ମାତିଉ 4
4
ସଇତାନ୍ ଆଜିସୁଲା ପରିକା ଡିନ୍ଡେମ୍ଡେନ୍
(ମାର୍କ 1:12–13; ଲୁକ 4:1–13)
1 #
ଏବ୍ରି 2:18; 4:15 ତିର୍ଗି' ସଇତାନ୍ ଆଜିସୁଲା ପରିକା ଡେମେଇ' ଡ'ସେକ୍ ପବିତ୍ର ଆତ୍ମା ଆଜିସୁଲା ଟାଂରାବାଟା ପାଦାବକ୍ ରିଂଅଁ' ଉଇଗା' । 2ସା' ସାଲିସ୍ଦିନ୍ ସିମି'ଇ ସାଲିସ୍ଦିନ୍ ତୁମୁଂଗ ଜିସୁଲା ଆତା ଆଂଡାଗ୍ ଡୁକୁ । ସା' ତିର୍ଗି' ଆମାଇ କୁଡୁଗା' । 3ଆଇ'ତୁନ୍ବେଲା ପରିକା ଡିନ୍ଡେମା ଆମାଇ ପରିକା ଡିନ୍ଡେମ୍ପୁଲେଇ ମାଇନା ଉନ୍ତୁ' ସାକ୍ସେକ୍ “ନ ମାପ୍ରୁନା ଉଁ'ଉଁ ଡ'ନା ଆକେନ୍ ବୁରେଲେ ରୁଟି ଏଲା ଡ'ସେକ୍ ସୁଁ” ଡ'ସେକ୍ ସୁନ' ।
4ମାତର୍ ଜିସୁଲା ଆମାଇ ସୁନ', “ରେମଲେ ରୁଟିଉ ସୁମ'ସେକ୍ ଆବୁରତା, ମାତର୍ ମାପ୍ରୁ ସୁନ'କୁନୁଂ ତୁମ' ସବ'ନା ରେମଲେ ବୁରତା ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା” ଡ'ସେକ୍ ସୁନ' ।
5ତିର୍ଗି' ସଇତାନ୍ ଆମାଇ ଜିଉଦିରେମଲେନା ପବିତ୍ର ଉଂଗମ୍ ଡ'କୁନୁଂ ଜିରୁସାଲମ୍ ମୁନା'ଉଂଗମ୍ବକ୍ ରିଂଅଁ' ଉଇସେକ୍ ମନ୍ଦିର୍ନା ଅବୁଦି ତି'ୟୁର୍ବାଇ' ବାଗ୍ବକ୍ ଅ'ତନ'ସେକ୍ ଆମାଇ ସୁନ', 6“ନ ମାପ୍ରୁନା ଉଁ'ଉଁ ଡ'ନା ଇଂକେକୁରୁଂ ଆଲୁଂ ଅପ'ଡା । ମାସା'ଡ'ନା,
‘ଆନ ବଲ୍ ଜୁଜୁପୁଲେଇ ମାପ୍ରୁ ଆମାଇନା ଦୁତଲେ ସୁନ୍ତ ।
ମାରି ନନା ତିକ୍ସୁଂ ଆବୁରେ ଆତିପ୍ରବେଇ' ଡ'ସେକ୍
ମା'ଏ ମା'ଏନା ତିତିବକ୍ ଆନ ତାନ୍ଡାଲ' ରିଂତା’ ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା” ଡ'ସେକ୍ ସୁନ' ।
7ସା' ଜିସୁଲା ଆମାଇ ସୁନ', “‘ନ ଆନନା ପ୍ରବୁ ଆମାପ୍ରୁ ପରିକା ଆଡେମ'’ ଡ'ସେକ୍ସା ମାପ୍ରୁନା ଉଲାକ୍ବକ୍ ଲେକ୍ଲ'ତା” ଡ'ସେକ୍ ସୁନ' ।
