ଲୁକ 4
4
ସଇତାନ ଜିସୁନିକି ପରିକ୍ୟା କିଅନ୍
(ମାତିଉ ୪:୧–୧୧; ମାର୍କ ୧:୧୨–୧୩)
1ଜିସୁ ପିର୍ନି ଡିଙ୍ଗାଟି ନେଞ୍ଜାନାହି ଜର୍ଦ୍ଦନ ପେରେଏଜୁଟି ୱ୍ଡେଚାନ୍ ୱାତେଞ୍ଜି ଅଟେ ଡିଙ୍ଗାତି ସାହାଜ୍ୟଟି ତାକାନ୍ ଚିହ୍ପି ଗର୍ରିଇନ୍ଦା ହାଚ୍ଚେଞ୍ଜି । 2ଏମ୍ବାଟି ରି କୁଡ଼ି ଦିନା ଟିକ୍ନା ସଇତାନ ଜିସୁନିକି ପରିକ୍ୟା କିତେ । ଏ ତୁକାତାୱା ଏୱାଞ୍ଜି ଇନ୍ନା ତିନ୍ବା ଉନ୍ବା କିଆହେଃଲ୍ଲାତେଞ୍ଜି, ଏ ରି କୁଡ଼ି ଦିନା ୱିହନେଃଏ, ତାଙ୍ଗେ ହାକ୍କି ଆତେ ।
3ଏମ୍ୱାଟି ସଇତାନ ଏୱାଞ୍ଜିକି ୱେସ୍ତେଞ୍ଜି, “ନିନୁ ଜଦି ମୁଲାପେନୁତି ମ୍ରିଃଏଞ୍ଜାତି, ଏହେଙ୍ଗ୍ ଆତେସି ଇ ୱାଲ୍ଲିତିଦି ରୁଟି ଆଅନ୍ ବାଗା ୱେସ୍ମୁ ।”
4ଜିସୁ ତାଙ୍ଗେ ୱେସ୍ତେଞ୍ଜି, “ଦର୍ମପୁତିତାୱା ୱ୍ରିଗାଆନ୍ନେ, କୁଏଞ୍ଜି ୱାର୍ରି ରୁଟିଙ୍ଗ୍ ଡ଼ାହି ନିମ୍ୱେଞ୍ଜି ।”
5ଆଟେ ସଇତାନ ଏୱାଞ୍ଜିକି ହରୁଡ଼ିପେ ଅଆନ୍ ର ମାଡେ ପୁର୍ତିତି ହାବେତ୍ ରାଜିଙ୍ଗ୍ ଏୱାଞ୍ଜିକି ତସ୍ତେଞ୍ଜି । 6ଆଟେ ସଇତାନ ଏୱାଞ୍ଜିକି ୱେସ୍ତେଞ୍ଜି, “ନାନୁ ନିଙ୍ଗେ ଇ ହାବେତ୍ ହକତ୍ ଅଟେ ଇ ହାବେତ୍ ଦନ ହିଆ, ଇନାକି ନାଙ୍ଗେ ଏୱା ସର୍ପି କିୱାଆନ୍ନେ, ଆଟେ ନାନୁ ଇନ୍ଦାରିକି ମନ, ଏୱାଞ୍ଜିକି ଏଦା ହିମାଃଇ । 7ଆଟେ ନିନୁ ଜଦି ନା ଗାଡ଼ିହେରୁ କିଆଦି, ଇଚ୍ଚେସି ଇ ହାବେ ନିଙ୍ଗେ ହିଆ ।”
8ଜିସୁ ତାଙ୍ଗେ ୱେସ୍ତେଞ୍ଜି, ଦର୍ମପୁତିତାୱା ୱ୍ରିଗାଆନ୍ନେ, “ନିନୁ ୱାର୍ରି ଦାର୍ମୁ ନି ମୁଲାପେନୁତି ଗାଡ଼ିହେରୁ କିଦି, ଆଟେ ୱାର୍ରି ତା ଆଙ୍ଗୁଲ୍ ଆଦି।”
