ମାତିଉ 3
3
ଜିସୁଲା ସୁସାପ୍ଡେନ୍ ଡ'ସେକ୍ ଜଅନ୍ଲା ଆରେମଲେ ସୁଁସୁଡେନ୍
(ମାର୍କ 1:1–8; ଲୁକ 3:1–18; ଜଅନ୍ 1:6–8,15–34)
1ଉନ୍ତା ଆରେମଲେ ବାପ୍ତିସ୍ମା ବିବେ'ଡା ଜଅନ୍ଲା ସାକ୍ସେକ୍ ଜିଉଦା ଜିଲାନା ଟାଂରାବାଟା ପାଦାବକ୍ ତଂସେକ୍ ଆରେମଲେ ମାପ୍ରୁନା ତୁମ' ସୁଁସୁ ମୁଲାୟ' । 2#ମାତିଉ 4:17; ମାର୍କ 1:15ମାଇ ମା ଡ' ସୁନ' ଡ'ନା “ସରଗ୍ରାଜି ଉନ୍ତୁ' ସା'ଗା'ସା' ପେ ଗୁଲାଇର ପାପ୍କାମ୍ ଅଲିରାକ୍କାମ୍ ଗୁଲାଇ ତର୍ମୁଲୁଇ' ଅନ୍ତୁର'ସେକ୍ ପେ ମାପ୍ରୁନ୍ବକ୍ ଆନ୍ଡେଇଁୟା” ଡ'ସେକ୍ ସୁନ' । 3ବାବବାଦି ଜିସାୟଲା ଜଅନ୍ନା ବିସୟ ଡି'କେନ୍ ସୁନ'କୁ, ମା ଡ' ସୁନ'କୁ ଡ'ନା:
“ମୁଇନ୍ଡା ରେମ ଟାଂରାବାଟା ପାଦାବକ୍ ତଂସେକ୍ ଡକ୍ତି'ତା ସୁଁସୁଡେନ୍ ।
ମାଇ ମା ଡ' ସୁନ'ତା ଡ'ନା ‘ପ୍ରବୁ ସୁସାପ୍ପୁଲେଇ କୁରୁଂ ଅ'ରଇଁ,
ମାଇପୁଲେଇ କୁରୁଂ ଅସୁସାଡ' ବୁଂ'’ ଡ'ସେକ୍ ଆରେମଲେ ସୁନ'ତା” ଡ'ସେକ୍ ସୁନ'କୁ ।
4ଜଅନ୍ଲା ଉନ୍ଟ୍ନା ଲୁଇଁବୁରଂ ଅ'ରଇଁୟ'କୁନୁଂ ସକାବାନ୍ଦା ଅଲୁ'କୁ ମାରି ଇସାବୁରଂ ଅ'ରଇଁୟ'କୁନୁଂ ବେଲ୍ଟୁ ଇନ୍ସାପ୍ବକ୍ ତୁକୁ । ଗୁର୍ତାଂଗୁଲାଇ'ସୁଗବାଇ' ଡୁକୁନୁଂ ମାରି ବୁର୍ଲୁକ୍ନା ଞୁଡାକ୍ ମାଇ ସୁମ'ସେକ୍ ଡୁକୁ । 5ସା' ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂ ରେମଲେ ମାରି ଜିଉଦା ଜିଲାନା ରେମଲେ ଗୁଲାଇର ମାରି ଜର୍ଦନ୍ କିନ୍ଡାକ୍ନା ଉନ୍ତୁ'ତ'ନାଂ ଡୁକୁନୁଂ ଉଂଗମ୍ନା ରେମଲେ ଗୁଲାଇର ଜଅନ୍ଲା ସୁନ'କୁନୁଂ ତୁମ' ଅଂପୁଲେଇ ମାଇନ୍ବକ୍ ଉଇଗା' । 6ଉଇସେକ୍ ମୁଇନ୍ଡା ମୁଇନ୍ଡା ମା'ଏ ପାପ୍କାମ୍ ଡେମ'କୁନୁଂ ଗୁଲାଇ ଆମାପ୍ରୁ ସୁନ' । ସୁନ'ସା' ଜଅନ୍ଲା ଆମା'ଏ ଜର୍ଦନ୍ କିନ୍ଡାକ୍ବକ୍ ବାପ୍ତିସ୍ମା ବେଡ' ।
