ମାର୍କ 7
7
ଇମ୍ବ'ନା ବଲ୍ ଇମ୍ବ'ନା ଆସାର୍ ଡ'ସେକ୍ ଜିସୁଲା ଅମାକ୍ଡେନ୍
(ମାତିଉ 15:1–9)
1ମୁସିଂ ଆ'ଇରସୁଗ ପାରୁସିଦଲ୍ନା ରେମଲେ ମାରି ଜିଉଦିରେମଲେନା ନିୟମ୍ ଅମାକ୍ରେମ୍ ଡି'ତା ଜିରୁସାଲମ୍ ଉଂଗମ୍କୁରୁଂ ସାକ୍ସେକ୍ ଜିସୁନ୍ କନ୍ଡେକ୍ ରୁନ୍ଗା' । 2ସା' କିୟାଂ ସୁସୁମ୍ ସିଁସେଇଁ ମି ତିତି ଗୁଇ'ତିଡାକ୍ ଡୁତା ଡ'ସେକ୍ ଜିଉଦିରେମଲେନା ମୁଲର୍ବାଂସା' ଡୁକୁନୁଂ ନିୟମ୍ ମମାନ୍ବାର୍ ଜିସୁନା ସିସ୍ୟଲେ ମଗୁଇ'ତିଡାକ୍ ସୁସୁମ୍ ଡେଂକୁନୁଂବକ୍ ମା'ଏ ଜୁଲ' । 3ମାସା'ଡ'ନା ପାରୁସିଦଲ୍ନା ରେମଲେ ମାରି ଜିଉଦିରେମଲେ ମା'ଏନା ମୁଲର୍ନା ରେମଲେ ବୁଂଅଁ'କୁନୁଂ ନିୟମ୍ସୁଗ ତିତି ଗୁଇ'ତିକ୍ସେ'ଗାଉ ସୁମ'କୁ । ଗୁତୁନ୍ ନିୟମ୍ ମା'ଏ ଇସାଉ ମାନ୍ସେକ୍ ଡୁକୁ। 4ଡି'କେନା ମା'ଏ ଆଟ୍ରେମ୍ ଇକ୍ସେକ୍ସା ଇନ୍ଡଇ'ଏସା ମଗୁଇ'ତି ମଗୁଇ'ସୁଂ ଆସୁମ୍ତ । ମା'ଏ ଆଟ୍କୁରୁଂ ମାଏସା ରିଂଅଁ'ସେକ୍ସା ମଗୁଇଡାଗ୍ ଆସୁମ୍ତ । ମାରି ଗିଲାଆର୍ଲାମ୍ କିକ୍ ସା'ତି ବିନେସାକ୍ସା ଗୁଲାଇଉ ମି ତନ୍ତରି'ତ ଡ'ସେକ୍ସା ମା'ଏନା ଅବୁଦି ନିୟମ୍ ଡୁକୁ ।
5ଗୁତୁନ୍ସା' ପାରୁସିଦଲ୍ନା ରେମଲେ ମାରି ଜିଉଦିରେମଲେନା ନିୟମ୍ ଅମାକ୍ରେମେ ଆଜିସୁଲା ଅ'ଗଁସ୍ଲା'ଗା', “ନନ୍ ସିସ୍ୟଲେ ମାସା' ମୁଲର୍ନା ରେମଲେ ବୁଂଅଁ'କୁନୁଂ ନିୟମ୍ ମମାନ୍ବାର୍ ମଗୁଇ'ତିଡାକ୍ ସୁସୁମ୍ ଡେନ୍ତା?” ଡ'ସେକ୍ ଅ'ଗଁସ୍ଲା'ଗା' ।
