ମାର୍କ 4
4
ବିବି'ରେମ୍ନା ଉ'ସୁରାମ୍
(ମାତିଉ 13:1–9; ଲୁକ 8:4–8)
1 #
ଲୁକ 5:1–3
ଜିସୁଲା ମାର୍ ମୁସଉ ସମ୍ଦର୍କିନ୍ଡାକ୍ ପାଲି ଉଇସେକ୍ ଆରେମଲେ ମାପ୍ରୁନା ତୁମ' ସୁଁସୁ ମୁଲାୟ' । ସା' ଆତାସା ଅବୁଦିର ଆଜିସୁଲା ଗୁରୁଂଡେମ'ସେକ୍ ରୁନ୍କୁଗା' । ସା' ଜିସୁଲା ଗୁତୁନ୍ ସମ୍ଦର୍କିନ୍ଡାକ୍ବକ୍ ଡୁକୁନୁଂ ମୁଇ ଡଂଗାବକ୍ ଡାଇ'ଗା' ମାରି ଆତା ଲେଇ'ସେକ୍ ମାପ୍ରୁନା ତୁମ' ଅମାଗ' । ସା' ଗୁତୁନ୍ ଅମାଗ'କୁନୁଂ ଅଂଅଁ'ସେକ୍ ଅବୁଦି ରେମଲେ ସମ୍ଦର୍କିନ୍ଡାକ୍ ପାଲି ଡୁକୁଗା' । 2ସା' ମାଇ ଆମା'ଏ ଉ'ସୁରାମ୍ ଉଡ' ଉଡ'ସେ'ଗା ଅବୁଦି ଅମାଗ'ସେକ୍ ସୁନ', 3“ପେ ଅଂ, ମୁଇନ୍ଡା ବିବି'ରେମ୍ ସୁମୁ ବିବି' ତୁର୍ଗା' । 4ସା' ମାଇ ବିବି'ବେଲା ଏନ୍ତୁକ୍ ସୁମୁ କୁରୁଂପାଲି ଲ'ଗା' । କୁରୁଂବକ୍ ଲ'ଗା'ସା' ପୁରି'ସୁରଇ' ସାକ୍ସେକ୍ ଗୁତୁନା ସୁମ'ସୁଂଅଁ' । 5ମାରି ଏନ୍ତୁକ୍ ସୁମୁ ଇ'କିସୁଗ ତୁବୁକ୍ ଡୁକୁନୁଂ ବୁରେ ବାଗ୍ବକ୍ ଲ'ଗା' । ସା' ପରେକ୍ ତୁର୍ବି'ଗା' । 6ତୁର୍ବି'କୁନୁଂ ରେ'ଗି ବିତ୍ରେ ଗୁଗାଇ ଆଗଂତାସା' ଅବୁଦି ଞା'ବର୍ ବେଡ'ସା' ଆଇ'କୁ ଗୁଇ'ଉଇଗା' । 7ମାରି ଏନ୍ତୁକ୍ ସୁମୁ ଗୁରାଇ'କୁରିଂବକ୍ ଲ'ଗା' । ଗୁତୁନ୍ ତୁର୍ବିକ୍ସେ'ଗା ମୁନା' ଡେଂକୁନୁଂବେଲା ଗୁତୁନ୍ ଗୁରାଇ'କୁରିଂ ରେଡ'ସୁଂଅଁ' । ସା' ଆମୁନା'ତା ମାରି ଆଗିଲେ ଆସୁ'ଉତା । 8ମାତର୍ ଏନ୍ତୁକ୍ ସୁମୁ ବାନିବାଇ' ତୁବୁକ୍ବକ୍ ଲ'ଗା' । ଗୁତୁନ୍ ତୁର୍ବିକ୍ସେକ୍ ବାନି ମୁନାକ୍ସେକ୍ ଗିଲେସୁ'ଉଗା' । ଗିଲେସୁ'ଉକ୍ସେକ୍ ବୁଲୁଗା'ସା' ଅୟ'ସିଡ'ସା' ତିରିସ୍ ଗୁନ୍ ସାଟେ ଗୁନ୍ ମାରି ସଏ ଗୁନ୍ସା ବାଂଗା' ।”
