ମାର୍କ 14
14
ଆଜିସୁଲା ଅଗୁଇ'ନେଇ' ଡ'ସେକ୍ ଜିଉଦିରେମଲେନା ମୁନା'ରେମେ ଅଇଁଡେନ୍
(ମାତିଉ 26:1–5; ଲୁକ 22:1–2; ଜଅନ୍ 11:45–53)
1ଇସ୍ରାଏଲ୍ ରେମଲେ ନିସ୍ତାର୍ ପରବ୍ବକ୍#14:1 ଇସ୍ରାଏଲ୍ ରେମଲେ ମିସର୍ ଦେସ୍ବକ୍ ଗତି ଡୁକୁ । ସା' ମାପ୍ରୁ ଆମା'ଏ ଉନ୍ତ୍କୁରୁଂ ଅ'ତୁର' । ଆତୁନ୍ ଅ'ତୁର'କୁନୁଂ ଦିନ୍ ଏତ୍ସେକ୍ ଇସ୍ରାଏଲ୍ ରେମଲେ ନିସ୍ତାର୍ ପରବ୍ ଆଟେକ୍ ଡେମ'କୁ । ମାରି ମା'ଏ ଉନ୍ତା ମପୁସୁଇବାଇ' ପିଟା ଅ'ରଇଁୟ' ସୁମ୍ତ । ମପୁସୁଇ'ବାଇ' ରୁଟି ଅ'ରଇଁୟ' ସୁମ'କୁ । ଗୁତୁନ୍ ପରବ୍ ମୁଲାଇବାର୍ ଦୁଇଦିନ୍ ସିଁସେଇଁ ମୁନା'ପୁଜାରିଲେ ମାରି ଜିଉଦିରେମଲେନା ନିୟମ୍ ଅମାକ୍ରେମ୍ ଲେଇ'ସେକ୍ ମି ଆଜିସୁଲା ଡୁପାକ୍ସେ'ଗା କଲେ ସବ'ସେକ୍ ଅଗୁୟ'ନା ଡେନ୍ତା ଡ'ସେକ୍ ଅଇଁୟ' । 2ମାତର୍ “ପରବ୍ବକ୍ ଆମାଇ ଆସବ୍ନେଇ', ସବ'ନା ରେମଲେ ଅବୁଦି ରିମ୍ତ” ଡ'ସେକ୍ ମା'ଏ ସୁନ' ।
ଅବୁଦି ବାସ୍ନାବାଇ' ସୁ'ଉ ଆଜିସୁନ୍ ବ'ବ୍ କିପ୍ଲାଡାଗ' ବିବେ'ଡେନ୍
(ମାତିଉ 26:6–13; ଜଅନ୍ 12:1–8)
3 #
ଲୁକ 7:37,38 ବେତନିଆ ଡ'ସେକ୍ ମୁଇ ଉଂଗମ୍ବକ୍ ସିମନ୍ ଡ'ସେକ୍ ମୁଇନ୍ଡା କୁକୁମ୍ବାଇ' ବଲ୍ ଡେଂସେକ୍ ଡୁକୁ । ମାଇନା ଡିଂଅଁବକ୍ ଜିସୁଲା ସୁସୁମ୍ ଡେଂକୁନୁଂବେଲା ମୁଇନ୍ଡା ସେଲାନ୍ଲା ଅତର୍ ଡ'କୁନୁଂ ଅବୁଦି ବଲ୍ଟାବାଇ' ଅବୁଦି ଦାମ୍ବାଇ' ବାସ୍ନାବାଇ'ନା ସୁ'ଉ କାଁସେକ୍ ରିଂଅଁ' ସା'ଗା' । ରିଂଅଁ' ସାକ୍ସେକ୍ ଗୁତୁନ୍ ଗୁଲୁଗୁକ୍ କାଁସ୍ ପିଗ୍ରୁଗ'ସେକ୍ ଗୁତୁନ୍ ସୁ'ଉ ଆଜିସୁନା ବ'ବ୍ କିପ୍ଲାଡାଗ' ବେଡ' ।
4ସା' ଆତା ଲେଇ'କୁନୁଂରେମ୍ ଏନ୍ତୁକ୍ର ଜୁଲ'ସେକ୍ “ମାସା' ମାଇ ଆଇ'ତୁନ୍ ଡାବୁନା ବାସ୍ନାବାଇ'ନା ସୁ'ଉ ସରଉ କିବ୍ଲାଡାଗ'ସେକ୍ ବୁଡାୟ'? 5କେନ୍ ବାସ୍ନାବାଇ'ନା ସୁ'ଉ ସୁଂଅଁ'ନା ମୁଇନ୍ଡା ରେମ ବର୍ସେକ୍ କାମ୍ ଡେମ'ନା ଆ'ଇ ଡାବୁ ବାମ୍ତା ଆଇ'ତୁନା ଆରା'ଗେ ଅଦିକ୍ ଡାବୁ ଆମାଇ ବାମାନା । ଗୁତୁନ୍ ଡାବୁ ଜାଜା ମବୁନାମ୍ରେମ୍ ଡୁତା ଆତୁନୁଂଏଁ ବିବେ' ଗଂଆଁନା'” ଡ'ସେକ୍ ମା'ଏ ମା'ଏଉ କଲେକଲେ ଅଇଁୟ'ସେକ୍ ଆତୁନ୍ ସେଲାନ୍ଲା ଗିସେ'ଗା' ।
