ଲୁକ 2
2
ଜିସୁ କ୍ରିସ୍ଟତି ପ୍ଲିଅନି
(ମାତିଉ ୧:୧୮–୨୫)
1ଏଚିତୁକାତାୱା ରୁମିୟତି ହାବେତ୍ ରାଜିତାୱା ପାରୁ ୱ୍ରିଗିକିଅନ୍ ବାଗା କାଇସର ଅଗସ୍ଟ ଆଦେସ୍ ହିଆନ୍ ପକ୍ତେଞ୍ଜି । 2ସିରିଆତି ଆକୁଡ଼୍ କିଅନ୍ତାଞ୍ଜି କୁରିନିୟତି ତୁକାତାୱା ଇହିଙ୍ଗିସି ପାରୁ ୱ୍ରିଗନ୍ତାଦି କାହେ ମ୍ରାନ୍ଦାଚ୍ଚେ । 3ଏଦାବାଗା ହାବେ ଦାଲ୍ଲା ପାରୁ ୱ୍ରିଗିକିଅନ୍ ବାଗା ତା ତା ଗାଡ଼ାନାସ୍କାଇନ୍ଦା ହାଜ୍ଜିଚ୍ଚେରି ।
4ଆଟେ ଜସେପ ୱାଡ଼େ ପାରୁ ୱ୍ରିଗିକିଅନ୍ ବାଗା ମରିୟମ ଡ଼ାହି ଗାଲିଲିତି ନାଜରିତ ପାରୁଗାଟି ଗାଡ଼ାନାଜୁତାୱାଟି ଜିହୁଦା ରାଜିତି ବେତଲିହିମ ପାରୁଗାଟି ଦାଉଦତି ଗାଡ଼ାନାଜୁଇନ୍ଦା ହାଚ୍ଚେରି, ଇନାକି ଏୱାଞ୍ଜି ଦାଉଦତି ପୁଣ୍ଡି ଆଟେ ଗୁସ୍ଟିତି କୁଏଞ୍ଜି ମାଚ୍ଚେଞ୍ଜି । 5ଏୱାଞ୍ଜ୍ ଡ଼ାହି ବିବା ଆଅନ୍ ବାଗା ମରିୟମନିକି ୱେଞ୍ଜାଚ୍ଚେରି ଅଟେ ଏଦି ଟୁଟୁ ମାଚ୍ଚେ । 6ଏୱାରି ଏ ଗର୍ରିତାୱା ମାଚ୍ଚି ତୁକାତାୱା ମରିୟମତି ମାରାନ୍ଦୁକା ଏତେ, 7ଆଟେ ଏଦି ତା କାହେତି ମ୍ରିଃଏଞ୍ଜିକି ମାରିତେ ଆଟେ ଏୱାଞ୍ଜିକି ଜିରା ଡ଼ାହି ମୁଚ୍ଚି କିଆନ୍ କଡିଙ୍ଗ୍ ଡଙ୍ଗିତାୱା ଡପ୍ତେରି, ଇନାକି ମାନ୍ବା ଇଡ୍ଡୁତାୱା ଏୱାର୍ ବାଗା ଗର୍ରି ହେଃଲ୍ଲାତେ ।
ଗାଉଡ଼ାଙ୍ଗା ଅଟେ ସର୍ଗ ଦୁତଙ୍ଗ୍
8ଏ ରାଜିତାୱା ଏଚ୍ଚେ ଗାଉଡ଼ାଙ୍ଗା ପାଙ୍ଗାତାୱା ମାଞ୍ଜାନ୍ ଡାଡ଼ିଙ୍ଗ୍ ତା ମେଁଣ୍ଡାଅଡାଙ୍ଗ୍ ଜପିଚ୍ଚେରି । 