ଲୁକ 1
1
ତିଅପିଲ ବାଗାଟି
1ଏ ଜେଡାଗାଟି ତିୟପିଲ, ଜିସୁତି ଆଙ୍ଗୁଲ୍ କାମା ମ୍ରାନ୍ଦିତାୱାଟି ଏମ୍ୱେ ନିଜ୍ଜାନେଃଏ ତା ସାକି ଆନ୍ନେରି ଅଟେ ଦାର୍ମୁ ବାକ୍ୟ ପ୍ରଚାର କିଆନ୍ନାରି, ଏୱାରି ମାଙ୍ଗେ ସର୍ପି କିଆଞ୍ଜାନ୍ ଡେହେଙ୍ଗ୍, 2ମା ପାଟ୍ଟି ଗଟିଆଚ୍ଚି କାହେତି ଡୁଣ୍ଡେଲ୍ କୁଲାଟି ହାବେତାରି ମାନିଟି ୱ୍ରିଗନ୍ ବାଗା ଇଚ୍ଚା କିଆନ୍ନେରି । 3ଏଦାବାଗା ଏ ଜେଡାଗାଟି ତିୟପିଲ କାହେଟେଃଏ ହାବେତ୍ କୁଲା ନେହେନ୍ ଦାହାନାହି ଏ କୁଲା ହାବେ ନି ବାଗାଟି ନାନୁ ରହାନାହି ୱ୍ରିଗନ୍ ବାଗା ଏଲୁ କିତେ । 4ଇନିସ୍କି ଏ ହାବେତ୍ କୁଲା ନିନୁ ଗ୍ରାମ୍ବାଞ୍ଜି, ଏୱା ହାବେ ନିଜ୍ଜାନେଃଏ ପୁନ୍ବନ୍ ମୁଦି, ଏଦାବାଗା ନାନୁ ୱ୍ରିଗେଞ୍ଜା ।
ଡୁବନ୍ ହିନ୍ନି ଜହନ ପ୍ଲିଅନ୍ତି କାତା
5ଜିହୁଦା ଦେସାତି ରାଜେଞ୍ଜି ହେରଦ ତୁକାତାୱା ଅବିୟଙ୍ଗ୍ତି ଦାଲ୍ଲା ତାୱାଟି ଜିକରିୟ ପାରୁଟି ରଃଅଞ୍ଜି ଜାଜକ ମାଚ୍ଚେଞ୍ଜି; ତା କୁଆଲୁ ହାରନ ପୁଣ୍ଡିତି ମ୍ରାଗା ମାଚ୍ଚେ, ତା ପାରୁ ଏଲିସାବେତ୍ । 6ଏ ପଣ୍ଡ୍ରି ଦାର୍ମୁତି ହାବେତ୍ ଆଗ୍ୟାଁ ଅଟେ ହାଜୁତିଦି ପାଲ୍ନି ଆନ୍ ଇନ୍ନି ଦୁସି ଆଃଏଟେଃଏ ମୁଲାପେନୁତି ନକେସି ଦାର୍ମିକ ମାଚ୍ଚେରି । 7ଇନାକି ଏଲିସାବେତ୍ ୱାଞ୍ଜାଗାଟାଦି ମାଚ୍ଚି ବାଗାଟି ଏୱାରି ବଦାଙ୍ଗ୍ ପାଁଣ୍ଡେହେଃଲ୍ଲାତେରି, ଆଟେ ଏ ରିଃଆରି ଗାପ୍ଚି ଅଁଣ୍ଡୁ ଆଇଚ୍ଚେରି ।
8 ଏୱାଞ୍ଜି ତା ଦାଲ୍ଲାତି ପାଲୁ ଡେହେଙ୍ଗ୍ ମୁଲାପେନୁତି ନକେସ୍ ଜାଜକତି ଆଙ୍ଗୁଲ୍ କାମା କିଚ୍ଚି ତୁକାତାୱା, 9ଜାଜକ କାମାତି ହାଜୁ ଡେହେଙ୍ଗ୍ ଗୁଲ୍ଲିଙ୍ଗ୍ ଡ଼ାହି ଆଚି କିଆନ୍ ଏୱାଞ୍ଜିକି ଦାର୍ମୁତି ଇଡ୍ଡୁତାୱା ହଲଜାନାହି ଦୁପ ହିଅନ୍ତିକି ଆତେ, 10ଆଟେ ଦୁପ ହିଚ୍ଚି ତୁକାତାୱା ହାବେ ଦାଲ୍ଲା କାଟ ପ୍ରାତ୍ନା କିଚ୍ଚେରି । 