7 #
ମାତିଉ 12:34; 23:33 ମାତର୍ ଅବୁଦିର ପାରୁସିଦଲ୍ନା ରେମଲେ ମାରି ସାଦୁକି ଦଲ୍ନା ରେମଲେ ଆତା ବାପ୍ତିସ୍ମା ଇନ୍ଡ୍ରିଂପୁଲେଇ ଜଅନ୍ବକ୍ ସୁସାପ୍ଡେଂକୁନୁଂ ଜୁଲ'ସେକ୍ ଜଅନ୍ଲା ଆମା'ଏ ସୁନ', “ଅ ରେମଲେ, ପେ ଡ'ନା ଅବୁଦି ବିସ୍ ଡୁକୁନୁଂ ବୁବୁ'ନା ଉଁ'ଉଁନେସୁଗ ! ଆକେ ସାକ୍ସେକ୍ ବାପ୍ତିସ୍ମା ରିଂନା ମାପ୍ରୁ ଆପେ ଡନ୍ଡ୍ ଆବେ'ତ ଡ'ସେକ୍ ଜା ଆପେ ସୁନ'ସା' ପେ ଆକେ ଉର' ସା'ଗୁତୁପେ? 8ପେ ପାପ୍କାମ୍ ଅଲିରାକ୍କାମ୍ ଗୁଲାଇ ଅଡକ୍ସୁଂଅଁ'ସେ'ଗା ମାପ୍ରୁନ୍ବକ୍ ଆନ୍ଡେଇଁଗୁତୁପେ ଡ'ନା ପେ ନିଜେ ବଲ୍କାମ୍ ଡେମ'ସେକ୍ ଅସୁଇ'ଆର୍ । 9#ଜଅନ୍ 8:33ମାରି ନେଇ ଅବ୍ରାଆମ୍ନା ଉଁ'ଉଁନେସା' ମାପ୍ରୁ ଆନେଇ ଡନ୍ଡ୍ ଆବେ'ତ ଡ'ସେକ୍ ପେ ଆଏତ୍ଗା' । ମାସା'ଡ'ନା ଅବ୍ରାଆମ୍ଲାପୁଲେଇ ଉଁ'ଉଁ ଦର୍କାର୍ ଡ'ନା ଆତୁନ୍ ବୁରେଲେସା ମାପ୍ରୁ ଅବ୍ରାଆମ୍ନା ଉଁ'ଉଁନେ ଅ'ଏ ଗଂତା ଡ'ସେକ୍ ନିଂ ଆପେ ସୁନ'ତିଂ । 10#ମାତିଉ 7:19ଜୁ, ମୁଇନ୍ଡା ଟାଂଗିୟା ସକ୍ସେକ୍ ଆସୁଲପ୍ନା ସୁନୁମ୍ବକ୍ ଆ'ନାଉ ସେପ୍ତିଂ ଡ'ସେକ୍ ଜାଗ୍ଲ'ତା; ଇମ୍ବ'ନ୍ ସୁଲପ୍ ବଲ୍ଟା ଆସୁ'ଉତା ଆତୁନ୍ ସୁଲପ୍ ଗୁଲାଇ ଗୁୟ'ସେକ୍ ବାଲ'ସୁଂତ ।”
11“ପେ ପାପ୍କାମ୍ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁଗୁତୁନେଇ ଡ'ସେକ୍ ଅସୁଇ'ପୁଲେଇ ନିଂ ଆପେ ଡାଗ୍ବୁରଂ ବାପ୍ତିସ୍ମା ବିବେ'ଡେନ୍ତିଂ । ମାତର୍ ମୁଇନ୍ଡା ନିଂକୁରୁଂ ଅବୁଦି ବପୁବାଇ' ଆନିଂ ତେଂଗି' ସୁସାପ୍ଡେନ୍ତା । ମାଇ ଅବୁଦି ମୁନା'ରେମ୍ସା' ନିଂ ମାଇନା ମୁଇନ୍ଡା ଗତିରେମ୍ସୁଗ ଡୁକୁକ୍ସେକ୍ସା ମାଇନା ପନ୍ଡଇଁ ରିଂ ବିବେ' ଆଗଂତିଂ । ମାଇ ଆପେ ପବିତ୍ର ଆତ୍ମାବୁରଂ ମାରି ସୁଂଅଁବୁରଂ ବାପ୍ତିସ୍ମା ବେ'ତ । 