ମାତିଉ 12
12
ଜିସୁଲା ବିସ୍ରାମ୍ଦିନ୍ନା ବିସୟ ସୁଁସୁଡେନ୍
(ମାର୍କ 2:23–28; ଲୁକ 6:1–5)
1ଆଇ'ତୁନ୍ବେଲା ଜିସୁଲା ବିସ୍ରାମ୍ଦିନ୍ବକ୍ ବୁରଂରି'ତା ଉଇଡେଂକୁ । ସା' ଆମାଇନା ସିସ୍ୟଲେ କୁଡୁକୁସା' ବୁରଂବକ୍ ଡୁକୁନୁଂ ଗମ୍ ରୁଇବାଡ'ସେକ୍ ପୁସ୍ରିଡ' ପୁସ୍ରିଡ' ସୁସୁମ୍ ମୁଲାୟ' । 2ସା' “ଜୁ, ବିସ୍ରାମ୍ଦିନ୍ବକ୍ ଆଡେମ' ଡ'ସେକ୍ ସୁନ'କୁନୁଂ ନନା ସିସ୍ୟଲେ ଡେମ'ତା” ଡ'ସେକ୍ ପାରୁସିଦଲ୍ନା ରେମଲେ ଆମାଇ ସୁନ' ।
3ଜିସୁଲା ଆମା'ଏ ସୁନ' “ଦାଉଦ୍ଲା ମାରି ମାଇନା ବାଇଲ'ଗେ କୁଡୁକୁନୁଂବେଲା ମା ଡେମ' ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ପେ ପଡ୍ ଆଡୁତୁପେ ଇ? 4ଦାଉଦ୍ଲା ମାପ୍ରୁନା ଡିଂଅଁବକ୍ ଗାଇସେକ୍ ମାପ୍ରୁନା ସାର୍ମ'କନ୍ଡେକ୍ ବୁଂଅଁ'କୁନୁଂ ପବିତ୍ରବାଇ' ରୁଟି ଜୁଗ'ସେକ୍ ସୁମ' ମାରି ମାଇନା ବାଇଲ'ଗେସା ସୁମ'। ମାତର୍ ଗୁତୁନ୍ ରୁଟି ଡ'ନା ପୁଜାରିଲେଉ ସୁସୁମ୍ ଡୁତା ଡ'ସେକ୍ ନିୟମ୍ ଡୁକୁ । 5ମାରି ‘ପୁଜାରିଲେ ବିସ୍ରାମ୍ଦିନ୍ ମନ୍ଦିର୍ବକ୍ କାମ୍ ଡେମ'ନାସା' ମା'ଏ ବିସ୍ରାମ୍ଦିନ୍ନା ନିୟମ୍ ମମାନ୍ବାର୍ ରେମଲେ ଡ'ସେକ୍ ଆମା'ଏ ଆଜୁତ’ ଡ'ସେକ୍ ମସାଲା ବେଡ'କୁନୁଂ ନିୟମ୍ବକ୍ ଲେକ୍ଲ'କୁନୁଂ ପେ ପଡ୍ ଆଡୁତୁପେ ଇ? 6ମାତର୍ ମନ୍ଦିର୍ନା ନିୟମ୍କୁରୁଂ ଅଦିକାର୍ ଡୁକୁନୁଂ ମୁଇନ୍ଡା ମୁନା'ରେମ୍ ଆକେ ଡୁତା ଡ'ସେକ୍ ନିଂ ଆପେ ସୁନ'ତିଂ । 7#ମାତିଉ 9:13‘ପେ ଗିଗେ ଗେଲ'କୁନୁଂ ଆନିଂ ଦର୍କାର୍ ଆରାକ୍ ମାତର୍ ପେ ଆପାଲ୍ ରେମଲେ ଲିବିସୁପ୍ବା, ଗୁତୁନାଉ ଆନିଂ ଦର୍କାର୍ ’ ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ କେନ୍ ଗୁଲାଇନା ଅର୍ତ ପେ ମାଗ'ନାଏ ଦରମ୍ବାଇ' ରେମଲେବକ୍ ମା'ଏ ପାପ୍ରେମ୍ ଡ'ସେକ୍ ପେ ଆସୁଁପେ । 