8ମାରି ମୁସ ସଇତାନ୍ ଆଜିସୁଲା ଅବୁଦି ତିଉର୍ବାଇ' ମୁଇ କୁନ୍ଡା ବାଗ୍ବକ୍ ରିଂଅଁ' ଡା'ଇ'ଗା' । ରିଂଅଁ' ଡା'ଇ'ସେକ୍ ଗୁଲାଇ ଦେସ୍ଦୁନିଆ ମାରି ଆତା ଡୁକୁନୁଂ ଗୁଲାଇ ବଲ୍ବଲ୍ଟାବାଇ' ମାମା ଡୁତା ଗୁତୁନ୍ ଗୁଲାଇନା ମଇମା ଆମାଇ ଅସୁୟ' । 9ଅସୁୟ'ସେକ୍ ସଇତାନ୍ ଆଜିସୁଲା, “ନ ଆନିଂ ଏନ୍ଡିକ୍ସେକ୍ ସୁନ୍ଡ୍ରତୁନ ଡ'ନା ନିଂ କେନ୍ ଗୁଲାଇ ଆନ ବେ'ତିଂ” ଡ'ସେକ୍ ସୁନ' ।
10ସା' ଜିସୁଲା ଆମାଇ, “ଅ ସଇତାନ୍, ନ ନିଂକୁରୁଂ ସୁଲୁଂ ଡୁଂଆଁ, ମାସା'ଡ'ନା ଆନନା ପ୍ରବୁ ଆମାପ୍ରୁଉ ନ ସୁନ୍ଡ୍ର ଡୁତା ମାରି ଆମାଇଉ ସେବା ଡିନ୍ଡେମ୍ ଡୁତା ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା” ଡ'ସେକ୍ ସୁନ' । 11ଉନ୍ତା ସଇତାନ୍ ଆଜିସୁଲା ଅନ୍ତୁର' ଡୁଂଗା', ସା' ମାପ୍ରୁନା ଦୁତଲେ ସାକ୍ସେକ୍ ଆମାଇ ସାନ୍ଡୁଂଅଁ' ।
ଜିସୁଲା ଆରେମଲେ ମାପ୍ରୁନା ତୁମ' ଅମାକ୍ ମୁଲାଇବାର୍ଡେନ୍
(ମାର୍କ 1:14–15; ଲୁକ 4:14–15–31)
12 #
ମାତିଉ 14:3; ମାର୍କ 6:17; ଲୁକ 3:19,20 ଆଜଅନ୍ଲା ବନ୍ଦିବକ୍ ସୁରୁଂଅଁ'ତା ଡ'ସେକ୍ ଅଂଅଁ'ସା' ଜିସୁଲା ଗାଲିଲି ଜିଲାବକ୍ ମାରି ଆନ୍ଡେଇଁଗା' । 13#ଜଅନ୍ 2:12ଆନ୍ଡେଇଁସେକ୍ ନାଜରିତ୍ ଉଂଗମ୍ବକ୍ ସା'ଗା'; ମାତର୍ ଗୁତୁନ୍ ଉଂଗମ୍ ଅନ୍ତୁର'ସେକ୍ କପର୍ନାଉମ୍ ଉଂଗମ୍ବକ୍ ଉଇସେକ୍ ଆତା ଡୁକୁ । କପର୍ନାଉମ୍ ଉଂଗମ୍ ଡ'ନା ସବୁଲୁନ୍ ମାରି ନପ୍ତାଲି ଡ'କୁନୁଂ ଇମ୍ବାରୁ କୁଲ୍ନା ରେମଲେନା ଉନ୍ତୁ' ଡୁକୁନୁଂ ଗାଲିଲି ସମ୍ଦର୍କିନ୍ଡାକ୍ ପାଲି ଡୁକୁ । 14ଜିସୁଲା ଗୁତୁନ୍ ଉଂଗମ୍ବକ୍ ଡୁକୁସା' ଇନ୍ତେକନ୍ଡେକ୍ ବାବବାଦି ଜିସାୟଲା ସୁନ'କୁନୁଂ ଆ'ନା ସତ୍ ଡେଂଉଇଗା' । ଆମାଇ ମାପ୍ରୁ ସୁଁ ଡ'ସା' ମାଇ ମା ଡ' ସୁନ'କୁ ଡ'ନା:
