ମାର୍କ 6
6
ଜିସୁନା ଉଂଗମ୍ରେମ୍ ଆମାଇ ବଲ୍ ଆମାନ୍ତା
(ମାତିଉ 13:53–58; ଲୁକ 4:16–30)
1ଜିସୁଲା ଉନ୍ତ୍କୁରୁଂ ମାଇନା ସିସ୍ୟଲେବୁରଂ ନାଜରିତ୍ ଡ'ସେକ୍ ମାଇନା ନିଜର୍ନା ଉଂଗମ୍ବକ୍ ସା'ଗା' । 2ବିସ୍ରାମ୍ଦିନ୍ବକ୍ ଜିସୁଲା ମା'ଏନା ପାର୍ତନା ଡିଂଅଁବକ୍ ମାପ୍ରୁନା ତୁମ' ଆରେମଲେ ଅମାକ୍ଡେଂକୁ । ସା' ମାଇନା ତୁମ' ଅଂଅଁ'ସେକ୍ ଗୁଲାଇ ରେମଲେ କାବାକାବା ଡେଂଉଇଆର୍ଗା' ।
“କୁନା କେନ୍ ଗୁଲାଇ ଇମ୍ବ'କୁରୁଂ ବାଂଗା'ଲେଇ?” ଡ'ସେକ୍ ମା'ଏ ସୁନ' । “ଆଇ'କେନ୍ ବୁଦିଗିୟାନ୍ ମାଇ ଇମ୍ବ'କୁରୁଂ ବାଂଗା'ୟାଂ? ନେଇ' ଇନ୍ଡଇ'ଏସା ମଜୁନୁମମୁନାକ୍ ଡୁକୁନୁଂ କେନ୍ ଗୁଲାଇ କାବାକାବା ଡିନ୍ଡେମ୍ବାଇ' କାମ୍ ମାଇ ମି ଡିନ୍ଡେମ୍ ଗଂଗୁତା । 3ମାଇ ବାଡାଇରେମ ଆରାକ୍ ଇ? ମାଇ ମରିୟମ୍ନା ଉଁ'ଉଁ ଆରାକ୍ ଇ? ମାଇନା ବୁୟାଂଏଁ ଜାକୁବ୍ଲା, ଜସିଲା, ଜିଉଦାଲା, ସିମନ୍ଲା ମାରି ମାଇନା ତୁନାଲେସା ଆକେ ନେଇ'ବୁରଂ ଡୁତା । ମିଞାଂ ମାଇ କେନ୍ ଗୁଲାଇ ଡିନ୍ଡେମ୍ ଗଂଗୁତା?” ଡ'ସେକ୍ ମା'ଏ ଡୁ'ତୁନ୍ଉ ଅବୁଦି ଗୁମୁୟ'ସେକ୍ ଆମାଇ ବିସ୍ବାସ୍ ଆଡେମ୍ତ ।
4 #
ଜଅନ୍ 4:44
ଜିସୁଲା ଆରେମଲେ ସୁନ' “ଜାଏସା ମୁଇନ୍ଡା ବାବବାଦି ଡୁକୁନା ଆମାଇ ମାଇନା ନିଜର୍ନା ଉଂଗମ୍ରେମ୍, ନିଜର୍ କୁଲ୍ନା ରେମଲେ ମାରି ନିଜର୍ନା ଡିଂଅଁନ୍ରେମ୍ସା ବଲ୍ ଆମାନ୍ତା । ମାତର୍ ପାଲ୍ ଉଂଗମ୍ବକ୍ ଉଇସେକ୍ ସୁନ'ନା ମା'ଏ ବଲ୍ ମାନ୍ତା” ଡ'ସେକ୍ ସୁନ' । 5ଡୁ'ତୁନ୍ସା' ମାଇ ଆତା କାବାକାବା ଡିନ୍ଡେମ୍ବାଇ'ନା ମାଏସା କାମ୍ ଡିନ୍ଡେମ୍ ଆଗଂତା । ଆ'ଇରସୁଗ ସି ରେମ୍ବକ୍ଉ ମାଇନା ତିତିବୁରଂ ଆଲାମ'ସେ'ଗା ବଲ୍ ଡିନ୍ଡେମ୍ ଗଂକୁ । 6ମାରି ରେମଲେ ଆମାଇ ବିସ୍ବାସ୍ ଆଡେମ୍ତସା' ଜିସୁଲା କାବା ଡେଂଉଇଗା' ।