8ମାସା'ଡ'ନା ବିସ୍ରାମ୍ଦିନ୍ବକ୍ ମାମା ଡିନ୍ଡେମ୍ ଡୁତା ଡ'ସେକ୍ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁନା ଅଦିକାର୍ ଡୁତାସା' ମାଇ ବିସ୍ରାମ୍ଦିନ୍ନା ପ୍ରବୁ” ଡ'ସେକ୍ ସୁନ' ।
ଜିସୁଲା ସିର୍ଲାତିତିବାଇ'ବକ୍ ବଲ୍ ଡିନ୍ଡେମ୍ଡେନ୍
(ମାର୍କ 3:1–6; ଲୁକ 6:6–11)
9ଜିସୁଲା ଉନ୍ତ୍କୁରୁଂ ତୁର୍ସେକ୍ ମା'ଏନା ପାର୍ତନା ଡିଂଅଁବକ୍ ଉଇଗା' । 10ସା' ସିର୍ଲାତିତିବାଇ'ରେମ ମୁଇନ୍ଡା ଆତା ଡୁକୁ । ସା' ପାରୁସିଦଲ୍ନା ରେମଲେ “ବିସ୍ରାମ୍ଦିନ୍ବକ୍ ଆମୁଇନ୍ଡା ବଲ୍ ଡିନ୍ଡେମ୍ନା ନେଇ'ନା ନିୟମ୍ବକ୍ ଲେକ୍ଲ'କୁନୁଂସୁଗ ଡୁତା ଇ?” ଡ'ସେକ୍ ଆଜିସୁଲା ଅ'ଗଁସ୍ଲା'ଗା' । ମାସା' ମା'ଏ ଆମାଇ ଡୁ'ତୁନା ଅ'ଗଁସ୍ଲା'ଗା' ଡ'ନା ଜିସୁଲା ଅଁ'ଅଁ ଡ'ନା ମାଇ ଅଲିରାକ୍ବାଇ' ସୁନ'ତା ଡ'ସେକ୍ ସୁନେଇ' ଡ'ସେ'ଗାଉ ମା'ଏ ଆମାଇ ଡୁ'ତୁନା ଅ'ଗଁସ୍ଲା'ଗା' ।
11 #
ଲୁକ 14:5
ମାତର୍ ଜିସୁଲା ଆମା'ଏ ସୁନ', “ବିସ୍ରାମ୍ଦିନ୍ବକ୍ ପେନ୍ ବିତ୍ରେ ଜାଏସାନା ମୁଇ ମେନ୍ଡା କାଲ୍ବକ୍ ଗାଇଗା' ଡ'ନା ପେ ଆତୁନ୍ ମେନ୍ଡା ଗୁତୁନ୍ କାଲ୍କୁରୁଂ ତିତିବୁରଂ ୱାନ'ସେକ୍ ଆ'ତୁର୍ତୁପେ ଇ? ଆରାକ୍, ଅ'ତୁର୍ତୁପେ । 12ଡୁ'ତୁନ୍ ଡ'ନା ମୁଇନ୍ଡା ରେମ ମୁଇ ମେନ୍ଡାନ୍କୁରୁଂ ଅବୁଦି ମୁନା' । ଡୁ'ତୁନ୍ସା' ବିସ୍ରାମ୍ଦିନ୍ବକ୍ ବଲ୍କାମ୍ ଡିନ୍ଡେମ୍ନା ନେଇ'ନା ନିୟମ୍ବକ୍ ଲେକ୍ଲ'କୁନୁଂସୁଗ ଡୁତା” ଡ'ସେକ୍ ସୁନ' ।
13ଡୁ'ତୁନ୍ ସୁନ'ସେକ୍ ଜିସୁଲା ଆତୁନ୍ ସିର୍ଲାତିତିଲା “ନ ନନା ତିତି ତୁଂତି” ଡ'ସେକ୍ ସୁନ'ସା' ମାଇ ତୁଂତିଲ' । ସା' ମାଇନା ଗୁତୁନ୍ ତିତି ମୁଇ'ସାଂନା ତିତିସୁଗ ବଲ୍ ଡେଂଉଇଗା' । 14ମାତର୍ ପାରୁସିଦଲ୍ନା ରେମଲେ ଉନ୍ତ୍କୁରୁଂ ତୁର୍ସେକ୍ ଆମାଇ ମି ଅଗୁୟ'ନା ଡେନ୍ତା ଡ'ସେକ୍ ଅଇଁୟ' ।