9ଦାର୍ମୁତି ରଃଅଞ୍ଜି ଦୁତ ଏୱାର୍ ରେଃଏସ୍ ଡିଡ୍ଡିତେଞ୍ଜି, ଆଟେ ଦାର୍ମୁତି ମହିମା ଏୱାର୍ତି ଗୁଞ୍ଜେର୍ ହାବେ ପ୍ଲାମ୍ୱିତେ, ଆଟେ ଏୱାରି ଏଗେଲେଃଏ ଆଜ୍ଜିତେରି, 10ଏଦିମ୍ୱା ଦୁତ ଏୱାରିକି ୱେସ୍ତେଞ୍ଜି, “ଆଃଜ୍ଜାଟୁ; ହୁଡ଼ାଟୁ, ନାନୁ ହାବେ ଦାଲ୍ଲାତି ଗାପ୍ଚି ରାହାଙ୍ଗ୍ତି ସୁସମାଚାର ମିଙ୍ଗେ ୱେସ୍ପିଞ୍ଜା, 11ଇନାକି ନିଞ୍ଜୁ ଦାଉଦ ଗାଡ଼ାନାଜୁତାୱା ମି ବାଗାଟି ରଃଅଞ୍ଜି ଜ୍ଡିପାଗାଟାଞ୍ଜି ପ୍ଲିଆନ୍ନେଞ୍ଜି, ଏୱାଞ୍ଜି କ୍ରିସ୍ଟ ଦାର୍ମୁ । 12ଆଟେ ମି ବାଗାଟି ଇଦି ତୁର୍ରି ଲାକ୍କା ଆନେ, ମିରୁ ରଣ୍ଡା ବଦାତିଦି ଜିରା ମୁଚ୍ଚି କିଆନ୍ କଡିଙ୍ଗ୍ ଡଙ୍ଗିତାୱା ଡପ୍ଚାନାଦାଆ ହୁଡ଼ିଦେରି ।”
13ଆଟେ ଏଚିୱାଡ଼େ ଏ ଦୁତଙ୍ଗ୍ ଡ଼ାହି ସର୍ଗତି ଗାପ୍ଚି ଦୁତଙ୍ଗ୍ ରପାଟ୍ଟେ ଆନାହି ମୁଲାପେନୁତି ଗାଡ଼ିହେରୁ କିଆନ୍ ୱେସ୍ତେରି,
14“ସର୍ଗତାୱା ମାନ୍ନି ମୁଲାପେନୁତି ମହିମା,
ଆଟେ ପୁର୍ତିତାୱା ତା ରାହାଙ୍ଗ୍ ଅଟେ କୁଇଙ୍ଗ୍ତାୱା ତା ଲତୁ ଆପାକାଦି ।”
15ଦୁତଙ୍ଗ୍ ଏୱାର୍ତାୱାଟି ସର୍ଗଇନ୍ଦା ହାଚ୍ଚାୱିଃଆଟି ଗାଉଡ଼ାଙ୍ଗା ତାରୁ ତାରୁ ୱେସ୍ପିଆତେରି, “ୱାଦୁ ମାରୁ ବେତଲିହିମ ଟିକ୍ନା ହାଜ୍ଜାନ୍, ଦାର୍ମୁ ମାଙ୍ଗେ ଇ ଇମ୍ୱିନ୍ କାତା ୱେସ୍ତାତେଞ୍ଜି, ଏଦା ହୁଡ଼ିହାନ୍ନା ।”
16ଏମ୍ବାଟି ଏୱାରି ୱିର୍ନା ହାଜ୍ଜାନ୍ ଦାହାନାହି ମରିୟମ ଆଟେ ଜସେପନିକି, ଆଟେ କଡିଙ୍ଗ୍ ଡଙ୍ଗିତାୱା ବଦାନିକି ଡପ୍ଚାନାଦାଆ ହୁଡ଼ିତେରି । 17ଏୱାରି ଇଦା ହୁଡ଼ାନ୍ ଏ ବଦାତି କୁଲାଟି ଏୱାରିକି ଇମ୍ୱିନ୍ କାତା ୱେସ୍ପା ଆଚ୍ଚେ, ଏଦା ପକ୍ତେରି । 18ଆଟେ ଏଚ୍ଚେ ଦାଲ୍ଲା ଗାଉଡ଼ାଙ୍ଗାତାୱାଟି, ଏ ହାବେ କାତା ୱେଚ୍ଚେରି, ଏୱାରି ହାବେତାରି ଏଦା ୱେଞ୍ଜାନ୍ ଆକ୍କାବାଡ଼ାଙ୍ଗ୍ ଆତେରି । 19ମତ୍ର ମରିୟମ ଇ ହାବେ କାତା ହଡାଙ୍ଗ୍ତାୱା ଇଟ୍ଟାନ୍ ଏଲୁ କିଅନ୍ ମ୍ରାସ୍ତେ । 20ଆଟେ ଗାଉଡ଼ାଙ୍ଗାନିକି ଇନିସ୍ ୱେସ୍ପା ଆଚ୍ଚେ, ଏହେଙ୍ଗିସି ଏୱାରି ଇନ୍ନା ଇନ୍ନା ୱେଚ୍ଚେରି ଆଟେ ହୁଡ଼ିତେରି, ଏ ହାବେତ୍ କୁଲା ବାଗାଟି ମୁଲାପେନୁତି ଗଉରବ କି କି ୱ୍ଡେତେରି ।