15“ସବୁଲୁନ୍ନା ଉଁ'ଉଁନେ ବୁସାଁନେ ମାରି ନପ୍ତାଲିନା ଉଁ'ଉଁନେ ବୁସାଁନେ ଡୁକୁନୁଂ ଦେସ୍ ଗୁଲାଇ
ଗାଲିଲି ଜିଲାନା ସମ୍ଦର୍କିନ୍ଡାକ୍ ପାଲି ମାରି ଜର୍ଦନ୍ କିନ୍ଡାକ୍ ଇନ୍ସିପାଟ୍ସା ଡୁତା ।
ମା'ଏ ଅବୁଦିର ଜିଉଦିରେମଲେ ଆରାକ୍ ।
16ମା'ଏ ଗୁଲାଇର ଞୁର୍ବକ୍ ଡୁକୁନୁଂସୁଗ ଡୁକୁ
ମାତର୍ ଆ'ନା ମା'ଏ ମୁନା'ବାଇ' ତାରା' ବାଂଗୁତା ।
ମାରି ମା'ଏ ଗୁଲାଇର ଗୁଇ'କୁନୁଂସୁଗ ଡୁକୁ
ମାତର୍ ଆ'ନା ମା'ଏ ଜିବନ୍ ବିବେ'ନା ତାରା' ବାଂଗୁତା ।”
17 #
ମାତିଉ 3:2
ଉନ୍ତ୍ବାଂସା' ଜିସୁଲା ମାପ୍ରୁନା ତୁମ' ସୁଁସୁ ମୁଲାୟ' । ମାଇ ସୁନ' “ସରଗ୍ରାଜି ଉନ୍ତୁ' ସା'ଗା'ସା' ପେ ଗୁଲାଇର ପାପ୍କାମ୍ ଅଲିରାକ୍କାମ୍ ଗୁଲାଇ ତର୍ମୁଲୁଇ' ଅନ୍ତୁର'ସେକ୍ ମାପ୍ରୁନ୍ବକ୍ ଆନ୍ଡେଇଁୟା” ଡ'ସେକ୍ ସୁନ' ।
ଜିସୁଲା ଆସିସ୍ୟଲେ ଆ'ଇରବକ୍ସୁଗ ସିରେଡେନ୍
(ମାର୍କ 1:16–20; ଲୁକ 5:1–11; ଜଅନ୍ 1:35–42)
18ଜିସୁଲା ଗାଲିଲି ସମ୍ଦର୍କିନ୍ଡାକ୍ ପାଲି ଉଇଡେଂକୁନୁଂବେଲା ପିତର୍ ଡ'ସେକ୍ ଅ'ଇମିଲ'କୁନୁଂ ସିମନ୍ଲା ମାରି ମାଇନା ବୁୟାଂ ଆନ୍ଦ୍ରିୟଲା ମାଇପା ଇମ୍ବାୟ ବୁନୁୟାଂ ଜାଲ୍ ରାନ୍ଡେ ଡେଂକୁନୁଂ ମାଇ ଜୁଲ' । ମାଇପା ଇମ୍ବାୟ ବୁନୁୟାଂ ଇସାଉ ଆ'ଡଂ ସୁଂଅଁ'ସେ'ଗା ସୁମ'ବୁରକୁ । 19ଜିସୁଲା ଆମାଇପା ସୁନ' “ପା ଲ, ନିଂବୁରଂ ସା'ବା । ପା ଆ'ନ୍ପନ୍ତେକ୍ ଆ'ଡଂ ସବ'ପା ମାତର୍ ଆ'ନାବାଂସା' ଆରେମଲେ ନିଂବକ୍ ୱାୟ' ଇନ୍ଡ୍ରିଂପୁଲେଇ ଅମାକ୍ତିଂ” ଡ'ସେକ୍ ସୁନ' । 20ସା' ମାଇପା ଆ'ଇକୁ ଜାଲ୍ ଅଡକ୍ସୁଂଅଁ'ସେକ୍ ଆମାଇ ତେଂଗି' ଉଇଗା' ।