6ଜିସୁଲା ଆମା'ଏ ସୁନ' “ଅ ନାଡାଇବାର୍ବାଇ' ରେମଲେ, ପେ ମିବାଇ' ରେମ ଡ'ସେକ୍ ଇନ୍ତେକନ୍ଡେ'କା ମାପ୍ରୁ ଆଜିସାୟଲା ସୁନ'କୁନୁଂ ଆ'ନା ସତଇସା ଡେଂଗୁତା । ମାସା'ଡ'ନା ମାପ୍ରୁ ସୁନ'କୁନୁଂ ଜିସାୟଲା ଅଂଅଁ'ସେ'ଗା ଲେକ୍ଲ'ତା, ମା ଡ'ନା:
‘କେନ୍ ରେମଲେ ଆନିଂ ସୁନ୍ଡ୍ରକୁନୁଂସୁଗ ସରଉ ଜତ୍ନେ ଅସୁଇ'ତା ।
ମାତର୍ ମା'ଏନା ଏତ୍ ନିଂକୁରୁଂ ଅବୁଦି ସୁଲୁଂ ଡୁତା ।
7ମାରି ମା'ଏ ସୁନ୍ଡ୍ରକ୍ନାସା ମାସା ଆବାମ୍ତା ।
ମାସା'ଡ'ନା ଆମା'ଏ ନିଂ ବେଡ'କୁନୁଂ ନିୟମ୍ ଆରାକ୍ ମାତର୍ ରେମଲେନା ନିୟମ୍ ଗୁଲାଇ ମା'ଏ ଆରେମଲେ ଅମାଗ'ତା’ ଡ'ସେକ୍ ସୁନ'ତା ।
8ପେ ଗୁଲାଇର ମାପ୍ରୁନା ନିୟମ୍ ଅଡକ୍ସୁଂଅଁ'ସେକ୍ ରେମଲେ ଅ'ରଇଁୟ'କୁନୁଂ ନିୟମ୍ ବଲ୍ ଡ' ସବ'ସେକ୍ ଡୁତୁପେ” ଡ' ସୁନ' ।
9ଜିସୁଲା ମାରି ଆତୁନ୍ ରେମଲେ ସୁନ', “ରେମଲେ ଅ'ରଇଁୟ'କୁନୁଂ ମୁଲର୍ନା ନିୟମ୍ ଗୁଲାଇ ଡିନ୍ଡେମ୍ପୁଲେଇ ମାପ୍ରୁ ବେଡ'କୁନୁଂ ନିୟମ୍ ଗୁଲାଇ ପେ ଅଡକ୍ସୁଂଅଁ'ତୁପେ । 10ଇନ୍ତେକନ୍ଡେ'କା ମସାଲା ସୁନ'କୁ, ‘ପେ ଗୁଲାଇର ୟଂବାନା ତୁମ' ମାନ୍ଲା । ମାରି ଜାଏସା ଆୟଂଆବା ଅଲିରାକ୍ବାଇ' ସୁନ'ନା ଆମାଇ ଅଗୁୟ' ସୁଂସୁଂ ଡୁତା’ ଡ'ସେକ୍ ସୁନ'କୁ । 11-12ମାତର୍ ଜାଏସା ମୁଇନ୍ଡା ରେମ ଆୟଂଆବା ବିବେ'ପୁଲେଇ ବୁଂଅଁ'କୁନୁଂ #7:11–12 କର୍ବାନ୍ ଡ'ନା–ଆମାପ୍ରୁ ଗେତିଂ ଡ'ସେକ୍ ବୁଂଅଁ'ତିଂ । ରେମଲେ ମା'ଏନା ଦନ୍ସମ୍ପତି ମାପ୍ରୁନା କାମ୍ ଡିନ୍ଡେମ୍ପୁଲେଇ ବେ'ତିଂ ଡ'ସେକ୍ ସୁନ'ନା ଗୁତୁନ୍ କର୍ବାନ୍ ଡ'ସେକ୍ ସୁନ୍ତ । ଡୁ'ତୁନ୍ ବୁଂଅଁ'ନା ଗୁତୁନ୍ ଡାବୁବୁରଂ ଆମା'ଏନା ୟଂବା ଜୁଜୁପୁଲେଇ ବିବେ' ଦର୍କାର୍ ଆରାକ୍ ଡ'ସେକ୍ ସୁନ୍ତ ମାତର୍ ମା'ଏ ଆମାପ୍ରୁ ମବିନେ' ତରଇ'ନା ମୁନ୍ସୁଗ ଡେମ'କୁ ।