ଜିରୁସାଲମ ମନ୍ଦିରତାୱା ଜିସୁ
21 #
ଲୁକ ୧:୩୧
ଏୱାଞ୍ଜିକି ଆଟ୍ଟା ଦିନା ଏପନେଃଏ, ସୁନତ କିଆନ୍, ଏୱାଞ୍ଜ୍ତି ପାରୁ ଜିସୁ ହିତେରି, ଇ ପାରୁ ତାଙ୍ଗେ ଟୁଟୁ ଆଃଆନ୍ କାହେଟେଃଏ ଦୁତ ତାୱାଟି ହିୱା ଆଚ୍ଚେ ।
22ଏଚିତୁକାତାୱା ମସାତି#ଲେବି ୧୨:୧–୮ ହାଜୁ ଡେହେଙ୍ଗ୍ ଏୱାର୍ତି ସୁଚି ଆଅନ୍ତି ଦିନା ଏତାତେ, ଏୱାରି ଏ ବଦାତିଦି ଦାର୍ମୁ ବାଗାଟି ଉଚ୍ଚର୍ଗ କିଅନ୍ ଜିରୁସାଲମଇନ୍ଦା ଅତେରି । 23ମସାତି ହାଜୁତାୱା ୱ୍ରିଗାଆନ୍ନି ଡେହେଙ୍ଗ୍, “କାହେ ପ୍ଲିଆନ୍ନି ହାବେତ୍ ମ୍ଡେହା ବଦାଙ୍ଗ୍ ଦାର୍ମୁ ବାଗାଟି ପିର୍ନି ଇଞ୍ଜାନ୍ ଲେକା ଆନେରି ।” 24ଆଟେ ୱାଡ଼େ, ଏ ହାଜୁତାୱା ୱ୍ରିଗାଆନ୍ନି ଡେହେଙ୍ଗ୍, ଏୱାରି ତାଙ୍ଗେ ଦାର୍ମୁ ରେଃଏସ୍ ଉଚ୍ଚର୍ଗ କିଅନ୍ ବାଗା ରିଣ୍ଡା ପାରା କି ରିଣ୍ଡା ଗୁଗୁର୍କା ବଲି ହିଅନ୍ ବାଗା ଜିରୁସାଲମଇନ୍ଦା ଅତେରି ।
ସିମିୟନ ଜିସୁନିକି ହୁଡ଼ନ୍
25ଆଟେ ହୁଡ଼ାଟୁ, ଜିରୁସାଲମତାୱା ସିମିୟନ ପାରୁଟି ରଃଅଞ୍ଜି ନିଗ୍ଗା ଦାର୍ମିକ କୁଏଞ୍ଜି ମାଚ୍ଚେଞ୍ଜି; ଏୱାଞ୍ଜି ଇସ୍ରାଏଲତି ଜ୍ଡିପା ତୁକା କାଚାନ୍ ମାଚ୍ଚେଞ୍ଜି, ଆଟେ ପିର୍ନି ଡିଙ୍ଗା ତା ଡ଼ାହି ମାଚ୍ଚେ । 26ପିର୍ନି ଡିଙ୍ଗା ତାଙ୍ଗେ ଇ କାତା ୱେସାଚ୍ଚେ, ଏୱାଞ୍ଜି ଦାର୍ମୁ ମୁଲାପେନୁତାୱାଟି ୱାଇନି କ୍ରିସ୍ଟନିକି ହୁଡ଼େଟେଃଏ, ଏୱାଞ୍ଜି ହାଃଏଞ୍ଜି । 