21ମାରି ମାଇ ଇ'କି ଡଗ୍ରିତା ଉଇଗା'ସା' ଆଜେବଦିନା ଉଁ'ଉଁପା ଆଜାକୁବ୍ଲା ମାରି ଆଜଅନ୍ଲା ଆମାଇପା ବୁନୁୟାଂବକ୍ ଆତା ସମ୍ଦର୍କିନ୍ଡାକ୍ ପାଲି ବାଡେଇଁବୁରଂ ମୁଇ ଡଂଗା ବାଗ୍ବକ୍ ଲେଇ'ସେକ୍ ଜାଲ୍ ସ'କୁ ଡେଂକୁନୁଂ ଜୁଲ' । ସା' ଜିସୁଲା ଆମାଇପାସା ନିଂବୁରଂ ସା'ବା ଡ'ସେକ୍ ୱାୟ' । 22ୱାୟ'ସା' ମାଇପା ଆତୁନ୍ ଡଂଗା ମାରି ଆବାଡେଇଁସା ଆ'ଇକୁ ଅଡକ୍ସୁଂଅଁ'ସେକ୍ ଆଜିସୁଲା ତେଂଗି' ଉଇଗା' ।
ଜିସୁଲା ଆସିରେମ୍ ବଲ୍ ଡିନ୍ଡେମ୍ଡେନ୍
(ଲୁକ 6:17–19)
23 #
ମାତିଉ 9:35; ମାର୍କ 1:39 ଜିସୁଲା ଜିଉଦିରେମଲେନା ପାର୍ତନା ଡିଂଅଁବକ୍ ଆରେମଲେ ମାପ୍ରୁନା ବଲ୍କବର୍ ଅମାଗ' ମାରି ମାପ୍ରୁ ରାଜି ଅ'ରଇଁୟ'ସେକ୍ ଆରେମଲେ ମି ସାସନ୍ ଡେମ୍ତ ଡ'ସେକ୍ ବଲ୍କବର୍ ସୁନ' ମାରି ମାମା ପାଲ୍ପାଲ୍ ସିକୁନୁଂରେମ୍ବକ୍ ଆଗୁଲାଇର ମାଇ ବଲ୍ ଡେମ'ସେକ୍ ଗାଲିଲି ଜିଲାବକ୍ ଗୁଲାଇ କୁନ୍ଡା ବୁଲ୍ଲ'କୁ । 24ସା' ଜିସୁଲା ଡେମ'କୁନୁଂ କାମ୍ ସୁରିଆ ଦେସ୍ବକ୍ ଗୁଲାଇ କୁନ୍ଡା ଉନୁଂଗା' । ସା' ପାଲ୍ପାଲ୍ ସି ଡୁକୁନୁଂ ରେମଲେବକ୍ ମାରି ବୁତ୍ ସବ'କୁନୁଂ ରେମଲେବକ୍, ଗୁଇଲିକ୍ସେକ୍ ଡୁକୁନୁଂ ରେମଲେବକ୍ ମାରି ଗୁଇ'ସାର୍ତିଲ' ଗୁଇ'ସାର୍ସୁଂଅଁ' ଡୁକୁନୁଂ ରେମଲେବକ୍ ଡି'କେନା ପାଲ୍ପାଲ୍ ସିକ୍ସେକ୍ ଡୁକୁନୁଂ ରେମଲେବକ୍ ବଲ୍ ଡିନ୍ଡେମ୍ପୁଲେଇ ଜିସୁନ୍ବକ୍ ରିଂଅଁ' । ରିଂଅଁ'ସା' ମାଇ ଆମା'ଏ ବଲ୍ ଡେମ' । 25ଗାଲିଲିନା, ଦେକାପଲିନା, ଜିରୁସାଲମ୍ନା, ଜିଉଦା ଜିଲାନା ରେମଲେ ମାରି ଜର୍ଦନ୍ କିନ୍ଡାକ୍ ଇନ୍ସିପାଟ୍ ଡୁକୁନୁଂ ଉଂଗମ୍ନା ରେମଲେସା ଅବୁଦିର ଆମାଇ ତେଂଗି' ଉଇଗା' ।
Currently Selected:
ମାତିଉ 4: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
