ଲୁକ 5
5
ଜିସୁ କାହେତି ଗ୍ରାମ୍ୱାଗାଟାଞ୍ଜିକି ଆର୍ପନ୍
(ମାତିଉ ୪:୧୮–୨୨; ମାର୍କ ୧:୧୬–୨୦)
1 #
ମାତି ୧୩:୧,୨; ମାର୍କ ୩:୯,୧୦; ୪:୧ ରନେସି ଜିସୁ ଗିନେସରତ ସାମ୍ନ୍ଦେର୍ ଇଡ଼ାତାୱା ଡିଡ୍ଡାଚ୍ଚେଞ୍ଜି, ଏଚିତୁକାତାୱା ଦାଲ୍ଲା ଗୁଟ୍ଟୁ ଆନ୍ ମୁଲାପେନୁତି ବାକ୍ୟ ୱେନ୍ବନ୍ ବାଗା ନାଚ୍ଚିତ୍ରଚି ଆଇଚ୍ଚେରି । 2ଆଟେ ଜିସୁ ସାମ୍ନ୍ଦେର୍ ଇଡ଼ା ରେଃଏସ୍ ରିଣ୍ଡା ଡଙ୍ଗାଙ୍ଗ୍ ମାଚ୍ଚାଦାଃଆ ହୁଡ଼ିତେଞ୍ଜି; ମିନ୍ଙ୍ଗା ଆହ୍ପନ୍ତାରି ଏମ୍ବାଟିଆଟି ଜାଚାନ୍ ଜାଲ ନବ୍ଗିଚ୍ଚେରି । 3ଏ ଡଙ୍ଗାଙ୍ଗ୍ତାୱାଟି ଇମ୍ୱିନାଦି ସିମନତାଦି ମାଚ୍ଚେ, ଏ ଡଙ୍ଗାତାୱା ଏଙ୍ଗାନ୍ ଗ୍ରିଆ ତାୱାଟି ହିତେ ଦେହା ଅନ୍ ବାଗା ଜିଗିତେଞ୍ଜି, ଆଟେ ଏୱାଞ୍ଜି ଡଙ୍ଗାତାୱା କକ୍ଚ୍ଚାନ୍ ଦାଲ୍ଲାନିକି ଗ୍ରାପନ୍ ମ୍ରାସ୍ତେଞ୍ଜି ।
4ଏ ଗ୍ରାପା ୱିହି କିଆନ୍ ସିମନନିକି ୱେସ୍ତେଞ୍ଜି, “ଡଙ୍ଗାତିଦି ଏଗେଲ୍ ଏଜୁ ମାନ୍ନି ଗର୍ରିଇନ୍ଦା ଅଆନାହି ମିନ୍ଙ୍ଗା ଆହ୍ପନ୍ ବାଗା ମି ଜାଲ ମେସ୍ଦୁ ।”
5 #
ଜହ ୨୧:୩
ଏମ୍ବାଟି ସିମନ ୱେସ୍ତେଞ୍ଜି, “ଏ ଗ୍ରାପାଗାଟାତି, ମାମୁ ଡାଡ଼ିଙ୍ଗ୍ ୱେଗି କାମା କିଆନାହି ଇନ୍ନା ପାଁଣ୍ଡାହେଃଲ୍ଲାମୁ, ମତ୍ର ନି କାତା ଆହାନ୍ ନାନୁ ତୁହ୍ପା ଜାଲ ମେସିଃଇ ।” 6#ଜହ ୨୧:୬ଆଟେ ଏୱାରି ଏଦା ମେସାନ୍ ଏଗେଲ୍ ମିନ୍ଙ୍ଗା ଆହ୍ତେରି, ଆଟେ ଏୱାର୍ତି ଜାଲ ପ୍ଡୁଙ୍ଗାୱିଅନ୍ ମ୍ରାସ୍ତେ । 