27ପିର୍ନି ଡିଙ୍ଗା ସିମିୟନନିକି ଜିରୁସାଲମ ମନ୍ଦିରଇନ୍ଦା ତାଚ୍ଚିୱାତେ, ଏଚିତୁକାତାୱା ଜିହୁଦିଙ୍ଗ୍ତି ହାଜୁ ଡେହେଙ୍ଗ୍ କାମା କିଅନ୍ ବାଗାଟି ଜସେପ ଅଟେ ମରିୟମ ବଦା ଜିସୁନିକି ଆହାନାହି ଜିରୁସାଲମ ମନ୍ଦିରଇନ୍ଦା ୱାତେରି । 28ଏଚିତୁକାତାୱା ଏୱାଞ୍ଜି ତାଙ୍ଗେ ଏତାନାହି ମୁଲାପେନୁତି ଗାଡ଼ିହେରୁ କିଆନ୍ ୱେସ୍ତେଞ୍ଜି ।
29“ଏ ଦାର୍ମୁ, ହାଦାଡ଼ି ନିନୁ ନି ବାକ୍ୟ ଡେହେଙ୍ଗ୍
ନି କାମ୍ବାରେଏଞ୍ଜିକି ଲତୁଟି ହାଅନ୍ତିକି ପିହ୍ତାମୁ,
30ଇନାକି ନା କାନ୍ନୁ ନି ଜ୍ଡିପା ହୁଡ଼ାନ୍ନେ,
31ନିନୁ ଇନ୍ନା ହାବେ ନି ଦାଲ୍ଲା ନକେସି ହାମ୍ୱେର୍ କିଆଞ୍ଜି,
32ଅନଜିହୁଦିଙ୍ଗ୍ ରେଃଏସ୍ ନିଜ୍ଜା ପପ୍କନ୍ତି ଅଲା,
ଆଟେ ନି ଇସ୍ରାଏଲ ଦାଲ୍ଲାନିକି ଗଉରବ ଡେହେଙ୍ଗ୍ କିଆଞ୍ଜି ।”
33ଏୱାଞ୍ଜ୍ କୁଲାଟି ୱେସାନ୍ନି ହାବେତ୍ କୁଲାତାୱା ତା ଇୟାଆବା ଆକ୍କାବାଡ଼ାଙ୍ଗ୍ ଆଇଚ୍ଚେରି । 34ଆଟେ ସିମିୟନ ଏୱାରିକି ମେଲା କିଆନ୍ ତା ଇୟା ମରିୟମନିକି ୱେସ୍ତେଞ୍ଜି, “ହୁଡ଼ାମୁ, ଇନିସ୍କି ଇସ୍ରାଏଲତାୱାଟି ଏଚ୍ଚେ ଦାଲ୍ଲା ନାହେଡ୍ ଆଅନ୍ ବାଗା ଅଟେ ଏଚ୍ଚେ ଦାଲ୍ଲା ଜ୍ଡିପା ପାଁନ୍ବନ୍ ବାଗା ମୁଲାପେନୁଟିଆଟି ଇ ବଦା ଆଚି ଆନ୍ନେଞ୍ଜି । ଏୱାଞ୍ଜି ମୁଲାପେନୁତାୱାଟି ରଣ୍ଡି ତୁର୍ରି ଡେହେଙ୍ଗ୍ ଆନେଞ୍ଜି, 35ଏଦାବାଗା ଦାଲ୍ଲା ତାଙ୍ଗେ ବିରୁଦି ଆନ୍ ତା ହଡାଙ୍ଗ୍ତି ଲାଃଇତି ଏଲୁ ହାବେ ପକ୍ନେରି, ଆଟେ ଦୁଃକ ଡେହେଙ୍ଗ୍ ୱାଉଗାଟି କଣ୍ଡା ମି ପରନ୍ତିଦି ଗାଜା କିଆନେ ।”
36ଆଟେ ହାନ୍ନା ପାରୁଟି ରଣ୍ଡି ବାବବାଦି ମାଚ୍ଚେ; ଏଦି ଆସେର୍ ପୁଣ୍ଡିତି ପିନୁଏଲତି ମ୍ରାଗା । ଏଦାଡ଼ିକି ଏଗେଲ୍ ଅଁଣ୍ଡୁ ଆଚ୍ଚେ; ଏଦି ବିବା ଆନ୍ ଅଡ଼ି ଅଁଣ୍ଡୁ ଟିକ୍ନା କୁଏଞ୍ଜି ଡ଼ାହି ନିମ୍ୱାନ୍ ମାଚ୍ଚେ ଆଟେ ନାଲ୍କୁଡ଼ି ନାଲ୍ ଅଁଣ୍ଡୁ ଟିକ୍ନା ୱାଟ୍ଟା ଆନ୍ ମାଚ୍ଚେ ।