11ଏଚିତୁକାତାୱା ଦାର୍ମୁତି ରଃଅଞ୍ଜି ଦୁତ ଦୁପ ବେଦିତି ତିନ୍ନି ଇନ୍ଦେଟି ଡିଡ୍ଡାନାହି ତଞ୍ଜୁ ଆତେଞ୍ଜି । 12ଜିକରିୟ ତାଙ୍ଗେ ହୁଡ଼ାନ୍ ତ୍ରିକ୍ତ୍ରାକ୍ ଆନାହି ଆଜ୍ଜିତେଞ୍ଜି । 13ମତ୍ର ଦୁତ ତାଙ୍ଗେ ୱେସ୍ତେଞ୍ଜି, “ଜିକରିୟ, ଆଃଜ୍ଜାଆ” ଇନାକି ନି ପ୍ରାତ୍ନା ୱେନ୍ବନ୍ ଆନ୍ନେ, ଆଟେ ନି କୁଆଲୁ ଏଲିସାବେତ୍ ନି ବାଗା ରଃଅଞ୍ଜି ମ୍ରିଃଏଞ୍ଜିକି ମାରିନେ, ଆଟେ ନିନୁ ଏୱାଞ୍ଜ୍ ପାରୁ ଜହନ ହିଦି । 14ଏୱାଞ୍ଜି ମି ରାହାଙ୍ଗ୍ ଆଟେ ଏଗେଲ୍ ରାହାଙ୍ଗ୍ତି ବାଗା ଆନେଞ୍ଜି, ଆଟେ ତା ବାଗାଟି ଦାଲ୍ଲା ରାହାଙ୍ଗ୍ ଆନେରି । 15ଇନାକି ଏୱାଞ୍ଜି ଦାର୍ମୁତି ନକେସ୍ ବେର୍ରାନାଞ୍ଜି ଆନେଞ୍ଜି; ଏୱାଞ୍ଜି ଅଙ୍ଗୁରନିରୁ କି କାଲୁ ଏଚ୍ଚେକ୍ ଉଃନ୍ନେଞ୍ଜି, ଆଟେ ଇୟା ଟୁଟୁ ତାୱାଟେଃଏ ପିର୍ନି ଡିଙ୍ଗା ଡ଼ାହି ନେଞ୍ଜିନେଞ୍ଜି, 16ଆଟେ ଏୱାଞ୍ଜି ଇସ୍ରାଏଲ ମ୍ରିକାତାୱାଟି ଏଚ୍ଚେ ଦାଲ୍ଲାନିକି ତା ଦାର୍ମୁ ମୁଲାପେନୁ ରେଃଏସ୍ ୱ୍ଡେପ୍ତାନେଞ୍ଜି । 17ଆବାଙ୍ଗ୍ତି ହଡାଙ୍ଗ୍ ବଦାଙ୍ଗ୍ ପାଟ୍ଟି ଅଟେ ହିଟ୍ଟାଗାଟାରିକି ଦାର୍ମିକଙ୍ଗ୍ତି ଗ୍ୟାଁନଟି ୱ୍ଡେପ୍ଚ୍ଚାନ୍ ତାପନ୍ ବାଗା ଆଟେ ଦାର୍ମୁ ବାଗା ନେହେନ୍ ରହାନ୍ ଦାର୍ମୁତି ଦାଲ୍ଲାନିକି ହାମ୍ୱେର୍ କିଅନ୍ ବାଗା ଏୱାଞ୍ଜି ଏଲିୟତି ଡିଙ୍ଗା ଆଟେ ବଲ ଡ଼ାହି ଦାର୍ମୁ ନକେସ୍ ତାକିନେଞ୍ଜି ।
18ଏମ୍ବାଟି ଜିକରିୟ ଦୁତନିକି ୱେସ୍ତେଞ୍ଜି, “ନାନୁ ଇନିମିଡି ଇଦା ପୁଃଇ ? ଇନାକି ନାନୁ ତ ବୁଡ୍ଡା, ଆଟେ ନା କୁଆଲୁ ୱାଡ଼େ ତ ବୁଡ୍ଡା ଆତେ ।”