6ମାତର୍ ଜିସୁଲା ଆମା'ଏ ସୁନ' “ଆମାଇ ମାସା ଆଡିଗ'! ମାସା' ଆମାଇ କସ୍ଟ ବେ'ତୁପେ? ନିଂପୁଲେଇ ମାଇ ବଲ୍କାମ୍ ଡେମ'ତା । 7ଆକେ ମବୁନାମ୍ରେମ ଇସାଉ ଡୁତାସା' ଇନ୍ଡ'ୟା ଆପେ ବିବେ' ମୁନ୍ ଡୁତା ଉନ୍ତା ବିବେ' ଗଂତୁପେ । ମାତର୍ ନିଂ ପେବୁରଂ ଇସାଉ ଆକେ ଆଡୁତିଂ । 8ମାଇ ଆ'ଇ ଡିନ୍ଡେମ୍ ଗଂଗା' ଆଇ'ତୁନା ନିଂପୁଲେଇ ଡେମ' । ରାଇ'ସାଂ ଇନ୍ଡ୍ରିଂବେଲା ଆନିଂନା ମଟ୍ ସୁ'ଉ ସୁସୁସୁଗ ମାଇ ନିଂ ଗୁଗୁଇ' ସିଁସେଇଁଉ ଆନିଂ ଆ'ନା ସୁଲାଡାଗ' ବେଡ'ତା । 9ସା' ଗୁଲାଇ ଦେସ୍ଦୁନିଆବକ୍ ମାପ୍ରୁନା କେନ୍ ବାନିକବର୍ ସୁଁସୁବେଲା ମାଇ ଡେମ'କୁନୁଂସା ଆମାଇ ଏତ୍ବାର୍ପୁଲେଇ ରେମଲେ ବାର୍ସୁନ୍ତ ଡ'ସେକ୍ ନିଂ ଆପେ ସତଇସା ସୁନ'ତିଂ” ଡ'ସେକ୍ ଜିସୁଲା ସୁନ' ।
ଆଜିସୁଲା ଅସୁୟ'ବେ'ତିଂ ଡ'ସେକ୍ ଇସ୍କରିୟତ୍ ଜିଉଦାଲା ସୁଁସୁଡେନ୍
(ମାତିଉ 26:14–16; ଲୁକ 22:3–6)
10ଜିସୁଲାବୁରଂ ଇସାଉ ଡୁକୁନୁଂ ବାରଲକ୍ ସିସ୍ୟଲେନ୍ ବିତ୍ରେ ମୁଇନ୍ଡା ଇସ୍କରିୟତ୍ ଜିଉଦାଲା ମୁନା'ପୁଜାରିଲେନ୍ବକ୍ ଉଇସେକ୍ ଆଜିସୁଲା ଅସୁୟ'ବେ'ତିଂ ଡ'ସେକ୍ ଅଇଁୟ' । 11ସା' ଗୁତୁନ୍ ଅଂଅଁ'ସେକ୍ ମା'ଏ ଅବୁଦି ସାର୍ଦା ଡେଂସେକ୍ ଆନ ଡାବୁସା ବେ'ତୁନେଇ ଡ'ସେକ୍ ତିତିବାଡ'କୁ । ସା' ଇନ୍ଡ'ୟା ଆମା'ଏ ଅସୁୟ' ବେଡ'ନା ଡେନ୍ତା ଡ'ସେକ୍ ମାଇ ଏତ୍ସେ'ଗା ଡୁକୁ ।
ଜିସୁଲା ମାଇନା ବାରଲକ୍ ସିସ୍ୟଲେବୁରଂ ନିସ୍ତାର୍ ପରବ୍ନା ବଜି ସୁସୁମ୍ଡେନ୍
(ମାତିଉ 26:17–25; ଲୁକ 22:7–16,21–23; ଜଅନ୍ 13:21–30)
12କମିର୍ ମମିସାଇବାର୍ ରୁଟି ସୁସୁମ୍ନା ପରବ୍ନା ମୁଲ୍ନା ଦିନ୍ବକ୍ ଜିଉଦିରେମଲେ ମପୁସୁଇ'ବାଇ' ରୁଟି ଅ'ରଇଁୟ'ସେକ୍ ସୁମ୍ତ । ମାରି ଉନ୍ତ୍ଦିନ୍ଉ ମା'ଏ ନିସ୍ତାର୍ ପରବ୍ପୁଲେଇ ଆ'ଉଁମେନ୍ଡା ସେପ୍ତ । ସା' ଜିସୁନା ସିସ୍ୟଲେ “ଆମ୍ବ' ନେଇ' ଉଇସେକ୍ ନିସ୍ତାର୍ ପରବ୍ନା ବଜି ଡେମ'ନା ଡେନ୍ତା ଡ'ସେକ୍ ନ ଏତ୍ଗୁତୁନ?” ଡ'ସେକ୍ ଆମାଇ ଅ'ଗଁସ୍ଲା'ଗା' ।
13ସା' ମାଇ ଆମାଇନା ଆଇମ୍ବାୟ ସିସ୍ୟପା ୱାୟ'ସେକ୍ ସୁନ' “ପା ଜିରୁସାଲମ୍ ମୁନା'ଉଂଗମ୍ବକ୍ ଉୟା । ଉଇବେଲା ମୁଇନ୍ଡା ଇଂଗେରା ମୁଇ କିକ୍ବକ୍ ଡାଗ୍ ରିଂଅଁ' ଉଇଡେଂକୁନୁଂ ଜୁତୁପା । ଆମାଇ ତେଂଗି' ଉୟା । 14ମାଇ ଆମ୍ବ' ଗାଇତା ଆତୁନ୍ ଡିଂଅଁ ସାକାର୍ ସୁଁ ‘ନିଂ ନିଂନା ସିସ୍ୟଲେବୁରଂ ନିସ୍ତାର୍ ପରବ୍ ଇମ୍ବ'ନ୍ ଡିଂଅଁବକ୍ ଡେମ'ନା ଡେନ୍ତା ଡ'ସେକ୍ ଜିସୁଲା ଆନ ଅ'ଗଁସ୍ଲାକ୍ପୁଲେଇ ଆନାଂ ବେନ୍ଟାୟ'ତା’ ଡ'ସେକ୍ ସୁଁ । 15ଡୁ'ତୁନ୍ ସୁନ'ନା ଗୁତୁନ୍ ଡିଂଅଁ ସାକାର୍ ଆପା ବଜିପୁଲେଇ ଗୁଲାଇ ଅଜାଗ'ସେ'ଗା ବୁଂଅଁ'କୁନୁଂ ମୁଇ ବୁଡାଲା ବାଗ୍ବକ୍ନା ଡିଂଅଁ ଅସୁଇ'ତ । ପା ଆତା ନେଇ' ଗୁଲାଇରପୁଲେଇ ସୁସୁମ୍ନା ଅଜାଗ'ବୁଂ” ଡ' ସୁନ'ସେକ୍ ଜିସୁଲା ଆମାଇପା ବେନ୍ଟାୟ' ।
