଲା । 15ମାସା'ଡ'ନା ନିଂ ଆପେ ସୁଁସୁପୁଲେଇ ତୁମ' ମାରି ବୁଦିଗିୟାନ୍ ବେ'ତିଂ । ସା' ପେ ସୁନ'କୁନୁଂ ପେନା ଦାଇରେମ୍ ଅଂଅଁ'ସେକ୍ ବାସ୍ ମା ଡ'ସେକ୍ସା ଆପେ ସୁଁସୁ ଆଗଂତା । 16ପେନା ୟଂଏଁ ବା ଲେ, ବୁୟାଂଏଁ ତୁନାଲେ, ଡିଂଅଁନ୍ରେମେ ମାରି ବାଇଲ'ଗେ ଗୁଲାଇର ଆପେ ଦାଇରେମ୍ନା ତିତିବକ୍ ବେ'ତ ମାରି ଆପେ ଆ'ଇରସୁଗବକ୍ ଅଗୁୟ'ସୁଂତ । 17ପେ ଆନିଂ ବିସ୍ବାସ୍ ଡେମ'ତୁପେସା' ଗୁଲାଇର ଆପେ ଗୁମୁଇତ । 18ମାତର୍ ପେନ୍ ବ'ବ୍ନା ଉକ୍ବକ୍ ମୁଇସା ନସ୍ଟ ଆଡେନ୍ତା । 19ମା ଡେଂନାସା ପେ ଆନିଂଉ ବିସ୍ବାସ୍ ଡେମ'ଡୁକୁନା ଆପେ ମଡୁନମ୍ ଜିବନ୍ ବାମ୍ତା ।”
ଜିରୁସାଲମ୍ ମୁନା'ଉଂଗମ୍ ନାସ୍ ଉଇତା ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 24:15–21; ମାର୍କ 13:14–19)
20ଜିରୁସାଲମ୍ ମୁନା'ଉଂଗମ୍ବକ୍ ବର୍ତି ସଇନିକଲେ ଡୁକୁନୁଂ ପେ ଜୁଲ'ନା ଗୁତୁନ୍ ଉଂଗମ୍ ବୁଡାଇବାର୍ନା ବେଲା ସୁରୁଇ' ସୁସାପ୍ଡେନ୍ ଡ'ସେକ୍ ମାକ୍ତୁପେ । 21ଉନ୍ତା ଜାଜା ଜିଉଦା ମୁନା'ଉଂଗମ୍ବକ୍ ଡୁତା ମା'ଏ କୁନ୍ଡାବାଗ୍ବକ୍ ଉର' ଡୁଂଏଇ' । ମାରି ଜାଜା ଜିରୁସାଲମ୍ ମୁନା'ଉଂଗମ୍ ବିତ୍ରେ ଡୁତା ମା'ଏ ଗୁତୁନ୍ ଉଂଗମ୍କୁରୁଂ ତୁର୍ସେକ୍ ଡୁଂଏଇ' । ମାରି ଜାଜା ଉଂଗମ୍ ବାଇରି ଡୁତା ମା'ଏ ଉଂଗମ୍ ବିତ୍ରେ ଆଗାଏଇ' । 22ମାପ୍ରୁ ଆମାଇନା ରେମଲେ ଡନ୍ଡ୍କସ୍ଟ ବେ'ତ ଡ'ସେକ୍ ଇନ୍ତେକନ୍ଡେକ୍ ବାବବାଦିଲେ ଲେକ୍ଲ'କୁନୁଂ ଉନ୍ତା ସତଇସା ଡେନ୍ତା । 23ଆଇ'ତୁନ୍ବେଲା ଜାଜା ଅନ୍ତୁର'କୁନୁଂ ମାରି ଅଗ'କୁନୁଂବାଇ' ସେଲାନେ ଡୁତା ଡ'ନା ମା'ଏ ଅବୁଦି କସ୍ଟ ବାମ୍ତା । ମାସା'ଡ'ନା ଉନ୍ତ୍ବେଲା କେନ୍ ଦେସ୍ବକ୍ ଅବୁଦି କସ୍ଟ ସାପ୍ତା ମାରି କେନ୍ ରେମଲେନ୍ ବାଗ୍ବକ୍ ମାପ୍ରୁ ଅବୁଦି ଗିସେ'ତା । 24ମାରି ସଇନିକଲେ ଆ'ଇରସୁଗବକ୍ ଅଗୁୟ'ସୁଂତ । ମାରି ଆ'ଇରସୁଗ ଡୁକୁନୁଂରେମ୍ବକ୍ ସବ'ସେକ୍ ପାଲ୍ପାଲ୍ ଦେସ୍ବକ୍ ରିଂଅଁ' ଉଇତା । ଜାଜା ଜିଉଦିରେମ ଆରାକ୍ ମା'ଏ ଜିରୁସାଲମ୍ ଉଂଗମ୍ବକ୍ ଗାଇସେକ୍ ଗୁତୁନ୍ ଉଂଗମ୍ ନାସାଇତ । ମା'ଏ ଆ'ଇଦିନ୍ ଗୁତୁନ୍ ଉଂଗମ୍ବକ୍ ଡୁକୁଡୁତା ଡ'ସେକ୍ ମାପ୍ରୁ ବୁଂଅଁ'ତା ଆଇ'ତୁନ୍ ଦିନ୍ ମା'ଏ ଜିରୁସାଲମ୍ବକ୍ଉ ଡୁତା ।
