ଲୁକ 3
3
ଡୁବନ୍ ହିନ୍ନି ଜହନତି ପ୍ରଚାର
(ମାତିଉ ୩:୧–୧୨; ମାର୍କ ୧:୧–୮; ଜହନ ୧:୧୯–୨୮)
1ତିବିରିଆ କାଇସର ଆକୁଡ଼୍ କିଆନ୍ ପନ୍ଦ୍ର ଅଁଣ୍ଡୁ ଆଇଚ୍ଚି ତୁକାତାୱା, ପନ୍ତିୟ ପିଲାତ ଜିହୁଦା ରାଜିତି ଆକୁଡ଼୍ କିଅନ୍ତାଞ୍ଜି ମାଚ୍ଚେଞ୍ଜି ଅଟେ ହେରଦ ଗାଲିଲିତି ସାମନ୍ତ ରାଜେଞ୍ଜି ମାଚ୍ଚେଞ୍ଜି, ଆଟେ ତା ଆମ୍ୱେସ୍ ପିଲିପ ଇତୁରିଆ ଅଟେ ତ୍ରାକନିତି ରାଜିତାଞ୍ଜି ମାଚ୍ଚେଞ୍ଜି, ଆଟେ ଲୁସାନିଆ ଅବିଲିନିତି ସାମନ୍ତ ରାଜେଞ୍ଜି ମାଚ୍ଚେଞ୍ଜି, 2ଅଟେ ହାନାନ ଅଟେ କୟାପା ଗାମିନ୍ ଜାଜକଙ୍ଗ୍ ମାଚ୍ଚେରି, ଏଚିତୁକାତାୱା ମୁଲାପେନୁତି ବାକ୍ୟ ଚିହ୍ପି ଗର୍ରିତାୱା ଜିକରିୟତି ମ୍ରିଃଏଞ୍ଜି ଜହନ ରେଃଏସ୍ ଏତେ । 3ଏମ୍ବାଟି ଡୁବନ୍ ହିନ୍ନି ଜହନ ଜର୍ଦ୍ଦନ ଟାକ୍କେ ମାଚ୍ଚି ହାବେତ୍ ରାଜିଇନ୍ଦା ହାଜ୍ଜାନାହି ପାପ ମାକ୍ସାଡ଼ି ବାଗାଟି ଏଲୁୱ୍ଡେପ୍ଚାନ୍ ଡୁବନ୍ ଆଅନ୍ ବାଗା ୱେସ୍ତେଞ୍ଜି । 4ଇନିସ୍କି ଜିସାୟ ବାବବାଦିତି ପୁତିତାୱା ୱ୍ରିଗାଆନ୍ନେ,
“ଚିହ୍ପି ଗର୍ରିତାୱା ଗଲି ଆନ୍ ୱେସ୍ପିନ୍ନି ରଃଅଞ୍ଜ୍ତି ଉକୁଡ଼୍,
ଦାର୍ମୁତି ପାହେର୍ ହାମ୍ୱେର୍ କିଦୁ,
ରାଜି ପାହେର୍ ତିହ୍ଦୁ,
5ହାବେତ୍ କୁଟ୍ଟିଙ୍ଗ୍ ଗର୍ରି ଡ଼ାମ୍ୱା କିୱା ଆନେ,
ଆଟେ ହାବେତ୍ ବେର୍ ହର୍କା ଆଟେ ଡଟି ହର୍କା ଡ଼ାମ୍ୱା କିୱା ଆନେ,
କଟେଡ଼୍ ପାହେର୍ ଲେର୍ କିୱା ଆନେ,
ଆଟେ କୁଟ୍ଟିଙ୍ଗ୍ ଡେପାଙ୍ଗ୍ ଆନ୍ନି ୱିର୍ରା ଡ଼ାମ୍ୱା ପାହେର୍ ଡେହେଙ୍ଗ୍ ଆନେ;