କର୍ବାନ୍ (ଡ'ନା ଆପା ବିବେ'ପୁଲେଇ ବୁଂଅଁ'କୁନୁଂ ଆ'ନାବାଂସା' ଆମାପ୍ରୁ ଗେତିଂ ଡ'ସେକ୍ ବୁଂଅଁ'ତିଂ, ଆ'ନାବାଂସା' ଆପା ବାସ୍ ଆବେ'ତିଂ) ଡ'ସେକ୍ ସୁଁ ଡ'ସେକ୍ ଆପାଲ୍ରେମ ଅମାଗ'ତୁପେ । 13ରେମଲେ ଅ'ରଇଁୟ'କୁନୁଂ ନିୟମ୍ ଗୁଲାଇ ଅମାକ୍ପୁଲେଇ ପେ ମାପ୍ରୁନା ନିୟମ୍ ଗୁଲାଇ ଅଡକ୍ସୁଂଅଁ'ତୁପେ । ମାରି ପେ ଡୁ'ତୁନ୍ବାଇ' ଅବୁଦି ଅବୁଦି କାମ୍ ଡେମ'ସେକ୍ ଡୁତୁପେ” ଡ'ସେକ୍ ସୁନ' ।
ଆମୁଇନ୍ଡା ରେମ ମାମା ଅଲିରାକ୍ ଡିନ୍ଡେମ୍ ଗଂତା ଡ'ସେକ୍ ଅମାକ୍ଡେନ୍
(ମାତିଉ 15:10–20)
14ଜିସୁଲା ଆତା ରୁନ୍କୁନୁଂ ଆରେମଲେ ମାଇନ୍ବକ୍ ୱାୟ'ସେକ୍ ଆମା'ଏ ସୁନ' “ନିଂ ମାମା ସୁନ୍ତିଂ ଗୁତୁନା ପେ ଗୁଲାଇର ଅଂଅଁ'ସେକ୍ ପେନ୍ ଏତ୍ବକ୍ ବଲ୍ ବୁଂଅଁ'କୁଲା । 15ରେମଲେ ମାମା ସୁମ'କୁନୁଂ ସୁଲଇ' ବିତ୍ରେ ଗାଇସେକ୍ ଆମା'ଏ ଅଲିରାକ୍ ଆଡେମ୍ତ । ମାତର୍ ରେମଲେନା ଜିବନ୍ ବିତ୍ରେକୁରୁଂ ମାମା ତୁର୍ତା ଗୁତୁନାଉ ଆମା'ଏ ଅଲିରାକ୍ ଡେମ୍ତ । 16(ନିଂ ସୁନ'କୁନୁଂ ମା ଡ'ସେକ୍ ମାଗ୍ମାକ୍ପୁଲେଇ ଆପେ ମୁନ୍ ଡୁକୁନା ପେ ବଲ୍ ଅଂଅଁ'କୁଲା)” ଡ'ସେକ୍ ସୁନ' ।
17ଆମା'ଏ ଗୁତୁନ୍ ସୁନ'ସେ'ଗା ଜିସୁଲେ ମୁଇ ଡିଂଅଁବକ୍ ଗାଇଗା' । ସା' ମାଇନା ସିସ୍ୟଲେ ମାଇ ଆ'ନା ବାର୍ସୁନ'କୁନୁଂ ଉ'ସୁରାମ୍ନା ଅର୍ତ ମା ଡ'ସେକ୍ ଆମାଇ ଅ'ଗଁସ୍ଲା'ଗା' । 