ମାର୍କ 15
15
ଆଜିସୁଲା ପିଲାତନ୍ବକ୍ ଇନ୍ଡ୍ରିଂଡେନ୍ତା ।
(ମାତିଉ 27:1–2–11–14; ଲୁକ 23:1–5; ଜଅନ୍ 18:28–38)
1 ଇନ୍ଜୁର୍ ପୁରୁଂପୁରୁଂବେଲା ମୁନା'ପୁଜାରିଲେ ନିୟମ୍ ଅମାକ୍ରେମ୍ ମାରି ଜିଉଦିରେମଲେନା ମୁନା'ରେମେ ଗୁଲାଇର ଲେଇ'ସେକ୍ ଆଜିସୁଲା ମି ଡେମ'ନା ଡେନ୍ତା ଡ'ସେକ୍ ଅଇଁୟ' । ଅଇଁୟ'ସେ'ଗା ଆଜିସୁଲା ତୁଲ'ରେଡ'ସେକ୍ ଜିଉଦା ଦେସ୍ନା ମୁନା'ରେମ୍ ପିଲାତନ୍ବକ୍ ରିଂଗା' ।
2ସା' ପିଲାତଲା “ନ ଜିଉଦିରେମଲେନା ରାଜା ଇ?” ଡ'ସେକ୍ ଆଜିସୁଲା ଅ'ଗଁସ୍ଲା'ଗା' । ସା' ଜିସୁଲା,
“ଅଁ'ଅଁ, ନ ସୁନ'କୁନୁଂସୁଗଉ” ଡ'ସେକ୍ ସୁନ' ।
3ମାରି ମୁନା'ପୁଜାରିଲେ ଆପିଲାତଲା ଜିସୁଲା ଅଲିରାକ୍ବାଇ' କାମ୍ ଡେମ' ଡ'ସେକ୍ ସରଉ ଅସୁଇ'ଲଂଗା' । ଅସୁଇ'ଲଂଗା'ସା'ଏସା ଜିସୁଲା ବାସ୍ ଆସାର୍ଲଂତା । 4ସା' ପିଲାତଲା ଆଜିସୁଲା ସୁନ' “ଜୁ ଅଲିରାକ୍ବାଇ' କାମ୍ ଡେମ'ତା ଡ'ସେ'ଗା ରେମଲେ ଆନ ନିନ୍ଦାଲ'ତା । ନ ମାମା ସୁଁସୁ ଡୁତା ଇ?” ଡ'ସେକ୍ ସୁନ' ।
5ସୁନ'ସା'ଏସା ଜିସୁଲା ବାସ୍ ଆସାର୍ଲଂତା । ବାସ୍ ଆସାର୍ଲଂତାସା' ପିଲାତଲା ଜୁଲ'ସେକ୍ କାବା ଡେଂଉଇଗା' ।
ଆଜିସୁଲା ଅଗୁଇ' ଡ'ସେକ୍ ପିଲାତଲା ସୁଁସୁଡେନ୍
(ମାତିଉ 27:15–26; ଲୁକ 23:13–25; ଜଅନ୍ 18:39—19:16)
6ବରସ୍କେ ବରସ୍ ବନ୍ଦି ଡୁକୁନୁଂ ରେମବକ୍ ଆଜାଏସା ନିସ୍ତାର୍ ପରବ୍ବେଲା ଅ'ତୁର' ବେ' ଡ'ସେକ୍ ରେମଲେ ସୁନ'ନା ପିଲାତଲା ଅ'ତୁର' ବେଡ'କୁ । 