ଜିସୁଲାଉ ମାପ୍ରୁଲା ସିରେଲ'କୁନୁଂ ମୁଇନ୍ଡା ଗୁପାମ୍ରେମ୍
15ମା'ଏ ଅଇଁୟ'କୁନୁଂ ଜିସୁଲା ମାଗ'ସେକ୍ ଉନ୍ତ୍କୁରୁଂ ତୁର୍ଡୁଂଗା' ମାରି ଅବୁଦି ରେମଲେସା ଆମାଇ ତେଂଗି' ଉଇଗା' । ସା' ଜାଜା ସିବାଇ' ଡୁକୁ ଆମା'ଏ ଆଗୁଲାଇର ଜିସୁଲା ବଲ୍ ଡେମ' । 16ମାରି ନିଂ ଜା ଡ'ସେକ୍ ପେ ଆଜାଏସା ବାସ୍ ଆସୁନ' ଡ'ସେକ୍ ଜିସୁଲା ଆମା'ଏ ସୁନ' । 17ଇନ୍ତେକନ୍ଡେକ୍ ଆବାବବାଦି ଆଜିସାୟଲା ମାପ୍ରୁ ସୁଁ ଡ'ସେକ୍ ସୁନ'ସା' ମାଇ ମା ଡ'ସେକ୍ ସୁନ'କୁ ଗୁତୁନ୍ ଆ'ନା ସତ୍ ଡିନ୍ଡେମ୍ପୁଲେଇ ଡି'କେନ୍ ଡେଂଗା' । ମାଇ ମା ସୁନ'କୁ ଡ'ନା:
18ଜୁ, ନିଂ ସିରେଲ'କୁନୁଂ ନିଂନା ଗୁପାମ୍ରେମ୍,
ଆମାଇ ନିଂ ସିରେଲ'ତିଂ ମାରି ଆମାଇ ନିଂ ଲବ୍ଗୁତିଂ ମାରି ଆମାଇ ଜୁଲ'ନା ନିଂ ଅବୁଦି ସାର୍ଦା ଡେଂଗୁତିଂ ।
ନିଂ ପବିତ୍ର ଆତ୍ମା ଆମାଇ ବେ'ତିଂ ।
ମାରି ଜାଜା ଆମାପ୍ରୁ ବିସ୍ବାସ୍ ମଡିନେମ୍ ଡୁତା ଆମା'ଏ ମାପ୍ରୁ ମି ସିଦାସିଦା ବିସାର୍ନା ଡେମ୍ତ ଡ'ସେକ୍ ମାଇ ସୁନ୍ତ ।
19ମାଇ ଇନ୍ଡଇ'ଏସା ଆରିମ୍ତ କି ଆକିରତା,
ମାରି ରେମଲେ ଅବୁଦି ରୁନ୍କୁନୁଂବକ୍ ମାଇ ସରଉ ମାମା ଅଇଁୟ'କୁନୁଂ ଆଅଂତ ।
20ମାପ୍ରୁନା ମୁନ୍ସୁଗ ମାଇ ଗୁଲାଇ ସିଦାସିଦା ଡେମ'ସେକ୍ ଆଗୁଲାଇ ଜିନ୍ବାର୍ପନ୍ତେକ୍,
ରବ୍ଡା'କୁନୁଂ ଅର୍ଡାଗ୍ ମାଇ ଆପିକ୍ରୁକ୍ତ,
ମାରି ଲିଲି' ଡେଂକୁନୁଂ ବତି ମାଇ ଆ'ଲି'ତ ।
21ଗୁଲାଇ ଜାତିନ୍ ରେମଲେ ମାଇନ୍କୁରୁଂ ନେଇ' ରକ୍ୟା ବାମ୍ତୁନେଇ' ଡ'ସେକ୍ ଆସ୍ତା ।
ଜିସୁଲା ମାରି ବାଆଲ୍ଜିବୁଲ୍
(ମାର୍କ 3:20–30; ଲୁକ 11:14–23)