18ସା' ଜିସୁଲା ଆମା'ଏ ସୁନ' “ନିଂ ସୁନ'କୁନୁଂ ପେସା ଆମାକ୍ତୁପେ ଇ? ରେମଲେ ମା ସୁମ'ନାସା ଗୁତୁନା ବିତ୍ରେ ଗାଇସେକ୍ ଆମା'ଏ ଅଲିରାକ୍ ଆଡେମ୍ତ ଡ'ସେକ୍ ଆମାକ୍ତୁପେ ଇ? 19ଗୁତୁନ୍ ମାମା ସୁମ'କୁନୁଂ ମା'ଏନା ଜିବନ୍ ବିତ୍ରେ ଆଗାଇତା, ସିଦା ସୁଲଇ'ବକ୍ ଗାଇତା ମାରି ସୁଲଇ'ବକ୍ ଜିର୍ସେକ୍ ଜାଡା ଉଇତା ।” କେନ୍ ଉ'ସୁରାମ୍ବକ୍ ଗୁଲାଇ ସୁସୁମ୍ନା ବଲ୍ ଡ'ସେକ୍ ଜିସୁଲା ସୁନ'ତା ।
20ଜିସୁଲା ମାରି ସୁନ' “ରେମଲେନା ଜିବନ୍ବକ୍ ଏତ୍କୁନୁଂଉ ଆମା'ଏ ଅଲିରାକ୍ ଡେମ୍ତ। 21ମାସା'ଡ'ନା ମୁଇନ୍ଡାନା ଜିବନ୍ବକ୍ ଅଲିରାକ୍ବାଇ' ଏତ୍ ସାପ୍ତା । ମାରି ଜାଲିବାଇ', ଡୁଂଗା'ବାଇ', ଟାକ୍ରିବାଇ', 22ବାୟାବାଇ', ଲାଡ୍ସିବାଇ', ନାଡାଇବାର୍ବାଇ', ଗୁମୁଇସୁପ୍ବାଇ', ଆଂକାର୍ବାଇ', ଅସୁଇ'ଲଂବାଇ', ବଡ୍ପୁନ୍ୟାବାଇ', ମୁର୍କବାଇ' ଡି'କେନା ଅବୁଦି ଅଲିରାକ୍ବାଇ' ରେମଲେନା ଜିବନ୍ବକ୍ ସାପ୍ତା । 23କେନ୍ ଅଲିରାକ୍ବାଇ' ଗୁଲାଇ ଜିବନ୍ ବିତ୍ରେକୁରୁଂ ସାପ୍ତା । ମାରି ଗୁତୁନ୍ ଅଲିରାକ୍ବାଇ'ନା ଗୁଲାଇ ଆମା'ଏ ନାସାଇତ ।”
ମୁଇନ୍ଡା ଡିୟଂକୁ'ୟା ଆଜିସୁଲା ବିସ୍ବାସ୍ ଡିନ୍ଡେମ୍ଡେନ୍
(ମାତିଉ 15:21–28)
24ତିର୍ଗି' ଜିସୁଲା ଗାଲିଲି ଉଂଗମ୍କୁରୁଂ ସର ଡ'କୁନୁଂ ଉଂଗମ୍ବକ୍ ଉଇଗା' । ଉଇସେକ୍ ମୁଇ ଡିଂଅଁବକ୍ ଗାଇସେକ୍ ନିଂ ଆକେ ଡୁତିଂ ଡ'ସେକ୍ ଜାଏସା ଆମାଗେଇ' ଡ'ସେକ୍ ଡିଂଅଁବକ୍ଉ ଡୁକୁଗା' । ଡୁ'ତୁନ୍ ଏତ୍ସେକ୍ ଡୁକୁଗା'ସା'ଏସା ରେମଲେ ଗୁଲାଇର ମାଇ ଆତା ଡୁତା ଡ'ସେକ୍ ମାଗ' । 