19ଦୁତ ତାଙ୍ଗେ ୱ୍ଡେପ୍ଚ୍ଚି ୱେସ୍ତେଞ୍ଜି, “ନାନୁ ଗାବ୍ରିଏଲ୍, ନାନୁ ମୁଲାପେନୁତି ନକେସ୍ ଡିଡ୍ଡେମାଃଇ, ଆଟେ ନିଙ୍ଗେ, ଇ ସୁସମାଚାର ୱେସ୍ପନ୍ ବାଗା ନାନୁ ୱାମାଃଇ । 20ହୁଡ଼ାମୁ, ଇୱାହାବେ ସପଲ ଆଃଆନ୍ ଟିକ୍ନା ନିନୁ କାତା ୱେସ୍ପନ୍ ମୁଃଆ, ଇନାକି ନା ଇମ୍ୱିନ୍ ହାବେତ୍ କାତା ଟିକ୍ ତୁକାତାୱା ସପଲ ଆନେ, ଇ ହାବେତ୍ କାତା ନିନୁ ମାଞ୍ଜାଡ଼ି କିଃଆତି ।”
21ଏମ୍ୱାଟି ଦାଲ୍ଲା ଜିକରିୟନିକି କାଚାନ୍ ମାଚ୍ଚେରି, ଆଟେ ମନ୍ଦିରତାୱାଟି ହପନି ଜୁକୁଡ଼୍ ଆଅନେଃଏ ଏୱାରି ଆକ୍କାବାଡ଼ାଙ୍ଗ୍ ଆତେରି । 22ମତ୍ର ଏୱାଞ୍ଜି କାଟ ହଚାନାହି ଏୱାରିକି କାତା ୱେସ୍ପନ୍ ମୁଃଆତେଞ୍ଜି; ଏମ୍ୱାଟି ଏୱାରି ପୁଚ୍ଚେରି ଜେ, ଏୱାଞ୍ଜି ମନ୍ଦିରତାୱା ଇନ୍ନା ଆତେସି ହୁଡ଼ନ୍ ପାଁଣ୍ଡାନ୍ନେଞ୍ଜି, ଆଟେ ଏୱାଞ୍ଜି ଏୱାରିକି କାତା ୱେସ୍ପନ୍ ମୁଃଆତାୱାଟି ୱାଞ୍ଜୁ ଡ଼ାହି ହୁଟାନାହି ୱେସ୍ପନ୍ ମ୍ରାସ୍ତେଞ୍ଜି ।
23ଡେଗ୍ଗା ତା ଆଙ୍ଗୁଲ୍ ଆଅନ୍ତି ପାଲୁତି ଦିନା ହାବେ ୱିହନେଃଏ, ଏୱାଞ୍ଜି ତା ଇଡ୍ଡୁଇନ୍ଦା ହାଚ୍ଚେଞ୍ଜି । 24ଏଚ୍ଚି ଦିନାଟିଆଟି ଏୱାଞ୍ଜ୍ତି କୁଆଲୁ ଏଲିସାବେତ୍ ଟୁଟୁ ଆତେ, ଆଟେ ଏଦି ସେ ଡାଁଞ୍ଜୁ ଟିକ୍ନା ଇମ୍ୱି ହାଲ୍ଲେଟେଃଏ ଇଜ୍ଜା ବାସାଆତେ, 25ଏମ୍ବାଟି ଏଦି ୱେସ୍ତେ, “ୱିହାନ୍ଦୁକାତାୱା ଦାର୍ମୁ ନାଙ୍ଗେ ପାପୁଅଲ୍ଚାନାହି, ନା ଲେଜ୍ଜା ଦାଲ୍ଲା ତାୱାଟି ଦେହା କିଆଞ୍ଜାନେଞ୍ଜି ।”
ଜିସୁ ପ୍ଲିଅନ୍ତି କାତା
26ଏଲିସାବେତ୍ ଟୁଟୁ ଆନ୍ ହାରା ଡାଁଞ୍ଜୁ ଆଇଚ୍ଚି ତୁକାତାୱା ମୁଲାପେନୁ ଗାବ୍ରିଏଲ୍ ଦୁତନିକି ଗାଲିଲିତି ନାଜରିତ ପାରୁଗାଟି ଗାଡ଼ାନାଜୁଇନ୍ଦା ରଣ୍ଡା ଲାଃଉ ରେଃଏସ୍ ପାଣ୍ଡିତେଞ୍ଜି; 27#ମାତି ୧:୧୮ଦାଉଦ ପୁଣ୍ଡିତି ଜସେପ ପାରୁଗାଟି ରଃଅଞ୍ଜି ମ୍ଡେହେଞ୍ଜି ବାଗା ଏଦାଡ଼ିକି ୱେଞ୍ଜାଚ୍ଚେରି; ଏ ଲାଃଉତି ପାରୁ ମରିୟମ । 28ଏମ୍ବାଟି ଦୁତ ଇଡ୍ଡୁ ଲାଃଇ ହଲ୍ଜାନାହି ଏଦାଡ଼ିକି ୱେସ୍ତେଞ୍ଜି, “ଜୁହାରି, ଏ ଅନୁଗ୍ରହ ପାଁଣ୍ଡାନ୍ନାତି, ନି ଲତୁ ଆପାକାଦି, ଦାର୍ମୁ ନିଙ୍ଗେ ମେଲା କିଆଞ୍ଜାନେଞ୍ଜି ।”
