ଲୁକ 10
10
ଜିସୁ ମୁ କୁଡ଼ି ବାରାଗାଣ୍ଡିନିକି ପାଣ୍ଡନ୍
1ଏମ୍ୱାଟି ଦାର୍ମୁ ଆଟେ ମୁ କୁଡ଼ି ବାରାଗାଣ୍ଡିନିକି ଆଚି କିତେଞ୍ଜି ଅଟେ ତାନୁ ଇମ୍ୱି ଇମ୍ୱିନ୍ ଗାଡ଼ାନାସ୍କା ଅଟେ ଗର୍ରିଙ୍ଗ୍ଇନ୍ଦା ହାଲ୍ବନ୍ ମାଚ୍ଚେ, ଏ ଗର୍ରିଙ୍ଗ୍ଇନ୍ଦା ରି ରି ଗାଣ୍ଡି କିଆନ୍ ଏୱାରିକି ତା ନକେସି ପାଣ୍ଡିତେଞ୍ଜି । 2#ମାତି ୯:୩୭,୩୮ଆଟେ ଏୱାଞ୍ଜି ଏୱାରିକି ୱେସ୍ତେଞ୍ଜି, “ୱେହା ପାଃଏ ଗାପ୍ଚି, ମତ୍ର କାମା କିଅନ୍ତାରି କକ୍ଚି; ଏଦାକି କାମା କିଅନ୍ତାରିନିକି ତା ୱେହା ମେରାଇନ୍ଦା ପାଣ୍ଡନ୍ ବାଗାଟି ମେରାତି ସକାରେଏଞ୍ଜିକି ଜିଗାଟୁ ।” 3#ମାତି ୧୦:୧୬ମିରୁ ହାଜ୍ଜୁ; ହୁଡ଼ାଟୁ, କ୍ଡାଡିଙ୍ଗ୍ ମାଦ୍ଦେ ମେଁଣ୍ଡାଡଟିଙ୍ଗ୍ ଲାକ୍କାଟି ନାନୁ ମିଙ୍ଗେ ପାଣ୍ଡେଞ୍ଜା । 4ଲେବୁଙ୍ଗ୍ ଗାଞ୍ଜି କି ବେଗୁ କି ପାଣ୍ଡେଙ୍ଗ୍ ଅଃଆଟୁ, ଆଟେ ଗିଜ୍ଜୁତାୱା ଇନ୍ଦାରିକି ଜୁହାରି କିଃଆଟୁ । 5ଆଟେ ମିରୁ ଇମ୍ୱିନ୍ ଇଡ୍ଡୁତାୱା ହଡେରି, କାହେ ଏ ଇଜ୍ଜାତାରିନିକି ୱେସ୍ଦେରି, ଇ ଇଡ୍ଡୁତାୱା ଲତୁ ଆପାକାଦି । 6ଆଟେ ଏ ଗର୍ରିତାୱା ରଃଅଞ୍ଜି ଲତୁଗାଟି କୁଏଞ୍ଜି ମାନ୍ନେଞ୍ଜି ଇଚ୍ଚେସି ମି ଲତୁ ଏୱାଞ୍ଜ୍ତି କୁଃଏଟି ବାସାଆନେ; ଜଦି ଏୱାଞ୍ଜି ଲତୁ ପାଁନ୍ବନ୍ ବାଗା ଇଚ୍ଚା କିହେଃଲ୍ଲେଞ୍ଜି, ଇଚ୍ଚେସି ଏଦି ମି ପାଟ୍ଟି ୱ୍ଡେଚାନାହି ୱାନେ । 7#୧କ ୯:୧୪; ୧ତି ୫:୧୮ଆଟେ ଏୱାର୍ ପାଟ୍ଟି ଇନ୍ନା ମାନ୍ନୁ, ଏୱା ତିଞ୍ଜାଉଣ୍ତାନ୍ ଏ ଇଡ୍ଡୁତାୱା ମାଞ୍ଜୁ, ଇନାକି କାମା କିନ୍ନାରି ତା କୁଲି ପାଁନ୍ବନ୍ ଜୁଗ୍ୟ । ଇଟ୍କା କୁଚ୍ଚେ ହାଃଲ୍ଲାଟୁ । 