25ଜିସୁଲା ଆତା ସା'ଗୁତା ଡ'ସେକ୍ ମୁଇ ଡିୟଂକୁଇ'ସା ଅଂଅଁ' । ଆମାଇନା ଉଁ'ଉଁ ଅଲିରାକ୍ବାଇ' ବୁତ୍ ସବ'ବୁଂଅଁ'ସା' ମାଇ ଜିସୁନ୍ବକ୍ ସାକ୍ସେକ୍ ଜିସୁନା ତିକ୍ସୁଂକନ୍ଡେକ୍ ଏନ୍ଡିକ୍ସେକ୍ ସୁନ୍ଡ୍ରଗା' । 26ଗୁତୁନ୍ ଡିୟଂକୁଇ' ଜିଉଦିରେମ ଆରାକ୍ । ମାଇ ସୁରପନିକିୟା ଦେସ୍ନା ରେମ । ମାଇ ଗିରିକ୍ସାମ୍ ଅଇଁୟ'କୁ । ମାଇ “ଆନିଂନା ଉଁ'ଉଁ ବୁତ୍ ସବ'ତା, ନ ବଲ୍ ଡେମ୍” ଡ'ସେକ୍ ଆଜିସୁଲା ସୁନ' ।
27ଜିସୁଲା ଆମାଇ ସୁନ' “ଗୁବୁଲେପୁଲେଇ ଡୁକୁନୁଂ ରୁଟି ଆଗୁସୁ'ଡେ ବିବେ' ବଲ୍ ଆରାକ୍ । ସିଁସେଇଁ ଗୁବୁଲେ ସୁମ'ସେ'ଗା ବ'ସୁଲେଇ'” ଡ'ସେକ୍ ସୁନ' ।
28ସା' ଗୁତୁନ୍ ଡିୟଂକୁଇ' ଆଜିସୁଲା ସୁନ' “ଅଁ'ଅଁ ଗୁରୁ, ନ ସୁନ'କୁନୁଂ ସତ୍ । ମାତର୍ ଗୁବୁଲେ ସୁସୁମ୍ବେଲା ଗିଲାକୁରୁଂ ମୁଇମୁଇ ମ'ଜାଂ ଲ'କୁନୁଂ ଗୁସୁ'ଡେସା ସୁମ'ତା” ଡ'ସେକ୍ ସୁନ' ।
29ସା' ଜିସୁଲା ଆତୁନ୍ ଡିୟଂକୁ'ୟା “ନ ବଲ୍ ସୁନ'ନ । ନ ବଲ୍ ସୁନ'ନସା' ନ ଆ'ନା ଡିଂଅଁବକ୍ ଉୟା; ଆନନା ଉଁ'ଉଁ ବୁତ୍ ସବ'କୁନୁଂ ମାଇନା ଞେରିକୁରୁଂ ତୁର୍ ଡୁଂସେକ୍ ବଲ୍ ଡେଂକୁନୁଂ ନ ଜୁତୁନ” ଡ'ସେକ୍ ସୁନ' ।
30ଗୁତୁନ୍ ଡିୟଂକୁ'ୟା ମାଇନା ଡିଂଅଁବକ୍ ଇକ୍ସେ'ଗା ଜୁଲ'ସା' ମାଇନା ଉଁ'ଉଁ କଟ୍ବକ୍ ବଲ୍ ଡିରି'କୁଗା' । ମାରି ବୁତ୍ସା ମାଇନା ଞେରିକୁରୁଂ ତୁର୍ସେ'ଗା ଡୁଂକୁଗା' ।
ଜିସୁଲା ବଇରା କନ୍ଦାବାଇ' ରେମବକ୍ ବଲ୍ ଡିନ୍ଡେମ୍ଡେନ୍