16ସା' ଗୁତୁନ୍ ସିସ୍ୟପା ଗୁତୁନ୍ ମୁନା'ଉଂଗମ୍ବକ୍ ଉଇଗା' । ସା' ଜିସୁଲା ସୁନ'କୁନୁଂସୁଗଉ ସତଇସା ଆମୁଇନ୍ଡା ଇଂଗେରା ଡାଗ୍ ରିଂଅଁ' ଉଇଡେଂକୁନୁଂବକ୍ ଅଲି'ଗା'ସା' ଆମାଇ ତେଂଗି' ଉଇସେକ୍ ମାଇପା ନିସ୍ତାର୍ ପରବ୍ନା ବଜିପୁଲେଇ ଗୁଲାଇ ଅଜାଗ'ବୁଂଅଁ' ।
17ମୁନ୍ଡି'ଗା'ସା' ଜିସୁଲା ମାଇନା ବାରଲକ୍ ସିସ୍ୟଲେବୁରଂ ସୁସୁମ୍ପୁଲେଇ ଆତା ସା'ଗା' । 18ସାକ୍ସେକ୍ ମା'ଏ ଗୁଲାଇର ଲେଇ'ସେକ୍ ସୁସୁମ୍ବକ୍ ଜିସୁଲା ସୁନ' “ନିଂବୁରଂ ସୁସୁମ୍ ଡେଂକୁନୁଂ ପେନ୍ ବିତ୍ରେ ମୁଇନ୍ଡା ଆନିଂ ଦାଇରେମେନ୍ବକ୍ ଅସୁୟ'ବେ'ତ ଡ'ସେକ୍ ନିଂ ଆପେ ସତଇସା ସୁନ'ତିଂ” ଡ'ସେକ୍ ସୁନ' ।
19ସା' ମା'ଏ ଗୁତୁନ୍ ଅଂଅଁ'ସେକ୍ ଅବୁଦି ସିନ୍ତାଲ' ରୁନ୍ତାଲ'ସେ'ଗା ମୁଇନ୍ଡା ମୁଇନ୍ଡା “ନିଂ ଇ? ଡ'ନ୍ ନିଂ ଇ?” ଡ'ସେକ୍ ଆମାଇ ଅ'ଗଁସ୍ଲା'ଗା' ।
20ସା' ମାଇ ସୁନ' “ପେ ବାରଲକ୍ ଡୁକୁନୁଂ ବିତ୍ରେ ମୁଇନ୍ଡା ଆନିଂ ଆଦାଇରେମ୍ ଅସୁୟ'ବେ'ତ । ଆ'ନା ଜା ନିଂବୁରଂ ତିରେ ଗିଲାବକ୍ ତିତି ସୁସୁବ'ତା ମାଇଉ ଆନିଂ ଅସୁୟ'ବେ'ତ । 21ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ଇନ୍ତେକନ୍ଡେ'କା ମାପ୍ରୁନା ଉଲାକ୍ବକ୍ ନିଂ ମି ଗୁଇ'ତିଂ ଡ'ସେକ୍ ଲେକ୍ଲ'ବୁଂଅଁ'ତା ଡୁ'ତୁନ୍ଉ ନିଂ ଗୁଇ'ତିଂ । ମାତର୍ ଜା ଆନିଂ ଆଦାଇରେମ୍ ଅସୁୟ'ବେ'ତ ଆମାଇ ମାପ୍ରୁ ଅବୁଦି ଡନ୍ଡ୍ ବେ'ତ । ଆମାଇ ଆକେ ଜନମ୍ ଆବେଡ'ନା ଅବୁଦି ବଲ୍ ଡେମାନା” ଡ'ସେକ୍ ସୁନ' ।
ପ୍ରବୁବଜ
(ମାତିଉ 26:26–30; ଲୁକ 22:14–20; 1 କରିନ୍ତିୟ 11:23–26)
22ମା'ଏ ସୁସୁମ୍ବେଲା ଜିସୁଲା ମୁଇ ରୁଟି ଜୁଗ'ସେକ୍ ଆମାପ୍ରୁ ସୁନ୍ଡ୍ରଗା' । ସୁନ୍ଡ୍ରକ୍ସେକ୍ ମାଇ ଗୁତୁନ୍ ରୁଟି ସିସିଡ' । ସିସିଡ'ସେକ୍ ଆସିସ୍ୟଲେ ବେଡ'ସେକ୍ “ଇନ୍ଡ ଜୁଗ' ସୁମ୍, କେନା ନିଂନା ଞେରି” ଡ'ସେକ୍ ସୁନ' ।
23ତିର୍ଗି' ମାଇ ମୁଇ ଗିଲାବକ୍ ଅଂଗୁର୍ନା ଡାଗ୍ ଜୁଗ'ସେକ୍ ଆମାପ୍ରୁ ସୁନ୍ଡ୍ରଗା' । ସୁନ୍ଡ୍ରକ୍ସେକ୍ ଗୁତୁନ୍ ଗିଲାନା ଅଂଗୁର୍ନା ଡାଗ୍ସା ଆସିସ୍ୟଲେ ବେଡ' । ସା' ମା'ଏ ଗୁଲାଇର ଗୁତୁନ୍ ଗିଲାକୁରୁଂ ଇଡ' ।