7ଏମ୍ବାଟି ତା ଡ଼ାହି ତଡ଼ୁ କାମାଗାଟାରି ଏମ୍ୱେନାରି ବିହି ଡଙ୍ଗାତାୱା ମାଚ୍ଚେରି, ଏୱାର୍ତାୱାଟି ସାହାଜ୍ୟ ପାଁନ୍ବନ୍ ବାଗା ଏୱାରିକି ଆର୍ତେରି । ଏମ୍ବାଟି ଏୱାରି ୱାନାହି ରିଣ୍ଡା ଡଙ୍ଗାଙ୍ଗ୍ତାୱା ଇହିଙ୍ଗିସି ନେସ୍ତେରି ଜେ, ଏୱା ମୁଞ୍ଜିନ୍ ଲାକ୍କା ଆତୁ । 8ମତ୍ର ସିମନ ପିତର ଇଦା ହୁଡ଼ାନ୍ ଜିସୁତି କାଟ୍କା ନେତେ ବ୍ଡିଆନାହି ୱେସ୍ତେଞ୍ଜି, “ଏ ଦାର୍ମୁ, ନା ଟିଆଟି ହାଲ୍ମୁ, ଇନାକି ନାନୁ ରଃଅଞ୍ଜ୍ ପାପିଗାଟାନୁ ।”
9ଇନାକି ଏୱାରି ଏଗେଲ୍ ମିନ୍ଙ୍ଗା ଆହାଚ୍ଚେରି ଜେ, ଏଦା ହୁଡ଼ାନ୍ ଏୱାଞ୍ଜି ଅଟେ ତା ତଡ଼େଙ୍ଗ୍ ହାବେ ଆକ୍କାବାଡ଼ାଙ୍ଗ୍ ଆତେରି । 10ଆଟେ ଜେବଦିତି ରିଃଆରି ମ୍ରିକା ଜାକୁବ ଅଟେ ଜହନ, ଏମ୍ବେନାରିକି ସିମନ ଡ଼ାହି ଆଡ୍ଡାନ୍ ମାଚ୍ଚେରି, ଏୱାର୍ ୱାଡ଼େ ଏହେଙ୍ଗିସିନେଃଏ ଆକ୍କାବାଡ଼ାଙ୍ଗ୍ ଆତେରି । ଆଟେ ଜିସୁ ସିମନନିକି ୱେସ୍ତେଞ୍ଜି, “ଆଃଜ୍ଜାଟୁ, ନିଞ୍ଜୁତାୱାଟି ମିରୁ କୁଇଙ୍ଗ୍ନିକି ଆହ୍ଦେରି ।”
11ଏମ୍ବାଟି ଏୱାରି ଡଙ୍ଗାଙ୍ଗ୍ତିଦି ଗ୍ରିଆଇନ୍ଦା ତାଚ୍ଚାନ୍ ହାବେ ତୁହାନାହି ତା ବେତଟ୍ ହାଚ୍ଚେରି ।
ଜିସୁ ମୁଟ୍ଡାଙ୍ଗ୍ ରଗୁଗାଟାଞ୍ଜିକି ନେହି କିଅନ୍
(ମାତିଉ ୮:୧–୪; ମାର୍କ ୧:୪୦–୪୫)
12ରଲି ଜିସୁ ରଣ୍ଡା ଗାଡ଼ାନାଜୁତାୱା ମାଚ୍ଚି ତୁକାତାୱା, ହୁଡ଼ାଟୁ ରଃଅଞ୍ଜି ମୁଟ୍ଡାଙ୍ଗ୍ ରଗୁଗାଟାଞ୍ଜି ଏ ଗର୍ରିତାୱା ମାଚ୍ଚେଞ୍ଜି; ଏୱାଞ୍ଜି ଜିସୁନିକି ହୁଡ଼ାନ୍ କାଟ୍କା ନେତେ ବ୍ଡିଆନ୍ ଜିଗାନାହି ୱେସ୍ତେଞ୍ଜି, “ଏ ଦାର୍ମୁ, ନିନୁ ଜଦି ଇଚ୍ଚା କିଦି ଇଚ୍ଚେସି ନାଙ୍ଗେ ନେହି କିଅନ୍ ମୁତାଦି ।”