31ମାରି ଜିସୁଲା ସର ଡ'କୁନୁଂ ଉଂଗମ୍କୁରୁଂ ସିଦନ୍ ଉଂଗମ୍ବକ୍ ଉଇସେକ୍ ଉନ୍ତ୍କୁରୁଂ ଦେକାପଲି ଦେସ୍ବକ୍ ଉଇଗା' । ମାରି ଉନ୍ତ୍କୁରୁଂ ଗାଲିଲି ଜିଲାବକ୍ ଡୁକୁନୁଂ ସମ୍ଦର୍କିନ୍ଡାକ୍ବକ୍ ଉଇଗା' । 32ଆତା ରେମଲେ ଆମୁଇନ୍ଡା ବଇରା କନ୍ଦାବାଇ'ବକ୍ ଜିସୁନ୍ବକ୍ ୱାୟ' ରିଂଅଁ'ସେକ୍ ନନା ତିତିବୁରଂ ଆଲାମ'ସେକ୍ ଆମାଇ ବଲ୍ ଡେମ୍ ଡ'ସେକ୍ ସୁନ' ।
33ଜିସୁଲା ଆତୁନ୍ ବଇରାକନ୍ଦାଲାଉ ୱାୟ' ଅ'ତୁର'ସେକ୍ ଇ'କି ଡକ୍ରି'ତା ୱାୟ' ଉଇଗା' । ୱାୟ' ଉଇସେକ୍ ଜିସୁଲା ମାଇନା ଉନ୍ଡ୍ରୁୱାଇ'ତି ଆମାଇନା ଇମ୍ବାର୍ ଲୁନ୍ତୁର୍ବକ୍ ସୁରୁଂଅଁ'ବେଡ' । ମାରି ଜିସୁଲା ମାଇନା ଉନ୍ଡ୍ରୁୱାଇ'ତିବକ୍ ବୁଇ'ତୁର୍ସେ'ଗା ଆମାଇନା ଲେ'ୟାଂ ଅଗିଡ' ବେଡ' । 34ଅଗିଡ'ସେକ୍ ଜିସୁଲା ସରଗ୍ବକ୍ ତାଂଡାୟ'ସେ'ଗା ମୁନା'ବାଇ' ଆତୁ'ଗା' । ଆତୁକ୍ସେକ୍ “ଇପତ୍” ଡ'ସେକ୍ ସୁନ' । ଇପତ୍ ଡ'ନା “ରୁକ୍ଉୟା” ଡ'ସେକ୍ ଅର୍ତ ଡୁତା । 35ସା' ମାଇନା ଲୁନ୍ତୁର୍ ସେଟ୍ଟ' ଅଂଅଁ' ମାରି ମାଇନା ତୁମ' ସେଟ୍ଟ' ତୁର୍ଗା'ସା' ମାଇ ବଲ୍ ଅଇଁୟ' ।
36ମାରି ମାଇ ମି ବଲ୍ ଡେଂଗା' ଡ'ସେକ୍ ଆଜାଏସା ଆସୁନ' ଡ'ସେକ୍ ଜିସୁଲା ଆଗୁଲାଇର ସୁନ' । ସୁନ'କୁସା'ଏସା ମା'ଏ ଆଗୁଲାଇର ଅଦିକ୍ ଅଦିକ୍ ସୁନ'ବେଡ' । 37ସା' ରେମଲେ ମା'ଏ ସୁନ'କୁନୁଂ ଅଂଅଁ'ସେକ୍ ଅବୁଦି କାବା ଡେଂଉଇସେକ୍ “ଜିସୁଲା ଗୁଲାଇ ବଲ୍ ଡେମ'ତା, ମାଇ ବଇରାବାଇ'ବକ୍ ମାରି କନ୍ଦାବାଇ'ବକ୍ ବଲ୍ ଡେମ'ସା' କନ୍ଦାବାଇ' ଅଇଁ ଗଂଗା' ମାରି ବଇରାବାଇ' ଅଂ ଗଂଗା'” ଡ'ସେକ୍ ବାର୍ସୁନ' ବାର୍ସୁନ'ସେକ୍ ଡୁକୁ ।
Currently Selected:
ମାର୍କ 7: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