24ମାରି ମାଇ ଆମା'ଏ ସୁନ' “କେନା ନିଂନା ବନି । ଦର୍ତନିବକ୍ ଗୁଲାଇ ରେମଲେନା ପାପ୍ ଗୁଇଡାକ୍ପୁଲେଇ ନିଂନା ବନି ନିଂ ଗୁଗୁଇ'ବେଲା ବେ'ତିଂ । ଡୁ'ତୁନ୍ ଡେମ'ନା ଆରେମଲେ ପାପ୍ନା ଡନ୍ଡ୍କୁରୁଂ ରକ୍ୟା ଡିନ୍ଡେମ୍ପୁଲେଇ ମାପ୍ରୁ ବେଡ'କୁନୁଂ ପର୍ମାନ୍ ସତ୍ ଡେନ୍ତା । 25ମାପ୍ରୁନା ରାଜିବକ୍ ଉଇସେ'ଗା ତିମେ ଅଂଗୁର୍ନା ଡାଗ୍ ଇ'ପନ୍ତେ'କା କେନ୍ ଅଂଗୁର୍ନା ଡାଗ୍ ନିଂ ମାରି ଆଇ'ତିଂ ଡ'ସେକ୍ ନିଂ ଆପେ ସତଇସା ସୁନ'ତିଂ” ଡ'ସେକ୍ ଆମା'ଏ ସୁନ' ।
26ମାରି ଆମାପ୍ରୁ ସୁନ୍ଡ୍ରପୁଲେଇ ମା'ଏ ମୁଇ ସିସେର୍ ସେର'ସେକ୍ ଜିତ କୁନ୍ଡାବକ୍ ଉଇଗା' ।
ପିତର୍ଲା ମା ଡେମ୍ତ ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 26:31–35; ଲୁକ 22:31–34; ଜଅନ୍ 13:36–38)
27ମା'ଏ ଉଇବେଲା ଜିସୁଲା ସୁନ' “ପେ ଗୁଲାଇର ଆନିଂ ଅଡକ୍ସୁଂଅଁ'ସେକ୍ ଉର' ଡୁଂତୁପେ । ମାସା'ଡ'ନା ଇନ୍ତେକନ୍ଡେ'କା ମାପ୍ରୁନା ଉଲାକ୍ବକ୍ ମାପ୍ରୁ ସୁନ'କୁନୁଂ ଡି'କେନ୍ ଲେକ୍ଲ'ତା: ମା ଡ'ନା:
‘ନିଂ ଆଗୁଗୁଇ'ରେମ୍ ସେବ'ସୁଂତିଂ,
ସା' ମେନ୍ଡାଲେ ତଂରିତଂକେ ଡେନ୍ତା ’ ଡ'ସେକ୍ ଲେକ୍ଲ'ତା ।
28 #
ମାତିଉ 28:16
ମାତର୍ ନିଂ ଗୁଇ'କୁନୁଂକୁରୁଂ ମୁରାକ୍ସେକ୍ ପେନ୍ ସିଁସେଇଁ ଗାଲିଲି ଜିଲାବକ୍ ଉଇତିଂ ” ଡ'ସେକ୍ ସୁନ' ।
29ସା' ପିତର୍ଲା ସୁନ' “ଗୁଲାଇର ଆନ ଅନ୍ତୁର'ସେକ୍ ଡୁଂନାସା ନିଂ ଆନ ଆଅନ୍ତୁର୍ତିଂ” ଡ'ସେକ୍ ସୁନ' ।
30ସା' ଜିସୁଲା ଆପିତର୍ଲା ସୁନ' “ଅ ପିତର୍, ଆ'ନା ତୁମୁଂଗ ବାର୍ଲୁଇ' ଗିସିଂ ସୁସୁ ସିଁସେଇଁଉ ନିଂ ଆମାଇ ଆମାକ୍ତିଂ ଡ'ସେକ୍ ତିନ୍ପାଲି ସୁନ୍ତୁନ ଡ'ସେକ୍ ଆନ ନିଂ ସତଇସା ସୁନ'ତିଂ” ଡ'ସେକ୍ ସୁନ' ।
31ସା' ପିତର୍ଲା ସୁନ' “ନବୁରଂ ଗୁଗୁଇ' ପଡ୍ତା ଡ'ନାସା ଆନ ନିଂ ଆମାକ୍ତିଂ ଡ'ସେକ୍ ଇନ୍ଡଇ'ଏସା ଆସୁନ୍ତିଂ” ଡ'ସେକ୍ ସୁନ' । ମାରି ମାଇବୁରଂ ଡୁକୁନୁଂ ଗୁଲାଇ ସିସ୍ୟଲେସା ଡୁ'ତୁନାଉ ଆଜିସୁଲା ସୁନ' ।
ଗେତ୍ସିମାନି ଡ'ସେକ୍ ମୁଇ ଡିନ୍ଜାବୁର୍ବକ୍ ଜିସୁଲା ପାର୍ତନା ଡିନ୍ଡେମ୍ଡେନ୍
(ମାତିଉ 26:36–46; ଲୁକ 22:39–46)
32ତିର୍ଗି' ଜିସୁଲା ମାଇନା ସିସ୍ୟଲେବୁରଂ ଗେତ୍ସିମାନି ଡ'ସେକ୍ ଇମିକୁନୁଂ ମୁଇ ଡିନ୍ଜାବୁର୍ବକ୍ ଉଇଗା' । ଉଇସେକ୍ ମାଇ “ନିଂ ପାର୍ତନା ଅ'ଡମ୍ପନ୍ତେକ୍ ପେ ଆକେ ଲେଇ'କୁଲା” ଡ'ସେକ୍ ସୁନ' । 33ସୁନ'ସେକ୍ ମାଇ ଆପିତର୍ଲା, ଆଜାକୁବ୍ଲା ମାରି ଆଜଅନ୍ଲା ଆମା'ଏ ଇଁ'ଗେନ୍ଡ୍ରବକ୍ ମାଇବୁରଂ ୱାୟ' ରିଂଗା' । ମାରି ମାଇନା ଜିବନ୍ବକ୍ ଅବୁଦି ସିନ୍ତାରୁନ୍ତା ମାରି ଅବୁଦି କସ୍ଟସା ସା'ଗା' । 34ସା' ମାଇ ଆମା'ଏ ସୁନ' “ନିଂନା ଜିବନ୍ବକ୍ ଅବୁଦି ସିନ୍ତା ସାକ୍ସେକ୍ ନିଂ ଗୁଗୁଇ'ଗାଗାଇ' ଡେଂକୁନୁଂସୁଗ ଡେଂଗୁତିଂ । ପେ ଆକେ ନିଂବୁରଂ ମଲେମ' ଡୁକୁଲା” ଡ'ସେକ୍ ସୁନ' ।