ଜିସୁଲା ଆବାରଲକ୍ ପେରିତଲେ ପାଲ୍ପାଲ୍ ଉଂଗମ୍ବକ୍ ବେନ୍ଟାଇବାର୍ଡେନ୍
(ମାତିଉ 10:5–15; ଲୁକ 9:1–6)
ତିର୍ଗି' ଜିସୁଲା ପାଲ୍ପାଲ୍ ଉଂଗମ୍ବକ୍ ବୁଲ୍ଲ' ବୁଲ୍ଲ'ସେ'ଗା ମାପ୍ରୁନା ତୁମ' ଅମାଗ' । 7ମାରି ଜିସୁଲା ଆବାରଲକ୍ ସିସ୍ୟଲେ ୱାୟ'ସେକ୍ ଆରେମଲେ ଅଲିରାକ୍ବାଇ' ବୁତ୍ଲେ ସବ'କୁନୁଂବକ୍ସା ଞୁଞପୁଲେଇ ମାଇନା ବପୁ ବେଡ'ସେକ୍ ଇମ୍ବାୟ ଇମ୍ବାୟବକ୍ ପାଲ୍ପାଲ୍ ଉଂଗମ୍ବକ୍ ବେନ୍ଟାୟ' ।
8ବେନ୍ଟାଇବାର୍ବେଲା ଜିସୁଲା ଆମା'ଏ ସୁନ' “ପେ ଉଇବେଲା ମୁଇ ବୁ'ଡୁଂଉ ସକ୍ସେକ୍ ଉୟା । ସୁସୁମ୍ପୁଲେଇ ରୁଂକୁକ୍ତୁରଇ' ମାରି ମୁନାମୁଡିଂବକ୍ ଡାବୁସୁଲପ୍ସା ରିଂଅଁ' ଆଉଇଗା' । 9ପେ ପନ୍ଡଇଁ ଅଲୁକ୍ସେକ୍ ଉୟା, ମାତର୍ ଅଲୁ'କୁନୁଂ ସକାକୁରୁଂ ପାଲ୍ ମାରି ଅଦିକ୍ ଆରିଂଗା' । 10ମାରି ପେ ମୁଇ ଉଂଗମ୍ବକ୍ ଉଇସେକ୍ ମୁଲ୍ ଇମ୍ବ'ନ୍ ଡିଂଅଁବକ୍ ଗାଇତୁପେ ଗୁତୁନ୍ ଉଂଗମ୍ବକ୍ କାମ୍ ଡୁନ୍ଡମ୍ପନ୍ତେକ୍ ଆତୁନ୍ ଡିଂଅଁବକ୍ଉ ଡୁକୁଲା । 11#ପେରିତ 13:51#ଲୁକ 10:4–11ମାରି ଇମ୍ବ'ନ୍ ଉଂଗମ୍ରେମ୍ ପେ ନେନ୍ବକ୍ ଆଗାଇଗା' ଡ'ସେକ୍ ଆପେ ଆବୁଲ'ନା ଆରା'ଗେ ପେନ୍ ତୁମ' ଆଅଂଅଁ'ନା ଗୁତୁନ୍ ଉଂଗମ୍କୁରୁଂ ଡୁଂଡୁଂବେଲା ପେନ୍ ତିକ୍ସୁଂବକ୍ ଡୁଲି ଗିଡ'କୁନୁଂ ଆତା ପୁପାସୁଂସେକ୍ ଡୁଂଆଁ । ମାସା'ଡ'ନା ମା'ଏ ବୁଲ୍କାମ୍ ଡେମ'ତା ଡ'ସେକ୍ ତିର୍ଗି'ସୁମଂ ଗୁତୁନ୍ ଡୁଲି ସାକି ସୁନ୍ତ ” ଡ'ସେକ୍ ସୁନ' ।
12ସା' ସିସ୍ୟଲେ ଗୁଲାଇର ଉଇସେକ୍ ପେ ପାପ୍କାମ୍ ଅଲିରାକ୍କାମ୍ ଅନ୍ତୁର'ସେକ୍ ପେନ୍ ଜିବନ୍ ବାଦ୍ଲି ଡେଂସେକ୍ ମାପ୍ରୁନା ବାନିକବର୍ ସବ୍ ଡ'ସେକ୍ ଆରେମଲେ ସୁନ'ସୁନ' ବୁଲ୍ଲ' । 13#ଜାକୁବ୍ 5:14ମାରି ବୁତ୍ ସବ'କୁନୁଂ ରେମଲେବକ୍ ଆବୁତ୍ଲେ ଞନ'ସେକ୍ ବଲ୍ ଡେମ' । ମାରି ଅବୁଦି ସିବାଇ' ରେମଲେବକ୍ସା ସୁ'ଉ ସୁସୁଲ'ସେ'ଗା ବାନି ଡେମ' ।