29ମତ୍ର ଏଦି ଇ କାତାତାୱା ଏଗେଲ୍ ଆକ୍କାବାଡ଼ାଙ୍ଗ୍ ଆନାହି, ଇଦି ଇନିମିଡିତି କାତା ଇଞ୍ଜାନ୍ ତା ମନତାୱା ଗ୍ଲକ୍ନା ମାଞ୍ଜାନ୍ ଏଲୁ କିଅନ୍ ମ୍ରାସ୍ତେ । 30ଏମ୍ବାଟି ଦୁତ ତାଙ୍ଗେ ୱେସ୍ତେଞ୍ଜି, “ଏ ମରିୟମ, ଆଃଜ୍ଜାଆ, ଇନାକି ନିନୁ ମୁଲାପେନୁତି ଅନୁଗ୍ରହ ପାଁଣ୍ଡାଞ୍ଜି ।”
31 #
ମାତି ୧:୨୧
ଆଟେ ହୁଡ଼ାମୁ, ନିନୁ ଟୁଟୁ ଆନାହି ରଃଅଞ୍ଜ୍ ମ୍ରିଃଏଞ୍ଜିକି ମାରିଦି ଅଟେ ତା ପାରୁ ଜିସୁ ହିଦି । 32ଏୱାଞ୍ଜି ବେର୍ରାନାଞ୍ଜି ଆନେଞ୍ଜି ଅଟେ ହାବେତାୱାଟି ଗାମିନ୍ ମୁଲାପେନୁତି ମ୍ରିଃଏଞ୍ଜି ଇଞ୍ଜାନ୍ ପଙ୍ଗିନେଞ୍ଜି; ଦାର୍ମୁ ତାଙ୍ଗେ ତା ଜୁଜୁଆକେ ଦାଉଦତି ଗାଦି ହିନେଞ୍ଜି,
33ଏୱାଞ୍ଜି ଜାକୁବତି ପୁଣ୍ଡିତାୱା କାଲେଙ୍ଗ୍କାଲା ବାଗା ଆକୁଡ଼୍ କିନେଞ୍ଜି, ଆଟେ ତା ରାଜି ଏଚ୍ଚେକ୍ୱାଡ଼େ ୱିଃହେ । 34ମରିୟମ ଦୁତନିକି ୱେସ୍ତେ, “ଇଦି ଇନିମିଡି ଆନେ ? ନାନୁ କୁଏଞ୍ଜିକି ପୁଞ୍ଜାହେଃଲ୍ଲେନୁ ।” 35ଦୁତ ତାଙ୍ଗେ ୱେସ୍ତେଞ୍ଜି, “ପିର୍ନି ଡିଙ୍ଗା ନି କୁଃଏଟି ଜାତାନେ” ଅଟେ ମୁଲାପେନୁତି ବଲ ନିଙ୍ଗେ ମୁଚ୍ଚି କିଆନେ, ଏଦାକି ଏମ୍ୱେନାଞ୍ଜି ପ୍ଲିନେଞ୍ଜି, ଏୱାଞ୍ଜି ପିର୍ନି ଅଟେ ମୁଲାପେନୁତି ମ୍ରିଃଏଞ୍ଜି ଇଞ୍ଜାନ୍ ପଙ୍ଗିନେଞ୍ଜି । 36ଆଟେ ହୁଡ଼ାମୁ, ନି ବିଡ଼ାଗାଟି ଏଲିସାବେତ୍ ୱାଡ଼େ ବୁଡ୍ଡା ୱେଲା ରଃଅଞ୍ଜି ମ୍ରିଃଏଞ୍ଜିକି ଟୁଟୁତାୱା ଆହାନ୍ନେ । ଏମ୍ୱେନାଦି ୱାଞ୍ଜାଗାଟାଦି ଇଞ୍ଜାନ୍ ପଙ୍ଗାଚ୍ଚେ, ଏଦି ହାଦାଡ଼ି ଟୁଟୁ ଆନ୍ ହାରା ଡାଁଞ୍ଜୁ ଆତେଦେ ।