9ଆଟେ ସଇତାନ ତାଙ୍ଗେ ଜିରୁସାଲମଇନ୍ଦା ଅଚ୍ଚାନାହି ମନ୍ଦିରତି ଦଲାନ୍ କୁଃଏଟି ଡିଡ୍ଡି କିଆନ୍ ତାଙ୍ଗେ ୱେସ୍ତେଞ୍ଜି, “ନିନୁ ଜଦି ମୁଲାପେନୁତି ମ୍ରିଃଏଞ୍ଜାତି, ଏହେଙ୍ଗ୍ ଆତେସି ଇମ୍ୱାଟିଆଟି ନେତେ ପାଞ୍ଜାମୁ ।” 10ଇନାକି ଦର୍ମପୁତିତାୱା ୱ୍ରିଗାଆନ୍ନେ, ନିଙ୍ଗେ ନିପନ୍ ବାଗାଟି ମୁଲାପେନୁ ତା ଦୁତଙ୍ଗ୍ନିକି ଆଦେସ୍ ହିନେଞ୍ଜି । 11ଆଟେ ଇଦି ୱାଡ଼େ ପୁତିତାୱା ୱ୍ରିଗାଆନ୍ନେ, କାଲେ ନି ପାନେଡ଼୍କା ୱାଲ୍ଲିତାୱା ଉଗ୍ନୁ, ଇଦାବାଗା ଏ ଦୁତଙ୍ଗ୍ ନିଙ୍ଗେ କାସ୍କାଟି ଡେସାନ୍ ଆହ୍ତାନେରି ।
12ମତ୍ର ଜିସୁ ତାଙ୍ଗେ ୱେସ୍ତେଞ୍ଜି, “ଦର୍ମପୁତିତାୱା ୱ୍ରିଗାଆନ୍ନେ, ନିନୁ ଦାର୍ମୁ ନି ମୁଲାପେନୁନିକି ପରିକ୍ୟା କିଃଆ ।”
13ସଇତାନ ତାଙ୍ଗେ ହାବେତ୍ ୱାହୁତି ପରିକ୍ୟା ୱିହି କିତାୱିଃଆଟି ଜିସୁନିକି ପିହାନାହି ହାଚ୍ଚେଞ୍ଜି ।
ଜିସୁ ତା ଆଙ୍ଗୁଲ୍ କାମା ମ୍ରାସ୍ପନ୍
(ମାତିଉ ୪:୧୨–୧୭; ମାର୍କ ୧:୧୪–୧୫)
14ଏମ୍ୱାଟି ଜିସୁ ଡିଙ୍ଗାତି ବଲଟି ଗାଲିଲି ରାଜିଇନ୍ଦା ୱ୍ଡେଚାନାହି ହାଚ୍ଚେଞ୍ଜି; ଆଟେ ଗୁଞ୍ଜେର୍ତି ହାବେତ୍ ନାସ୍କାନାୱା ତା କାମା ପଙ୍ଗିତେ । 15ଆଟେ ଏୱାଞ୍ଜି ଏୱାର୍ତି ହାଜା ଇଟ୍କା ଏସେନ୍ ଗ୍ରାପ୍ଚାନ୍ ହାବେତାରିତାୱାଟି ଗଉରବ ପାଁନ୍ବନ୍ ମ୍ରାସ୍ତେଞ୍ଜି ।
ଜିସୁନିକି ନାଜରିତତାୱା ଗ୍ରହନ କିଃଆତେରି
(ମାତିଉ ୧୩:୫୩–୫୮; ମାର୍କ ୬:୧–୬)