8ଆଟେ ମିରୁ ଇମ୍ୱିନ୍ ବେର୍ ନାଜୁତାୱା ହଡେରି ଅଟେ ଦାଲ୍ଲା ମିଙ୍ଗେ ଗ୍ରହନ କିଞ୍ଜାନେରି, ଏଦିମ୍ୱା ମିଙ୍ଗେ ତିନ୍ବନ୍ ବାଗା ଇନ୍ନା ହିଆନେରି, ଏଦା ତିଞ୍ଜୁ, 9ଏ ଗର୍ରିତାୱା ମାନ୍ନି ରଗୁଗାଟାରିକି ନେହି କିଦୁ, ଆଟେ ଏୱାରିକି ୱେସ୍ଦୁ, ମୁଲାପେନୁତି ରାଜି ମି ଟାକ୍କେ ୱାତେ । 10#ପେରି ୧୩:୫୧ମତ୍ର ଇମ୍ୱିନ୍ ଗାଡ଼ାନାଜୁତାୱା ମିରୁ ହଡେରି ଅଟେ ଦାଲ୍ଲା ମିଙ୍ଗେ ଗ୍ରହନ କିହେଲ୍ଲାଦାଃଏରି, ଏମ୍ୱାତି ଆଟେଲ୍କାତାୱା ହଚାନାହି ୱେସ୍ଦୁ, 11#ମାତି ୧୦:୭–୧୪; ମାର୍କ ୬:୮–୧୧; ଲୁକ ୯:୩–୫ “ମା ପାନେଡ଼୍କାନାୱା ମାନ୍ନି ମି ନାଜୁତି ଦୁଲିତିଦି ମି ବିରୁଦିଆଟି ହାଡ଼୍ଚ୍ଚାନ୍ ହାଜ୍ଜିନ୍ନାମୁ; ମତ୍ର ମୁଲାପେନୁତି ରାଜି ଟାକ୍କେ ୱାତେ, ଇଦା ପୁଞ୍ଜାଞ୍ଜୁ ।” 12#ମାତି ୧୧:୨୪; ମାତି ୧୦:୧୫ନାନୁ ମିଙ୍ଗେ ୱେସ୍ପିଞ୍ଜା, ଏଚିୱେଲା ଏ ଗାଡ଼ାନାଜୁତି ଦଣ୍ଡ ସଦମତି ଦଣ୍ଡଟିଆଟି ଗାପ୍ଚି ଆନେ ।
ମାଞ୍ଜାଡ଼ି କିଃଆନାରିତି ଗାଡ଼ାନାଜୁ
(ମାତିଉ ୧୧:୨୦–୨୪)
13“ହାୟ, ଦଣ୍ଡ ପାଁନ୍ବନ୍ତି କରାଜିନ୍ ଗାଡ଼ାନାଜୁ, ହାୟ, ଦଣ୍ଡ ପାଁନ୍ବନ୍ତି ବେତ୍ସାଇଦା, ଇନାକି ମି ତାୱା ଇମ୍ୱିନ୍ ବଲତି କାମା କିୱାଆନ୍ନେ, ଏ ହାବେ କାମା ଜଦି ସର ଅଟେ ସିଦନତାୱା କିୱା ଆନ୍ନେମା, ଇଚ୍ଚେସି ଏମ୍ବାତି ଦାଲ୍ଲା କାହେଟେଃଏ ଅକ୍କାଙ୍ଗ୍ ମେଦ୍ଦାନାହି ନାଡ଼ିଗୁଣ୍ଡାତାୱା କକ୍ଚ୍ଚାନାହି ଏଲୁୱ୍ଡେପ୍ନେର୍ମା । 14ଆତେସ୍ୱାଡ଼େ ବିଚାର ତୁକାତାୱା ମି ଦଣ୍ଡ ତାୱାଟି ସର ଅଟେ ସିଦନତି ଦଣ୍ଡ ସହି ଆଅନ୍ ଆନେ । 15ଆଟେ ଏ କପର୍ନାହୁମ, ନିନୁ ଇନ୍ନା ସର୍ଗ ରାଜି ଟିକ୍ନା ନିଙ୍ଗିଦି ? ବାଃଏ, ନିନୁ ନାଡ଼ିକୁଟ୍ଟି ଟିକ୍ନା ଦଣ୍ଡ ପାଁନ୍ବନ୍ ବାଗା ହାଜ୍ଜି ।”
16 #