22ତିର୍ଗି' ଆ'ଇରସୁଗ ରେମଲେ ବୁତ୍ ସବ'କୁନୁଂ ଆମୁଇନ୍ଡା ରେମ ଜିସୁନ୍ବକ୍ ରିଂଅଁ' ସା'ଗା' । ଆମାଇ ବୁତ୍ ସବ'କୁସା' ମାଇ କାନାମ'ବାଇ' ମାରି କନ୍ଦାବାଇ' ଡୁକୁ । ସା' ଜିସୁଲା ଆମାଇ ବଲ୍ ଡେମ'ସା' ମାଇ ବଲ୍ ଅଇଁ ଗଂଗା' ମାରି ବଲ୍ ଜୁଜୁସା ଗଂଗା' । 23ସା' ଗୁତୁନ୍ ଜୁଲ'ସେକ୍ ଆତା ରୁନ୍କୁନୁଂ ରେମଲେ ଗୁଲାଇର ଅବୁଦି କାବାକାବା ଡେଂସେକ୍, “ସତଇସା କୁନା ଦାଉଦ୍ନା ଉଁ'ଉଁ ଇ?” ଡ'ସେକ୍ ସୁନ' ।
24 #
ମାତିଉ 9:34; 10:25 ମାତର୍ ପାରୁସିଦଲ୍ନା ରେମଲେ ଗୁତୁନ୍ ଅଂଅଁ'ସେକ୍ “ଆକୁନା ବୁତ୍ଲେନା ମୁନା'ରେମ୍ ବାଆଲ୍ଜିବୁଲ୍ଲା ବପୁ ବେଡ'ତାସା'ଉ ମାଇ ଆବୁତ୍ଲେ ଞନ' ଅ'ତୁର୍ ଗଂଗୁତା” ଡ'ସେକ୍ ସୁନ' ।
25ସା' ମା'ଏ ଏତ୍କୁନୁଂ ଜିସୁଲା ମାଗ'ସେ'ଗା ଆମା'ଏ ସୁନ', “ମୁଇ ରାଜିନା ରେମଲେ ପାଲ୍ପାଲ୍ ଡେଂସେକ୍ ମା'ଏ ମା'ଏଉ ରିମ'ନା ମା'ଏନା ରାଜି ନାସ୍ ଉଇତା । ମାରି ମୁଇ ଉଂଗମ୍ନା ରେମଲେ ଆରା'ଗେ ଡିଂଅଁନ୍ରେମେ ମା'ଏ ମା'ଏଉ ରିମ'ସେକ୍ ପାଲ୍ପାଲ୍ ଡେଂଉଇତା ଡ'ନା ମା'ଏ ଡୁକୁ ଆଗଂତା । 26ଡୁ'ତୁନ୍ଉ ସଇତାନ୍ ମାଇବୁରଂ ଡୁକୁନୁଂ ଆବୁତ୍ଲେ ଞନ' ଅ'ତୁର୍ ଡେନ୍ତା ଡ'ନା ମା'ଏ ମା'ଏନ୍ ବିତ୍ରେ ପାଲ୍ପାଲ୍ ଡେଂଉଇତା ମାରି ମାଇନା ରାଜିସା ଆଡୁତା । 27ଆମାଇ ବାଆଲ୍ଜିବୁଲ୍ ବପୁ ବେଡ'ସା'ଉ ମାଇ ଆବୁତ୍ଲେ ଞନ' ଅ'ତୁର୍ ଗଂଗୁତା ଡ'ସେକ୍ ପେ ଆନିଂ ସୁନ'ତୁପେ ଡ'ନା ପେନ୍ ରେମଲେ ଜାନା ବପୁବୁରଂ ଆବୁତ୍ଲେ ଞନ' ଅ'ତୁର୍ ଡେନ୍ତା? ଡୁ'ତୁନ୍ ଡ'ନା ପେନ୍ ରେମଲେଉ ପେ ବୁଲ୍ ସୁନ'ତୁପେ ଡ'ସେକ୍ ଆପେ ସୁନ୍ତ । 28ମାତର୍ ନିଂ ମାପ୍ରୁନା ଜିବନ୍ନା ବପୁବୁରଂ ଆବୁତ୍ଲେ ଞନ' ଅ'ତୁର୍ତିଂ ଡ'ନା ମାପ୍ରୁ ରାଜି ଅ'ରଇଁୟ'ସେକ୍ ଆରେମଲେ ଜୁଜୁନା ବେଲା ଆ'ନା ଡେଂଗୁତା ଡ'ସେକ୍ ପେ ମାଗ'କୁଲା ।”