37ଇନାକି ମୁଲାପେନୁ ୱେସାନ୍ନି କାତା ଏଚ୍ଚେକ୍ୱାଡ଼େ ବାଃଏ ଆଃଏ । 38ଏମ୍ୱାଟି ମରିୟମ ୱେସ୍ତେ, “ହୁଡ଼ାମୁ, ନାନୁ ଦାର୍ମୁତି କାମ୍ବାରାଲୁତାନୁ” ନି କାତା ଡେହେଙ୍ଗ୍ ନା ପାଟ୍ଟି ଆପାକାଦି । ଏମ୍ୱାଟି ଦୁତ ଏଦାଡ଼୍ତାୱାଟି ହାଚ୍ଚେଞ୍ଜି ।
ମରିୟମ ଏଲିସାବେତ୍ ଡ଼ାହି ବେଟ୍ଟା ଆଅନ୍
39ଏମ୍ବାଟି ମରିୟମ ହାମ୍ୱେର୍ ଆନ୍ ଜିହୁଦା ରାଜିତି ହରୁତାୱା ମାନ୍ନି ରଣ୍ଡା ଗାଡ଼ାନାଜୁଇନ୍ଦା କାର୍ବେକ୍ ହାଚ୍ଚେ, 40ଆଟେ ଜିକରିୟତି ଇଡ୍ଡୁତାୱା ହଲ୍ଜାନ୍ ଏଲିସାବେତ୍ନିକି ଜୁହାରି କିତେ । 41ଆଟେ ଏଲିସାବେତ୍ ମରିୟମତି ଜୁହାରି ୱେନ୍ବନେଃଏ ତା ଟୁଟୁ ଲାଃଇ ମାଚ୍ଚି ବଦା ୱିଡିତେ, ଆଟେ ଏଲିସାବେତ୍ ପିର୍ନି ଡିଙ୍ଗା ଡ଼ାହି ନେଞ୍ଜିତେ, 42ଏମ୍ବାଟି ଏଲିସାବେତ୍ ଏଗେଲ୍ ଗଲି ଆନ୍ ୱେସ୍ତେ, ଆଚାସ୍କାତାୱାଟି ୱାଡ଼େ ନିନୁ ଦନ୍ୟ, ଆଟେ ଦନ୍ୟ ନି ଟୁଟୁ ଲାଃଇତି ବଦା । 43ଇ ବାଗ୍ୟ ନାଙ୍ଗେ ଇମ୍ୱିନାୱାଟି ଆତେ ଜେ, ନା ଦାର୍ମୁତି ଇୟା ନା ରେଃଏସ୍ ୱାନ୍ନେ ? 44ଇନାକି ହୁଡ଼ାମୁ, ନି ଜୁହାରିତି ଉକୁଡ଼୍ ୱେଞ୍ଜେସେଃଏ ନା ଟୁଟୁ ଲାଃଇତି ବଦା ରାହାଙ୍ଗିଃଆଟି ୱିଡିତେ । 45ନିନୁ ଦନ୍ୟ, ମାଞ୍ଜାଡ଼ି କିଅନ୍ ମୁତି, ଇନାକି ଦାର୍ମୁତାୱାଟି ନାଙ୍ଗେ ଇନ୍ନା ଇନ୍ନା ୱେସ୍ପା ଆନ୍ନେ, ଏୱା ହାବେ ସପଲ ଆନୁ ।
ମରିୟମ ରାହାଙ୍ଗ୍ତି ଗାଡ଼ିହେରୁ କିଅନି
46ଏମ୍ୱାଟି ମରିୟମ ୱେସ୍ତେ,
“ନା ଜିଉ ଦାର୍ମୁନିକି ଜୁଙ୍ଗେନ୍ନେ,
47ଆଟେ ନା ଡିଙ୍ଗା ନା ଜ୍ଡିପାଗାଟି ମୁଲାପେନୁତି ରେଃଏସ୍ ଏଗେଲ୍ ରାହାଙ୍ଗ୍ ଆଇନେ ।
48ଇନାକି ଏୱାଞ୍ଜି ନା ଲାକ୍କା ନିଗାଡ଼୍ଗାଟି କାମ୍ବାରାଲୁ ନାଙ୍ଗେ ମେହ୍ତାତେଞ୍ଜି,
ଆଟେ ହୁଡ଼ାଟୁ, ନିଞ୍ଜୁତାୱାଟି ଆଙ୍ଗାତାଙ୍ଗା ଟିକ୍ନା ଦାଲ୍ଲା ନାଙ୍ଗେ ଦନ୍ୟ ଇଞ୍ଜାନ୍ ୱେସ୍ତାନେରି ।