7ଉନ୍ତା ବାରବ୍ବା ଡ'ସେକ୍ ମୁଇନ୍ଡା ରେମ ଡୁକୁ, ମାଇ ସର୍କାର୍ରେମବୁରଂ ରିମ'କୁନୁଂ ରେମଲେବୁରଂ ମିସ୍ସେ'ଗା ଆଏନ୍ତୁକ୍ର ଅଗୁୟ'ସା' ଆମାଇ ମା'ଏବୁରଂ ଆତା ବନ୍ଦିବକ୍ ବୁଂଅଁ'କୁଗା'। 8ସା' ରେମଲେ ଆପିଲାତଲା “ଇସାଉ ନ ଡେମ'କୁନୁଂସୁଗ ଆମୁଇନ୍ଡା ଅ'ତୁର' ବେ'” ଡ'ସେକ୍ ସୁନ' ।
9ସା' “ଆଜିଉଦିରେମଲେନା ରାଜା ଅ'ତୁର'ବେଡ'ନା ଆପେ ମୁନ୍ କି?” ଡ'ସେକ୍ ପିଲାତଲା ସୁନ' । 10ମାସା'ଡ'ନା ମୁନା'ପୁଜାରିଲେ ଆଜିସୁଲା ଆଂକାର୍ ଡେଂସେ'ଗାଉ ନିଂବକ୍ ରିଂଅଁ'ତା ଡ'ସେକ୍ ପିଲାତଲା ମାଗ'କୁସା' ଡି'କେନା ଅ'ଗଁସ୍ଲା'ଗା' । 11ମାତର୍ ଆଜିସୁଲା ଆରାକ୍ ଆବାରବ୍ବାଲା ଅ'ତୁର' ବେ' ଡ'ସେକ୍ ସୁଁ ଡ'ସେକ୍ ମୁନା'ପୁଜାରିଲେ ଆରେମଲେ ଅ'ଗଁସାମ'କୁଗା' ।
12ସା' ପିଲାତଲା “ଜିଉଦିରେମଲେନା ରାଜା ଡ'ସେକ୍ ଆଜା ପେ ସବ' ରିଂଅଁ'ତୁପେ ଆମାଇ ମା ଡେମ'ନା ଡେନ୍ତା ଡ'ସେକ୍ ପେ ଏତ୍ଗୁତୁପେ?” ଡ'ସେକ୍ ସୁନ' ।
13ସା' “ଆମାଇ କୁର୍ସବକ୍ ଅଡାୟ' ଅଗୁଇ'!” ଡ'ସେକ୍ ଗୁଲାଇର ଡକ୍ତି'ତା କିରକ୍ସେ'ଗା ସୁନ' ।
14ସା' ପିଲାତଲା “ମାସା' ଅଗୁଇ' ଡ'ତୁପେ? ମାଇ ମା ଅଲିରାକ୍ବାଇ' କାମ୍ ଡେମ'ତାସା'?” ଡ'ସେକ୍ ସୁନ' ।
ମାତର୍ ମା'ଏ ଗୁଲାଇର ମାରି ଅବୁଦି ଡକ୍ତି'ତା କିରକ୍ସେକ୍ “ଆମାଇ କୁର୍ସବକ୍ ଅଡାୟ' ଅଗୁଇ'!” ଡ'ସେକ୍ ସୁନ' ।
15ଆରେମଲେ ଅ'ସାର୍ଦାପୁଲେଇ ପିଲାତଲା ଆବାରବ୍ବାଲା ଅ'ତୁର'ବେଡ' । ଇସାବୁରଂ ଗିଗେଇ' ଅ'ରଇଁୟ'କୁନୁଂବକ୍ ଲୁଆ ତୁଲ'ସେକ୍ ଆଜିସୁଲା ପିଲାତଲା ଅବୁଦି ଅବୁଗ' । ଅବୁଗ'ସେକ୍ ଆମାଇ କୁର୍ସବକ୍ ଅଡାଇ' ଡ'ସେକ୍ ବେଡ' ।
ଆଜିସୁଲା ଅ'କିୟାଲିଡେନ୍