35ସୁନ'ସେକ୍ ମାଇ ମା'ଏନ୍କୁରୁଂ ଇ'କି ଡଗ୍ରି'ତା ସୁଲୁଂ ଉଇସେକ୍ ତୁବୁକ୍ବକ୍ ଏନ୍ଡିଗା' । ଏନ୍ଡିକ୍ସେକ୍ ମାପ୍ରୁନ୍ବକ୍ ଡି'କେନ୍ ପାର୍ତନା ଡେମ', “ଅ ବା, ନ ଡେମ୍ତିଂ ଡ'ନା କେନ୍ କସ୍ଟ ଗୁଲାଇ ନିଂକୁରୁଂ ସୁଲୁଂ ଡେମ୍” ଡ'ସେକ୍ ପାର୍ତନା ଡେମ' । 36ମାଇ ସୁନ' “ଅ ବା, ନଉ ଗୁଲାଇ ଗଂତୁନ । ଡି'କେନ୍ବାଇ' କସ୍ଟ ଆନିଂ ଆସାବେଇ' । କେନ୍ କସ୍ଟ ନ ସୁଲୁଂ ବୁଂ । ମାତର୍ ନିଂନା ମୁନ୍ ଆରାକ୍ ନନା ମୁନ୍ ମା ଗୁତୁନ୍ଉ ନ ଡେମ୍” ଡ'ସେକ୍ ଜିସୁଲା ପାର୍ତନା ଡେମ' ।
37ମାରି ମାଇ ମାଇନା ସିସ୍ୟଲେନ୍ବକ୍ ସା'ଗା', ସା' ମା'ଏ ଲେମ'କୁନୁଂ ଜୁଲ' । ସା' ମାଇ ଆପିତର୍ଲା, “ଅ ସିମନ୍, ନ ଲେମ'ଗୁତୁନ ଇ? ମଲେମ' ନିଂବୁରଂ ମୁଇ ଗନ୍ଟାସା ଲିଲେଇ' ଆଗଂତୁନ ଇ? 38ପେ ମଲେମ' ପାର୍ତନା ଡେମ' ଡୁକୁଲା, ଡୁ'ତୁନ୍ ଡେମ'ନା ପେନ୍ ଜିବନ୍ବକ୍ ପରିକା ଆସାପ୍ତା । ମାସା'ଡ'ନା ନିଂ ସୁନ'କୁନୁଂସୁଗ ଡିନ୍ଡେମ୍ପୁଲେଇ ଆପେ ମୁନ୍ ଡୁତା ମାତର୍ ବପୁ ଆରାକ୍ସା' ଆଗଂତୁପେ” ଡ'ସେକ୍ ସୁନ' ।
39ସୁନ'ସେକ୍ ସିଁସେଇଁ ମି ପାର୍ତନା ଡେମ'କୁ ଡୁ'ତୁନ୍ଉ ମାରି ଉଇସେକ୍ ପାର୍ତନା ଡେମ' । 40ମାରି ସାକ୍ସେକ୍ ମାଇ ଜୁଲ'ସା' ମା'ଏ ମାରି ଲେମ'କୁନୁଂ ଜୁଲ' । ଆମା'ଏନା ମ' ଜୁଲ'ନା ଲେମ' ଡୁସୁ'କୁସା' ଅବୁଦି କସ୍ଟ ଡେଂକୁ । ମା'ଏ ଗିୟାସୁପ୍ସେକ୍ ମା ସୁନ୍ତୁନେଇ ଡ'ସେକ୍ ଜୁ'ଜା ଡେଂଉଗା' ।
41ମାର୍ ମୁସ ମା'ଏନ୍ବକ୍ ତିର୍ଗି' ସାକ୍ସେକ୍ ମାଇ ସୁନ', “ମାରି ଲେମ'ଗୁତୁପେ ଇ? ଲେମ'ସେକ୍ ବାନି ପୁନ୍ଗୁତୁପେ ଇ? ଆ'ଇତୁନ୍ ଡେନ୍ତାବେ । ମାପ୍ରୁ ବେନ୍ଟାୟ'ସା' ସା'କୁନୁଂ ଆରେମନା ଉଁ'ଉଁ ଅଲିରାକ୍ବାଇ' ରେମଲେନା ତିତିବକ୍ ଅସୁୟ' ବିବେ'ନା ବେଲା ଆ'ନା ଡେଂଗୁତା । 42ଇନ୍ସେଇ'ଉ ତନା, ଡ ଉୟାନେଇ' । ଜୁ, ଆନିଂ ଅସୁ'ୟା ସା'ଗା'” ଡ'ସେକ୍ ସୁନ' ।
ଆଜିସୁଲା ଅସୁୟ' ବିବେ'ଡେନ୍ ମାରି ଦାଇରେମ୍ ଆମାଇ ସୁସପ୍ଡେନ୍
(ମାତିଉ 26:47–56; ଲୁକ 22:47–53; ଜଅନ୍ 18:3–12 )