ମାତି ୧୦:୪୦; ମାର୍କ ୯:୩୭; ଲୁକ ୯:୪୮; ଜହ ୧୩:୨୦ ଜିସୁ ତା ଗ୍ରାମ୍ବାଗାଟାରିକି ୱେସ୍ତେଞ୍ଜି, “ଏମ୍ୱେନାଞ୍ଜି ମି କାତା ୱେଞ୍ଜିନ୍ନେଞ୍ଜି, ଏୱାଞ୍ଜି ନା କାତା ୱେଞ୍ଜିନ୍ନେଞ୍ଜି, ଆଟେ ଏମ୍ୱେନାଞ୍ଜି ମିଙ୍ଗେ ଗ୍ରହନ କିହେଲ୍ଲାଦାଃଏଞ୍ଜି, ଏୱାଞ୍ଜି ନାଙ୍ଗେ ଗ୍ରହନ କିହେଲ୍ଲାଦାଃଏଞ୍ଜି, ଆଟେ ଏମ୍ୱେନାଞ୍ଜି ନାଙ୍ଗେ ଗ୍ରହନ କିହେଲ୍ଲାଦାଃଏଞ୍ଜି, ଏୱାଞ୍ଜି ନାଙ୍ଗେ ପାଣ୍ଡାଞ୍ଜାନ୍ନି ଆବାନିକି ୱାଡ଼େ ଗ୍ରହନ କିହେଃଲ୍ଲେଞ୍ଜି ।”
ମୁ କୁଡ଼ି ବାରାଗାଣ୍ଡି ଗ୍ରାମ୍ବାଗାଟାର୍ ୱ୍ଡେଚାନ୍ ୱାତେରି
17ଏମ୍ବାଟି ଏ ମୁ କୁଡ଼ି ବାରାଗାଣ୍ଡି ଗ୍ରାମ୍ବାଗାଟାରି ରାହାଙ୍ଗ୍ ଡ଼ାହି ୱ୍ଡେଚାନ୍ ୱାନାହି ୱେସ୍ତେରି, “ଦାର୍ମୁ, ବୁତଙ୍ଗ୍ ୱାଡ଼େ ନି ପାରୁଟି ମା କାତା ମାନି ଆତୁ ।”
18ମତ୍ର ଜିସୁ ଏୱାରିକି ୱେସ୍ତେଞ୍ଜି, “ବିଜ୍ଜି ଲାକ୍କା ସର୍ଗଟି ସଇତାନନିକି ତ୍ରଙ୍ଗନ୍ତାଦା ନାନୁ ହୁଡ଼ିତେଃଏ । 19ହୁଡ଼ାଟୁ, ନାନୁ ମିଙ୍ଗେ ରାଚୁ ଅଟେ କାଚ୍ଚାଜାନା କୁଃଏଟି ତାକନ୍ ବାଗା ହକତ୍ ହିଆଞ୍ଜା, ଆଟେ ସତ୍ରୁତି ହାବେତ୍ ବଲ କୁଃଏଟି ୱାଡ଼େ ବେର୍ ବଲ ହିଆଞ୍ଜା, ଆଟେ ଇନ୍ନି କୁଲା ୱାଡ଼େ ମିଙ୍ଗେ ନାହେଡ୍ କିଆଦାଃଏ । 20ଡ଼ଃଆନ୍ ଡିଙ୍ଗାଙ୍ଗ୍ ମି କାତା ମାନି ଆଇନୁ ଇଞ୍ଜାନ୍ ରାହାଙ୍ଗ୍ ଆଃଆଟୁ, ମତ୍ର ମି ପାରୁ ସର୍ଗ ରାଜିତାୱା ୱ୍ରିଗାଆନ୍ନେ, ଏଦାବାଗା ରାହାଙ୍ଗ୍ ଆଦୁ ।”
ଜିସୁତି ରାହାଙ୍ଗ୍
(ମାତିଉ ୧୧:୨୫–୨୭; ୧୩:୧୬–୧୭)
21ଏଚିତୁକାତାୱା ଜିସୁ ପିର୍ନି ଡିଙ୍ଗା ଡ଼ାହି ରାହାଙ୍ଗ୍ଟିଆଟି ନେଞ୍ଜାନ୍ ୱେସ୍ତେଞ୍ଜି, “ଆବା, ସର୍ଗ ଅଟେ ପୁର୍ତିତି ଦାର୍ମୁ, ନିନୁ ଗ୍ୟାଁନିଗାଟାରି ଅଟେ ବୁଦ୍ଦି ମାନ୍ନି ଦାଲ୍ଲା ତାୱାଟି ଇ ହାବେତ୍ କୁଲା ଆଡ଼୍ଚ୍ଚାନ୍ ଇଟ୍ଟାନାହି ବଦାଙ୍ଗ୍ତି ଟାକ୍କେ ପକ୍ତି, ଏଦାବାଗା ନିଙ୍ଗେ ଜୁଙ୍ଗେଞ୍ଜା; ହାଁ, ଆବା, ଇନାକି ଇଦି ନି କାନ୍ନୁତାୱା ଗାପ୍ଚି ନେହାଦି ତଞ୍ଜିତେ ।