49ଇନାକି ଇମ୍ୱିନ୍ ବଲଗାଟି ମୁଲାପେନୁ ନା ପାଟ୍ଟି ବେର୍ କାମା କିଆନ୍ନେଞ୍ଜି;
ଏୱାଞ୍ଜ୍ତି ପାରୁ ପିର୍ନି ।
50ଆଟେ ତାଙ୍ଗେ ସନ୍ମାନ୍ କିନ୍ନାରିକି ତାନୁ ଆଙ୍ଗାତାଙ୍ଗା ଟିକ୍ନା ପାପୁଅଲ୍ନେଞ୍ଜି ।
51ଏୱାଞ୍ଜି ତା ମପ ଡ଼ାହି ବଲ ପକ୍ଚ୍ଚାନ୍ନେଞ୍ଜି,
ଗର୍ବଗାଟାରିକି ତା ହଡାଙ୍ଗ୍ତି ଜୁଜନାତିଦି ହାବେ ବାରାୱିତି କିଆନ୍ନେଞ୍ଜି ।
52ଏୱାଞ୍ଜି ବଲଗାଟି ରାଜେଙ୍ଗ୍ନିକି ଗାଦିତାୱାଟି ଜାପ୍ଚ୍ଚାନ୍ନେଞ୍ଜି, ଲୁଙ୍ଗୁର୍ଗାଟାରିକି ଗାମି କିଆନ୍ନେଞ୍ଜି,
53ଏୱାଞ୍ଜି ହାକ୍କିଗାଟାରିକି ନେହି ତିନ୍ବା କୁଲା ଡ଼ାହି କ୍ଡିପି କିଆନ୍ନେଞ୍ଜି, ପାଁନ୍ବାଗାଟାରିକି ୱାର୍ରି କାସ୍କାଟି ପାଣ୍ଡିତେଞ୍ଜି ।
54କାଲେଙ୍ଗ୍କାଲା ଟିକ୍ନା ପାପୁଅଲ୍ଚାନ୍ ଏଲୁ କିଅନ୍ ବାଗାଟି ତା କାମ୍ୱାରେଏଞ୍ଜି ଅବ୍ରାହାମ ଅଟେ ତା ପୁଣ୍ଡି ଇସ୍ରାଏଲତି ଉପକାର କିଆନ୍ନେଞ୍ଜି ।”
55ମା ଜୁଜୁଆକେଙ୍ଗ୍ ଇସ୍ରାଏଲ ପାଟ୍ଟି ତା କିଆଚ୍ଚି ଦିବ୍ବା ଡେହେଙ୍ଗ୍ ଅବ୍ରାହାମ ଆଟେ ତା ବଦାମିଡା ପାଟ୍ଟି କାଲେଙ୍ଗ୍କାଲା ମାନ୍ନାକାଦି ।
56ଆଟେ ମରିୟମ ବାଇକ୍ ମୁ ଡାଁଞ୍ଜୁ ଏଲିସାବେତ୍ ଡ଼ାହି ମାଞ୍ଜାନ୍ ତା ଇଡ୍ଡୁଇନ୍ଦା ୱ୍ଡେତେ ।
ଡୁବନ୍ ହିନ୍ନି ଜହନତି ପ୍ଲିଅନି
57ଡେଗ୍ଗା ଏଲିସାବେତ୍ତି ମାରନ୍ତି ଦିନା ଏପନେଃଏ, ଏଦି ରଣ୍ଡା ବଦା ମାରିତେ ।
58ଆଟେ ଦାର୍ମୁ ଜେ, ତାଙ୍ଗେ ଏଗେଲ୍ ପାପୁଅଲ୍ଚାନାଦାଆ, ୱେଞ୍ଜାନ୍ ତା ହଡ଼୍ଗିନାରି ଅଟେ ତା ବିଡ଼ାଗାଟାରି ତା ଡ଼ାହି ରାହାଙ୍ଗ୍ ଆଅନ୍ ମ୍ରାସ୍ତେରି ।
59ଆଟ୍ଟା ଦିନାଟି ଏୱାରି ବଦାତିଦି ସୁନତ କିଅନ୍ ବାଗା ୱାତେରି ଅଟେ ତା ଆବାତି ପାରୁ ଡେହେଙ୍ଗ୍ ତା ପାରୁ ଜିକରିୟ ହିଅନ୍ ବାଗା ଇଚ୍ଚା କିତେରି ।