9ମାରି ଜିସୁଲା ଆଗୁଲାଇର ସୁନ' “ନିଂ ସୁନ'କୁନୁଂ ଉ'ସୁରାମ୍ ମା ଡ'ସେକ୍ ମାଗ୍ମାକ୍ପୁଲେଇ ଆପେ ମୁନ୍ ଡୁକୁନା ପେ ବଲ୍ ଅଂଅଁ'କୁଲା” ଡ'ସେକ୍ ସୁନ' ।
ଉ'ସୁରାମ୍ ମାପୁଲେଇ ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 13:10–17; ଲୁକ 8:9,10)
10ତିର୍ଗି' ଜିସୁଲା ସାକ୍ମାଇ ଡୁକୁନୁଂବେଲା ମାଇନା ସିସ୍ୟଲେ ବାରଲକ୍ ମାରି ମାଇବୁରଂ ଡୁକୁନୁଂ ପାଲ୍ପାଲ୍ ରେମଲେସା ମାଇନ୍ବକ୍ ସାକ୍ସେକ୍ ମାଇ ସୁନ'କୁନୁଂ ଉ'ସୁରାମ୍ନା ଅର୍ତ ମା ଡ'ସେକ୍ ଅ'ଗଁସ୍ଲା'ଗା' ।
11ଜିସୁଲା ଆମା'ଏ ସୁନ' “ମାପ୍ରୁନା ରାଜି ମିବାଇ' ଡ'ସେକ୍ ଜାଏସା ଆ'ନ୍ପନ୍ତେକ୍ ମମୁନାକ୍ ଡୁକୁନୁଂ ଆପେଉ ସିଦା ଅମାକ୍ ଡେନ୍ତିଂ । ଆପାଲ୍ ରେମଲେ ନିଂ ଉ'ସୁରାମ୍ ଉଡ'ସେକ୍ ଅମାକ୍ ଡେନ୍ତିଂ । 12ମାସା'ଡ'ନା ଇନ୍ତେକନ୍ଡେ'କା ଜିସାୟଲା ଉଲାକ୍ବକ୍ ମା ଲେକ୍ଲ'ବୁଂଅଁ'କୁ ଡୁ'ତୁନ୍ଉ ଡିନ୍ଡେମ୍ପୁଲେଇ ଡୁ'ତୁନ୍ ଡେମ'ତିଂ । ମାଇ ମା ଲେକ୍ଲ'ବୁଂଅଁ'କୁଗା' ଡ'ନା,
‘ମାପ୍ରୁ ମା ଡିନ୍ଡେମ୍ ଡେନ୍ତା ଗୁତୁନ୍ ମା'ଏ ଜୁତ । ଜୁଲ'ନାସା ମା'ଏ ବଲ୍ ଆମାକ୍ତ ।
ମାପ୍ରୁ ସୁନ'କୁନୁଂ ମା'ଏ ଅଂତ । ଅଂଅଁ'ସେକ୍ସା ମା'ଏ ବାସ୍ ଆମାକ୍ତ ।
ଡୁ'ତୁନ୍ ଡେଂନା ମା'ଏ ଡେମ'କୁନୁଂ ଗୁଲାଇ ପାପ୍କାମ୍ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆଆନ୍ଡେଇଁତା ମାରି ମାପ୍ରୁ ମା'ଏନା ପାପ୍ ଗୁଲାଇ କେମା ଆଡେମ୍ତ’” ଡ'ସେକ୍ ଜିସୁଲା ସୁନ' ।
ବିବି'ରେମ୍ନା ଉ'ସୁରାମ୍ନା ଅର୍ତ ଅମାକ୍ଡେନ୍
(ମାତିଉ 13:18–23; ଲୁକ 8:11–15)