29“ଜାଏସା ମୁଇନ୍ଡା ରେମ ମାଇନ୍କୁରୁଂ ଅବୁଦି ବପୁବାଇ' ରେମନା ଡିଂଅଁବକ୍ ଗାଇସେକ୍ ମାଇନା ଗୁଲାଇ ଦନ୍ସମ୍ପତି ଡୁଂଗା'ଲ' ରିଂତିଂଡ'ନା ସିଁସେଇଁଉ ଆତୁନ୍ ବପୁବାଇ' ରେମ ତୁଲ'ରେଡ'ସେକ୍ ବୁଂବୁଂ ଡୁତା । ଡୁ'ତୁନ୍ ଡେମ'ନା ମାଇନା ଦନ୍ସମ୍ପତି ଗୁଲାଇ ରିଂରିଂ ଗଂତା ।”
30 #
ମାର୍କ 9:40
ଜା ନିଂବୁରଂ ଆମିସ୍ତା ମାଇ ନିଂନା ଦାଇରେମ୍ । ଆନିଂ କାମ୍ବକ୍ ଜା ଆସାନ୍ଡୁଂତ ମାଇ ବିଡ୍କାୟ'ତା । 31ଡୁ'ତୁନ୍ସା' ନିଂ ଆପେ ସୁନ'ତିଂ, ରେମଲେ ମାମା ପାପ୍କାମ୍ ଡେମ'କୁନୁଂ ମାରି ମାମା ଅଲିରାକ୍ବାଇ' ସୁନ'କୁନୁଂ ଗୁଲାଇ କେମା ଡେମ୍ତ । ମାତର୍ ପବିତ୍ର ଆତ୍ମାନା ବାଗ୍ବକ୍ ମାମା ଅଲିରାକ୍ବାଇ' ସୁନ'କୁନୁଂ କେମା ଆଡେମ୍ତ । 32#ଲୁକ 12:10ମାରି ଜାଏସା ମୁଇନ୍ଡା ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁନା ବାଗ୍ବକ୍ ମାମା ଅଲିରାକ୍ବାଇ' ମୁଇ ତୁମ'ସା ସୁନ'ନା କେମା ବେ'ତ, ମାତର୍ ପବିତ୍ର ଆତ୍ମାନା ବାଗ୍ବକ୍ ଜାଏସା ମୁଇନ୍ଡା ମାମା ଅଲିରାକ୍ବାଇ' ମୁଇ ତୁମ'ସା ସୁନ'ନା ଆମାଇ ଇନ୍ଡଇ'ଏସା କେମା ଆବେ'ତ ।
ସୁ'ଉକୁନୁଂ ଜୁଲ'ସେକ୍ ଗୁତୁନ୍ ମିବାଇ' ସୁଲପ୍ ଡ'ସେକ୍ ମାକ୍ତୁନେଇ'
(ଲୁକ 6:43–45)
33 #
ମାତିଉ 7:20; ଲୁକ 6:44 ବଲ୍ବାଇ' ସୁଲପ୍ ଡୁତା ଡ'ନା ବଲ୍ବାଇ' ସୁଉ'କୁନୁଂ ବାମ୍ତା ମାରି ଅଲିରାକ୍ବାଇ' ସୁଲପ୍ ଡୁତା ଡ'ନା ଅଲିରାକ୍ବାଇ' ସୁଉ'କୁନୁଂ ବାମ୍ତା । ସା ରେମଲେ ଗୁତୁନ୍ ସୁଉ'କୁନୁଂ ଜୁଲ'ନା ସୁଲପ୍ ସମ'ଗଂତା । 34#ମାତିଉ 3:7; 23:33; ଲୁକ 3:7; ମାତିଉ 15:18; ଲୁକ 6:45ଅ, ଅବୁଦି ବିସ୍ ଡୁକୁନୁଂ ବୁବୁ'ଡେନା ଉଁ'ଉଁନେ! ପେ ଅଲିରାକ୍ବାଇ' ରେମଲେ ଡ'ନା ମି ବଲ୍ବାଇ' ତୁମ' ସୁଁସୁ ଗଂତୁପେ? ମାସା'ଡ'ନା ମୁଇନ୍ଡାନା ଜିବନ୍ବକ୍ ମାଇ ମା ଏତ୍ଗୁତା ଗୁତୁନାଉ ମାଇ ସୁନ୍ତ । 