13ଏମ୍ବାଟି ଜିସୁ କାଜ୍ଜୁ କହାନ୍ ତାଙ୍ଗେ ଡିଗାନ୍ ୱେସ୍ତେଞ୍ଜି, “ନାନୁ ଇଚ୍ଚା କିମାଃଇ, ସୁଚି ଆମୁ ।” ଏଚିୱାଡ଼େ ଏୱାଞ୍ଜି ତା ମୁଟ୍ଡାଙ୍ଗ୍ ରଗୁଟି ନେହିଆତେଞ୍ଜି । 14ଆଟେ ଏୱାଞ୍ଜି ତାଙ୍ଗେ ଆଗ୍ୟାଁ ହିଆନ୍ ୱେସ୍ତେଞ୍ଜି, “ଇନ୍ଦାରିକି ୱେଃସାଆ, ମତ୍ର ହାଜ୍ଜାନ୍ ଜାଜକଙ୍ଗ୍ନିକି ନି ଗାଣ୍ଡି ତସ୍ମୁ, ଆଟେ ମସାତି ହାଜୁ ଡେହେଙ୍ଗ୍ ନି ନେହି ଆନ୍ନାଦାଃଆ ଏୱାର୍ ରେଃଏସ୍ ସାକ୍ୟ ହିଅନ୍ ବାଗାଟି ନଇବେଦ୍ୟ ଉଚ୍ଚର୍ଗ କିମୁ ।”
15ମତ୍ର ଜିସୁତି କାମା କୁଲାଟି ଗାପ୍ଚି ପ୍ରେଜିତେ, ଆଟେ ଗାପ୍ଚି ଦାଲ୍ଲା ୱେନ୍ବନ୍ ବାଗା ଅଟେ ତା ତା ରଗୁତାୱାଟି ନେହି ଆଅନ୍ ବାଗା ରପାଟ୍ଟେ ଆଅନ୍ ମ୍ରାସ୍ତେରି; 16ମତ୍ର ଏୱାଞ୍ଜି ଚିହ୍ପି ଗର୍ରିଙ୍ଗ୍ନାୱା ମାଞ୍ଜାନ୍ ପ୍ରାତ୍ନା କିଚ୍ଚେଞ୍ଜି ।
କେରିୱାଚ୍ଚା ରଗୁଗାଟାଞ୍ଜି ନେହି ଆଅନ୍
(ମାତିଉ ୯:୧–୮; ମାର୍କ ୨:୧–୧୨)
17ରନେସି ଜିସୁ ଗ୍ରାପେଚ୍ଚି ତୁକାତାୱା ଗାଲିଲିତି ହାବେତ୍ ନାସ୍କା ଅଟେ ଜିହୁଦା ରାଜିତି ଜିରୁସାଲମତାୱାଟି ୱାଚ୍ଚି ପାରୁସିଙ୍ଗ୍ ଅଟେ ମସାତି ହାଜୁ ଗ୍ରାପାଗାଟାରି ରେଃଏସ୍ କକ୍ଚାଚ୍ଚେରି । ଆଟେ ଏୱାଞ୍ଜି ଇନିମିଡି ନେହି କିନେଞ୍ଜି, ଏଦାବାଗା ଦାର୍ମୁତି ବଲ ତା ତାୱା ମାଚ୍ଚେ । 18ଆଟେ ହୁଡ଼ାଟୁ, ଏଚ୍ଚେ ଦାଲ୍ଲା ରଃଅଞ୍ଜି କେରିୱାଚ୍ଚା ରଗୁଗାଟି କୁଏଞ୍ଜିକି ଗାଡ୍ଡେଲ୍ତାୱା ଡେକାନ୍ ତାଚ୍ଚାନ୍ ଏୱାଞ୍ଜିକି ଇଡ୍ଡୁ ଲାଃଇ ଅନ୍ ବାଗା ଅଟେ ଜିସୁ ନକେସି ଇଟ୍ଟନ୍ ବାଗା ସେସ୍ଟା କିଚ୍ଚେରି । 