ମାର୍କ 5
5
ବୁତ୍ ସବ'କୁନୁଂ ରେମ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 8:28–34; ଲୁକ 8:26–39)
1ଜିସୁଲା ମାରି ମାଇନା ସିସ୍ୟଲେ ଗୁତୁନ୍ ସମ୍ଦର୍କିନ୍ଡାକ୍ବକ୍ ପକ୍ସେକ୍ ଗରାସିୟ ରେମଲେନା ଦେସ୍ବକ୍ ଡେଲ' । 2ଜିସୁଲା ଡଂଗାକୁରୁଂ ତୁତୁର୍ବେଲା ଅଲିରାକ୍ବାଇ' ବୁତ୍ ସବ'କୁନୁଂ ମୁଇନ୍ଡା ରେମ ରାଇ'ସାଂବକ୍କୁରୁଂ ମାଇନ୍ବକ୍ ଆଇ'କୁ ଉର' ସା'ଗା' । 3ଆମାଇ ବୁତ୍ ସବ'କୁସା' ମାଇ ଇସାଉ ଆରାଇ'ସାଂବକ୍ଉ ଡୁକୁ । ଆମାଇ ଜାଏସା ସବ'ସେକ୍ ତୁତିଂ ଡ'ନାସା ଆ'ଗଂତା ଡେଂକୁ ମାରି ସିଂକ୍ଲିବୁରଂ ତୁତିଂ ଡ'ନାସା ଆଗଂତା ଡେଂକୁ । 4ଆମାଇନା ତିତି ତିକ୍ସୁଂ ସିଂକ୍ଲିବୁରଂ ଅବୁଦି ପାଲି ତୁଲ'ରେଡ'ବୁଂଅଁ'କୁସା'ଏସା ଗୁତୁନ୍ ବୁତ୍ ସବ'କୁନୁଂ ରେମ ତିତି ତିକ୍ସୁଂବକ୍ ତୁଲ'କୁନୁଂ ସିଂକ୍ଲି ତିକ୍ସାର୍ସେକ୍ ସିସିଡ'ଲୁଲାର' ସୁଂସୁଂ । ଆମାଇ ଅବୁଦି ବପୁ ଡୁକୁଗା'ସା' ଜାଏସା ଆମାଇ ସୁସବ୍ ଆଗଂତା ଡେଂକୁ । 5ମାଇ ଗୁଲାଇ ସିମି'ଇ ଗୁଲାଇ ତୁମୁଂଗ ରାଇ'ସାଂବକ୍ବକ୍ ମାରି କୁନ୍ଡାଲେବକ୍ ୱାଇସେର' ଆଇଲାବ' ବୁଲ୍ଲ'କୁ । ମାରି ମାଇଉ ଆମାଇନା ଞେରି ବୁରେବୁରଂ ବୁକ୍ବର୍ତିବର୍ସେକ୍ସା ଡୁକୁଗା' ।
6ଗୁତୁନ୍ ବୁତ୍ ସବ'କୁନୁଂ ରେମ ଆଜିସୁଲା ସୁଲୁଂକୁରୁଂ ଜୁଲ'ସେକ୍ ଉର' ସା'ଗା' । ଉର' ସାକ୍ସେ'ଗା ଜିସୁନା ସାର୍ମ'କୁରୁଂ ଏନ୍ଡିକ୍ସେ'ଗା ଆମାଇ ସୁନ୍ଡ୍ରଗା' । 7-8ସା' ଜିସୁଲା ଆତୁନ୍ ବୁତ୍ ସୁନ' “ଅ ଅଲିରାକ୍ବାଇ' ଆତ୍ମା, ନ ଗୁତୁନ୍ ରେମନ୍କୁରୁଂ ତୁର୍ସେକ୍ ଡୁଂଆଁ” ଡ'ସେକ୍ ସୁନ'ସା' ମାଇ ଅବୁଦି ଡକ୍ତି'ତା କିରକ୍ସେକ୍ ଆଜିସୁଲା ସୁନ', “ଅ ମୁନା' ମାପ୍ରୁନା ଉଁ'ଉଁ ଜିସୁ, ନ ଆନିଂ ମା ଡିନ୍ଡେମ୍ପୁଲେଇ ଏତ୍ଗୁତୁନ? ଆନିଂ ନ ଡନ୍ଡ୍ ଆବେଡ' ଡ'ସେକ୍ ନିଂ ମାପ୍ରୁନା ଇମିବକ୍ ପର୍ମାନ୍ ସବ'ସେକ୍ ଆନ ସୁନ'ତିଂ” ଡ'ସେକ୍ ସୁନ' ।