ଏରଦ୍ ରାଜା ଆଜଅନ୍ଲା ଗପେ'ଡେନ୍
(ମାତିଉ 14:1–12; ଲୁକ 9:7–9)
14 #
ମାତିଉ 16:14; ମାର୍କ 8:28; ଲୁକ 9:19 ଆଇ'ତୁନ୍ବେଲା ଗୁଲାଇକୁନ୍ଡାନ୍ ରେମଲେ ଜିସୁଲା ବଲ୍କାମ୍ ଡେମ'କୁନୁଂ ବାର୍ସୁନ'କୁସା' ଏରଦ୍ ରାଜାସା ଗୁତୁନ୍ ଅଂଅଁ' । ମାରି ଏନ୍ତୁକ୍ର ସୁନ'କୁ “ଜର୍ଦନ୍ କିନ୍ଡାକ୍ବକ୍ ଆରେମଲେ ବାପ୍ତିସ୍ମା ବେଡ'କୁନୁଂ ଗୁତୁନ୍ ଜଅନ୍ଲାଉ କେନ୍ ଜିସୁଲା । ଜଅନ୍ଲା ଗୁଇ'କୁନୁଂଆଁ ବୁରଗୁତା ଡେ ମାଡେ, ଗୁତୁନ୍ସା'ଉ ମାଇ ଡି'କେନ୍ କାବାକାବା ଡିନ୍ଡେମ୍ବାଇ' କାମ୍ ଡିନ୍ଡେମ୍ ଗଂଗୁତା” ଡ'ସେକ୍ ସୁନ' ।
15ମାରି ଏନ୍ତୁକ୍ର “ମାଇ ଇନ୍ତେକନ୍ଡେ'କା ଏଲିୟ ଡ'ସେକ୍ ଡୁକୁନୁଂ ମୁଇନ୍ଡା ବାବବାଦି” ଡ'ସେକ୍ ସୁନ' ।
ମାରି ଏନ୍ତୁକ୍ର ସୁନ' “ଇନ୍ତେକନ୍ଡେ'କା ଡୁକୁନୁଂ ବାବବାଦିଲେନ୍ ବିତ୍ରେ ଡୁକୁନୁଂ ମୁଇନ୍ଡା ବାବବାଦିସୁଗ ମାଇ ଡୁତା” ଡ'ସେକ୍ ସୁନ' ।
16ଏରଦ୍ ରାଜାଲା ଜିସୁନା ଗୁଲାଇ ବିସୟ ଅଂଅଁ'ସେକ୍ “ନିଂ ଆଜଅନ୍ଲା ଗପେଡ'ସେକ୍ ଅଗୁୟ'ସୁଂଅଁ'ବୁଂଅଁ'ନିଂ ଆ'ନା ଗୁତୁନ୍ ଜଅନ୍ଲା ମାରି ବୁରକ୍ସେକ୍ ସା'ଗୁତା” ଡ'ସେକ୍ ସୁନ' ।
17-20 #
ଲୁକ 3:19,20 ମାସା' ସୁନ' ଡ'ନା ପିଲିପ୍ ଡ'ସେକ୍ ଏରଦ୍ ରାଜାନା ମାଂ ମୁଇନ୍ଡା ଡୁକୁ, ଆମାଇନା କୁନୁଇ' ଆଏରଦିଆଲା ଏରଦ୍ଲା ବୁଂଅଁ'କୁ । ସା' ଜଅନ୍ଲା ଆଏରଦ୍ଲା ସୁନ' “ଆନନା ଇମ୍ବିଂ ନ ବୁଂବୁଂପୁଲେଇ ମାପ୍ରୁନା ନିୟମ୍ ଆରାକ୍” ଡ'ସେକ୍ ସୁନ'କୁ । ସା' ଏରଦିଆଲା ଗିସେକ୍ସେକ୍ ଆଜଅନ୍ଲା ଅଗୁଇ'ତିଂ ଡ'ସେକ୍ ଏତ୍କୁସା'ଏସା ଆଗଂତା । ମାସା'ଡ'ନା ଜଅନ୍ଲା ମୁଇନ୍ଡା ଦରମ୍ବାଇ' ମାରି ବଲ୍ରେମ୍ ଡ'ସେକ୍ ଏରଦ୍ଲା ମାଗ'କୁସା' ବୁତୁଂସେ'ଗା ଆମାଇ ବନ୍ଦିବକ୍ ସୁରୁଂଅଁ'ସେକ୍ ବଲ୍ ଜୁଲ'କୁ । ଜଅନ୍ଲା ସୁନ'କୁନୁଂ ଅଂଅଁ'ସେକ୍ ଏରଦ୍ନା ଜିବନ୍ବକ୍ ଅବୁଦି ସିନ୍ତା ସାକ୍ନାସା ମାଇନା ତୁମ' ମାରି ଅଂପୁଲେଇ ଆମାଇ ଅବୁଦି ମୁନ୍ ଡୁକୁ ।
21ମୁସିଂ ଏରଦ୍ ରାଜାନା ଜନମ୍ଦିନ୍ ସା'ଗା' । ସା'ଗା'ସା' ମାଇ ଆମାଇନା ମନ୍ତ୍ରିଲେ ଆମୁନା' ପଲିସ୍ଲେ ମାରି ଗାଲିଲି ଦେସ୍ନା ମୁନା'ମୁନା'ରେମଲେବକ୍ ୱାୟ'ସେକ୍ ମୁଇ ବଜି ବେଡ' । ଉନ୍ତ୍ଦିନ୍ ଆଜଅନ୍ଲା ଅଗୁଇ'ପୁଲେଇ ମୁଇ ସୁଜଗ୍ ଆଏରଦିଆଲା ବାଂଗା' । 22ଉନ୍ତା ଏରଦିଆନା ସେଲାମ୍ବୁଇ'ଗୁ ଆତା ବଜିବକ୍ ସାକ୍ସେକ୍ ମିମେ ମେଗା' । ମାଇନା ମିମେ ଜୁଲ'ସେକ୍ ଗୁଲାଇର ଅବୁଦି ସାର୍ଦା ଡେଂଗା' । ସା' ଏରଦ୍ ରାଜା ଆସେଲାନ୍ଲା ୱାୟ'ସେକ୍ “ଅ ମିଂ, ମା ଆନ ମୁନ୍ ଡୁତା ଗୁତୁନ୍ ଆନିଂ ଲୁ', ନିଂ ଆନ ବେ'ତିଂ” ଡ'ସେକ୍ ସୁନ' । 23ମାରି ମାଇ ସୁନ' “ନ ମା ଲୁଡ'ନାସା ନିଂ ବେ'ତିଂ । କେନ୍ ରାଜିନା ତାଡେକ୍ ବେ' ଡ'ନାସା ସତଇସା ଆନ ବେ'ତିଂ” ଡ'ସେକ୍ ତିତି ବାଡ'ସେକ୍ ସୁନ' ।
24ସା' “ନିଂ ମା ଲୁଡ'ନା ଡେନ୍ତା” ଡ'ସେକ୍ ଗୁତୁନ୍ ସେଲାନ୍ଲା ଆୟଂଡେଇଁ ସୁନ' ।
ସା' “ବାପ୍ତିସ୍ମା ବିବେ'ଡା ଜଅନ୍ନା ବ'ବ୍ ଲୁ', ୟା” ଡ'ସେକ୍ ୟଂଡେଇଁ ସୁନ' ।
25ସା' ଗୁତୁନ୍ ସେଲାନ୍ଲା ଉର' ଉଇସେକ୍ ଆରାଜା ସୁନ' “ଆନିଂ ବାପ୍ତିସ୍ମା ବିବେ'ଡା ଜଅନ୍ନା ବ'ବ୍ ମୁଇ ତାଲିବକ୍ ସେଟ୍ଟ' ରିଂଅଁ'ବେ'” ଡ'ସେକ୍ ସୁନ' ।