22 #
ଜହ ୩:୩୫;
ଜହ ୧୦:୧୫
ନା ଆବା ହାବେତ୍ କୁଲା ନାଙ୍ଗେ ସର୍ପି କିଆଞ୍ଜାନେଞ୍ଜି; ଆଟେ ମ୍ରିଃଏଞ୍ଜି ଏମ୍ୱେନାଞ୍ଜି, ଏଦା ଆବାନିକି ପିହାନ୍ ଏମ୍ୱେନାଞ୍ଜି ପୁଃନ୍ନେଞ୍ଜି, ଆଟେ ଆବା ଏମ୍ୱେନାଞ୍ଜି, ଏଦା ମ୍ରିଃଏଞ୍ଜିକି ପିହାନ୍ ଏମ୍ୱେନାଞ୍ଜି ପୁଃନ୍ନେଞ୍ଜି, ଆଟେ ମ୍ରିଃଏଞ୍ଜି ଇନ୍ଦାର୍ ରେଃଏସ୍ ଏୱାଞ୍ଜିକି ପପ୍କନ୍ ବାଗା ଇଚ୍ଚା କିନ୍ନେଞ୍ଜି, ଏୱାଞ୍ଜି ପୁନ୍ନେଞ୍ଜି ।
23ଆଟେ ଜିସୁ ତା ଗ୍ରାମ୍ୱାଗାଟାରିକି ମ୍ଲିଆନ୍ ୱେସ୍ତେଞ୍ଜି, ଏ ହାବେତ୍ କୁଲା ହୁଡ଼ାନ୍ନି ବାଗାଟି ମିରୁ ଦନ୍ୟ । 24ଇନାକି ନାନୁ ମିଙ୍ଗେ ୱେସ୍ପିଞ୍ଜା, ମିରୁ ଇନ୍ନା ଇନ୍ନା ହୁଡ଼େଞ୍ଜେରି, ଏୱା ହାବେ ଏଚ୍ଚେ ବାବବାଦିଙ୍ଗ୍ ଅଟେ ରାଜେଙ୍ଗ୍ ହୁଡ଼ନ୍ ବାଗା ମନ କିତେରି, ମତ୍ର ହୁଡ଼ନ୍ ମୁଃଆତେରି; ଆଟେ ମିରୁ ଇନ୍ନା ଇନ୍ନା ୱେଞ୍ଜିଞ୍ଜେରି, ଏ ହାବେ ଏୱାରି ୱେନ୍ବନ୍ ବାଗା ମନ କିତେରି, ମତ୍ର ୱେନ୍ବନ୍ ମୁଃଆତେରି ।”
ନିଗ୍ଗା ସମିରନ କୁଏଞ୍ଜ୍ତି ତୁକାଙ୍ଗାତା
25 #
ମାତି ୨୨:୩୫–୪୦; ମାର୍କ ୧୨:୨୮–୩୪ ଆଟେ ହୁଡ଼ାଟୁ, ରଃଅଞ୍ଜି ହାଜୁ ପୁତି ପୁନ୍ବନ୍ତାଞ୍ଜି ନିଙ୍ଗାନ୍ ଜିସୁନିକି ପରିକ୍ୟା କିଆନ୍ ୱେଚ୍ଚେଞ୍ଜି, “ଏ ଗ୍ରାପାଗାଟାତି, ଟାକ୍କିଡ଼ହ୍ନାତି ପରନ୍ ପାଁନ୍ବନ୍ ବାଗା ନାନୁ ଇନ୍ନା କିଃଇ ?”
26ଏମ୍ୱାଟି ଜିସୁ ଏୱାଞ୍ଜିକି ୱେସ୍ତେଞ୍ଜି, “ମସାତି ହାଜୁତାୱା ଇନ୍ନା ୱ୍ରିଗାଆନ୍ନେ ? ନିନୁ ଇନିମିଡି ପଡ଼ି ଆଇଞ୍ଜି ?”