43ଡୁ'ତୁନ୍ ମାଇ ଅଇଁୟ'କୁନୁଂବେଲା ବାରଲକ୍ ସିସ୍ୟଲେନ୍ ବିତ୍ରେ ମୁଇନ୍ଡା ଜିଉଦାଲା ଡ'କୁନୁଂଆଁ ସେଟ୍ଟ' ଜିସୁନ୍ବକ୍ ସା'ଗା' । ସା' ମାଇବୁରଂ ମୁନା'ପୁଜାରିଲେ ମାରି ଜିଉଦିରେମଲେନା ନିୟମ୍ ଅମାକ୍ରେମେ ମାରି ମୁନା'ରେମେ ବେନ୍ଟାୟ'ସା' କାନ୍ଦାଲେ ମାରି ବୁ'ଡୁଂଏଁ ସକ୍ସେ'ଗା ଅବୁଦି ରେମଲେସା ମା'ଏବୁରଂ ସା'ଗା' ।
44ଆଜିସୁଲା ଅସୁୟ'ବିବେ'ଡା “ନିଂ ଆଜା ବୁଇଁତମ୍ତିଂ ମାଇଉ ଗୁତୁନ୍ ରେମ, ଆମାଇ ପେ ସବ'ସେ'ଗା ବଲ୍ ତୁଲ'ରେଡ'ସେ'ଗା ରିଂଅଁ' ଉୟା” ଡ'ସେକ୍ ଆତୁନ୍ ରେମଲେ ମୁଇ ସିନସୁଗ ସିଁସେଇଁଉ ସୁନ'ବୁଂଅଁ' । 45ସା' ମାଇ ସିଦା ଜିସୁନ୍ବକ୍ ସାକ୍ସେକ୍ ଆଜିସୁଲା “ଅ ଗୁରୁ” ଡ' ୱାୟ'ସେକ୍ ଆମାଇ ବୁଇଁତମ' । 46ସା' ଗୁତୁନ୍ ଜୁଲ'ସେ'ଗା ରେମଲେ ଆଜିସୁଲା ସବ' । 47ଆଇ'ତୁନ୍ବେଲା ଜିସୁନା ସିସ୍ୟଲେନ୍ ବିତ୍ରେ ମୁଇନ୍ଡା ମାଇନା କାନ୍ଦା ଜୁଗ'ସେକ୍ ଆମୁନା'ପୁଜାରିନା ଗତିରେମ୍ ସେବ'ସା' ଲୁନ୍ତୁର୍ ସେତୁକ୍ ଉଇଗା' ।
48ଜିସୁଲା ଆମା'ଏ ସୁନ' “ମାସା' ପେ ଆମୁଇନ୍ଡା ଟାକ୍ରିରେମ୍ବକ୍ ସୁସପ୍ସୁଗ କାନ୍ଦାଲେ ମାରି ବୁ'ଡୁଂଏଁ ଗୁଲାଇ ସକ୍ସେକ୍ ନିଂବକ୍ ସା'ଗୁତୁପେ? 49#ଲୁକ 19:47; 21:37ଇସାଉ ନିଂ ମନ୍ଦିର୍ବକ୍ ପେବୁରଂ ଡୁକୁକ୍ସେ'ଗା ଆରେମଲେ ମାପ୍ରୁନା ବଲ୍କବର୍ ଅମାଗ'କୁନିଂ । ଉନ୍ତା ପେ ଆନିଂ ଆସପ୍ତୁପେ । ମାସା'ଡ'ନା ଡି'କେନ୍ ଡେଂନାଉ ମାପ୍ରୁନା ଉଲାକ୍ବକ୍ ଆନିଂ ମି ଡେନ୍ତା ଡ'ସେକ୍ ଲେକ୍ଲ'ତା ଡୁ'ତୁନା ଆନିଂ ଡେନ୍ତା” ଡ'ସେକ୍ ସୁନ' । 50ଆଇ'ତୁନ୍ବେଲା ମାଇନା ତିରେ ଡୁକୁନୁଂ ସିସ୍ୟଲେ ଗୁଲାଇର ଆମାଇ ଅଡକ୍ସୁଂଅଁ' ଡୁଂଗା' ।
51ଆଇ'ତୁନ୍ବେଲା ମୁଇନ୍ଡା ଡିନ୍ଡା ଇଂଗେର୍ ମୁଇ ବଲ୍ଟା ଲଂଗିପ'ଉ କୁକୁଇସେ'ଗା ଆଜିସୁଲା ତେଂଗି'ତେଂଗି' ଉଇଡେଂକୁ । ସା' ଜିସୁନା ଦାଇରେମେ ଆମାଇ ସବ' । 52ସା' ମାଇ ବୁତୁଂସେ'ଗା କୁକୁଇକୁନୁଂ ଗୁତୁନ୍ ବଲ୍ଟା ଲଂଗିପ' ଅଡକ୍ସୁଂଅଁ'ସେ'ଗା ନାଂଗାସାଲ୍ ଉର' ଡୁଂଗା' ।
ଆଜିସୁଲା ବିସାର୍ନା ଡିନ୍ଡେମ୍ଡେନ୍
(ମାତିଉ 26:57–68; ଲୁକ 22:54–55,63–71; ଜଅନ୍ 18:13–14,19–24)
53ତିର୍ଗି' ମା'ଏ ଆଜିସୁଲା ମୁନା'ପୁଜାରିଲେନା ମୁନା' ରେମବକ୍ ରିଂଅଁ' ଉଇଗା' । ଆତା ମାଇନ୍ବକ୍ ମୁନା'ପୁଜାରିଲେ, ମୁନା'ମୁନା' ରେମଲେ ମାରି ଜିଉଦିରେମଲେନା ନିୟମ୍ ଅମାକ୍ରେମ୍ସା ରୁନ୍କୁଗା' । 54ଆଜିସୁଲା ସବ' ଇନ୍ଡ୍ରିଂବେଲା ଆମାଇ ମା ଡେମ୍ତ ଡ'ସେ'ଗା ପିତର୍ଲା ଞଁସୁଲୁଂ ଜୁଲ' ଜୁଲ' ଉଇଗା' । ଉଇସେକ୍ ମାଇ ମୁନା'ପୁଜାରିଲେନ୍ ମୁନା'ରେମ୍ନା ଡିଂଅଁନା ରୁନୁକ୍ସିଂବକ୍ ଗାଇଗା' । ଆତା ମୁନା'ପୁଜାରିଲେନ୍ ମୁନା'ରେମ୍ନା ଡିଂଅଁ ଜାଗ୍ବାର୍ରେମ୍ ରୁନୁକ୍ସିଂବକ୍ ଗିକ୍ସଂଅଁ'ସେକ୍ ଲେଇ'କୁସା' ମାଇସା ମା'ଏବୁରଂ ଲେଇ'ଗା' ।
55ମୁନା'ପୁଜାରିଲେ ମାରି ମୁନା'ରେମଲେ ଗୁଲାଇର “ଆଜିସୁଲା ଅଗୁଇ'ନେଇ'” ଡ'ସେକ୍ ପଲୁ ସାକିପୁଲେଇ ତୁର' । ମାତର୍ ମାସା ଆବାମ୍ତା । 56ଅବୁଦିର ସାକ୍ସେକ୍ ଜିସୁଲା ଅଲିରାକ୍ବାଇ' ଡେମ'ତା ଡ'ସେକ୍ ପଲୁବାଇ' ସାକି ସୁନ'ସା'ଏସା ମା'ଏନ୍ ତୁମ' ଆବିଡ୍ତା ଡେଂକୁ ।
57ମାରି ଏନ୍ତୁକ୍ର ତଂସେ'ଗା ପଲୁବାଇ'ନା ସାକି ସୁନ' । ମା'ଏ ମା ଡ'ସେକ୍ ସୁନ' ଡ'ନା: 58#ଜଅନ୍ 2:19“ରେମଲେ ଅ'ରଇଁୟ'କୁନୁଂ କେନ୍ ମନ୍ଦିର୍ ନିଂ ଅ'ଲାର'ସେ'ଗା ପାଲ୍ ମୁଇ ତିନ୍ଦିନ୍ବକ୍ ଅ'ରଇଁତିଂ । ଗୁତୁନ୍ ମନ୍ଦିର୍ ରେମଲେ ତିତିବୁରଂ ଅ'ରଇଁୟ'କୁନୁଂବାଇ' ଆରାକ୍ ଡ'ସେକ୍ ଜିସୁଲା ସୁନ'କୁନୁଂ ନେଇ' ଅଂଅଁ'ତୁନେଇ'” ଡ'ସେକ୍ ମା'ଏ ସୁନ' । 59ମା'ଏ ଗୁଲାଇର ଡି'କେନ୍ ସାକି ସୁନ'ସା'ଏସା ମା'ଏନ୍ ତୁମ' ବାସ୍ ଆବିଡ୍ତା ।
60ତିର୍ଗି' ଗୁଲାଇର ଲେଇ'କୁନୁଂବକ୍ଉ ମୁନା'ପୁଜାରିଲେନ୍ ମୁନା'ରେମ୍ ତଂସେକ୍ ଆଜିସୁଲା ଅ'ଗଁସ୍ଲା'ଗା', “ମା'ଏ ଆନନ୍ ବାଗ୍ବକ୍ ସୁନ'କୁନୁଂ ଅଂଅଁ'ସେକ୍ ନ ମାଏସା ମାରି ଆସୁନ୍ତୁନ ଇ?” ଡ'ସେକ୍ ଅ'ଗଁସ୍ଲା'ଗା' । 61ମାତର୍ ଜିସୁଲା ବାସ୍ ଆସାର୍ଲଂତା, ମାଇ ଜୁ' ଡୁକୁଗା' ।
ସା' ମୁନା'ପୁଜାରିଲେନ୍ ମୁନା'ରେମ୍ ମାରି ଆମାଇ ଅ'ଗଁସ୍ଲା'ଗା', “ନ ମାପ୍ରୁନା ଉଁ'ଉଁ, କିରିସ୍ଟଲା ଇ?” ଡ'ସେକ୍ ସୁନ' ।
62ସା' ଜିସୁଲା ସୁନ' “ଅଁ'ଅଁ, ନିଂଉ । ମାରି ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ନିଂ ଅବୁଦି ବପୁ ଡୁକୁନୁଂ ମାପ୍ରୁନା ସୁସୁମ୍ତିକୁରୁଂ ଲେଇ'କୁନୁଂସା ମାରି କି'ତୁଂବକ୍ ବାଦଲ୍କୁରୁଂ ଆକେ ଜୁଜର୍ ଡେଂକୁନୁଂ ବେଲାସା ପେ ଆନିଂ ଜୁତୁପେ” ଡ'ସେକ୍ ସୁନ' ।
63-64ସା' ଗୁତୁନ୍ ଅଂଅଁ'ସେକ୍ ମୁନା'ପୁଜାରିଲେନ୍ ମୁନା'ରେମ୍ ମାଇନା ନିଜର୍ନା ସକା ନିଜେ ଗାର'ସେକ୍ ସୁନ' “ମାଇ ମାପ୍ରୁସୁଗ ସୁନ'କୁନୁଂ ପେ ଅଂଅଁ'ପେ । ଆ'ନା ମାରି ଜାଏସା ସାକି ସୁଁସୁ ଦର୍କାର୍ ଆରାକ୍! ଆ'ନା ଆମାଇ ମା ଡେମ'ନା ଡେନ୍ତା ଡ'ସେକ୍ ପେ ଏତ୍ଗୁତୁପେ?” ଡ'ସେକ୍ ସୁନ' । ସୁନ'ସା' ଗୁଲାଇର ଆମାଇ ଅଗୁୟ'ନା ଡେନ୍ତା ଡ'ସେକ୍ ରାଜି ଡେଂଗା' ।