9ସା' ଜିସୁଲା ଆମାଇ “ନନା ଇମି ମା” ଡ'ସେକ୍ ଅ'ଗଁସ୍ଲା'ଗା'। ସା' ମାଇ “ନିଂନା ଇମି ବାଇନି, ମାସା'ଡ'ନା ବାଇନି ଡ'ନା ଅବୁଦି ବୁତ୍ଲେବୁରଂ ମିସ୍ସେକ୍ ଡୁତୁନେଇ” ଡ'ସେକ୍ ସୁନ' ।
10ସା' ଗୁତୁନ୍ ବୁତ୍ ଆଜିସୁଲା ସୁନ' “ଆନେଇ ନ କେନ୍ ରାଜିକୁରୁଂ ସୁଲୁଂବକ୍ ଆବେନ୍ଟାୟ'” ଡ'ସେକ୍ ଅବୁଦି ସୁନ୍ଡ୍ରବାଲୁକ୍ସେକ୍ ସୁନ' ।
11ଆଇ'ତୁନ୍ବେଲା ଗୁତୁନ୍ କୁନ୍ଡାପାଲି ଆରାସିବି' ଗୁଗୁଇ' ବୁଲ୍ଲ'କୁ । 12ସା' ଗୁତୁନ୍ ବୁତ୍ଲେ ଆଜିସୁଲା ସୁନ' “ନ ଆନେଇ ଗୁତୁନ୍ ରାସିବି'ବକ୍ ବେନ୍ଟାୟ'ବେ', ନେଇ ଆତା ଗାଇତୁନେଇ” ଡ'ସେକ୍ ସୁନ୍ଡ୍ରବାଲୁକ୍ସେକ୍ ସୁନ'। 13ଡୁ'ତୁନ୍ ସୁନ'ସା' ପେନା ମୁନ୍ସୁଗ ଆତା ଉୟା ଡ'ସେକ୍ ଜିସୁଲା ସୁନ' । ସା' ଗୁତୁନ୍ ଅଲିରାକ୍ବାଇ' ଆତ୍ମାଲେ ଗୁତୁନ୍ ରେମନ୍କୁରୁଂ ତୁର୍ସେକ୍ ଗୁତୁନ୍ ରାସିବି'ନା ଞେରିବକ୍ ଗାଇଗା' । ସା' ରାସିବି'ଡେ ବାୟାକିଲେକ୍ସେ'ଗା ଗୁତୁନ୍ କୁନ୍ଡାକୁରୁଂ ମଲୁଂ ଅ'ଉର୍ ଅପାକ୍ ଜର୍ସେକ୍ ଆତା ସମ୍ଦର୍କିନ୍ଡାକ୍ବକ୍ ଅପକ୍ସେକ୍ ଗୁଗୁଇ' ଆର୍ଗା' । ଗୁତୁନ୍ ରାସିବି'ଡେ ଗୁଲାଇ ଏଜାଲ'ନା ଦୁଇ ଅଜାର୍ସୁଗ ଡୁକୁ ।
14ଗୁତୁନ୍ ଗିବି'ଡେ ଗୁଲାଇ ଗୁଗୁଇ'ଆର୍ଗା'ସା' ଗୁତୁନ୍ ଗୁଗୁଇ'ରେମ୍ ଗୁତୁନ୍ ମୁନା'ଉଂଗମ୍ବକ୍ ଉର' ଇକ୍ସେକ୍ ଆଗୁଲାଇର ସୁନ' ମାରି ଉନ୍ତୁ'ତ'ନାଂ ଡୁକୁନୁଂ ଉଂଗମ୍ବକ୍ସା ସୁନ' । ସା' ମା ଡେଂଗା' ଡ'ସେକ୍ ଗୁଲାଇ ଉଂଗମ୍ରେମ୍ ଜୁଜୁ ସା'ଗା' । 