35ମୁଇନ୍ଡା ରେମ ମାଇନା ଜିବନ୍ବକ୍ ବଲ୍ଟା ଏତ୍ସେକ୍ ଡୁତା ଡ'ନା ମାଇ ଅଇଁବେଲା ବଲ୍ବଲ୍ଟାବାଇ' ତୁମ' ସାପ୍ତା ମାରି ମୁଇନ୍ଡା ରେମ ମାଇନା ଜିବନ୍ବକ୍ ଅଲିରାକ୍ବାଇ' ଏତ୍ସେକ୍ ଡୁତା ଡ'ନା ମାଇ ଅଇଁବେଲା ଅଲିରାକ୍ବାଇ' ତୁମ' ସାପ୍ତା । 36ମାତର୍ ଜାଏସା ମୁଇନ୍ଡା ମଏତ୍ବାର୍ ମଗୁନ୍ବାର୍ବାଇ' ତୁମ' ସୁନ'କୁନୁଂ ଗୁଲାଇ ମାସା' ନିଂ ଡୁ'ତୁନ୍ ସୁନ'ନିଂ ଡ'ସେକ୍ ବିସାର୍ନା ଡିନ୍ଡେମ୍ବେଲା ଗୁତୁନ୍ ଗୁଲାଇ ସୁଁସୁ ପଡ୍ତା ଡ'ସେକ୍ ନିଂ ଆପେ ସୁନ'ତିଂ । 37ନ ମାମା ସୁନ'ତୁନ ଗୁତୁନ୍ ସୁନ'କୁନୁଂ ତୁମ'ବୁରଂଉ ବିସାର୍ନା ଡିନ୍ଡେମ୍ବେଲା ନ ବଲ୍ବାଇ' ରେମ କି ଅଲିରାକ୍ବାଇ' ରେମ ଡ'ସେକ୍ ସୁନ୍ତ ।
ଜିଉଦିରେମଲେ ଆଜିସୁଲା କାବାକାବା ଡିନ୍ଡେମ୍ବାଇ' କାମ୍ ଡେମ୍ ଡ'ସେକ୍ ସୁଁସୁଡେନ୍
(ମାର୍କ 8:11–12; ଲୁକ 11:29–32)
38 #
ମାତିଉ 16:1; ମାର୍କ 8:11; ଲୁକ 11:16 ଆଇ'ତୁନ୍ବେଲା ନିୟମ୍ ଅମାକ୍ରେମେ ମାରି ପାରୁସିଦଲ୍ନା ରେମଲେ ଆ'ଇରସୁଗ ଆଜିସୁଲା ସୁନ', “ଅ ଗୁରୁ ନେଇ ନନ୍କୁରୁଂ କାବାକାବା ଡିନ୍ଡେମ୍ବାଇ'ନା ମୁଇ ସିନ ଜୁଜୁପୁଲେଇ ମୁନ୍ ଡେଂଗୁତୁନେଇ” ଡ'ସେକ୍ ସୁନ' । 39#ମାତିଉ 16:4; ମାର୍କ 8:12ସା' ଜିସୁଲା ଆମା'ଏ ସୁନ', “ପେ ଅବୁଦି ଅଲିରାକ୍ବାଇ' ମାରି ଆମାପ୍ରୁ ମମାନ୍ବାର୍ବାଇ' ରେମଲେ! ମା ପେ କାବା ଡିନ୍ଡେମ୍ବାଇ'ନା ସିନ ଜୁଜୁପୁଲେଇ ମୁନ୍ ଡେଂଗୁତୁପେ ଇ? ମାତର୍ ଆବାବବାଦି ଆଜୁନସ୍ଲା ମାପ୍ରୁ ମା ଡେମ' ଗୁତୁନ୍ ସିନକୁରୁଂ ମାରି ପାଲ୍ ମାଏସା ସିନ ଆପେ ଆ'ସୁଇ'ତ । 