(ମାତିଉ 27:27–31; ଜଅନ୍ 19:2–3)
16ସଇନିକଲେ ଆଜିସୁଲା ପିଲାତନା ଡିଂଅଁବକ୍ ଅ'ଗାୟଁ'ସେକ୍ ଆଗୁଲାଇ ସଇନିକଲେ ୱାୟ' । 17ୱାୟ'ସେକ୍ ମା'ଏ ଆଜିସୁଲା ରାଜା ଡ'ସେକ୍ ଅ'କିୟାଲିକ୍ସେକ୍ ମୁଇ କିଲୁଂବେଇଁ ରଂଗବାଇ' ଇମ୍ପ' ଅ'କୁକୁୟ' । ଅ'କୁକୁୟ'ସେକ୍ ଗୁରାଇ'ବୁରଂ ବାଂଟିସୁଗ ଗଲ'କୁନୁଂ ମୁଇ ଆଜିସୁଲା ଅ'ରାଂବଗ'ବେଡ' । 18ମାରି ମା'ଏ ଆମାଇ “ଅ ଜିଉଦିରେମଲେନା ରାଜା, ଆନ ନମସ୍କାର୍” ଡ'ସେକ୍ ଅବୁଦି ଅ'କିୟାଲିଗା' । 19ମା'ଏ ଆମାଇ ଆବ'ବ୍ ବୁ'ଡୁଂବୁରଂ ମାରିମାରି ବୁଗ'ସେକ୍ ଆସାର୍ମ' ବୁଇ'ତୁର'ବେଡ' । ମାରି ମାଇନା ସୁମଂବକ୍ ଏନ୍ଡିକ୍ସେ'ଗା ଅବୁଦି ଅ'କିୟାଲିକ୍ସେ'ଗା ସୁନ୍ଡ୍ରଗା' । 20ଅ'କିୟାଲି ଅ'ଡମ'ସେକ୍ ମା'ଏ ଗୁତୁନ୍ କିଲୁଂବେଇଁ ରଂଗବାଇ' ଇମ୍ପ' ଅ'କୁକୁୟ'କୁନୁଂ ଉରିଗ'ସେକ୍ ଜିସୁନା ଇମ୍ପ' ଅ'କୁକୁୟ'ବେଡ'ସେକ୍ ଆମାଇ କୁର୍ସବକ୍ ଅଗୁଇ'ପୁଲେଇ ରିଂଅଁ' ଉଇଗା' ।
ଆଜିସୁଲା କୁର୍ସବକ୍ ଅଗୁଇ'ଡେନ୍
(ମାତିଉ 27:32–44; ଲୁକ 23:26–43; ଜଅନ୍ 19:17–27)
21 #
ରମିୟ 16:13
ରିଂଅଁ' ଉଇରେମ୍ କୁରିନିୟ ମୁନା'ଉଂଗମ୍ନା ଆସିମନ୍ଲା କୁରୁଂବକ୍ ସୁସାପ୍ଡେଂକୁନୁଂ ଜୁଲ' । ଜୁଲ'ସେ'ଗା ଆଜିସୁଲା ଅଗୁଇ'ପୁଲେଇ ଇନ୍ଡ୍ରିଂ ଡେଂକୁନୁଂ ଗୁତୁନ୍ କୁର୍ସ ଡୁଁ ଡ'ସେକ୍ ସଇନିକଲେ ଆମାଇ ଅ'ଡୁନ' । ଆଲେକ୍ଜାନ୍ଡର୍ ମାରି ରୁପ୍ ଡ'ସେକ୍ ମାଇନା ଇମ୍ବାୟ ଉଁ'ଉଁପା ଡୁକୁ । 22ସଇନିକଲେ ଆଜିସୁଲା ଗଲ୍ଗତା ଡ'ସେକ୍ ମୁଇ ଡାଉବାଇ' କୁନ୍ଡାବକ୍ ରିଂଅଁ' ଉଇଗା' । ଗଲ୍ଗତା ଡ'ନା “କୁରେଇଁକୁଇଁବ'ବ୍ ଜାଗା” ଡ'ସେକ୍ ଅର୍ତ ଡୁତା । 