6ଆଟେ ପୁର୍ତି ଦାଲ୍ଲାହାବେ ମୁଲାପେନୁତି ଜ୍ଡିପା ହୁଡ଼ିନେରି ।”
7 #
ମାତି ୧୨:୩୪; ୨୩:୩୩ ଆଟେ ଜହନ ଡୁବନ୍ ଆଅନ୍ ବାଗା ତା ଟାକ୍କେ ୱାଇଚ୍ଚି ଦାଲ୍ଲାନିକି ୱେସ୍ତେଞ୍ଜି, “ଏ ଗାପ୍ଚି ବିସଗାଟି ରାଚୁତି ପୁଣ୍ଡି, ୱାଇନି ତରୁଟିଆଟି ଜ୍ଡିଅନ୍ ବାଗାଟି ଏମ୍ୱେ ମିଙ୍ଗେ ୱେସ୍ତାତେ ? 8#ଜହ ୮:୩୩ଏଦାକି ମିରୁ ମି ଏଲୁୱ୍ଡେପ୍ଚାନ୍ ନେହି ବେବାର୍ ତସ୍ଦୁ; ଆଟେ ଅବ୍ରାହାମ ତ ମା ଆବା ଇଞ୍ଜାନ୍ ହଡାଙ୍ଗିଃଆ ଏଲୁ କିଃଆଟୁ; ଇନାକି ନାନୁ ମିଙ୍ଗେ ୱେସ୍ପିଞ୍ଜା ମୁଲାପେନୁ ଇ ୱାଲ୍ଲିଙ୍ଗ୍ଟିଆଟି ଅବ୍ରାହାମ ବାଗାଟି ବଦାଙ୍ଗ୍ନିକି ପିଲ୍ପନ୍ ମୁନେଞ୍ଜି । 9#ମାତି ୭:୧୯ଆଟେ ହାଦାଡ଼ି ଟିକ୍ନା ମ୍ରାନୁ ଟାକ୍କୁତାୱା କୁରେଡ଼୍ ମାଟ୍ପା ଆନ୍ନେ; ଏଦାବାଗା ଇମ୍ୱିନ୍ ମ୍ରାନୁ ନେହି କାଉ ଆଃଗେଏ, ଏଦା କାତାନାହି ନାଡ଼ିତାୱା କୁମ୍ବନ୍ ଆନେ।”
10ଏମ୍ୱାଟି ଦାଲ୍ଲା ତାଙ୍ଗେ ୱେନ୍ବନ୍ ମ୍ରାସ୍ତେରି, “ଏହେଙ୍ଗ୍ ଆତେସି ମାମୁ ଇନ୍ନା କିନାମୁ ?”
11ଜହନ ଏୱାରିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ଇନ୍ଦାରିକି ରିଣ୍ଡି ଅଙ୍ଗିଙ୍ଗ୍ ମାନ୍ନୁ, ଏୱାଞ୍ଜି ଇନ୍ଦାରିକି ହେଃଲ୍ଲ, ଏୱାଞ୍ଜିକି ରଣ୍ଡା ହିପାକାଞ୍ଜି; ଆଟେ ଇନ୍ଦାରିକି ତିନ୍ବନ୍ ମାନ୍ନେ ଏୱାଞ୍ଜି ଏହେଙ୍ଗିସି କିପାକାଞ୍ଜି ।”
12 #
ଲୁକ ୭:୨୯
ସିସ୍ଟୁଅନ୍ତାରି ୱାଡ଼େ ଡୁବନ୍ ପାଁନ୍ବନ୍ ବାଗା ୱାନ୍ ତାଙ୍ଗେ ୱେଚ୍ଚେରି, “ଏ ଗ୍ରାପାଗାଟାତି ମାମୁ ଇନ୍ନା କିନାମୁ ?”