16ଏୱାଞ୍ଜି ଇମ୍ୱିନ୍ ନାଜରିତ ଗାଡ଼ାନାଜୁତାୱା ବାଡ୍ଡି ଆଚ୍ଚେଞ୍ଜି, ଏ ଗର୍ରିଇନ୍ଦା ହାଚ୍ଚେଞ୍ଜି ଅଟେ ତା ହାଜୁ ଡେହେଙ୍ଗ୍ ୱାହୁଜାମ୍ବା ୱାରାତାୱା ହାଜା ଇଡ୍ଡୁତାୱା ହଟେଞ୍ଜି, ଆଟେ ଦର୍ମପୁତି ପଡ଼ିଆଅନ୍ ବାଗା ଡିଡ୍ଡିତେଞ୍ଜି । 17ଏମ୍ବାଟି ଜିସାୟ ବାବବାଦିତି ପୁତି ତାଙ୍ଗେ ହିତେରି, ଆଟେ ଜିସୁ ଏଦା ୱ୍ଲେକ୍ଚାନାହି, ଇମ୍ୱିନ୍ ଗର୍ରିତାୱା ଇ ବାକ୍ୟ ୱ୍ରିଗାଆନ୍ନେ, ଏଦା ପାଟେଞ୍ଜି,
18“ଦାର୍ମୁତି ଡିଙ୍ଗା ନା ପାଟ୍ଟି ଜାତାତେ,
ଏଦାକି ପାଃନାନାରି ରେଃଏସ୍ ସୁସମାଚାର ୱେସ୍ପନ୍ ବାଗା ଏୱାଞ୍ଜି ନାଙ୍ଗେ ନିଜ୍ଜୁଟି ଆଚି କିଆଞ୍ଜାନେଞ୍ଜି,
ବନ୍ଦିଗାଟାରିକି କୁଲ୍ପନ୍ ଅଟେ
କାଡ଼ାଙ୍ଗ୍ଗାଟାରିକି ହୁଡ଼ନ୍ତି କୁଲା ୱେସ୍ପନ୍ ବାଗା,
ଆଟେ ଦୁଃକ ପାଁଣ୍ଡିନ୍ନି ଦାଲ୍ଲାନିକି କୁଲ୍ପନ୍ ବାଗା,
19ଆଟେ ଦାର୍ମୁତି ଅନୁଗ୍ରହ ଅଁଣ୍ଡୁ ୱେସ୍ପନ୍ ବାଗା
ଏୱାଞ୍ଜି ନାଙ୍ଗେ ପାଣ୍ଡାଞ୍ଜାନେଞ୍ଜି ।”
20ଡେଗ୍ଗା ଏୱାଞ୍ଜି ପୁତି ମୁଚ୍ଚି କିଆନାହି ଏମ୍ୱାତି ଆଙ୍ଗୁଲ୍ଗାଟାଞ୍ଜିକି ଏଦା ୱ୍ଡେପ୍ଚ୍ଚା ହିଆନ୍ କକ୍ତେଞ୍ଜି, ଆଟେ ହାଜା ଇଡ୍ଡୁତି ହାବେତାରିତି କାଡ଼୍କା ଏୱାଞ୍ଜିକି ମେହାନ୍ ମାଚ୍ଚୁ । 21ଆଟେ ଏୱାଞ୍ଜି ଏୱାରିକି ୱେସ୍ପନ୍ ମ୍ରାସ୍ତେଞ୍ଜି, “ନିଞ୍ଜୁ ଦର୍ମପୁତିତି ଇ ବାକ୍ୟ ମିରୁ ଜେ ୱେଚ୍ଚେରି ଏଦି ଲେର୍ ଆତେ ।”
22ଆଟେ ହାବେତାରି ଏୱାଞ୍ଜ୍ କୁଲାଟି ସାକି ହିଅନ୍ ମ୍ରାସ୍ତେରି ଅଟେ ତା ଗୁତିଟି ହପିଚ୍ଚି ଅନୁଗ୍ରହ ବାକ୍ୟତାୱା ଆକ୍କାବାଡ଼ାଙ୍ଗ୍ ଆତେରି, ଆଟେ ଏୱାରି ୱେସ୍ପନ୍ ମ୍ରାସ୍ତେରି, “ଇୱାଞ୍ଜି ଇନ୍ନା ଜସେପତି ମ୍ରିଃଏଞ୍ଜି ଆଃଏ ?”