23ଆତା ମା'ଏ ଅଂଗୁର୍ନା ଡାଗ୍ବକ୍ ଗନ୍ଦରସ ଡ'କୁନୁଂ ମୁଇ ସି'ରଂ#15:23 ଗୁତୁନ୍ ସି'ରଂନା ଇମି ଗନ୍ଦରସ ଡ'ସେକ୍ ଡୁତା। ଗୁତୁନ୍ ଇଡ'ନା ଞେରି ଇନ୍ସାପ୍ ସିକୁନୁଂବକ୍ ସି ଉନାତା । ମାୟ'ସେ'ଗା ଆଜିସୁଲା ଇ'ପୁଲେଇ ବେଡ'ସା' ମାଇ ଇନ୍ସାଂଗା' । 24ତିର୍ଗି' ସଇନିକଲେ ଆଜିସୁଲା ଗୁତୁନ୍ କୁର୍ସବକ୍ ଉରନ'ସେ'ଗା କୁନ୍ଟିବୁରଂ ତାଂଅଁ' । ତାଂଅଁ'ସେ'ଗା ଗୁତୁନ୍ କୁର୍ସବୁରଂଉ ଆଜିସୁଲା ଅ'ତନ । ଅ'ତନ'ସେକ୍ ଜିସୁନା ସକାବାନ୍ଦା ଆଜା ବାମ୍ତା ଡ'ସେକ୍ ସଇନିକଲେ ପାଁନ୍ଜି ବୁଂଅଁ'।
25ଇନ୍ଜୁର୍ ତାଂବ'କୁନୁଂବକ୍ ଡ'ନା ନଟାବେଲା ମା'ଏ ଆଜିସୁଲା କୁର୍ସବକ୍ ତାଂଅଁ'ସେ'ଗା ଅ'ତନ । 26ନିଂ ଜିଉଦିରେମଲେନା ରାଜା ଡ'ସେକ୍ ମାଇ ସୁନ'ସା' ଆମାଇ ଅଗୁୟ' ଡ' ରେମଲେ ମାଗେଇ' ଡ'ସେକ୍ “ଜିଉଦିରେମଲେନା ରାଜା” ଡ' ମୁଇ ପାଟାବକ୍ ଲେକ୍ଲ'ସେକ୍ ମାଇନା ବ'ବ୍ ବାଗ୍ବକ୍ କୁର୍ସବକ୍ ତାଂଅଁ'ବୁଂଅଁ' । 27ଅଲିରାକ୍ବାଇ' କାମ୍ ଡେମ'କୁନୁଂ ରେମବକ୍ସା ଆ'ଇମ୍ବାୟ ଡି'କେନ୍ଉ କୁର୍ସବକ୍ ତାଂଅଁ'ସେ'ଗା ଜିସୁନା ସୁସୁମ୍ତିକୁରୁଂ ଆମୁଇନ୍ଡା ବାସାକ୍ତିକୁରୁଂ ଆମୁଇନ୍ଡା ଡେମ'ସେକ୍ ପାଲ୍ପାଲ୍ ଅ'ତନ । 28(ଅ'ତନ'ସା' ଇନ୍ତେକନ୍ଡେ'କା ମାପ୍ରୁନା ଉଲାକ୍ବକ୍ “ମା'ଏ ଆମାଇ ଡୁଂଗା'ରେମ୍ବୁରଂ ମିସାୟ'” ଡ'ସେକ୍ ଲେକ୍ଲ'କୁନୁଂ ଆ'ନା ସତଇସା ଡେଂଗା')।
29 #