15ଗୁତୁନ୍ ଉଂଗମ୍ରେମ୍ ଜିସୁନ୍ବକ୍ ସାକ୍ସେକ୍ ଜୁଲ'ସା' ଆଜା ବାଇନି ବୁତ୍ ସବ'ବୁଂଅଁ' ମାଇ ବଲ୍ ଡେଂସେକ୍ ସକାବାନ୍ଦା ଅଲୁକ୍ସେ'ଗା ବଲ୍ ଲେଇ'କୁନୁଂ ମାରି ମାଇନା ଏତ୍ଗୁନ୍ ଗୁଲାଇ ବଲ୍ ଡେଂକୁନୁଂ ଜୁଲ'ସେକ୍ ଅବୁଦି ବୁତୁଂସେକ୍ ଜୁର୍ଜାକ୍ ଉଇଗା' । 16ବୁତ୍ ସବ'କୁନୁଂ ରେମ ମି ବଲ୍ ଡେଂଗା' ମାରି ରାସିବି' ମି ଡେଂସେକ୍ ଗୁଇ'ଗା' ଗୁତୁନ୍ ଗୁଲାଇ ଜୁଲ'କୁନୁଂ ରେମଲେ ଆଗୁଲାଇର ବାର୍ସୁନ' ବେଡ' । 17ସା' ଗୁତୁନ୍ ଗୁଲାଇ ଅଂଅଁ'ସେକ୍ ଆଜିସୁଲା ଇଂକେକୁରୁଂ ଡୁଂଆଁ ଡ'ସେକ୍ ରେମଲେ ସୁନ୍ଡ୍ରବାଲୁକ୍ସେକ୍ ସୁନ' ।
18ସା' ଜିସୁଲା ଡଂଗାବକ୍ ଲେଇ'ସେକ୍ ଉଇତିଂ ଡ'ସେକ୍ ତୁର୍ଗା' । ସା' ଆଜା ବୁତ୍ ସବ'ବୁଂଅଁ' ମାଇ ଆଜିସୁଲା ନିଂଲୁକ୍ ସାପ୍ତିଂ ଡ'ସେକ୍ ସୁନ' । 19ସା' ଜିସୁଲା ଆମାଇ ସୁନ' “ଆରାକ୍ ନ ଆସା'ଗା' । ପେନ୍ ଡିଂଅଁବକ୍ ଉଇସେକ୍ ପ୍ରବୁ ମି ଆନ ବଲ୍ ଡେମ' ମି ଆନ ଦୟା ଡେମ' ଗୁତୁନ୍ ଗୁଲାଇ ଆଗୁଲାଇର ନ ସୁଁ” ଡ'ସେକ୍ ସୁନ' । 20ସା' ଗୁତୁନ୍ ରେମ ଇକ୍ସେକ୍ ଜିସୁଲା ଆମାଇ ମାମା ଡେମ' ଗୁତୁନ୍ ଗୁଲାଇ ଦେକାପଲି ଉଂଗମ୍ବକ୍ ସୁନ'ସୁନ' ବୁଲ୍ଲ'କୁ । ସା' ଗୁତୁନ୍ ଅଂଅଁ'ସେକ୍ ଗୁଲାଇ ଉଂଗମ୍ରେମ୍ ଅବୁଦି କାବାକାବା ଡେଂଉଇଗା' ।
ଗୁଇ'କୁନୁଂରେମ୍ବକ୍ ଜିସୁଲା ବର'ଡେନ୍ ମାରି ଆମୁଇନ୍ଡା ସେଲାନ୍ଲା ସତକ୍ ସାକ୍ସେକ୍ ମତେପ୍ବାର୍ ଡୁକୁନୁଂବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 8:23–27; ଲୁକ 8:22–25)