23ଏମ୍ୱାଟି ଏୱାଞ୍ଜି ଏୱାରିକି ୱେସ୍ତେଞ୍ଜି, “ମିରୁ ନିଜ୍ଜାନେଃଏ ନାଙ୍ଗେ ଇ ୱେସାନ୍ନି କାତା ୱେସ୍ତାଦେରି, ଏ ବଇଦ, କାହେ ନି ଗାଣ୍ଡି ନେହି କିମୁ; କପର୍ନାହୁମତାୱା ଇନ୍ନା ଇନ୍ନା ଆନ୍ନେ ଇଞ୍ଜାନ୍ ମାମୁ ୱେଞ୍ଜିନ୍ନାମୁ, ଏୱା ହାବେ ଇ ଗର୍ରିତାୱା ନି ପ୍ଲିଆନି ନାଜୁତାୱା ୱାଡ଼େ କିମୁ ।” 24#ଜହ ୪:୪୪ଆଟେ ଏୱାଞ୍ଜି ୱେସ୍ତେଞ୍ଜି, “ନାନୁ ମିଙ୍ଗେ ନିଜ୍ଜାନେଃଏ ୱେସ୍ପିଞ୍ଜା” ଇମ୍ୱିନ୍ ବାବବାଦି ୱାଡ଼େ ତା ଆବାତି ଗାଡ଼ାନାଜୁତାୱା ସନ୍ମାନ୍ ପାଃନେଞ୍ଜି ।
25ମତ୍ର ନାନୁ ମିଙ୍ଗେ ନିଜ୍ଜାନେଃଏ ୱେସ୍ପିଞ୍ଜା, “ଏଲିୟତି ତୁକାତାୱା ଏଚ୍ଚିକିଃଆ ମୁ ଅଁଣ୍ଡୁ ହାରା ଡାଁଞ୍ଜୁ ଟିକ୍ନା ଜାଗ୍ଗୁଟି ପିଜ୍ଜୁ ଆଃଆତାୱାଟି ହାବେତ୍ ରାଜିତାୱା ଗାପ୍ଚି କାରି ଦିଆଚ୍ଚେ, ଏଚିତୁକାତାୱା ଇସ୍ରାଏଲତାୱାଟି ଏଗେଲ୍ ୱାଟ୍ଟାଗାଟା ମାଚ୍ଚୁ । 26ଆତେସ୍ୱାଡ଼େ ଏଲିୟନିକି ମୁଲାପେନୁ ଏୱାଡ଼୍ତି ଇନ୍ଦାର୍ ରେଃଏସ୍ ପାଣ୍ଡେଟେଃଏ, ୱାର୍ରି ସିଦନ ରାଜିତି ସାରିପତତି ରଣ୍ଡି ୱାଟ୍ଟାଗାଟି ଆଚାଲୁ ରେଃଏସ୍ ପାଣ୍ଡାଚ୍ଚେଞ୍ଜି । 27ଆଟେ ବାବବାଦି ଏଲିସାୟତି ତୁକାତାୱା ଇସ୍ରାଏଲତାୱା ଏଗେଲ୍ ମୁଟ୍ଡାଙ୍ଗ୍ ରଗୁଗାଟାର୍ ମାଚ୍ଚେରି; ଆତେସ୍ୱାଡ଼େ ଏୱାରି ତାୱାଟି ଏମ୍ୱେ ରଗୁ ନେହି ଆହେଃଲ୍ଲାତେରି, ୱାର୍ରି ସିରିଆ ଦେସାତି ନାମାନ ରଗୁଟି ନେହି ଆଚ୍ଚେଞ୍ଜି ।”
28ହାଜା ଇଡ୍ଡୁତାୱା ଇ ହାବେ କାତା ୱେଞ୍ଜି ୱେଞ୍ଜି ହାବେତାରି ରାଗାଟି ନେଞ୍ଜିତେରି । 29ଆଟେ ଏୱାରି ନିଙ୍ଗାନ୍ ଏୱାଞ୍ଜିକି ନାଜୁତାୱାଟି ହପ୍ତେରି ଅଟେ ଏୱାର୍ତି ଗାଡ଼ାନାଜୁ ଇମ୍ୱିନ୍ ହରୁତାୱା ମାଚ୍ଚେ, ଏ ହରୁଟି ନେତେ ତୁହ୍ପନ୍ ବାଗାଟି ଏୱାଞ୍ଜିକି ଏଦିମ୍ୱା ଅତେରି । 30ମତ୍ର ଏୱାଞ୍ଜି ଏୱାର୍ ମାଦ୍ଦେ ହଚାନ୍ ହାଚ୍ଚେଞ୍ଜି ।