ମାର୍କ 14:58; ଜଅନ୍ 2:19 କୁରୁଂବକ୍ ଉଇ ଇ'ରେମ୍ ଆଜିସୁଲା ଜୁଲ'ସେକ୍ ଅବୁଦି ଅ'କିୟାଲିଗା' । ଅ'କିୟାଲିକ୍ସେକ୍ ଅ'ଡୁର୍ବକ୍ ଅ'ଡୁର୍ସେକ୍ସେକ୍ ଅବୁଦି ଡୁଡଲ' । ମାରି ମା'ଏ “ଅଁ'ଅଁ, ଜୁ, କେନ୍ ମାପ୍ରୁନା ମନ୍ଦିର୍ ଅ'ଲାର'ସେକ୍ ତିନ୍ଦିନ୍ବକ୍ ଅ'ରଇଁତିଂ ଡ'କୁନ । ଆ'ନା ନ ଗଂତୁନ ଇ? 30ଡୁ'ତୁନ୍ ଡ'ନା, ଗୁତୁନ୍ କୁର୍ସକୁରୁଂ ନ ଆ'ନା ଆଲୁଂ ଜର୍ସେକ୍ ନନା ଜିବନ୍ ନ ନିଜେ ରକ୍ୟା ଡେମ୍” ଡ'ସେକ୍ ଆମାଇ ଅବୁଦି ନିନ୍ଦାଲ' ।
31ଡୁ'ତୁନା ମୁନା'ପୁଜାରିଲେ ମାରି ନିୟମ୍ ଅମାକ୍ରେମ୍ସା ଆଜିସୁଲା ଅବୁଦି ନିନ୍ଦାଲ' । ମା'ଏ ସୁନ' “ଜୁ, ମାଇ ଆଗୁଲାଇର ରକ୍ୟା ଡେମ'କୁ, ଆ'ନା ମାଇନା ଜିବନ୍ ରକ୍ୟା ଡିନ୍ଡେମ୍ ମାଇ ଆଗଂତା । 32କିରିସ୍ଟଲା ଡ'କୁନୁଂ ଇସ୍ରାଏଲ୍ ରେମଲେନା ରାଜା ଆ'ନା ଗୁତୁନ୍ କୁର୍ସକୁରୁଂ ଜରା । ଡୁ'ତୁନ୍ ଡ'ନାଏ ନେଇ ଜୁଲ'ସେ'ଗା ସତଇସା ଆନ ବିସ୍ବାସ୍ ଡେମ୍ତୁନେଇ” ଡ'ସେକ୍ ସୁନ' । ଜିସୁଲାବୁରଂ ତିରେ ଅ'ତନ'କୁନୁଂ ଡୁଂଗା'ରେମ୍ପାସା ଆଜିସୁଲା ଡୁ'ତୁନ୍ଉ ସୁନ'ସେକ୍ ନିନ୍ଦାଲ' ।
ଜିସୁଲା ଗୁଗୁଇ'ଡେନ୍
(ମାତିଉ 27:45–56; ଲୁକ 23:44–49; ଜଅନ୍ 19:28–30)
33ଉନ୍ତ୍ଦିନ୍ ବର୍ସିମି'ଇକୁରୁଂ ତିନ୍ଟାପନ୍ତେ'କା ଗୁଲାଇ ରାଜି ଞୁର୍ ଉଇଗା' । 34ତିନ୍ଟାବେଲା ଜିସୁଲା “ଏଲି, ଏଲି ଲାମା ସବକ୍ତାନି” ଡ'ନା “ଅ ନିଂନା ମାପ୍ରୁ, ଅ ନିଂନା ମାପ୍ରୁ, ମାସା' ଆନିଂ ନ ଅଡକ୍ସୁଂଅଁ' ଡୁଂନ?” ଡ'ସେକ୍ ଡକ୍ତି'ତା ଉ'ଗା' ।
35ଉ'ଗା'ସା' ଆତା ତଂକୁନୁଂ ରେମଲେ ଅଂଅଁ'ସେ'ଗା “ଜୁ, ମାଇ ଆଏଲିୟଲା ୱାୟ'ତା” ଡ'ସେକ୍ ସୁନ' ।