12ମୁଇନ୍ଡା ବୁରଂରେମ୍ ମାଇନା ତିତିବକ୍ ଡୁକୁନୁଂ କିଁସୁପ୍ବୁରଂ ତିଲିମ୍ଡାଗ୍ବକ୍ ଏର'ସେ'ଗା ଗମ୍ ମାରି ଲୁଂ ଗୁଲାଇ ପାଲ୍ପାଲ୍ ଡିନ୍ଡେମ୍ସୁଗ ମାଇ ଡେମ୍ତ । ଡୁ'ତୁନ୍ ଡେମ'ସେକ୍ ବଲ୍ଟା ଗମ୍ ମାଇନା ଡାସୁଂବକ୍ ବୁଂତ ମାରି ଗୁତୁନ୍ ଲୁଂ ଗୁଲାଇ ମଲିପ୍ସାର୍ବାଇ' ସୁଂଅଁବକ୍ ବାଲ'ବେ'ତ ।”
ଜିସୁଲା ବାପ୍ତିସ୍ମା ଇନ୍ଡ୍ରିଂଡେନ୍
(ମାର୍କ 1:9–11; ଲୁକ 3:21–22; ଜଅନ୍ 1:31–34)
13ଆଇ'ତୁନ୍ବେଲା ଜିସୁଲା ଜଅନ୍କୁରୁଂ ବାପ୍ତିସ୍ମା ଇନ୍ଡ୍ରିଂପୁଲେଇ ଗାଲିଲି ଜିଲାକୁରୁଂ ଜର୍ଦନ୍ କିନ୍ଡାକ୍ବକ୍ ସା'ଗା' । 14ମାତର୍ ଜଅନ୍ଲା ଆମାଇ, “ନିଂ ନନ୍କୁରୁଂ ବାପ୍ତିସ୍ମା ଇନ୍ଡ୍ରିଂଡୁତା, ନ ମାସା' ନିଂବକ୍ ଇନ୍ଡ୍ରିଂପୁଲେଇ ସା'ଗୁତୁନ?” ଡ'ସେକ୍ ପିଟାଇବାର୍ପୁଲେଇ ସେସ୍ଟା ଡେମ' । 15ସା' ଜିସୁଲା ଆମାଇ ସୁନ' “ନ ଆ'ନା ଆନିଂ ଡେମ୍, ନାଂ ଡୁ'ତୁନା ଡେମ'ନାଉ ନାଂପୁଲେଇ ବଲ୍ ଡେନ୍ତା, ମାସା'ଡ'ନା ମାପ୍ରୁନା ମୁନ୍ ମା ଗୁତୁନ୍ ଗୁଲାଇ ଡୁ'ତୁନ୍ଉ ଡିନ୍ଡେମ୍ ଗଂତୁନାଂ” ଡ'ସେକ୍ ସୁନ' । ସା' ଜଅନ୍ଲା ରାଜି ଡେଂଗା' । 16ଜିସୁଲା ବାପ୍ତିସ୍ମା ରିଂସେକ୍ ସେଟ୍ଟ' ଡାଗ୍କୁରୁଂ ତୁର୍ଗା' । ଆଇ'ତୁନ୍ବେଲା କି'ତୁଂ ରୁ'କୁନୁଂ ମାରି ମାପ୍ରୁନା ଜିବନ୍ ମୁଇ ପାରାସୁଗ ଜର୍ସେକ୍ ମାଇନ୍ ବାଗ୍ବକ୍ ଲିଲେଇ' ଡେଂକୁନୁଂ ମାଇ ଜୁଲ' । 17#ମାତିଉ 12:18; 17:5; ମାର୍କ 1:11; ଲୁକ 9:35ମାରି “କେନା ନିଂ ଅବୁଦି ଲବ୍କୁନୁଂ ନିଂନା ଉଁ'ଉଁ, ଆମାଇ ଜୁଲ'ସେକ୍ ନିଂ ଅବୁଦି ସାର୍ଦା ଡେଂଗୁତିଂ” ଡ'ସେକ୍ କି'ତୁଂକୁରୁଂ ମାପ୍ରୁ ସୁନ'କୁନୁଂସା ଅଂଅଁ' ।
Currently Selected:
ମାତିଉ 3: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