37ଏଦି ମନ୍ଦିର ପିହେଟେଃଏ ୱାରାଆଞ୍ଜାନ୍ ଅଟେ ପ୍ରାତ୍ନା ଡ଼ାହି ଡାଡ଼ିଙ୍ଗ୍କାର୍ରାତାୱା ଗାଡ଼ିହେରୁ କିଆୱିତେ । 38ଏଚିତୁକାତାୱା ଏଦି ଏଚ୍ଚାନାହି ମୁଲାପେନୁତି ରାହାଙ୍ଗ୍ କି କି ଜିରୁସାଲମତି କୁଲ୍ପା କାଚାନ୍ ମାଚ୍ଚି ହାବେତାରିନିକି ତା କୁଲା ୱେସ୍ପନ୍ ମ୍ରାସ୍ତେ ।
ଜସେପ ଅଟେ ମରିୟମ ନାଜରିତଇନ୍ଦା ୱ୍ଡେପନ୍
39 #
ମାତି ୨:୨୩
ଡେଗ୍ଗା ଏୱାରି ଦାର୍ମୁତି ହାଜୁ ଡେହେଙ୍ଗ୍ ହାବେ କାମା ୱିହି କିଆନ୍ ଗାଲିଲି, ତା ଗାଡ଼ାନାଜୁ ନାଜରିତଇନ୍ଦା ୱ୍ଡେତେରି । 40ଆଟେ ବଦା ବାଡ୍ଡି ଆଅନ୍ ମ୍ରାସ୍ତେ ଆଟେ ଗ୍ୟାଁନଟି ନେଞ୍ଜାନ୍ ବଲଗାଟାଞ୍ଜି ଆତେଞ୍ଜି, ଆଟେ ମୁଲାପେନୁତି ଅନୁଗ୍ରହ ତା କୁଃଏଟି ମାଚ୍ଚେ ।
ମନ୍ଦିରତାୱା ବଦାସ୍ ଜିସୁ
41ତା ଇୟାଆବା ହାବେ ଅଁଣ୍ଡୁ ନିସ୍ତାର ରେହାଙ୍ଗ୍ ତୁକାତାୱା ଜିରୁସାଲମଇନ୍ଦା ହାଜ୍ଜିଚ୍ଚେରି, 42ଏୱାଞ୍ଜିକି ବାରା ଅଁଣ୍ଡୁ ଆଇଚ୍ଚି ତୁକାତାୱା ଏୱାରି ରେହାଙ୍ଗ୍ତି ରିତିନିତି ଡେହେଙ୍ଗ୍ ଏମ୍ବା ହାଚ୍ଚେରି । 43ରେହାଙ୍ଗ୍ତି ଦିନା ୱିହି କିଆନ୍ ଏଚ୍ଚିକିଃଆ ଏୱାରି ୱ୍ଡେପିଞ୍ଜାତେରି, ଏଚିତୁକାତାୱା ଏଦିମ୍ୱା ବଦାସ୍ ଜିସୁ ଜିରୁସାଲମତାୱା ବାସାଆତେଞ୍ଜି, ଆଟେ ତା ଇୟାଆବା ଏଦା ପୁଞ୍ଜାହେଃଲ୍ଲାତେରି । 44ମତ୍ର ଏୱାଞ୍ଜି ହାଜ୍ଜାଚ୍ଚି ଦାଲ୍ଲା ଡ଼ାହି ମାନ୍ନେଞ୍ଜି ଇଞ୍ଜାନ୍ ଏଲୁ କିଆନାହି ଏୱାରି ର ଦିନାତି ଗିଜ୍ଜୁ ହାଚ୍ଚେରି, ଆଟେ ତା ବିଡ଼ା ଦାଲ୍ଲା ଆଟେ ତା ପୁଞ୍ଜାନ୍ନି ଦାଲ୍ଲାତାୱା ଏୱାଞ୍ଜିକି ଦାହ୍ପନ୍ ମ୍ରାସ୍ତେରି, 45ଆଟେ ଏୱାଞ୍ଜିକି ପାଃନେଟେଃଏ ଦାହି ଦାହି ଜିରୁସାଲମଇନ୍ଦା ୱ୍ଡେତେରି । 