13ମାରି ଜିସୁଲା ଆମା'ଏ ସୁନ' “ପେ ଗୁଲାଇର ନିଂ ଉଡ'କୁନୁଂ କେନ୍ ଉ'ସୁରାମ୍ ଆମାକ୍ତୁପେ ଡ'ନା ପାଲ୍ପାଲ୍ ଉ'ସୁରାମ୍ ଉଡ'ନା ମି ମାକ୍ତୁପେ? 14ସୁମୁ ବିବି'ରେମ୍ ସୁମୁ ବିଡ'କୁନୁଂସୁଗ ମାପ୍ରୁନା ବାନିକବର୍ ସୁଁସୁରେମ୍ ଆପାଲ୍ ରେମଲେ ମାପ୍ରୁନା ବାନିକବର୍ ସୁନ୍ତ । 15ମାରି ମାପ୍ରୁନା ବାନିକବର୍ ଅଂଅଁ'କୁନୁଂରେମ୍ ଏନ୍ତୁକ୍ର କୁରୁଂପାଲି ଡୁକୁନୁଂ ତୁବୁକ୍ସୁଗ ଡୁତା । ମା'ଏ ମାପ୍ରୁନା ତୁମ' ଅଂତ । ଅଂଅଁ'କୁନାସା ସଇତାନ୍ ସୁରୁଇ' ସାକ୍ସେ'ଗା ମା'ଏ ଅଂଅଁ'କୁନୁଂ ବାନିକବର୍ ଗୁଲାଇ ଅ'ବାନାଲ' ସୁଂତ । 16ମାରି ବୁରେକୁରିଂବକ୍ନା ତୁବୁକ୍ସୁଗ ଏନ୍ତୁକ୍ର ଡୁତା । ମା'ଏ ମାପ୍ରୁନା ତୁମ' ସୁରୁଇ' ସାର୍ଦାଡେଂସେ'ଗା ଅଂତ । 17ମାତର୍ ମା'ଏ ଆମାପ୍ରୁ ବଲ୍ ଆମାକ୍ତସା' ମା'ଏନା ଜିବନ୍ ରେ'ଗି ମଡୁକୁ ସୁଲପ୍ସୁଗ ଡୁତା । ମା'ଏ ପରେକ୍ ସାର୍ଦା ଡେଂସେକ୍ ଡୁକୁନାସା ଆମାପ୍ରୁ ବିସ୍ବାସ୍ ଡେମ'ସେ'ଗା ଡୁତାସା' ରେମଲେ ଆମା'ଏ ବୁକ୍ବୁକ୍ ସାକ୍ନା କି ମାମା ଦୁକକସ୍ଟ ମା'ଏନ୍ ଜିବନ୍ବକ୍ ସାକ୍ନା ମା'ଏ ଆମାପ୍ରୁ ବିସ୍ବାସ୍ ଡେମ'କୁନୁଂ ସୁରୁଇ' ଅଡକ୍ସୁଂତ । 18ମାରି ଗୁରାଇ'କୁରିଂବକ୍ନା ତୁବୁକ୍ସୁଗ ଏନ୍ତୁକ୍ର ଡୁତା । ମା'ଏ ମାପ୍ରୁନା ତୁମ' ଅଂତ । 19ମାତର୍ ଗୁତୁନ୍ ରେମଲେ କେନ୍ ଦେସ୍ଦୁନିଆବକ୍ ମାମା ସୁମ'ସେକ୍ ବୁରତୁନେଇ' ମି ଡେଂସେକ୍ ଡୁତୁନେଇ' ଡ'ସେକ୍ ମାରି ମି ଡେମ'ନା ଅବୁଦି ସାକାର୍ ଏତୁନେଇ' ଡ'ସେକ୍ ମାରି ପାଲ୍ପାଲ୍ ମାମା ଡୁତା ଗୁତୁନ୍ ଗୁଲାଇ ବୁମ୍ବାମ୍ପୁଲେଇ ଅବୁଦି ମୁନ୍ ଡେଂସେକ୍ ଡୁତା । ସା' ମାପ୍ରୁନା ବାନିକବର୍ ମା'ଏ ବାନାତା ମାରି ବଲ୍କାମ୍ ଡିନ୍ଡେମ୍ ଆଗଂତା । 