26ସୁନ'ସା' ରାଜା ଅଂଅଁ'ସେକ୍ ଅବୁଦି ସିନ୍ତାଲ' । ମାତର୍ ଗୁଲାଇ କିଲମ୍ରେମେ ଲେଇ'କୁନୁଂବକ୍ ଆମାଇ ତିତିବାଡ'ସେକ୍ ମା ନ ଲୁଡ'ନାସା ନିଂ ଆନ ବେ'ତିଂ ଡ'ସେକ୍ ସୁନ'କୁସା' ମାଇ ଆରାକ୍ ଡ'ସେକ୍ ସୁଁସୁ ଆଗଂତା । 27ଡୁ'ତୁନ୍ସା' ଜଅନ୍ନା ବ'ବ୍ ଗପେଡ'ସେକ୍ ସୁରୁଇ' ରିଂଅଁ' ସା'ବା ଡ'ସେକ୍ ମାଇ ଆମୁଇନ୍ଡା ବେନ୍ଟାୟ' । ସା' ମାଇ ଉଇସେକ୍ ବନ୍ଦିବକ୍ ଜଅନ୍ନା ବ'ବ୍ ଗପେଡ'ସେକ୍ ରିଂଅଁ' ସା'ଗା' । 28ରିଂଅଁ' ସାକ୍ସେକ୍ ବ'ବ୍ ମୁଇ ତାଲିବକ୍ ବୁଂଅଁ'ସେକ୍ ଆସେଲାନ୍ଲା ବେଡ' । ବେଡ'ସା' ସେଲାନ୍ଲା ଗୁତୁନ୍ ବ'ବ୍ ରିଂସେକ୍ ଆୟଂଡେଇଁ ବେଡ' । 29ଜଅନ୍ନା ସିସ୍ୟଲେ କେନ୍ ତୁମ' ଅଂଅଁ' ସାକ୍ସେକ୍ ମାଇନା ମଟ୍ ରିଂସେକ୍ ଆତିଲ'ସୁଂଅଁ' ।
ଜିସୁଲା ପାଁନ୍ସ୍ଟା ରୁଟି ମାରି ଇମ୍ବାରୁ ଆ'ଡଂବୁରଂ ପାଁନ୍ସ୍ ଅଜାର୍ ରେମଲେବକ୍ ଅ'ସୁମ୍ ଡେନ୍
(ମାତିଉ 14:13–21; ଲୁକ 9:10–17; ଜଅନ୍ 6:1–14)
30ତିର୍ଗି' ଜିସୁଲା ବେନ୍ଟାୟ'କୁନୁଂ ବାରଲକ୍ ପେରିତଲେ ସାକ୍ସେକ୍ ମା'ଏ ଉଂଗମ୍ବକ୍ ମାମା ଡେମ'କୁନୁଂ ମାରି ଆରେମଲେ ଅମାଗ'କୁନୁଂ ଗୁଲାଇ ଆଜିସୁଲା ସୁନ' । 31ମା'ଏନ୍ବକ୍ ଅବୁଦି ରେମଲେ ଉଇ ଇ'ଡେଂକୁସା' ଜିସୁନା ସିସ୍ୟଲେ ସୁସୁମ୍ପୁଲେଇସା ଉଇ ଆଗଂତା ଡେଂକୁ । ସା' ଜିସୁଲା ଆମା'ଏ ସୁନ', “ଡ ଜାଏସା ମଡୁକୁବକ୍ ଉଇସେ'ଗା ଇ'କି ପୁନ୍ଲାନେଇ'” ଡ'ସେକ୍ ସୁନ' ।
32ସା' ମା'ଏ ଗୁଲାଇର ମୁଇ ଡଂଗାବକ୍ ଲେଇ'ସେକ୍ ଜାଏସା ମଡୁକୁ ଜାଗାବକ୍ ଉଇଗା' । 33ସା' ଗିରି ଜିସୁଲେ ଉଇଡେନ୍ତା ଡ' ରେମଲେ ଜୁଲ'ସେକ୍ ଗୁଲାଇ ଉଂଗମ୍ନା ରେମଲେ ସୁରୁଇ' ଉର'ସେ'ଗା ମା'ଏନ୍ ସିଁସେଇଁଉ ଡେଲ' । 34#ମାତିଉ 9:36ଜିସୁଲେ ଡଂଗାକୁରୁଂ ତୁତୁର୍ବେଲା ଜୁଲ'ସା' ଅବୁଦି ରେମଲେ ଆତା ରୁନ୍କୁଗା' । ସା' ମାଇ ଆମା'ଏ ଆଗୁଲାଇର ଜୁଲ'ସା' ମା'ଏ ଗୁଗୁଇ'ରେମ୍ ମଡୁକୁବକ୍ନା ମେନ୍ଡାଲେସୁଗ ବିବିକ୍ ଲୁଲାଇଁକୁଗା'ସା' ଜିସୁଲା ଅବୁଦି ଲିବିସୁପ୍ଗା' । ମାରି ଆମା'ଏ ମାପ୍ରୁନା ତୁମ' ଅମାଗ' ।