ଜିସୁ ଡ଼ଃଆନ୍ ଡିଙ୍ଗା ଆହାଚ୍ଚି କୁଏଞ୍ଜିକି ନେହି କିଅନ୍
(ମାର୍କ ୧:୨୧–୨୮)
31ଏୱାଞ୍ଜି ଗାଲିଲିତି କପର୍ନାହୁମ ଗାଡ଼ାନାଜୁଇନ୍ଦା ୱାତେଞ୍ଜି, ଆଟେ ୱାହୁଜାମ୍ବା ୱାରାତାୱା ଦାଲ୍ଲାନିକି ଗ୍ରାପନ୍ ମ୍ରାସ୍ତେଞ୍ଜି । 32#ମାତି ୭:୨୮,୨୯ଆଟେ ଏୱାରି ତା ଗ୍ରାପନ୍ତାୱା ଆକ୍କାବାଡ଼ାଙ୍ଗ୍ ଆତେରି, ଇନାକି ତା ବାକ୍ୟ ହକତ୍ ପାଁଣ୍ଡାନ୍ନାଦି ମାଚ୍ଚେ । 33ରନେସି ହାଜା ଇଡ୍ଡୁତାୱା ଡ଼ଃଆନ୍ ଡିଙ୍ଗା ଆହାଚ୍ଚି ରଃଅଞ୍ଜି କୁଏଞ୍ଜି ମାଚ୍ଚେଞ୍ଜି; ଏୱାଞ୍ଜି ବେର୍ ଉକୁଡ଼୍ ଡ଼ାହି ଗଲି ଆତେଞ୍ଜି, 34“ଏ ନାଜରିତତି ଜିସୁ, ନି ଡ଼ାହି ମାନ୍ଦି ଇନ୍ନି ବିଡ଼ା ମାନ୍ନେ ? ନିନୁ କି ମାଙ୍ଗେ ନାହେଡ୍ କିଅନ୍ ବାଗାଟି ୱାତି ? ନିନୁ ଏମ୍ବେନାତି, ନାନୁ ଏଦା ପୁଞ୍ଜାମାଃଇ; ନିନୁ ମୁଲାପେନୁତି ଏ ପିର୍ନି କୁଏଞ୍ଜ୍ତାତି ।”
35ଜିସୁ ତାଙ୍ଗେ ଆସ୍ପି କିଆନ୍ ୱେସ୍ତେଞ୍ଜି, “ଡାମ୍ନା ବାସାଆମୁ, ଇୱାଞ୍ଜ୍ତାୱାଟି ହଚାନ୍ ହାଲ୍ମୁ ।” ଏମ୍ୱାଟି ଏ ବୁତ ଦାଲ୍ଲା ମାଦ୍ଦେନେଃଏ ପିହାନାହି ତାଙ୍ଗେ ଇନ୍ନା ନାହେଡ୍ କିଃଏଟେଃଏ ଏୱାଞ୍ଜ୍ତାୱାଟି ହଚାନ୍ ହାଚ୍ଚେ ।
36ଏମ୍ୱାଟି ହାବେତାରି ଆକ୍କାବାଡ଼ାଙ୍ଗ୍ ଆନାହି ତାରୁ ତାରୁ ୱେସ୍ପିଆତେରି, “ଇଦି ଇନ୍ନି କାତା ? ଏୱାଞ୍ଜି ଏ ଡ଼ଃଆନ୍ ଡିଙ୍ଗାଙ୍ଗ୍ତିଦି ହକତ୍ ଅଟେ ବଲ ଡ଼ାହି ଆଦେସ୍ ହିନ୍ନେଞ୍ଜି, ଆଟେ ଏୱା ହଚାନାହି ହାଜ୍ଜିନ୍ନୁ ।” 37ଏମ୍ୱାଟି ଏୱାଞ୍ଜ୍ କୁଲାଟି ସୁସମାଚାର ଗୁଞ୍ଜେର୍ ମାନ୍ନି ଗାଡ଼ାନାସ୍କା ଏସେନ୍ ପ୍ରେଜିତେ ।
ଜିସୁ ଗାପ୍ଚି ଦାଲ୍ଲାନିକି ନେହି କିଅନ୍
(ମାତିଉ ୮:୧୪–୧୭; ମାର୍କ ୧:୨୯–୩୪)