19ମତ୍ର ଗାପ୍ଚି ଦାଲ୍ଲା ମାଚ୍ଚାୱିଃଆଟି ଏୱାଞ୍ଜିକି ଇଡ୍ଡୁ ଲାଃଇ ଅନ୍ତିକି ଗିଜ୍ଜୁ ପାଃନାତାୱାଟି ଏୱାରି ଇଡ୍ଡୁ କୁଃଏଟି ହାଜ୍ଜାନ୍ ଦଲାନ୍ କାର୍ଚାନ୍ ଗାଡ୍ଡେଲ୍ ଡ଼ାହି ଏୱାଞ୍ଜିକି ମାଦ୍ଦି ଗର୍ରିତାୱା ଜିସୁ ନକେସି ଜାପ୍ତେରି । 20ଏୱାଞ୍ଜି ଏୱାର୍ତି ମାଞ୍ଜାଡ଼ି ହୁଡ଼ାନାହି ୱେସ୍ତେଞ୍ଜି, “ଏ କୁଏଞ୍ଜାତି, ନି ପାପ ହାବେ ମାକ୍ସାଡ଼ି ଆନ୍ନେ ।”
21ଏମ୍ବାଟି ସାସ୍ତ୍ରିଙ୍ଗ୍ ଅଟେ ପାରୁସିଙ୍ଗ୍ ତା ତା ଲାଃଇ କାତାବାର୍ତା କିଆନ୍ ଇଦା ୱେସ୍ପନ୍ ମ୍ରାସ୍ତେରି, “ଇୱାଞ୍ଜି ଜେ ମୁଲାପେନୁନିକି ଅଡ୍ଡେନ୍ନେଞ୍ଜି, ଇୱାଞ୍ଜି ଏମ୍ବେନାଞ୍ଜି ? ୱାର୍ରି ମୁଲାପେନୁନିକି ପିହାନ୍ ଆଟେ ଏମ୍ୱେନାଞ୍ଜି ପାପ ମାକ୍ସାଡ଼ି କିଅନ୍ ମୁନେଞ୍ଜି ?”
22ମତ୍ର ଜିସୁ ଏୱାର୍ତି କାତା ଆହ୍ପି ଆଅନ୍ତାଦା ପୁଞ୍ଜାନାହି ଏୱାରିକି ୱେସ୍ତେଞ୍ଜି, “ମିରୁ ମି ମି ମନତାୱା ଇନ୍ନା କାତାବାର୍ତା ଆଇଞ୍ଜେରି ?” 23ନି ପାପ ହାବେ ମାକ୍ସାଡ଼ି ଆତେ ଇଞ୍ଜାନ୍ ୱେସ୍ପନ୍ କି ନିଙ୍ଗାନ୍ ତାକାମୁ ଇଞ୍ଜାନ୍ ୱେସ୍ପନ୍ ଇନ୍ନା ସହଜ ? 24ମତ୍ର ପୁର୍ତିତାୱା ପାପ ମାକ୍ସାଡ଼ି କିଅନ୍ ବାଗା କୁଏଞ୍ଜ୍ ମ୍ରିଃଏଞ୍ଜିକି ଜେ, ହକତ୍ ମାନ୍ନେ ଇଦା ଇନିସ୍କି ମିରୁ ପୁଞ୍ଜେରି ଏୱାଞ୍ଜି କେରିୱାଚ୍ଚା ରଗୁଗାଟାଞ୍ଜିକି ୱେସ୍ତେଞ୍ଜି, ନାନୁ ନିଙ୍ଗେ ୱେସ୍ପିଞ୍ଜା, “ନିଙ୍ଗାମୁ, ନି ଗାଡ୍ଡେଲ୍ ଆହାନ୍ ନି ଇଜ୍ଜା ହାଲ୍ମୁ ।”