21ଜିସୁଲା ଡଂଗାବକ୍ ଲେଇ'ସେକ୍ ସମ୍ଦର୍କିନ୍ଡାକ୍ ଇନ୍ସିକୁରୁଂ ମାରି ଆନ୍ଡେଇଁଗା'ସା' ଆଜିସୁଲା ଜୁଲ'ସେକ୍ ଆତା ସମ୍ଦର୍କିନ୍ଡାକ୍ ପାଲି ରେମଲେ ଅବୁଦି ରୁନ୍ଗା' । 22ସା' ଜିଉଦିରେମଲେନା ପାର୍ତନା ଡିଂଅଁନା ମୁନା'ରେମ୍ ମୁଇନ୍ଡା ଆତା ଜିସୁନ୍ବକ୍ ସା'ଗା' । ମାଇନା ଇମି ଜାଇରସ୍ ଡ'ସେକ୍ ଡୁକୁ । ମାଇ ଆଜିସୁଲା ଜୁଲ'ସେ'ଗା ଆଇ'କୁ ଏନ୍ଡିକ୍ସେକ୍ ସୁନ୍ଡ୍ରଗା' । 23ସୁନ୍ଡ୍ରକ୍ସେକ୍ “ନିଂନା ଉଁ'ଉଁ ଡାଉ ସେଲାନ୍ଲା ଅବୁଦି ସିକ୍ସେକ୍ ଗୁଗୁଇ' ଡେନ୍ତା । ନ ଇ'କି ନିଂନା ଡିଂଅଁବକ୍ ସା'ବା । ନ ସାକ୍ସେକ୍ ଆନିଂନା ଉଁ'ଉଁ ଆଲାମ'ନା ମାଇ ବୁରତା” ଡ'ସେକ୍ ଅବୁଦି ପାଲି ଉକ୍ଉକ୍ସେକ୍ ସୁନ' ।
24ସା' ଜିସୁଲା ଜାଇରସ୍ଲାବୁରଂ ତିରେ ଉଇଗା' । ଆମାଇ ତେଂଗି' ରେମଲେସା ଅବୁଦିର ଉଇଗା' । ଅବୁଦିର ଉଇଡେଂକୁସା' ରେମଲେ ଅ'ତୁଂସାଂ ଅ'ପେଲାଇସେକ୍ ଜିସୁନା ବାଗ୍ବକ୍ ଲକ୍ବିବେ'ଡେଂକୁନୁଂସୁଗ ଡେଂକୁ । 25ଆତା ଉଇଡେଂକୁନୁଂ ରେମଲେନ୍ ବିତ୍ରେ ଆମୁଇ ସେଲାନ୍ଲା ସତକ୍ ଡେଂସେକ୍ ବନି ମତେପ୍ବାର୍ ଡୁକୁଗା' । ସା' ମାଇ ବାର ବରସ୍ ପନ୍ତେକ୍ ଡୁ'ତୁନ୍ବାଇ'ଉ ଡୁକୁ । 26ଗୁତୁନ୍ ସେଲାନ୍ଲା ଅବୁଦି ଡାକ୍ଟର୍ବକ୍ ଉଇଗା'ସା'ଏସା, ଆରାକ୍ । ମାଇନା ଡାବୁସୁଲପ୍, ଗିସିଂପୁରି' ଗୁଲାଇ ଡମ'ଉଇଗା' । ମାତର୍ ଆମାଇ ଅଦିକ୍ ଅଦିକ୍ ଡେଂସେକ୍ ଅବୁଦି କସ୍ଟ ବାଂସେକ୍ ଡୁକୁଗା' । 27-28ଗୁତୁନ୍ ସେଲାନ୍ଲା ଜିସୁଲା ବାନି ଡେମ୍ତ ଡ'ସେକ୍ ଅଂଅଁ'କୁଗା' । ସା' ନିଂସା' ଆଜିସୁନା ଇମ୍ପ' ଆଲାମ'ନା ବାନି ଡେନ୍ତିଂ ଡ'ସେକ୍ ମାଇନା ଜିବନ୍ବକ୍ ଏତ୍ଗା' । ସା' ଆଜିସୁଲା ତେଂଗି' ଉଇରେମ୍ବୁରଂ ମାଇସା ଉଇଗା' । ଉଇସେକ୍ ମାଇ ଜିସୁନା ଗି'ଡାଂକୁରୁଂ ସାକ୍ସେକ୍ ଆମାଇନା ଇମ୍ପ' କଲେ ଆଲାମ' । 29ମାଇ ଆଜିସୁନା ଇମ୍ପ' ଆଲାମ' ବେଡ'ସା' ଆଇ'କୁ ବାନି ଡେଂଗା' । ମାରି ନିଂ ବଲ୍ ଡେଂନିଂ ଡ'ସେ'ଗା ମାଇ ମାଗ' ।