40ମାସା'ଡ'ନା ଜୁନସ୍ଲା ମି ମୁନା' ଆ'ଡଂନା ସୁଲ'ଇ ବିତ୍ରେ ତିନ୍ଦିନ୍ ସିମି'ଇ ତିନ୍ଦିନ୍ ତୁମୁଂଗ ଡୁକୁ, ଡୁ'ତୁନ୍ସୁଗ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁସା ଦର୍ତନିନା ବିତ୍ରେ ତିନ୍ଦିନ୍ ସିମି'ଇ ତିନ୍ଦିନ୍ ତୁମୁଂଗ ଡୁତା । 41ମାପ୍ରୁ ଆରେମଲେ ବିସାର୍ନା ଡିନ୍ଡେମ୍ବେଲା ନିନିବି ଉଂଗମ୍ନା ରେମଲେ ଆ'ନ୍ନା ରେମଲେବୁରଂ ତିରେ ତଂସେକ୍ କୁନୁଂଏଁ ବୁଲ୍କାମ୍ ଡେମ'ତା ଡ'ସେକ୍ ସାକି ସୁନ୍ତ । ମାସା'ଡ'ନା ଇନ୍ତେକନ୍ଡେକ୍ ଡୁକୁନୁଂ ବାବବାଦି ଜୁନସ୍ଲା ସୁନ'କୁନୁଂ ତୁମ' ଅଂଅଁ'ସେକ୍ ଗୁତୁନ୍ ଉଂଗମ୍ରେମ୍ ପାପ୍କାମ୍ ଡେମ'କୁନୁଂ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁଗା' । ମାତର୍ ଜୁ, ନିଂ ଆ'ନା ଜୁନସ୍ନାକୁରୁଂ ମୁନା' ରେମ ଆକେ ଡୁତିଂସା'ଏସା ପେ ନିଂନା ତୁମ' ଆଅଂତୁପେ । 42ମାପ୍ରୁ ଆରେମଲେ ବିସାର୍ନା ଡିନ୍ଡେମ୍ବେଲା ଗୁରାଇ'ସିଂକୁରୁଂନା ରାଜାକୁଇ' ଆ'ନ୍ନା ରେମଲେବୁରଂ ତିରେ ତଂସେକ୍ କୁନୁଂଏଁ ବୁଲ୍କାମ୍ ଡେମ'ତା ଡ'ସେକ୍ ସାକି ସୁନ୍ତ । ମାସା'ଡ'ନା ଇନ୍ତେକନ୍ଡେକ୍ ସଲମନ୍ ରାଜାଲା ଅବୁଦି ବୁଦିଗିୟାନ୍ବାଇ'ସା' ମାଇନା ତୁମ' ଅଂପୁଲେଇ ଗୁତୁନ୍ ରାଜାକୁଇ' ଅବୁଦି ସୁଲୁଂରାଜିକୁରୁଂ ମାଇନ୍ବକ୍ ସା'କୁ । ମାତର୍ ନିଂ ଆ'ନା ସଲମନ୍କୁରୁଂ ମୁନା' ରେମ ଆକେ ଡୁତିଂସା'ଏସା ପେ ନିଂନା ତୁମ' ଆଅଂତୁପେ ।”
ମୁଇନ୍ଡାନ୍ବକ୍ ବୁତ୍ ମାରି ଆନ୍ଡେଇଁଡେନ୍
(ଲୁକ 11:24–26)