13ଏୱାଞ୍ଜି ଏୱାରିକି ୱେସ୍ତେଞ୍ଜି, “ମି ବାଗାଟି ଏଚ୍ଚଡ଼୍ ୱ୍ରିହ୍ପନ୍ତି ହାଜୁ ମାନ୍ନେ ତା ତାୱାଟି ଏଗେଲ୍ ୱ୍ରିଃହାଟୁ ।”
14ସିପେଙ୍ଗ୍ ୱାଡ଼େ ତାଙ୍ଗେ ୱେନ୍ବନ୍ ମ୍ରାସ୍ତେରି, “ଆଟେ ମାମୁ ଇନ୍ନା କିନାମୁ ?” ଏୱାଞ୍ଜି ଏୱାରିକି ୱେସ୍ତେଞ୍ଜି, “ବଲଟି କି କଲ ୱେସାନାହି ଇନ୍ଦାର୍ତି ଦନ ଅଃଆଟୁ, ଆଟେ ମିଙ୍ଗେ ଏଚ୍ଚଡ଼୍ ଟାକ୍କାଙ୍ଗ୍ ହିଆନେରି ଏଚ୍ଚଡ଼୍ ଟାକ୍କାଙ୍ଗ୍ ଡ଼ାହି ଲତ୍ନା ବାସାଆଦୁ ।”
15ଦାଲ୍ଲା କାଚାନ୍ ମାଚ୍ଚାୱିଃଆଟି, ଜହନ କିନା କ୍ରିସ୍ଟ ଆନେଞ୍ଜି, ଇଦା ଜହନ କୁଲାଟି ହାବେତାରି ତା ତା ଏଲୁଟି କାତାବାର୍ତା କିଚ୍ଚେରି, 16ଜହନ ହାବେତାରିନିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ନାନୁ ପାଃଏ ଏଜୁତାୱା ଡୁବନ୍ ହିଞ୍ଜା, ନା ତାୱାଟି ଜେ, ଏଗେଲ୍ ବଲଗାଟାଞ୍ଜି, ଏୱାଞ୍ଜି ୱାଇନ୍ନେଞ୍ଜି, ତା ପାଣ୍ଡେଙ୍ଗ୍ତି ନଡ଼୍କା ୱ୍ରିପ୍କନ୍ ବାଗା ନାନୁ ଜୁଗ୍ୟ ଆଃଏ, ଏୱାଞ୍ଜି ମିଙ୍ଗେ ପିର୍ନି ଡିଙ୍ଗା ଅଟେ ନାଡ଼ିଟି ଡୁବନ୍ ହିଆନେଞ୍ଜି । 17ଏୱାଞ୍ଜ୍ତି କାଜ୍ଜୁତାୱା ହେଚି ମାନ୍ନେ, କ୍ଲାଃଉତାୱା ମାନ୍ନି ଗହମତିଦି ନେହେନ୍ ଜିଞ୍ଜନ୍ ବାଗାଟି, ଆଟେ ତା କିଟ୍ଟାଇଡ୍ଡୁତାୱା ଗହମ ଉହି କିଅନ୍ ବାଗାଟି, ମତ୍ର ହାଟ୍କାତିଦି ଏୱାଞ୍ଜି ଏଚ୍ଚେକ୍ ଡୁମ୍ବାନ୍ ନାଡ଼ିତାୱା କୁମ୍ୱିନେଞ୍ଜି ।”
18ଜହନ ଏହେଙ୍ଗିସି ଏଗେଲ୍ ଉପଦେସ ହିଆନ୍, ଆଟେ ବିହି ବିହି ଉଚ୍ଚାହ ହିଅନ୍ତି ବାକ୍ୟ ୱେସାନାହି, ଦାଲ୍ଲା ରେଃଏସ୍ ସୁସମାଚାର ୱେସ୍ପିଚ୍ଚେଞ୍ଜି, ଆଟେ ଏଲୁୱ୍ଡେପନ୍ ବାଗା ଏୱାରିକି ଉପଦେସ ହିଚ୍ଚେଞ୍ଜି । 19#ମାତି ୧୪:୩,୪; ମାର୍କ ୬:୧୭,୧୮ମତ୍ର ସାମନ୍ତ ରାଜେଞ୍ଜି ହେରଦ ତା ଆମ୍ବେସ୍ତି କୁଆଲୁ ହେରଦିଆତି କୁଲାଟି ଅଟେ ତାନୁ କିଆନ୍ନି ହାବେତ୍ ଡ଼ଃଆନ୍ କାମା କୁଲାଟି ଜହନତାୱାଟି ଉପଦେସ ପାଁନ୍ବନେଃଏ, 20ଏୱାଞ୍ଜି ଜହନନିକି ବନ୍ଦି ଇଡ୍ଡୁତାୱା ବନ୍ଦି କିଆନ୍ ତା ହାବେତ୍ ଡ଼ଃଆନ୍ କାମା ଡ଼ାହି ଇଦା ୱାଡ଼େ ଆଟ୍ତେଞ୍ଜି,