30ଆଇ'ତୁନ୍ବେଲା ଜିସୁନା ଞେରିକୁରୁଂ ବପୁ ତୁର୍କୁନୁଂ ମାଗ'ସେକ୍ “ଆନିଂନା ଇମ୍ପ' ଜା ଆଲାମ'?” ଡ'ସେକ୍ ଜିସୁଲା ଆନ୍ଡେଇଁକିକ୍ସେକ୍ ଅ'ଗଁସ୍ଲା'ଗା' ।
31ସା' ମାଇନା ସିସ୍ୟଲେ ସୁନ' “ଜୁ ଆଇ'କେନ୍ ରେମ ଡୁକୁକ୍ସେକ୍ ଅ'ତୁଂସାଂ ଅ'ପେଲାଇକୁନୁଂବକ୍ ଆନିଂ ଜା ଆଲାମ' ଡ'ସେକ୍ ମିଞାଂ ନ ଅ'ଗଁସ୍ଲା'ଗୁତୁନ?” ଡ'ସେକ୍ ସୁନ' ।
32ଜିସୁଲା ମିଏସା ଆମାଇ ଜୁତିଂ ଡ'ସେ'ଗା ଆନ୍ଡେଇଁକି' ପୁଇମଂକି'କୁ । 33ସା' ଆତୁନ୍ ସେଲାନ୍ଲା ମାମା ଡେଂକୁ ଗୁତୁନ୍ ମାଇ ନିଜେ ମାଗ'ସେକ୍ ଅବୁଦି ବୁତୁଂସେ'ଗା ଜୁର୍ଜାଗ୍ସେକ୍ ଜିସୁନ୍ବକ୍ ସାକ୍ସେ'ଗା ଆମାଇ ସୁନ୍ଡ୍ରକ୍ସେକ୍ ଗୁଲାଇ ସତ୍ ସୁନ'ବେଡ' । 34ସା' ଜିସୁଲା ଆମାଇ ସୁନ' “ଅ କୁଇ', ନ ଆନିଂ ବିସ୍ବାସ୍ ଡେମ'ତୁନସା' ନ ବାନି ଡେଂନ । ସା' ସାନ୍ତିସାର୍ଦା ଡେଂସେକ୍ ନ ଆ'ନା ଉୟା । ନ ବଲ୍ ଡେଂନ'” ଡ'ସେକ୍ ସୁନ' ।
35ଡି'କେନା ସୁଁସୁବେଲା ଜିଉଦିରେମଲେନା ପାର୍ତନା ଡିଂଅଁନା ମୁନା'ରେମ ଜାଇରସ୍ ଡ'ସେକ୍ ଇମି ଡୁକୁନୁଂନା ଡିଂଅଁକୁରୁଂ ଏନ୍ତୁକ୍ର ଆତା ସାକ୍ସେକ୍ “ନ'ଉଁ ଗୁଇ'ଉଇଗା', ନ ମାରି ଆଗୁରୁଲା ୱାୟ' ଆରିଂଅଁ'ବେ” ଡ'ସେକ୍ ଆଜାଇରସ୍ଲା ସୁନ' ।
36ମା'ଏ ଅଇଁୟ'କୁନୁଂ ଜିସୁଲା ଅଂଅଁ'ସେକ୍ସା ମଉନଂସୁଗ ଆଜାଇରସ୍ଲା ସୁନ' “ନ ଆବୁତୁଂଗା' ! ଆନିଂ ନ ବିସ୍ବାସ୍ ଡେମ୍” ଡ'ସେକ୍ ସୁନ' ।