20ମାରି ବାନିବାଇ' ତୁବୁକ୍ସୁଗ ଏନ୍ତୁକ୍ ରେମଲେ ଡୁତା । ମା'ଏ ମାପ୍ରୁନା ତୁମ' ଅଂତ । ଅଂଅଁ'ସେକ୍ ଗୁତୁନ୍ ଅଂଅଁ'କୁନୁଂ ତୁମ' ଏତ୍ବକ୍ ବଲ୍ ବୁଂତ ମାରି ବଲ୍କାମ୍ ଡେମ୍ତ । ଗୁତୁନ୍ ତୁବୁକ୍ବକ୍ ତୁର୍ବି'କୁନୁଂ ସୁମୁ ବଲ୍ ଗିଲେସୁ'ଉକ୍ନା ଅୟ'ସିଡ'ନା ତିରିସ୍ ଗୁନ୍, ସାଟେ ଗୁନ୍ ମାରି ସଏ ଗୁନ୍ସା ବାମ୍ତା ।”
ବତିନା ଉ'ସୁରାମ୍
(ଲୁକ 8:16–18)
21 #
ମାତିଉ 5:15; ଲୁକ 11:33 ମାରି ଜିସୁଲା ସୁନ' “ଡିଂଅଁବକ୍ ଜାଏସା ବତି ଅ'ଡଲ'ସେକ୍ କିକ୍ ଆଲୁଂ ଆରାକ୍ନା କଟ୍ ଆଲୁଂ ବୁଂତ ଇ? ଆରାକ୍, ଇନ୍ଡଇ'ଏସା ଡୁ'ତୁନ୍ ଆବୁଂତ । ମା'ଏ ମିଏସା ଗୁତୁନ୍ ବତି ଗୁଲାଇ କୁନ୍ଡା ତାରେଇ' ଡ'ସେକ୍ ବତି ବୁଂବୁଂନା ତାନ୍ବକ୍ଉ ବୁଂତ ।” 22#ମାତିଉ 10:26; ଲୁକ 12:2ସା' ଆ'ନା ମାମା ରୁକ୍ସାଗ' ବୁଂଅଁ'କୁନୁଂ ଗୁଲାଇଉ ତୁନାତା । ମାରି ମ'ସୁଇ' ମ'ମାକ୍ ଡେମ'କୁନୁଂ ଗୁଲାଇଉ ଜୁଜୁ ଗଂତା । 23ମାରି ଜିସୁଲା ସୁନ' “ନିଂ ସୁନ'କୁନୁଂ ଉ'ସୁରାମ୍ ମା ଡ'ସେକ୍ ମାଗ୍ମାକ୍ପୁଲେଇ ଆପେ ମୁନ୍ ଡୁକୁନା ପେ ବଲ୍ ଅଂଅଁ'କୁଲା” ଡ'ସେକ୍ ସୁନ' ।
24 #
ମାତିଉ 7:2; ଲୁକ 6:38 ମାରି ଜିସୁଲା ସୁନ' “ମାପ୍ରୁନା ତୁମ' ସୁଁସୁବେଲା ଗୁତୁନ୍ ଗୁଲାଇଉ ପେ ବାନି ଅଂଅଁ'ସେକ୍ ଡୁକୁଲା । ପେ ମି ଡେମ୍ତୁପେ ଗୁତୁନ୍ ସମାନ୍ ଆପେସା ବେ'ତ । ପେ ବଲ୍ ଅଂଅଁ'ନା ଆଇ'ତୁନ୍ ଆରା'ଗେ ମାରି ଅଦିକ୍ ମାଗ୍ମାକ୍ପୁଲେଇ ମାପ୍ରୁ ଆପେ ବୁଦି ବେ'ତ । 25#ମାତିଉ 13:12; 25:29; ଲୁକ 19:26ଜାଜା ବଲ୍ ଅଂତ ଆମାଇ ମାପ୍ରୁ ମାରି ଅବୁଦି ବୁଦି ବେ'ତ । ଜାଜା ବଲ୍ ଆଅଂତ ମା'ଏନ୍ବକ୍ ଇ'କିସୁଗ ବୁଦି ଡୁକୁନୁଂସା ମାପ୍ରୁ ରିଂଅଁ' ଡୁଂତା” ଡ'ସେକ୍ ଆମା'ଏ ସୁନ' ।
ବିଡ'କୁନୁଂ ସୁମୁ ମି ତୁର୍ବିକ୍ସେକ୍ ମୁନା'ତା?