ଜିସୁଲା ମାରି ସାପ୍ତିଂ ଡ'ସେକ୍ ସୁଁସୁଡେନ୍
(ମାତିଉ 24:29–31; ମାର୍କ 13:24–27)
25 #
ଅସୁୟ'କୁନୁଂ 6:12,13 ଉନ୍ତା ସିଂଇଁ, ଆର୍କେ ମାରି ମୁମର୍ତ'ଗେବକ୍ ଅବୁଦି କାବାକାବାବାଇ' ମାମା ତୁନାତା । ସମ୍ଦର୍କିନ୍ଡା'ଗେ ଅବୁଦି ଲାଇଗର୍କୁନୁଂ ଅଂଅଁ'ସେକ୍ ମାରି ମୁନା'ମୁନା' ତଂକୁକ୍ଡାଗ୍ ଜୁଲ'ସେକ୍ ଦର୍ତନିନା ରେମଲେ କେନା ମା ଡେଂଗୁତା ଡ'ସେକ୍ ଏତ୍ସେ'ଗା ଅବୁଦି ସିନ୍ତାତ ମାରି ବୁତୁଂତା । 26କି'ତୁଂବକ୍ ଡୁକୁନୁଂ ଗୁଲାଇ ଅବୁଦି ପର୍ରାଇ'ତାସା' କେନ୍ ଦେସ୍ଦୁନିଆବକ୍ ମି ଡେନ୍ତା ଡ' ରେମଲେ ସିନ୍ତାଲ'ସେକ୍ ଅବୁଦି ବୁତୁଂସେକ୍ ପୁଇମଡ' ପୁଇତିଂଅଁ'ସେକ୍ ଲକ୍ତା । 27#ଅସୁୟ'କୁନୁଂ 1:7ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ । ଉନ୍ତା ନିଂ ଅବୁଦି ବପୁ ବାଂସେକ୍ ଅବୁଦି ତାର୍କିକ୍ସେ'ଗା#21:27 ଅବୁଦି ତାର୍କିକ୍ସେ'ଗା ମଇମା ବାଂସେକ୍ ବାଦଲ୍ଡାଗ୍କୁରୁଂ ଜୁଜର୍ ଡେଂକୁନୁଂ ମା'ଏ ଗୁଲାଇର ଜୁତ । 28ସା' ନିଂ ସୁନ'କୁନୁଂସୁଗ ଡିନ୍ଡେମ୍ ମୁଲାୟ'ନା କେନ୍ ଦର୍ତନିନା ଗୁଲାଇ ଦୁକକସ୍ଟକୁରୁଂ ମାପ୍ରୁ ଆନେଇ' ଅ'ତୁର୍ନା ବେଲା ସୁରୁଇ' ସୁସାପ୍ଡେନ୍ତା ଡ'ସେକ୍ ପେ ମାକ୍ତୁପେ । ସା' ପେ ବପୁ ବାଂସେକ୍ ସାର୍ଦାକ୍ସେକ୍ ଡୁକୁଲା ।
ଲିଅଇ ସୁଲପ୍ନା ଉ'ସୁରାମ୍
(ମାତିଉ 24:32–35; ମାର୍କ 13:28–31)
29ମାରି ମାଇ ଆମା'ଏ ଅମାକ୍ପୁଲେଇ ମୁଇ ଉ'ସୁରାମ୍ସୁଗ ସୁନ', “ଆଲିଅଇ ସୁଲପ୍ ମାରି ଆଗୁଲାଇ ସୁଲ'ବେ ଜୁ । 30ଗୁତୁନ୍ ଗୁଲାଇ ସୁଲ'ବେ ପୁ'ଡୁର୍କୁନୁଂ ଜୁଲ'ସେକ୍ ଞା'ସିଂବେଲା ସୁରୁଇ' ସୁସାପ୍ଡେନ୍ ଡ'ସେକ୍ ପେ ମାଗ'ତୁପେ । 31ଡୁ'ତୁନ୍ସୁଗ କେନ୍ ଗୁଲାଇ ଡେଂକୁନୁଂ ଜୁଲ'ନା ମାପ୍ରୁ ଆରେମଲେ ସାସନ୍ ଡିନ୍ଡେମ୍ନା ବେଲା ସୁରୁଇ' ସୁସାପ୍ଡେନ୍ ଡ'ସେକ୍ ପେ ମାକ୍ତୁପେ ।