27ଏୱାଞ୍ଜି ୱ୍ଡେପ୍ଚ୍ଚି ୱେସ୍ତେଞ୍ଜି, “ନିନୁ ନି ହାବେତ୍ ହଡାଙ୍ଗ୍, ହାବେତ୍ ପରନ୍, ହାବେତ୍ ବଲ ଅଟେ ହାବେତ୍ ମନ ହିଆନ୍ ଦାର୍ମୁ ନି ମୁଲାପେନୁନିକି ଜେଡା କିମୁ; ଆଟେ ନି ହଡ଼୍ଗି ଦାଲ୍ଲାନିକି ନି ଗାଣ୍ଡି ଡେହେଙ୍ଗ୍ ଜେଡା କିମୁ ।”
28ଏମ୍ୱାଟି ଏୱାଞ୍ଜି ଏୱାଞ୍ଜିକି ୱେସ୍ତେଞ୍ଜି, “ନିନୁ ଟିକ୍ ୱେସ୍ତାତି; ଇଦା କିମୁ, ଏହେଙ୍ଗ୍ ଆତେସି ନିନୁ ପରନ୍ ପାଁଣ୍ଡି ।”
29ମତ୍ର ଏୱାଞ୍ଜି ତା ଗାଣ୍ଡି ଦାର୍ମିକ ଇଞ୍ଜାନ୍ ତସ୍ପନ୍ ବାଗା ମନ କିଆନ୍ ଜିସୁନିକି ୱେଚ୍ଚେଞ୍ଜି, “ଏହେଙ୍ଗ୍ ଆତେସି ନା ହଡ଼୍ଗିନାରି ଏମ୍ୱେନାରି ?”
30ଜିସୁ ଏ କାତା ଆହାନ୍ ୱେସ୍ତେଞ୍ଜି, “ରଃଅଞ୍ଜି କୁଏଞ୍ଜି ଜିରୁସାଲମତାୱାଟି ଜିରିହଇନ୍ଦା ହାଜ୍ଜି ହାଜ୍ଜି ଟ୍ଡକେଙ୍ଗ୍ କାଜ୍ଜୁତାୱା ଦିତେଞ୍ଜି । ଏୱାରି ଏୱାଞ୍ଜ୍ତି ଅଙ୍ଗିଙ୍ଗ୍ ମିଞ୍ଜାନ୍ ଅତେରି ଅଟେ ହାତି ଡେହେଙ୍ଗ୍ ଚାହାନାହି ତୁହାନ୍ ହାଚ୍ଚେରି । 31ଏଚିତୁକାତାୱା ରଃଅଞ୍ଜି ଜାଜକ ଏ ପାହେର୍ ହିଆନ୍ ହାଜ୍ଜିଚ୍ଚେଞ୍ଜି, ଆଟେ ଏୱାଞ୍ଜି ଏୱାଞ୍ଜିକି ହୁଡ଼ାନାହି ରେମ୍ବାନ୍ ହାଚ୍ଚେଞ୍ଜି । 32ଏଚିଲାକ୍କା ରଃଅଞ୍ଜି ଲେବିୟ ୱାଡ଼େ ଏ ଗର୍ରିଇନ୍ଦା ୱାନ୍ ଏୱାଞ୍ଜିକି ହୁଡ଼ାନାହି ରେମ୍ବାନ୍ ହାଚ୍ଚେଞ୍ଜି । 33ମତ୍ର ରଃଅଞ୍ଜି ସମିରନତି କୁଏଞ୍ଜି ଏୱାଞ୍ଜିକି ହୁଡ଼ାନ୍ ତା ଟାକ୍କେ ହାଜ୍ଜାନ୍ ପାପୁଅଲ୍ଚାନ୍ ରାହାପାହା ଆତେଞ୍ଜି, 34ଅଟେ ରେଃଏସ୍ ହାଜ୍ଜାନ୍ ଏୱାଞ୍ଜ୍ତି ହାବେତ୍ ଗାଜାଙ୍ଗିଆ ନିଜ୍ଜୁ ଅଟେ ଅଙ୍ଗୁରନିରୁ ୱାକ୍ଚ୍ଚାନ୍ ଏୱା ହାବେ ଗାସାହିତେଞ୍ଜି, ଆଟେ ଏୱାଞ୍ଜିକି ତା ଗଦ କୁଃଏଟି କକ୍କି କିଆନ୍ ତାଙ୍ଗେ ରଣ୍ଡା ଜାମ୍ୱାଇଡ୍ଡୁଇନ୍ଦା ଅଆନ୍ ଆଙ୍ଗୁଲ୍ ଆତେଞ୍ଜି । 35ୱେଃଇତାୱା ଏୱାଞ୍ଜି ରିଣ୍ଡା ରୁପା ଟାକ୍କାଙ୍ଗ୍ ୱେଚାନାହି ଏ ଆଙ୍ଗୁଲ୍ ଆଇଚ୍ଚାଞ୍ଜିକି ହିଆନ୍ ୱେସ୍ତେଞ୍ଜି, ଇୱାଞ୍ଜିକି ଆଙ୍ଗୁଲ୍ ଆମୁ, ଆଟେ ଇନାୱାଡ଼େ ଏଗେଲ୍ କର୍ଚ କିଦି, ଏୱା ନାନୁ ୱ୍ଡେଚାନ୍ ୱାନି ତୁକାତାୱା ନିଙ୍ଗେ ହିଆ ।
36ଇ ମୁ ଗାଣ୍ଡିତାୱାଟି ଏମ୍ୱେନାଞ୍ଜି ଟ୍ଡକେଙ୍ଗ୍ କାଜ୍ଜୁତାୱା ଦିଆଚ୍ଚି କୁଏଞ୍ଜ୍ତି ହଡ଼୍ଗିନାଞ୍ଜି ଇଞ୍ଜାନ୍ ଏଲୁ କିଞ୍ଜି ?”