35ଆମା'ଏ ଅମାଗ' ଅମାଗ' ଅବୁଦି ବେଲା ଡେଂଗା'ସା' ଜିସୁନା ସିସ୍ୟଲେ ମାଇନ୍ବକ୍ ସାକ୍ସେକ୍ ସୁନ' “ଜୁ, ଆକେ ସିମ୍ରାଗୁମ୍ରାକୁନୁଂ ଜାଗାବକ୍ ଡୁତୁନେଇ' । ଆ'ନା ଅବୁଦି ବେଲା ଡେଂଗା' । ସା' ଆଗୁଲାଇର ବେନ୍ଟାୟ'ବେ' । 36ମା'ଏ ଇନ୍ତୁ'ତ'ନାଂ ଡୁକୁନୁଂ ଉଂଗମ୍ବକ୍ ଉଇସେକ୍ ନିଜେନିଜେ ସବ'ମୁୟ' ସୁମେଇ'” ଡ'ସେକ୍ ସୁନ' ।
37ମାତର୍ ଜିସୁଲା ଆମା'ଏ ସୁନ' “ପେ ଆମା'ଏ ମାଏସା ସୁସୁମ୍ପୁଲେଇ ବେ'” ଡ'ସେକ୍ ସୁନ' ।
ସା' “ଆଇ'ତୁନ୍ ରେମଲେବକ୍ ନେଇ ମା ସୁସୁମ୍ପୁଲେଇ ବେ'ତୁନେଇଲେଇ? ଆଇ'ତୁନ୍ ରେମଲେବକ୍ ବିବେ'ପୁଲେଇ ଅବୁଦି ଡାବୁ ଡେନ୍ତା” ଡ'ସେକ୍ ଜିସୁନା ସିସ୍ୟଲେ ସୁନ' ।
38ସା' ଜିସୁଲା ଆମାଇନା ସିସ୍ୟଲେ ସୁନ' “ପେନ୍ବକ୍ ଆ'ଇ ରୁଟି ଡୁତା, ପେ ଉଇସେ'ଗା ଜୁ” ଡ'ସେକ୍ ସୁନ' ।
ସା' ମା'ଏ ଉଇସେକ୍ ଜୁଲ'ସା' “ପାଁନ୍ସ୍ଟା ରୁଟି ମାରି ଇମ୍ବାର୍ ଆ'ଡଂ ଡୁତା” ଡ'ସେକ୍ ସୁନ' ।
39ଜିସୁଲା ଆମାଇନା ରେମଲେ ସୁନ' “ଆମା'ଏ ଆଗୁଲାଇର ସେପ୍ସାକ୍ବକ୍ ଡାଡି ଡାଡି ଅଲେଇ'” ଡ'ସେକ୍ ସୁନ' । 40ସା' ମା'ଏ ମୁଇ ଡାଡିବକ୍ ପସାସ୍ଲକ୍ ମୁଇ ଡାଡିବକ୍ ସଏ ଲକ୍ ଡି'କେନା ଆମା'ଏ ଆଗୁଲାଇର ଅବୁଦି ଡାଡି ଅଲେୟ' । 41ସା' ଜିସୁଲା ଗୁତୁନ୍ ପାଁନ୍ସ୍ଟା ରୁଟି ମାରି ଇମ୍ବାରୁ ଆ'ଡଂ ତିତିବକ୍ ସକ୍ସେକ୍ ସରଗ୍ବକ୍ ତାଂଡାୟ'ସେକ୍ ଆମାପ୍ରୁ ସୁନ୍ଡ୍ରଗା' । ସୁନ୍ଡ୍ରକ୍ସେ'ଗା ମାଇନା ତିତିବୁରଂ ପାଁନ୍ସ୍ଟା ରୁଟି ସେତୁଗ'ସେକ୍ ଆଗୁଲାଇର ବାନ୍ଟାଲ'ବେ' ଡ'ସେକ୍ ଆମାଇନା ସିସ୍ୟଲେ ବେଡ' । ଗୁତୁନ୍ ଆ'ଡଂସା ଡୁ'ତୁନାଉ ବାନ୍ଟାଲ'ବେ' ଡ'ସେକ୍ ବେଡ' । 42ସା' ମା'ଏ ଗୁଲାଇର ବୁସୁପନ୍ତେକ୍ ସୁମ' । 43ମାରି ଲଲ'କୁନୁଂ ଗୁତୁନ୍ ରୁଟି ମାରି ଆ'ଡଂ ଗୁଲାଇ ଜୁକ୍ଜୁଗ'ସା' ବାରଟା ଡାମୁଂ ଡେଂଗା' । 44ଆତା ରୁଟି ସୁସୁମ୍ବକ୍ ଆଇଂଗେରେଉ ଏଜାଲ'ନା ପାଁନ୍ସ୍ ଅଜାର୍ସୁଗ ଡୁକୁଗା' ।