ଜହନ ଜିସୁନିକି ଡୁବନ୍ ହିଅନ୍
(ମାତିଉ ୩:୧୩–୧୭; ମାର୍କ ୧:୯–୧୧)
21ହାବେ ଦାଲ୍ଲା ଡୁବନ୍ ଆତାୱିଃଆଟି ଜିସୁ ୱାଡ଼େ ଡୁବନ୍ ଆନ୍ ପ୍ରାତ୍ନା କିଚ୍ଚି ତୁକାତାୱା ଜାଗ୍ଗୁ ଗେର୍ପା ଆତେ, 22#ମାତି ୩:୧୭; ମାର୍କ ୧:୧୧; ଲୁକ ୯:୩୫ପିର୍ନି ଡିଙ୍ଗା ଗୁଗୁର୍ ଲାକ୍କା ଆନ୍ ତା କୁଃଏଟି ଜାତାତେ, ଆଟେ ଜାଗ୍ଗୁଟି ଇ ହାଦ୍ଦା ଆତେ, “ନିନୁ ନା ଜେଡାଗାଟି ମ୍ରିଃଏଞ୍ଜାତି, ନି ପାଟ୍ଟି ନାନୁ ଏଗେଲ୍ ରାହାଙ୍ଗ୍ ।”
ଜିସୁ କ୍ରିସ୍ଟତି ପୁଣ୍ଡିହିରୁ
(ମାତିଉ ୧:୧–୧୭)
23ଜିସୁ ପ୍ରଚାର କାମା ମ୍ରାସ୍ତି ତୁକାତାୱା ତାଙ୍ଗେ ବାଇକ୍ କଡ଼େକ୍ ଦାସା ଅଁଣ୍ଡୁ ଆଚ୍ଚେ; ଦାଲ୍ଲାତି କାତା ଡେହେଙ୍ଗ୍ ଜିସୁ ଜସେପତି ମ୍ରିଃଏଞ୍ଜି; ଜସେପ ଏଲିତି ମ୍ରିଃଏଞ୍ଜି, 24ଏଲି ମତାତତି ମ୍ରିଃଏଞ୍ଜି, ମତାତ ଲେବିତି ମ୍ରିଃଏଞ୍ଜି, ଲେବି ମଲକିତି ମ୍ରିଃଏଞ୍ଜି, ମଲକି ଜନ୍ନୟତି ମ୍ରିଃଏଞ୍ଜି, ଜନ୍ନୟ ଜସେପତି ମ୍ରିଃଏଞ୍ଜି, 25ଜସେପ ମତତ୍ୟାତି ମ୍ରିଃଏଞ୍ଜି, ମତତ୍ୟା ଆମସତି ମ୍ରିଃଏଞ୍ଜି, ଆମସ ନାହୁମତି ମ୍ରିଃଏଞ୍ଜି, ନାହୁମ ହେସ୍ଲିତି ମ୍ରିଃଏଞ୍ଜି, ହେସ୍ଲି ନଗୟତି ମ୍ରିଃଏଞ୍ଜି, 26ନଗୟ ମହତତି ମ୍ରିଃଏଞ୍ଜି, ମହତ ମତତ୍ୟାତି ମ୍ରିଃଏଞ୍ଜି, ମତତ୍ୟା ସିମୟିତି ମ୍ରିଃଏଞ୍ଜି, ସିମୟି ଜସେକତି ମ୍ରିଃଏଞ୍ଜି, ଜସେକ ଜଦାତି ମ୍ରିଃଏଞ୍ଜି, 27ଜଦା ଜଆନାତି ମ୍ରିଃଏଞ୍ଜି, ଜଆନା ରେସାତି ମ୍ରିଃଏଞ୍ଜି, ରେସା ଜିରୁବାବିଲତି ମ୍ରିଃଏଞ୍ଜି, ଜିରୁବାବିଲ ସଲ୍ଟିଏଲତି ମ୍ରିଃଏଞ୍ଜି, ସଲ୍ଟିଏଲ ନେରିତି ମ୍ରିଃଏଞ୍ଜି, 28ନେରି ମଲକିତି ମ୍ରିଃଏଞ୍ଜି, ମଲକି ଅଦ୍ଦିତି ମ୍ରିଃଏଞ୍ଜି, ଅଦ୍ଦି କସାମତି ମ୍ରିଃଏଞ୍ଜି, କସାମ ଏଲ୍ମଦାନତି ମ୍ରିଃଏଞ୍ଜି, ଏଲ୍ମଦାନ ଏରତି ମ୍ରିଃଏଞ୍ଜି, 29ଏର ଜିହସୟତି ମ୍ରିଃଏଞ୍ଜି, ଜିହସୟ ଏଲିୟାଜରତି ମ୍ରିଃଏଞ୍ଜି, ଏଲିୟାଜର ଜରିମତି ମ୍ରିଃଏଞ୍ଜି, ଜରିମ ମତାତତି ମ୍ରିଃଏଞ୍ଜି, ମତାତ ଲେବିତି ମ୍ରିଃଏଞ୍ଜି, 30ଲେବି ସିମିୟନତି ମ୍ରିଃଏଞ୍ଜି, ସିମିୟନ ଜିହୁଦାତି ମ୍ରିଃଏଞ୍ଜି, ଜିହୁଦା ଜସେପତି ମ୍ରିଃଏଞ୍ଜି, ଜସେପ ଜନାମତି ମ୍ରିଃଏଞ୍ଜି, ଜନାମ ଏଲିୟାକିମତି ମ୍ରିଃଏଞ୍ଜି, 31ଏଲିୟାକିମ ମଲାହତି ମ୍ରିଃଏଞ୍ଜି, ମଲାହ ମନ୍ନାତି ମ୍ରିଃଏଞ୍ଜି, ମନ୍ନା ମତତାତି ମ୍ରିଃଏଞ୍ଜି, ମତତା ନାତନତି ମ୍ରିଃଏଞ୍ଜି, ନାତନ ଦାଉଦତି ମ୍ରିଃଏଞ୍ଜି, 32ଦାଉଦ ଜିସିତି ମ୍ରିଃଏଞ୍ଜି, ଜିସି ଅବେଦତି ମ୍ରିଃଏଞ୍ଜି, ଅବେଦ ବୟଜତି ମ୍ରିଃଏଞ୍ଜି, ବୟଜ ସେଲହତି ମ୍ରିଃଏଞ୍ଜି, ସେଲହ ନହସନତି ମ୍ରିଃଏଞ୍ଜି, 33ନହସନ ଅମିନାଦବତି ମ୍ରିଃଏଞ୍ଜି, ଅମିନାଦବ ଅଦ୍ମିନତି ମ୍ରିଃଏଞ୍ଜି, ଅଦ୍ମିନ ଅର୍ନିତି ମ୍ରିଃଏଞ୍ଜି, ଅର୍ନି ହେସ୍ରନତି ମ୍ରିଃଏଞ୍ଜି, ହେସ୍ରନ ପେରସତି ମ୍ରିଃଏଞ୍ଜି, ପେରସ ଜିହୁଦାତି ମ୍ରିଃଏଞ୍ଜି, 34ଜିହୁଦା ଜାକୁବତି ମ୍ରିଃଏଞ୍ଜି, ଜାକୁବ ଇସାକତି ମ୍ରିଃଏଞ୍ଜି, ଇସାକ ଅବ୍ରାହାମତି ମ୍ରିଃଏଞ୍ଜି, ଅବ୍ରାହାମ ତେରହତି ମ୍ରିଃଏଞ୍ଜି, ତେରହ ନାହରତି ମ୍ରିଃଏଞ୍ଜି, 35ନାହର ସରୁଗତି ମ୍ରିଃଏଞ୍ଜି, ସରୁଗ ରେଉତି ମ୍ରିଃଏଞ୍ଜି, ରେଉ ପେଲଗତି ମ୍ରିଃଏଞ୍ଜି, ପେଲଗ ଏବରତି ମ୍ରିଃଏଞ୍ଜି, ଏବର ସେଲହତି ମ୍ରିଃଏଞ୍ଜି, 36ସେଲହ କେନାନତି ମ୍ରିଃଏଞ୍ଜି, କେନାନ ଅର୍ପକ୍ୟଦତି ମ୍ରିଃଏଞ୍ଜି, ଅର୍ପକ୍ୟଦ ସେମତି ମ୍ରିଃଏଞ୍ଜି, ସେମ ନହତି ମ୍ରିଃଏଞ୍ଜି, ନହ ଲେମକତି ମ୍ରିଃଏଞ୍ଜି, 37ଲେମକ ମତୁସେଲହତି ମ୍ରିଃଏଞ୍ଜି, ମତୁସେଲହ ହନକତି ମ୍ରିଃଏଞ୍ଜି, ହନକ ଜେରଦତି ମ୍ରିଃଏଞ୍ଜି, ଜେରଦ ମହଲଲେଲତି ମ୍ରିଃଏଞ୍ଜି, ମହଲଲେଲ କେନାନତି ମ୍ରିଃଏଞ୍ଜି, 38କେନାନ ଏନସତି ମ୍ରିଃଏଞ୍ଜି, ଏନସ ସେତତି ମ୍ରିଃଏଞ୍ଜି, ସେତ ଆଦମତି ମ୍ରିଃଏଞ୍ଜି, ଆଦମ ମୁଲାପେନୁତି ମ୍ରିଃଏଞ୍ଜି ।
Currently Selected:
ଲୁକ 3: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