60ମତ୍ର ଏୱାଞ୍ଜ୍ ଟାଡି ୱେସ୍ତେ, “ବାଃଏ, ଏୱାଞ୍ଜ୍ତି ପାରୁ ଜହନ ଆନେ ।”
61ଏୱାରି ତାଙ୍ଗେ ୱେସ୍ତେରି, “ମି ବିଡ଼ାଗାଟାରି ତାୱା ଇନ୍ଦାରିକି ଇ ପାରୁ ହେଃଲ୍ଲେ ।”
62ଏମ୍ବାଟି ଏୱାଞ୍ଜିକି ଇମ୍ୱିନ୍ ପାରୁ ହିଅନ୍ ଆନେ ଇଞ୍ଜାନ୍ ତା ଆବା ଇଚ୍ଚା କିନ୍ନେଞ୍ଜି, ଏଦା ଏୱାରି ତାଙ୍ଗେ ହୁଟାନାହି ୱେନ୍ବନ୍ ମ୍ରାସ୍ତେରି । 63ଏଦିମ୍ୱା ଏୱାଞ୍ଜି ରଣ୍ଡା ୱ୍ରିଗନ୍ ବାଗା କଡ଼ିପାଟା ୱ୍ରିହାନାହି ଇଦା ୱ୍ରିଗିତେଞ୍ଜି, “ଏୱାଞ୍ଜ୍ତି ପାରୁ ଜହନ, ଏମ୍ୱାଟି ହାବେ ଦାଲ୍ଲା ଆକ୍କାବାଡ଼ାଙ୍ଗ୍ ଆତେରି ।”
64ଆଟେ ଏଚିୱାଡ଼େ ତା ଗୁତି ଅଟେ ୱାଙ୍ଗେସି ୱ୍ରିଙ୍ଗିତେ, ଏମ୍ବାଟି ଏୱାଞ୍ଜି କାତା ୱେସାନ୍ ମୁଲାପେନୁତି ଗାଡ଼ିହେରୁ କିଅନ୍ ମ୍ରାସ୍ତେଞ୍ଜି ।
65ଏମ୍ବାଟି ଏୱାର୍ତି ହଡ଼୍ଗିନାରି ହାବେ ଆଜ୍ଜିତେରି, ଆଟେ ଇ ହାବେତ୍ କାତା ଜିହୁଦା ରାଜିତି ହରୁରାଜି ଏସେନ୍ ମାଞ୍ଜିଚ୍ଚି ହାବେଇନ୍ଦା ଦାଲ୍ଲା ୱେସ୍ପିଆତେରି ।
66ଆଟେ ଏଦା ୱେଞ୍ଜାଚ୍ଚି ହାବେ ଦାଲ୍ଲା, ଏୱା ହାବେ ତା ତା ହଡାଙ୍ଗ୍ତାୱା ଇଟ୍ଟାନ୍ ୱେସ୍ପିଆତେରି, ଆତେସି ଇ ବଦା ଇନ୍ନା ଆଅନ୍ ହାଜ୍ଜିନ୍ନେ ? ଇନାକି ଦାର୍ମୁତି କାଜ୍ଜୁ ତା କୁଃଏଟି ମାଚ୍ଚେ ।
ଜିକରିୟତି ବାବବାନି
67ଆଟେ ତା ଆବା ଜିକରିୟ ପିର୍ନି ଡିଙ୍ଗାଟି ନେଞ୍ଜାନାହି ଇ ବାବବାନି ୱେସ୍ତେଞ୍ଜି ।
68“ଦାର୍ମୁ, ଇସ୍ରାଏଲତି ମୁଲାପେନୁ ଦନ୍ୟ,
ଇନାକି ଏୱାଞ୍ଜି ପାପୁଅଲ୍ଚାନ୍ ତା ଦାଲ୍ଲାନିକି କୁଲ୍ପନ୍ ବାଗା ୱାନ୍ନେଞ୍ଜି ।
69ଏୱାଞ୍ଜି ତା କାମ୍ୱାରେଏଞ୍ଜି ଦାଉଦତି ପୁଣ୍ଡିଟି ମା ବାଗାଟି ବଲଗାଟି ଜ୍ଡିପାଗାଟାଞ୍ଜିକି ନିକ୍ଚାନ୍ନେଞ୍ଜି,
70ନକିତାୱାଟି ତା ପିର୍ନି ବାବବାଦିଙ୍ଗ୍ତି ଗୁତିଟି ଇନିସ୍ ୱେସାଚ୍ଚେଞ୍ଜି,