37ସା' ଅବୁଦିର ଡୁକୁଗା'ସା' ପିତର୍ଲା, ଜାକୁବ୍ଲା ମାରି ଆଜାକୁବ୍ନା ମେ' ଆଜଅନ୍ଲା ଆମା'ଏ ଇଁ'ଗେନ୍ଡ୍ରବକ୍ ଜିସୁଲା ମାଇବୁରଂ ଜାଇରସ୍ନା ଡିଂଅଁବକ୍ ୱାୟ' ଉଇଗା' , ମାରି ଆଜାଏସା ୱାୟ' ଆରିଂତା । 38ସା' ମା'ଏ ଜାଇରସ୍ନା ଡିଂଅଁବକ୍ ସା'ଗା'ସା' ଆତା ଅବୁଦିର ରୁନ୍ସେ'ଗା କିରକୁଗା' ମାରି ରେମଲେ ବୁଗ୍ବର୍ତିବର୍ସେ'ଗା ଉକ୍ସେ' ୱାଇସେ'କୁଗା' । 39ସା' ମାଇ ଡିଂଅଁବକ୍ ଗାଇସେକ୍ ଆମା'ଏ ସୁନ' “ମାସା' ପେ ଉକ୍ସେ' ୱାଇସେକ୍ସେକ୍ କିରଗୁତୁପେ? କେନ୍ ସେଲାମ୍ବୁଇ'ଗୁ ଗୁଇ' ଆଡୁତା ମାତର୍ ମାଇ ଲେମ'ଗୁତା” ଡ'ସେକ୍ ସୁନ' ।
40ସା' ଗୁତୁନ୍ ଅଂଅଁ'ସେକ୍ ରେମଲେ ଆମାଇ ଅ'ଗେୱାଲ' ବେଡ' ।
ସା' ଆତା ଡୁକୁନୁଂରେମ୍ବକ୍ ଆଗୁଲାଇର ମାଇ ବାଇରି ଅ'ତୁର'ବେଡ' । ଅ'ତୁର'ବେଡ'ସେକ୍ ଜିସୁଲାବୁରଂ ସା'କୁନୁଂ ଇଁ'ଗେନ୍ଡ୍ରବକ୍ ମାରି ଗୁତୁନ୍ ସେଲାନ୍ନା ୟଂବାବୁରଂ ମା'ଏ ସ ଲକ୍ ଗୁଇ'କୁନୁଂନା ଉନ୍ତୁ' ଉଇଗା' । 41ଗୁଇ'କୁନୁଂନା ଉନ୍ତୁ' ଉଇସେକ୍ ଜିସୁଲା ଆମାଇନା ତିତି ସବ'ସେକ୍ “ଟଲିତା କୁମ୍” ଡ'ସେକ୍ ସୁନ' । ଗୁତୁନ୍ ଅର୍ତ ମା ଡ'ନା “ଅ କୁଇ', ନ ମୁରା'ଗା ଡ'ସେକ୍ ନିଂ ଆନ ସୁନ'ତିଂ ।” 42ସା' ଗୁତୁନ୍ ବାର ବରସ୍ ଡେଂକୁନୁଂ ସେଲାନ୍ଲା ମୁରାକ୍ସେ'ଗା ଡିଂଅଁବକ୍ ଉରିଂଅଁ' । ଉରିଂଅଁ'ସା' ୟଂଡେଇଁ ବାଡେଇଁ ଜୁଲ'ସେ'ଗା କାବାକାବା ଡେଂଉଇଗା' । 43ମାରି ଜିସୁଲା ଆୟଂଡେଇଁ ଆବାଡେଇଁ ସୁନ' “ଆନିଂନା ଉଁ'ଉଁ ଜିସୁଲା ବ'ରଲ' ଡ'ସେକ୍ ପା ଆଜାଏସା ଆବାର୍ସୁନ' । ପା ଆତୁନ୍ ଗୁଲା ମାମା ସୁସୁମ୍ପୁଲେଇ ବେ'” ଡ'ସେକ୍ ସୁନ' ।
Currently Selected:
ମାର୍କ 5: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