ଜିସୁଲା ଡାଗ୍ ବାଗ୍ବକ୍ ଉରିଂଡେନ୍
(ମାତିଉ 14:22–33; ଜଅନ୍ 6:16–21)
45ତିର୍ଗି' ଜିସୁଲା ଆରେମଲେ ଆଗୁଲାଇର ପେ ପେନ୍ ଡିଂଅଁବକ୍ ଇ'ଡା ଡ'ସେକ୍ ବେନ୍ଟାଇବାର୍ବେଲା ଆମାଇନା ସିସ୍ୟଲେ ଡଂଗାବକ୍ ସୁରୁଇ' ଅ'ଲେୟ'ସେକ୍ ନିଂନା ସିଁସେଇଁ ପେ ସମ୍ଦର୍କିନ୍ଡାକ୍ ଇନ୍ସିପାଟ୍ ବେ'ତ୍ସାଇଦା ଉଂଗମ୍ବକ୍ ଉୟା ଡ'ସେକ୍ ସୁନ' । 46ଆଗୁଲାଇର ବେନ୍ଟାୟ'ସେକ୍ ଜିସୁଲା ସାକ୍ମାଇଉ ମୁଇ କୁନ୍ଡାବାଗ୍ବକ୍ ପାର୍ତନା ଡିନ୍ଡେମ୍ପୁଲେଇ ଡାଇ'ଗା' ।
47ତୁମୁଂଗ ମାଇନା ସିସ୍ୟଲେ ଡଂଗାବକ୍ ଲେଇ'ସେକ୍ ସମ୍ଦର୍କିନ୍ଡାକ୍ ମନ୍ଜା ଡୁକୁ । ମାତର୍ ଜିସୁଲା ତୁବୁକ୍ବକ୍ ସାକ୍ମାଇଉ ଡୁକୁ । 48ଡଂଗାବକ୍ ମା'ଏ ବାରଲକ୍ ପୁପ'ବେଲା ଅବୁଦି ଉଇଡାଗ'କୁସା' ଗୁତୁନ୍ ସମ୍ଦର୍କିନ୍ଡାକ୍ବକ୍ ଅବୁଦି ତଂକୁକ୍ଡାଗ'କୁଗା' । ସା' ମା'ଏ ତୁଇଡାକ୍ତୁତୁଇ'ସା' ଆଗଂତା ଡେଂକୁ । ମାରି ମା'ଏ ଅବୁଦି କସ୍ଟସା ବାଂକୁ । ସା' ଗୁତୁନ୍ ଜୁଲ'ସେକ୍ ଜିସୁଲା ତାଇ'ସୁଗିସିଂବେଲା ଗୁତୁନ୍ ସମ୍ଦର୍କିନ୍ଡାକ୍ ବାଗ୍ବକ୍ ଉରିଂଅଁ' ଉରିଂଅଁ' ମା'ଏନ୍ବକ୍ ସୁସାପ୍ଡେଂକୁ । ମାଇ ମା'ଏନ୍ବକ୍ ସୁସାପ୍ରେମ୍ ଆମା'ଏ ରାବ୍ସେଁୟଁ'କୁନୁଂସୁଗ ଉଇଗା' । 49ସା' ମାଇ ସମ୍ଦର୍କିନ୍ଡାକ୍ ବାଗ୍ବକ୍ ଉରିଂଅଁ' ଉରିଂଅଁ' ଉଇଡେଂକୁନୁଂବକ୍ ମାଇନା ସିସ୍ୟଲେ ଜୁଲ'ସେକ୍ ଗୁତୁନ୍ ବୁତ୍ ଡେ ମାଡେ ଡ'ସେକ୍ ଗୁଲାଇର ରାକ୍ତି'ରାକ୍ବକ୍ସେ'ଗା କିରକୁଗା' । 50ଆଜିସୁଲା ଜୁଲ'ସେକ୍ ଗୁଲାଇର ବୁତୁଂଗା' ।