38ଡେଗ୍ଗା ଜିସୁ ହାଜା ଇଡ୍ଡୁତାୱାଟି ନିଙ୍ଗାନାହି ସିମନତି ଇଡ୍ଡୁଇନ୍ଦା ହାଚ୍ଚେଞ୍ଜି । ସିମନତି ପଦା ଗାପ୍ଚି ନମେର୍ ଆଇଚ୍ଚେ, ଆଟେ ଏୱାରି ଏଦାଡ଼୍ତି କୁଲାଟି ଏୱାଞ୍ଜିକି ଜିଗାନ୍ ୱେସ୍ତେରି । 39ଏମ୍ୱାଟି ଜିସୁ ତା ରେଃଏସ୍ ଡିଡ୍ଡାନାହି ନମେର୍ତିଦି ଆଦେସ୍ ହିଆନ୍ ୱେସ୍ତେଞ୍ଜି, ଆଟେ ତାଙ୍ଗେ ନମେର୍ ପିହ୍ତେ, ଆଟେ ଏଦି ଏଚିୱାଡ଼େ ନିଙ୍ଗାନାହି ଏୱାରିକି ଆଙ୍ଗୁଲ୍ ଆଅନ୍ ମ୍ରାସ୍ତେ ।
40ୱେଲା ମେଦ୍ଦେଏଚ୍ଚି ତୁକାତାୱା, ଏମ୍ୱେନାରି ବିହି ବିହି ରଗୁଟି ରେଡ଼ମ୍ ଆନ୍ ମାଚ୍ଚେରି, ଏ ହାବେତାରିନିକି ଏୱାରି ଏୱାଞ୍ଜ୍ ରେଃଏସ୍ ତାଚ୍ଚିୱାତେରି ଅଟେ ଏୱାଞ୍ଜି ହାବେ ଦାଲ୍ଲା କୁଃଏଟି କାଜ୍ଜୁ ଇଟ୍ଟାନାହି ଏୱାରିକି ନେହି କିତେଞ୍ଜି । 41ଆଟେ “ବୁତଙ୍ଗ୍ ୱାଡ଼େ ଗଲି ଆଏସ୍ନା ନିନୁ ମୁଲାପେନୁତି ମ୍ରିଃଏଞ୍ଜି ଇଞ୍ଜାନ୍ ୱେସାନାହି ଏଗେଲ୍ ଦାଲ୍ଲାତାୱାଟି ହଚାନ୍ ହାଚ୍ଚୁ ।” ଆଟେ ଜିସୁ ବୁତଙ୍ଗ୍ତିଦି ଆସ୍ପି କିଆନ୍ କାତା ୱେସ୍ପନ୍ ବାଗା ହିଃଆତେଞ୍ଜି, ଇନାକି ଏୱାଞ୍ଜି ଜେ କ୍ରିସ୍ଟ ଇଞ୍ଜାନ୍ ଏୱା ପୁଞ୍ଜିଚ୍ଚୁ ।
ହାଜା ଇଟ୍କାନାୱା ଜିସୁତି ୱେସ୍ପନ୍
(ମାର୍କ ୧:୩୫–୩୯)
42ଡାଃଏସ୍ ଆଅନେଃଏ, ଏୱାଞ୍ଜି ଗାଡ଼ାନାଜୁତାୱାଟି ହଚାନାହି ରଣ୍ଡା ଚିହ୍ପି ଗର୍ରିଇନ୍ଦା ହାଚ୍ଚେଞ୍ଜି; ଆଟେ ଦାଲ୍ଲା ହାବେ ତାଙ୍ଗେ ଦାହି ଦାହି ତା ରେଃଏସ୍ ୱାତେରି, ଆଟେ ଏୱାଞ୍ଜି ଇନିମିଡି ଏୱାର୍ତାୱାଟି ହାଃଲ୍ଲେଞ୍ଜି, ଏଦାବାଗା ତାଙ୍ଗେ ଆଙ୍ଗନ୍ ବାଗା ସେସ୍ଟା କିତେରି । 43ମତ୍ର ଏୱାଞ୍ଜି ଏୱାରିକି ୱେସ୍ତେଞ୍ଜି, “ବିହି ବିହି ଗାଡ଼ାନାଜୁତାୱା ୱାଡ଼େ ନାଙ୍ଗେ ମୁଲାପେନୁ ରାଜିତି ସୁସମାଚାର ୱେସ୍ପନ୍ ମାନ୍ନେ, ଇନାକି ଏଦାବାଗା ନାଙ୍ଗେ ମୁଲାପେନୁ ପାଣ୍ଡାଞ୍ଜାନେଞ୍ଜି ।”
44ଆଟେ ଏୱାଞ୍ଜି ଜିହୁଦା ରାଜିତି ହାବେତ୍ ହାଜା ଇଟ୍କା ଏସେନ୍ ପ୍ରଚାର କିଅନ୍ ମ୍ରାସ୍ତେଞ୍ଜି ।
Currently Selected:
ଲୁକ 4: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