65ଏନ୍ତୁକ୍ର ଆମାଇନା ସାରମ' ବୁଇ'ତୁର'ବେଡ' । ମାରି ଏନ୍ତୁକ୍ର ଆମାଇନା ମ' ଇମ୍ପ'ବୁରଂ ଡାମଡ' ତୁଲ'ସେକ୍ ତିତିବୁରଂ ବୁଗ' । ବୁଗ'ସେ'ଗା “ନ ବାବବାଦି ମାନ୍କି? ଆ'ନା ଜା ଆନ ବୁଗ'ତା ନ ସୁଁ” ଡ'ସେକ୍ ଆଜିସୁଲା ସୁନ' । ମାରି ଜାଗ୍ବାର୍ରେମ୍ସା ଆମାଇ ରିଂସେକ୍ ଅବୁଦି ବୁଗ' ।
ଆଜିସୁଲା ନିଂ ଆମାକ୍ତିଂ ଡ'ସେକ୍ ପିତର୍ଲା ସୁଁସୁଡେନ୍
(ମାତିଉ 26:69–75; ଲୁକ 22:54–62; ଜଅନ୍ 18:15–18,25–27 )
66ପିତର୍ଲା ମୁନା'ପୁଜାରିନା ରୁନୁକ୍ସିଂବକ୍ ଲେଇ'କୁନୁଂବେଲା ମୁନା'ପୁଜାରିନା ଡିଂଅଁବକ୍ କାମ୍ ଡେମ'କୁନୁଂ ମୁଇନ୍ଡା କାମ୍ବୁଇ' ଆତା ସା'ଗା' । 67ସାକ୍ସେ'ଗା ଆପିତର୍ଲା ସୁଂଅଁବକ୍ ଅ'ସୁଗୁର୍ସେକ୍ ଲେଇ'କୁନୁଂବେଲା ବଲ୍ ସର୍ମଡ' ଜୁଲ' । ଜୁଲ'ସେକ୍:
“ନସା ନାଜରିତ୍ ଉଂଗମ୍ନା ଜିସୁଲାବୁରଂ ତିରେ ଡୁକୁନକି ମି?” ଡ'ସେକ୍ ସୁନ' ।
68ସା' “ନିଂ ଆମାଇ ଆମାକ୍ତିଂ । ନ ମା ଡ'ସେକ୍ ସୁନ'ତୁନ, ଗୁତୁନା ନିଂ ଆମାକ୍ତିଂ” ଡ'ସେକ୍ ପିତର୍ଲା ସୁନ' । ପିତର୍ଲା ଡୁ'ତୁନ୍ ସୁନ'ସେ'ଗା ଉନ୍ତ୍କୁରୁଂ ତୁର୍ସେ'ଗା ରୁନୁକ୍ସିଂନା ଡାନ୍ଡର୍କନ୍ଡେକ୍ ଉଇଗା' । ସା' ଆଇ'ତୁନ୍ବେଲା ଗିସିଂ ଆଇ'କୁ ସୁଗା' ।
69ମାରି ଗୁତୁନ୍ କାମ୍ବୁଇ' ଆପିତର୍ଲା ଆତା ତଂକୁନୁଂବକ୍ ଜୁଲ'ସେକ୍ “ସତଇସା ମାଇସା ଜିସୁଲେବୁରଂ ଡୁକୁଗା'” ଡ'ସେ'ଗା ଆତା ତଂକୁନୁଂ ରେମ୍ବକ୍ ସୁନ' । 70ସା' ପିତର୍ଲା “ନିଂ ଆରାକ୍” ଡ'ସେକ୍ ସୁନ' ।
ମାରି ପରେକ୍ ଡୁକୁସା' ଆତା ଡୁକୁନୁଂ ରେମଲେ ଆମାଇ ଜୁଲ'ସେକ୍ “ନ ଗାଲିଲି ଉଂଗମ୍ନା ରେମସା' ନସା ମା'ଏବୁରଂ ଡୁକୁନ ଡ' ନେଇ ସତଇସା ମାଗ'ତୁନେଇ” ଡ'ସେ'ଗା ସୁନ' ।
71ସା' ମାଇ ନିଜେ ଆନାବୁଂବର୍ସେକ୍ ପର୍ମାନ୍ ସବ'ସେକ୍ ସୁନ' “ପେ ଆଜା ସୁନ'ତୁପେ ନିଂ ଆମାଇ ଆମାକ୍ତିଂ” ଡ'ସେକ୍ ସୁନ' ।
72ଡୁ'ତୁନ୍ ସୁଁସୁକେ ସୁଁସୁ ମାର୍ ମୁସ ଗିସିଂ ସୁଗା' । ସା' “ବାର୍ଲୁଇ' ଗିସିଂ ସୁଁସୁ ସିଁସେଇଁ ନ ଆନିଂ ଆମାକ୍ତିଂ ଡ'ସେକ୍ ତିନ୍ପାଲି ସୁନ୍ତୁନ'” ଡ'ସେକ୍ ଜିସୁଲା ଆମାଇ ସୁନ'କୁନୁଂ ତୁମ' ପିତର୍ଲା ଏତ୍ଗା' । ଏତ୍ସେ'ଗା ଅବୁଦି ସିନ୍ତାଲ'ସେକ୍ ମାଇ ଉ'ଗା' ।
Currently Selected:
ମାର୍କ 14: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