ସା' ଜିସୁଲା ଆମା'ଏ ସୁରୁଇ' ସୁନ' “ଆବୁତୁଂଗା', ପେ ବପୁବାଂସେକ୍ ଡୁକୁଲା, ନିଂଉ କେନା” ଡ'ସେକ୍ ସୁନ' । 51ତିର୍ଗି' ମାଇ ଡଂଗାବକ୍ ଗାଇସେକ୍ ମା'ଏବୁରଂ ଲେଇ'ଗା'ସା' ଉଇଡାକ୍ ତେବ୍ଗା' । ସା' ଗୁତୁନ୍ ଜୁଲ'ସେକ୍ ମା'ଏ ଗୁଲାଇର କାବା ଡେଂଉଇଗା' । 52ପାଁନ୍ସ୍ଟା ରୁଟି ଇମ୍ବାର୍ ଆ'ଡଂବୁରଂ ପାଁନ୍ସ୍ ଅଜାର୍ ରେମଲେବକ୍ ବେଡ'କୁନୁଂ ଜୁଲ'ସେକ୍ସା ଜିସୁନା ସିସ୍ୟଲେ ମାଇନା ବପୁ ମାଗ୍ମାକ୍ ଅରଇ' ଡେଂକୁ । ମାସା'ଡ'ନା ଗୁତୁନ୍ ଗୁଲାଇ ମା'ଏନ୍ ଜିବନ୍ବକ୍ ବୁଜ୍ବାର୍ପୁଲେଇ ଅବୁଦି କସ୍ଟ ଡୁକୁ ।
ଗିନେସରତ୍ ଉଂଗମ୍ବକ୍ ସିକୁନୁଂ ରେମଲେବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 14:34–36)
53ଜିସୁଲେ ଗୁଲାଇର ସମ୍ଦର୍କିନ୍ଡାକ୍ବକ୍ ପକ୍ସେ'ଗା ଗିନେସରତ୍ ଦେସ୍ବକ୍ ଡେଲ'ସେକ୍ ଡଂଗା ଆତା ପାଲି ତୁଲ' । 54ମା'ଏ ଡଂଗାକୁରୁଂ ତୁତୁର୍ବେଲା ସମ୍ଦର୍କିନ୍ଡାକ୍ ପାଲି ତଂକୁନୁଂ ରେମଲେ ଆଜିସୁଲା ସମଡ' । 55ସମଡ'ସେ'ଗା ଉର'ଉର' ଉଇସେକ୍ ଆଗୁଲାଇ ଉଂଗମ୍ରେମ୍ ଜିସୁଲା ସା'ଗୁତା ଡ'ସେକ୍ ସୁନ' । ସା' ଗୁତୁନ୍ କବର୍ ଅଂଅଁ'ସେକ୍ ଆଗୁଲାଇ ସିରେମ୍ ଜିସୁଲା ଆମ୍ବ' ଡୁତା ଡ' ଅଂଅଁ'ସେକ୍, ଆତା ବିନେସାକ୍ବକ୍ ରିଂଅଁ' ଉଇଗା' । 56ଜିସୁଲା ବୁରଂବକ୍ ଡୁକୁନ୍ସା ଉଂଗମ୍ବକ୍ ଡୁକୁନ୍ସା ଆଟ୍ବକ୍ ଉଇନାସା ମାରି ଆମ୍ବ' ଡୁକୁନାସା ରେମଲେ ଆସିରେମ୍ ଜିସୁନ୍ବକ୍ ୱାୟ' ରିଂଅଁ'ସେକ୍ ଅଡିରିଗ'କୁ । ଅଡିରିଗ'ସେକ୍ ରେମଲେ ଆଜିସୁଲା ସୁନ'କୁ “ଅ ଜିସୁ, ସିରେମ୍ ଆନନା ସାକ୍ଡିଂସକାସା ଇ'କି ଆଲାମେଇ'” ଡ'ସେକ୍ ସୁନ' । ମାରି ଆମାଇ ଆଲାମ'କୁନୁଂ ଗୁଲାଇ ରେମଲେ ବଲ୍ ଡେଂଗା' ।
Currently Selected:
ମାର୍କ 6: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