26ମାପ୍ରୁ ମି ରେମଲେନ୍ ଜିବନ୍ବକ୍ ମାଇନା ରାଜି ଅ'ରଇଁତ ଡ'ସେକ୍ ମାରି ମୁଇ ଉ'ସୁରାମ୍ ଉଡ'ସେକ୍ ଜିସୁଲା ଅମାଗ' । “ମାପ୍ରୁନା ରାଜି ମୁଇନ୍ଡା ବୁରଂବକ୍ ସୁମୁ ବିଡ'କୁନୁଂସୁଗ ଡୁତା। 27ବିଡ'ସେ'ଗା ମାଇ ତୁମୁଂଗ ଲେମ'ତା, ଇନ୍ଜୁର୍ ମୁରାକ୍ସେକ୍ ବୁରଂବକ୍ ଉଇସେକ୍ ପାଲ୍ ମାମା କାମ୍ ଡେମ୍ତ । ମାତର୍ ଗୁତୁନ୍ ବିଡ'କୁନୁଂ ସୁମୁ ଆ'ଇଦିନ୍ ତିର୍ଗି' ମି ତୁର୍ବିକ୍ସେକ୍ ମୁନା'ତା ଗୁତୁନ୍ ମାଇ ଆମାକ୍ତ । 28ମାସା'ଡ'ନା ଗୁତୁନ୍ ସୁମୁ ତୁର୍ବି'ପୁଲେଇ ତୁବୁକ୍ଉ ସାନ୍ଡୁଂତ । ସିଁସେଇଁ ତୁର୍ବିକ୍ସେକ୍ ଉଲାକ୍ତା ମାରି କେନ୍ଡା ସାପ୍ତା । ଗୁତୁନ୍ ତିର୍ଗି' ଗିଲେକ୍ସେକ୍ ବୁଲୁତା । 29ବୁଲୁକ୍ନା ଗୁତୁନ୍ ବିବି'ଡା ଅ'ରଇଁ ସକ୍ସେକ୍ ଅଇ'ସିସି'ନ୍ବେଲା ଡେଂଗା' ଡ'ସେକ୍ ଅଇ'ତ ସି'ତ ।”
ସର୍ସୁ ମନ୍ଜିନା ଉ'ସୁରାମ୍
(ମାତିଉ 13:31–34; ଲୁକ 13:18–19)
30ଜିସୁଲା ମାରି ସୁନ' “ଆପେ ଅମାକ୍ପୁଲେଇ ଇମ୍ବ'ନ୍ ଉ'ସୁରାମ୍ ଉଡ'ନା ମାପ୍ରୁନା ରାଜି ମିବାଇ' ଡ'ସେକ୍ ପେ ମାକ୍ତୁପେ ଡ'ସେକ୍ ନିଂ ଏତ୍ଗୁତିଂ । ଆପେ ଅମାକ୍ପୁଲେଇ ନିଂ ମୁଇ ଉ'ସୁରାମ୍ ଉ'ତିଂ, 31ମାପ୍ରୁନା ରାଜି ମୁଇ ସର୍ସୁ ମନ୍ଜିସୁଗ ଡୁତା । ଗୁତୁନ୍ ସର୍ସୁ ମନ୍ଜି ଦର୍ତନିବକ୍ ଡୁକୁନୁଂ ଗୁଲାଇ ମନ୍ଜିକୁରୁଂ ଅବୁଦି ଡାଉବାଇ' । 32କେନା ଡାଉବାଇ' ଡ'ନାସା' ଗୁତୁନ୍ ତୁର୍ସେକ୍ ଡିନ୍ଜାବୁର୍ବକ୍ ଡୁକୁନୁଂ ଆଗୁଲାଇ ସୁଲ'ବେ ଜିନ୍ତା । ଗୁତୁନ୍ ମୁନାକ୍ସେକ୍ ମୁନା'ମୁନା'ବାଇ' କେନ୍ଡା ଡେନ୍ତା । ମାରି ଗୁତୁନ୍ ମୁନା'ମୁନା'ବାଇ' କେନ୍ଡାଲେବକ୍ ପୁରି'ସୁରଇ'ଏ ଇନ୍ସାକ୍ପି' ଇନ୍ସାଗ'ସେକ୍ସା ଡୁକୁ ଗଂତା ।”
33ଡି'କେନା ଜିସୁଲା ରେମଲେ ବଲ୍ ମାଗ୍ମାକ୍ପୁଲେଇ ଅବୁଦି ଉ'ସୁରାମ୍ ଉଡ'ସେକ୍ ଅମାଗ'କୁ । 34ଡୁ'ତୁନ୍ଉ ଉ'ସୁରାମ୍ ମଉନୁ' ମାଇ ଆରେମଲେ ମାଏସା ଅମାଗ' ଆଡୁତା । ମାତର୍ ଜିସୁନା ସିସ୍ୟଲେ ଗୁତୁନ୍ ଉ'ସୁରାମ୍ ବଲ୍ ଆମାକ୍ତ ଡ'ନା ପାଲ୍ ରେମଲେ ଜାଏସା ମଡୁକୁବେଲା ମାଇ ଆମା'ଏ ବଲ୍ ଅମାଗ'କୁ ।