32କେନ୍ ଗୁଲାଇ ଡିନ୍ଡେମ୍ ପନ୍ତେକ୍ ଆ'ନା ଡୁକୁନୁଂ ଜୁଲିନା ରେମଲେ ଆଗୁଇ'ତା ଡ'ସେକ୍ ଆପେ ନିଂ ସତଇସା ସୁନ'ତିଂ । 33କି'ତୁଂ ମାରି ଦର୍ତନି ଗୁଲାଇ ବୁ'ଗ୍ ଉଇତା ମାତର୍ ନିଂ ସୁନ'କୁନୁଂ ତୁମ' ଇନ୍ଡଇ'ଏସା ଆବୁ'ତା ।”
ସଇଗା ଡୁକୁଡୁତା ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 24:36–44; ମାର୍କ 13:32–37)
34ମାତର୍ ପେ ସଇଗା ଡେଂସେକ୍ ଡୁକୁଲା । ରେମଲେ ମା'ଏନ୍ ଜିବନ୍ ଇ'କି ବଲ୍ ଡିନ୍ଡେମ୍ପୁଲେଇ ମାମା ଡେମ୍ତ ଡୁ'ତୁନ୍ସୁଗ ପେସା ଡେମ'ସେକ୍ ମାରି ବିସାକ୍ସେକ୍ ଆଡୁକୁଗା' । ମାରି ମା ସୁମ'ଇଡ'ବୁରତିଂ ମି ଡୁତିଂ ଡ'ସେକ୍ କେନ୍ ଦର୍ତନିନା ଗୁଲାଇ ଏତ୍ସେକ୍ ସିନ୍ତାଲ'ରୁନ୍ତାଲ' ଆଡୁକୁଗା' । ମାସା'ଡ'ନା ପେ ସଇଗା ଡେଂସେକ୍ ଆଡୁତୁପେ ଡ'ନା ଡୁନକ୍ବକ୍ ମି ମାମା ଗାଇନା ରମ୍ପିକ୍ ବେ'ତ ଡୁ'ତୁନା ନିଂ ସୁରୁଇ' ସାକ୍ନା ପେ ଆମାକ୍ତୁପେ । 35ମାସା'ଡ'ନା ଦର୍ତନିବକ୍ ଡୁକୁନୁଂ ଆଗୁଲାଇ ରେମଲେ ଡି'କେନା ଡେନ୍ତା । 36ସା' ଇସାଉ ପେ ସଇଗା ଡେଂସେକ୍ ଡୁକୁଲା । କେନ୍ ଗୁଲାଇ ଆପେ ଡେଂନାସା ପେ ଆମାପ୍ରୁଉ ମାନ୍ସେକ୍ ଡୁକୁପୁଲେଇ ପେ ପାର୍ତନା ଡେମ' ଡୁକୁଲା । ମାରି ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ନିଂନା ସାର୍ମ'କନ୍ଡେକ୍ ପେ ମଗେୱା ବପୁବାଂସେକ୍ ତୁନ୍ତପୁଲେଇ ପାର୍ତନା ଡେମ' ଡୁକୁଲା ।
37 #
ଲୁକ 19:47
ମାଇ ଇସାଉ ସିମି'ଇ ମନ୍ଦିର୍ବକ୍ ଆରେମଲେ ମାପ୍ରୁନା ତୁମ' ଅମାଗ'ସେ'ଗା ତୁମୁଂଗ ଜିତ କୁନ୍ଡାବକ୍ ଉଇସେକ୍ ବାସାକୁ । 38ସା' ଇସାଉ ଇନ୍ଜୁର୍ନୁକ୍ ରେମଲେ ଗୁଲାଇର ମାଇନା ତୁମ' ଅଂପୁଲେଇ ମନ୍ଦିର୍ବକ୍ ସା'କୁ ।
Currently Selected:
ଲୁକ 21: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