25ଏମ୍ବାଟି ଏୱାଞ୍ଜି ଏଚିୱାଡ଼େ ଏୱାର୍ତି ନକେସି ନିଙ୍ଗାନ୍, ଇମ୍ୱିନ୍ ଗାଡ୍ଡେଲ୍ତାୱା ଏୱାଞ୍ଜି ହୁଞ୍ଜାଚ୍ଚେଞ୍ଜି, ଏଦା ଆହାନାହି ମୁଲାପେନୁତି ଗଉରବ କି କି ତା ଇଜ୍ଜା ହାଚ୍ଚେଞ୍ଜି । 26ଏମ୍ବାଟି ହାବେତାରି ଆଜ୍ଜାନାହି ମୁଲାପେନୁତି ଗାଡ଼ିହେରୁ କିଅନ୍ ମ୍ରାସ୍ତେରି ଆଟେ ଏଗେଲ୍ ଆଜ୍ଜାନାହି ୱେସ୍ତେରି, “ନିଞ୍ଜୁ ମାମୁ ଏଚ୍ଚେକ୍ ହୁଡ଼ାହେଃଲ୍ଲାନ୍ କାମା ହୁଡ଼ିତାମୁ ।”
ଜିସୁ ଲେବିନିକି ଆର୍ପନ୍
(ମାତିଉ ୯:୯–୧୩; ମାର୍କ ୨:୧୩–୧୭)
27ଏମ୍ବାଟି ଜିସୁ ହଚାନାହି ଲେବି ପାରୁତି ରଃଅଞ୍ଜି ସିସ୍ଟୁ ଅନ୍ତାଞ୍ଜିନିକି ସିସ୍ଟୁ ୱ୍ରିହ୍ପନ୍ତି ଗର୍ରିତାୱା କକ୍ଚାଚ୍ଚାଦାଃଆ ହୁଡ଼ାନ୍ ତାଙ୍ଗେ ୱେସ୍ତେଞ୍ଜି, “ନା ବେତଟ୍ ୱାମୁ ।” 28ଏମ୍ବାଟି ଏୱାଞ୍ଜ୍ ଟାକ୍କାଙ୍ଗ୍ ହାବେ ପିହାନାହି ନିଙ୍ଗାନ୍ ତା ବେତଟ୍ ହାଲ୍ବନ୍ ମ୍ରାସ୍ତେଞ୍ଜି ।
29ଆଟେ ଲେବି ତା ଇଜ୍ଜା ଜିସୁ ବାଗା ରଣ୍ଡା ବେର୍ ବୁଜି କିତେଞ୍ଜି, ଆଟେ ଏଗେଲ୍ ସିସ୍ଟୁଅନ୍ତାରି ଅଟେ ବିହି ବିହି ଦାଲ୍ଲା ଏୱାରି ଡ଼ାହି ତିନ୍ବନ୍ ବାଗାଟି କକ୍ତେରି । 30#ଲୁକ ୧୫:୧,୨ଏମ୍ବାଟି ପାରୁସିଙ୍ଗ୍ ଅଟେ ସାସ୍ତ୍ରିଙ୍ଗ୍ ଜିସୁତି ଗ୍ରାମ୍ୱାଗାଟାର୍ ବିରୁଦିଆଟି ହେଃଏସ୍ ଆନ୍ ୱେସ୍ପନ୍ ମ୍ରାସ୍ତେରି, “ମିରୁ ଇନାବାଗା ସିସ୍ଟୁଅନ୍ତାରି ଅଟେ ପାପିଗାଟି ଦାଲ୍ଲା ଡ଼ାହି ତିନ୍ବା ଉନ୍ବା କିଞ୍ଜେରି ?”