46ମୁ ଦିନାଟି ଏୱାରି ଏୱାଞ୍ଜିକି ଜିରୁସାଲମ ମନ୍ଦିରତାୱା ପାଟେରି; ଦର୍ମ ଗ୍ରାପାଗାଟାର୍ ଡ଼ାହି କକ୍ଚ୍ଚାନାହି ଏୱାର୍ତି କାତା ୱେଞ୍ଜିଚ୍ଚେଞ୍ଜି, ଆଟେ ଏୱାରିକି ୱ୍ଡେପ୍ଚ୍ଚି ୱେଞ୍ଜିଚ୍ଚେଞ୍ଜି, 47ଆଟେ ଏଚ୍ଚେ ଦାଲ୍ଲା ଏୱାଞ୍ଜ୍ତି କାତା ୱେଞ୍ଜିଚ୍ଚେରି, ହାବେତାରି ଏୱାଞ୍ଜ୍ତି ବୁଦ୍ଦି ଆଟେ ୱେସ୍ପନ୍ତାଦା ହୁଡ଼ାନ୍ ଆକ୍କାବାଡ଼ାଙ୍ଗ୍ ଆଇଚ୍ଚେରି । 48ଏୱାରି ଏୱାଞ୍ଜିକି ହୁଡ଼ାନ୍ ଆକ୍କାବାଡ଼ାଙ୍ଗ୍ ଆତେରି, ଆଟେ ତା ଇୟା ଏୱାଞ୍ଜିକି ୱେସ୍ତେ, “ମ୍ରିଃଏଞ୍ଜାତି, ମାଙ୍ଗେ ଇନାବାଗା ଏହେଙ୍ଗିସି ବେବାର୍ କିଆତି ? ହୁଡ଼ାମୁ, ନି ଆବା ଆଟେ ନାନୁ ରାହାପାହା ଆନାହି ନିଙ୍ଗେ ଦାହ୍ପିଞ୍ଜାନାମୁ ।”
49ଇଦିମ୍ୱା ଏୱାଞ୍ଜି ଏୱାରିକି ୱେସ୍ତେଞ୍ଜି, “ଇନ୍ନା ବାଗା ମିରୁ ନାଙ୍ଗେ ଦାହ୍ପିଞ୍ଜାତେରି ? ନା ଆବାତି ଇଡ୍ଡୁତାୱା ନାଙ୍ଗେ ମାନ୍ବନ୍ ଆନେ, ଇଦା ଇନ୍ନା ପୁଞ୍ଜାହେଃଲ୍ଲାତେରି ?” 50ମତ୍ର ଏୱାଞ୍ଜି ଏୱାରିକି ଇମ୍ୱିନ୍ କାତା ୱେସ୍ତେଞ୍ଜି, ଏଦା ଏୱାରି ପୁଃନ୍ନାତେରି ।
51ଡେଗ୍ଗା ଏୱାଞ୍ଜି ଏୱାର୍ ଡ଼ାହି ୱ୍ଡେଚାନ୍ ନାଜରିତଇନ୍ଦା ୱାତେଞ୍ଜି ଅଟେ ଏୱାର୍ ଡ଼ାହି ବାସାଆତେଞ୍ଜି; ଆଟେ ତା ଇୟା ଇ ହାବେତ୍ କାତା ନେହେନ୍ ତା ହଡାଙ୍ଗ୍ତାୱା ଇଟ୍ଟିତେ । 52ଆଟେ ଜିସୁ ଗ୍ୟାଁନଟି ଆଟେ ଗାଣ୍ଡିଟି, ଆଟେ ମୁଲାପେନୁତି ଅଟେ କୁଇଙ୍ଗ୍ତି ଅନୁଗ୍ରହଟି ବାଡ୍ଡି ଆତେଞ୍ଜି ।
Currently Selected:
ଲୁକ 2: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