37ଏୱାଞ୍ଜି ୱେସ୍ତେଞ୍ଜି, “ଏମ୍ୱେନାଞ୍ଜି ଏୱାଞ୍ଜିକି ପାପୁଅଲ୍ତେଞ୍ଜି, ଏୱାଞ୍ଜି ।” ଜିସୁ ତାଙ୍ଗେ ୱେସ୍ତେଞ୍ଜି, “ହାଲ୍ମୁ, ନିନୁ ୱାଡ଼େ ଏଚିଲାକ୍କା କିମୁ ।”
ଜିସୁ ମାର୍ତା ଅଟେ ମରିୟମତି ଇଜ୍ଜା ହାଚ୍ଚେଞ୍ଜି
38 #
ଜହ ୧୧:୧
ଏୱାରି ପାହେରିଃଆ ହାଜ୍ଜିଚ୍ଚି ତୁକାତାୱା ଜିସୁ ରଣ୍ଡା ନାଜୁତାୱା ହଟେଞ୍ଜି ଅଟେ ମାର୍ତା ପାରୁଟି ରଣ୍ଡି ଆଚାଲୁ ତା ଇଜ୍ଜା ତାଙ୍ଗେ ଆଙ୍ଗୁଲ୍ ଆତେ । 39ମରିୟମ ପାରୁଟି ତା ଆଙ୍ଗି ମାଚ୍ଚେ, ଏଦି ଦାର୍ମୁତି କାଟ୍କା ନେତେ କକ୍ଚ୍ଚାନ୍ ଏୱାଞ୍ଜି ଗ୍ରାପେଚ୍ଚି କାତା ୱେଞ୍ଜିଚ୍ଚେ । 40ମତ୍ର ମାର୍ତା କାମାତାୱା ଏଗେଲ୍ ବ୍ୟସ୍ତ ଆଇଚ୍ଚେ; ଏଦାକି ଏଦି ଜିସୁ ରେଃଏସ୍ ହାଜ୍ଜାନ୍ ୱେସ୍ତେ, “ଏ ଦାର୍ମୁ, ନା ଆଙ୍ଗିନାଦି ୱାର୍ରି ନାଙ୍ଗେ କାମା କିୱିକିଞ୍ଜାନେ, ଏଦା ନିନୁ ପୁଞ୍ଜେହେଃଲ୍ଲାମା ? ଏଦାଡ଼ିକି ୱେସ୍ମୁ, ଏଦି ନାଙ୍ଗେ ସାହାଜ୍ୟ କିଆକାଦି ।”
41ମତ୍ର ଦାର୍ମୁ ଏଦାଡ଼ିକି ୱେସ୍ତେଞ୍ଜି, “ମାର୍ତା, ମାର୍ତା, ନିନୁ ଗାପ୍ଚି କାମା କୁଲାଟି ଏଲୁ କିଆନ୍ ବ୍ୟସ୍ତ ଆଇଞ୍ଜି । 42ମତ୍ର ୱାର୍ରି ର କୁଲାଟି ଆବସକ ମାନ୍ନେ; ମରିୟମ ଏ ନେହି କୁଲାତିଦି ଆଚି କିଆନ୍ନେ, ଏଦାଡ଼ିକି ଏମ୍ବାଟି ରେପନ୍ ଆଃଏ ।”
Currently Selected:
ଲୁକ 10: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