71ଏହେଙ୍ଗିସି ମା ସତ୍ରୁଙ୍ଗ୍ତାୱାଟି ଆଟେ ମାଙ୍ଗେ ସ୍ରିଞ୍ଜନ୍ତାରିତି କାଜ୍ଜୁତାୱାଟି ଜ୍ଡିପ୍ତାନେଞ୍ଜି ।
72ଇନିସ୍ ଏୱାଞ୍ଜି ଜୁଜୁଆକେଙ୍ଗ୍ନିକି ପାପୁଅଲ୍ନେଞ୍ଜି, ଆଟେ ଏୱାଞ୍ଜି ତା ପିର୍ନି ଚୁକ୍ତି ଏଲୁ କିନେଞ୍ଜି,
73ମା ଆବା ଅବ୍ରାହାମତି ରେଃଏସ୍ ଇମ୍ୱିନ୍ ହାପ୍ପା କିଆଚ୍ଚେଞ୍ଜି, ଏୱାଞ୍ଜି ଏ ପିର୍ନି ହାଜୁତିଦି ଏଲୁ କିନ୍ନେଞ୍ଜି ।
74ଆଟେ ମାମୁ ମା ସତ୍ରୁ କାଜ୍ଜୁତାୱାଟି ନିମ୍ୱାନ୍ନାମୁ, ଏଦାବାଗା ଆଜ୍ଜେଟେଃଏ ମୁଲାପେନୁନିକି ଆଙ୍ଗୁଲ୍ ଆନାମୁ ।
75ଇନିସ୍କି ମାରୁ ମୁଲାପେନୁ ନକେସି, ପିର୍ନି ଅଟେ ଦାର୍ମିକ ଆନାହି ନିମ୍ବାନ୍ ବାସା ଆଅନ୍ ମୁନା ।
76ଏ ନା ମ୍ରିଃଏଞ୍ଜି, ନିନୁ ହାବେତାୱାଟି ଗାମିନ୍ ମୁଲାପେନୁତି ରଃଅଞ୍ଜି ବାବବାଦି ଇଞ୍ଜାନ୍ ପଙ୍ଗିଦି; ଇନାକି ନିନୁ ଦାର୍ମୁ ନକେସି ଗିଜ୍ଜୁ ହାମ୍ୱେର୍ କିଅନ୍ତି ଦୁତ ଆଦି ।
77ଏୱାର୍ତି ପାପ ମାକ୍ସାଡ଼ି କିତି ବାଗାଟି ଏୱାର୍ ଜ୍ଡିପା ପାଁନେରି, ଇ କାତା ତା ଦାଲ୍ଲାନିକି ୱେସ୍ପନ୍ ହାଜ୍ଜି ।
78ଇନାକି ମା ମୁଲାପେନୁ ପାପୁଅଲ୍ପନ୍ତାଞ୍ଜି ଅଟେ ହଡାଙ୍ଗିଃଆ ଲୁଙ୍ଗୁର୍ଗାଟାଞ୍ଜି, ଏୱାଞ୍ଜି ମା ବାଗା ସର୍ଗଟି ଜ୍ଡିପାତି ୱେଲା ହପିକିନେଞ୍ଜି ।
79ଏମ୍ବେନାରି ହାଅନ୍ତି ଆନ୍ଦେର୍ ଡ଼ୁଗାତାୱା ବାସାଆଇନେରି, ଏୱାରିକି ଲତୁ ଗିଜ୍ଜୁତାୱା ଡୁଚାନ୍ ଅନ୍ ବାଗା ଏୱାଞ୍ଜି ହାବେତାରି କୁଃଏଟ୍ ସର୍ଗତାୱାଟି ଅଲା ହିଆନେଞ୍ଜି ।”
80ଆଟେ ବଦା ବାଡ୍ଡିଆନ୍ ଡିଙ୍ଗାଟି ବଲ ଆଅନ୍ ମ୍ରାସ୍ତେଞ୍ଜି ଅଟେ ଇସ୍ରାଏଲ ରେଃଏସ୍ ପଙ୍ଗାହେଃଲ୍ଲାନ୍ ଟିକ୍ନା ଚିହ୍ପି ଗର୍ରିତାୱା ବାସାଆତେଞ୍ଜି ।
Currently Selected:
ଲୁକ 1: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