31ଜିସୁ ଏୱାରିକି ୱେସ୍ତେଞ୍ଜି, “ନେହାର୍ ବାଗା ଅସାଗାଟାଞ୍ଜିକି ଆବସକ ଆଃଏ, ମତ୍ର ରଗୁଗାଟାର୍ ବାଗା ଆବସକ । 32ନାନୁ ଦାର୍ମିକଗାଟାରିକି ଆରପନ୍ ବାଗା ୱାହେଃଲ୍ଲାନୁ, ମତ୍ର ଏଲୁୱ୍ଡେପିକିଆନ୍ ପାପିଗାଟାରିକି ଆର୍ପନ୍ ବାଗା ୱାମାଃଇ ।”
ୱାରାଆଞ୍ଜନ୍ତି କୁଲାଟି ୱେନ୍ବନ୍
(ମାତିଉ ୯:୧୪–୧୭; ମାର୍କ ୨:୧୮–୨୨)
33ତୁଲ୍ଲେ ଦାଲ୍ଲା ଜିସୁନିକି ୱେସ୍ତେରି, “ଜହନତି ଗ୍ରାମ୍ୱାଗାଟାରି ରଲିତିକି ରଲି ୱାରାଆଞ୍ଜେନ୍ନେରି ଅଟେ ପ୍ରାତ୍ନା କିନ୍ନେରି, ପାରୁସିଙ୍ଗ୍ତି ଗ୍ରାମ୍ୱାଗାଟାର୍ ୱାଡ଼େ ଏହେଙ୍ଗିସି କିନ୍ନେରି, ମତ୍ର ନି ଗ୍ରାମ୍ୱାଗାଟାରି ତିନ୍ବା ଉନ୍ବା କିନ୍ନେରି ।”
34ଏମ୍ବାଟି ଜିସୁ ଏୱାରିକି ୱେସ୍ତେଞ୍ଜି, “କୁଆଲୁ ତାପ୍କନ୍ତାରି ଡ଼ାହି ବିବା ଲାୱେଞ୍ଜି ମାନ୍ନି ତୁକାତାୱା ମିରୁ କି ଏୱାରିକି ହାକ୍କିଟି ମାନ୍ବି କିଅନ୍ ମୁଦେରି ? 35ମତ୍ର ଦିନା ୱାନେ; ଆଟେ ଏଚ୍ଚିକିଃଆ ଏୱାର୍ତାୱାଟି ବିବା ଲାୱେଞ୍ଜିକି ୱେଚାନ୍ ଅୱାଆନେ, ଏଚିତୁକାତାୱା ଏୱାରି ୱାରାଆଞ୍ଜିନେରି ।”
36ଆଟେ ଏୱାଞ୍ଜି ଏୱାରିକି ରଣ୍ଡା ତୁକାଙ୍ଗାତା ୱେସ୍ତେଞ୍ଜି, “ଏମ୍ବେନାଞ୍ଜି ପୁନି ଜିରାତି ଦାନ୍ଦା ଗେସାନାହି ପ୍ଡାଃଇ ଜିରାତାୱା ଆଃଟେଞ୍ଜି; ଆଟ୍ତେସି ଏ ପୁନି ଜିରାତିଦି ଗେସ୍ନେ, ଆଟେ ପୁନି ଜିରାତି ଦାନ୍ଦା ୱାଡ଼େ ପ୍ଡାଃଇ ଦାନ୍ଦା ଡ଼ାହି ଆଃଡ୍ଡେଏ । 37ଆଟେ ଏମ୍ୱେ ପୁନି ଅଙ୍ଗୁରନିରୁ ପ୍ଡାଃଇ ଟଡୁ କୁପାତାୱା ଇଟ୍ଟେରି; ଇଟ୍ଟିତେସି ପୁନି ଅଙ୍ଗୁରନିରୁ ଏ କୁପାତିଦି ଗେସ୍ନେ, ଆଟେ କୁପା ନାହେଡ୍ ଆନେ । 38ମତ୍ର ପୁନି ଅଙ୍ଗୁରନିରୁ ପୁନି କୁପାତାୱା ଇଟ୍ଟନ୍ ମାନ୍ନେ । 39ଆଟେ ଏମ୍ବେନାରି ପ୍ଡାଃଇ ଅଙ୍ଗୁରନିରୁ ଉଣ୍ଡାନ୍ ପୁନି ଅଙ୍ଗୁରନିରୁ ଉନ୍ବନ୍ତିକି ମନ କିଃଏରି, ଇନାକି ଏୱାଞ୍ଜି ୱେସ୍ନେଞ୍ଜି ପ୍ଡାଆନାଆ ତ ନେହାଆ ।”
Currently Selected:
ଲୁକ 5: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