36ସା' ମୁଇନ୍ଡା ଉର' ଉଇସେକ୍ ପୁସୁଇ'ବାଇ' ଅଂଗୁର୍ଡାଗ୍ ସ୍ପନ୍ଜ୍ବୁରଂ ଜୁଂଡାଗ'ସେକ୍ ଆବୁ'ଡୁଂ ପୁଗ'ସେ'ଗା ଆଜିସୁଲା ଇ'ପୁଲେଇ ଅଡାୟ' ବେଡ' । ବେଡ'ସେକ୍ “ମାଇ ଡୁ'ତୁନା ଡୁକୁଲେଇ', ଆମାଇ ଆ'ନା ଏଲିୟଲା ସାକ୍ସେକ୍ ଅ'ଜର୍ତକି ଆରାକ୍, ଜୁନେଇ'” ଡ'ସେକ୍ ଗୁତୁନ୍ ରେମ ସୁନ' ।
37ତିର୍ଗି' ଜିସୁଲା ଡକ୍ତି'ତା ଉକ୍ସେ'ଗା ଗୁଇ'ଉଇଗା' ।
38ଜିସୁଲା ଗୁଗୁଇ'ବେଲା ଆତା ମାପ୍ରୁନା ମନ୍ଦିର୍ ବିତ୍ରେ ଅ'ଡିପୁଲେଇ ତୁଲ'କୁନୁଂ ମୁନା' ଇମ୍ପ' ବାଗ୍ବକ୍କୁରୁଂ ଆଲୁଂ ସିଂସାଡ୍ ଗାର୍ଉଇଗା' । 39ରମିୟ ସଇନିକଲେନା ମୁନା'ରେମ୍ ମୁଇନ୍ଡା ଜିସୁଲା ଗୁଇ'କୁନୁଂବକ୍ ଡୁକୁ । ଜିସୁଲା ଗୁଗୁଇ'ଡେଂକୁନୁଂ ମାଇ ଜୁଲ'ସେ'ଗା “କେନ୍ ରେମ ସତଇସା ମାପ୍ରୁନା ଉଁ'ଉଁ” ଡ'ସେକ୍ ସୁନ' ।
40 #
ଲୁକ 8:2,3 ଆ'ଇରସୁଗ ସେଲାନେ ସୁଲୁଂକୁରୁଂ ଜୁଲ' ତଂକୁଗା' । ମଗ୍ଦଲିନି ମରିୟମା ଡାଉ ଜାକୁବ୍ନା ମାରି ଜସିନା ୟଂ ମରିୟମା ମାରି ସଲମିଲାସା ମା'ଏବୁରଂ ଡୁକୁଗା' । 41ଜିସୁଲା ଗାଲିଲି ଉଂଗମ୍ବକ୍ ଡୁକୁନୁଂବେଲା ମା'ଏ ଆଜିସୁଲା ତେଂଗି' ଉଇସେ'ଗା ଆମାଇ ଅବୁଦି ସାନ୍ଡୁଂଅଁ'କୁ । ମା'ଏବୁରଂ ଜିରୁସାଲମ୍ ମୁନା'ଉଂଗମ୍ନା ଅବୁଦି ସେଲାନେସା ଜିସୁଲାବୁରଂ ସା'କୁ ।
ଜିସୁନା ମଟ୍ ଲାଗ୍ଲାଗ୍ବକ୍ ବୁଂବୁଂଡେନ୍
42ବିସ୍ରାମ୍ଦିନ୍ବକ୍ ମାସା ଡିନ୍ଡେମ୍ନା ନିୟମ୍ ଆରାକ୍ସା' ରେମଲେ #15:42 କେନ୍ ଗୁଲାଇଉ ବିସ୍ରାମ୍ଦିନ୍ନା ସିଁସେଇଁନା ଦିନ୍ ସୁକୁର୍ବାର୍ ଦିନ୍ ଡେଂଗା' । ସୁକୁର୍ବାର୍ ଦିନ୍ ମା'ଏ ଗୁଲାଇଉ ସୁସୁମ୍ପୁଲେଇ ରାଂଅଁ' ବୁଂତ ମାସା'ଡ'ନା ବିସ୍ରାମ୍ଦିନ୍ବକ୍ ମାସା କାମ୍ ଡିନ୍ଡେମ୍ ଆରାକ୍ ଡ'ସେକ୍ ମା'ଏନା ନିୟମ୍ ଡୁତା ।