43“ଆମୁଇନ୍ଡା ଅଲିରାକ୍ବାଇ' ବୁତ୍ ସବ'କୁନୁଂ ମାଇନ୍କୁରୁଂ ତୁର୍ସେକ୍ ବାସାପୁଲେଇ ଡାଗ୍ ମଡୁକୁବାଇ' ତାନ୍ବକ୍ ଆପାଲ୍ ମୁଇନ୍ଡା ତୁର'ତୁର' ବୁଲ୍ତ । ମାଇ ତୁର'ତୁର'ସେକ୍ ଆବାଂଗା' ଡ'ନା ନିଂ ଆମ୍ବ' ମୁଲ୍ ଡୁକୁନିଂ ଗୁତୁନ୍ ଡିଂଅଁବକ୍ଉ ଉଇତିଂ ଡ'ସେକ୍ ଗୁତୁନ୍ ରେମନ୍ବକ୍ ମାରି ଆନ୍ଡେଇଁସେକ୍ ସାପ୍ତା । 44ମାଇ ଆନ୍ଡେଇଁ ସାକ୍ସେକ୍ ଜୁଲ'ନା ଗୁତୁନ୍ ଡିଂଅଁ ବଲ୍ଟା ରିକ୍ତାଂଅଁ'ସୁବ୍ଡାଗ'ସେକ୍ ଗୁଲାଇ ଅ'ରଇଁୟ'ସେକ୍ ମି ସରଉ ଡୁତା, ଡୁ'ତୁନ୍ସୁଗ ଗୁତୁନ୍ ଡୁକୁନୁଂ ମାଇ ଜୁତ । 45ସା' ଗୁତୁନ୍ ବୁତ୍ ଉଇସେକ୍ ମାଇନ୍କୁରୁଂ ଅବୁଦି ଅଲିରାକ୍ବାଇ' ସାତ୍ଟା ବୁତ୍ଲେବକ୍ ୱାୟ' ରିଂସେକ୍ ମା'ଏ ଗୁଲାଇର ଗୁତୁନ୍ ରେମନା ଞେରିବକ୍ ଗାଇସେକ୍ ଆତା ବାସାତା । ସା' ଗୁତୁନ୍ ରେମ ମୁଲ୍ ମି ଡୁକୁ ଗୁତୁନ୍କୁରୁଂ ଆ'ନା ମାଇ ଅଦିକ୍ ଅଲିରାକ୍ବାଇ' ଡେଂଉଇତା । ଆ'ନ୍ ଜୁଲିନା ଅଲିରାକ୍ବାଇ' ରେମଲେବକ୍ସା ଡୁ'ତୁନାଉ ଡେନ୍ତା” ଡ'ସେକ୍ ଜିସୁଲା ସୁନ' ।
ଜିସୁନା ୟଂ ମାରି ବୁୟାଂଏଁ
(ମାର୍କ 3:31–35; ଲୁକ 8:19–21)
46ଜିସୁଲା ରେମଲେବୁରଂ ଅଇଁୟ'ସେକ୍ ଲେଇ'କୁନୁଂବେଲା ମାଇନା ୟଂ ମାରି ବୁୟାଂଏଁ ସାକ୍ସେକ୍ ମାଇବୁରଂ ଅଇଁନ୍ତୁନେଇ ଡ'ସେକ୍ ବାଇରି ତଂଗା' । 47ସା' ମୁଇନ୍ଡା ଆଜିସୁଲା ସୁନ' “ପେଇଁଜଂ ମାରି ପେନ୍ ବୁୟାଂଏଁ ନବୁରଂ ଅଇଁନ୍ତୁନେଇ ଡ'ସେକ୍ ବାଇରି ତଂଗୁତା” ଡ'ସେକ୍ ସୁନ' । 48ସା' “ଜା ନିଂନା ୟଂ? ମାରି ଜା ନିଂନା ବୁୟାଂଏଁ?” ଡ'ସେକ୍ ମାଇ ଆମାଇ ଅ'ଗଁସ୍ଲା'ଗା' । 49ମାରି ମାଇ ଆସିସ୍ୟଲେ ଅସୁୟ'ସେକ୍ ସୁନ', “ଜୁ, କୁନୁଂଏଁଉ ନିଂନା ୟଂ ମାରି ନିଂନା ବୁୟାଂଏଁ । 50ମାସା'ଡ'ନା ସରଗ୍ବକ୍ ଡୁକୁନୁଂ ନେମ୍ବାନା ମୁନ୍ସୁଗ ଜାଜା କାମ୍ ଡେମ'ତା ମା'ଏଉ ନିଂନା ବୁୟାଂଏଁ ତୁନାଲେ ମାରି ମା'ଏଉ ନିଂନା ୟଂ” ଡ'ସେକ୍ ସୁନ' ।
Currently Selected:
ମାତିଉ 12: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