ଉଇଡାକ୍ସା ଜିସୁନା ତୁମ' ଅଂଅଁ'ତା
(ମାତିଉ 8:23–27; ଲୁକ 8:22–25)
35ଉନ୍ତ୍ ମୁନ୍ଡିପ୍ ଜିସୁଲା ଆମାଇନା ସିସ୍ୟଲେ ସୁନ' “ଲ ନେଇ' କେନ୍ ସମ୍ଦର୍କିନ୍ଡାକ୍ ଜିନ୍ସେକ୍ ଇନ୍ସିପାଟ୍ ପ'ଡାନେଇ'” ଡ'ସେକ୍ ସୁନ' । 36ସା' ଆତା ଡୁକୁନୁଂ ଆରେମଲେ ଅନ୍ତୁର'ସେକ୍ ଜିସୁଲା ଇମ୍ବ'ନ୍ ଡଂଗାବକ୍ ଲେଇ'କୁଗା' ଗୁତୁନ୍ ଡଂଗାବକ୍ ଲେଇ'ସେକ୍ ମା'ଏ ଉଇଗା' । ରେମଲେ ପାଲ୍ ଡଂଗାବକ୍ ଲେଇ'ସେକ୍ ଆଜିସୁ ତେଂଗି' ଉଇଗା' । 37ଡଂଗାବକ୍ ଜିସୁଲେ ଲେଇ'ସେକ୍ ଉଇଡେଂକୁନୁଂବେଲା ଗୁତୁନ୍ ସମ୍ଦର୍କିନ୍ଡାକ୍ବକ୍ ମୁନା' ଉଇଡାଗ୍ ଗୁର୍ଡାଗ୍ ସା'ଗା' । ମାରି ଗୁତୁନ୍ ସମ୍ଦର୍କିନ୍ଡାକ୍ନା ଡାଗ୍ ତଂକୁକ୍ଡାଗ'ସେକ୍ ସା'ଗା'ସା' ଗୁତୁନ୍ ଡଂଗା ଲୁବ୍ଡାକ୍ ଡେଂକୁନୁଂସୁଗ ଡେଂଗା' ।
38ଆଇ'ତୁନ୍ବେଲା ଜିସୁଲା ଡଂଗାନା ଗି'ଡାଂକୁରୁଂ ଏର୍ବକ୍ଡିଂସେକ୍ ଲେମ'କୁଗା' । ଲେମ'କୁସା' ମାଇନା ସିସ୍ୟଲେ ଉଇସେକ୍ ଆଜିସୁଲା ରୁକ୍ତିଡ'ସେକ୍ ସୁନ' “ଅ ଗୁରୁ, ଅ ଗୁରୁ, ଇନ୍ସେଇ'ଉ, ଆ'ନା ନେଇ ଗୁଲାଇର ଲୁବ୍ଡାଗ୍ସେକ୍ ଗୁଇ'ତୁନେଇବେ, ନ ମା ଆନେଇ ଇ'କିସା ଆଏତ୍ତୁନ ଇ?” ଡ'ସେକ୍ ସୁନ' ।
39ସା' ଜିସୁଲା ମୁରାକ୍ସେକ୍ ଆତୁନ୍ ଉଇଡାକ୍ “ଜୁଗ୍ଲା, ଆଉଇଡାଗ' ” ଡ'ସେକ୍ ସୁନ' । ମାରି ଲାଇଲାଇସେକ୍ ସୁସାପ୍ଡେଂକୁନୁଂ ଆଡାଗ୍ସା “ଜୁଗ୍ଲା” ଡ' ସୁନ'ସା' ଉଇଡାକ୍ ତେପ୍ଗା' । ମାରି ଲାଇଲାଇସେକ୍ ସୁସାପ୍ଡେଂକୁନୁଂ ଡାଗ୍ସା ତେପ୍ଗା' ।
40ତିର୍ଗି' ଜିସୁଲା ଆମାଇନା ସିସ୍ୟଲେ ସୁନ' “ପେ ମାସା' ବୁତୁଂଗୁତୁପେ? ଆ'ନ୍ପନ୍ତେକ୍ ଆନିଂ ବିସ୍ବାସ୍ ଡିନ୍ଡେମ୍ ଅରଇ' ଇ?”
41ମା'ଏ ଅବୁଦି ବୁତୁଂସେ'ଗା “ମାଇ ମିବାଇ' ରେମ? ଉଇଡାକ୍ ମାରି ତଂକୁକ୍ଡାକ୍ସା ମାଇନା ତୁମ' ଅଂଅଁ'ତା” ଡ'ସେକ୍ ମା'ଏ ମା'ଏନ୍ ବିତ୍ରେ ଅଇଁୟ' ।
Currently Selected:
ମାର୍କ 4: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