ସୁକୁର୍ବାର୍ ଦିନ୍ ଗୁଲାଇ ଅଜାଗ' ବୁଂତ । 43ଗୁତୁନ୍ ଦିନ୍ ମୁନ୍ଡିପ୍ ଆରାମାତିୟା ଉଂଗମ୍ନା ଜସେପ୍ଲା ପିଲାତଲେନ୍ବକ୍ ଉଇସେକ୍ ମାଇ ମବୁତୁଂ ଜିସୁନା ମଟ୍ ଲୁଡ' । ମାଇ ଆତା ଜିଉଦିରେମଲେନା ମୁଇନ୍ଡା ମୁନା'ରେମ୍ସୁଗ ଡୁକୁଗା'ସା' ଆମାଇ ଗୁଲାଇର ମାନ୍କୁଗା' । ମୁସିଂ ମାପ୍ରୁ ମାଇନା ରାଜି ଅ'ରଇଁୟ'ସେ'ଗା ରାଜା ଏତା ଡ'ସେକ୍ ଜସେପ୍ଲା ଜାଗ୍ଲ'କୁଗା' । 44ଜିସୁଲା ସୁରୁଇ' ଗୁଇ'ଗା' ଡ' ଅଂଅଁ'ସେକ୍ ପିଲାତଲା ବିସ୍ବାସ୍ ଆଡେମ୍ତ । ସା' ମାଇ ଆସଇନିକଲେନା ମୁନା'ରେମ୍ ୱାୟ'ସେକ୍ ସତଇସା ଜିସୁଲା ଗୁଇ'ଗା' କି ଅରଇ'? ଡ'ସେକ୍ ଅ'ଗଁସ୍ଲା'ଗା' । 45ସଇନିକଲେନା ମୁନା' ରେମ ଜିସୁଲା ଗୁଇ'ଗା' ଡ'ସେକ୍ ସୁନ'ସା'ଉ ପିଲାତଲା ଆଜସେପ୍ଲା ଜିସୁନା ମଟ୍ ରିଂଆଁ ଡ'ସେକ୍ ସୁନ' । 46ସା' ଜସେପ୍ଲା ଉଇସେକ୍ ଜିସୁନା ମଟ୍ ଅ'ଜର'ସେକ୍ ଦାମ୍ବାଇ'ନା ମୁଇ ଇମ୍ପ'ବୁରଂ ଗବ' । ମାରି ମୁଇ ବୁରେବକ୍ ଅ'ରଇଁୟ'କୁନୁଂ ଲାଗ୍ଲାଗ୍ବକ୍ ରିଂସେକ୍ ଅଡିରିଗ' ବେଡ' । ଅଡିରିଗ' ବେଡ'ସେକ୍ ଗୁତୁନ୍ ଲାଗ୍ଲାଗ୍ନା ଡାନ୍ଡର୍ବକ୍ ବୁଡାଲା ପାଟାସୁଗବାଇ' ବୁରେବୁରଂ ଅନ୍ତୁଡ'ବେଡ' । 47ମାରି ମଗ୍ଦଲିନି ମରିୟମା ମାରି ଜସିନା ୟଂ ମରିୟମା ଇମ୍ବାୟ ଜିସୁନା ମଟ୍ ଆମ୍ବ' ବୁଂଅଁ' ଡ'ସେ'ଗା ଜୁଲ'କୁଗା' ।
Currently Selected:
ମାର୍କ 15: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
